Ka Nupepa Kuokoa, Volume XL, Number 48, 28 November 1902 — Page 6

Ka Nupepa Kuokoa

KE KILOHANA POOKELA NO KA LAHUI HAWAII.

 

NOVEMBA 28, 1902

 

6

He oia ke ano kuli, oia hoi, ke kulana kuli i emi mai ka lohe ana e loaa ai ka manaolana no ka lapaau a na. O na ma`i kuli i hoikeia ae no ka loaa ole o ke ola eia nae he ola no i ka Aila Inikini Kikapu, a ina o oe kekahi iloko o ia kulana, mai kuihe ka manao aka e hoolana. Aole he nui o ka lilo ma ka hoao ana a aohe he poino e loaa an ila oe ma ka hoao ana a e loaa i`o ana io oe ka pomaikai.

 

KA AILA KIKAPU

Ka Hoola o ka Ma`i Kuli.

 

            “Aia he mau manawa iloko o na makahiki i hala aku i komo ai au iloko o ka ma`i kuli o ka pepeiao, ka mea i hooulu mai i ka pilikia nui ma ko`u aoao. Ua lapaau mai kekahi poe laau lapaau ia`u aole nae he loaa iki ia`u ka maha a hiki wale i ko`u lawe ana i ka Aila Inikini Kikapu a oia ka mea nana i hoihoi mai i ka lohe o kuu mau pepeiao. Ua hoihoi mai oia i ka lohe maoli o kuu mau pepeiao. He mau makahiki ka loihi ae nei o keia mau mea a oia mau ka maikai o ka lohe o kuu mau pepeiao a hiki wale i keia manawa.”—H. Hemingway, no Montrose, N.Y.

 

:o:

 

HE 25 KENETA NO KA OMOLE HOOKAHI A HE LOAA I NA HALEKUAI LAAU LAPAAU APAU.

 

Make mainoino na I`a.

 

            Oiai ka makai kaulio, Kapena Huka e holoholo ana ma kana kuakai ma ke alanui Waikiki, aia hoi ua lohe aku la oia i kekahi mea i pahu mai kekahi wahi mai kokoke ma kahi o ka Moiwahine Liliuokalani.

 

            Ua kiei aku la kahi makai kaulio maluna ae o ka pa, a imua o kona mau lena maka, ua ike aku la oia he elua mau kanaka kokoke ma kekahi waa e ohi ana i ka i`a mai loko mai o ke kai.

 

            I kela manawa ua ike maopopo loa iho la kahi makai kaulio he kiana pauka ka laua mea make e pepehi nei i ka i`a, ua kakali iho la keia no ko laua huli hoi mai.

 

            Ua hala aku la ua makai nei maloko o kekahi alanui olowi a waiho aku la i kona lio, ame he popoki la, ua kakali aku la ua wahi makai nei kokoke ma kahi o ka waapa e lana ana.

 

            Iloko o ka manawa pokole ua hoea mai la ua mau kanaka nei ma kahi o ka waa e lana ana, a i keia manawa hookahi no ua lele mai la ua kapena makai nei a paa iho la laua.

 

            He mau kanaka keia i oo a o kekahi e laua ua lilo ka lima mamuli no o ka hana a ke kiana pauda.

 

            Ua haawi ae laua i ko laua mau inoa, e kaluahine ame Kumakaihi.

 

            Iloko o kahi waa o laua, ua loaa aku i ka makai e eke manini; iloko o ka eke buke he elua mau owili kiana i hoomakaukauaia.

 

            Iloko o kekahi apana pepa i hikiia ua loaa hou aku he eha mau owili ame kekahi poho kini uuku i piha me na kukepele.

 

            Ua keleponaia mai ke kaa o ka halewai a ua laweia aku la laua ma Kuapapanui kahi i hookauia aku ai ka hoopii, ka pepehi i`a ku i ke kanawai.

 

Imua o ka Lunakanawai De Bolt.

 

            Ua hoea ae imua o Lunakanawai De Bolt ka hihia o Lothario no ka hoowalewale i kekahi kaikamahine. He Pukiki opio poupou keia a he maikai hoi kona wahi umiumi, me na minoaka no nae o ka hookamani; he maikai a he ui no hoi ka helehelena o kahi kaikamahine, aka o kana mau hoike e hoaiai maopopo loa mai ana no ia aole oia he kaikamahine hoopono loa.

 

            No keia mau hoike a ke kaikimahine ma kona aoao, ua hoapono mai la ka Lunakanawai De Bolt i kana mau olelo ma ka aoao pale.

 

            O na leta hooipoipo a laua i kakau ai, ua heluheluia ae iloko o ka aha hookolokolo, a penei kekahi oia mau leta:

 

Honolulu, T. H. Iulai 9, 1902.

 

Miss Hana.

            “Ka`u Ipo Aloha Ua hauoli au i ke kakau ana aku ia oe i keia wahi mau iaina pokole o ke aloha, me ka manaolana i kou ola maikai e like no hoi me au i keia manawa. Oiai o keia ka mua o ka`u mau laina aloha ia oe ke manao nei au e loaa pono ana keia leta ia oe me ka maikai.

