Ka Nupepa Kuokoa, Volume XLI, Number 5, 30 January 1903 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

4          NUPEPA KUOKOA, IANUARI 30, 1903

 

ana me ka ekemu ole no nae.  Ua ike aku la lakou he wahi uwiuwiki malamalama uuku ka mea hoi i hoike mai ia lakou nei o kahi la i makemakeia.

            "He hana ano nui keia i hiki mai la e hui me ke poo o na moneka mai ka mea Kiekie mai ka Moiwahine Ietiwa, wahi a Kuinoka i pane aku ai me ka leo o ke ano ikaika, a i oleloia ma ka olelo o ka aina.  Aia he wahi puka uuku mawaho ae o ka pani-puka nui a malaila e ku ana kekahi wahi moneka me ke kukui hele po ma kona lima, kauoha mai ia ia lakou nei e komo.

            "E kali oe ia'u maanei e ke Kapena," wahi a ka pane a kekahi koa loihi, kino pilalahi maikai, me kona huli i kahi e mai ka malamalama aku o ke kukui.  Ia manawa koke no ua noho aku la o Lore maloko o ke panipuka o ke ano paahao no.  Ua alakai aku la kahi moneka no kahi e hui aku ai me ke poo.

            "O keia ka manawa o'u e haawi aku ai i ko'u aloha hope loa," wahi a Lore i hawanawana aku ai.

            "Aole e hiki ia'u ke aloha aku ia oe pela.  Ua like no ia me ka i ana, o keia ka hopena o ko kaua hui ana.  Aole e aloha no ka wa hope aka no keia manawa a hui hou aku no kaua," wahi a ka wahine opio i hawanawana aku ai.

            "Ae, he mea pono e hui hou kaua.  E hoolohe ana wau i kau mau kauoha aka, e hoi hou mai no wau i ka manawa e hiki ole ai ia'u ke noho hou aku.  O hoi i ka halealii, a e kau aku i na maka i ka la e ike ai oe ia'u e kukuli ana ma kou mau wawa.  E hiki i'o mai ana ia la me ka hakalia ole.  Pehea kou hoi ana aku a komo iloko o ka halealii me ka loaa ole o kekahi hoohuoiia?"

            "He kamalii anei au i kau manao?  Iloko wale no o ekolu hora e moe aku ai au ma ko'u wahi moe, a he hookahi wale no mea iloko o ka paalii i loaa ka ike i kela hele ana o'u.  Eia ae na moneka."  Ua hele mai ia lakou a ku iho la mamua o kekahi pani puka.  "E ku oe maanei a e hele ae au e ike i ke poo o na moneka," wahi a ka wahine.  A hala he umi minute, me he la he manawa loihi loa ia ia Lore alaila, ua hoi hou mai la ke Aliiwahine.

            "E lawe aku ana oia ia oe i kou lumi," wahi a Ietiwa me ka hooikaika ana e hookuoo.

            "Me ke aloha nui ia oe-.  E hoomanao i kuu aloha aia me oe," i hawanawana aku ai o Lore.

            "I kekahi ia e hiki aku ai au?" i hawanawana hou aku ai o Lore iaia e pau ana i kona lima.

            a ole e hiki iaia nei ke pane aku, nolaila ua haawi mai oia i kona ae ma ke kunou ana.

 

MOKUNA XX.

ULUAOA KE KULANAKAUHALE

 

            "Ua mahuka ka paahao, ke kanaka Amerika," wahi a ka pane a na mea apau o ke kulanakauhale i ke ao ana ae i kekahi ia ae.

            O keia mea hou i puka ae ai i ke kulanakauhale ua komo aku no ka olu o ka manao i ka lehulehu, eia nae, ua puiwa loa lakou i ka loaa ana o ke alanui i hemo ai oia mai na lima aku o na makai.  Mamua aku a hiki wale no i ka manawa i mahuka aku la o ke kanaka Amerika aole he mea i hoao a mahuka a lanakila.  Ma keia hoi, ka makamua loa o ka loaa ana o kekahi o ia ano, a ma ka nana aku i ka manao o ka lehulehu aole he ulu mai o na manao hoahewa i ka makainui no kana malama hemahema ana.

            Ua loaa pu ae no keia manao maka'u i ka loaa hou aku no o ua paahao nei, a o kekahi iloko iho no o lakou, e iini nui ana no kona loaa ole aku a e pakele loa aku.  Eia nae, ke houluuiu ia lakou apau aole he mea hiki ke hooaiai ae i kahi i holo ai o ka mahuka.   Mai ke kakahiaka a hiki i ke awakea ka wawa mau o keia, me he moolelo la ke kumu o ka lohe ia ma na wahi apau o ka aina, a ua lilo no hoi he mea nui loa.  He wiwoole aku a wiwoole, mai ka mea e puka ana mai ka waha mai o ka lehulehu.  Aole no e nele ka hiki o ka hana i'o ia oia ano hana, no ka mea, he poe hookalakupua no ka poe Amerika.

            I ke kakahiakanui okoa no, ua hele aku la ka makainui i ka lumi paahao o Lore i noho ai, a mawaho o ka holo, ua lohe aku la oia i ka u-na leo o ka ehaeha mailoko mai o ua lumi nei, a i ka wehe ana aku o ka makainui ua ike aku la oia i ke kiai ua nakiikiiia me na kahanahana lole a okiola no hoi i ke koko a e mokaki ana ka lole o ke kanaka lawehala i holo ma-lu a o ka lole o ke kiai aole iluna o kona kino.  Ma ka nana aku i ke kiai me he la e make aku ana, no ka mea, ua pau ka hapanui o ke koko, aka, mahope iho o ka hooponopono ana iaia ua loaa iki ae la ka maikai a i ke ahiahi ana iho, ua hiki iho la iaia ke kamailio.

