Ka Nupepa Kuokoa, Volume XLI, Number 14, 3 April 1903 — Page 6
| This text was transcribed by: | Rosemary Mccune |
| This work is dedicated to: | Faith Ako and family |
Ka Nupepa Kuokoa
KE KILOHANA POOKELA NO KA LAHUI HAWAII.
NUPEPA KUOKOA, APERILA 3. 1903.
============================
**********************************************************************
[the following ad spans two columns and is bordered on all sides]
O ka Hoopalaleha oia ka hoopiha ana i na Pa-Ilina me na Kino Make..........
O ka hoopalaleha ana i ka nana ana i na eha e loaa ana @ kela ame keia la, oia hoi na ano ma'i i maa mau, me ka noonoo ole no ua mau ehaeha la ua kau aku ke koikoi o ia hoopalaleha ana ua mau ehaeha la maluna o ka poe lawelawe oihana hoolewa kupapau, a o ka piha no hoi o n apa-ilina me na kino make. O ka lepopaa, ke nahu ikaika o ka opu, ka hiki ole i na puupaa ke hana eha mai o ke kua, ono ole mai ka ai, inoino ke koko, paa i ka huehue, o lepolepo mai ka helehelena, hia-a i ka po, ame ka lawa ole oka ikaika kino ame ka noonoo ikaika he mau mea wale no lakou apau i ulu mai mamuli o keia mau ehaeha liilii e loaa ai i kela ame keia la. O lakou na agena
e ulu mai ai ka ma'i e puka mai ai ke koko ino, ame ke kaa aku o na oihana hana o ke kino holookoa mawaho o ke ano mau, a oia no hoi ka nawaliwali o ke kino. O ka mea huna o ke oia maikai o ke kino oia no ka maemae o ke koko. O ke koko maikai he hoike ana mai ia he kanaka kino ikaika ia. O ke
Ka Mea Hoolelo ae i ke Koko
KIKAPU SAGWA,
[big, bold type]
Ua hanaia mai ka laau Kikapu mailoko mai o ka aa o na laau ulu, mai na ililaau, na nahele ame na pilali laau, ka laau lapaau hoi mai na mea maoli mai e hiki ai ke hoo i ae i na ma'i apau o ke akepaa, na puupaa, na ma'i o ka opu ame na ma'i o ka opu ame na ma'i
o ka puuwai. He laau hoomomona ia i ke koko a he hoomaemae no hoi, he hooikaika i na puupaa ame ke akepaa a hoihoi hou mai ia lakou i ko lakou kulana @u. Iloko o na pilikia o ka opu he ikaika ko keia laau e hooikaika ai i na hana o ka opu ma ka hoonui ae i ka wai a wale hoowali ai o ka opu, a he mana no hoi kona e hooponopono ai i na wahi e ae i pilikia o ka opu, a hooikaika hou i ka mana hoowali ai o ka opu. Ina eia oe ke hoehae haia nei e na eha, e loaa ana i kela ame keia la, o ka laau Kikapu Sagawa kou mea nana e hoola mailoko mai o ia mau pilikia. He kualia ka laau lapaau Kikapu Sagawa e ka poe kuai laau lapaau apau. Ina he kanalua kou e pili ana i kou ma'i alalia e kakau leka mai oe ia makou a na makou ia e wehewehe aku i kou pilikia me ka auhau ole. E kakau mai i ke keena oihana lapaau.
KIKAPOO INDIAN MEDICINE CO., NEW HAVEN, CONN.
Aia ma kahi o Hobron kahi e loaa ai.
****************************************************************
Manamanalima Pehu.
--
AME NA AU NUI O KA EHA MAMULI O KA RUMATIKA.
--
HE MA'I ANO IKAIKA LOA MA CANADA, N.H. A I OLA I NA HUAALE AKALA A KAUKA WILLIAMS NO KA POE HAIKEA.
--
"He mau makahiki i hala aku nei," wahi a Mrs. F. D. Rowe o Canada, N. H., "oia no hoi ka manawa a'u e noho ana iloko o ka ehaeha a ka ma'i rumatika. He elua makahiki i hala i loaa ai au i keia pilikia a na na huaale akala a Kauka Williams no ka poe haikea i haawi mai ia'u i ke ola hou. Mamua o ko'u ai ana i keia mau, huaale ua pehu ae la kuu mau manamanalima a nui maoli ka eha e hiki pono ole ai la'u ke hoomanawanui. Ua hoopilikia, pu mai keia ma'i la'u ma kuu opu, ke kumu i loaa ai i kuu opu ka hoowali kupono ole i ka ai huiia me ka lepopaa. O ka oihana aalolo keia o'u ua hohiaeha loa mai no hoi ia'u a lilo i mea hookaumaha mai la'u.
"Aia he manao iloko o ka nupepa a'u i ike ai a heluhelu, ke kumu o ka loaa ana ia'u o ka manao e hoao i na huaale akala a Kauka Williams no ka poe haikea, a ia kuu hooko io ana i ka poho mua ua loaa koke mai la ia'u ka oluolu a i ka pau ana o ua poho la a hoomaka, au i ka lua o na poho a i ka manawa i pau ai la poho ua maalo ae la na ano rumatika mai ia'u aku. A i ka pau ana o kekahi mau poho hou ua koi hou mai ka maikai me a'u a nalowale loa no hoi ka rumatika mai ia'u aku. Ua lawe pu no ka'u kane i keia mau huaale a loaa pu no iaia ka maikai."
