Ka Nupepa Kuokoa, Volume XL, Number 47, 21 November 1902 — Page 5

Ka Nupepa Kuokoa               

KE KILOHANA POOKELA NO KA LAHUI HAWAII.

NUPEPA KUOKOA, NOVEMABA 21, 1902        5

NA SENATE.

HAULE ELUA SENATOA AOLE I HIKI MAI.

            I nehinei iho la no oiai ke aouli lani i hoomawehiwehi ae ai i kona papalina olumahiehie mai na aahu mai o ka ua i hana mao ole iho nei i keia mau la, a ma ka hora 10 hoi o ka kakahiaka ua akoakoa ae ma ka lumi kalaunu ma Halealii na moho senatoa i koho ponoia me ka haule o elua senatoa, Kikila Bolaunu ame Wilikoki o Kauai.

            He umi-kumamakolu senatoa i akoakoa ae ma ka hora i oleloia a ua hoea pu aku malaila he nui o na poe makaikai i iini nui e ike i na helehelena o na senatoa ame ko lakou mau kulana.

            Mahope o ka hoike ana mai o na Komite o na palapala hoapono, ua hoounaia aku he mau komite no ka launa pu ana me ke Kiaaina, a no ka hoike ana iaia ua makaukau ka Aha Senate no ka hoohana ana i na hana imua.

            Ua hoouna mai ke Kiaaina i ka Aha Senate i kana "Olelo Hoouna" e pili ana i ke kulana o ke Aupuni na luna nui a me na kumu i hoopauia ai.

            Ma ka po Poakolu i hala, Nov. 19 ua malama iho na Repubalika he halawai ma ko lakou keena, a ua hanaia kekahi olelo hooholo o ka papa hooko ka mea mana e lawe a noonoo i na poe e noi hana nei no ka Ahaolelo.

            Maloko o ka Senate ua akoakoa ae na laia apau, koe o Balaunu ame S. W. Wilikoki, a ua manaoia e huli hoi mai ana o Balaunu i keia la maluna o ka Alameda, a o Wilikoki i ka Lapule.

            Ua koho ponoia o H. P. Baldwin he Peresidena no ka manawa, a ua kohoia ae o Papai, Palika ame Balunu o Hilo na komite nana palapala hoapono.

            Ua hoopaneeia ka halawai no ka hora 10 o keia kakahiaka.

KA HALE NANI HIWAHIWA O SCHWAB.

            O Charles M. Schwab ke kanaka e ohi nei i kona uku makahiki o $1,000,000, i oi ae mamua o na kanaka apau o ke ao nei, ke kukulu nei ma Riverside Side, New York, i kekahi hale nani hiehie i hiki loa ia New York ke kaena ae, aole ona lua malalo iho o ka lani.  O na kanaka loea apau o New Your ma keia hana o ke kaha kii hale, ua hoolilo aku lakou i ko lakou mau noonoo ana maluna o keia hale.

            O ke kumukuai o ka aina kahi hoi ana i iini ai e kukuluia keia hale, he $865,000 a ua manaoia, e hiki aku ana ka hoolilo maluna o keia hale ma ka huina o na miliona.

            O keia mau miliona e hooliloia nei, aole loa oia e noonoo ana ia mea e like hoi me ka wahine e noonoo ole ana i ka bila o kana nanahu o $3.

            I ka wa kamalii o keia kanaka ua hana aku oia iloko o ka halekuai me ka uku o $2.50 o ka pule, ua like ia me $120 o ka makahiki, aka i keia la, ke noho nei oia maluna o ka noho hanohano Peresidena o ka Ahahui Kila o Amerika Huipuia, me na kanaka hana malalo o kona mana i hiki ka heluna ma ka 45,000, a o kona uku makahiki he $1,000,000 he uku hoi i oi ae mamua o ka Emepera, Moi, ame ka Peresidena o Kekahi o na aupuni malamalama.

            Ke hoolilo nei oia i kela makahiki ame keia makahiki he mau tausani dala no ke kokua ana i ka poe ilihune.

            O ka waiwai i'o o kona mau kea (shares) iloko o keia Ahahui ana e noho Peresidena nei he $28,000,000.

            O ke a'o mau o keia ona miliona i kona poe hoa aloha oia keia:

            "E hana aku oukou i ka hana i like me ka'u i hana ai."

            Kuai i kea (share) maloko o kekahi hui:  kuai hou i kekahi i ka wa o ka dala iloko o kou lima; a e hoao hoi e lilo i laia no ka hui e hoohana ana ia oe.  Ua loaa iaia ke kulana o ka Amerika oiaio o keia au hou, ka ikaika hana, eleu, ame ka mikimiki, a he keonimana piha hoi oia.

            O keia iho la ke kanaka nona ke kulana keiki kuaaina papalina lepo o 12 makahiki e kalaiwa ana i ke ka'a popopo mai kahi taona uuku mai o Loretto, Pa., noka hale hoolulu kaaahi ma Cresson.

            Ke kukuluia nei eia he 2 halepule,--hookahi no kona makuahine ma Loretto a hookahi no kona makuahonawai wahine ma Braddock.