            Ma ia manawa i hoike mai ai oia i na mea i hanaia i ka po iho, oia kona hele ana malaila no ka makaala no, a mawaho o ka lumi o ke kanaka paahao Amerika, ua lohe aku la oia i ka nunulu leo o ka ehaeha ke kumu i loaa ai iaia ka manao ua loaa ia paha ka lawehala i ka eha a ma'i paha a no ia kumu, ua wehe ae la oia i ka puka o ka lumi i ike aku oia a maopopo ka pilikia.  I ka nana i'o aku no o ke kiai he nanaina kona o ka ehaeha, pela hoi i hu ae ai kona aloha nona ke kumu i ulu ae ai ka noonoo e komo aku e kokua iaia a ma kona (lawehala) ui ana mai i ke kiai e komo aku e kokua iaia, pela, oia i hooko aku ai, a i ka manawa ona i komo pono loa aku ai iloko o ka lumi oia no ka manawa i lele mai ai ua paahao nei a ki-mo mai la iaia me kekahi mea eha ana i huna ai mahope ona, a o ka pau ae la no ia o kona ike.  Aole ola i ike i na mea i hanaia mahope iho.

            Ma ka manawa a ka makainui i wehe ai i ka puka ua weheia me ke ki nou, oiai, ua lilo aku ka hoihoi ki a ke kiai, ke kumu hoi i hemo ai o ke pani-puke ia Lore.  Ma ka aoao o ke kiai ua hoike aku oia i kona ano kaumaha maoli ma ka olelo ana i ka makainui e ki iaia i ka pu a make, aka, aole i nana aku ka makainui ia mau olelo, no ia mea, ua laweia aku oia i ka haieme'i no ka lapaaua ana.  Ua hoike ao kekahi mau kiai ekolu i ko lakou ike ana i kekahi i iho mai ai mai ka aleo mai mahope koke iho o ka hora umi-kumamalua, ua manao nae lakou kekahi o na kiai.  Ua hoike ae no ka makainui i kona hoomaopopo ana i kekahi mea e hele ana ma kahi o ka hora umi-kumamalua a ua manao wale ae no oia, kekahi o na kiai.  I ka manawa i oia apopo ai keia mau mea ua pii ae la ka huhu o ka makainui, a hoouna koke ia aku la na makai apau e huli kuke i ke kanaka paahao a hiki wale i ka po ana aole ho wahi mea a lohe ia nona.

            Ma ka aoao hoi o Hale Anagusi ua nui ino loa kona puiwa, no ia mea ua hele koke aku la oia i ka makainui me ka nana ole ae ina paha e ae ia mai ana oia a aole paha.  Eia nae, i ka manawa ona i hiki aku ai ua weheia mai no ka puka nona, a mahope o ka lohe ana i na mea apau, oia hoi ka ike a ke kiai i hoopoinoia ua kaha loa aku ia no kana huakai i ka paalii, a i ka manawa ana i hiki aku ai ua piha ua wahi ia i na kanaka, a iloko o ia huina na hoaloha o ke Keikialii o ka
Akau.  Ua loaa ka ike i na mea apau aole he aeia o kekahi mea e komo iloko o ka paalii aka i ko ia nei hele ana, ua weheia ae la ka puka nona.  Ma ko ianei-alahele ua lele oi wale mai ia no kekahi kanaka o ka Akau e hoopaapaaia Hale Anagusi mamuli o ka manao i loaa ia lakou, na ianei i hoomahuka i ka paahao.  Aole no i kanalua o Hale ka mea hoi a Hale i panai aku ai ma kona aoao e waiho ka paio ana a hiki mai ke kau hauielau.

            O ka Moiwahine Ietiwa i kela kakahiaka, ua hoaiaia kona hiamoe e ke kuhina nui ma ka hoike ana aku i ka mahuka ana o ke kanaka paahao, a i ka lohe ana o ka Moiwahine ia mea hou ano kaumaha, ua hapai koke ae la oia i kona mau lima e hoike ana i kona kaumaha no ka lono mahuka o ke kanaka, a ua hai koke aku oia e iho koke aku ana oia i kahi o ka hana i ka manawa e pau ai kona inu kope ana.  Aia iloko o kona puuwai iho, ka wai e lana malie ana no ka pakele maopopo maoli o ka mea ana i aloha nui ai.  Ua hoomanao ae no oia i na hana o ka huakai i heleia e ia i ka po iho, ame ka noho ana iho o ka paahao iloko o kahi o na moneka ame kona hoi ana mai i kauhale me ka maalahi a hiki i kona lumi me ka pilikia ole.  I kona manawa i ala mai ai ua mino aka iki iho la no ua u'i nei i ka ike ana iho i ka mokaki o kona lole o ka hele ana i ka po.  Ua weheweheia keia mau pono lole ana i hele ai i ka po iho iloko o ka lumi malalo o ka halealii kahi hoi ona i aahu mai ai i kona lole mau o ka noho hale ana, aka, i kona hoi ana mai i kona lumi ua paa pu mai no oia ia mau lole, no ka manao ana e hookomo iloko o kekahi pahu i malamaia, he pahu hoi i hoopihaia me kona mau lole o ka wa kamalii.  Ua makemake oia e malama ia mau lole ana i hele ai i ka po ma ke ano hoomanao.  I ka manawa ana i lele mai ai mai ka moe mai, ua hele loa aku la oia i kahi o ua pahu la a wehe ae la i ka pahu a hoihoi aku la oia i na lole ma ka aoao malalo loa o ka pahu lole.  Ua ki hou aku la no oia alaila kahea aku la oia i kana poe haiawahine.  A makaukau na mea apau, ua iho mai la oia no ka hui puana me ke anaina e kali ana no kona hiki aku.  Iloko o ka lumi kukakuka, e noho ana na kaukaualii Halefonta ame ka puuku o ke aupuni, ame kekahi poe e iho.  Me kona hookuoo ame ka hookaumaha ana i kona helehelena ua pane aku la oia no na mea pili i ua kanaka mahuka la.