 

            E Hana ka`u aloha, i kou manawa i kau aku ai iluna o ka moku ma ka Poalua nei ua manao au e make ana au, no ka mea ua hoao au e holo pu me oe aole nae e hiki. Ua holo aku oe ma ka moana akea a ua noho iho wau ma ka aina nei e noonoo ana ia oe e kuu aloha e haalele mai la ia`u.

 

            O na aakoko iloko o kuu kino e haalulu mau ana ia no ka haupu mau ia oe e kuu aloha ina la apau, hoi hou mai hoi oe me a`u ahea la hiki aku ia manawa.

 

            Ke wela nei kuu puuwai me ke aloha ia oe a ke iini nui nei au pela no hoi oe; ke haawi aku nei au ia oe i kuu good-bye, e kakau mai i leta na`u ma ka moku mua.

 

                        “Hana kuu aloha,

           

            “E kakali ana au a e kiai ana me ka moe uhane mau ia oe.

 

                        Kou oiaio,

                        A. PERRY

 

            Good-bye hou Kuu aloha mai poina ia`u.

 

                        “Honolulu, Maarch 4, 1902.

 

            “Kuu aloha: Ka malamalama o kuu puuwai auwe e kuu aloha e hoike aku wa ia oe kuu ano i ko`u manawa i haalele aku ai ia oe i ka po nei.

 

            He 6 a 7 manawa a`u i hoao ai e huli e nana aku hoi la oe aka aole au i ike aku ia oe. Ua ike no wau he poeleele haahaa hoi na aouli a ua napoo aku noi ka la ma kona wahi maa mau. Ua manao hoi au e ike aku i kou mau papa ina maikai aka o ka mea wale no a`u i ike oia no ka malamalama ma kahi @ uuku.”

 

            @ ke Kula o Kamehameha ke hanai puaa nei a le momona maoli no na puaa e makepono ai na okeni, a o ka poe e ake ana e loaa na puaa momona e @ e @ no ka makemake ma ka hele ana ilaila aole e nele ka hookoia o ka makemake no ke kumukuai kapono.

 

E heluhelu i keia apau.

 

Aole Oe i Ike i ka Manawa e Nui ai Keia Manao.

 

(Mai ka Nupepa Sydney Herald mai.)

 

            He mea waiwai nui ka loaa ana o ka ike i na kamaaina o Honolulu nei pili i ka waiwai i`o ame ka hoohana ana o ka laau lapaau, oiai, ina e loaa ole ana kekahi hana e hoohana ai i ua mea nei, eia nae aia no he manawa e hoohanaia, ai no ka mea, aia ke ano o ke kanaka iloko o na ano powehiwehi o ka manawa i maopopo mua ole, e hiki ole ai i ka poe naauao loa ke alo ae ia mau mea o ka manawa e hiki mai ana. Alaila e hoomaopopo ia ka AILA HAMO A DOAN ke hiki ke hoola i na ma`i puupuu o ka ili. Hookahi no kau ana o ka olu no ia o ka manao a o ka hoomau ana oia no hoi ke ola loa ana.

 

            Eia iho kekahi ma`i i ike ia: Eia ka Mr William Gilliver o ka Hui Alahao o Gilliver & Curtis, nona hoi ka hua uwila o “Avoca,” Bankstown, a penei oia i kakau ai; a ua pa`i piha ia keia leta:

 

            Messrs. Foster-McClellen Co., 76 Pitt St., Sydney, N. S. W., Feberuary 14, 1899.

 

            Aloha oukou:--I mea e pomaikai ai olua ame ka lahui a puni e noho ana iloko o na ehaeha he nui, a i loohia nui hoi i na kinaunau o ke kino mamuli o ka ai ana a ka meeau ame ka maneo o ke kino, nolaila keia wahi noakaka akea. He 22 o`u makahiki iloko o ka ehaeha o ka ma`i he meeau. Ua hoao au i na kauka lehulehu a aole nae i loaa ka pono, he wahi maha iki wale ae no a mea oili hou no. Ua nui maoli no ka pilikia mamuli o keia mau kinaunau. I kuu ike ana i ka oukou hoolaha, ua kuai koke au i poho laau hamo na`u, a i kuu hoao ana hookahi hapalua o ua poho nei, o ka hoomaka mai no ia o ke ola, a i keia wa ua, ola loa ia au. E hoolaha aku oukou i keia elike me ka makemake.

 

            Me ka mahalo,

            WILLIAM GILLIVER.

 

            Ke kuaiia keia laau a DOAN ma na halekuai laau apau, no ke 50 keneta o ke poho; a e hoounaia no ma ka leta ke loaa mua mai ke kumukuai ia HOLLISTER DRUG CO.,  Honolulu, na Agena no Ko Hawaii Paeaina.

 

Ke hooneeia nei ka Bila Kalana ame Kulanakauhale imua.

 

HOOPAUKIKI NA KOMISINA MALUNA O KEIA BILA.

