Ka Nupepa Kuokoa, Volume XLI, Number 18, 1 May 1903 — Page 6
| This text was transcribed by: | Holly |
| This work is dedicated to: | For Kimmie |
Ka Nupepa Kuokoa
KE KILOHANA POOKELA NO KA LAHUI HAWAII.
NUPEPA KUOKOA, MEI 1 1903
AILAKIKAPU
Ka mea kulai i na hu’i o na Aa Lolo
He laau lapau hiki keia ke hoola i na ma’i apau, hui o na aaloo, eha o na lima ame na wawae o ke ano papalahu kekahi mamuli o ka nui o ke anu i hui me ka wa wela, na maeele o na aalolo o na u-ha, na umii a me ke nahu o ka opu a me na eha o waho o ke kino ame ko loko. He hikiwawe loa ka oluolu ame ke ola. Ola ke ano o ka laau kupono e malama ai ma na kauhale no na ma’i e hiki koke mai i ka manawa pokole. O ka malama ana i omole laau i kauhale ua oi aku ia mamua o ke kii ana i ke kauka o hookahi mile ka mamao.
“Mahope iho o ka noho ana i loko o na ehaeha a ka ma’i o na aalolo ame ka nalulu ikaika o ke poo he mau pule lehulehu i hala me ka loaa ole o kekahi oluolu, ua hopu koke aku wau i ka aila kikapu ma ke ano oia ka’u no ka manawa hope. Ua hamo koke iho la wau, a o ka loaa koke no ia ia’u ka maha ame ka oluolu, ka mea hoi a’u e hoolaio aku nei i ka poe i loaa a e loaa aku ana i na eha o na aalolo ame ka nalulu ikaika, e hoao i keia laau me ka hoohakaiia ole e like me ko’u hookaulua ana a hala kekahi manawa, aka e hoao i ike ai a lawa ka makemake.”- Na Mrs. F. E. Kelleher keia pane maluna ae e noho la ma ke alanui Richmond, Helu 290, St Paul, Minn.
“Ua hamo koke aku i ka aila Kikapu no ka eha nalulu o ke poo a o ka loaa koke no ia o ka oluolu i ka manawa pokole. No ka nalulu o ke poo ame ke anu ale au i ike i kekahi laau maikai e like me keia.” A o keia pane na Mrs. Kate Bowers o Nokomis, Ill.
25 KENETA KO KA OMOLE HOOKAHI A E LOAA MA NAALEKUAI LAAU APAU, A MA KAHI O HOBRON DRUG CO., Honolulu.
-----
NUHOU O KO NA AINA E
Mai ka Uwea Telegarapa mai.
MAKEMAKE O RUSIA E KAIHI IA MANAKURIA.
PEKINA, Aperila 23.- Ua waiho mai o Rusia i kekahi kauoha ia Kipa e haawi aku ia Mankuria nona, i na aole, aole oia e haalele ana.
YOKOHAMA, Aperila 23.- He ekolu mau mokukaua Iapana i hoounaia aku nei no Niusuana, Manakuria. Ua pioloke o Iapana no keia kumuhana o Rusia e pili ana no Manakuria, a e kokua no oia ina e ulu ae ana kekahi hakaka mawaena paha o Rusia ame Enelani, a i ole, me Amerika paha.
HAKAKA NA HOA.
SPRINGFIELD, Ilinoi, Aperila 23.- Ua ulu ae kekahi hoopaapaa ano nui ma keia la iloko o ka Hale o ka Ahaolelo, a ua hoolele puupuu ae kekahi mau hoa, a ua kauoha ae ka Lunahoomalu e hoopanee ka Aha a haalele i kona noho. Ua koho koke ia ae i Lunahoomalu no ka wa a ua hoomauia na hana. Ua ulu ae keia hakaka no na mea e pili ana i ka ona ia ana o na alahao e ke kulanakauhale.
HAKAKA KUE IUDAIO.
ST. PETERSBURG, Russia Aperila 23.- Ua ulu ae kekahi hoohaunaele kue Iudaio maanei i keia la, a he iwakalua kumamalima poe i make, a he nui ka poei i eha.
PAHU MA KA HALE AILA
MINEAPOLIA, Minesota, Aperila 23.- Ua pahu ae ka hale hana aila i kukuluia ma na palena pau o ke kulanakauhale nei a he umi-kumamakanhi kanaka i make, a he nui o na kanaka kana i eha kukonukonu loa.