Olelo o ka Hanohano.

            O na kanaka e hana ana e like me ka lakou olelo i olelo ai:  a o na mea i puka ai ka oiaio e like me ka lakou i olelo ai--he mau mea hoolana manao ia i kau mai maluna o lakou.  He hoowahawaha kakou i na hoopunipuni ia kakou:  oi loa aku ka hoopunipuni i manaoia e hana pela.  Aka aole he hoopunipuni na kanaka apau ina no e hoopuka kuhihewa ke kanaka.  Ina no iloko o na ahahui aole no e loaa.  Ua ike kela ame keia o ka hoohana ana i na hana kalepa aina maluna o ke alakai pono ame ka manaoio.  He mau miliona o na mea i kuaiia i kela ame keia la aole ma na olelo hoopaa i kakauia aka maluna o na olelo hoopaa waha wale no.  Ua kapa mau ia ae ka Stock Exchange he punana no na piliwaiwai, eia nae aohe wahi e ae e malamaia ai na olelo hoopaa me ka hanohano nui ae.  Nolaila i ka manawa a makou e olelo ai i ka.

WAMPOLE'S PREPARATION

ka laau lapaau o ke au hou i hoaoia a ikeia ka maikai, no kona hoopunipuni ole i kekahi, e loaa iaia na manaolana no ka hoolaia a pomaikai malaila ke manao nei makou e manaoio ana no lakou.  No ka oiaio o keia mea ua nui na ma'i i lawelaweia i na ia i hala e hoike ana i kona ano.  Ua hooiaio wale ia aku no oia maluna wale no o na mea ana e hiki ai ke hoohana a holopono.  He hiki oia ke hana i na ma'i inoino o ke koko, La Garipa, na nawaliwali, na eha o ka puu ame ke akemama, ame na ano ma'i inoino o ke koke.  He ono ke ai me he hone (meli) la a he hanai a hoola i'o.  He waiwai keia mailoko mai o ka Aila o ke Akepaa o ka I'a Cod (Pure Cod Liver Oil) mai na akepaa o na i'a cod hou mai i huiia me ke Compound Syrup of Hypophosphites ame ka Extract of Malt and Wild Cherry.  Eia ka Kauka Austin D. Irvine olelo:  "Ua hoohana aku wau i keia laau ma na ma'i i ku i kana mana hoola, aka aole nae i ka poe i ku ole, a he maikai maoli no na hua i puka mai."

            He loaa ka manaoiana i ka oolopu laau mua a he maikai i ka opu.  Aole ia e hoopunipuni a hoopau-ha ia oe a he hoopakele no hoi ka poe i nele i na hoomaikai mai kekahi ano laau e ae.  He laau ia no ka lanakila lapaau o ke au lapaau e hele nei.  He kuaiia keia laau e ka poe kuai laau lapaau apau.

 

Aole Kekeue no na Noho a @ e Senatoa.

            Aole loa e hoao ana na senatoa o ka aoao Home Rula ia lakou ka hapanui o ka Ahaolelo i hala, e lawa i ko lakou mau noho ma ka Aha Senate kuikawa ma ka la e noho mai ai ia, pela ka hihiona i keia mau la.   Aole he mau hana pualu i hanaia e lakou, a ke manaoia wale ia neu no, o keia kumuhana, ua pau ia i ka hooponoponoia no e lakou.  Ua loaa aku kekahi mau olelo ao ana i na senatoa Home Rula mai na loio mai, aia no he mau kowa maikai no ka hakaka ana a loaa hoi ko lakou mau noho, aka ua waiho mai la no na Home Rula i keia mau olelo ao, a kalele ae la no maluna o ko lakou manao.  Ua ikeia iho la i nehinei, la 13 o Novemaba, o ka Bila a Caypless i holo mai nei ma ka Ahaolelo lahui i auwi aku la oia iho la no ka panina hope loa maluna o keia kumuhana.  Ua laweia ma keia bila e Mr. Caypless no ka aoao Home Rula, a hooholoia, e like me kana i kukala ai ma kana haiolelo, mamuli o kona hooikaika.  Maloko o keia bila, e olelo ana, O na Senatoa i koho ponoia ma ke kau Koho Balota mua o ka Teritori nei, e paa lakou i'ko lakou mau noho no ke kau o eha makahiki (4) mai ka la o ia koho balota ana, koe na mea o keia hope aku.  O keia Bila i hooholoia e ka Ahaolelo Lahui, mahope o keia kanawai Okana, ua manaoia, e kapaeia na ano hakumakuma, a e hooponopono loa ia na paonioni, e pili ana no na lala like ole i kohoia,, a me ko lakou mau noho.

 

NUI KA POE NOI OIHANA.

            He nui na Repubalika i waiho i ko lakou poe inoa no na oihana, a e loaa ana he manawa hoohauoli i ka mana hooko o ia aoao kalaiaina i ka hoolauna ana ia lakou imua o na Hale elua no ka kohoia mai.  Ua waihoia aku keia oe inoa malalo iho imua o na komite:  PUUKU O KA TERITORI:  A. J. Campbell, H. M. Dow, Theo. F. Lansing Geo. B. McClellan, J. H. Fisher

            KAKAUOLELO KIEKIE:  Keena o na Hana Hou Chas. L. Beal, E. G. Keen, Chas. F. Murray, G. E. Smithies, Clarence M. White.