            "Ke manao nei au e haawi makana i ka poe loaa ai ia."

            "Pela," wahi a ka elemakule Casepa.

            "I kanalima paha dala e papa?" wahi hou a ka Moiwahine.

            "Kanalima?" i hoohalahala aku ai ka elemakule Casepa ame ka puuku o ke aupuni.

            "Aole anei i lawa kela huina?" wahi hou a ka ninau a ka Moiwahine.

            "He kanaka ano nui kela.  He pepehi kanaka o ke Keikialii," wahi a ka puuku.

            "Pololei kela," wahi a ka elemakule Casepa i kokua ae ai i ka manao o ka puuku."  He kanaka ano maoli no oia a aole he mea maikai e hookuukuu wale iaia."

            "Oiaio kela.  He kanaka ano nui maoli no oia a he kanaka e poino ai ka lehulehu," wahi a ka Moiwahine.

            "Pono kela.  Ke manao nei au oia ka huina kupono no keia kanaka." wahi a ka elemakule Casepa.

            "Pehea ka elima kaukani dala," wahi hou a ka Moiwahine.

            "Aole he hoopaapaa ana no kela haawina dala," wahi a ka puuku.

(Aole i pau.)

           

NA ALOHA ELUA

i ka

IPO HOOKAHI.

MOKUNA XXXV.

HOOPILIHUA LOA IA KA NAAU.

           

            "O, Daisy, Daisy, ke hoehaeha loa mai nei oe i kuu naau!" wahi a Kilinetona i olelo aku ai.

            "Aole, aole wau i manao e hana aku e like me kela," wahi a Daisy i pane mai ai.  "Manao wau he nui aku na wahine e ae apau, oia hoi na wahine e noho hauoli ana, a ka lakou poe kane i aloha ai ia lakou e hoomau ia ko lakou ola ana, e Caro i ka wa e loaa ai o ka lakou keiki-aole anei o lakou hana pela?"  E haka pono mai ana ka nana ana a kela mau maka kaumaha iaia me ka iini nui.  "Ke pule nei wau no kuu make aku i loaa ia oe ka nohona kuokoa aohe mea nana e keakea mai ia oe, no ka mea he hana kuhihewa loa kela i hanaia ai, e Caro, keia mare ana o kaua-ua ike maoli no wau i ka hewa.  Ua ike wau i ke ano o na kane i aloha i ka lakou poe wahine i ko'u wa i kamaaina ai ia Mr. ame Mrs. De Grey."

            Ua moe malie iho la oia me ka pane leo ole no kekahi mau minute pokole, alaila alawa ae ia kona mau maka iluna a nana mai la iaia me ka oluolu.

            "U loihi maoli no hoi keia manawa au i kaawale aku nei i kahi e, e Caro.  Ua hoomaka mai wau e noonoo aole loa oe e huli hoi hou mai ana."

            E na Lani e kokua mai iaia!   Aohe hu'a uwepa i hili ia i hiki ke hoomanawanui ia kona eha a pela no hoi me kela mau huaolelo-ua loihi ke kaawale ana i kahi e.  A heaha kana hana i hana ai?  Pehea oia i hoohala ai i keia manawa loihi oiai kana wahine e ma'i ana, e emi liilii mai ana, a hiki i kona mawaliwali loa ana?

            "Caro, aohe anei ou makemake e ike i kuu wahi keikikane uuku?"

            Ua ano e loa iho la ko Sir Kilinetona noonoo i ka olelo ole ana mai o Daisy "ke keiki a kaua."

            He hana maa mau no ia ana o ka olelo nana no ke keiki.  Ua komo mai la ka wahine malama ma'i ia wa me ke keiki ana e hii ana iloko o kona mau lima.  Ka Sir Kilinetona hoomaopopo mua aku i kinohi i kona wa i ike aku ai he puolo lole keokeo ka ua wahine la e lawe mai ai; alaila, hoike koke mai la ko Daisy helehelena i ka hoihoi, i kona wa i hohola mai ai i kekahi lima nawaliwali ona.  Me kona mau lima ponoi ua wehe ae la oia i ua puolo keokeo la a ike ia iho la kekahi helehelena maemae, u'i, a ohana maikai me he anela ia ka nani.

            "O kuu keikikane keia a'u i hai aku nei ia oe, e Caro." wahi a Daisy i olelo mai ai.  Aohe wau i kapa i kona inoa; ua waiho no wau a hiki i kou wale hoi mai ai."

            Ua huli mai la na maka o Daisy me ka manao iini nui iloko ona a nana mai la iaia; me he mea la, e olelo mai ana no laua.  "E haawi mai oe i kou mahalo, i kuu bebe."