O ke kumu maoli o ka ma'i rumatika eia no ka noho o ke ano akika iloko o ke koko ka mea hoi nana e hoanoe i ka olona e hoohui ana i ka io paahana ma ka iwi, e noho ai ke kanaka iloko o ka pilikia. O na Huaale Akala a Kauka Williams no ka Poe Haikea he laau hiki loa ia ke komo aku iloko o ke kumu o ka ma'i a ulaa mai a lilo i mea palupalu. He hiki oia ke holoi ae i na inoino apau a hoowaiwai ae i ke koko a o ke kumu no hoi keia i ike ia ai he laau keia i pili i kela ano ma'i.
Aole no hoi keia he laau i pili wale no i ka rumatika aka ua hiki ke hoola i ka ma'i locomotor ataxis, ano lolo, nalulu o ka poo, hiki ke hoopau i na ano maikai ole mahope iho o ka oluolu ana mai ka ma'i gripa mai, kapalili o ka puuwai, hohoma mai o ka helehelena ame na ano ma'i like ole o kane ame wahine.
He kualia na Huaale Akala a Kauka Williams no ka Poe Hiakea e ka poe kuai laau lapaau apau no ke 50 keneta no ke poho hookahi a he eono poho laau i ka $2.50. Aohe he kualia o keia ano laau ma ka huina nui a ma ka haneri. Ua hiki no ke kauoha aku a loaa mai, mai ka Dr. Williams Medicine Co., Schenctady, N. Y. ke kakau aku ma ka leka. Mai poina i ka lawe i ka mea maikai a waiho i ka helu malalo iho.
--------------------
Welo ka Hae Lenalena.
--
LOAA KEKAHI O NA KEIKI KOREA I KA MA'I VARIOLOID.
--
O-IA NA OHUA MAMUA O KA LELE ANA IUKA NEI.
--
I ka hiki ana mai o ka Mokuahi Gaelic mai Yokohama mai i ke awakea o ka Poakahi nei, ua ikeia aku e welo mai ana ka hae lenalena, ka hoailona ma'i. Ua manaoia ae he hepela paha ka ma'i oluna o ka moku.
I ka pili ana aku o ka waapa mahu o ke Kauka hoomalu ma ka aoao o ka mokuahi, ua oleloia mai oia e ke Kauka o ka moku ua loaaia kekahi wahi keiki uuku a kekahi poe Korea i holo mai no Honolulu nei i kekahi ano ma'i e like me ka hepela, he Varioloid ka inoa. Ua loaa ua wahi keiki nei i ka ma'i he mau la mahope o ko lakou haalele ana aku ia Yokohama.
I ka wa i maopopo ai i ke Kauka ua loaa kekahi mea i ka ma'i, ua hookaawale kokeia oia. Ma keia hanaia ana, aole i laha ae ua ma'i nei iwaena o na ohua. I ke ku ana o lakou ma Yokohama mai Kina mai, ua loaa no kekahi o keia poe Korea i ua ana mai nei, a ua puhi uahila ka moku, a hookuula mai mahope no nae o ko lakou hoomaluia ana malaila no elua la.
I ke ku ana mai maanei, aole i aeia e pili ka moku i ka uwapo. Ua makemake na ohua kapena a lele i kula nei, ua olelo aku no nae ke Kauka he hiki no ina nae lakou e ae ana e o mua ia. Ua ae lakou, a i ka auwina la, ua hooleleia mai lakou. Ua o ia no hoi na ohua oneki apau, a hooleleia i kahi hoomalu ma Kahakaaulana. E noho ana lakou malaila no umi-kumamalima la.
O ka leta, ua puhiia i ka uahi mamua o ka laweia ana aku i ka hale leta. I ka pau ana o ke puhi uahiia ana o ka moku holookoa, ua hoopiliia mai i ka uwapo.
--------------------
Ka Oeoe Haunaele me Pauahi.
--
IKE NA HOA AHAOLELO I NA HANA A NA MAKAI AME KA,
POE KINAIHI.
--
Ma ka hapalua i hala o ka hora eiwa o ka po Poaha o ka pule i hala, ua hoopuiwaia ke kulanakauhale hoolookoa nei me ke kani pinepine ana o ke oeoe pauahi. O ke kani mua, oia ka hoailona hoohnaunaele, elima kani ana. He kakaikahi ka poe i maopopo i ke ano o keia hoailona, i na makai no nae, o ke kulanakauhale nei, kekahi keia o na kahea weliweli, oia hoi, haunaele nui, a koikoi.
Aole i loihi iho, ua kani hou mai la ke oeoe hoailona pauahi, helu 35, ma ka uwapo Pakipika.
Eia nae, aohe he haunaele, a pauahi hoi o ia po. Ua hanaia keia ma mea i mea e hoikeike ai i ke komike makai o ka Ahaolelo i ka holopono ame ka makakau o na mea e pili ana i ka oihana makai ame ka oihana kinai ahi o ke kaona nei.