LUNA HOOIA O KA TERITORI:  J. M. Riggs.

            KAKAUOLELO O KE SENATE:  Wm. H. Coney, William Savidge, C. R. Buckland.

            MAKAI O KA SENATE:  Wm. H. Thornton.

            ELELE O KA SENATE:  D. Piikoi Okuu, Ed. C. Aldrich.

            KAHUNAPULE O KA SENATE:  J. M. Ezera.

            PULUMI HALE O KA SENATE:  Solomon Paawela, Geo. P. Paunini.

            PULUMI HALE O KA HALE O NA LUNAMAKAAINANA:  Moses Keliiaa

            ELELE O KA HALE O NA LUNAMAKAAINANA:  David Kama.

            MAHELE OLELO:  William J. Coelho.

            KAKAUOLELO O KA HALE O NA LUNAMAKAAINANA:  A. H. Morre

            MAKAI O KA HALE O NA LUNAMAKAAINANA:  James E. Shaw.

            Aole i pau pono na inoa o ka poe i makemake i ka oihana ma keia papa inoa, aka ke kakali nei kekahi poe i ka kakau inoa ia aku o ko lakou mau palapala noi.  Ua oleloia, aole e lawe mai ana ke komite i keia kumuhana a noonoo, aka e waihoia aku ana imua o ke Kiaaina, a e kohia mai hoi e ke Senate ame ka Hale, a e hooholoia ai hoi ma ka halawai e malamaia ana ma ka Poakahi o keia pule ae.  E hoea mai ana na Senatoa o ka mokupuni i ka la apopo, a e hoomaka ana na kukakuka ana me na alakai kuloko.

 

HE LETA.

            Mr. Lunahooponopono, Aloha oe:

            Oluolu oe e hookomo iho ma kahi kaawale o ka elele waha ole a ka lahui i keia mau manao.

            He leo uwalo i na Lunamakaainana, ka Elele Hanohano Kalanianaole ame na Senatoa ka poe hoi i koho pono ia e ka lahui mai Hawaii a Niihau ola keia, ke kau leo aku nei ko oukou makamaka i na moho apau i lanakila ; ka pahu balota o ka aoao Repubalike e hooko oukou i ka oukou mea i wanana ai penei: 

            "Makemake makou e hanaia ka Pono Kaulike o ka Lehulehu."

            A oia wanana a oukou la oia ka ko oukou makamaka e uwalo aku nei i ko oukou mau puuwai aloha pakahi e aloha ia kakou hoakanaka o kipa hewa ke aloha i ka ilio.

            E kupaa maluna o ke kahua o ka pono ame ka pololei mai lolelua wale ka manao, no ka mea, o ke kanaka lolelua wale o ka naau lauwili ia me kona mau aoao apau.

            O ka'u pule, na ke Akua e hooholomua i ka oukou mau hana ku i ka pono me ka pololei ma ka inoa o Iesu Kristo, Amen.

            Me na keiki oniu hua medala ko'u welina.

            Kou oiaio,

            ARTHUR K. MITCHELL,

Kalaupapa, Nov., 13, 1902.

            (Ma ka nana i'o ana aku i ko lakou ano, oia hoi ka poe Repubalika i holo moho iho nei a i puka iho la, a ka makamaka Mitchell e kau leo nei, he poe i'o no lakou e hooko ana i ka lakou mau olelo i hooikaika ai oiai i ka manawa e kau leo ana i ka lehulehu e koho aku ia lakou.  Aole no e hiki ke wanana mua aku e hana i'o ia mai ana ka hana e like me ka hiki maalahi i ka Mea Nona ka ike oi ae mamua o ko ke kanaka, aka, ina e kilohi aku ma ke ano o ua poe moho la ame ko lakou mau moolelo ame ka lakou mau hana, ua lawa i'o ia mau hana a lakou i hana ai i mau haawina na ke kanaka e ike i'o ai e hanaia ana ka hana.

            Ua hoopuka ae ka Elele, ke ike nei oia i ka hilinai o kona lahui iaia alaila aole e nele ka loaa iaia ame kona mau hoa ka manao e hooikaika e piha pono ka hilinai i hookauia mai, ma kekahi olelo ana ae he hilinai no hoi ia iaia ame kona mau hoa ame ko lakou aoao kalaiaina Repubalika.  Ke manao nei ke Kuokoa aohe he kumu e hua ole ai ka lakou hana oiai ua kaa aku lakou maluna o ke kahua o ka hoohua i'o a e hua i'o ana.  Hookahi mea maopopo loa oia ka hua i'o o ka hana iloko o ke ano maikai ame ka holomua o ka aina, aka no ka nui o ka hua alia kakou e ninau no ia mea a hiki i ka manawa e ikeia ai.