HOAO NA IAPANA E KOLOHE.
VICTORIA, Aperila 24.- Ma ka mokuahi Emeperesa i ku mai nei , ua loaa mai kekahi lono ua hoano e ae kekahi poe wiliki Iapana ia lakou iho a kanu he nui o na mea pahu malalo o ke alahao o Rusia ma Manakurai.
Ke mau nei ko Rusia hoomakaukau ana no ke kaua.
KUEIA O MR. LUNA HOOMALU.
SPRINGFIELD, Ill., APerila 24.- Ua hooholo ka Hale i keia la i kekahi olelo hooholo i ko lakou hilinai ole i ka Lunahoomalu no kona hoao ana mamua aku nei e palaina-puna i na kipe e pili ana i na mana hoohana.
HOOKI NA PAKE HOLOI LOLE.
BUTTE, Aperila 24.- He ekolu haneri o na Pake holoi lole i hooki hana no ko lakou makemake e hoopila ae ko lakou aku.
NA KOA TUREKE.
LADANA, Aperila 24.- Ke hoakoakoa nei o Tureke i 240,000 kea mea Macedonia.
KIPAKUIA KA MISIONARI MOREMONA
BERELINA, Kelemania, Aperila 24.- Ua kauohaia ae e kipakuia na misonari Moremona.
KIAIIA O RUSIA.
Wasinetona, D. C., Aperila 24.- Ke kiai ia nei na luna o ke Keena Aupuni i ka noho ana o Rusia a Manakuria ame kona kulana ano hoohakaka no na mea e pili ana i keia kumuhana.
HOOLANAIA KE COLORADO.
PILIDELEPIA, Aperila 25.- Ua hoolanaia ma keia la ka mokukaua holo moana Colorado. E oi aku ana maiuna o $4,000,000 kona kumu hoolilo, a he 322 ana ka nui o kona mau kanaka.
PAA KE KEENA TELEGARAPA.
BUTTE, Montana, Aperila 25.- No ka hoooki ana o na elele i ka hana ana, ua paniku ae ka Hui Western Union Teleparaga i kona mau keena maanei.
KAUA ME NA POWA.
FRANFORD, Ky., Aperila 25.- Ua hakaka kekahi poe makai o ka mokuaina o Inidiana me eono powa ma keia la. Ua pakele na powa.
HOOHAUNAELE MAWAENA O NA ILI KEOKEO AME NA PAELE.
THEBES, Ilinoi, Aperila 26.- Ua ulu ae kekahi hakaka mawaena o na ili-keokeo ame na paele ma o ka Liia ana o kekahi negero a ua pepehiia he nui o kona mau kokua. Ma ke aumoe, ua pepehi kekahi negero a make loa kekahi haole, a ua hopuia oia e ka makai a hoopaaia i ka halepaahao. Mahope iho ua hiki aku la malaila kekahi poe ili-keokeo a hoohemo iaia a liia ae la.
I Ka lohe ana o kekahi poe negero e ae, ua hele mai lakou e hoao e hoopakele i ko lakou hoa, a ua hakakaia aku lakou ma na alanui, a no ia kumu aohe i holopono ka lakou hana. Ua hooauheeia na negero, a he nui ka poe i eha.
HOOHAUNAELE HOOMANA MA FARANI.
PARISA, Farani, Aperila 27.- He nui na haunaele kupilikii i ulu ae ma na apana kuaaina no ka hoaoia ana e hoomana aku i ke Kanawai Ahahui e kue ana i na kula malalo o na hoomana i hooko ole i ka manao o ua kanawai nei. Ua hopuia he nui o na moneka e noho nei ma ko lakou mau hale haipule i loaa ole ke kauoha mai ke aupuni mai, a eia ke konokono nei na enemi o ka ahakuhina o Combes i na kanaka e hoohaunaele i kumu e pioloke ai ka ahakuhina.
LOIHI AKU I KO SANA PETERO.
ROMA, Aperila 27.- I kulike ole ai me ka wanana e pili ana i na Pope aole loaa na makahiki o Sana Petero ma ka noho ana he poo no ka hoomana Katolika Roma, Ma ka la apopo e loaa ai he mau ia oi maluna aku o 25 makahiki o ka noho pope ana o ka Sana Ptero kaulana. Ke olelo nei he maikai ke ola o ka Pope, a ma ka nana aku e loaa ana no iaia ke ola loihi ana.
