Ka Nupepa Kuokoa, Volume XL, Number 47, 21 November 1902 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

 

HOOLAHA KUMAU

 

Ka Hui Alahao ame Aina o Oahu

Manawa Holo

Mahope aku o Ianuari 1, 1902

 

MAI HONOLULU AKU

HALE HOOLULU

 

Na la apau koe ke Sabati   Na la apau    Na la apau koe ke Sabati    Na la apau    Na la apau

a.m.                                         a.m.                 a.m.                                 p.m.             p.m.

Honolulu 7:10                         9:10                 11:05                               3:15              5:10

Manana 8:03                           9:48                 11:40                               3:45              5:30

Ewa Mill 8:32                         10:08               12:00                               4:05              6:10

Waianae ----                            10:50               ----                                   4:45               ----

Waialua ----                             11:55               ----                                   5:40               ----

Kahuku ----                             12:32               ----                                   6:15               ----

 

MAI WAHO MAI

HALE HOOLULU

 

Na la apau koe ke Sabati   Na la apau koe ke Sabati Na la apau       Na la apau

Kahuku ----                             5:35                                             ----             2:08

Waialua ----                             6:10                                             ----             2:50

Waianae ----                            7:10                                             ----           3:55

Ewa Mill 5:50                         7:45                                             1:05           4:32

Manana 6:15                           8:03                                             1:30           4:52

Honolulu 6:50                         8:35                                             2:05           5:26

 

G.P. Dennison.

Luna Nui

F.C. Smith.

Luna Kuai Kikiki

 

Kakela me Kuke

(Kaupalenaia)

 

Poe kalepa ma ke Komisina

A HE

POE LAWELAWE KOPAA

 

POE AGENA NO NA MAHIKO LEHULEHU

 

S. OZAKI

 

WAIHO I KA

OIHANA KUAI PAPALE

 

Kuai oemi Loa

I NA PAPALE

35c NO KA PAPALE $1.00

Halekuai 178 – Alanui Hotele

 

Ina He Makemake

KOU I KA

Lauoho Maikai

E HELUHELU I KEIA.

 

Maila paha ke pau nei kou lauoho i ka helelei, a koe kakaikahi. E kau i ka laau mamua o ka pau loa ana i ka helelei, e hana i laau e ulu hou ai. O ka laau

“Laau Hooulu Lauoho a Ayers” ka mea e ulu hou ai. He nani ka lauoho ke ulu mai, a he nui hoi. Ina he nawali ka ulu ana o kou lauoho, o ka

“Laau Hooulu Lauoho a Ayers” ka mea e manoanoa ai ka ulu ana, a ke loaa i keia laau pau loa ka helelei ana. I na he piha kou poo ke Kepia, o ka

“Laau Hooulu Lauoho a Ayers” ka laau e pau ai a maemae koupoo. Ke loaa i keia laau e hoi hou ana ka ulu ana o kou lauoho a like me ko kou wa bebe.

Hoomakaukau ia e Kauka J.C. Ayer & Company, Lowell, Mass., U.S.A.

E loaa no keia mau Huaale ma ka Hale Kuai Laao o Hollister, ananui Papu.

 

O ka laau kunu a Chamberlain ua hana wale ia no no ke kunu, ke anu, ka nae, kunu kalea ame ka nalulu. Ua lilo mai ia i mea kaulana no kona hoola ana i keia mau ano mai ma na wahi apau o keia poepoe honua naauao. Ua loaa mai na olelo hooia e hoike ana i kana hana maikai; o ke ano kunu inoino loa, ua hoolaia e ia; ua hoolaia hoi ke anu e kona mana lua oia; a o ka nae i hiki mai me kona ikaika nui ua hoopauia ae, a he hoopakele mau no hoi i ke ola o na kamalii. O kona lawe nui ia ana no ka hoola ana i ke kunu kalea he hoike ana ia i kona ike i ka aihue ana i ka ikaika oia ano mai. Ua lilo oia i milimili na na makuahine no ka mea, aole he mau mea hoopoino i ke ola iloko ona he ole loa no hoi ka pilikia ma ka haawi ana aku i na keiki, ina no ia he bebe. He hoola k@na, a he hoola hikiwawe no hoi. Hui @ Benson, Smith, ka agena kuai laau.