 

            Ma ka Poalima i hala, Nov. 21, ua malamaia ka halawai a na komisina Hana Bila Kalana ame Kulanakauhale ma ke Keena Hoolulu o na Repubalika, a ua kukakuka nui na lala maluna o keia mau bila e hanaia nei. Maloko o keia ua ikeia kekahi mau ke`ake`a, a ua ike pu ia kekahi mau pauku o na bila i hanaia e hooholoia kekahi mau mea e hooholo pono ia ai hoi ka hana a ka Loio Amerika Breckons, oiai aia ma kona lima e hana ia nei a e hoopihapiha nei i ka iwi kuamoo o keia bila kulanakauhale. Ua kopeia ka palapala mua o keia kanawai mahope o na kanawai o Wyoming, a o ka mea e noonoo nui wale ia nei oia no ka hookomo ana maloko o keia bila i kekahi mau mea mai ka bila kulanakauhale mai (Kaleponi, i mea hoi e hoomaikai loa ia aku ai ke kulana kuloko o keia teritori.

 

            O ka pilikia i halawai me lakou ma keia hana ana oia no ka hoao ana e nihi mawaho ae o na kahua i hoakaka pono ia ma ke Kanawai Okana.

 

            Ke noonoo mau nei na loio o na komisina maluna o ke kanawai Okana, a ua loaa ia lakou ka ike maopopo i kekahi mau ke`ake`a i ka hoapono ana i na kanawai o na mokuaina no keia teritori mamuli o keia kanawai Okana.

 

            Ua hoomaopopoia, o ka la e hooholoia o keia bila, ke ano o ka malama ana i ke koho balota mua ame kekahi mau hoakaka no na loaa aupuni, no ka nooholomua ana i ka apana i na mahina mua a hiki i ke komo ana mai o ka auhau kuloko oia na mea a na komisina e noonoo nui nei.

 

            I KA MANAWA E HIKI PONO OLE AI AA OE KE MOE MAMULI O KE KUNU, he mea kupono a he hana pono loa no hoi na kekahi mea e hai aku ia oe no kou lawe ana i mau wahi oolopu o ka laau LAPAAU KUNU A CHAMBERLAIN i mea e holoiia ae ai ka maneo o ka puu ame ka eha o ka puu ame ka loaa pu aku o ka hiamoe oluolu ana i ka po. Aole e hala kana mana hoola aole no hoi e hakaila ka hoola ana. E loaa no ka laau kunu a Chamberlain ma ka halekua laau lapaau o Benson, Smith & Co., na agena no ke kumukuai kupono ma ke kuike.

 

Mea hou o na Awakumoku.

 

KA ELELE WILIKOKI MALUNA O KA MOKUMAHU “KINA.”

 

Uuku iki na aloha mai na hoaloha aku.

 

            Ma ka po Poalua i hala, Nov. 18, ua haalele iho ka Elele Wilikoki i ke kulanakauhale nei no ka Ahaolelo Lahui e noho mai ana ma ke kau pokole i keia mahina ae.

 

            He mau hoaloha kakaikahi ka i hoea aku ma kai o ka uwapono ka ike ana iaia a no ka haawi ana iaia i ke aloha pumehana, aka o keia mau heluna kakaikahi ua hoolilo ia ae ko lakou noonoo maluna o kekahi kanaka ona e noke ana i ka uwa a hiki i kona ha ana.

 

“Huro no Wilikoki! Hipa!! Hipa huro,” aka aole i huo like na kanaka kakaikahi i kupono ai hoi e haawiia i hapaumi, aka o ka mea i loheia aku oia no ka leo o kekahi kanaka i piha me ka hauoli, e uwa ana.

 

            “Aole huro? Polo-lei. He Repubalika wau. Ua pau ka Home Rula. He Home Rula wau i na lanakila ka Home Rula, a he Repubalika polo-lei wau i na lanakila ka Repubalika. Huro”

 

            Ua pai hou aku kekahi kanaka e haawi i huro aka aole i hooko ia ia makemake.

 

            Ua hoao aku na hoaloha pilipaa o ka Elele Wilikoki e keakea i keia mau hana pono ole a keia kanaka ona, aka aole i hiki oiai ua piha hauoli na mea apau i kana mau hana hoakaaka, a i kona manawa i haiolelo mai ai e olelo ana e ponoo Wilikoki e kukulu i pa pohaku a puni keia mau mokupuni ewalu no ke ke`ake`a ana aku i na Repubalika i ke komo ana mai iloko, ua hehe nui ae la ka aka o na kanaka a pau i akoakoa ae malaila.

 

            I kekahi kiu mea hou ua hoike aku la o Wilikoki aole ana mau hoolala no kekahi mau bila ana hoi e hookomo aku ai ma keia kau pokole no ka pomaikai o Hawaii.

 

            Ua manao oia e noonoo ana oia i kana hana ma kona alahele no Amerika Huipuia.

 

            E pili ana no ka Home Rula o keia mua aku ua olelo ae o Wilikoki he nui ka manawa hana no keia mau makahiki elua ae. Ua manao oia he lanakila no kona ina i hoohana pono na Demmokarata me na hoolala i hoaponoia.