HOOLE O RUSIA.
ST. PETERSBURG, Aperila 27- Ua hoole mai ka luna aupuni o ke keena o na aina e aole o Rusia i kauoha e panikuia na awa o Manakuria mai ke komo ana aku o na waiwai o na aina e, a i ole, i ke komo ana aku o na kanaka o na aina e mai ia mahele mai. Aole no hoi o Rusia i makemake e kaihi i ka mana kukulu telegarapa ma Manakuria.
KA HOIKE A MILES.
WASINETONA, D. C., Aperila 27.- Maka Gernala Miles hoike e pili ana i ke kulana ma Pilipine, ua ikeia ae kekahi mau mea ano nui.
Ua hoike mai o Generala Miles ua kipakuia, hoehaehaia, a ua powaia na Pilipino e na koa Amerika me ka ike ana a na aliikoa Amerika.
HELE NUI NO KALEPONI.
KAPALAKIKO, Aperila 28.- No ka holopono o na hana hoolaha e pili ana no ka holomua o na haa o Kaleponi nei, ua komo mai ka Hikina mai he iwakalua-kumamaha tausani poe makemake e noho hookuonoono maanei iloko ae nei o umi pule.
HOOMAKAUKAU KAUA.
VICTORIA, Aperila 28.- Ke hoomakaukau like nei o Iapana ame Rusia no ke kaua ana o ke kuai nui nei laua i na mea kaua. Ua hiki ae ma Port Arthur he eiwa mau mokukaua Rukini.
EHA MOKUAHI HOU.
KAPALAKIKO, Aperila 28.- EIA o Peresidena Harriman o Seattle ma keia kulanakauhale, a ua olelo ae oia eia lakou ke hoao nei e hakahaka n o na hana kalepa o ka Hikina, a e loaa ana he eha mau mokuahi hou ia lakou.
KA HOOPAAPAA NO MANAKURIA.
ST. PETERSBURG, Rusia, Aperila 28- Ua hele aku ke Kuhina Kaua o Rusia no Manakuria.
Ua kauohaia aku e hanaia i iwakalua mokukaua lawe pu no ka holo ana ma ka muliwai Amua.
Ua olelo ae na luna aupuni Rukini ua makemake loa lakou e hooponopono me Amerika Huipuia no ka wehe ana i na awa o Manakuria no ke komo ana mai o na waiwai Amerika.
PEKINA, Kina, Aperila 28.- Ua haalele aku o Kina i ke kauoha a Rusia nana e hoomalu o Manakuria, a ua kakooia o Kina ma ka hoole ana a Iapana, Enelani ame Amerika Huipuia, na aupuni e kakoo ana iaia ina e ulu ae kekahi kaua.
Ua olelo ae ke Kuhina Rukini e noho nei ma Pekina o ke kue ana a keia mau Mana, he kumu ia e kaihi ai o Ruia i na maheleaina Manakuria a hookomo malalo o ka malu o ka Emepera o Rusia.
-----
Kokoke e Pau ka Hana ana.
HE UUKU WALE NO NA HANA I KOE.
E PAU NO NA MEA APAU INA E MALIE KEIA MAHINE AE.
Ma ka po o ka Poano nei i loheia mai ai ua loaa ka hohonu maikai mai ka nuku aku o ke Awa o Ewa a hiki i kahi hohonu o ke kai, a o ka hana wale no i koe, oia ka hookaawale ana ae i kekahi mau puu e moe nei ma ka papaku o ke auwaha. I keia manawa, he 200 kapuai ke akea o ke auwaha a he 20 kapuai ka hohonu, a ma kekahi mau wahi, he 20 apuai wale no a o keia na wahi e eli hou ia aku ana.
Ma ka hemo ana o ke awa o Ewa e loaa mai ana i keia Teritori he nui o na pomaikai. Ke kali nei ka Oihana Kaua Moana o Amerika a pau ae na hana e pili ana i ke awa, alaila, kukulu e i wahi hoolulu kumoku manawa. Ina e holopono na hana e komo mai ana no na moku o kela ame keia ano no ka hana hou ana malaila, a malia paha, e kukuluia ae ana kehaki wahi kapili moku i like ka maikai me ko na aina e.
-----
I Hookahi no Punahele e Pono ai.
KAUPALENAIA E KA PAPA OLA.