 

NA ALOHA ELUA

i ka

IPO HOOKAHI.

Mokuna XX.

HE WAHINE I ALOHA OLE IA.

I ko Sir Kilinetona lohe ana i kela poe huaolelo ua nana iho la oia ilalo iaia; e haloiloi ia ana kona mau maka e ka waimaka; e haalulu ana kona mau lehelehe. Heaha la ka huaolelo i hiki ia Sir Kilinetona ke olelo mai? Iloko o ka papaku o kona puuwai ua ike maopopo no oia aohe aloha iloko ona nona.

“E kuu Daisy aloha,” wahi a Sir Kilinetona i olelo mai ai me ka hoao ana iho e mino aka, “ke haawi mai nei keia ilina nani i na manao pouliuli ia oe; aohe no a he mea maikai o ke ola ana no ke aloha mamua o ka make ana no ia mea?”

“E hoao mau ana nohoi oia e alo ae mai kau mau ninau mai a pau,” wahi a Daisy i noonoo iho ai iloko ona; “he hana mau nohoi ia nana ina oia e lohe ana i kekahi mea e pili ana no ke aloha.”

Ua noho malie iho la o Daisy no kekahi mau minute pokole alaila olelo aku la oia:

“Caro, e ae mai ana anei oe e hoopaa mai i kekahi olelo hoopaa me au?”

“Ae, wahi ana i pane pokole mai ai.

“E hoohiki mai oe i kou wa e make ai e hoihoi mai oe iau ia nei nei e kanu ai; a e Caro, ua makemake loa au e kanuia ma kekahi wahi e kokoe ana i kekai he nani loa, ma ka aoao hoi o ke kanaka i make ai no ke aloha. Mai hoopoina hoi oe?”

“Aole loa au e hoolohe aku ana i kena mea, e Daisy; aole oe e pono e noho loihi hou iloko o keia wahi.”

Ia wa i lawe koke aku ai oia iaia ma kahie, aka, aole nohoi laua i hoopoina iki i ka ilina o Sana Marie Piera.

He ekolu makahiki i hala ae nei mai ka manawa a Sir Kilinetona Adea i lawe aku ai i kana wahine opio i ka aina o ka oliva a me na mea kanu hihi. Mai ia manawa mai i hoomaka ae ai kona wahine ui e pii; e mau ana no kela helehelena maemae o kona mau la opio maluna o kona helehelena, a ua loaa maoli no iaia ke kulana o ka wahine kanaka makua; he oluolu ka nanaina, me ka maemae pu, he mau maka ano kaumaha, a pela nohoi me kona mau lehelehe.

Ua ike o Daisy i ka mea oiaio i keia wa. Ua ike iho la oia aohe i kupono kona aloha no ka hoopiha ana i ke ola o kana kane; ua ike no oia, aia wale no oia mawaho aku o ia aloha; aohe wahi mahele ona iloko o kona puuwai. Me ka malie, me ka ehaeha a me ke kaumaha i ala mai ai ka hoomaopopo ana iloko o Daisy i ka mea oiaio. Ua ike no oia aole ia aloha kana kane iaia. He mau mea liilii wale no kana i hoomaopopo; aole loa ona hoike mai i kona helehelena hoihoi iaia. I kona wa e komo aku ai iloko o kekahi lumi kahi hoi ana e noho ana, ua nana mai no oia me ka oluolu; he mino aka mau mai no oia iaia; aka, aole nae ia no ke aloha maoli, he mau hana hoopalaimaka wale no ia ana. Ka Daisy mau hana maikai a pau he mea ole wale no ia iaia. Aohe lokahi o ka manao mawaena o laua, aia wale no ke aloha ma ko Daisy, a ma ka aoao hoi o ke kane, aole.

Aole no i pupuahulu o Daisy ma ka noonoo ana; aka, me ke akahele loa oia i hana ai a hiki i ka hopena pau o kana mea i manao ai. Alaila, he mea okoa hu ae no kekahi nana e hoomaka mai ana e hoolauwili i kona noonoo a oia hoi keia-ina aohe oia i aloha iaia, no ke aha la oia i mare ai me ia? aole i hiki ia Daisy ke hoike lea ae no ia mea.