            O na manao hoihoi keiki apau aia ia iloko o kela mau maka kahi i hoike mai ai.  Aole hiki ia Sir Kilinetona ke alo ae i kona haawi ana aku i kona aloha iaia.  He kanaka u'i maoli i'o no ua bebe la me na mina maluna o kona mau papalina.  Ua haawi aku la oia i kona mahalo a hiki i ka wa o na maka o ka makuahine opio i piha ae ai i ka waimaka a hoomaka mai ia oia e uwe.  I kona wa i ike aku ai i ka hiolo mai o na waimaka, ua hoopilihua loa ia iho la kona noonoo.

            "Auwe no hoi oe, e Daisy, heaha ia keia ou e uwe mai nei?" wahi a Sir Kilinetona, ninau aku ai me kona hoomaopopo ole i ka manao iloko o ka wahine.

            "Ua komo mai iloko o'u ka maka'u a me ka hopohopo, aole la oe e makemake ana iaia," wahi a Daisy i olelo mai ai me ka uwe.

            "Aohe au e makemake ana iaia!  Auwe nohoi oe, pehea la i hiki ai ia oe ke manao e like me kela?  O wai hoi ka mea i hiki ole ke pale ae i ka makemake i keia keiki kanaka ui maoli no-me kona helehelena maemae?"

            "Aka," wahi no a Daisy i olelo hou mai ai me kela manao ano kakanalua no iloko ona," ke olelo mai nei na poe apau ua like loa ka kona helehelena me ko'u."

            "Ua pololei no ia olelo ana," wahi a Sir Kilinetona i pane aku ai," "o wau no kekahi e ike aku nei ua like loa i'o no me oe."

            "A, alaila ua makemake no oe iaia?" wahi a Daisy i olelo mai ai me ka hauoli nui iloko ona.

            Maikai maoli no hoi oe, e Caro.  Makemake maoli nohoi au ina i like loa me oe.

            "Ia wa komo mai ana ka wahine malama mai.  Ua lawa paha keia kamailio ana a Madame.

            "E pono ia oe e hoomaha i keia manawa."

            "I hookahi huaolelo i koe," wahi a Daisy i olelo mai ai.

            Ua hoao ae la oia e hapai i kona lima e lalau mai i ke poo o kana kane a huki iho ilalo a hoopili me kona, aka, aohe nae he hiki iaia.

            "Ua makemake wau e hawanawana aku ia oe i kekahi mea, e Caro," wahi a Daisy i olelo mai ai.

            Ua kulou iho la ko Sir Kininetona poo ilalo a hiki i ka pili ana o kona papalina me ka papalina o kana wahine, aka, aole nae oia i honi iho iaia-o ka wahine malama ma'i no kekahi i hoomaopopo mai i kela.

            "E hele hou ana no anei oe?" wahi a Daisy i ninau mai ai me ka leo nawaliwali.

            "Aole," wahi a Sir Kininetona i pane aku ai; a i kona wa i kamailio aku ai he ku io kona manao ana i olelo aku ai.

            Alaila hiki mai ana ke kauka, a aloha mai la ia Mr. Kilinetona me ke ano hoihoi ole, me ka manao kahaha loa iloko ona heaha la ke ano o keia kanaka i hiki ai iaia ke hele i kahi e a haalele i kana wahine ui no kekahi mau mahina loihi loa.  Aohe oia i hoike pono mai i ko Daisy ano i kona wa i loaa mai ai iaia e noho mehameha ana.

            "Ua nawaliwali loa iho nei oia," wahi a ke kauka i olelo mai ai.

            Aole oia i haawi aku i manawa no Sir Kilinetona e olelo mai ai, aka, ua hai mai la oia i ke ano o kona hele ana mai i kela la i keia la, ame kona loaa mai iaia e like me ke ano mau aohe wahi loli ae o ka mai, e noke mau ana i ka uwe me he mea la e naha ae ana kona puuwai.

            "Ua hai mau aku au iaia he mea ia nana e hoemi mai i kona ikaika-a ua like oia me ka punawai i ka hoohiolo mau o na waimaka.  Ua nui ko'u kaumaha i ka ike mau iaia e like me keia ke ano.  Ua hele kona ili a mae i ka holoi mau ia e ka waimaka.  Ina e haalele hou ia ana o madame e like me mamua, he mea pono ia'u e imi i kokoolua wahine nona e noho pu ai."

            "Na'u e nana aku ia mea," wahi a Sir Kilinetona i olelo aku ai me ka hikiwawe.  "Aole e haalele hou ia o Madame e noho hookahi i keia manawa e like me kona kulana e waiho nei iloko o ka nawaliwali.  He manaolana no anei kou e ola ana no oia?"

            "Aole hiki ia'u ke haawi aku i ka olelo hooholo no ka loaa hou o ka oluolu iaia i keia manawa.

            "O ko'u manao ponoi no ka'u e hoike aku nei mai ka mea a'u i ike ai e pili ana no madame, oia hoi keia, o ka haawi ana aku i na hoohauoli ana iaia ua oi aku ia mamua o na laau apau a'u e haawi aku ai iaia."

            Ua manao iho ia o Sir Kilinetona iloko iho ona, e loaa ana iaia ia mea, ina he mea hiki ia iaia ke haawi aku.

            Alaila hoi aku la ke kauka no kona home.

            I ka wa i hoi aku ai o ke kauka ua kauoha aku la ka wahine malama ma'i i na poe apau o loko o ka hale e noho malie loa lakou e like me ke kamalii liilii ame ka hoonakeke ole, no ka mea, ua hiamoe ia o madame mahope iho o kona ala ana no kekahi mau hora loihi, a akahi no a loaa iaia ka maha.

