Ka Nupepa Kuokoa, Volume XL, Number 47, 21 November 1902 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

4          NUPEPA KUOKOA, NOVEMABA 21, 1902

Maleia no ke Aloha

___

HE MOOLELO NO KE

KAIKAMAHINE ALII IETIWA

___

Ka Ui nohea i ahai ae i ka puuwai.

______

MOKUNA X.

___

IETIWA.

___

            “O Danoka kekahi o ka poe kumakaia e manao nei e kumakaia ia oe. Oia ame hookahi kuke ame elua mau koa kiai, o lakou kekahi poe i komo pu aku iloko o keia ano hana me ka poe na lakou i hoolala i keia mau hana. Aole anei e hiki ia oe ke hilinai mai ia’u ma ka haalele ana i kou moe a e holo ae oe ma kekahi wahi o ko lumi e pee ai i ole oe e loaa mai? O ka mea oiaio ua lalau loa aku nei ka imi ana o ua poe powa nei i kou lumi a mai kali iki oe no kahi manawa hou aku, aka, e lele koke mai oe a e hooko aku me ke kali hou ole aku. Ke hoopaa nei au i ka’u olelo e hoopakele no wau ia oe mai keia hana kumakaia a kela poe. Hele mai, e ka Mea Kiekie a e pee nou iho.”

            Ma keia manawa a laua e kukai kamailio nei ua manaoio mai ka wahine e noho ana iluna o ka moe. Ia manwa hookahi no ua ike koke iho la o Lore ua lanakila kana hooikaika ana, pela i piha hauoli ai oloko ona. Ua hooko io mai la no ua wahine la ma ka lele ana mai, mai kona moe mai a ku ana imua o ke kanaka opio me ka lole moe-po silika o ke ano maikai loa.

            “Owai kou inoa?” i ninau aku ai ka wahine me kona hoopa ana aku i ka poohiwi o ke kanaka opio.

            “He kanaka au no na aina e – he Amerika – o Gerenefolo Lore ko’u inoa,” wahi a ke kanaka. Ua ku malie loa iho ua wahine la me ka pane leo ole o kekahi mau minute, a no ka meha ia manawa ua lohe aku la ke kanaka opio i ka hanu nui ana iho o ka wahine.

            “He moeuhane anei keia a’u e ike nei?” wahi a ka wahine i pane ae ai me ka hopu ana mai i ka lima o ke kanaka a umii ikaika iho la e like me ka ikaika i loaa iaia. “Aole keia he moeuhane aka, he mea oiaio maoli. Aole au i makemake e haawi aku i ke kauoha ia oe e ke alii ma ke ano hookikina aka mamuli o keia mau hana kumakaia ia oe pela i hiki ole ai ia’u ke alo i ka hana ana i keia ano hana. A ina – ”

            “E hele mai oe maanei ma kahi o ke kukui,” wahi a ka wahine i kamaha aku ai me ka leo e hoike ana i kona ano pihoihoi nui.

            Ia manawa hookahi no ua huki aku la ka wahine ia Lore a ku pono ana laua a elua malalo o ka malamalama o ke kukui. Ma ka aoao o ka wahine ua ike oia i ke kanaka he ikena i hoopihaia aku ai oloko o kona puuwai me ka hauoli piha. Aka ma ko Lore aoao aole oia i hoomaopopo i ka helehelena o ka wahine oiai ua pakuia ae kona helehelena e kona uhipoo e kuuwelu iho ana.

            “Eia ka mea e hanaia nei i keia po. Aia he elua kanaka malalo pono o kou pukaaniani a he elua kanaka e pii mai nei i kou lumi moe nou. Mai ku oe malaile e ikea mai auanei oe a kou lawe aihue ia aku no ia i Geneluka.”

            “Ke haawi aku nei au i ko’u hilinai piha nou. E hoala anei au i na kiai no keia mau mea?” wahi a ka wahine i ninau aku ai ma ka hawanawana ana.

            “Ina he mea hiki, ua makemake loa au e paa lakou apau ia’u. Na’u no e hopu ia lakou apau. Aia lakou a paa alaila, hoala aku au i na kiai,” wahi a Lore.

            “O oe no kuu mea hoopakele Amerika” wahi a ka wahine i hoopuiwa aku ai. “E uhai mai oe ia’u.” Alakai aku la oia ia Lore a hiki ma kahi o ka puka. “E ku oe maanei a e hele ae au e hoala i ke kaukaualii. Aia kona lumi moe ma kahi e pouli mai ai.”

            Wehe ae la ka wahine i ka puka a ku pono iho la ma ka puka no kekahi sekona. Ike aku la o Lore i ke kino holooka o ka wahine mailuna a hiki ilalo, pau pu me kona helehelena, he ikena i komo mai iloko ona me ka hikiwawe loa, o kana mea e ike nei o Miss Gagenessaloka no ia.

            “O wahi a Lore i hoopu’a ae ai aole nae i puka loa ae kona leo me ka hina ana aku i kona kino imua i kahi a ka wahine e ku ana. “O oe! o oe!! o oe anei ke aliiwahine?”

            “Ae, owau no ia,” i hawanawana mai ai ka wahine, a oia no hoi ka manawa i malele aku ai oia mai ko Lore aoao aku.