Ma ka hapalua hora eiwa, ua hiki aku o Lunahoomalu komike o ka Oihana Makai Kupihea ame ka Lunahoomalu o ka Hale Beckley i ke Keena o ke Kakauolelo o ka Halewai, a ia manawa o Makai Nui Brown i wili ae ai i ke kahea hoohaunaele. Ua kani koke ae la ke oeoe ma ka hale hana uwila. a ia manawa no i ikeia aku ai na makai e holo paukiki ana no ka halewai. Ua ala mai ka poe makai e hiamoe ana i kauhale, o kekahi poe o lakou, komo wale no i ke kamaa, lole wawae ame ka papale, aohe kakini ame ka palule.
I ko lakou wa i hiki aku ai ma ka halewai ua haawiia mai na pu ame na kaaepoka a ua hoounaia aku kekahi poe e kiai i na puka komo o ka halewai. Hookomoia na lio iloko o ke kaa, a ia manawa i komo mai ai na makai kau lio. Hoolakoia mai lakou me na pu a makaukau na mea apau o ka oihana makai no ka olelo kauoha.
Ia manawa komo mai o Hope Makai Nui Chillingworth me kekahi o na Makai Kiu. E homaka ana lakou e hopuhopu i kekahi poe pili waiwai i ka wa i kani ai ke oeoe, a i ko lakou lohe koke ana, ua holo koke lakou no ka halewai a haalele i ka lakou apana hana. Ua laina kokeia ae na makai, Haole, Hawaii, Pake, Kepani, Poko Riko, malalo o ke alakai ana a Makai Nui Brown ame Kapena Paka.
Ma ka nana ana a Lunahoomalu Beckley i ka manawa ma ka uwaki, he umi minute wale no ka loihi o ka manawa mai ke kani ana o ke oeoe a hiki i ka akoakoa ana o na makai apau. Ia manawa i hoounaia aku ai ke kaa makai e holo ma na pahu apau e hookani mai i ka lohe i ka halewai aia lakou me kahi a makemakeia ai.
I ka pau ana o keia mau hana hoikeike, ua haawi aku na hoa o ka Ahaolelo i ko lakou mahalo ia Makai Nui Brown no ka holopono o na hana o ka Oihana makai malalo o kana alakai ana.
Mai ka halewai aku, holo aku lakou no ka uwapo Pakipika, a ua wiliia ae ka pahu makai. I ka hala ana ae o na minute eha, ua hiki aku ka makai paikikala. Mai ilaila aku no, wiliia ke oeoe pauahi, a ua hiki aku ka poe kinai ahi ilaila iloko o ekolu minute ame kanaha kekona. Ua hoounaia aku ka lohe i na kaa o Palama ame Makiki, a iloko o elima minute, ua hiki laua ma kahi i makemakeia. Ma na ano apau, he makaukau ka mea i hoikeia mei e ka oihana Makai ame ka Oihana Kinalahi.
Ua hanaia keia mau mea me ka maopopo ole i na makai.
----------------------
Na ka Uwila i Lawe Mai.
--
IKEIA NAE LAUA I HONOLULU
--
Mai ka telegarapa mai, Kapalakiko, Maraki 28. - O.F. Gaylord ame Gertrude Maunder he mau mea i haalele io ianei a kau aku maluna o ka mokuahi Alameda he mau mea mahuka laua.
-
"Aole o'u nana i na mea e hoolahaia ana." wahi a Gaylord i pane aku ai i ka mea kakau nupepa namu Adavataisa i ka po o ka Poanono ino nei, Maraki 28. I ka manawa i hoikeia ae nei, oia ka manawa i hui ae ai na keonimana ame na lede o ka Moana Hotele ma Waikiki no ka hoohauoli ana ia lakou iho ma ka hulahula ana. A iloko o keia huina o Mr. Gaylord kekahi, ka mea kakau nupepa. I ka manawa i ku mai ai ka mokuahi Alameda i o kakou nei i keia mau ia, iho nei, i hoea mai ai o Mr. Gaylord i ukali pu ia mai e kekahi wahine uuku u'i, he mea oiaio he wahine u'i maoli i'o no oia, a i ka lele ana mai @uka o ka aina nei ua holo aku laua i ka Moana Hotele a aia laua ilaila kahi i noho ai ke kumu o ke komo ana lioko o kela anaina hulahula i ka po i hoikeia ae nei.
Ma ka manawa i holo mai ai laua ua hookomo aku o Mr. Gaylord ma ka papainoa moku i ka inoa o ka wahine uuku u'i ma ka inoa o Mrs. Gaylord.
"Aole i maopopo ia'u ina he kuleana ia no kekahi mea e kauhihi wale mai ai iloko o ke kuleana o kekahi ma na ano apau," wahi a Gaylord i pane mai ai i ka manawa i ninau poloeiia aku ai ina paha o laua na mea i mahuka mai nei mai Kapalakiko mai e like me ka mea i telegarapaia mai. "Ae, o ka wahine ma a'u i keia manawa o ka'u wahine mare no ia. A no ka manawa o maua i mare ai, ke manao nei au aole au i ike e kuleana he kuleana o kekahi mea ma ia kumuhana, no ka mea, aole au i ike he kuleana kekahi o kekahi mea i pili ilaila, koe wale no paha ka ohana o ka wahine."