            I ka hiamoe ana o Daisy ua puka aku ia o Sir Kilinetona iwaho a ike iho la oia, aia oia malalo o ka malamalama o na hoku kahi i ku ai.  Ua hele mai ia o loko ona ia wa a luuluu i ka ua mea o ka pilihua o ka naau.

            Ua hele holoholo iho la oia iluna a i lalo mawaena o na lalani kumu alani e kuku ana.

            "Ina au e hai ana i ke ano o ko'u moolelo i kekahi poe," wahi a Sir Kilinetona i olelo ae ai, "e nana mai ana lakou o wau kekahi kanaka lapuwale loa malalo o ka malamalama o ka la a ke Akua i hana mai ai; a eia nae he hana hewa loa no ka'u i hana ai: he nui wale na pilikia ma ko'u aoao i ku-e mai ia'u-ua pakaawili hele ia au ma ko'u mau alanui a pau eia mau mea.  Aohe mea i hoowahawaha i ka hewa, hoowahawaha i na hana ino, i oi ae mamua o'u: aka nae, owai la ka mea i oi ae o ke ino?  Aohe no hoi au i manao e hana e like me ia ke ano.  Ua hele hewa au no ka mea ua maka'u wale au i ka nana ana aku i ka helehelena o kuu aloha me ka hai ana aku iaia ua mare au me kekahi mea okoa.

            Aohe i loaa ia'u ka manao kao'e wiwo ole i ka pale ana ae i kona mau lima e apo mai ana i kuu a-i me ka hai ana aku iaia aohe o laua kuleana ma ia wahi.  Mai ia wa mai au i hoehaeha ia ai a hiki i keia manawa."

            Heaha la kana hana e hana ai?  O ke kakau aku anei la Lede May a hoike aku i ka mea oiaio apau me kona mihi pu aku i ka hana hewa ana i hana ai? –hai aku iaia he wahine kana ame ke keiki aia i Farani nei, a e haawi ana oia i kona aloha apau maluna o laua, alaila o kona hoomanao no ia mai Enelani mai a hiki i kona poina loa ana?

            O ke alahele pono loa ia ana i noonoo ai: a o kana ia ia i manao ai e hooko no kekahi manawa: alaila hoea hou mai la no ka hoowalewale o ke aloha o ka mea ana i aloha ai iloko ona a komo ae la no ka manao iloko ona aole e hai aku ia nuhou hoolele hauli ia Lede May o make auanei oia.

 

MOKUNA XXXVI.

KA MANAO HOOHUOI ILOKO O KA WAHINE.

           

            He ma'i loihi kela o Daisy i waiho ai me ka hoonawele malie ana.  He lehulehu wale na manawa a ke kauka i haawi pio ai i kona manaolana nona, me kona manaoio he mea pohihihi loa ka loaa hou ana o ka oluolu iaia.  Aka, ua loaa hou nae iaia ka lanakila mahope mai; ua hoomaka mai la e pii malie kona ikaika; ua hoi hou mai la ke ano o kona ili e like me ka manawa mamua; ua nalohia aku ka poopoo o kona mau maka-a ua komo mai ka manaolana nona i keia wa.

            Ua hoike maoli aku o Sir Kilinetona i kana hoomaikai ana me ka hunahuna ole no ka hoi hou ana mai o ke ola iloko o kana wahine.  Ina oia i make, me nei ua lilo oia he kanaka pepehi kanaka maoli; aka, i keia wa iho la nae, ua haawi aku oia i kona mahalo ame ka hoomaikai ana i na Lani no kona aloha ana mai iaia.  Ua lohi maoli no ka hoihoi hou ia ana mai o ke ola iloko ona; aole hiki iaia ke haalele iki iho iaia i hookahi la.  Ina oia e kaawale ana mai iaia aku, a i kona wa e hoi mai ai e loaa mai ana oia iaia ua oi loa ae la kona nawaliwali, ua hele mai la kona helehelena a hailepo, a olelo mai la oia penea:

            "Ihea aku nei oe, e Caro?"

            O ko Sir Kilinetona wa ia i hai aku ai iaia i ke ano o kana hana i hele ai, a o ka Daisy hoi e pane mai ai:

            "E maka'u mau ana au i na wa apau o kou nalowale hou aku mai ia'u aku; aka, aole no nae hoi paha oe e haalele mai ana ia'u?"

            Ua hooia aku ia o Sir Kilinetona, aole oia e haalele ana iaia; alaila loaa iho la ka maha iaia.

            Ua kakau leta aku la ua Kilinetona nei ia Lede May, e hai aku ana iaia i ka nui o kana hana i Farani a oia paha ka mea nana e kaohi mai iaia a loihi ilaila, a he mea maopopo ole kona wa e hoi hou aku ai i Enelani.  Ua kakau aku la oia me kona ike maopopo no he hana apuka, a hewa loa ia ana e hana la, a eia nae aohe oia i ike i ka wehe ana mai iaia iho mai ia hana paakiki mai.