            Ma keia manawa a Lore i ike pono ai ua puni ia ae la oia me he mea la aia he uhane ke hekau la maluna ona, naka ae la kona mau kuli, ike ae la kona mau oloolo wawae i ka haalulu me he la ua maalo ae ka ikaka a me ka manaku o kona mau wawae. No keia manawa pokole loa o ka ike ana i ka wahine ua poina loa ae la oia i na hana kumakaia i hoolalaia i kela po, a hala kekahi mau minute e pono e hoohala ole ia i ka manawa kupilikii e like iho la me ia ua hoi hou mai ia kona noonoo a hoomaopopo iho aohe keia he manawa no na mea e ae aka no ka paio ana e puka aku ai ma o ka pilikia.

            “Aole au i hoala aku nei i ke kaukaualii no ko’u manao nuiwa mai oia no ka mea ua kaia loa ia i ka hiamoe.” Wahi a ke aliiwahine i hawanawana mai ai ia Lore, iaia i hoi hou mai ai a ku ma ka puka.

            “Alaila, e oluolu oe e ku ae ma kahi e loaa ole mai ai oe i na limakoko,” wahi a Lore. “E hiki mai ana laua ianei ano ke ole e loaa aku kekahi mea nana e keakea i ko laua alahele.”

            “A e malama no hoi oe i kou ola. Heaha kou mea e haawi ai oe i kou ola iloko o ka pilikia ina ua loaa iho la ka maha i keia manawa. Ua hoopakele oe i ka wahinealii. Ua ko kau papahana.”

            “Alaila o oe io no ke aliiwahine. Ke kaumaha nei au no kou aliiwahine ana.”

            “Hamau,” i hawanawana aku ai ka wahine.

            Ma keia manawa a laua e kukai kamailio ana ua hamama loa ae la ka ipuka. Ua nee aku la o Lore a me ke aliiwahine ma kahi pouliuli o ka paku makika no ka mea ua ike laua i kekahi aka kanaka i ka maalo ana ae. O keia ka manawa a Lore i ike ai ua pili loa oia me ka wahine he kokoke ana ia ma ko ia la aoao e lohe aku ai oia i ke kapalili o ka pana ana o ka puuwai palupalu a holo pu mai la no hoi ka mehana o kona kino iaia nei. Ua pii pu mai la no hoi ka lelele o ko ia nei oili, eia nae mahope koke iho ua nalo aku ia mau mea apau, no ka mea, ua nohoalii iho la ka manao iloko ona ua pakele ka mea i makemakeia e hoopakele, a aia ia iloko o kona mana ame kona ikaika no ka paio ana aku o keahi kumu o ka uluhia ikaika loa ia ai oia no kona maopopo loa ana o ka wahine ana e hoopakele nei oia no ka wahine a kona puuwai i aloha nui ai ke kumu o kona haalele ana i kona aina hanau a au mai i ke kai loa a noho iwaena o ka lahui malihini, a iloko o ka aina malihini. Oia no hoi kana wahine i aloha ai iwaena o na wahine apau o ke ao holooka.

            Aole i liuliu loa ua ike io aku la no laua i kekahi kanaka i ke komo ana mai ma ke kokolo ana ilalo. Ua hoopa mai la ka wahine iaia nei he hoike ana ua loaa aku la iaia ka oiaio o ka mea a Lore i hoike aku ai iaia. Mahope koke iho no ua ike hou aku la laua i ka alua o ke kanaka e kolo mai ana no. Me he mea la, i ka Lore nana aku i ke kanaka powa elua i komo mai ai e noonoo ana oia i ke kuhikuhi i haawiia mai iaia oia ka hoohann ana i ke kaukaualii i ka laau hoohiamoe. Haupu wale mai la no iloko o Lore ina o Anagusi kekahi alaila lana loa kona manao no ka paio aku. O ke kanaka i komo mua ai iloko o ka lumi aole ona ike pono ia aku mamuli o kona kaa ana aku iloko o ka omamalu o ka moe. O ke kanaka iaia ka laau hoohiamoe aia oia ma kahi o ka moe ke makaukau la e hooko i kana hana. O keia no hoi ka manawa a Lore i ike ai he wa kupono no ka paio ana a he mea makehewa ke kali ana no Anagusi, nolaila, ua pale ae oia i ka paku a uhi aku la a nalo ka wahine, lele aku la oia ma kahi akea o ka lumi a kau aku la i na pu panapana elua e paaia ana e kona mau lima, hookahi ma kahi lima a hookahi i kekahi, a pane aku la me ka leo ikaika. “E lilo no olua i mau kanaka make ke oni olua.” “E Hale! e wiki mai oe eia ua mau kanaka kumakaia nei. E na powa e kau ae i ko olua mau lima iluna.”

            I kela manawa pokole ua malamalama koke ae la ka lumi holooka. Ua hoa koke ia ae la na kukui a moakaka loa ae la oloko a ike pono ia aku la na kanaka powa.

            Ia Lore iloko o ke kulana mana aole oia i hoomaopopo aia kekahi mea mahope mai ona ame kona ike ole no ua pa mai la oia i ka pauku laau emoole ua hehee iho la oia a waiho ana ilalo, a mamua o ka pau ana o kona noonoo ua lohe aku no oia i ke kahea leo nui ana mai o ke aliiwahine: Danoka! Mai hili hou oe iaia! E make ana oia ke hili hou oe!