            O ke kumu o ka pilikia o na Home Rula i ke kau i hala o ka holomua ole o ka lakou hana, oia no ka hooko ole i ke kahuahana a lakou i hoolaha ai, a e like me ka oiaio ia lakou, pela no ka oiaio e kau mau ana maluna o keia poe moho i puka iho la mai ka Elele aku a hiki i na lunamakaainana, a ke hana keia poe pela, alaila e ko ana no e like me ka hoike a kekahi o lakou e hoopau i ke koho ana no lakou a aole no lakou e koho hou ia.  A e manao anei kakou e hana ana lakou ia mau ano hana i mea no lakou e koho hou ole ia ai?  E manao anei kakou e hana ana lakou i na hana e holomua ole ai ka aina oiai oia ko lakou iini?  Ke manao nei makou aole lakou e hoohemahema ana i ka manawa i loaa ia lakou mai ka lahui aku no ka hana i'o ana i ka hana no ka pomaikai o ka lehulehu ame ka aina.--L. H.)

 

NA LEO HOOMAIKAI.

 

E ka Nupepa Kuokoa e:--Aloha oe:

            E oluolu mai oe, e ae mai ia'u, e haawi aku au i ka'u mau hoomaikai he nui i ka poe apau i kakoo, a i koho ia'u ma kela la poina 'ole i hala aku la, Novemaba 4.

            Oia hoi, ka Aapana Koho Lunamakaainana Elua o ka Mokupuni o Hawaii, i ka lokahi ana me ka hoomanawanui i oili ma ka Apua ke ola o na pokii, "A nona na pihi kalaunu, he 400 balota a oi, a me ia hanohano a oukou i pawehi mai la, ke haawi nui aku nei au i kuu mahalo nui ia oukou, e na Kohala, na Kona, ame Kau.

            A maluna oe o ia, "E panai aku ana au ma ko'u aoao, e hana i ka pono no ka lehulehu ame ka holomua o ka aina.

H. M. KANIHO.

Kohala Akau, Hawaii,

            Nov. 14, 1902.

 

E ka Nupepa Kuokoa e:--Aloha oe:

            E oluolu mai oe, e ae mai ia'u, e haawi aku au i ka'u mau hoomaikai, he nui, i ka poe apau i kakoo, a i koho ia'u ma kela la poina ole i hala aku la, Novemaba 4.

            Oia hoi, ka Apana Koho Senatoa Ekahi ka Mokupuni o Hawaii.

            "O ke o i no hoi a Hawaii la a ka Moku Nui, aohe kaukaulua iho."

            Ua lawe ae la oukou, i ka hanohano kiekie loa o na heluna balota o na Moho Senatoa, o ko kakou Apana Koho, nona ka heluna; he 11,000 balota a oi.

            A me ia hiwahiwa a oukou i papahi mai la, pela no au e hana ai i ka pono mai la, pela no au e hana ai i ka pono o ka lehulehu ame ka holomua o ka Aina.

            Mahalo nui ia oukou apau loa e o'u mau haku Makaainana.

PALMER R. WOODS,

North Kohala Hawaii, Nov. 14, 1902.

 

            I o'u mau hoa makaainana koho balota o ka Apana Elima; Aloha oukou a nui:

            Ma keia ke haawi aku nei au ia oukou pakahi a ia oukou no apau e na oiwi i koho ia'u i Wahaolelo Lunamakaainana no keia Kau Ahaolelo e hiki mai ana i ko'u mahalo ame na hoomaikai no ka lei hanohano o ka lanakila helu ekahi a oukou i pawhi iho ai maluna o'u ka oukou moho.  O ka loaa ana ia'u o 'na balota mahuahua o ka heluna oia hoi o ke kiekie maluna o na moho apau; o ka hooia maopopo loa ia no ko oukou hilinai maluna o'u.  A i kau ai ma ko'u aoao, ke hoopaa hou aku nei au ia'u iho, e like me ka'u mau mea i hoike mua aku ai ia oukou, e hooikaika no au ma na ano apau e hooholo ia ua mau kumhana 'la no ka pono, ka pomaikai ame ka holomua o ko kakou aina kulaiwi ame kakou, na oiwi hanau o ka lepo aloha o Hawaii.

            O ka oukou mau palapala noi ame ka oukou mau kumuhana i makemake e waiho ia imua o ka Hale Ahaolelo, ua makaukau au e waiho aku imua o ia Aha Hanohano i ka manawa a oukou e waiho mai ai ma ko'u poholima.

            Me ka manaolana no ko oukou mau oia kino maikai a no ka loaa o na pono ame na pomaikai a kakou e kau nui aku nei, ke hoopau nei au, me ka haawi aku i ko'u aloha i na makuakane, na makuahine ame na kaikuahine mai na Pali hulilua o na Koolau e kaapuniia ana e ke apo o ka lokahi ma ka aoao Akau o ka Mokupuni o Kakuhihewa a hoea hou i ka ulumahiehie o ka Ua Kukalahale.

Aloha nui apau loa!

Me ka haahaa,

HENERY C. VIDA,

(HANALE VIKA)

O Halemaumau.

Honolulu, Nov. 17, 1902.

 

HE LEO ALOHA I O'U MAU HAKU MAKAAINANA O KA MOKUPUNI O HAWAII.