Alaila noho iho la ua keonimana nei a noonoo no kekahi mau minuke. "Aia he wiliki e hoea mai ana ianei, e hookahi mahina mai keia manawa aku," wahi hou a ua keonimana nei i pane mai ai, a ia manawa e maopopo ai na mea apau. Aka, aohe o'u nana ia mea, oi loa ka hoike ae i kona inoa.
"Aohe au i manao e telegarapa aku ana kekahi nona paha kekahi wahi kuleana iki iloko o ko'u a ke manao nei au ua hoolahalu wale mai kekahi poe kamalii ia'u. Aohe o'u nana ia mea a aohe no a'u mea e olelo ai."
"No maua iho, e holo aku ana maua no Iapana, aka he mea pono ia'u e hiki aku i Kapalakiko iloko o ka mahina o Iune. He hele mau wau i ka akau i ke kau la a he kanaka eli lua lanahu no hoi wau. He dala no ka'u i lawa ke uku i na lilo apau a'u e hele ai. Aohe o'u maa i ka hoomahele ana ma ka ha'i ana i na mea e maopopo ia mai ai ka'u oihana."
O Gaylord ma ka nanaia aku aia ma kahi o na makahiki he kanaha a o ka wahine he opiopio loa oia. Wahi ana e noho loa iho ana laua i Honolulu nei a piha ka mahina alaila hoomaka ka huakai no Iapana.
-----
Nuhou o ko na Aina E
(Mai ka aoao i mai.)
-
KA MAKA MUA O KE KUIKAHI.
WASINETONA, Maraki 29. - Ma ka la apopo e hoomaka ai ka maka mua o na hana o ke Kuikahi Panailike mawaena o keia aupuni ame Kuba.
MAKE O SWIFT.
KIKAKO, Maraki, 29 - Ua make o G. F. Swift ka peresidena o ka hale hana kini bipi o
Swift & Co.
INO MA KA MOANA AKELANIKA.
SAVANA, Maraki 29 - He nui ka ino o keia mau la ma ka aekai Hema o ka Moana Atelanika. He nui o na kanaka lawaia i poino o keia Kulanakauhale.
HE KAKAUOLELO NO KALAKAUA.
SAN BERNADINO, CAL., - Maraki 30. - Ua make maanei i keia la o Kapena Ferdinand Cark, kekahi o na kakauolelo o ka Moi Kalakaua o Hawaii i kona wa e ola ana.
MAKANI IKAIKA MA KA AKELANIKA.
NEWPORT NEWS, Maraki 30. - Ke pa ikaika nei ka makani ma na aekai hema o ka Moana Akelanika. He ekolu mau moku kuna i poino a he nui na ola i poino. E maopopo no na mea apau e pili ana no ka ino ina e paa na uwea telegarapa i ka hana houia.
HELE MAKAIKAI NA ALII O PELEKANE.
LADANA, Maraki 30. - Ua haalele mai ka Moi ia Ladana nei no Potugala e ike i ka Moi Carlos, a o ka Moiwahine Alexandra hoi no Copenhagen i ike i ka ohana alii o Denemaka.
KA HAUNAELE MA MACEDONIA.
BELGRADE, Servia, Maraki 30. - Ke hakaka mau nei na koa Tureke ame na Macedonia. Ke hooikaika nei na kipi e nui ko lakou mau koa. He nui na popilikia i loaa ia lakou.
NL OLINA, La., Maraki 30. - Ke hoomaka nei ka waikahe e kahe ikaika maanei. He nui na wahi o ka pale wai i nahaha a ke hoomaka nei na kanaka e holo.
HAKAKA PELEPELE.
KAPALAKIKO, Kal., Maraki 31. - Ma keia po, ua pilkia o "Terry" McGovern i ka manawa elua ia. "Young" Corbett, ka loea pelepele o Denver.
Ua nui ka poe i hiki ae e ike i ka hakaka, a ua piha hoi ka Mechanic's Pavilion. He maikai ke kino o na mea hakaka i ke komo ana mai.
KA HAKAKA MA MACEDONIA.
SOFIA, Maraki 31. - Ke hoomaka mai nei e nui loa ka hoouka kaua ame ka haunaele ma Macedonia. Ua loaa mai ka lono i keia la ua hoouka kaua ia aku ke kauhale o Abaditchs e na Bashibazouks. Ua nui na popilikia i loaa aku i ka poe oho auhau mai na kanaka aku.
HOI HOU MA KA NOHO KALAUNU.
STOCKHOLM, Sweden, Marakai 31. - Ua hoi hou ae ka Moi Oscar e hookele i na aupuni o Sweden ame Norway i keia la. Ua pii loa ae ke ola maikai o ka Moi.
E HELE AND MA FARANI.
LADANA, Maraki 31. - Ua hooholo ka Moi Eluene i kona manao e hele e ike la Peresidena Loubert o Farani.
MA'I O KIAAINA TAFT.
WASINETONA, D. C., Maraki 31. - Ua ma'i loa ia o kiaaina Taft o Pilipine. Ke manaoia nei e waiho mai ana oia i kana oihana.
