Ka Nupepa Kuokoa, Volume XL, Number 49, 5 Kekemapa 1902 — Page 5

Ka Nupepa Kuokoa

KE KILOHANA POOKELA NO KA LAHUI HAWAII.

 

   NUPEPA KUOKOA, DEKEMABA 5, 1902     5

 

Nuhuo Kuloko.

 

  Hana @koino mai nei ka pele ma @uateniala a pau na tausani ola i ka make ame na aina waiwai i ka hoopoin@a.

 

  Nui ke kelekele o na alanui i keia mau la iho nei mamuli o ka hana mao ele a ka ua, a ua kahinu ia ae na ka@iaa nani me ka lepo.

 

  Ma ka Lapule i hala, Nov. 30, ua ki aku la he kelamoku o Magnussen kona ina ia Keaupuni me ka pu a holo aku ia. Aloha ole ka hana.

 

  Mamuli o ka noii pono ana ia iho nei e na Keena like ole o ke aupuni, ua hoopauia  aku la o Aukakini ame J. H. Boyd mai ko laua Keena aku.

 

  Ua hoopakele ae o Kapena Sachs he mau popoki mai ka make mai.

  E haawi makana ana ka Lahui Popoki i metala hanohano nona.

 

  Nui ka ohohiaia o ka hoikeike Hawaii i malamaia ma ka Halekeaka Ofiuma i ka Poaono i hala aku nei.

  Hoomauia aku imua e na hoa.

 

  Ma keia mahina ae o Ianuari e holo loa ana ke kaa uwila ma Kapiolani Paka. Hauoli loa ana na kini o Waikiki ina e paa ana keia alahao.

 

  E malama ana ka halawai kumau o ka Kamehameha Alumni Association ma ke ahiahi, Dekemaba la 5, ma ka hora 7:30 P. M. ma kahi maa mau.

 

  Ke makemake nei na Porto Rico o Hawaii nei e huli hoi no ko lakou aina wahi a lakou ua like lakou me na kauwa kuapaa e hoohanala nei maanei.

 

  Mai poina e ka makamaka heluhelu i ka Aha Mele ma Kauluwela e haawiia ana ma ka po Poaono, Dec. 20. E looa na Kikiki hapaha ame hapalua i na laia o ka hui.

 

  Ua ku mai ka Mokuahi Hongkong Maru ma ke ahiahi Poakahi nei, Dec. 1, mai Kapalakiko mai, a ua holo loa aku no ka Hikina me Kuhina Wu maluna o kona oneki.

 

  Ma ka paani polo i malamala ma Kapiolani Paka ma ka Poaono nei i hala, Nov. 29, mawaena o Maui ame Oahu, ua ahai ae ka inoa hope i ka lanakila kamahao me na helu 14 3/4 (Oahu) i ka 4 3/4 (Maui.)

 

  Ina e holopono io ana ka mea e hoolaia ia nei no ka malamaia o ka hookahakaha mokukaua mawaho o Hawaii nei. e ike ana kakou i na mokukaua awaawaa o na ano like ole o ka Aumokukaua o Amerika Huipuia.

 

  Ma ka po Poakolu i hala, Dec. la 3, hora 7:30 P. M. ua oili mai la mai ka puhaka mai o Mrs. Emily Kahoe, wahine a Mr. Halemano o ka pa hoomalu o Kauluwela. he opuu daimana nani, he malihini keikikane. Hauoli no.

 

  Ua weheia ae ma ka Pa Hoomalu o Kauluwela, Vineyard St., he halekula no na mea apau e makemake ana e hoomahuahuaia ka ike olelo haole ame ka ike olelo Hawaii. Poakahi ame ka Poaha, hora 5 P. M., aole auhau.

 

  E noii ana ka lala o na komite o ka Papa Ola i ke kupono ame ka kupono ole o na halekaa ame lio o na Iapana mauka o ka Palama ma ke alanui Pupule. Ua olelo ae ka luna nana Tracy o ka Papa Ola e pono keia mau hale e wawahiia.

 

  Ua lohe mai makou ke paaia nei na poe lawaia.

  O ka oiaio maoli ua noa ka lawaia ma na ano apau Koe na wahi a ka Papa Ola i papa no ka pono o ke ola o ka lehulehu a mawaho ae o keia mau wahi i papaia, ua noa a ua pali i na mea apau me ka ke'ake'a ole ia.

 

Ka Luau Repubalika ma

ka Uwapo o Hackfeld.

 

  AKOAKOA AE HE MAU TAUSANI MALAILA MA KE KAKAHIAKA A HIKI I KE AHIAHI.