 

NA POUHA-NA O KA HALE O KEAWE AME UMI, O NA LA KAHIKO.

 

            E Hilo e, e o'u mau hoa o ka la hoouka kaua i hala, ke poina ole nei au i ka oukou mau hooikaika ana no'u, i ka la koho, ke haawi aku nei au i na hoomaikai anui nou, a e hoomanao iho, owau ka oukou Kauwa haahaa, o na pilikia apau o ka apana, hoouna mai ia'u, aohe leo, aolhe waha-a he kauwa au 'na na aoao Kalaiaina o kahi mea, he kauwa no au nana.  Nolaila, e ka poe koho o Hilo, nana ia na hemahema o ka apana, mai manao iho na Home Rula, aole au he kauwa na lakou, hoouna mai i na hoopii ia'u, e hookoia ana me ka eleu.  Huro!  Laupahoehoe ka eleu!

            E Puna e, he Hawaii au ma ka hanau ana, he Hawaii a mau, he aloha au i kuu lahui Hawaii, no ka oukou hana pookela ia'u, ma ka la koho Balota i hala, ke haawi aku nei au i na hoomaikai palena ole ia oe e Puna, he kauwa au na oukou ma na ano apau, ke noi nei au ia oukou mai keia la aku, e nana pono i na pilikia o ka apana, a hoouna ae ia'u i ka ahaolelo, ina no he Home Rula, hoouna ae no ia'u, a ina no aohe hoopii, e leta mai no ia'u, i maopopo ia'u ka pilikia, ke ku nei au ma ka puka, me ka hamare ahi a ka Amara, e hoolei maluna o ka hao, oiai e wela ana.

            Aole au i poina ia oe e Hamakua.  Eia oe iloko o kuu manao, e ae, mai, e pahola aku ai i kuu hoomaikai nou, mai loko lilo loa mai o kuu puuwai, a hoouna mai ia'u ma na leta, a ma na Palapala Hoopii paha.

            Kaulana oe e Kohala Hema, ua lanakila oukou i ka la koho, a ke haawi nei au i ka mahalo no oukou.  O oukou ka i ike i na pilikia o ka apana a hai mai ia'u.

            E Kohala nui. E ae mai e lawe aku i kuu mau hoomaikai, a o na keke-ue o na la i hala, e kanuia mau mea a nalo.

            "A aia iloko o ka lokahi ka ikaika."

            No na pilikia o ka apana, eia iho kuu hoa, Chas. H. Pulaa, hooili iho iaia, he wahi kino puipui, na maua ia e laulima ae i ka ahaolelo.

            Ua ikea kou ikaika i ka la koho a o na mahalo a nui nou, eia iloko lilo o ka puuwai:  Nolaila, nou wau a mau, a na oukou e hai ae i na pilikia o ka apana na'u ia e hana mai.

            Pehea la o Kona?  Kahaluu!  Pehea hoi oe e poina ai, he hi-a ua moe, aia ilalo.

            E Kona Kaiopua i ka lai, o ko oukou ikaika hoohana, ua oi aku imua o ka uila, a ke poina ole nei au i ka lei a oukou i papahi iho ai maluna o'u, e ae mai ia'u, e pahola aku, i kuu mau hoomaikai Kiekie no oukou.

            "O kuu kahua, no ka pono kaulike o ka lahui, ame ka holomua o ka aina."  I aupuni o ka lehulehu, na ka lehulehu, a no ka lehulehu.

            E ka mokupuni o Hawaii, e ae hou mai ia'u e pahola piha aku i kuu mau hoomaikai no ka lanakila kamahao a oukou i hoolei aku ai maluna o ke alii a kakou ia

            Jonah Kuhio Kalanianaole.

            Me keia mau mea, e hoomanao iho, he enemi no'u na hana ahuai dala waiwai ole, a e hooikaika ana au ia Hawaii ma kekahi mau hana nui o ka aina ina he hiki.

Me ka mahalo,

Ka oukou Kauwa Haahaa.

D. PARIS JR.,

Moho Senatoa o ka Mokupuni o Hawaii,

Kealakekua, South Kona, Nov. 17, 1902.

 

            HOOMAIKAI I KAOMIIA.

            Mamuli o ka haiki o na keena hookipa a o ka oukou olelo waha ole ka nupepa Kuokoa nolaila ua kaomiia keia hoomaikai, a ka moho lunamakaainana Robert Makahalupa o na Kona e haawi ana i ka poe koho he 51 mai loko mai o ka heluna o 351 i kohi iaia ma Nov. 4, 1902.  O keia ka poe koho o ka Apana Koho Elua.  No oukou ka hoomaikai piha o ka moho i papahiia no kela 51 balota no na hakoko kaua o ka la koho balota.

 

Makua i Aloha Nui ia.

 

UA HALA KA REV. T. E. ALEXANDER

            O Rev. T. F. Alexander, kekahi kauwa aloha a ke Akua i hooikaika i kana misiona ma Iapana no na makahiki he 25 a oi, ua hala a ua haalele mai la i keia ola ana ma ka Poalima i hala aku la Nov. 14.