            I kela manawa hookahi no ua ike aku la no hoi o Lore i ka nee ana ae o ua mau kanaka la a kokoke i ka moe e ku ana. Ike pu ae la no oia i ka nee ana ae o kekahi mau mea kino ame kona lohe pu ana aku i ka leo uwa a o ka hope loa o ke kani ana o ka pu me ka uwa leo nui ana mai o Anagusi: “A lolo oe e ke kolohe!”

            Me ka noonoo koliuliu loa ua loaa aku la no ia Lore ka lohe i ka uwe leo nui o ka wahine nona me kona hoomaopopo iho aia kona poo ke hapaiia la. Ua loaa pu ae la no iaia ka manao eeke ke kahe paha ia kona koko maluna o ka lole o ka wahine. A o na mea ana i lohe ai mahope mai he mau uwa ana ame na holoke ma o a maanei.

            I ka manawa i hoi hou mai ai ka noonoo o Lore ua hoopuiwa loa oia no na mea ana e homaopopo ana. Ke lohe la oia i ka hauwalaau ame na holo-keana. Hoomakili ae la oia i kona mau maka e nana pela oia i lohe ai i kekahi leo o ka pane ae: Ke ike nei au aia oia ke pohala ae nei. E nana pu mai kaua e Mr. Anagusi. Ke kaakaa ae nei kona mau maka. He hoomaopopo mai no oe ia’u, e Lore?”

            Ua nana ae la o Lore a nana wale aku la no me he mea la aole ona hoomaopopo i ka mea ana e ike ana a haule wale iho la no kana nana maluna o ka uluna kahi o kona poo e waiho ana. Eia nae, nona iho, ua komo mai na haawina o ka hauoli ma na mea ana i ike ai. Ua hoao ae o Lore e kamailio aole nae e hiki iaia ke walaau.

            O kana i hoomaopopo mua ai ua aahu ka wahine me ka lole moe silika keokeo a i keia he ano okoa. Ma kona honi ana i ke ala like ole ua hoomaopopo koke iho la oia aia he mau pua like ole iloko o ka lumi. I kela ame keia manawa, e makili mau ae ana kona noonoo pela no hoi i ikaika loa mai ai ka ike nana a kona mau maka, a hiki i kona hoomaopopo loa ana aole keia he malamalama kukui aka ua hala ka po a ke o mai nei ka malamalama o ka la. Ua maopopo pu iho la oia, aia oia ke moe la ma kekahi wahi.

            “Pehea ‘oe?” wahi a ka ninau o kekahi leo i kamaaina iaia. Ke ike nei o Lore aia he kanaka e noho kokoke mai ana maluna o kekahi noho nui a e hekau iho ana kekahi lima kane maluna ona. Eia nae aole i hiki iaia ke pane ae.

            “E ke kauka,” i pa-e mai ai kekahi leo, a loaa iho la iaia nei aia ka mea nona ka leo ke noho la ma kahi o kona poo. “He eha kukonukonu loa anei keia i kau ike?”

            “Pela ko’u manao.” I pane ai kekahi leo kane.” Manao wau e hala ana kekahi manawa iaia nei aka, ina no e akahele ka malama ana aole no e loihi loa o ke ola no ia. Akahi no a hoi mai kona noonoo. Mai hoopilikia i kou noonoo e ke alii.

            “Ke hauoli nei au no keia mau hooiaio,” wahi a ke aliiwahine. Ua huli ae ko Lore maka a ike aku la i ka wahine a haawi aku la i kona hoomaikai. Ua komo mai la na hiohiona o ka wahine iloko ona, aohe ona nana ina oia ke wahinealii a aole paha, hookahi mea i maopopo loa iaia ua aloha oia iaia. Ua aloha oia me kona naau apau, aohe hoopaapaa ana ma kona aoao no ia mea. I kela manawa no ua kulou mai la ka wahine a hawanawana mai la ma ka pepeiao o Lore: “He wiwoole oe, aohe lua e like ai a ua hoopakele mai oie ia’u.”

            Hamohamo iho la oia i kona lima lahilahi maluna o ke poo o ke kanaka i loaa i na palapu me ka hoopuka hou ana iho: “E kuu Amerika oiaio.” Ua hoao ae la o Lore e lalau ae i ka lima o ka wahine aka ua hiki ole iaia ke hana no ka mea, ua nawaliwali loa oia. Ku ae la ka wahine iluna a hele aku la, a pani iho la o Lore i kona mau maka.

            Mai paupauaho oe,” wahi a kekahi leo i pa-e iho ai.

            “E oluolu ana oe i ka manawa kupono. E honi mau oe i keia hainaka he ea oluolu kona e hooluolu ai ia oe.”

            No kekahi mau minute ka noho meha ana ua ike ko loko i ka hoao ana ae o Lore e ala iluna.

            “E moe maila oe. Ua olelo mai nei ke kauka e hana oe pela,” wahi a kekahi leo i kamaaina iaia.

            “Aia wau ihea e Anagusi?” wahi a ke kanaka i loaa i na palapu.

            Eia oe iloko o ke kaleka,” wahi a ka @a@e. “E hai aku ana no wau ia oe i @ @ea apau i hanaia i keia manawa. @@@@ @ @@ au iloko o kona lumi?”

           “Aole oe iloko olaila aka, eia oia iloko o kou lumi nei. Aia kou lumi, kupono ma kahi aoao o ka lumi o Casepa. He kaukaualii o Casepa.”

            “A he aliiwahine anei oia?”

            “Laki maoli oe, no ka mea oia ia.”

            “Waiwai ole maoli keia hooikaika ana. Makehewa loa keia mau hoolala ana.”