 

  Ma ka Poaha i hala, Nov. 27 ka la Kulaia, ua malamaia ae ka luau Repubalika no ka hoomanao ana i ka Lanakila kamahao o ka la 4 o Nov. i hala aku la ma ka uwapo o Hackfield ma ka aoao o Ewa o ke awa kumoku.

  He eha tausani kanaka Hawaii ame na lahui e ae he poe koho balota no ka apana elima ka hapanui i akoakoa ae malaila mai ke kakahiaka a hiki i ke ahiahi a ua hoike ae lakou i ko lakou mau helehelena hauoli me na pihi e Kuhio ame na lipine "Kalanianaole" e pulelo ana maluna o ko lakou kuka.

  Ma ka hora 11 A. M. o ia kakahiaka, ua akoakoa mai la na lala o ke komite hooponopono ahaaina ma ka uwapo, Ma ka po Poakolu a ao ae ka Poaha ua hooliloia ae ka uwapo me he hale kamana ia, e kani koele ana na hamale, e nakeke ana na pahiolo e pahupahu ana hoi na poke laau oiai e hana apa na kanaka hana i na pakaukau me ka puapuahulu nui mai kahi kihi a hiki i kekahi kihi o ka uwapo.

  O kekahi poe hoi ua houluwehiwehi ae lakou ia loko o ua uwapo nei me na hae like ole o na aupuni o ke ao nei a mawaho loa o ka puka e komo aku ai e pulelo ana ka hae aloha o Hawaii me kona nani piha.

  Maluna o na pakaukau loihi i hoomakaukauia ua haliia iho ka palapalai ame ka la'i, a ma kahi e noho ai, ua haliiia me na mauu laiki.

  Ua waihoia maluna o ka pakaukau na pola poi i hiki aku maluna o ke tausani ame na laulau, ka uwala ame ka i'a kalua.

  I ka manawa i pa'e mai ai o ka leo o ma kuene e kono mai ana i na mea apau e noho nui e ai, ua aluku nui aku la na kanaka ma ka papaaina, a iloko o ka manawa pokole he eha tausani a oi ke nonoho nui ana e hoopiha i ka lua o ka inaina, ke kane, wahine, keiki, Pake Pukiki, Porto Rico, a pela aku. Aka, aole keia he luau no ka manawa hookahi a pau ae no a nele hoi na kanaka e hiki hope mai ana, aka o na kanaka hiki hope mai aiai na laulau ame na i'a ua makaukau na lakou.

  Mai ke kakahiaka mai a hiki i ke ahiahi ua oili mai na kanaka ame na wahine a he nui maoli no na hoaloha haole i akoakoa ae malaila a launa pu ma ka paina ana. Ma ka auwina la hor 5 ua pau pono ae na kanaka i ka piha aka aia he mau laulau he nui maoli i wehe ole ia, a ua haawiia aku he mau laulau no ka hoihoi ana'ku i ko lakou mau home.

  Ua hoea pu ae malaila na keiki o Kawaihau Club i ukali aku nei i ke Keikialii ma kana alahele haiolelo, a na lakou i ulele ae na mele kaili puuwai ame na hula tomi-tomi hoohauoli; ka lehulehu.

  Ina manawa apau e hula mai ai na keiki hookani pila, ua ku ae kekahi a hulaku'i iho la a ua nui na leo hooho hauoli i wawalo ae maloko o ka paia hale o ka uwapo.

  Ua akoakoa ae malaila na moho i lanakila no keia ahaolelo e noho mai ana, e lulu lima ana hoi me na hoaloha o na aoao kalaiaina like ole, a@ ma ka papaaina ua nonoho pu iho na Home Rula ame na Repubalika me ka hauoli aole me ka manao ano e no na mea pili kalaiaaina aka me ka manao ulumahiehie ame ka maikai.

  Ua ikeia aku ka Hon. W. C. Achi e kono ana i na mea a pau, i na kamalii, na kane ame na wahine e noho e painu a pela pu no hoi o Judge Kaulukou.

  O na lala o ke komite i hiki ae malaila oia no E. C. Winston ame R. N. Boy ame na kokua ikaika a C. H. Clark.

  I ka aneane ana e hiki aku i na hora o ke ahiahi ua ku ae o W. C. Achi maluna o kekahi pakaukau a olelo mai la:

  Hauoli au i ka ike ana ia oukou i kela la no ka akoakoa ana mai ma keia luau i hoomakaukauia. Ua iini nui na Repubalika e halawai oluolu me oukou e like me kela la, a ke hauoli nei au no ko oukou hiki ana mai. E hoomanao oukou i ka olelo aelike a na Repupalika imua o oukou a ke hooko nei ia olelo aelike. Ua olelo aku ka aoao Repubalika i na Poola e haawiia ana na hana o ka uwapo apau ia lakou, a ke hooko nei makou i keia olelo.