            Aole he hiohiona ma'i i ikeia maluna ona, aka iwaho oia kahi i hele ai e like me ka maa mau i ka wa a ka lima menemene ole o ka make i kikoo mai ai a pio iho la ka ipukukui o ia hale.  Ua hanauia o Rev. T. F. Alexander ma Mount Horeb, Tennessee, Okatoba, la 8, 1850, a hoonaauaoia no ka oihana kahunapule.  Me ka hakalia ole, ua hapai koke ae la no ia i kana hana misiona, a no 25 makahiki a oi kona hoolilo ana i kona manawa hana ma Iapana malalo o ka hookele ana a ka Papa Misiona Bresbyterian.  Eiwa mahina i hala i hoea mai ai oia i Honolulu nei malalo o ka olelo a'o a kona Kauka, a oiai aole no i maikai loa kona ola kino, aole i upuia e hoea koke mai ana ka hopena

            Iaia ma Iapana ua loaa iaia kekahi noho ma kekahi kula kiekie, oiai oia he kanaka i piha me ka naauao.

            Mai kona hoea ana i Honolulu nei, ua hoohala aku oia i kona manawa hana maloko o na halawai haipule a na Iapana.

            Iloko o kona manawa pokole o kona noho ana maanei, ua loaa iaia he nui o na hoaloha maikia.  Ua haalele iho oia i hope nei kana wahine ame elima keiki, a ke noho nei ma Mount Horeb, Tenn, O kekahi kaikamahine ana o Miss Ellen Alexander kona inoa ianei no oia no ka hoomaha ana a holo loa no oia no ka hoomaha ana a holo loa aku no Iapana i kana hana misiona.

            Ua malamaia ka hoolewa i ka Lapule i hala aku la, Nov. 16, a hoomaka ka huakai mai ka home o A. F. Cooke o ke Alanui Moi.  Aloha no ia makamaka.

 

Loaa Ka Makana i na Makai.

            Oiai, he mea maa mau ina e lele ana kekahi poe kela mai luna mai o ko lakou moku, aole akou e huli hoi koke ana pela iho la i ikeia ai na kela o ka mokukaua New York.  Ua maopopo loa ia lakou, ina e huli hoi ana lakou no ka moku mahope iho o ka manawa i ae malaeiaeia mai ai, e hoopaiia ana lakou, a no ia kumu, ua kauhihi ae la kahi manao e mau no ka noho ana iuka o ka aina, a launa pu hoi iloko o na hoohauoli ana, mamua o ka hoi ana aku i ka moku, me na hoopai e kakaii ana maluna o ka poohiwi.  Nolaila, ma ka Poalima i hala aku nei, la 14, he 25 poe kela i huli hoi ole aku, a ua waihoia mai ka uku maa mau o $10 pakahi no na mabuka ma ka lima o ka oihana makai.  Iloko o ka manawa pokole, aia hoi, ua paa aku ua poe kolohe nei, a hoihoiia ma ka mokukaua, me ka uku ia mai $250 ma ke gula.

            O kapena Kanae ka mea i ponopono loa o na makai, no ka mea, mamua o ka napoo ana o ka la ma kona wahi, he poe keia i pau i ka hopuia e ia.

            E hoomanao pu ia, o keia kekahi o na kanaka ikaika loa maloko o keia oihana Makai, a nana no i hopu o Sharkey iloko o elua manawa ma ke kulanakauhale nei, ka haole hoi i kaulana mai nei i ka pelepele.

            Mamuli o ko Kanae hopu ana iaia, ua hoomaikai mai oia iaia (Kanae) me ka i ana aku iaia i kona lawa ma ka puili.  Aohe no paha e pakele i ka poi uouo o ka Aina.

 

Makemake na Kanaka Hawaii i Aina ma Waiakea.

            HILO, Nov. 4.--Ma ka po Poalua nei, ua akoakoa ae ma ka halepule hou o Waiakea he 80 poe kanaka oiwi ponoi o ka aina no ka noonoo ana ame ke kukakuka pu ana i loaa ai ke alahele e loaa pono ai ko lakou iini no ka aina. 

            Ke paa nei ka Hui Mahiko o Waiakea ma ka hoolimalima he 95,000 eka aina mai ke kai a hiki aku i ke kiekiena o Mauna Loa.

            He mau makahiki i hala ae nei, ua hoao aku keia hui mahiko e hoolilo i kekahi hapa o ka hoolimalima, 87,000 eka i ke aupuni no kekahi mau aina maikai, akak, ua hoole aku ke aupuni i keia noi.

            Ua wawaia iwaena o na kanaka Hawaii a ko lakou manaoio ua hiki loa no i ka Hui Halewili ke uku i ka aina ko ma ke ano kuleana kaulike, a e haawi pio ana i na aina makai ame kekahi mau apana e ikeia nei he aina ululaau.  O na kanaka Hawaii i noho a kupa maluna o keia aina, ua lini nui loa lakou e lilo keia mau aina ia lakou ma ke ano he mau home hookuonoono, a mamuli o keia manao, ua malama iho la lakou i ka halawai i hai mua ia ae la maluna, no ke noi ana hoi i ka Ahaolelo kuloko e noho mai ana ma ka mahina o Feberuari e hoaiai aku ia Amerika Huipuia no keia kumuhana.