            Uwoki kena ano kamailio au. He nui ka poe noho kokoke mai anei aole e nele ko lakou lohe i kou leo,” wahi a Hale.

            Ua noho malie loa iho la o Lore no umi minute me ka haka pono ana o kona mau maka iluna o ke kilina.

            “Hola ehia keia,” i ninau aku ai oia i kona hoaaloha e noho kokoke mai ana, me ka leha pu ana aku o kona mau maka iaia.

            “O ka hola ehiku ponoi keia. Eha hola kou moe ana iloko o ke kulana hoomaopopo ole o kou noonoo. Ua ikaika loa ka hili ana o kela kanaka lapuwale a hulia me kou hoohanuia ana i ka laau hoohiamoe ke kumu i kou kuninipo loa ana iloko o kela mau hola.”

            “O ka mea a’u i hoomaopopo ai oia ko’u lohe ana i ke kani o ka pu ame na hauwalaau. Pehea la ua make anei kekahi i ka pu?”

            “Ua pakele anei kela poe apau?”

            “O, ua pau lakou i ka puhee i ka manawa pokole, wahi a Hale.

            “E hai mai oe ia’u i na mea apau i hanaia. Ua eha anei oia.”

            “Aole oia i eha. Aohe wahi palapu i loaa aku ma kona kino. Aka e hai aku wau ia oe, ua make hookahi kanaka ia’u. Ua loaa aku o Denoka i kuu poka a ua make oia me ka loaa ole iaia ka noonoo o ka mea nana i ki aku iaia a heaha la ka mea i ku ai. Ua maopopo loa ia’u ua komo ka poka ma ke poo. I ka manawa a’u i hoea mai ai ua ike mai au nana i ho-a ae i na kukui a malamalama ai oloko o ka lumi a oia no ka manawa a’u i ike aku ai iaia e paa ana me ka pauku laau. Ua lohe no wau i kau kahe ana ana i kuu inoa a hele no hoi au a hiki i ka puka oia kou manawa i loaa ai i ka hauna paukulaau, a oia no hoi ka hoomaka ana ae o ka haunaele. O olua na mea nana i hoohaukae loa i ka pale holoi wawae nani loa a’u i ike ai, a’u hoi i ike ole ai mamua.”

            “Heaha ka maua mea i hoohaukae aku ia maea?” wahi i ninau aku ai o Lore.

            “Oia mea i haukae e lilo ana ia i mea malama mau ia e ia (ka wahine) no ka mea, wahi ana i olelo mau ae ai ua kikohukohu i ke koko o ka mea i piha i ka wiwoole a wahi hou ana aole loa a malele aku kela pale-holoi-wawae mai iaia aku. Ua pihoihoi loa oia i kela manawa nou i ka manawa i piha mai ai ka lumi i kanaka. Aole au e poina nona i ka manawa i kiiia mai ai oia e ka wahine kaukaualii ame ka makuahine hanauna ona a laweia no kekahi lumi okoa aku. Eia, ua pau loa aku nei kela poe iwaho a e hai aku ana au ia oe i ka’u hana i kela kuke i kamanawa au i haalele iho ai ia maua. Ua hoohanu aku wau iaia a ike iho la wau aole oia e ala koke mai ana, nolaila ua haalele aku wau iaia e moe ana iloko o ia ano a o ko’u hiki aku no hoi ia i ka papahele ia’u e pii ana ma ke alapii ua ike koke aku la wau ia Denoka ke kiai o ka holo ma kahi kokoke i ka lumi moe o ka moiwahine e holo ana me ka mama nui ma ka holo. Ma keia manawa no ua lohe aku wau i kau kahea ana no’u a i kuu haka pono ana ua hamama ka puka a e hoana ana no hoi o Denoka i ka pauku laau a hiki no hoi au ma ka puka, o kou loaa aku la no ia i kana hauna ke kumu o kou hehee ana i ka papahele. Ua ki aku la wau iaia i kela manawa a ike aku la wau i kona (wahine), holo ana mai a pili ma kou aoao a oia no hoi ka hiki mua i ou la mamua o’u. O ka powa i komo iloko o ka lumi ua holo a aole no hoi au i kiia mai a emoole ua lohe aku ia au i ka pahu ana mai o kekahi o lakou ma ke alanui pii me ke kakaa ana i lalo o ke alapii. Ua loaa koke mai ia ka manao ia’u e alualu aku mahope o ua poe la a loaa io aku la no ia’u ke kanaka i kakaa ma ke alapii ua eha loa a ua paki liilii ke koko. O kekahi kanaka ua holo aku oia maloko o ka lumiaina me ka manao e pakele aka, ua loaa koke mai la oia i na koa. O kekahi poe ua aahu lakou me ka lole keokeo a o lakou ka poe i loaa mai ai au a umi ia iho la wau me ka ikaika a laweia ae la wau he paahao na lakou pela au i hoomaopopo ai he poe maikai lakou. I kela manawa o’u i hina ai i lalo ua hele mai la ka makainui i hui pu ai me kaua iloko o ka halepaahao ua hele no hoi a piha loa i ka huhu no kaua no ka mea wahi ana oia iho la ka kaua mea i hele ai ianei no ka hana ana i kela ano hana.