========================================
[this ad spans two columns and is bordered on all sides]
E hele i kahi o na kauka huki niho noeau, Helu 215 Alanui Hotele, ma o aku o ke
Alanui Uniona ma ke alo iho o Young Hale. Hemaikai na lawelawe hana ana a emi no hoi ka auhau. He maikai na mea hana o ke ano hou loa. Aohe auhau no ka noho ana, a he
wahine Hawaii ke kokua.
Hoopiha me ke Kala - - - 50 keneta NO PLATES
Hoopiha me ke Gula $1.00 a pii aku REQUIRED
Papa Niho Gula - - - - - - - -
Papa Niho Kala - - - - - - - - }$5 [artist rendering of lower denture]
Papa Niho Maoli - - - - - - -
Papa Niho piha pono - - - - - $ 5.00
Huki ana i ka Niho - - - - - - - - -50c
------------------------------------------
NA KAUKA HUKI NIHO NOEAU
W. E. Allen, D.D.S. F. L. Ferguson, D. D. S.
=================================================
KA WAIKAHE.
NU OLINA, Maraki 31. - Ke hoomaka mai nei i pii ino ka waikahe ma ka Muliwai Misisipi. Ua maluhiluhiia na kanaka e hana nei ma na palewai, a e pono e kokuaia keia poe ma ka haawi dala ana aku i mea e hoopauia ai ko lakou mau popilikia.
OHI DUTE NEKERO.
CHASLESTON, S.C., Maraki 31. - Ua hoomaka ma keia la o Dr. Crum i kana hana he mea Ohi Dute o ke Awa. E kukuluia ae ana paha kekahi hoopii e hoopau ae i kona noho ana ma ia oihana.
MOKU HEIHEI.
GLASCOW, Maraki 31. - Ua haalele inoia o Shamrock I e Shamrock III ma kekahi heihei i malamaia ma keia la. Ke olioli nei ka poe ike hana moku i ka holo o keia moku e heihei aku ai no ke kiaha Amerika.
HOOKI I KA HANA ANA.
NU IOKA Aperila 1. - Ke ahulau mai nei na hooki hana ana a puni ka aina, ua aneane paha e piha 50,000 o na kanaka hana e noho wale nei a he heluna hoi i oi aku i hiki ole ke loaa ka hana ma keia hooki hana ana.
HAUNAELE KA POE HANA PAPA.
UKIAH, Kal., Aperila 1. - Ua ulu ae kekahi haunaele maanei mawaena o ka poe uniona hana papa ame ka poe uniona ole. Ua lele hakaka aku ka poe uniona i na limahana e hana ana ma ko lakou wahi a he nui na poka i lele ae mawaena o lakou, a he ekolu mea e eha.
MAKE EONO MA KEKAHI ULIA.
PITTSBURG, Pa., Aperila 1. - He ulia poino i loaa ae maanei i keia la. Ma ke haki ana o kekahi mikini ma ka Pittsburgh Steel Works, eono kanaka i make a he umi hoi i eha, kukonukonu ioa ke eha o kekahi poe.
RUSIVELA NO KE KOMOHANA.
WASINETONA, D.C., Aperila 1. - Ma keia kakahiaka i hoomaka aku ai o Peresidena Rusivela ame kona mau hoa e hele no ke kaahelt ana i na Mokuaina o ke Komohana. Ua haalele aku kona kaa ia Peneselevania ma ka manawa, a he nui na kanaka i hele aku e haawi i ko lakou aloha iaia.
MALALO O KE KANAWAI KOA.
SANAA DOMINGO, Aperila 1. - No ka onene kaua, ua kukulaia ae ke kanawai kaua.
--------------------------------------------------
O KE KANAKA KINAI AHI, e alo ma ana oia i ka popilikia e loaa mai ana iaia mai na pohaku uwinihepa mai, na laau ame na kua hanee ame ka ula o ke ahi. Aole i makaukau pono kekahi keena kinai ahi ina aohe a lakou Laau Hamo Eha a Chamberlain, (Chambaerlain's
Pain Balm.) He maikai keia inau hamo no ka pau i ke ahi ame ka eha o na ano apau. E loaa no ka oluolu i ka hamo ekahi ana. E hoao. Benson, Smith & Co., Ltd., na Agena e kuai nei.
-------------------------------------------------
OLELO HOOLAHA.
-----
E malamaia ana he halawai o ka Aina Hui o Waimea, ma ka halehookolokolo o Waialua ma ka Poaona, Aperila la 4, M.H, 1903, ma ka hora 10 kakahiaka, ke kauoha ia nei na Lala apau o keia Hui, e hiki mai ma ia la no ka noonoo ana i na kumuhana ano nui.
Ma ke Kauoha o 2-3 iaia o ka Hui.
PETER UMI, Kakauolelo Kuikawa.
2956 - Mch., 27 - Apr. 3
==========================================================
Hoolaha Mana Hookolokolo
-----------------------------------
ILOKO O KA AHA HOOKOLOKOLO
Kaapuni o ka Apana Hookoloklo Kaapuni Elua o ka Teritory o Hawaii.
Ma ke Keena Hooponopono Waiwai Hooilina.
-----
Ma ka Hana o ka Waiwai o J. Kahakauwila i Make no Pauweia, Maui. Mea i make.
