Ka Nupepa Kuokoa, Volume XL, Number 48, 28 Nowemapa 1902 — Na Mea Hou o Hana. [ARTICLE]

Na Mea Hou o Hana.

E Mr. Lunahooponopono, me ka Mahalo: E oluolu e hookomo iho ma kahi kaawale o kau pepa i keia mau hua e kau ae la maluna; he mau la loihi keia i hala ae nei, akahi no au a hiki hou aku maluna o kou pakaukau. KA LA 4 O NOVEMABA 1902. He la ia i hiaai nui ia e na aoao Kalaiaina apau iloko o keia Teritori, a he la hoi e hiki ole ke poina ia e ka po apau, i ka welo ana o "Kihei-ahealoa" i ka aoao Repubalika ma ka Apana nei o Hana. O ka mahele koho Balota o Hana nei kekahi wahi i uhiia e ka mana o ka Home Rula, ina e nana ia i ke kau i hala o ka ikaika huki like o ka Home Rula he Haneri a oi balota i ko na Repubalika he Kanaha kumamaiwa wale no, a i keia kau hoi, o ka ikaika huki like i ka paa o ka aoao Repubalika he Kanaiwa alota, i ko ka Home Rula, he Kanahiki, nolaila, ua oi ae ka ikaika o ka Repubalika i keia kau mamua o ke Kau i hala, nolaila, ke hoomaikai aku nei no ka Aoao Repubalika i ka Aoao Home Rule i ko lakou ku ana a hoi mai ma ka aoao e loaa ai ka maha a me ka malu. Ma ka hora 11:30 A. M. o ka la i oleloia, ua ike ia aku ka huakai o ka Home Rule, e maki mai ana no ka pahu balota, a iluna hoi o na kaa me na gita e kani ana, a me na hae hoi i kuni ia me na huaolelo "Wela ka hao i ka Home Rule," me ka maluhia wale no keia mau hana ana. A ia wa hookahi no hoi, i poha mai ai ke oeoe o ke kaa-ahi e lawe mai ana i ka huakai o na Repubalika o Nahiku ame ko Kaeleku, a maki mai la no hoi no kahi koho, he nani wale no keia mau hana ana aole

he mau haunaele a hiki i ka pau ana o na hale oia la. He papaaina i malamaia ma ia la, mamuli o ka lulu dala ana a na Home Rule ame na Repubalika, a ua hoopiha ia ka lua o ka inaina o na poe i hele ae no na hana oia la. Ma ke Sabati la 9 ae, ua hookolokolo ia iwaena o na Home Rula kekahi alakai oia aoao, ua manaoia ua koho oia ma ka aoao Repubalika, a ma ia halawai i hiki kino aku ai o Mr. W. L. Hardy o Ulaino, a ke alakai nei oia i na Home Rula e hoomau aku i ka hoopaakiki ana, he mea pono ke ao kanaka mai kakou, malia he pono io no i ka aoao Repubalika elike me ka lakou i hai aku ai ia oukou. KA HALE WILI HOU. Ma ka Poaono la 15 iho nei i hoao ae ai ka Halewili hou o Hana nei i kona mau mea paa hana hou loa, no keia kikina e nee nei, ke oni nei na ku-e, a ke oniu nei hoi na huila, ua oia aku ka holopono o keia i ko ka wa i hala; ua hoonui hou ia ae na Nau o keia ame na mea paahana hou, aka, o ka uuku wale no ka hewa o ke ko, aole no paha e emo pau ae no keia mau wahi ko, a kali aku a hiki i ke oo hou ana. He mahalo nae i na poe mikiala hana, a hooholo hoi i na hana imi waiwai imua a e hoopomaikai ai i ka aina ame na lehulehu. HIHIA KUAI RAMA. Ma ka Poakahi la 17 iho nei i hoopuka mai ai ka Lunakanawai J. K. Hanuna i kana Olelo Hooholo e ahewa ana i ka mea kue Kanawai, ma ka hoopai ana he Hookahi Haneri Dala ame na Koina Aha. Nui no kela mau a-la. Ua kaulana o Hana nei i ke kuai waiona, a mai ia manawa mai a hiki iho la i ka la 17 akahi no hihia oia ano i paa i ka hopu ia a hoopai ia. O na kokua o ka mea hoopii ia, oia o Hon. W. P. Haia ame J. K. Iosepa a o F. Wittrock H. Z. Kapio me Jas. H. S. Kaleo na kokua ma ka aoao o ke Aupuni. He mau la okaikai keia o Hana nei, ke hele la a popoi ke kai i kumupali, a ke hoomalie mai nei nae hoi. He mau wahi mea hou ae la ia o kuaaina nei, me ka manaolana e halawai hou aku ana no kaua. Me ka Mahalo MEA KAKAU, Hana Nov. 17, 1902.