            Aka mahope i kuu hoakaka ana ua maopopo loa aku la, a pau ae la ko lakou kuhihewa a hookuuia ae la wau. Ua holo aku no makou no ka huli ana i ka poe powa ua ike aku wau ua piha koke ae la oloko o ka pa alii i na koa kiai pela no hoi me na makai a ua huikau pu mai ia me kanaka i hoonoho ia ai malalo o ka pukaaniani. I ka wa a’u i hoi hou mai ai i ka lumi ou e waiho ana ua piha oloko i kane ame ka wahine me na lole moe po wale no ua hele no hoi a pihoihoi me ka hoomaopopo ole i ka mea e hana ai.

            Mahope o ko’u wehewehe ana i ka moolelo o ko kaua hiki ana ianei i kela po ua hoike mai la no hoi ka makainui i ke kumu o ka hoala ia ana o ko lakou noonoo no ka hooko mai i ka lakou hana. Ia makou e hoolohe ana i ka moolelo, i ke kauka e hooponopono ana i kou mau palapu. Ua laweia o Denoka. Aole au i ike i kekahi anaina nani e like me ko kela i keia po. O ka wahinealii e hilinai ana ma kuu aoao hema nei a o ke kaukaualii mahope koke mai ona, a o ka makuahine he wahine aoo oia ame na haiawahine, na aliikoa ame na kiai ua hele a pihoihoi. He anaina maikai maoli no kela a’u i ike ai. Iloko o ka manawa pokole ua paa koke ae la ka pa alii i na koa no ke kiai ana ame ka huli ana i ka poe kumakaia a hiki no hoi i ka hola eono o ke kakahiaka ua pau loa lakou i ka paa me ka lawe pu ia o ko lakou mau ola. He elua wale no mea i malele aku oia na mea i hoonohoia e malama i ke kaa. Ua pakele laua a hiki i keia manawa aole he wahi mea a ikeia iki o laua.Mahope o ka hala ana he hookahi hola mai ka manawa i loaa ai oe i na palapu ua hoi holia mai oe iloko o keia lumi, a e hai aku wau ia oe ua lilo loa oe i mea nui loa i na mea apau o keia kakela e hooho mahalo ana i kou wiwoole ame na hana hookalakupua au i hana ai no ka hoopakele ana i ka wahinealii. Ua like oe me kahi bebe i aloha nui ia a makemake nui ia, ko lakou hele mai a paapu ae oe me he bebe e paapuia ana. E hai aku wau ia oe ua lilo maoli no oe i mea nui i kela poe apau.”

            “O oe ka wiwoole e Hale. Nau i hoopakele i kuu ola ame ko ke alii-wahine.” wahi a Lore i pane aku ai i ka manawa a Anagusi i hiki ai i ka panina o kana moolelo. “Aole au e ae e haawi mai oe a i ole o kekahi mea okoa aku paha i kekahi hookahi no’u.”

            “A nawai keia manao e kiia lakou apau a make?”

            “I ko’u manao na na mea no apau. Aole nae lakou i ui iki mai ia’u. O, eia ae ke aliiwahine.” Mai keia manawa a Anagusi e kamailio nei ua komo mai la ke aliiwahine, ka luahine aoo Waiomine ame ka elemakule Casepa.

            “Mai noho oe iluna e Lore,” wahi a ke aliiwahine. I kela manawa e kulu ana na waimaka ma ko Lore mau papalina.

            “A ua hoike anei lakou i ko lakou hewa e Hale?” wahi a ka ninau a Lore.

            “Aole au i maopopo. Ua hoi,e mai anei lakou e Casepa? O, aole au i noonoo iki ia mea.

            I mea aha ia o ka ninau ana no ka mea ua loaa aku lakou me ka hiki ole ke hoohewahewa i ko lakou hewa, wahi a Casepa i ui mai ai ia Lore me ka leo oluolu.

            Manao wau ia he kanaka makaala loa ko oukou makainui?” wahi a Lore i pane mai ai me ke ano huhu.

            “Heaha kela i pane ia ae la?” wahi a kekahi leo i pane mai ai me ke ano huhu. O ka mea nona ka leo i pa-e ae ai oia no ka makainui. Ua pii ino ae la kona huhu i kona manawa i lohe aku ai i keia mau olelo a Lore.

            “Ua makemake loa e ike i ke kumu e lawe koke ole ai i ko lakou oia me ka hoohakalia ole oiai ua ike maopopo loa ia ko lakou hewa.” I ninau hou mai ai oia.

            “Peia no hoi au e makemake nei e ike aku pehea la oe e huli ai a loaa ke alakai nui o keia mau hana oiai ua lawe aku la oe i ke ola o kela poe ke kumu e hiki ai ia oe ke nowele aku? wahi a Lore i ui aku ai a oia no hoi ka manawa ona i hina aku ai a waiho ana kona poo iluna o ka uluna.

            Ma keia pane a Lore aole e hiki i ka makainua o ua aina nei ke alo ae i ka oiaio o ka Lore ui ana a ua kau mai na hiohiona o ke ano hilahila no ka loaa ole o kela ano manao iaia. Nolaila ua hoopuka leo nui ae la oia e hooikaika ana oia a hiki i ka manawa e loaa ai ina nei no ka lilo aku o kona ola ma ia hele huli ana ua aa loa oia e komo aku iloko o ia poino. Aohe hookahi mea iloko o Edelewesi e hiki ai ke hooiaio mai, e hiki ai ke hopu ia kekahi mea ma ka hoohuoi no ka hana ana i kela hana e manao e aihue i ke aliiwahine. Ma na aoao apau aohe wahi o ka manaolana e loaa ai ka meheu.

