Ka Nupepa Kuokoa, Volume XLI, Number 7, 13 February 1903 — MEA HOU O HANA. [ARTICLE]

MEA HOU O HANA.

Ma ke ahiahi o ka la 25 o lanuari iho nei, ua hoomaka mai la ke ano inoino o na ao kaalelewa, a me ke ano ooloku o ka moana, a emoole, ua haule mai la na kulu-pakaua o Kulanihakoi, a me ka pa pukalaki ana mai hoi o ka makani. Ma ia po a hiki i ke ao ana aole i kuu iho ka pa ana o ka makani ame na kilihune ua e helelei ana. Ma ka la 27 ae, ua hooi loa ia ae ka inoino o ke kai i ko ka Poakahi, a e haki mai ana hoi ka nalu mai waho mai o ka lae o Nanualele a hiki iloko o ke awa, a ua hoohuiia hoi ke awa o Kauiki e ka nalu, a na ia kai i hoopae ae i ke kao lawe ukana o ka Hana Plantation a waiho ana i kaha-one. Ua hoomau mai keia ino pela a hiki wale i ka Poalima la 30, a mamuli o ka ino ua hoohalaia ka manawa ku mai o "Calaudina" no Hana nei; aka, ma ke ahiahi noenoe o ka la 29 ua ikeia aku la ua olali nei o Maui, e hooiho mai ana iloko o ke awa o Kauiki, oia no hoi na nalu e poi ana ame ka makani e onou mai ana mawaho pono mai o ka moana, aole i uku iho, ua nakeke mai la ka heleuma iloko o ke awa a e kupono ana no hoi i kona wahi maa mau e ku ai; a e haawiia na mahalo kiekie no Capt. Parker no kona wiwoole i ka hookomo ana mai i kona halelana me keia ino nui. I ka wa i komo mai ai ua Olali nei, ua piha ka uwapo i na kanaka, a e kali aku ana hoi o ka lele mai o na ohua, a ua makaukau hoi na poe o uka nei e kokua aku i ka poe ohua e hooleleia mai ana. Iloko o ka hapalua hora a oi ke kali ana o ko uka nei poe, aia hoi ua ikeia aku la kekahi waapaa e hoolana mai ana, a he wa kupilikii hoi ia, no ka mea, ke poi nei ka nalu i ka uwapo, aole hoi he wahi kupono no ka waapa e hoopili mai ai, koe wale no a malie kupono. O na ohua maluna o ka waapa e laweia mai nei, oia no ka mea hanohano W. P. Haia, Mr. Overnden ame kekahi malinihi haole ae. O ke keiki Hawaii, ua kala e no oia i kona mau mea kaumaha apau maluna iho ona, no ka mea, ua loaa iaia ka noonoo, i ka wa e hli ai ka waapa, alaila, e hoike ana oia i kona ike au e pae i ka aina; aka ua poho ia noonoo ana, no ka mea, ua eleu na keiki hoe waapa, a pili ana i ka wapo me ka maalahi, a i na hua no a kau i ka uwapo, ua iliki iho la kekahi mau nalu nui, aka, ua palekana nae. Ma ka Poalima ae, aole e hiki ke hoolei ia na ukana iuka o ka aina, nolaila, ua holo aku ke "Claudina" no na awa o Nuu ame Kipahulu - aole no i lele ko laila ukana, a ma ka Poaono ae la 31, ua huli hoi loa ae no ua "Calaudina" nei ma kona alahele pololei no Kahului me ke kipa ole mai i ke awa o Kauiki nei, aka, ua hala aku hoi ia mau la, a ke hoi mai nei ke ano malie. MOKU KALEPA. Ma ka la 1 o keia mahina, ua ikeia aku la kekahi moku e hooiho mai ana ua hele na pe'a a piha pono i ka makani, a i ka hookokoke ana mai, ua maopopo loa he moku Kalepa, a e hookomo mai ana hoi no ke awa o Kauiki. O keia no ka moku Kalepa i hoike mua ia mai e lawe mai ana he mau tausani kapuai papa no ka pa papa o ka Hana Store. Hauoli iho la na kanaka, loaa kahi hana o keia mau la nele, nana aku ana ia mua. KANAWAI KALANA. Ma ke ahiahi o ka la 31 o Ianuali, i noho iho ai ka halawai a ka aoao Repubalika o Hana nei no ka noonoo ana i ua Kanawai la, a ua akoakoa ae kekahi mau lala Hawaii, aole hoi he mau hoa haole i hiki ae, malia e kali ana no lakou a hiki mai ia wa, alaila, komo pu mai no ka hana. Ma ka noonoo ana i ua Kanawai la, ua loaa no na noonoo like ole - a ua kau nui ka noonoo ana maluna o na bona o na oihana apau, me na bona nunui wale no, a e hiki ai i ke kanaka Hawaii ke ike iho pehea ana la oia, aka, ma ka hoohuihui ana i na noonoo, ua mahalo ia ke Kanawai aka, me na hooponopono no nae. Mamuli hoi o ka bona e hiki ai i kekahi ke paa i ka hana i kona wa e kohoia ai a aole hoi e loaa ua hana la i ka mea i kohoia ke loaa ole ka hona, nolaila, ua a'o mai keia Kanawai i kekahi alanui e hiki ai ia kakou na kanaka Hawaii ke noho maluna o kekahi hana aupuni, oia hoi, he mea pono e hoopii ae i ko kakou mau auhau o na waiwai paa - i mea e hiki ai ia oe ke

noho bona aku no kekahi hoa Hawaii ou, a ina e hana kakou pela, alaila, o ka hookoia ana ia o ko kakou makemake, ke hooholoia keia kanawai Kalana. He mea pono no ke hele me ke akahele. Aole i kaheaia he halawai na ka lehulehu no keia kanawai, aka, he mea pono nae ke hana ia ia hana. Ke hooki nei au maanei ano kahi wa aku. Me ka mahalo, MEA KAKAU, Hana Feb. 3, 1903.