--(Mai ka nupepa Herald mai.)

 

Laau Ili no na Bebe

            NO KONA POO A ME KONA LAUOHO

Kekahi mea ano nui loa a@a Makuahine e noonoo n@i

            UA HANAUIA KELA A ME KEIA KEIKI ILOKO O KA HONUA NEI me ke ewe o na mai lehulehu e ulu mai ana iloko o ka ili, ke poo a e ilio ana hoi ke koko ia wa i mea nui loa no ka panee ana i keia popilikia, a pela ililo ai ia i mea nui loa e hookaumaha mau ai i ka noonoo o kela a me keia mea i oohia i ka nali ana, a na ma'i lehulehu.  Aole keia mea i hookaumaha ia ma kekahi ano e ae, aka, mamuli no o ka hoopaialehaia ana e ka mea i kupono e malama a makaala i keia poino.  Nolaila, ua lili i kumuhana na kela ame keia makuahine maikai e makaala mau ai i ka lakou mau keiki e loohia ana i na popilikia lehulehu e ulu mai ana mamuli o ke koko ino, e hookamaaina mau lakou me na mea a pa ue hiki a ke pale aku i keia mau popilikia lehulehu, i mea hoi e loaa ai ke ola maikai, malalo o na lapaau noeau ana me ka hikiwawe a me ke ola loa no hoi.

            Ua olelo ia' o k aauau me ka wai pu mehana a me ke KOPA CUTIKURA no ka hoomaemae ana i ka ili no ka papaa i ka lepo a me kahi mau ino @ ae, a pela hoi no ka unahi-pii, a pela hoi, ina ka e kapili malie i ka Aila Hamo CUTIKURA no ka hooki koke ana i ka maneo o ka ili, ka oeke ano manene o ka ili ame ka pehu, a pela hoi no ka hoomalielie ana i ka hu'i a me ka hoola ana i na palapu, a mahope aku oia wa, ina ka e inu i ka Laau Hoohainu CUTIKURA, oia wale ae la no ka na mea a pau e hana ai no ka pale ana aku i keia mau kinaunau o na keiki liilii i na wa apau e hoomaka mai ai, a ina no ua loaa mua, he mea pau wale no ia i keia mau laau ae la, ke malama pono ia na kuhikuhi.  Ma keia hana ana pela, e loaa ai i na makuahine hoomanawanui ka maha a me k oluolu o ka naau, a he mea no hoi ia no lakou e hookaumaha ole ia ai i na wa a pau.  Ua hoolaia keia mau haawina pomaikai ma na home lehulehu a puni ka aina.

            Mamuli o ka momona, ka maemae, ame ka hikiwawe o ke ola o keia laau, i makemake nui ia ai e na lahui kanaka a pau i hoao a ikemaka i kona waiwai nui ma ke ano hoola, a pela no hoi i hilinai nui ia ai kona waiwai no ka hoopakele ana i ka luhi a me ke kaumaha o na makua lehulehu ma na wahi a pau, a pela no i malama nui ia ai maloko o na home.

            HE HOOLA MAOPOPO NO NA MA'I MALOKO A MAWAHO O KE KINO.

            Oia hoi ke KOPA CUTICURA e hoomaemae ai i ka ili a me ke kepia o ke poo a hoowaliwali i ka alualu, o ka AILA CUTICURA HAMO no ka ho@pau koke i ka maneo a hooluolu a hoola, a me ke CUTICURA RESOLVENT no ka hooluolu a hoomaemae ana i ke koko.  Ke kuaiia nei ma na wahi a pau o ka honua nei.  Keena Kuai ma Auseteralia, R. Towns & Co., Sydney, N. @. W. Keena ma Aferika Hema, Lamron Ltd., Cape Town.  I loaa ai ka ili pahee maikai, ka lauoho a me na lima,"

 

$25 - Pu Kik@ Ole -$25

PAUDA AME LU, PU-PANAPANA PU RAIFELE AME NA LAKO O KA POE PAANI.

PEARSON & POTTER CO., Ltd.  Alanui Hotele me Uniona.

 

            Ka hoike no na l'a.

            O ka hoike mua a David Star Jordon ame Barton W. Everman e pili ana i ka lakou noii ana iho nei i na i'a like ole o ka mokupuni o Hawaii, i hoomakaia hoi ma ka malama o Iune a hoomauia no ekolu mahina, ua paiia mai ne ma Wasinetona, a aia he mau kope ke hoouna ia mai la no ke kulanakauhale nei.

            E pili ana i keia, he hoike ano nui ae kekahi mai a John N. Cobb aku maluna :Na I'a Kalepa o Hawaii," me na manao maikai i apoia iloko oia hoike.

            O keia hoike, ua paiia maloko o kekahi buke i hanaia me ka noeau nona na aoao he 250, i piha me na wehwehe maikai ame kekahi mau palapala aina.