 

            He nui ae ka poe o Hawaii nei i kau aku maluna o ka moku no ka Ipuka Gula o Kapalakiko a i ka hapalua hora 7 o ke ahiahi ua ahai aku ua kaeaea nei ia Wilikoki ma no Kaleponi me na manao kuihe ole i ka ino ame ka makani e halia ana imua o ke alo.

 

INO KA MOANA.

 

            Ua ku mai, ma ka Poalua i hala, Nov. 18, ka moku Mauna Loa mai Kona mau awa maa mau o Hawaii, Maui ame Molokai a hoike mai la i ka ino o ka moana, makani ikaika, a me ka ua ma Hamakua. Ua hoike pu mai la kona hulipahu i ka inoo Kau.

 

            Ma ke awa o Punaluu, ua hiki pono ole i na kela moku ke hoopiha i ka moku oiai e paialewa wale ia ana no kahi waapa me he apana pepa la. Ma kona ala hele huli hoi mai nei ua halawai aku oia me na makani ikaika o ka hikina akau.

 

MOKUKAUA NEW YORK NO KAPALAKIKO.

 

            Ua hala aku no ka Ipuka Gula o Kapalakiko ka mokukaua New York, ma ka Poalua i hala, Nov. 18. O keia ka mokukaua Amerika i ku iho nei ma ke awa o Kou me ka hiehie nui ame ka nani kilakila a i hoopukaia hoi Kona kii ma ka aoao mua o ka nupepa Kuokoa ma ka pule i hala. Me he la ua halawai aku la oia me ka ino ame ka makani, aka ua olelo ae kona mau aliimoku he ano maikai ole kana mau hana i ka wa ino, e lawe ana maloko o kona ihu i na ale nunui, a e hoohoihoi ole ana hoi i na kela o luna ona. Ua manaoia e kapalulu aku ana oia ma Kapalakiko iloko o na la eono.

 

ELUA KALEPA NO KAPALAKIKO.

 

            Ua hala aku no Kapalakiko ma ka Poalua i hala, Nov. 18, he elua mau moku kalepa, ka moku kalepa Falani Vincennes ame ka moku kia kolu Albert.

 

            Ua lawe akuka moku Falani maloko o kona lua he lanahu a o Albeert he mau eke kopaa.

 

HE ELUA MAU LAWEHALA.

 

            Aia ma kekahi lumi o ka mokukaua Amelika New York i holo aku nei i Kapalakiko ame ke kiai o kekahi mau koa malina, he elua mau lawehala, a e laweia ana laua no Kapalakiko no ka hana ana ma ka halepaahao no umi makahiki no kekahi kalaima i hanaia.

 

            Hookahi he kanaka puhi ohe helu ekahi, a o kekahi he kulana hulipahu kana. Ua huna loa ia ke ano o keia hihia mai a ka lehulehu aku.

 

He lio iloko o ka ehaeha.—B.H.

 

            Imua o ka maka o ka ehulehu a mamua pono o ke alo o Kuapapanui, ua hoikeia ae ke aloha ole o kekahi kepani kalaiwakaa kikane i kona lio. Ua laweia mai keia Kepani e kekahi o na kapena makai, a ua hoohikileleia na kanaka apau i ka ike ana i keia mau lio wiwi launa ole i ka hoohanaia e huki i keia kaa kikane kaumaha nui hewahewa. Maluna o ka helehelena o keia mau lio me ha la e olelo maopopo mai ana, “Eia maua la ke hoohanaia nei iloko o ka ehaeha hohonu. Aohe o maua hanai pono ia i ka ai. E nana mai oukou i ko maua ehaeha aia maluna o ko maua kua, a e hoopakele ae hoi oukou ia maua mai ka hoohana ia mai.”

 

EMI LOA NA AUHAU NO KA HANA HUKI NIHO

w. e. Allen, D.D.S.          F.L. Ferguson, D.D.S.

 

Hoopiha me ke Kala               50 keneta

Hoopiha me ke Gula               $1.00 a pili aku

Papa Niho Gula }

Papa Niho Kala}                     $5

Papa Niho Maoli}

Papa Niho piha pono               $5

Huki ana i ka Niho                  50c

 

            He makaukau no hoi na hoohana ana aia ma ARLINGTON HALE,  HELU 215 ma kahi aoao o na Alanui Hotele ame Uniona

 

            He mau Kauka makaukau loa laua a ina oe e hele i`aila aole e nele ka hana pololei ia mai e ku ai kou makemake. Aohe auhau no ka nana ana

 

Maluna o ke kua o kekahi o keia mau lio he palapu hou i like kona ana akea me ka waha o ke pola inu kope, a he ku maoli no i ka manaonao ke nana aku. Maluna o keia eha, e kuwai mau ana ke kolo o ke kaa a no keia kumu ua kuhohonu ka eha i loaa i keia lio.

 

            I ka manawa i weheweheia ai o ke kolo o keia lio ua ike maopopo loa ia aku la ka eha, a e lele mumulu ana hoi ka nalo maluna o ka eha e painaina ai. He eha hou loa keia, ua pau ka ili i ka akaaaia a ua helelei hoi ka hulu a ua hoomaka ae ka pehu e hana i kana hana.