  Ua hele aku na lala o ke komite o ka Repubalika e launa pu me na haku hana o ka uwapo me ka olelo aku ia lakou e haawi i na hana i na kanaka Hawaii a aole i na Asia a ua loaa mai na pane maikai.

  Ua iini au e hoike aku ia oukou o ka aoao Repubalika ka hoaloha maikai pilipaa o ke Kanaka Hawaii.

  Ua haawiia ae na leo hooho hauoli ana ma ka pau ana o kana kamailio.

 

Noi ia Uncle Sam i

Kokua.

 

MAKEMAKE NA PORTO RICO O

HILO E HULI HOI NO KA AINA.

 

  HILO, HAWAII, Nov. 29.--Ua malama ae na Porto Rico o Hilo nei ma ka po Lapule i hala ma ka halekeaka o na Iapana he halawai no ka noonoo ana i alahele kupono no ko lakou huli hoi ana i ko lakou aina makuahine.

  He nui o na Porto Rico i loaa i ka onawaliwali ame ka ma'i, a ke hookonokonoia nei na kanaka hana o ka mahiko e hoala mai i kekahi mau hana kupono ole.

  Ua olelo ae kekahi o na Porto Rico i hiki ae ma ka halawai na na luna mahiko e uku ia lakou no ka huli hoi ana i ka aina, no ka mea na lakou i lawe mai ia lakou ma Hawaii nei.

  Mahope e kekahi mau hoopaapaa ana ua hooholo lokahi ae na Porto Rico e noi ia o Amerika Huipuia e kokua mai ia lakou no ka hoihoi ana i lakou i ka aina hanau, a ua kohoia ae he komite no ka hooponopono ana i Palapala Noi a waiho aku i ke aupuni Amerika ma ke poo kulanakauhale o Wasinetona.

  He aneane e piha eha tausani Porto Rico ma ka aina nei, a ke iini nui nei ka hapanui o keia huina e huli hoi aku no ko lakou aina hanau.

KA HALE HOOLULU KAA-AHI O

HILO

  O ka hale hoolulu kaa-ahi o Hilo e kukuluia nei ma ke kihi o Front ame Waianuenue alanui he nani hiwahiwa ia i papahi hou ia ae la maluna o ke kulanakauhale o Hilo.

  He elua papahelu ke kiekie o keia hale me kekahi puo-a o hookahi haneri kapuai ke kiekie a e hanaia ana keia hale me he hale pohaku la.

  O ka papahele mua o keia hale e maheleheleia ana iloko o na Keena Ukana ame Keena Kikiki ame kekahi lumi nui no na ohua e kakali ai i na kaa.

  O ka hohonu o kona kaua he 160 kapuai, a nolaila ma kea e ikeia ua hiki loa ke hoakoakoaia ke kaa-ahi a piha malalo o kona malumalu.

  E huli ana ke alo o keia hale ma ke alanui Waianuenue a poaipuni ma ka hale leta a nolaila e huli ana ke Keena Ukana ame ke Keena Kikiki ma ke Alanui Front.

  Ma ka papahele elua, e hooliloia ana ia i keena nui no ka Luna Nui Lambert ame kekahi mau luna e ae.

  Me he la e hookulipolipoia ana ke kulana hiehie o keia hale hou mamuli o ka haleleta ano ole e ku la malaila aka oiai aole he wahi kupono e ae no ke kukulu ana i keia hale, ua hooholomuaia aku ka hana imua.

  Ke hoolalaia nei ke kii e Mr. Richley Herald.

KA LOKOMAIKAI A DILLINGHAM.

  Ua haawi makana aku o Mr. Dillingham i ka Waihona Buke o Hilo he $300, a mamuli o keia mau hana lokomaikai a keia kanaka puuwai hamama, ua panai mai na hoaloha o ka Waihona Buke i na mahalo ame na hoomaikai.

HALA O HON. F. C. LEBLOND.

  Ua haalele mai i keia ola ana ma kona home ma Celenia, Ohio, Nov. 9, ka Hon F. C. Le Blond, makuakane o C. M. Le Blond o Hilo.

  He nui kona manawa i komo ai iloko o ka Ahaolelo Lahui a ua Kamaaina hoi ma ke komohana waena a puni:--Herald.

 

Paniku Lunakanawai Liilii

i ka Hana ma Hilo.

 

  AO MAI O McKINLEY AME ROOSEVELT IA'U E HOAMERIKA I KEIA PAEAINA.