Ke Kauoha no ka Hoolaha o ka Hoolohe Palapala Noi no ka Hooia Palapala Kauoha.
-----
Aia he Palapala i hanaia ma ke ano he Palapala Kauoha a Palapala Hooilina Hope Loa a J.
Kahakauwila i make, a i waihoia mai iloko o ka Aha Hooponopono Waiwai Hooilina i oleloia ma ka la 11 o Maraki, 1903, a he Palapala Hooia kekahi no ka hooia ana i ua mea la, a no ka hoopuka ana i mau Leka Palapala Hooilina ia Auana, he mau mea i waihoia mai e Auana.
Ua Kauohaia o ka Poaha, la 7 o Mei, 1903, ma ka hora 10 a. m. o ka la i oleloia ma ke keena hookolokolo o keia aha hookolokolo ma Wailuku, Maui, oia ka manawa ame kahi e hooia ai i ka Palapala Kauoha i oleloia a e hooloheia, ai ka palapala noi i oleloia.
Hanaia ma Wailuku, Maui, Maraki 11, 1903.
Na ka Aha,
L. R. CROOK, Kakauolelo, (SILA)
2957 - APR. 3, 10, 17.
------------------------------------------------------------
ILOKO O KA AHA HOOKOLOKOLO
Kaapuni o ka Apana Hookolokolo Kaapuni Elua o ka Teritori o Hawaii.
Ma ke Keena Hooponopono Waiwai Hooilina. Iloko o ka Hana o ka Waiwai o P. Nauka i Make no Pelekunu, Molokai. Make Kauoha ole. Ke Kauoha no ka Hoolaha o ka Palapala noi Lunahooponopono Waiwai.
---
Ma ka heluhelu ia ana a waihoia ana mai o ka palapala noi a Hana Nauka, wahine kane-make a ka mea i make i ha'i la mai ai me ka pololei i ka make kauoha ole o P. Nauka o Pelekunu, Molokai, i Keawanui, Molokai, ma ka la 7 o Novemaba, A. D. 1901, a waiho iho he waiwai iloko o ka Paeaina Hawaii, he waiwai i kupono e noho hooponopono ia, a ke noi aku nei e hoopukaia mai i mau palapala hookuleana lunahooponopono waiwai no Makalei.
Ua kauohaia o ka Poana, la 7 o Mei, 1903, ma ka hora 10 a.m. o ka la i oleloia oia ka manawa i kohoia, a ma ia manawa e hooloheia ai ka palapala noi i oleloia ma ke keena hookolokolo o keia aha hookolokolo ma Wailuku, Maui, a ma ka manawa a ma kahi i oleloia no ka hoolohe ana i ua palapala noi nei e hiki ae ai a akoakoa ae ka poe apau i pili i keia mea a hoike mai i na kumu ina he mau hoohalahala kekahi oka hiki ole ke ae ia ka palapala noi i oleloia.
Hanaia ma Wailuku, Maui, Maraki 26, 1903.
JOHN W. KALUA, Lunakanawai o ka Aha Kaapuni o ka Apana Kaapuni Elua.
IKEMAKAIA, L. R. CROOK, Kakauolelo, (SILA)
2957 - Apr. 3, 10, 17.
--------------------------------------------------------------------
ILOKO O KA AHA HOOKOLOKOLO
Kaapuni o ka Apana Hookolokio Kaapuni Elua o ka Teritori o Hawaii.
Ma ke Keena Hooponopono Waiwai Hooilina.
---
Ma ka Hana o ka Waiwai o Leialoha Brown no Kalaupapa, Molokai. Keiki Oo-ole.
Kauoha e Hoike Kumu maluna o ka Palapala Noi o ke Kahu Malama Waiwai no ke Kuai Hoolilo Waiwai Paa.
---
Ma ka heluheluia ana mai ame ka waihoia ana mai o ka palapala noi a Kaehu Brown ke Kahu Malama o ke kino ame ka waiwai o Leialoha Brown he keiki oo-ole e noi ana i kauoha no ke kuai hoolilo aku i kekahi waiwai paa o ua keiki oo-ole nei i oleloia e hoike ana:
O keia mahele aina apau loa i hoakakaia iloko o ka palapala kuai a Hao i hana ai ia Leialoha Brown a i kopeia ma ka buke Aupuni helu 120, aoao 54 ame 55; a oia no hoi ka hapa o ka aina i haawiia ia Kanalua ma ka Palapala Sila Nui helu 3118, Kuleana helu 3457, nona hoi ka iliaina aneane 68-100 o ka Eka emi a oi iki, e waiho la ma Ohia, Waikapu, Maui; ame ka waiho ana mai i kekahi mau kumu ku i ke kanawai no ka hoolilo ana i ua waiwai paa nei.
Ma keia ke kauohaia nei o na hooilina apau ame na pilikoko pili i ua keiki oo-ole nei, ame ka poe apau i loaa ia lakou he kuleana iloko o ka waiwai paa i oleloia e hele mai imua o keia Aha Hookolokolo ma ka Poaha, ka la 7 o Mei, 1903, ma ka hora 10 a.m. ma ke Keena Hookolokolo o keia Aha Hookolokolo iloko o Wailuku, Maui, a malaila e hoike mai ai i ke kumu e ae olela ai ke kuai hoolilo ana i ua waiwai paa nei.