MAKA LA EKAHI O IULAI E HOEMIIA AI KA HELUNA O NA ILIO.
Ua piha paha he hookahi tausani poe ma’i e noho mai nei ma ke kahua ma’i ma Molokai, a ina e puunaueia ka heluna o na ilio e malamaia nei malaila i waena o keia heluna, e loaa no ka avelika o elima ilio a ke kanaka hookahi.
Ma ke kahua ma’i i keia mau la, ua nui ka noohalahala o na ma’i i ka lawa pono ole o ka haawina pai ai, a he makemake ko lakou e hoonuiia ae eia nae, o ka haawina e eaahiia nei i keia wa, mai mua mai no ia.
No keia hoohalahala, ua ulu mai ka manao i ka Luna Nui McVeigh e noii i ke kumu o ka lawa ole o keia haawina pai ai, a ma kona hana ana i keia mea, ua maopopo iho la iaia, o ke kumu, oia no ka hanai ana o na ma’i i na ilio a oi aku mamua o ka heluna kupono a lakou e malama ai me kekahi hapa o keia haawina ai.
I ka loaa ana o keia kumu, ua waiho mai oia i kekahi noi e pono e kaupalenaia ka heluna o na ilio ma ke kahua, a i mea hoi e kulike ai me keia noi i mea e pono ai ka poe ma’i, ua hooholo ka Papa Ola e pono e hanaia i rula e kaupalena ana i hookahi ilio a ke kanaka hookahi, a he hana hoi na ka luna nui o ka nana ana i ka hookoia keia rula. Aole no nae e mana koke ana keia mea a hiki i ka la ekahi o Iulai o keia makahiki.
-----
E Hoau ana i Kona Ike Pelepele.
Ma keia ahiahi Poakahi ae, ma ka halekeana Pake ma Alanui Lilihia, e malamaia ai kekahi hakaka pelepele mawaena o Poo Paoahi George W. Douglas o ka mokukaua Pelekane Amphitrite no ka papa kaumaha, i hiki mai nei mai Kapalakiko mai. Ua oleloia ae he mau kanaka akamai keia ma ka oihana hoolele puupuu, eia nae, aole laua i kok@ ko laua mau inoa maanei. Ma na moolelo hoi e loheia nei ma na uwapo kumoku, he kaeaea o Douglas, a i kona wa ma ke kahua hoolulu o na mokukaua ma Kina, aohe mea nana i pai kona poo. No Millet hoi, i hele mai nei oia i Honolulu nei no ka hakaka ana e Weday, a ua oleloia ae, ua ano kuha’u o Weday i ka hoopapa ana aku me ia. He kanaka kaulana o Millet ma Kapalakiko, a oia paha ko Weday mea i maka’u ai. kekahi no hoi, ua oi aku ko Millet kaumaha mamua o Weday.
He umi ka nui o na puni e hakakaia ana ma ia po He ekolu ka nui o na hakaka liilii mawaena o na sela Pelekani o na mikukauwa e ku nei ma ke awa.
Ka Puhi Opiuma ma ke Kulanakauhale.
Ma ka nupepa “Adavataisa” o ka Lapule nei i puka mai ai kekahi mea e pili ana i ka puhi opiuma ma Honolulu nei. Ma keia ua hoike ia ae he nui ka puka i loaa i na hui e kuai nei i ka opiuma. I ka wa i komo ai keia Teritori malalo o ke kanawai Amerika e pili ana i ka opiuma, ua komo nui mai ka opiuma, a ua weheia ae he nui o na hale puhi opiuma me ka maka’u ole i ke keakeaia mai e ka mana aupuni. Ke kuai nei kekahi hui Pake o Honolulu nei ma kahi o 5,000 paona opiuma avelika o ka mahina, a o ka puka makahiki, aia ma kahi o $12,000 a hiki aku i ka $15,000.
Ikeia wa, ke kuai hooliloia nei ka opiuma Hongkong, ka opiuma helu ekahi, no $5.60 o ke kini hookahi. Maluna o na tini hapa-paona aia ka puka ma kahi o $2 a hiki aku i ka $3.50.
Aia paha ma Honolulu nei i keia wa he 3,000 poe Pake e puhi nei i na la apua, a ua hiki i keia helua ke puhi he $750 opiuma o ka la hookahi, a no ka makahiki, he $273,750. No Honolulu wale nei no keia me ka helu pu ole ana i na kuaaina.