 

  HILO, Novemaba 27,--Ke hana nei o Lunakanawai Liilii me ka ikaika no ka hoamelika ana i na kupa o keia Paeaina, a ma ka Poaha nei, la 27 ka la kulaia hoomaikai i ke Akua, ua hooko iho la oia i na olelo a'o a na Peresidena o Amerika Huipuia.

  Ma ka Poaha nei i hala o kela pule aku nei, oiai kekahi Pukiki mea hoopaa aelike i ike iho ai ua hala ka manawa i oleloia ma kana aelike no ka hoomaikai ana i ke alanui Waianuenue, ua hoao aku la oia e paipai i kekahi o kona mau kanaka e hele i ka hana me ka uku kuike, a no keia mau olelo, ua hele aku la kekahi mau kanaka, ho-a i ke ahi o ke kaa-mahu a iloko o ka manawa pokole aia ke kaa-mahu ke nakolokolo 'la me ka hanakuli nui e hoomaikai ana hoi i ke alanui Waianuenue, me ka nana ole ae i ke kuahaua a ka Peresidena Rusawela, a oia iho la no hoi ka manawa o Lunakanawai Liilii i a'o aku ai ia lakou i kekahi o na haawina kiekie loa.

  Me Kapena Makai Lake ma kona aoao, ua hele kaapuni aku la laua ma na alanui apau a hoopau aku la i na kanaka e hana ana.

  Aole no ka makemake hana o ke kanaka ame ka uku aku o ka mea hoopaa aelike oia ka mea e pau ai o ka pilikia, aka, e maliu i ka leo o ka Lunakanawai no ka mea o kona leo he kanawai ia a o ka makai e ku ana malaila he halepaahao ia.

  No keia mau kumu, ua hoopioia iho la ke ahi o ke kaa-mahu a huli hoi aku la na kanaka hana no ko lakou mau home me na manao ano e no lakou e hookikinaia ana e hele i ka hana aole no e hiki no ka mea eia lakou malalo o kekahi aupuni i makemake nui e hoopololeiia ka hana me ke kue ole i ke kuahaua a kona Peresidena.

  Ua hoopii aku la kahi Pukiki i keia i ka Wiliki Gere o ka Keena Hana Aupuni a ua hele aku oia imua o ka lunakanawai.

  Imua o Kona Hanohano ua wehewehe aku la oia ua pilikia loa na kanaka i ke dala a ua makemake loa lakou i ka hana; ua hala ka manawa o ka aelike i oleloia, a aia ka mea hoopaa aelike ma ke alahele pilikia.

  "Aole," wahi a ka Lunakanawai Liilii, aia he elua wale no la nui Amerika ka la 4 o Iulai ame ka la 27 o Novemaba.

  Ua olelo mai o Peresidena McKinley ame Rusawela ia'u e hana au e like me ka hiki ia'u no ka hoamelika ana i na mokupuni o keia Paeaina a o ko'u kuleana keia.

  Ina i makemake na mea hoopaa aelike e hooko koke ia na olelo o la palapala, e hoohanaia na kanaka ame na kaa-mahu i ka manawa nui ole o na kaa e holoke ana, heaha ko lokou mea i hele ole ai e noi i ka Ilamuku e noa ka hana ma ka Lapule. Aole, aole loa e hiki ia'u ke ae aku i na kanaka e hana ma ka la nui o Amerika."

  Ma ke kauoha a ka Lunakanawai Liilii ua hoounaia aku na makai ma na wahi like ole no ka paniku ana i na hana.

 

Hakahaka Kahi o J. H.

Boyd.

 

(Kaomiia.)

 

  Ma ka Poalua i hala, Dec. 2, maloko o ka paia ihiihi o ka Aha Senate, ua waiho mai la ke komite o ke Keena o na Hana Hou e pili ana ia J. H. Boyd i ka lakou hoike, a mahope o na koho balota ana o na lala o ka senate, ua hoapono ae la ka hapanui o ka Hale e hookaawaleia o J. H. Boyd mai kona Keena aku ma ka 8 kue i ka 4.

  Mahope o ka hoike ana o ka senate i ke Kiaaina i keia mea ua hoike aku la oia ia J. H. Boyd ia mea.

  Ua waiho mai ke Komite o ke Keena Hana Aupuni i ka lakou hoike ma ke kakahiaka aka ma ke noi a ka aoao uuku ua hoopaneeia ka noonoo ana i ka hoike a ka auina la.