O ka manao hookahi wale no iloko ona o kona makemake e ike pono i ke kumu o ko Sir Kilinetona mare ana iaia, a koe aku kona aloha. Ua ike no oia, aole no kona wahine ui ana-oiai, he kanaka oia i kaahele ma na wahi like ole a pau a malia paha he poe wahine ui loa kana i ike ai i oi ae mamua ona; aole nohoi no kona kulana oiai, he kaikamahine ilihune oia.

Alaila komo ike mai la no kahi manaolana uuku iloko o Daisy, a oia kona wa i olelo iho ai iaia iho, “Malia paha he wahi aloha uuku no kona iau,” no ka mea, ua lohe oia i kona kamailio ana me kona makuahine, a ua mare aku oia iaia mamuli o kela loha ana ona. Aole loa i moeuhane o Daisy no kekahi mea okoa ae. Aole nohoi i komo mai ka manao lili iloko ona ia wa, no ka mea aole oia i manao ua aloha oia i kekahi mea okoa aku-aole loa no-hoi oia i hoopukapuka wale aku i ka inoa o kekahi wahine okoa aku. Alaila o ko Daisy wa ia e uhu iho ai me ka leo kaumaha a me na manao pohihi e hoolauwili ana i kona noonoo.

Ka mea weliweli hope i ike ia mahope mai oia ko Sir Kilinetona hoomaka ana mai e ano uluhua i ke ano o kona noho ana ia wa. Ia wa iho la me he mea la oia no ka puupuu nana i kulai aku iaia a hina ilalo he mea hiki ole ia ke hoala hou ae iluna. Ua manaoio loa no oia aohe ana hana e ae e hana aku ai, aka, o ka noho no me ia e kuewa hele ai a hiki i kona make ana.

I keia wa, ua ikaika loa mai la kona kino, a ke hoomaka mai la nae kona noonoo e hoouluhua iaia i ke ano o kona noho ana. Ua komo hou mai la iloko ona ka iini e hoi hou oia i kahi ana i haalele aku ai e hoala hou ai i kana hana. Aohe ana hana i keia wa, he noho wale iho no, a he mea maikai ole ia i kana noonoo ana. ina oia e nana aku i na ao o ka lani, aia no ka helehelena o Lede May iloko o laila; ua hoi hou mai la i ona la ka hoomanao ana nona i ka wa ona e honi aku ai i ke ala o na pua, ka lohe ana aku i na manu e himeni mai ana, pela nohoi ka owe mai o na lau laau. Ina wa a pau ana e noho mehameha ai e ilihia mau ana oia no ka mea ana i aloha ai.

O ka pono kana i manao ai e hana imua o ke Akua a me ke kanaka; aohe i komo mai na manao pono ole iloko ona no ka mea na manao poono ole iloko ona no ka hana ana aku i kekahi hana hewa. O kana hana i manao ai o kona hoike aku i kona ano he kane oluolu oia i kana wahine ia Daisy a e noho pu oia me ia iloko o ka maluhia a me ka lokahi,

Aka, ua noonoo iho la oia he mea pono iaia ka hale ana i kekahi wahi; e pono oia e imi i hana nana e hana ai. Ua olelo iho la oia iaia iho ua makemake oia e hoi hou i Enelani-aole nae i Esawale, ka home i hoopunapuna ia ai kona aloha no Lede May; aohe hoi ona makemake e hoi koke aku ilaila ia wa; aka, e hoi loa ana oia i Ladana; ilaila oia e ike aku ai i ke ano o na hana e hana ia ana; a laila nohoi oia e hoopau ai i kekahi mau hana ana i hana ole ia no kekahi mau makahiki loihi i hala ae. Ua olelo wale iho la no oia iaia iho, e akahele loa ana oia, aole ona makemake e ike hou aku kona mau maka i ka helehelena o Lede May, a o ka “Dukewahine hoi o Rosekana i keia manawa,” oia kona manao iloko iho ona ia wa.

“Aole, aole loa ou makemake e halawai pu me ia; aole au e hookomo hou aku ana iau iho iloko o na hana hoowalewale e hiki mai ana. Maila paha aole lo no au i aloha ia Daisy, aka, e hoike aku ana no au i kou kulana oiaio iaia.”