 

            Ua haawi ae ke Kepani i kona inoa o Soda. Ua olelo ae oia he kanaka hana oia malalo o kekahi hui e hoopiha nei i ke Alanui Waikiki. Aloha ole.

 

Ma ka Aha Senate.

(Na Hana o ke Senate i Kaomiia.

 

Na Lala o ka Aha Senate.

 

Senator Clarence Crabbe, D. P. R. Isenburg, L. L. McCandless, W. C. Achi, J. D. Parris, P. P. Woods, H. P. Baldwin, C. H. Dickey, S. W. Wilcox, D. Kalauokalani, S. E. Kaiue, J. T. Brown, J. B. Kaohi ame Nakapaahu.

 

            POAHA, Nov. 20—Hora 10 A.M. Kohoia o Balauina o Maui i Peresidena no ka manawa; William Savidge kakauolelo no ka manawa, Clarence Crabbe, Palika ame Balaunu o Hilo, Komite Nana Palapala; Jno. Buki, mahel,eolelo no ka manawa.

 

            Hoopaneeia ka Hale no ka hora 10 A. M. o ka Poalima.

 

            POALIMA, Nov. 21.—Hora 10 A. M. Kohoia o Clarence Crabbe i Peresidena; J. D. Paris, Hope-Peresidena; William Savidge, Kakauolelo; Jno. E. Buke, Maheleolelo; Rev. J., Kalino, Kahunapule; Isaac Cockett, Makai; Solomon Paawela Pulumi hale ame David Kama, Elele. Kohoia na komite no ka noii ana i na Keena Aupuni:

 

            Keena Hooia:--C. H. Dickey, S. W. Wilcox ame D. Kalauokalani.

 

            Keena o na Hana Aupuni:--H. P. Baldwin, J. D. Paris ame P. P. Wood.

 

            Keena o ka Puuku:--W. C. Achi, D. P.R. Isenburg ame S. E. Kaiue.

 

            Keena o na Aina Aupuni: -- L. L. McCandless D. P. R. Isenburg ame Kaohi.

 

            Keena o ka Loio Kuhina:--J. T. Brown, W. C. Achi ame J. T. Brown.

 

            Keena o ka Papa Hoonaauao:--S. W. Wilcox, J. D. Paris ame P. P. Woods.

 

            Kohoia na Komite Pai Palapala: W. C Achi, C. H. Dickey ame S. E. kaiue.

 

            Komite Hoopaa Hua Helu:--D. P. R. Isenburg, J. D. Paris ame P. P. Woods.

 

            Heluheluia ka Palapala a ke Kiaaina, a waihoia ma ka lima o ke Komite Pai.

 

            Hoopaneeia ka Hale no ka hora 10 A. M. kakahiaka Poaono.

 

            POAONO, Nov. 22.—Hora 10 A. M. Waiho mai o Senatoa Woods i kona noho Komite Papa Hoonaauao a kohoia o Nakapaahu ma ia noho.

 

            Heluheluia he leta mai Austin mai, Hoounaia o Senator Baldwin, Achi ame Kalauokalani e hui pu me ke Kiaaina.

 

            Hoopaneeia no ka hora 10 A.M. Kakahiaka Poakahi.

 

            POAKAHI, Nov. 24.—Hora 10 A. M. Hoike mai o Senatoa Achi o ke Komite Pai Palapala ua pau ka Palapala Hoouna a ke Kiaaina i ka unuhi ame ka pai hakahakaia. Aponoia ka hoike a hookuuia ke komite. Waiho mai o Senatoa Dickey i ka lunahoomalu o ke komite o ka keena hooia ame S. W. Wilcox i ko laua mau noho, a kohoia o D. P. R. Isenburg, lunahoomalu ame L. L. McCandless i lala no ia komite. Hoopaneeia ka Hale no ka hora 10 A.M. kakahiaka Poalua.

 

            POALUA, Nov. 25, 1902.—Hora 10 A. M. Olelo Hooholo na Senatoa Achi E hoomanaia ka Peresidena ma keia kau kuikawa e koho i elima lala komite no ka hoomakaukau ana i ka Bila Kalana ame kulanakauhale no ka hookomo ana ma keia kau Ahaolelo kumau e hiki mai ana.”

 

            Ku-e o Balauwina me ka olelo ana ua hu hewa keia olelo hooholo mawaho o ka palena o ke kahuahana a ke Kiaaina a o L. L. M Candless ma ia kumu hookahi no.

 

            Ninau-holo ka Olelo Hooholo 7 ia 6.

 

Hoopiiia o Puuku Wright

 

(Mai ka aoao 1 mai.)

 

Mary Isabela Jackson, Henrietta Cornwell Friel, Georgiana Macfarlane Friel, Anabel Boller (Voeller), John Braddock Watson, ame Tobdiner, a o kona inoa piha ame kona inoa oiaio, aole i maopopo i keia kiure, a malaila a i kela manawa i hana ai oia i kela hana puhiahi ma ka Degere Ekahi.