            Mahope mai o ia manawa he wahi wa uuku loa ke loaa ia Sir Kilinetona no ke kakau ana i kana poe leta.  Aole na Daisy i hoolalau iaia aka, na ka wahine malama ma'i me ka manaoio iloko ona he kanaka o Sir Kilinetona i like me na kane e ae apau, a oia kona mea o ke noi pinepine ana aku iaia e hana i kekahi hana na madame.  E kamailio ana anei oia ia madame no kekahi wahi manawa pokole-ua hele maoli no oia a ano kukule loa?  E heluhelu aku ana anei oia iaia i kekahi mau moolelo hoonanea?  E haawi aku ana anei oia i kona lima ia madame i wahi nona e paa mai ai i kona wa e holoholo iki iho ai iloko o ka lumi?  Alaila o ko Kilinetona wa iho la ia i ike ai iaia iho e hele huli ana ma na wahi like ole apau i na mea a Daisy i ono ai ame na mea ana i makemake ai.  E makemake ana o Daisy i na hua ai e pa mau ia ana e ka la, ka waina momona loa, na pua aala loa akahi no a mohala ae; a ma keia mau mea apau aole i kaniuhu iki oia, ua hoomanawanui oia i ka huli ana i keia mau mea apau, me he mea la ua aloha no oia iaia.

            Aole hiki ia Sir Kilinetona ke alo ae mai ka haawi ana aku i kona mahalo iaia, i ko Daisy wa e hiki mai ana i kana pepe ui iloko o kona mau lima; i ka nana aku i kona ano ua like loa oia me kekahi kii; he helehelena ui kona e nana mai ana me he mea la aohe kona he kino kanaka maoli-e hoike mai ana oia i ka hiohiona o ka makuahine opio i piha i ka hauoli no kana keiki makahiapo.  He wahine ui maoli iho la no oia, he akahai, he oluolu, he hoomanawanui, a mamuli o keia mau kumu oia ka mea nana i kaualako aku i ko Kilinetona manao e makaala mau iaia.  Ua ike iho la oia, aole i kaohi iki mai o Daisy iaia no kona hooko ana aku i kana mau hana apau, i na wa apau a ka wahine malama ma'i e noi aku ai iaia ina he mea hiki iaia ke haawi mai i kana kokua ana no kekahi mau mea liilii i makemakeia e hana, e hoole mai ana o Daisy, a olelo mai, "Ea, mai hooluhi loa aku oe ia Mr. Kilinetona."

            He mea hoouluhua loa ka lohe ana aku i ka pane ana mai a ka mea malama ma'i me ka mino aka.

            "Aohe ia he hana hooluhi iaia, aka, he mea hoeueu ia."'        

            Aole loa no he koi wale aku o Daisy iaia e hana mai i kekahi hana nana; e kuemi hope mau ana kona manao no ka haawi ana aku i na hooluhi ana iaia.  E hoole mau'ana no oia no kona haawi ana mai i kana kokua ana, a, ina hoi oia e ae ana, alaila e noi aku ana no oia e kala mai no ka hana hooluhi ana i haawi aku ai iaia.

            "No keaha ia oe i manao ai o na hana apau a'u e hana ai nau he hana hooluhi loa ka ia ia'u, e Daisy?" wahi a Sir Kilinetona i ninau aku ai iaia i kekahi la.

            "Aole anei i pololei ia manao ana o'u e like me ia, e Caro?"

            "Aole; ua ku kaawale loa ia mai ka mea oiaio mai; he makemake mau au e noho lawelawe aku nau ame keia hooliina opio a kaua."

            Ua puka aku la keia mau huaolelo mai iaia aku me kona noonoo mua ole i kana mea e kamailio aku ai.  Ia wa o Daisy i nana ae ai iluna iaia.

            "He hooilina oia no kahi hea?" wahi a Daisy i ninau mai ai.  "Aole no kaua keia home iwaena o na kumu laau oliva ame keia mau mea hiki i hihipea mai nei, e Caro, e haawi aku ai kaua iaia."

            Alaila ninau wale iho la no oia iloko iho ona o ka wa anei keia ana e hai aku ai i kona inoa oiaio ame ke ano o kona kulana-hai pu aku iaia o kahi pepe uuku ana e hii ana iloko o kona mau lima oia ana ka hooilina o Eaawale-he manao ia na ka ohana Adea-a e paa aku ana oia i kona kulana ponoi me na kanaka hanohano apau iloko o ka aina?  E hai ana anei oia i keia mau mea apau i kana wahine naau haahaa, akahai i hoomanawanui ai iloko o na ehaeha he nui?

            "Aole, oia ka mea a kona manao i hooholo ai; aole oia e hai iki ana i kona ano ame kana mau hana apau i kekahi mea okoa aku a hiki i kona hoike ana mai i keia mau mea apau ia Lede May: e huna malie ana no oia i keia mare ana ona i ka wahine a hiki i ko Lede May wa e lohe mua ai.  I ko Daisy wa e ano maikai iki ae ai-loaa iaia ka oluolu kupono no ka haalele ana iho iaia-o kona wa la e hoi hou ai i Enelani, alaila mihi aku oia i keia mau hana ana apau la Lede May.  Ua ike maopopo iho la oia i keia manawa i ke ano o kona apo ana mai i kana mihi ana aku-ua hiki no iaia ke ike aku i kekahi aka e umalu iho ana mamua o kona helehelena.  E haawi mai ana oia i kona aloha hope loa iaia: aole hiki ia laua ke hoolilo ia laua iho i mau hoaloha; no ka mea ua kukuni paa ke aloha o kahi i kekahi no ka launa ana ma ke ano he hoaloha wale no: e pono laua e noho ma ke ano he malihini loa kekahi i kekahi; aka, e like me ka loihi o ko Lede May oia ana, ua ike no oia e noho ana no oia me ke kupaa mahope ona.

            "Ua hoopoino aku au i kona oia e like me ko'u ponoi, wahi a Sir Kilinetona i olelo ae ai me ka leo nui, me kona hoopoina eia oia imua o ko Daisy alo i keia manawa ana i hoopuka aku ai i kana olelo. 