Hookahi hale opiuma ma Honolulu me eona moe ame ipukukui, ua hiki ke hoolilo he $600 opiuma o ka la hookahi.
-----
Na Kauka Huiki Niho Noeau,
hana pololei a hiki i keia manawa, a he haahaa ka auhau o ka huki ana. O ko laua no hoi ke keena kauka huki niho nui hookahi iloko o ka Paeaina Hawaii nei, a lawa pono no hoi me na lako oihana o ke ano hou loa a maikai no hoi.
He hukiia kou niho me ka eha ole a iloko no hoi o ka lawelawe noeau a maiau ana no hoi e hanaia ai, a o ia no hoi ka makou e ake nei. Aohe auhau no a nana ana. He wahine Hawaii ke kokua iloko o ke keena hana.
Keena hana ma Arlington Block, Helu 215, Alanui Hotele, ma o aku o Alanui Union.
-----
Eo i na Keiki Manuwa Pelekane
HOOKUKU PAANI PEKUPOPO MAWAENA O HONOLULU AME AMPHITRITE.
HAULE O HONOLULU, AME KA NUI HOOIKAIKA KA PAANI ANA.
Ma ka Poalima i hala aku nei la 24, i ulele ae ai na keiki Pelekane aukai o ka mokukaua Pelekane e ku mai nei i o kakou nei iloko o ke awakumoku o Kou nei “Amphitrite” me na keonimana o ke kulanakauhale o Honlulu nei iloko o ka paani pekupopo mawaho o ke kahua paani o Makiki.
Ma ka aoao o ka hui pekupopop o Honolulu nei ua wae ae lakou i ka poe makaukau loa ma keia ano paani o ke kulanakauhale, no ka paio ana aku i na keiki Pelekane o ka mokukaua i hai mua ia ae nei maloko o ua ano paani la o ke ano paani pekupopo a na Pelekane no nae.
I ka hookuku ana kela a hiki i ka panina o ka hana o ka la, ua lilo ae la ke eo i ua mau kamalii nei o ka moana a haule hoi o Honolulu i ka hopewaa. Hookahi helu a na keiki Pelekane a he ole ka na keiki o Honolulu, ka mea hoi i olelo mau ia ai he huakaka.
Elike me ka mea i hooholo like ia e malama i ka paani i ka hora elima p. m. o ka la i oleloia ae nei, pela i hoomaka ai na hana ia manawa, a imua o na maka o na makaikai i hiki ae ilaila aohe he hoohewahewa i ka ike ana i ka eleu maoli o na keiki o ke kai.
He eleu maoli ma ka peku ana i ka popopeku mamua a peku no mahope, hookahi mea ikeia o ka lele o ka popo i kahi i makemakeia ai ka popo e lele. Ke hala i ke peku a ka wawae aole e nele ka onoula e ke poo a i oe e ka umauma, a hookahi haawina o ia mau hana oia ka lele o ka popo i kahi i makemakeia. ole wale o keia aka o ka paaniia o ka popopeku mawaena o na wawae e kekahi ua kamalii Pelekane nei, a hoopahu’aia na keiki o Honolulu nei.
Aole o keia wale no ka mea i ikeia ma ka aoao o na Pelekane aka o ka mama i ka holo ame ka mikioi o ke kiina a he ku maoli no i ka ohohia o na hana.
Eia nae iloko o keia nui eleu aole i hope iho na keonimana o Honolulu nei he poe i wae ponoia mai, mai ka hapanui mai o na keiki paani ma keia ano paani oiai ua ikaika maoli lakou i ka paio ana ke kumu o ka loaa hou ole ana he helu hou aku na ua poe keiki nei o ke kai, eia nae aole i loaa iki he helu ia Honolulu a hala wale ka manawa paani i kaupalenaia.
Ua nui ka manawa i loaa ai ia Honolulu na haawaina o ka maikai e aneane ai e loaa ai ia lakou na helu, eia nae, ua hooneleia. Iloko o keia paani ana ua nui ka hooikaika ana o Honolulu ame na Pelekane no hoi a he elua mau mea popopeku i loaa i ka eha ma na lala, hookahi ma ka aoao o Honolulu a hookahi ma ka aoao o na keiki Pelekane.