 

Ua kauohaia ka poe i hoopiiia e hiki aku imua o Lunakanawai De Bol@no ka noomakaukau ana i ko lakou hihia. O ka poe i hoopiiia mawaho ae o Wm. Wright ame Nigel Jackson oia keia malalo iho:

 

            Aihue, Lee Hou, Kahaulaleo, Ah Chew, Juanito alia Lingua de la Cruz, Hopii, Kekoi, Kimura, Kealoha, Pedro Rodrigues, Geronimo, Gregoria Abile Eliza Rosalio ame Ah Sing.

 

            Hoeha Juan Canchez, Joe Tomokichi Owen Holt, Jr. Nakayama, Daikichi, August Herring, A. Reveira, Hioki, Miamoto, H. Mori.

 

            Wawahi Hale, E. Naone, Jacino, alias Liingua de la Crux.

 

            Puhi ahi, Akoni Au:

 

            Hoeha Manaoino, Spinola, Ah On ame Pat Chee.

 

Lini e make ka Moi Leopolo.

 

Hoao e lawe i ke ola o ka moi leopolo aole nae i ko.

 

            BRUSSELS, Novemaba 15.—Oiai i ka Moi Leopolo e hele ana i ka pule Te Deum no ka hoomanao ana i ka moiwahine aloha i hala aku i ka po, ua kiia mai la oia he ekolu manawa e kekahi kanaka i maopopo ole kona ano.

 

            Aole he mea i hoehaia. O ke kanaka nana i ki aku i ka Moi he kanaka Italia oia. E ku ana keia kanaka imua o ke alo o ka banako o Brussels ma ke alanui Rue Royale, i kona manawa i ki aku ai i ka Moi.

 

            Iloko o kekahi keena o kana pu ua loaa aku he mau poka pepa a ua manaoia oia no na poka i ki ia i ka moi. Ua hopuia ke kanaka i hoao ae e lawe i ke ola o ka moi, me ka hana nui no hoi ka makai i hopu ai iaia, oiai na kanaka e hae ana mahope o ke kanaka i hoao e lawe i ke ola o ko lakou moi aloha e panai aku iaia ma ia uku hookahi.

 

            Ua hoike ae oia i kona inoa o Robino. He nui a Jehulehu ae na kaa ma keia huakai alii ke kaa o ke kaukaualii Flanders ame kana wahine, ke kaa o ke ke kialii Albert of Flanders ame kana wahine, ke kaa o ka kaikamahinealii Clementine, na koa kiai ame na wahine ukali hanohano. Ma ka noii pono ia ana o ka hana a keia kanaka, ua maopopo loa iho la i ka makai ua ki maoli aku no keia kanaka i ka moi me ka poka maoli io no i hoomiomioia o mua me ke kepau, oiai ma ke ki ana a keia kanaka i kana pu ua noho liilii aku ka puka aniani o ke kaa o Comte d;Outremont’s a pahio aku la ka poka ma ka papalina o ka Ilamuku Hanohano. I ka manawa o Rubino i laweia ae ai mai ka puulu kanaka aku a laweia aku maluna o ke kaa, ua hoopuni koke ia ae la kahi kaa e na kanaka a kipehi aku la i ke kaa me na pahi ame na laau. Ua aneane hiki ole i na makai ke lawe aku i ka lawehala ma ke alanui no ka halewai, oiai ua piha kui ae la ke alanui me na kanaka a e noke ana hoi i ka uwa, “pepehi iaia a make loa” ame “E ola loihi ka Moi.” I ka manawa i hoea aku ai ke kaa ma ka halewai ua piha ke kaa me na pahi i hooleiia. Ua wawaia ua kamailio ae o Robino a ua hoopuka ae hoi i kekahi mau olelo pili i ka pepehi kanaka, a ua oleloia ae no hoi ua hiki mai oia i Brussels nei mai Ladana mai no ka pepehi ana i ka moi Leopolo, a ua haalele aku oia ma ka halepule no ia kumu wale no. Ua loheia ae no ua hoopuka ae o Robino aia oia malalo o kekahi hui Italia malu ma Ladana a ua hele mai oia i Brussels nei mai Ladana mai no ka pepehi ana i ka Moi Leopolo o ke aupuni o Belekiuma. Ua pahola koke aku la keia mea hou apuni ke kulanakauhale i ka manawa pokole, a ua kau mai na lia maluna o na makaainana o ka aina. I keia manawa ua piha ino ae la na alanui me na kanaka e kamailio ana i keia mau hana puuwai eleele e hoaoia nei maluna o ko lakou moi, a o ka oi loa aku ma na hale pai nupepa. He nui na olelo hoino i hoopuka ia e na kanaka no keia mau hana aloha ole.

 

            Aole i loaa i ka moi ka manao ano e no keia hana. I ka pau ana o ka ainaawakea o ka moi, ua kau oia maluna o ke kaa-uwila a holo loa aku la no ka hale hoolulu o ke kaa-ahi a kau aku la no ka holo ana i Geroenendael.