            I ka wahinealii e ku ana ma ka aoao o ka makuahine e kalele ana hoi kona lima maluna o ka makuahine ua ano pihoihoi oia no keia mau kamailio a pane aku la oia i ka makuahine:

            “Heaha la ke kumu o ko lakou manao ana e lawe aihue ia’u? No ko lakou makemake anei e pepehi ia’u a i ole e hoopaahao ia’u? O, e mama, aole anei au i hana aku i ka maikai i kuu lahui? Ua ike lakou i ka’u mau hana apau i hana ai no lakou a o lakou no ka i ike ia mau mea. Aole e hiki ia’u ke hana aku a oi aku mamua o ka hiki ia’u ke hana. He mau hana anei keia no ka hookahuli ia’u mai ka noho moi mai? Owai ka mea e aa e hana i kela ano hana ia’u?”

(Aole i pau.)

____________

(Mai ka aoao 3 mai.)

Ka Poka Nui me ka Poka Iki.

__________________

            i na enemi. Ia lakou e hoopiha ana i ka lakou mau pu ua ike aku la makou aia na waha o ka lakou mau pu e iliwai la me ke kiekie o na koa, nolaila, ua homaopopo aku la makou eia na enemi ke kokoke loa mai nei i ko makou wahi. I kinohi ua hooleleia aku na poka paa a mahope mai, na poka pahu, a ia manawa ua loaa mai ia ke kauoha ia makou e makaukau mau kela ame keia. He iwakalua minute mahope mai aole loa i lohe hou ia aku na leo o na pu a na enemi ma ko makou wahi, a no ia mea ua hoohuli ae la ka pualikoa pukuniahi a i ka lakou mau kaa pu a hoi aku la me ka hiehie e like me ko lakou nee mua ana i kinohi. Ia lakou i emi mai ai, ua hoi aku makou ma ko makou wahi mua, a ma ko makou alahele, ua hookui aku la ko’u wawae me ke kino make i palahe liilii i ka huila o na kaa pukuniahi. Ia makou no e hooponopono ana i ko makou kulana ua holo ae la elua mau pualikoa pukuniahi ma ko makou aoao hema a hoomaka aku la e ki poka i ka ululaau.

            “Ano, e a’u mau keiki,e ku me ka maaukau!” wahi a ko makou konela wiwoole. “I ka manawa e loaa a@@@ oukou ke kauoha, e hoomanao a e moe iho ilalo a ki aku i ka oukou mau pu.

            I hakalia no apau kana kamailio ana, ua pahu ae la kekahi poka maluna pono iho ona a ike aku la makou i ka hina ana iho o kona lio ilalo. Ua lohe koke ia na leo uwe mawaena o ko makou poe, aka, ua hoohauoli koke ia makou i ka wa i oili ae ai ke poo o ko makou konela iluna ame ke poha ana mai o kona leo:

            “Aole au i pilikia e a’u mau keiki,” ua uhi koke ia iho kona leo e na leo hauoli i kona poe koa, oiai, aia ka lakou mau hooho hauoli ke hoopiha la i na paia lani. Iloko oia manawa i holo aku ai o Mekia Hadina a haawi aku la i kona lio, a i ke kau ana o Konela Loila iluna o ka lio ua hoopiha hou ia ae ka lewa me na leo hauoli.

            Ia makou e hauoli ana, oia no ka wa i haluku iho ai na poka iki a na enemi iwaena o makou a make aku la kekahi poe o makou. Ua kukuli liko iho na koa apau ilalo a e likeme ke kauoha i haawiia mai ia makou, ua panai koke ia aku ka na enemi hana kimopo. Iloko no ia manawa i ikaika loa mai ai na ki poka ana a ka pualikoa pukuniahi, a he mau minute pokole mahope mai, ua loaa mai la ke kauoha no ka hoopau ana ae i ka makou ki ana.

            O keia ka hope loa o ka makou kaua ana ma ko makou aoao, oiai, ua huli aku la na Konofedereta a kaua aku la ma kekahi aoao okoa, nolaila, ua ku iho makou me ka hoolohe ana no na hana e hanaia ana ma kekahi aoao. Ke ake nui loa la wau e hoea koke mai ka malamalama o ka la, ina no ia he mea e poino ai, oiai, ma ka hakoko ana i ke ao ua hiki ke ike au i kahi a na enemi e kaua mai ana. Ua ku iho makou a hiki i ka wa i mamao loa aku ai na ki pu a na enemi, a o ko makou mau pualikoa pukuniahi aole loa i hoohala i ke ki ana aku i ka lakou mau pu a hiki wale i ke aumoe.

            Ua noho iho wau iluna o ka lepo a iloko o ka wa pokole, aia ko’u uhane ke hooipo la i ka poli o Pele, a pau ae la hoi ko’u lohe ana i na hana e hanaia ana. Aole wau i ala iki a hiki i ko Denisa hoala ana ia’u i kekahi la ae me kona hai ana mai eia makou ke nee nei. Ia’u e hooko ana i ke kauoha i haawiia mai ia’u ua ike aku la wau i kekahi o ko’u mau koa e pili ana ma kekahi kumulaau.

            Ua hele aku la wau e hoala iaia, aka, ua hoopuiwaia wau i ko’u hooni ana aku iaia, aia hoi ke kino wale iho no ua lele mua ka uhane. Ua hoohamama ia kona umauma e kekahi apana hao mai loko mai o ka poka pahu.