Hanaia ma Wailluku, Maui, Maraki 28, 1903.
JOHN W. KALUA, Lunakanawai o ka Aha Kaapuni o ka Apana Kapuni Elua.
IKEMAKAIA: L. R. CROOK, Kakauolelo, (SILA)
2957 - APR. 3, 10, 17, 24.
----------------------------------------
MA KE KAUOHA
-----------------------------------------
HOOLAHA AINA AUPUNI.
---
Ma a mahope aku o ka la 25 o Aperili, 1903, a ma ka hora 10 a.m. ma ke keena o J. Kaelemakule, Kailua, Kona Akau, Hawaii, e noi mai ai no ke Kuleana o ke Kuai Hoolimalima, e like, a malalo o na kahua o ke Kanawai Aina o ka Makahiki 1895.
Apana 1. iliaina 669 eka, ma Alika, Kona Hema, Hawaii, no $699.00.
Apana 2. iliaina 599 eka, ma Alika, Kona Hema, Hawaii, no $599.00.
Apana 3. iliaina 599 eka, ma Alika, Kona Hema, Hawaii, no 599.00.
Apana 4. iliaina 599 eka, ma Alika, Kona Hema, Hawaii, no 599.00.
Apana 5. iliaina 599 eka, ma Alika, Kona Hema, Hawaii, no 599.00.
No na mea aku i koe e hele ae ma ke keena o J. Kaelemakule, Kailua, Kona Akau, Hawaii, a i ole ma ke Keena Aina Aupuni, ma Honolulu.
EDWARD S. BOYD, Komikina Aina Aupuni.
Keena Aina Aupuni, Honolulu, Maraki 23, 1903.
2857 - Apr. 3, 10, 17th.
-------------------------------------
HE KAULEO HOOKAPU.
---
Ma keia ke papa hookapu loa ia aku nei na mea apau loa aole e oki, uhaki, pokepoke a i ole hoinoino wale i kekahi kumulaau, opu-nahelehele, mea kanu a mea ulu e ae e ulu ana maluna o kekahi aina aupuni, paka, pa-ilina a ululaau i kaa malalo o ka mana a hoomalu ana o ka Luna Nui o na Hana Hou.
E hoopilia no ka poe apau e komo hewa ana.
A ke noi ia aku nei na makua e hooaiai aku i keia hoolaha i ka lakou poe keiki, pili i keia hookapu.
HENRY E. COOPER, Luna Nui o na Hana Hou.
Keena o na Hana Hou, Honolulu, T. H. Maraki 24, 1903.
2956 - Mch. 27 - Apr. 3, 10.
----------------------------------------------
I NA NOTERI O KA LEHULEHU.
---
O na Komisina apau no na Noteri o ka Lehulehu, oia hoi na Luna Hooiaio Palapala, a puni ka Panalaau, i hoopukaia mamua aku o ka la 30 o Iune, M.H. 1900, ma keia ke kauohaia aku nei e hoihoiia mai, a e hoopukaia aku no na komisina hou ke noi ia mai pela.
LORRIN ANDREWS, Loio Kuhina, Panalaau o Hawaii.
Keena Loio Kuhina, Aperila 3, 1903.
Apr. 3, 10, 17.
-----------------------------------------
HOOLAHA HOOKO MORAKI
-----------------------------------------
HOOLAHA MANAO PANIKU A KUAI A KA MEA PAA MORAKI.
---
Ma keia ke haawiia aku nei ka hoolaha mamuli o ka mana kuai iloko o kekahi moraki i hanaia ma ka la 27 o Ianuari, 1902, i hanaia e J. S. Bailey, no Honolulu, Mokupuni o Oahu. Mea Moraki Mai ame Wilder & Co., Limited, he hui kuloko, ka Mea Paa Moraki, a i kopeia iloko o ke Keena Kakau Kope o ke Aupuni, ma Oahu, ma ka buke helu 280, aoao270 ame 272, ke manao nei ka Mea Paa Moraki e paniki i ka moraki i oleloia no na kumu uhaila, e hoike ana, o ka ulu ole@a ka ukupanee ame ke kumupaa @ manawa e uku ai.
Ke haawi pu ia aku nei no h@ hoolaha o ka waiwai apau i hoopa iloko o ua moraki la i oleloia e k@ kudala ia aku ana ma ke akea ma @ keena kudala o James F. Morgan o
Honolulu, Mokupuni o Oahu, ma @ Poaona, la 9 0 Mei, 1903 ma ka @ 12 awakea o ka la i oleloia.