  I ka manawa i noho hou ai ka hale, ua noi ae o L. L. McCandless e hoaponoia ka hoike a ke komite. Ua noi mai o senatoa Kalauokalani e waihoia ka hoike maluna ma ka papa a e noonooia ma ka senate ku mau e hiki mai ana. Kue mai o senatoa Achi i keia noi no ka mea ua huhewa mawaho o na rula, aka, aohe oia i maliu ia aku, a kokua aku la o Nakapaahu e waihoia ka hoike ma ka papa a i ke Kau kumau ma ka makahiki 1903, ninau, haule. 8--5.

  Ma ka ninau ina e aponoia ka hoike a ke komite, ua koho lokahi ae na Repubalika ehiku a me hookahi Demokarata e aponoia ka hoike a ke komite a he elima wale no Home Rula i makemake ole e apono.

  Ua hoikeia aku keia hana a ka senate i ke Kiaaina a pau ae la no hoi ka moolelo o J. H. Boyd.

  Maloko o ka hoike a ke komite e olelo ana ua malama o Boyd i na dala i loaa mai no na aina maloko o ka banako me ka hoopaa ana ma kona inoa, a aole hoi i hoopaa maloko o kana buke; o keia mau loaa ua paa aku oia no hookahi makahiki a oi mamua o ka hoopaaia ana iloko o ka buke a haawiia aku i ke kakauolelo nui; o na dala i loaa mai na palapala kuleana mai no na apana o Tantalus he $1,195.00 me $231.39 ukupanee mai Novemaba 1897 a hiki i Feberuari, 1902, a aole i haawiia ma ke Keena o ka Puuku a hiki i ka mahina o Okatoba 27, 1902 mahope o ke kauoha ana o ke Kiaaina iaia no keia mau dala; o na loaa aina he $4,450.00 aole no oia i hoopaa maloko o kana buke. Mahope o na noii pono ana, ua manao kou komite o na hana pono ole a me ka hawawa o ka Luna Nui o na Hana Hou me na dala o ka lehulehu he mea ia e hoike mai ana i kona kupono ole ma ia oihana kiekie.

  Nolaila ke hoaiai nei makou i ka senate e aponoia ka manao o ke Kiaaina ma ka hookaawale ana ia J. H. Boyd mai ke Keena aku o na Hana Hou a e ao aku i ke Kiaaina e hana i keia.

  Ua kokoia kou komite no ka noii pono ana i na hoopii a ke Kiaaina ia J. H. Boyd, ka Luna Nui o na Hana Hou, aka ke manao nei makou e pono ke Keena a me kona mau lala e noii pono loa ia aku, a ke hoaiai nei makou e kohola i komite e noii pono i keia Keena ame kona mau lala, a e hoike mai i keia senate kumau e noho mai ana.

 

  E HOOMAKA I KA MANAWA KUPONO NO KA LAPAAU ANA I PAU AI KA NAEOA'IKU. O ka hoailona mua o keia ana ma'i oia ka paa o ka leo; a o ka hope aku oia no ka pii mai o ke kunu ikaika e ike koke ia aku ai i ka manawa e loheia ai ke kunu mai e ka mea i maa ia ano ma'i. O ka manawa maikai loa o ka lapaau ana oia ka manawa e paa mai ai ka leo o ke keiki. Ina e haawiia ka LAAU KUNU A CHAMBERLAIN o ka pau koke no ia me ka hakalia ole. Ina no i ka manawa o ke kunu maoli e haawiia ai, e pau ana no ka ma'i. Aohe he poino e loaa ana ma keia laau. He hala ole kana hoola a he hakalia ole. Ma ka Halekuai Laau o Benson Smith & Co., Ltd., na agena kuai kukaa e loaa ai no ke kumukuai kupono.

 

Ma ka Aha Senate.

 

(Kaomiia.)

 

  POAKOLU, Nov. 26, Hora 10 A. M.--Noho ka senate a no ka hana ole ua hoopaneeia ka Hale no ke kakahiaka Poaono, Nov. 29. Hora 10 A. M.

  POAONO, Nov. 29, Hora 10 A. M.--Waiho mai o senatoa W. C.Achi i kana hoike hoapono no na inoa o ka Papa Auhau koe o R. H. Atkins o Kohala. Hoaponoia ka hoike a senatoa Achi a hoikeia i ke Kiaaina.

  Hoaponoia ka hoike a Senatoa Dickey no na luna nana Paahao ame ka hoike a Senatoa S. W. Wilcox no na lala elua o ka Papa Hoonaauao.

  Heluhelu mai o Senatoa Isenburg, ka lunahoomalu o ka komite noii i ke Keena Hoola i ka lakou hoike e kue loa ana i na hana a Aukakini e apono ana i ka manao o ke Kiaaina e hookaawaleia o Mr. H. C. Aukakini mai ke keena ae. Aponoia ka hoike 8-6.