______

MOKUNA XIV.

___

HOOHAAHAAIA.

            “O ka haulehia o ke kanaka koa,

Aole ia e hopo iho;

E like me kana pahikaua,

Oiai ia e kulia ana.”

            Ia makou i hiki ai i ka palena o ka ululaau ua halawai aku la makou me ka Mahele Ekolu e pii mai ana ma ke alahele no ka Mukuaina-Hulia. Ua nee mai o Ranola ame kona mau koa mai Federikabuga i ka  po mamua iho me ka hoomaha ole, a mai ia lakou mai i loaa mai ai ia makou ka lohe, o ka mahele wale no o Sewika ka i koe aku ma ke kahua kaua a Bonukaika i hakoko ai. Ma keia lono i maopopo ai ia makou ua hoololi ae o Li i kona kahua kaua, a eia me kona mau pualikoa ikaika iloko o keia mau ululaau a makou e kuoe nei.

            Me he mea la ma ka hoomaopopo ana o ka hapa mawaliwali keia o keia paio e hanaia nei, aka, o ka io maoli o ka hana ke neenee mai nei me ka hikiwawe.

            Me keia lono ua ku iho na kiai me ka meha pu, a o ka manawa aia ke nee la me na kahoaka e hoike mai ana aia na aoao a i elua ke moe ia no ka hoomanha ana. Ua ku iho wau me ke pahaohao i ko’u ike ana i ka nui maoli o ke kahua a makou i hakoko ai i ka po mamua iho, a me he mea la e moeuhane ana no wau i keia mau mea apau. Ua kuwai iho wau i ko’u maka i hiki ai ia’u ke hooia iho i ka’u mea e ike nei, a i ka nana ana iho aia io no na mea apau e hoopuni nei ia makou. O na kino make o na koa i paio ai i ka po mamua iho, aia lakou ke waiho la me ka nele i ka mea nana e huna iho i ko lakou mau kino. O kekahi mau kaa pukuniahi no lakou na leo i loheia e wawalo ana ma na kualono, ua opepeia ae lakou a aia lakou e waiho la me ka hiki ole ke hoohana hou aku. O na lio no lakou na kino ikaika e huki ana i na kaa i ka la mamua iho, aia ko lakou mau kino ke waiho la a ua pau hoi ka lakou mau hana. O kekahi mau aliikoa no lakou na leo kauoha i loheia e kalahea ana i na koa ma ka la mamua iho, aia ko lakou mau kino ke waiho ia me na kulu wai kehau e hoope ana i ko lakou mau kino a me he mea la he mau waimaka ia o ka lakou mau mea aloha e noho ana ma na home me ka hoopii ana ae i ko lakou mau leo pule i na Mana Kahikolu e hookipa aku i ko lakou mau uhane ma kela kapakai lai. I ka makaikai ana i keia mau mea apau, aole e nele ka loaa ana o ka lia maeele e holopuni ana i ke kino. Ae, he lia i’o no, no ka mea, he kiina na ka poka nui ame ka poka iki, a he kiina weliweli hoi i aneane aku kona lua i kahi i oleloia-“malaila e uwe ai a e uwi ai na niho.”

            “Ihea kakou e nee nei e ka mekia?” wahi a Kapena Buka i ka wa i hoea mai ai ua hoaloha la o makou.

            “O kakou ana ka poe e hookoeia ana ma ke ano aia no a puhili mai ko kakou mau mua, alaila, komo aku kakou e wawahi i na enemi. Aole wale no hoi pela aka, ua hakoko ikaika kakou a he mea pono no e loaa ka hoomaha ana. Aole no hoi e loihi loa, oiai, he ano e loa ka nanaina o na mea apau ke nana aku,” wahi a Mekia Hadina.

            “Ea, e ka Mekia, he kohu Buka mai nei hoi kou ano. Ke manao nei wau aole oe i uluhua?” wahi a’u, no ka mea ua pane mai ka mekia me kona ano uluhua maoli no i ko makou waiho mau ia a hiki i ka wa e aneane ana e pau ka hakoko ana.

            “Aole i kupono ia huaolelo. O ka pololei he ‘ake.’ Ua maopopo ia oe e Wilimona aole o’u hoolaha. Eia kakou i keia manwa ma ke pu pale wale ana no, a ke pahaohao nei au oiai ua lanakila hoi ka kakou hoonee ana ineihine.”

            “Owau pu iloko oia haawina. Me he mea la aia kekahi hewa i hanaia ma kekahi wahi,” wahi a’u.

            “Ua loaa pono mai la ia oe e Wilimona. Ke manao nei au aia no kekahi hemahema ma kekahi wahi. Ina manawa no hoi apau e loaa mau ana ia kakou ke pakalaki a e kuha’u mau ana no hoi.”

            “no ka hoopau manawa mau kekahi o ko kakou mau kenerala,” wahi a Kapena Buka.

            “Pela io no,” wahi a ka mekia.

            “Well, aole no kakou ia hewa, nolaila e hana no hoi kakou e like me ka mea hiki ia kakou,” wahi a’u. “Me he mea la ua ano olalau oe e ka mekia no kou hele wawae ana i keia manawa.”

            “Pela io paha,” wahi a ka mekia me kona akaaka ana ae. “Ke hoike aku nei wau, ua noonoo nui io no wau no ko’u lio; aka, ua oi aku ka pono i ke kaa ana ia Konela Loila, oia he kulana kiekie kona mamua o’u.”