 

Hoike makahiki o na Kula Sabati o Maui Hikina

 

            Ke hoike ia aku nei ka lohe i na Kula Sabati o Maui Hikina, e malamaia ana ka hoike makahiki ke hiki aku i ka la 25 o Dec. 1902 ma Wananalua Hana. Ke paipai pu ia nei na Kahu Kula Sabati apau e liuliu a e hoomakaukau hoi no ka la e hiki mai ana, na ka mea eleu no ka lanakila. Mai poina e hele pu mai me na kani no ka pole-a o Halalii. E ike ia malalo iho ka papa hoonohonoho o na hana oia la:

 

Pule.

Himeni Hui,…………….H. A. N. –110-2 p. Kula Sabati o Keanae, Haawina, Aug. 1902 “Hoaloha,” Himeni Hui, H. A. N.—17 2 p. Kula Sabati o Kaupo, Haawina, Sept. 1902 “Hoaloha,” Himeni Hui H. A. N. –97 2 p. Kula Sabati o Nahiku, Haawina, Oct. 1902, Hoaloha,” Himeni Hui, H. A. N.—197 3 p.

Lulu Dala.

 

Kula Sabati o Kipahulu, Haawina Nov. 1902 ‘Hoaloha,” Himeni Hui H. A. N.—225 2 p. Kula Sabati o Hana, Haawina Dec. 1902

Na Manao Paipai.

Himeni hookuu H. A. N. –11-2 ame ka pule.

 

            O keia maluna ae ka papa hana o ia la, na haawina ame na Himeni Hui, he mea pono i na alakai Himeni ke ao i na Himeni Hui, i hiki ai ia kakou a pau ke hoonani nui aku i ka la i hanau mai o ko kakou Hoola.

 

Me ka Mahalo,

JAS. H. S. KALEO,

Kahu Kula Sabati Nui o Maui Hikina.

Hana, Novemaba 20, 1902

 

HOOKI HANA MA KILAUEA.

 

            Ua hoomaka ka hooki hana ma Kilauea i ka Poakahi nei, Nov. 3.

 

            Ma ua kakahiaka nui la, ua hele aku he kanakolu poe Kepani i ka hana, he mau minute mahope o ka hora maa mau. Ua olelo aku la ko lakou luna (Pukiki) e hoopiha lakou, i ka manawa i lilo, i ke ahiahi. O kela mau olelo a ko lakou luna, ua like ia me kekahi puupuu ikaika i hahau ia aku maluna o lakou, a no ia kumu, ua huli hoi aku la ua poe Kepani la i ko lakou mau home. I ke aumoe ana iho, aole loa i ae ka hapanui o ua poe nei e hele i ka hana i kekahi kakahiaka ae. Ua hookikila aku ke koena o na Kepani a haawi pio mai la hoi lakou i na poo alakai kakaikahi. Aole loa i pau maanei, aka ua onou aku lakou i ka lakou mau hooweliweli ana i na kuke o na hale hoolimalima, ka luna nui, ke kamana, na kanaka o ka hale-wili, ame na kakauolelo o na hale kuai.

 

            Ua hoao aku o Kauka Yanagihara me na lima kokua o Mr. Eda o ka halekuai o Kilauea e hoomalimali i ko lakou inaina, aka, aole i maliu ia mai. He elua la ame elua po ko laua kamailio ana, ame ko laua hoomau ana i ke noi, e malama hoi i ka maluhia. Ke manao nei lakou e hele i ka hana i ka la apopo, la 7 o Nov. Ma ka nana aku. Ua nalohia kela manao inaina iloko o lakou i kela manawa.—Ka Mokupuni Kihapai (Kauai.) [@can’t tell if there was a line here or not]

 

Kupilikii iloko o na Lole

 

KA IKE O KEKAHI KANAKA KUAI LAAU LAPAAU MA KE AWAWA O KAMUELA.

 

Ua Hoike Mai Oia i ka Mea Kakau Nupepa i ke Ala Maalahi o Kona Lankila ana Maluna o ka Pilikia.

 

            “He nui na ike i loa mai ia`u,” wahi a Mr. Albent L. Gali, he kanaka kuai laau lapaau o ke Awawa o Kamuela (Sam’s Valley), ma Oregon, “a o ka ka hoomanao ana no kekahi o lakou ua aiai loa ia iloko o ko`u hoomanao ana.”

 

            “A heahe ia mea?” wahi a ka ninau a ke kanaka kakau nupepa.

 

            “Ia`u i ko`u wa liilii ma kahi o ka 12 ame 13 makahiki ua hoomaka mai ka ehaeha e kau mai maluna o kua kino mamuli o na ma`i o ke ano ma`i hehe e puka mai ai mai ko`u kino, a palahehe wale ae la no kuu ili. Ua manao wau o ke koko ino ke kumu o ka ulu ana mai o ia mau ino. Ua kaa aku la wau malalo o ka malama a kekahi mau kauka aole nae he loa ia`u ka maha. Ua pii mahuahua mai ia na palahehe maluna o ko`u ili a lilo loa i mea kupilikii no`u. Mahope mai ua loaa iho la wau i ka mai o na puupaa.”

 

            “Eia nae, he maikai kou ili i kela manawa i ka nana ia aku,” wahi a ka ninau a ka mea kakau nupepa.