  Hoikeia ka hana a ka senate i ke Kiaaina a hoopaneeia ka hale no ka hora 10 A. M. o ka Poakahi.

  POAKAHI, Dec. 1, Hora 10 A. M.--Heluheluia ka moolelo o ka hale. Aoia ke Kakauolelo e hookomo iloko o ka moolelo ka hoike piha a na komite ame ka leta a ke Kiaaina ma o Kona Kakauolelo la.

  Hoopaneeia ka Hale no ka hora 10 A. M. Poalua.

  POALUA, Dec. 2, Hora 10 A. M.--Heluheluia ka hoike a ke Komite o ke Keena o na Hana Hou, a aponoia ka hoike, heluheluia ka hoike a ke komite o ka Keena Puuku a aponoia. Kohoia mai na komite o ka bila Kalana ame Kulanakauhale e like me ka Olelo hooholo a W. C. Achi.

  Oahu, C. L. Crabbe ame L. L. McCandless; Hawaii, P. P. Woods; Maui S. E. Kaiue; Kauai, S. W. Wilcox.

  Hoopaneeia ka hale no ka kakahiaka Poakolu, hora 10 A. M.

  POAKOLU, Dec 3, Hora 10 A. M. Heluheluia ka hoike a ke komite o ka Papa Hoonaauao e mahalo ana i na mea lawelawe o loko o ia Keena. Kumai o L. L. McCandless a kue i ka hoololi ana i ke kahua o Keoneula a i Kahuku. Ku mai o Paul Isenburg a apono i ka hoike a ke komite, Na senatoa Dickey e laweia ka hoike a e k@ala. oiai aolo he me@ hooialo hoapono maloko o ka hoike. Kokua o W. C. Achi i ka L. L. McCandless. Kokua o Kalauokalani e laweia ka hoike a hoopaaia. Haule ka noi a Achi, a holo ka noi a Dickey.

  Heluhelu mai o Dickey i ka hoike a ke komite o ke Keena Kuhina Kalaiaina, a maloko o ua hoike nei e hoomaikai ana i na hana i hanaia maloko o ke keena; mahalo ana i ka Oihana Makai i ka malama maikai i ka lakou buke, a e apono ana i ke kohola ana i kokua no ke Komikina Aina Aupuni.

  "Ua apono au me kou mau hoa i ka hoike maluna ae koe ka panina hope loa e pili ana i kokua no ke Komikina Aina Aupuni.

  Manao wau aole kela he hana pono o ka hoonui ana aku i ka huina helu o na luna."

                       W. C. ACHI,

  "Waiho mai ke komite o ke Keena Aina Aupuni i ka lakou hoike; apono ke Komite e Koho hou ia i 3 lala o ka Senate e noii pono i keia Keena a e hoike mai i ka Ahaolelo Kumau, A. D. 1903.

               L. L. McCANDLESS,

               C. H. DICKEY,

               J. B. KAOHI."

  Heluheluia na leta hooia a ke Kiaaina no ka loa ana iaia na leta a ka Senate, a hoopaneeia ka Hale.

 

Nui Ka Poe Ohumu.

 

  E PAU NO NA OHUMU KE HOOLOHE KO HONOLULU NEI POE I KEIA OLELO A'O.

 

  O ke kuahaneenee oia ka mea mua o ka ohumuhumu ame ka uiha.

  O na puupaa mai ke kumu o ia pilikia ke nana pono ole ia.

  E nana pono i na pilikia oiai e hiki i'o mai ana lakou.

  Na eha o ka puumimi ame na puupaa ame na pilikia e ae.

  Ua hanaia na HUAALE KUAHANEENEE AME PUUPAA A DOAN no la mau ma'i apau.

  He hiki lakou ke hoola i na ano ma'i puupaa apau.

  Eia na hooiaio no na ike o ko Honolulu nei poe.

  Eia kekahi ma'i i pili loa ilaila.

  Hoike mai la o Mr. Metcalf o loko nei o keia kulanakauhale, penei: "Ua loohia au i kekahi eha ma kuu kua no na makahiki elima a oi aku. O na laau he lehulehu wale a'u i hoao ai, aole loaa la'u ka pono, a hiki wale i ka hoike ana mai a kahi hoaloha (oia o Mr. W. J. Maxwell) la'u i kahi laau maikai loa, a ua kuai aku la au i ua laau maikai loa nei, oia hoi na Huaale a Doan no ke Kikala Haneenee ame na Puupaa, ma kahi o Holister Drug Co. Aole i pau loa na huaale o ua poho mua la. ua kaawale aku la ka eha mai ia'u aku, a ua ola loa ae la hoi au mai keia eha weliweli i loaa ia'u. Mamuli o ka malama ana i poho o ua mau Huaale la iloko o ka hale, he mea ia e hiki ai ia'u ke akeakea aku i ka lapu hou ana mai o ua eha la maluna o'u. He kohu hana mana maoli ke kaawale ana 'ku o keia eha mai a'u aku. O ka poe apau i eha ia ko lakou mau kua, he mea pono ke kuai i na Huaale a Doan no ke Kikala Haneenee ame na Puupaa."