            Ua ea ae la ko Daisy poe iluna a nana mai la iaia.

            "O ko wai oia kau i hoopoino, e Caro?  No'u anei kau mea i kamailio mai nei?" wahi a Daisy i pane mai ai me ia leo oluolu.

            "Aole." oia ka pane hikiwawe i pane ia mai ai.  "He manao wale no ia a'u e noonoo ana a kamailio ae la au me ka leo nui."

            "Aka, ua hoopoino io anei oe i ke ola o kekahi mea?" wahi a Daisy i ninau hou mai ai me ka manao ku io.

            "Aole, aole loa! he olelo wale no ia i olelo ae nei, e Daisy i unuhiia mailoko mai o kekahi moolelo; aohe no he mea ano nui iloko o ia mau huaolelo."

            "He ku nae i ka weliweli ke ano o kela mau huaolelo a'u i lohe aku nei, ina no paha aohe ano nui iloko o lakou.  Aole o ko'u ola kau i hoopoino mai, e Caro; o kou manao maoli ua makemake oe e hoohauoli mai ia'u i kou wa i mare mai ai ia'u."

            "A, aole anei au i hooko ia mea?" wahi a Sir Kilinetona i ninau aku ai me ka leo nahenahe.  "Aole anei oe i hauoli, e Daisy?"

            "Ma kekahi ano ua hauoli au." wahi a Daisy i pane mai ai.  "Na kuu keiki oe e hoohauoli aku nei; aka, aohe ou aloha ia'u, e Caro, ua noii ia e a'u ia mea a ua ike au."

            "No keaha la oe i olelo mai ia aohe o'u aloha ia oe?  Ua hoike aku auanei au i ko'u ano ia oe, e Daisy e like me ia a koe ka'u mau hana lokomaikai?"

            "Aole; aka, o na hana lokomaikai, aole ia he aloha.  Ua heluhelu au i kekahi mea e pili ana i ke aloha me kahi lokomaikai uuku iloko ona: ua ike au ia mea he lokomaikai me ka loaa ole o ia mea he aloha.  He lokomaikai au ia Bedina, no ka mea he kauwa hoolohe pono oia; a he lokomaikai no hoi oe ia'u."

            I ko Sir Kilinetona lohe ana i keia mau olelo a Daisy o kona wa ia i nana pono aku ai iaia me ka piha haohao loa.  Me ka oiaio loa ua komo mai nei he ola ano hou iloko o kana Daisy.  He mau manao ano hou loa keia ona ana i hoike mai nei ana i moeuhane mua ole ai e kamaaina ana oia ia mau mea.

            "Daisy," wahi a Kilinetona i olelo aku ai ma ke ano niele, "e hai mai oe ia'u, pehea la i komo ai ka noonoo iloko ou aohe au i aloha ia oe?"

            Ia wa o Daisy i nana mai ai iaia me ka iini nui iloko ona, me he mea la e noonoo ana oia e hooku'iku'i olelo aku ana paha o Sir Kilinetona iaia; alaila olelo mai la oia:

            "I kiai ia hoi e a'u ke ano o kekahi poe okoa ae.  I kinohi-oia hoi, i ko kaua wa i mare ae ai-ua manao loa au ua aloha oe ia'u, a ua komo no hoi iloko o'u ka manaoio i mare mai oe ia'u no ke aloha.

            "A mahope mai?" wahi a Sir Kilinetona i olelo aku ai, me kona ike ana aku e hanu ana o Daisy i kekahi hanu kaumaha.

            "Ae, mahope mai ua nui palena ole ka'u mau mea i heluhelu ai e pili ana no ia mea he aloha; a ua ike au o kou aloha ia'u aohe ia i like iki me ka'u mea i heluhelu ai iloko o na buke.  Iloko o na buke, o na aloha oiaio apau, he akahele lakou a he mau no hoi.

            Alaila, ua halawai pu no hoi kaua me Mr. De Grey ma.  Nolaila ua aloha maoli no o Mr. De Grey i kana wahine.  Ua makaala ia e a'u kona ano a ua makaala ia no hoi e a'u kou ano; ua hoohalike ia e a'u na mea elua; a ua ike au i ke ano e nui mawaena o laua."

            Ua nana ae la o Sir Kilinetona iluna me ke ano hoihoi, me he mea la e kamailio ana o Daisy no kekahi mea ana i kamaaina, ana hoi i manao nui ole ai.

            "A heaha ke ano e mawaena o na mea elua?" wahi a Sir Kilinetona i ninau aku ai.

            "Ua hoike mai la i na tausani alahele like ole," wahi a Daisy i pane mai ai, a puai ae la ka ula maluna o kona helehelena haikea a haalulu pu iho la kona mau lehelehe.

            "E honi mau ana o Mr. Grey i kana wahine i kona wa e hele ai i kekahi wahi ame kona hoi ana mai."

            Aole hiki ia Sir Kilinetona ke pale ae i kona mino aka ana iho i keia mau mea ana i lohe ai mai la Daisy aku."

            "Aole loa anei au i honi ia oe, e Daisy?" wahi a Sir Kilinetona i ninau aku ai.

            "Aohe au i hoomanao iki i kekahi mea o ia ano mai ia oe mai.  Ae, manao au ua hana io oe ia hana ia oe i hele ai: aka, ua like nae ia me ke ano honi au e haawi ae ai ia pepe nei, aole he honi a ke kane e haawi ana i kana wahine ana i aloha ai."

(Aole i pau.)