Ua paa kona manao no ka hele, a o na mea aku a pau i koe a kona manao i hooholo ai oia kana e hai aku ia Daisy. Ua huna loa oia i kona inoa oiaio i ke ano o kona kulana a me kona waiwai mai kana wahine mai, no ka mea, ma kekahi ano ua makemake loa no oia i ko Daisy aloha ana iaia mamuli o kona kino ponoi iho, aole hoi mamuli o ka inoa hanohano, ka waiwai a pela wale aku. Ua ilo iho la ia i mea nui nana e noonoo ai i ko Daisy manao pahaohao a me na mea e ae nohoi a kona noonoo e kahaha ai.

No kekahi wa aku au e lawe ai iaia a hiki Esawale, a hai aku iaia o Lede Adea oia,” wahi a Kilinetona i olelo wale iho ai no iaia iho.

Ua kahea aku oia iaia he pua daisy no ke kula, aka, i keia wa aohe oia he pua no ke kula; aohe lede e ae i ike ai kona kulana lede iloko o ka aina holookoa mamua o Daisy Adea.

“Daisy,” wahi a Sir Kilinetona i olelo aku ai, ia laua e hele holoholo ana ma kahakai i kekahi ahiahi – “Daisy, aohe anei ou ano uiha mai i ke ano o ka noho ana o keia wahi?”

“Ano uiha mai?” wahi a Daisy i pane aku ai; “aole loa ia mea iloko ou. O ka noho’na hea aku auanei ka noho’na i oi aku o ka nani?”

“Aka, aohe poe e ae a kaua e ike nei, aohe wahi mea hou a kaua e lohe mai nei, aohe nohoi wahi mea a lohelohe wale ia aku ke ano o na hana e hanaia mai nei ma na wahi like ole a pau o ke ao nei-ua kanu ola maoli ia no kaua.”

“E kuhi ana au o kou makemake ia, a o kou iini nui ia,” wahi a Daisy i olelo aku ai. “Auwe, nohoi oe, e Caro, aole loa ou makemake e ike i kekahi mea, a i ole ia e lohe i na mea hou.”

“Ia wa aku la hoi paha ia iau e noho ana iloko o ka nawaliwali, aka, i keia manawa hoi ua maikai loa hoi au,” wahi a Sir Kilinetona i olelo mai ai, “ua ikaika loa hoi au, a ke auhee aku nei kela manao makemake ole ou ia mau mea mai kou noonoo aku. Ua makemake au e ike hou i ke ano o ko ke ao nei, e Daisy; aohe wahi hana o nei nei e manao ae ai e hana, aohe nohoi mea nana e hoohauoli mai ke ano o ka noho ana i kekahi manawa.”

Aohe i ike aku o Sir Kilinetona i ke ano kaumaha o kela mau maka i nana mai ai iaia.

Aohe ka mea nana e hoohauoli mai ka noho ana, oiai, aia nohoi oia me ia aohe ka he hana o laila e hana ai no ka mea, he hana nohoi ia o ka noho pu aku nohoi me ia! Ua hoomaka mai la o Daisy e ku mai a hiki i kona maule ana a kau mai la ka haawe o ka manao pilihua maluna ona. Ua lilo iho la no ka hoi oia i mea ole iaia-no ke aha la ka oia i mare ai iaia?

“Ua mano au,” wahi a Sir Kilinetona i olelo mai ai i kana wahine, “e hoi au i Enelani a noho ilaila no kekahi manawa; i nana aku au i ka hana e hana ai Ua lawa iho la ka noho ana e like me keia. O keia poe buke e heluhelu mau ia nei aohe ia i lawa no ka hoopiha ana mai i ka noonoo a me ke ola ana o kekahi kanaka ma ke ao nei.”

“Eia nohoi au me oe,” wahi a Daisy i olelo aku ai me ka leo nawaliwali; aka, aole nae i lohe mai ka pepeiao o kana kane iaia.

Ia wa oia i huli ae ai ma kahi e, a uhu iho la mea ka leo kaumaha.

“Mai hele aku oe, e Daisy,” wahi a Sir Kilinetona i olelo mai ai, “ua makemake au e noonoo pu kaua i na mea au i manao ai. Pehea kou manao no ka huli hoi ana i Enelani i keia pula ae?”