  E kuaiia aku ana na Huaale a Doan no ke Kikala Haneenee me na Puupaa e na poe kawili laau lapaau apau, ma ke 50 keneta no ke poho, a he $2.50 no 6 poho, a i ole, e hoounaia aku no ma ke Eke Leta e Hollister Drug Co., Honolulu, ke loaa mai ke kumukuai.

 

  Ua powaia kekahi Iapana Kalaiwa Kaa oiai oia e kalaiwa ana i kekahi ohua no Makiki. Ua olelo ae oia ua like kona ano me ka Porto Rico.

 

  E paani peku popo ana na keiki o Punahou ame na keiki o Honolulu ma ka hora 3:30 P. M. o ka la apopo, a ma ke ahiahi 7:30 e malamaia ana he kuikui puupuu mawaena o Weday ame Woods.

 

Laau Ili no na Bebe

NO KONA POO A ME KONA LAUOHO

Kek@hi mea ano nui loa aia Makuahine e noonoo nui

    UA HANAUIA KELA A ME KEIA KEIKI ILOKO O KA HONUA NEI me ke ewe o na mai lehulehu e ulu mai ana iloko o ka ili ke poo a e lilo ana hoi ke koko ia wa i mea nui loa no l@a panee ana i keia popilikia, a pela ililo ai ia i mea nui loa e hookaumaha mau ai i ka noonoo o kela a me keia mea i oohia i ka nali ana a na ma'i lehulehu. Aole keia mea i hookaumaha ia ma kekahi ano e ae, aka, mamuli no o la hoopalalehaia ana e ka mea i kupono e malama a makaala i kela poino. Nolaila, ua lili i kumuhana na keia ame keia makuahine maikai e makaala mau ai i ka lakou mau keiki e loohia ana i na popilikia lehulehu e ulu mai ana namuli o ke koko ino, e hookamaaina mau lakou me na mea a pa ue hiki a ke pale aku i keia mau popilikia lehulehu, i mea hoi e loaa ai ke ola mailai, malalo o na lapaau noeau ana me ka hikiwawe a me ke ola loa no hoi.

    Ua olelo ia o k aauau me ka wai @u mehana a me ke KOPA CUTIKURA no ka hoomaemae ana i ka ili no ka papaa i ka lepo a me kahi mau ino e ae, a pela hoi no ka unahi-pii, a pela hoi, ina ka e kapili malie i ka Aila Hamo CUTIKURA no ka hooki koke ana i ka maneo o ka ili, ka eeke ano manene o ka ili ame ka pehu, a pela hoi no ka hoomalielie ana i ka hu'i a me ka hoola ana i na palapu, a mahope aku oia wa, ina ka e inu i ka Laau Hoohainu CUTIKURA, oia wale ae la @o ka na mea a pau e hana ai uo ka pale ana aku i keia mau kinaunau o @a keiki liilii i na wa apau e hoomaka mai ai, a ina no ua loaa mua, he mea pau wale no ia i keia mau laau ae la, ke malama pono ia na kuhikuhi. Ma keia hana ana pela, e loaa ai i na makuahine hoomanawanui ka maha a me k oluolu o ka naau, a he mea no hoi ia no lakou e hookaumaha ole ia ai i na wa a pau. Ua hooiaia keia mau haawina pomaikai ma na home lehulehu a puni ka aina.

    Mamuli o ka momona, ka maemaae ame ka hikiwawe o ke ola o keia l@au, i makemake nui ia ai e na lahui kanaka a pau i hoao a ikemaka i kona waiwai nui ma ke ano hoola, a pela no hoi i hilinai nui ia ai kona waiwai no ka hoopakele ana i ka luhi a me ke kaumaha o na makua lehulehu ma na wahi a pau, a pela no i malama nui ia ai maloko o na home.

HE HOOLA MAOPOPO NO NA MA'I MALOKO A MAWAHO O KE

KINO.