 

KU-E KA PAPA OLA.

 

            Ma ka Poakolu, la 21 i kukala ae ai ka Papa Ola kuloko o kakou i ko lakou ku-e ikaika i ke kumuhana e hooliloia o Molokai i kahua hoolulu no na ma'i lepera e like me na manao o na Komikina i hele mai nei ianei ma ke kau wela i hala aku nei.  Ua laweia mai keia kumuhana ma keia la i oleloia ae nei e Kauka May ka lala hou o ka Papa Ola ma ka hakahaka o Dr. Sloggett.

            "E like me na kanaka noonoo maikai o keia mau ailana." wahi a Kauka May, he ku-e ikaika loa wau i na hoolaia e laweia mai ma ko kakou mau aekai nei na lepera o ka aina makua O Botany Bay he wahi ailana uuku mawaho aku o Aukekulia he kahua hoolulu ma'i lepera ia no ke aupuni o Beretania Nui a hiki i ka poino loa ana o keia inoa hanohano a puni ke ao.  I keia manawa ke makemake ia nei keia aina aloha o kakou e hoolilo i Botany Bay no ke aupuni o Amerika Huipuia.  Ina kakou e hana lokahi ana ua hiki ia kakou ke uwalo aku i ke aupuni makua aole e hana i keia hana, a e ku-e hoi kakou e like me ka mea hiki ia kakou.  Ma ke noi a Mr. Dole ua kohoia ae he komite o ekolu lala no ka hana ana, i memoriala ku-e e pili ana i keia kumuhana Dr. Moore, Mays ame E. A. Mottsmith.

 

HOOLAHA KUMAU

Ko Hui Bilioko Ho@

Malama O la o @

(KAUPALENAIA.)

 

Huina i hoahuia...........@       

Peresidena                   K. of @

Hope Peresidena.....    W. P. @

Puuku......        W. @

Keena Hana Nei

Alanui Papu, Kokoke i Alanui Kalepa

Keena Lala ma Hilo, Hawaii

E lawelawe ana i ka

Oihana Banako Hoahu Dala   ma Honolulu a me Hilo

 

            E laweia mai no na huina @ ka haawila o na uku@ ahu makahiki ma ka huina @ keneta no ka makahiki.  E @ Rula a me na hooponopono ana @ nau ae ma ke Keena @.

2238-1yr

 

KAUKA T. MITAMURA

            Alanui Nuuanu, Honolulu, T. H. Na Nora Hana:  Hora 8 a 10 kakahiaka @ hora 6 a 7:30 p. m. Sabati Hora @ 8 p. m. 

Telepone White 153.   P. O. Box @

 

KAUKA GEO. W. BURGESS,

            Keena hana ame kahi a he Hea @ S. Alanui Moi, - 10 a.m. a 2 p.m. a 7 p.m. na hora hana.

Telepone-Main 128.

 

KAUKA GEO. J. AUGUTE

Keena Hana 431 Alanui P@

Hora Ha 10-12 a. m. 3-4 @

Sabati 3:30-10:30 a. m.

 

D. KALAUOKALANI, JR.

Loio ma ke Kanawai

me

T. McCants Stewart

Loea ma ke Kanawai

Halepohaku o McIntyre. kahi o Alanui Papu ame Moi.

Pahu leta 569  Telepona 1M Honolulu, T. H.

 

LEWERS & COOKE

LUI A ME KUKE, Kaupaleaia

 

Na Mea Hookomo mai a Kuai aka in ana

LAKO HANA HALE

O Kela ame Kena Ano Malaila e loaa ai na mea malalo @

            NA PAPA N. W., NA PAPA HOLA PILI HALE, NA PUKA, NA OLEPELEPE AME NA PONO, PUKA ANIANI, NA KUI, AME NA MEA PILI I KA OIHANA KAMANA, NA PUKA PENA.

            NA PENA LIKE OLE, AME NA HULU PENA, NA ANIANI, NA PEPA HALE, PALE PUKA ANIANI, MOENA, ETC.

 

            O na kauoha pono hale apau loa o hiki mai ana ia makou e hio@ kole ia no me ka eleu ame na KUMUKUAI HAAHAA LOA.

 

LEWERS & COOKE

 

            O ka laau lapaau "@ Cough Remedy" ua hana @ na ma'i kunu, anu, naeoaiku, @ ame ka nalulu.  Ua hook@ keia laau iaia iho ma na aupuni @ malamalama apau o ka honua nei @ hoola kamahao ana i kela @ i oleloia ae ia.  Ua loaa mai @ oiai like ole mai na kanaka mai @ i keia mau pilikia e hoike mai @ ka hana kamahao o keia laau @ kunu ikaika loa i hoolala e k@ na anu ikaika loa i haawi pio ai i malalo o ka ikaika o keia laau: @ na ma'i naeoa'iku i hoolaia e keia laau o hoopakele mau ana i ke ole makaainana o ke kamaiki.   O ka hana hoohana@ia o keia laau no na ma'i ikaika @ ke kunu kalea ua hoike maopopo @ mai keia laau i kona ikaika a me @ hookaawale i na jua ino o loaa mai ana mamuli o keia mau ma'i.  Ua makahehi loa ia kela laau e na makuahine me he milimili la na lakou oiai aohe he mau mea hoopilikia iloko o keia lako i ka bebe uuku.  He hoola mau keia laau i keia mau ano ma'i a he hoola me ka hikiwawe loa.

            E loaa no kela laau ma ka halekuai laau o Benson Smith & Co. Ltd., no ke kumukuai kupono.