“Aohe au hoole ana aku ina o kou makemake ia,” wahi a ka pane i pane ia aku ai me ka oluolu. “O kou olioli ana o kou olioli ana nohoi ia.”

I kela pane hou ana no a Daisy aole iho la no ka i lohe mai o Sir Kilinetona.

Nolaila ua ku iho la o Daisy nona iho me ka makau ole a huli ae la kona mau maka iluna a nana aku la i kana kane.

“Caro, e hai mai oe iau,” wahi ana i olelo aku ai, “pehea la kaua i ano e ai? Ua olelo mai nei oe ua uiha oe i ke ano o ka noho ana o keia wahi; ua olelo aku nei hoi au eia nohoi au ka mea nana e hookaawale aku ia mau mea apau. Heaha aku la ka mea i koe?”

Ua hiki loa nohoi iaia ke hai aku i kana wahine ia wa koke no aia ka mea ano e mawaena o ke aloha a me ke ano o ia mea i makemake ia ai. Ua akaaka mai la oia me ke ano hoopohala no ka mea, ua lilo iho la ka Daisy ninau i ninau aku ai iaia i mea ole loa i kona manao-no ka mea, no ke aloha ole wale mai no ke kumu o ia hana ana pela.

“Aohe au i ike, e Daisy; e pono oe e au i ke ano o ka heluhelu ana i ka manao o hai, ina ua lilo ia i ninau ano nui kau noonoo ana-nou iho ua hala hu loa ia mawaho ae o kou noonoo ana Ma ke kaa ahi hea ana kaua? Ua makemake loa au e hele koke.”

Aole oia i manao nui i kana wahine, aole nohoi oia i aloha iaia. ua hele mai la kona helehelena a haikea a pela nohoi me kona mau lehelehe; eia nae aole iho la no i hoomaopopo mai kana kane i keia ano e ona. ua piha kona mau maka me na waimaka i aneane loa e hiolo iho, aole no nae oia i ike mai ia mea. Ua huli aku la ka wahine ma kahi e me ka manao walania iloko o kona naau, me kona ike ole i kekahi mea o ia ano. Ua hoomau mai la no oia i ke kamailio ana iaia, oiai aia kekahi manao ano nui iloko ona kahi i hoolauwili ai i kona noonoo.

Aole oia i aloha iaia. O kona noho pu ana me kana wahine ua lilo iho la ia i mea nona e uiha loa ai a hiki ole iaia ke hoomanawani ia mea; ua lilo kana wahine iaia me kekahi haawe kaumaha. No ke aha no la hoi oia i mare ai iaia, o na Lani wale no ka mea i ike i ke kumu-no Daisy iho he oki loa. Aole oia e koikoi wale aku ana iaia; e hookuu aku no iaia e hele i Enelani. I kinohi ua komo mai la kekahi manao iloko ona; alaila hoomanao hoi iho la nohoi oia iloko iho ona he hana ia nana e hoao aku ai i kona aloha iaia. Ina oia e hoole mai ana aole oia e ae ana iaia e noho, alaila, ua maopopo loa ua aloha no oia iaia. A ina hoi ua makemake no oia e hele oia wale no, alaila, he mea maopopo, aohe ona aloha iaia.

I ka wa a Daisy i waiho aku ai i kana hana hoao imua o kana kane, he wa ia o na manu e mele ana i ka lakou mau leo mele nahenahe loa, a e pa kolonahe mai ana kekahi koaniani makani maluna o na pua i kela ahiahi.

“Caro,” wahi ana i olelo aku ai, “he wahi manao kou e makemake nei e kamailio aku ia oe.

“Eia au ke hoolohe aku nei, e Daisy,” wahi a kana kane i pane mai ai.

“Aohe ou makemake e hoi koke me oe i Enelani i keia manawa, ua oi aku no kou makemake e noho ia nei no kekahi manawa pokole hou aku i koe.”

I kela wa ana e kamailio nei, aia kona puuwai ke pana la me ka ikaika, i kana hoomaopopo iho me he mea la e lohe mai ana no oia i ke kui; e kapalili ana kona poe pana a pau-me he mea la e hoolohe ana kona uhane no ka pane e paneia mai ai. Aohe i hoike mai kana kane i kekahi hiohiona o ka puiwa, a pela nohoi me kona ano pahaohao; aole nohoi oia i huli mai a nana ina paha he hana hoao keia a kana wahine iaia, aole paha.