I kinohi no ua loaa e aku la kekahi kanaka o ko Honolulu hui paani i ka eha ma kona wawae a ua lawa ia no ka pau loa ana o kona paani ana i ua ahiahila, a kokoke no hoi e pau ka manawa paani oia ka manawa i loaa mai ai kekahi o na keiki o ke kai, me he ea la i ke peku, apau loa no hoi ka hiki iaia ke paani hou aku.
Ma na ea apau ua maikai maoli no ka hookuku pekupopo ana.
-----
I Eha no ka Wali Pono Ole o ka Ai.
HOOLAIA E KA HUAALE AKALA A KAUKA WILLIAMS NO KA POE HAIKEA.
Maikai ke ola kino a ulaula maikai na papalina, a ma ka nana aku me he mea la aole o Miss Hele Rolling i loaa i kekahi mai kukonukonu, eia nae, aole pea. I ka hiki ana aku o kekahi mea kakau nupepa ma kona home, Helu 267 Alanui Wasinetona Hema, Columbus ohio, ua olelo mai oia:
“Elua ae nei makahiki i hala, ua loaa ia au i ka ma’i eha ma ka opu no ka wali pono ole o ka ai, a hiki pu mai me keia ka haalulu ame ka nalulu. Ua emi pu mai ko’u kino, haikea ano e mai ko’u helehelena, a aohe hoi he hiki ia’u ke hele no kahi loihi no ka pii mai o ka naenae a maluhiluhi hoi. Ua nui ko’u maka’u i keia kulana, ua haawi au ia’u iho malalo o ke kauka no ka lawe laau ana, eia nae, aohe he hiki i na kauka ke haawi mai ia’u he pono, a ua hoomaka iho la au e hele loa aku i ke ino. Aohe hiki i ko’u opu ke hoowali i na mea ai palupalu maikai, a ua lilo ae la ka ai ana he mea e hoopilikia mai ana ia’u. I keia wa ua nui ko’u maluhiluhi.
“O ka Huaale Akala a Kauka Williams no ka Poe haikea ka mea nana au i hoola. Ua heluhelu au i kekahi hoolaha e pili ana i na hana hoola a keia laau a ua hoomaka au e lawe. Ua kaa koke ia’u ka oluolu. Ua lawe mau au a hiki i ka loaa ana ia’u kou ano mau, a hiki hou ia’u ke ai me ka loaa ole i na ehaeha. Ua hoomaka mai au e oolea a no ka wa pokole ua loaa ia’u ke ola kino maikai.”
O ka loaa ana o ka pono ia Miss Roling ma ka lawe ana i ka Huaale Akala a Kauka Williams no ka Poe Haikea, he hookahi wale no ia i laweia ae mai loko ae o na tausani palapala hooiaio e waiho nei.
E ola no na ehaeha o ka opu i ka Huaale Akala a Kauka Williams, hoomaikai hou ana i na mea hoowali ai o ke kino, a hiki hoi ke hana hou e like me ke ano maa mau.
Ma ka heluna nui o na ma’i o keia ano, o na mea ai ano awaawa ame na mea ai palupalu ka mea nana e hoonawaliwali ka opu. O ka laau lapaau, aole he hiki ke hana i ka hana o ka opu, aka he mea kokuaia i ka hana ana a ka opu e like me kona ano mau! Ina e noiia mai e hoounaia aku no kekahi buke e hoakaka ana i ke ano o ka ai ana ma ke kakau ana i ka inoa malalo iho.
O ka Huaale Akala a Kauka Williams ke kuaiia nei he kanalima keneta o ke poho, eono poho no elua dala ame kanalima keneta, e loaa no ma na hale kuai laau lapaau apau, a ina aole, e hoouna ma ka leta ia Dr. Williams Medicine Company, Schenectady, N. Y. Aohe he kuai nui ma ka haneri. E makaala i ka mea hana hoohalike; aohe oe e la ia lakou.
-----
Ewalu Hora Hana o ka La
Ma keia hope aku he ewalu ana hora hana o ka la o na hana aupuni apau a o ka poe e hana nei a oi aku mamua o keia mau hora e hoemila mai ana. Ua kakauinoa o Kiaaina Dole i ka hila hana ma ka Poalima nei, a ua olelo mai na poo o na Keena aupuni e hooko aku ana lakou i keia kanawai.
I keia manawa, ke weheia nei na Keena i ka hora 8 o kaahiaka a hiki i ka hora 4 o ke ahiahi, me hookahi hora no ka ainaawakea. Malalo o ke kanawai hou e pakulia aku ana he hookahi hora holookoa, a malia paha weheia aku ana na keena a hiki i ka hora 5 o ke ahiahi.