O ka waiwai apau i hoopaaia ma@ o ka moraki i oleloia a e manaoia e kuai kudala aku e like me ia i @ mua ia ae nei, oia kela Palapala Hoolimalima o ka pa-hale e waiho la @ ka aoao mauka o ka Paumawai N@ ke Aupuni ma ke Alanui Alapai, @ o Honolulu i oleloia nona ka @ akahi-hapawalu (1/8) o ka eka, he @ i haawiia e ka Moiwahine kane-@ Kapiolani ia J. M. Vivas, ma ka la @ Okatoba, makahiki 1897, a i kopeia @ ke Keena Kakau Kope o ke Au@
iloko o Honolulu i oleloia, iloko o @ buke helu 185, aoao 206 ame 208 @ manawa o umi-kumamaha (14) m@ hiki mai ka la 6 mai o Okatoba @ mai, no ka uku makahiki hoolimalima o umi-kumumalua Dala ($12), a i @ wiia e J. M. Vivas i oleloia ia A @ Cooke, Kahu, no ka malama ana kekahi palapala i hanaia ma ka @ o Ianuari, 1899, a i kopeia maloko Keena Kakau Kope o ke Aupuni, o ka buke helu 185, aoao 206 ame a mai a A. F. Cooke aku ia J. S. H@ ka Mea Moraki Mai i oleloia ma k@ palapala i hanaia i ka la 30 o Novemaba, 1901, a i kopeia maloko Keena Kakau Kope o ke Aupuni o ka buke helu 228, ma ka aoao 422.
Ai he hale o elua hale ke k@ maluna o ua pa-hale la, i inisu@ Umikumamalima Haneri Dala ($@
Kuike a ma ke dala gula Amerika makemake.
Na lilo palapala apau ma ka a@ ka mea kuai mai.
No na mea aku i koe e ike a@ Mea Paa Moraki a i ole i kona @ loio Atkinson & Judd, Judd Bu@ Honolulu.
WILDER & CO., LIMITED. Mea Paa Moraki
Hanaia ma Honolulu. Maraki 31, @
2957 - Apr. 3, 10, 17, 24, - Mei 1.
--------------------------------------------------------
HOOLAA HOOKO MORAKI.
-------
MAMULI o kekahi mana kuai i h@ ke ia maloko o kekahi palapala moraki i hana i mawaena o John M. Vivas o Honolulu, Oahu o ka aoao m@ ame W. R. Castle, Malama Waiwai ka aoao elua, ma ka la 29 o Ianuari @ i kakau kope ia ma ka buke 174, aoao 388 i lilo i ka Hui Western and Hawaii Investment Company Limited, a @ muli o ka uhai ia ana o na kumu @ like o kela moraki, oia hoi ka uku @ ia o ka uku panee me ke kumupaa @ laila, ke hoolaha la aku nei e ka @ nona ka aoao elua o ua maraki nei, hooko ana oia la mana kuai.
A KE hoolaha hou ia aku nei @ mahope aku o na pule ekolu mai keia la aku, alaila, e hoolaha ia aku na aina i hoike ia ma ia moraki no ke kudala ana, ma ke keena kudala o James F. Morgan, ma Honolulu, ma ka la 4 o Aperila 1903, hora 12 o la la, ke ole @ uku ia ua moraki nei me na lilo mamua.
Aia ma kahi o W. R. KAKELA na olelo hoakaka no keia mea.
WESTERN AND HAWAIIAN INVESTMENT CO., LTD.
Hope o ka Mea Moraki Mai.
Penei na aina imoraki ia:
2 53-100 eka ma Kalihi, i hoikeia ma ka moraki, na apana 1 ame 3, sila nui 3500 ma ka Kui. (L.C.A.) 3172 ia Kouwiwi.
A ina aole e lawa ia aina no ka hoihnoi ana mai o na dala aie ma ka moraki me na lilo, alaila, e hoolilo aku na moraki me na @ota ia Vivas i hookomo pu ia ma keia moraki i mea e hoopaa hou ia ai ka uku ana mai oka a@ penei:
Moraki a Manuel Gouveia, Ian. 25, 1898, Buke 174, aoao 382.
Moraki a Maria de I. Sousa, Ian. 25, 1898, Buke 174 aoao 384.
Moraki a Antone Freitas, Ian. 25, 1898. Buke 174, aoao 385.
Moraki a J. de Freitas, Ian. 25, 1898, Buke 174,aoao 386.
2953- Mar. 6, 13, 20,27. - Apr. 3.
------------------------------------------------------------------------
Bro. Benjamin's Herbalo
[artist rendering of a gentleman
who is is possibly Amish,
Hasidic or Zorro]
HE MAIKAI NO!
E hoola noia oe - E noao. Ke kuai ia ne@e.
HOBRON DRUG CO.
Alanui Papu : : : : Honolulu, T.H.
-------------------------------------------------------------------
O kou mau niho kou mau hoaloha maikai
---
O ka hoohemahema ia lakou oia k@ ehaeha, e maeele ana iloko o ke kin@ ka noonoo ame ke ano e o ka helehelena. Ina he manao kou no ka hana @ aku, e kipa mai i o makou nei no k@ kuka pu ana me ka auhau ole. O na hana apau me ka maikai wale no e @ welawela ai a eha ole no hoi, a nui @ hoi ka poe i ike ia makou o ko Honolulu nei ame ko na mokupuni a lawa k@ lakou makemake a na lakou e hoike @ makou.
Na auhau no ka Hana ana.
Papa Niho Gula ......................$5@
Papa niho pono .......................$5@
Hoopiha me ka gula...$2.00 a pii ak@
Hoopiha me ke dala ...........50keneta
----
New York Dental Parlors
Helu 1657, Alanui Papu mawaena o na Alanui Moi ame Hotele.
--
Ma k@ William Pa'i Kii ipuka ao @ komo ai a loaa @ makou h@.