“Alaila aohe ou makemake e hele i Enelani. Auwe nohoi oe, e Daisy, ua aloha anei oe i keia aina kahi o ka oliva ame na mea kanu hihi i ulu nui ai?”

“Aohe anei ou makemake e hele ina aole owau pu kekahi?” wahi a Daisy i ninau aku ai me ka leo haalulu.

“Aohe no ia he mea pilikia ina owau wale no ke hele ana. He hookahi wale no au mea e noonoo nei, e Daisy-oia hoi aia no ia i kou makemake.”

“Alaila aia no ia i kou makemake,” wahi a Daisy i olelo aku ai. “A, e Caro, oia anei kou manao?”

“Ae; o kou manao ia. ua like no a like iau na oe ua makemake e noho no ia nei a i ole ia, hele pu nohoi kaua.”

Ua olelo wale iho la no oia iaia iho ua oi aku ka maikai ina e hiki ana iaia ke ike i ka mea oiaio i kela wa koke no.

“Alaila, aohe oe e haohao ana iau ina au e nalowale ana mai ia oe mai, e Caro?” wahi a Daisy i olelo aku ai.

Kela mau maka e nana aku ana iaia me ka iini nui, kela leo nahenahe i kamailio aku ai iaia, ua pau loa ia mau mea iaia i ka lohe ia. Ua ano komo iho la iloko ona ka haohao ina e hai ia ana ka mea oiaio-oia hoi e hiki ana no ka ia Daisy ke noho ina aole oia pu kekahi me ia, no ka mea, he wahine o Daisy i pili paa kona aloha iaia, a ina oia e kaawale ana mai iaia mai no ka hapalua hora, elilo ana ia i mea na kona manao e inoino loa ai. Ua kahaha maoli no ko Sir Kilinetona mano; he mea hou maoli no ia ia Daisy. He mea mau no ia i kekahi poe lede, wahi ana i manao wale he ai no, a nolaila he mea makehewa ka haohao ana aku ia mea.

“E haohao ana anei au ina oe e nalowale ana mai au aku, e Daisy?” wahi a Sir Kilinetona i hoopuka hou mai ai ia poe huaolelo. “Nani no ia na kou manao ponoi no i koho mai nei, ua hiki ole iau ke olelo aku ia mea. E paa loa ana nohoi kou manawa i ka han i kou wa e hiki aku ai i Enelani. Ua hiki no ia oe ke noho ia nei a pau ke kauwela nei, ina e makemake ana oe pela, a i ka mahina hope o ke kau haule lau alaila au kii mai ia oe.”

“Ua pono no ia i kou manao,” wahi a Daisyi olelo aku ai me ka leo nawaliwali. “I ka nana aku ua olioli loa oia i kou noho ia nei; ua oluolu loa no kona manao i kou hele pu ole me ia; ua lilo ia i mea ole i kona noonoo.”

Ia wa oia i hoohui ae ai i kona helehelena i kahi e i ike ole mai kana kane i kona hiohiona kaumaha. Ua hoomau aku la nohoi o Sir Kilinetona i ke kamailio ana iaia e pili ana no kana huakai hele e hele aku ai,

“E pono oe e hoouna i oe makana ui i kou makuahine, e Daisy,” wahi a Sir Kilinetona i olelo mai ai; “manao au ua oi aku no kona makemake e ike mai i kou helehelena mamua o na mea e ae au e hoouna aku ai iaia.”

“Aloha ino kuu makuahine!” wahi a Daisy i olelo aku ai. “Ua aloha io no oia iau.”

“Ae, ua aloha maoli no oia ia oe,” wahi a kana kane i pane mai ai me kona hoomaopopo ole i ka io maoli o ka Daisy olelo i olelo aku ai. Ua makemake au ia oe e hele e nana i lole veleveta nani loa nona.”

“Aohe kupono o ia anno lole iaia,” wahi a Daisy i olelo aku ai; “he makana nani loa kela e haawi aku ai nana.”

“E pono kaua e hana ia hana,” wahi a Sir Kilinetona i olelo mai ai, “a nau poonoi no e lawe aku a haawi iaia.”