Ma na hana alanui ae na uwapo ke hana nei na kanaka no 9 hora o ka la, a ma keia hope aku, e hoemiia mai ana i 8.
Eia maloko o keia kanawai kekahi pauku e olelo ana o ka poe e hana ana i na hana aupuni malalo o ka aelike. ua kau kela kanawai maluna o lakou, a o ka mea e kue ana i keia kanawai, e hoopa’iia no oia mai ka umi a hiki i hookahi haneri dala.
-----
MA KE KAUOHA
MA KE KAUOHA.
KEENA O KA PAPA OLA.
Honolulu, Hawaii, Aperila 21, 1903.
NA RULA AME NA HOOPONOPOON ANA NO NA MA’I LEPERA AME NA KOKUA E NOHO ANA MA KE KAHUA MA’I LEPERA MA MOLOKAI.
(Hoolahaia e like ai me ka Pauku 991 P.L. 1897)
NA ILIO
PAUKU 31. Aohe ma’i lepera a mea e ae e noho ana iloko o ke ahua Ma’i Lepera ma Molokai e loaa ke kuleana e malama ilio ai oi aku maluna o hookahi ilio.
A he hana ia na ka lunanui e nana ai i ka malama pono ia o ka manao o eia pauku.
Aole e lilo ka manao o keia puku i mea mana a hiki i ka la ekahi o Iulai, 1903.
Papa Ola.
Ma o kona Peresidena la.
CHAS. B. COOPER, M.D.,
Ikemakaia:
C. CHARLOCK,
Kakauolelo, Papa Ola,
Ma keia ke hoapono nei au i ka rula i hoike mua ia ae nei.
(Kakauionaia) SANFORD B. DOLE.
Kiaaina o ka Teritori of Hawaii
2960- Apr. 24.- Mei 1, 8.
-----
J. R. Mills
Notari a Luna Hooiaio Palapala Kanawai o na ano apau. He akahele a noeau ka lawelawe hana ana. Keena Hana ma Peral City, Manana, Ewa.
-----
O kou mau niho kou mau hoaloha maikai
O ka hoohemahema ia lakou oia kou ehaeha, e maeele ana iloko o ke kino, ka noonoo ame ke ano e o ka helehelena. Ina he manao kou no ka hana ia aku, e kipa mai i o makou nei no ke kuka pu ana me ka auhau ole. O na hana apau me ka maikai wale no e lawelaweia ai a eha ole no hoi, a nui no hoi ka poe i ike ia makou o ko Honolulu nei ame ko na mokupuni a lawa ko lakou makemake a na lakou e hoike no makou.
Na auhau no ka Hana ana.
Papa Niho Gula.....$5.00
Papa niho pono.....$5.00
Hoopiha me ka gula..... $1.00 a pii aku.
Hoopiha me ke dala..... 50 keneta.
New York Dental Parlors
Helu 1057, Alanui Papu mawaena o na Alanui Moi ame Hotele
Ma ko William Pa’i Kii ipuka no e komo ai a loaa ko makou keena.
-----
Ina He Makemake
-KOU I KA-
Lauoho Maikai
E HELUHELU I KEIA.
Malia paha ke pau nei kou lauoho I ka helelei, a koe kakaikahi. E kau i ka laau mamua o ka pau loa ana i ka helelei, e hana i laau e ulu hou ai. O ka laau
“Laau Hooulu Lauoho a Ayers”
ka mea e ulu hou ai. He nani ka lauoho ke ulu mai, a he nui hoi.
Ina he nawali ka ulu ana o kou lauoho, o ka
“Laau Hooulu Lauoho a Ayers”
ka mea e manoanoa ai ka ulu ana, a ke loaa i keia laau pau loa ka helelei ana. I na he piha kou poo ke Kepia, o ka
“Laau Hooulu Lauoho a Ayers”
ka laau e pau ai a maemae kou poo.
Ke loaa i keia laau e hoi hou ana ka
ulu ana o ou lauoho a like me ko
kou wa bebe.
Hoomakaukau ia e Kauka J. C. Ayer
& Company, Lowell, Mass., U. S. A.
E loaa no keia mau Huaale me ka
Hale Kuai Laau e Hollister, alanui Papu.