            Ua hoomaka mai ka hoike a Jordon ame Everman i na i'a o Hawaii i kupono i ka ai, i na kanawai e pili ana no lakou, ame kekahi mau mea e pili ana no lakou, ame kekahi mau mea e pili ana no ka hookomo ana mai i mau i'a ano hou mai na aina e mai.

            He nui ka aoao o keia buke e kuhikuhi ana i na i'a o ka loko, ame ke ano o ka lawe ana i ka i'a maikai o ka makeke.

            O ka hoike a ka Agena Kuikawa Cobb o ka Komikina I'a Amelika, e olelo ana i ke kulana o Hawaii, ame ka moolelo o na kanaka, a he nui aku e pili ana i ka moolelo, ka manaoio hoomana ame na manao kuhihewa o na kanaka lawaia.

            He hoihoi maoli no ka mea e heluhelu ana i kana moolelo o ka waapa ame ka upena a ke kanaka lawaia i ke kulana ame ke ano maoli o ka paeaea ana, haawi ana hoi i na hoaiai no ka paeaea.

            O kekahi mea maikai loa maloko oia hoike oia no na mea e pili ana i na moku Okohola i ke au i kaahope ae nei.

            Penei ka Profesa Cobb olelo e pili ana no Pearl Harbor.

            Mamua he nui hewahewa na ula maloko o keia awa, aka, i keia mau makahiki i aui ae nei, aole loa i noonoo hou ia ia mea, a aole loa i maopopo ka nui ame ka iki o ka ula i keia manawa.

            I ka makahiki 1871, oiai o kapena Wood e ana ana i ke awa, ua loaa aku la laia kekahi wahi i piha me ka ula a i ka lohe ana o na kanaka, ua loaa ia lakou he mau heluna nui a ua lawe aku hoi ma ka makeke no ke kuai ana.  Ma ka makahiki kulipolipo o ke keneturia i hala, ua loaa mua iho la ka olepe ma ka awa o Puuloa, he 9 mile mai Honolulu mai, a eha mile hoi ke akea.

            Ua maheleia iloko o elua apana, e kekahi ailana ame kekahi apana uuku o ka aina e holo ana ma kekahi waena.

            Ua makaia ka papaku ma ke poo o ke awa.  I ka wa i laulaha loa aku ai keia loaa, ua kukala ae la ka Moi, he Monopoli alii ia, a hoolimalima aku la i na kanaka luu no ka lawe ana mai i ka olepe.

 

HANA MAO OLE KA MAKANI, HIOLO NA KUMULAAU MA MOANALUA.

            O Moanalua, kekahi aina nani uliuli o S. M. Damon a i kaulana hoi i ke meleia, "hai ke au," ua hoopoinoia e ka makani i keia mau la iho nei.

            Ma ka hoike a kekahi keonimana mai Ewa mai, he nui na kumu Kiawe ame na kumu maia i alaaia mai ko lakou mau home lepo mai, a ke moe lolii nui nei i ka moe kau hooilo, e keakea ana hoi i ke alanui.  Wahi a keia keonimana, "Ma kekahi wahi o ke alanui aole e hiki i ke kaa ke hele me ke oki ole i na laau i alaaaia.  Ua olelo ae oia o keia kekahi o na makani ikaika loa i ikeia ma ko lakou aina no kekahi mau makahiki lokihi.

 

            I KA MANAWA E HIKI PONO OLE AI AA OE KE MOE MAMULI O KE KUNU, he mea kupono a he hana pono loa no hoi na kekahi mea e hai aku ia oe no kou lawe ana i mau wahi oolopu o ka laau LAPAAU KUNU A CHAMBERLAIN i mea e holoiia ae ai ka maneo o ka puu ame ka eha o ka puu ame ka loaa pu aku o ka hiamoe oluolu ana i ka po.  Aole e hala kana mana hoola aole no hoi e hakalia ka hoola ana.  E loaa no ka laau kunu a Chamberlain ma ka halekuai laau lapaau o Benson, Smith & Co., na agena no ke kumukuai kupono ma ke kuike.

 

KAUKA GEO. W. BURGES@,

            Keena hana ame kahi noho Helu 240 S. Alanui Moi, --10 a. m. a 3 p. m. na hora hana.

Telepone-Main 128.

 

NEE . . .

i ke Alanui Papu

            Mai E@te Hale mai, Alanui Hotele.

Ua Nee ae nei ka NEW YORK DENTAL PARLORS i ke Alanui Papu Mawaena o na Alanui Moi ame Hotele.

            Ua wehe ae nei makou he mau keena nui ae maikai ae, kahi a makou e hoonui ae ai i ka makou hana mamua o kahi mua, a ua ike na mea apau i ka nui mau o ka makou hana ma Honolulu nei mai ka manawa i hiki mai ai ianei.

            O ka makou na auhau haahaa loa no na hana kupono.  He hooiaioia na hana ame na lako no ko lakou maikai.  He hukiia na niho me ka eha ole.  Hele mai e ike ia makou.  Aohe auhau no ka nana ana.

            O ka wahine kokua ka mea kamailio ma ka olelo Hawaii.

New York Dental Parlors

            Helu 1057, Alanui Papu mawaena o na Alanui Moi ame Hotele.

            Moi Poina i ka Helu 1057