    Oia hoi ke KOPA CUTICURA e hoomaemae ai i ka ili a me ke kepia o ke poo a hoowaliwali i ka alualu, o ka AILA CUTICURA HAMO no ka hoepau koke i ka maneo a hooluolu a hoola, a me ke CUTICURA RESOLVENT no ka hooluolu a hoomaemae ana i ke koko. Ke kuaiia nei ma na wahi a paa o ka honua nei. Keena Kuai ma Auseteralia, R. Towns & Co., Sydney, N, S. W. Keena ma Aferika Hema, Lamron Ltd., Cape Town. "I loaa ai ka ili pahee maikai, ka lauoho a me na lima,"

    O POTTER DRUG AND CHEM. COMP., Boston, U. S. A., na Ona o na laau CUTICURA a pau loa.

 

$25    -    Pu Kiko Ole    -  $25

PAUDA AME LU, PU-PANAPANA PU RAIFELA AME NA LAKO O KA POE PAANI.

 

       PEARSON & POTTER CO., Ltd.

                       Alanui Hotele me

                                        me Uniona.

 

  Halekuai Papale o

MONTANO

 

                  . . . . WAIWAI O KE ANO HOU LOA

 

Papale  Wahine  lipine  a  lipine ole,

ame na papale i makaukau.   Na

hulu manu me na pua papale

o  ke  ano  hou  loa.

 

ARLINGTON HALE     :     :     :    ALANUI HOTELE

 

NEE   .   .   .

i ke Alanui Papu

Mai Elite Hale mai, Alanui Hotele.

. . .

Ua Nee ae nei ka NEW YORK DENTAL

PARLORS i ke Alanui Papu

Mawaena o na Alanui Moi

ame Hotele.

 

  Ua wehe ae nei makou he mau keena nui ae maikai ae, kahi a makou e hoonui ae ai i ka makou hana mamua o kahi mua, a ua ike na mea apau i ka nui mau o ka makou hana ma Honolulu nei mai ka manawa i hiki mai ai ianei.

  O ka makou na auhau haahaa loa no na hana kupono. He hooiaioia na hana ame na lako no ko lakou maikai. He hukiia na niho me ka eha ole. Hele mai e ike ia makou. Aohe auhau no ka nana ana.

  O ka wahine kokua ka mea kamailio ma ka olelo Hawaii.

New  York  Dental  Parlors

  Helu 1057, Alanui Papu mawaena o na Alanui Moi ame Hotele.

Moi Poina i ka Helu 1057

 

  E pono oukou e kipa ae ma ka halekuai o Ozaki ma ke Alanui Hotele, i loaa ai na makana Kalikimaka kupono no ka ui a oukou. Nui na waiwai Kepani nani e hewa ai ka maka o ka hoa.

 

  Ke holopapa a ke holomua nei na hana kipa ame na lulu ma ke kaona nei, kahi hoi o na wahine ame na kane Hawaii e hoohala a e awaiaulu pu nei ma keia hana. He mau hana kupono ole keia e hoolakalakaia nei ma keia taona nei, a o ka panikuia ana o keia mau hana, oia maoli no ke alahele o ka pono ame ka pololei.

 

Poe Akepau i loaa hou

ke OIa Kino Maikai.

 

  Ke hoike mau mai nei na Kauka ia makou mai na wahi like ole mai o ke ao nei no ka nui o ka poe i aneane e loaa i ka ma'i Akepau i hoopakele ia mai keia ma'i mai mamuli o ka laau

"AYER'S CHERRY PECTORAL."

  Ke loaa i keia laau e loaa ana i ka ma'i ka ma'i ka maha no ka wa mau loa, a aole no kekahi manawa pokole e like me kekahi ano laau okoa ae.

  Aohe Laau Kunu i oi ae o ka maikai mamua o ka LAAU KUNU

"AYER'S CHERRY PECTORAL."

He mea maikai e ike kakou i keia, no ka mea ua hoola keia laau i ka poe i loaa i keia haawina no aneane kanaono makahiki. E malama mau i keia laau. Ina aole au omole laau kunu o keia ano, e kuai koke mamua o ka loaa ana i ke kunu. Ina ua loaa kekahi iloko o ka ohana i ke anu e hooinu i keia laau a e loaa no ka maha.

  Hoomakaukau ia e Kauka J. C. Ayers & Co., Lowell, Mass., U. S. A.

  E loaa no keia mau Huaale ma na halekuai laau a pau.

 

  Nui ka hana a ka Senate Kuikawa i keia mau pule iho nei, a ua aneane nui no e papauaho.

  Nawai no e ole ka nui o ka hana, oiai ua poonaola ke kahua paa o ke aupuni e kekahi mau Luna hana pono ole a ua aneane no e hiolo kona mau pou; nui no ka makaala o ke Kiaaina i ka pono o ka lehulehu.