            “Mai lilo oe i Lukanela Konela i ka po nei. Ma ka apua wale no kou palekana ana e ke konela,” wahi a’u.”

            “He akelekele io no; aka, aole o’u makemake e hookiekieia ae wau mamuli o ka make ana o ko’u haku,” wahi a Mekia Hadina.

            Aka nae, aole o maua mea i ike aku i ke au o ka manawa e nee mai ana, a hiki hoi ke koho iho o keia kahua a maua e papaleo nei, oia no ke kahua a maua e papaleo nei, oia no ke kahua ona e hookiekie ia ae ai a kau ana ma ko Konela Loila kulana.

            Eia ko makou mahele ma ka aoao mawaho loa, ma ka hema hoi o na pualikoa o ka Akau a i ka hiki ana o ko makou hapa hope iloko o ka ululaau ua kauoha ia mai makou e moe iho ilalo malalo o na kumulaau, a o ka laina hoi o ke kahua kaua. No ka maluhiluhi maoli no, ua hooko koke aku na koa apau i ke kauoha; a iloko o na minute pokole, aole loa he hookahi mea i kakaa kona mau maka iwaena o keia heluna o umikumamalima tausani koa. No’u iho hoi, i loaa no a pili ko’u poo i ka honua, aia ko’u uhane ke hooipo ia me Kanehunamoku.

(Aole i pau.)

____________

HOOLAHA LOAA.

            Owau o ka mea nona ka inoa malalo iho nei, ke hoike aku nei au, ma ka la 11 o Novemaba nei, mawaena o Waiau ame Waimalu, ma ke alanui Aupuni, ua loaa ia’u he elua apa-lole. O ka mea nona keia waiwai i hoikeia, e kii koke mai ma ko’u wahi noho ma Waiawa, Ewa, iloko o na la he 15, a e uku pu mai i na lilo no ka hoolaha ana, ke hala keia manawa e lilo no ia’u na waiwai i hoikeia ae nei.

NOA MAHI. 

            Waiawa, Ewa, Nov. 13, 1902.

2937 – Nov. 14, 21.

HOOLAHA KUMAU

Ka Hui Banako Hoohu

            Malama Dala o Hawaii

(KAUPALENAIA.)

___

Huina i hoahuia-----$250,000 00.

Peresidena.....Kikila Baraunu

Hope Peresidena.....W. P. Robikana

Puuku.....W. G. Gooper

Keena Hana Nui:

Alanui Papu, kokoke i Alanui Kalepa.

Keena Lala ma Hilo, Hawaii.

E lawelawe ana i ka

Oihana Banako Hoahu Dala

            ma Honolulu a me Hilo

            E laweia mai no na huina hoahu me ka haawiia o na ukupanee no na hoahu makahi ma ka huina o 4 ½ pakeneta no ka makahiki. E loaa no na Rula a me na hooponopono ana ke ninau ae ma ke Keena Hoahu.

KAUKA T. MITAMURA

...

            Alanui Nuuanu, Honolulu, T. H.

Na Hora Hana:

            Hora 8 a 10 kakahiaka; hora 1 a 3 ame hora 6 a 7:30 p. m. Sabati: Hora 6 a 8 p. m.

LEWERS & COOKE

LUI A ME KUKE, Kaupalenaia

___

Na Mea Hookomo mai a Kuai aku

i na

LAKO HANA HALE

O Keia ame Kena Ano.

Malaila e loaa ai na mea malalo iho:

___

            NA PAPA N. W., NA PAPA HOLE, PILI HALE, NA PUKA, NA OLEPELEPE AME NA PONO PUKA ANIANI, NA KUI, AME NA MEA PILI I KA OIHANA. KAMANA, NA PONO PENA.

            NA PENA LIKE OLE AME NA HULU PENA, NA ANIANI, NA PEPA HALE, PALE PUKA ANIANI, MOENA, ETC.

___

            O na kauoha pono hale apau loa e hiki mai ana ia makou e hooko koke ia no me ka eleu ame na KUMUKUAI HAAHAA LOA.

Poe Akepau i loaa hou

ke Ola Kino Maikai.

___

            Ke hoike mau mai nei na Kauka ia makou mai na wahi like ole mai o ke ao nei no ka nui o ka poe i aneane e loaa i ka ma’i akepau i hoopakele ia mai keia ma’i mai mamuli o ka laau “AYER’S CHERRY PECTORAL.”      

            Ke loaa i keia laau e loaa ana i ka ma’i ka maha no ka wa mau loa, a aole no kekahi manawa pokole e like me kekahi ano laau okoa ae.

            Aohe Laau Kunu i oi ae o ka maikai mamua o ka LAAU KUNU “AYERS CHERRY PECTORAL.” He mea maikai e ike kakou i keia, no ka mea ua hoolaha keia laau i ka poe i loaa i keia haawina no aneane kanaono makahiki. E malama mau i keia laau. Ina aole au omole laau kunu o keia ano, e kuai koke mamua o ka loaa ana i ke kunu. Ina ua loaa kekahi iloko o ka ohana i ke anu e hooinu i keia laau a e loaa no ka maha.

            Hoomakaukau ia e Kauka J. C. Ayers & Co., Lowell, Mass., U. S. A.

            E loaa no keia mau Huaale ma na halekuai laau a pau.