 

            “Ae, ua pau na pilikia i ka holoi ia he mau makahiki i hala aku, mamuli o na HUAALE AKALA A KAUKA WILLIAMS no ka Poe Ma`i Hokii. Ua lohe au i ka mana hoola o keia ano huaale a Kauka Williama no ka ma`i inoino e ke koko a hooholo koke iho la wau e a ia mau huaale. Ua loaa koke mai la ia`u ka oluolu, a o kuu hoomau aku la no ia a hiki wale i ka pau loa ana o kuu mai, nalowale loa na alina palahehe i kau ai maluna o kuu iii. He ehiku makahiki o ka loaa ana o keia mau pomaikai ia`u a aole no hoi he loaa hou ia’u.”

 

            He hoola keia ano Huaale Akala a Kauka Williama no ka Poe Ma`i Hokii no ka mea he hele loa kana hana a ke kumu o ka ma`i e alaa mai ai. He malani wale no ka loaa a kekahi ano laau e ae aka o keia he hele loa no kana hana a ke kumu o ka ma`i. He mau haneri ano ma`i e like iho la me ko Mr. Gali i hoolaia e keia ano huaale aka aole wale no o keia ke ano ma`i i hoolaia e keia huaale aka o na ano mai a pau e ulu mai ana mailoko mai o ke koko inoino ame na aalolo nawaliwali—ka elua hoi o na kumu ma`i e ulu mai ai ka ino o ke kino o ke kanaka. He poe huaale lakou e hiki ke kulai i na ma`i maeele o na aalolo, o na u-ha ame ka hu`i o na aalolo e ae, rumatika, nalulu ikiiki o ke poo, ano lolo, ke ano naluea mahope iho o ka oluolu ana ma@ ka ma`i la gripa mai, ma`i o ka puuwai, hohoma mai o ka helehelena ame na ma`i like ole o kane ame na wahine.

 

            He kuaiia na Huaale Akala a Kauka Williama no ka Poe Ma`i Hokii e ka poe kuai laau lapaau apau no ke 50 keneta no ke poho hookahi a he eono poho i ka $2.50. E hooko ia no na kauoha ma ke ekeleta e Dr. Williams Medicine Compoany, Schenectady, N. Y.

 

NEE …

I ke Alanui Papu

 

Ma Elite Hale mai, Alanui Hotele.

 

Ua Nee ae nei ka NEW YORK DENTAL PARLORS i ke Alanui Papu Mawaena o na Alanui Moi ame Hotele.

 

            Ua wehe ae nei makou he mau keena nui ae maikai ae, kahi a makou e hoonui ae ai i ka makou hana mamua o kahi mua, a ua ike na mea apau i ka nui mau o ka makou hana ma Honolulu nei mai ka manawa i hiki mai ai ianei.

 

            O ka makou na auhau haahaa loa no na hana kupono. He hooiaioia na hana ame na lako no ko lakou maikai. He hukiia na niho me ka eha ole. Hele mai e ike ia makou. Aohe auhau no ka nana ana.

 

            O ka wahine kokua ka mea kamaiii@ ma ka olelo Hawaii.

 

New York Dental Parlors

 

            Hele 1057, Alanui Papu mawaena o na Alanui Moi ame Hotele.

 

            Moi Poina i ka Helu 1057

 

KAUKA GEO. W. BURGESS,

 

            Keena hana ame kahi noho Helu 24@ S. Alanui Moi,-- 10 a.m. a 3 p.m. na hora hana.

Telepone—Main 122

KA POKA NUI AME KA POKA IKI.

(Mai ka aoao 4 mai.)

 

Hooko aku i na kauoha e haawiia mai ana. Aole loa he kauoha i loaa mai ia makou a hiki i ke kapoo ana aku o ka la ma kona alahle; a i kela manawa ua hoohikileleia makou i ka nee ana a e o na puali pukaa me ka malie a o @ pu kuniahi keia, ua paa a`e i ka uh@ me na kihei huluhulu.

 

            I ka ike ana o na mea apau i @ haawina, ua olowalu like a`e mai o a o na leo hooho e hooho ana: “He auhee, he auhee!

 

            He auhee io no keia. Ua haule pu @ Generala Huka papa hana, a o wela ko makou wa e au hoi ai ma kekahi aoaoa o ka muliwai.

 

            I ka hala ana aku o na puali pu@ ua hoomaka a`e la na puali@ wawae e nee, a mahope aku kekahi mau puali pukaa. Ua loaa mai la @ kauoha i ko makou poualikoe e noho@ mahope a e ho-a ae i ke ahi ma @ ame kela wahi a na pualikoa i @ ai-he elua manao o keia hana @ pela; oia hoi e huna iho i ko makou @ hee ana mai na Konofederela mai@ ka lua i loaa ka malamalama @ makou alanui hele. Ua hoomau aku@ pualikoa i ka nee ana, a mai @ mai o na aliikoa i loaa mai ai ka@ la makou aia ka makamua ke @ ka muliwai o Rapahauoka.

(Aole i pau). [@the last three paragraphs were blurred on the edges]