“Alaila, nau no e lawe aku a haawi iaia?” wahi a Daisy i ninau aku ai me ka hoike ana mai o kona helehelena i ka hoihoi.

“Ae, a nau ia e hai aku i ko makuahine ua aloha loa oe i keia aina nani o Farani a ua hiki ole ia oe ke haalele i keia wahi, no ka hele ana aku e ike iaia.”

A laila iho la pau ko Sir Kilinetona hoomaopopo ana aku e pili ana no ia mea.

Mahope mai o ia manawa aole i hoopuka hou aku o Daisy i hookahi huaolelo, Ua kokua aku la o Daisy i kana kane i ka puolo ana i kona poe lole, a me ka hooponopono ana ikana poe buke ame na nupepa.

“Aohe au e lawe ana i kena poe buke” wahi a Sir Kilinetona i olelo mai ai. “E hoi mai ana nohoi au iloko ae ne o ke kau haule lau; a ia wa nohoi au e lawe ai ia lakou apau.”

Aole o Daisy i ohumu ae a i ole ia hoahewa aku la hoi iaia; aka, i kela la keia la ua hoomaka mai la kona kino e emi a hiki i kona wiwi loa ana; ua oi loa mai la ke kaumaha o kona mau maka, a hao mai la na mino aka ana maluna o kona mau papalina. Ua hana mai no kana kane i ka hana maikai iaia; a ina no paha oia i hoomaopopo aole no ia he mea nona e ike ai nona ke kumu o ia ano e ana. Nona no ka makemake e noho-aole oia i ike he manao ko Daisy i hana ai e like me ia. Ua ike iho la oia mai ka hora a Sir Kilinetona i manao ai e huli hoi i Enelani, mai la wa mai kona hoomaka ana mai e ano hoihoi; ua lohe aku la oia iaia e himeni ana i kekahi poe mele hooipoipo-he hana hoi nana i hana ole mai ko laua la i mareia ai a hiki wale ia manawa; o ka mea maamau i ike ia nona ua like ia me kekahi kanaka e poi pu ia iho ana e na popilikia he nui i kona wa e hele ae ai. Aka, i keia wa hoi, eia oia ke olioli nei, ke himeni nei a ke akaaka nei, ke kamailio nei me ka piha hauole e pili ana no kekeahi poe hoaloha ana i manaolana ai e halawai pu aku ana oia me lakou, ua hoke maoli mai oia i kona ano eleu a ano maikai maoli nohoi mamua o na makahiki i kaa hope ae.

“Ua loaa maoli no iaia ka maha ina oia e kaawale aku ana mai iau aku,” wahi a Daisy i manao iho ai iloko ona; “ua lilo ia manao i mea hoolana mai ia loko ona. No ke aha no la oia i mare mai ai iaia?”

E olelo mau aku ana oia i kana wahine i kona manawa e haalele iho ai iaia, me kona hoomaopopo ole ua lilo ia olelo ana ana i na wa a pau me kekahi pahikaua e hou ana i ka puuwai o kana wahine opio. Alailai hiki mai la ka la i pau ai o kona poe ukana apau i ka hoomakaukau ia, a o ka hoomaka wale no koe e hele.

He helehelena hoihoi kona me na mino aka mahiehie maluna o kona mau papalina i kona wa i hele aku ai e aloha i kana wahine.

“Ua maopopo loa no anei ia oe, e Daisy, aole oe e mihi ana i kou hoololohe e noho,” wahi a kana kane i olelo mai ai. “Aole no i hala mahope o ka manawa, ina e makemake ana oe e hele; ua hiki no iau ke kali aku a ka la apopo.”

“Aohe ia he mea nou e mihi ai,” wahi a Daisy i pane aku ai, “Ua oi aku no paha kou hauoli ina o oe hookahi wale no ke hele.”

Aole no i hookuikui olelo hou aku o Sir Kilinetona i ka pane a kana wahine i pane aku ai, oiai ua makemake loa o Daisy e olelo mai oia, aohe me ia kona manao. Ua puliki mai la oia i kana wahine e paa iloko o kona poli, a honi iho la iaia. “Good-by, Daisy,” wahi a Sir Kilinetona i olelo mai ai; “eia au ke hele nei, e malama pono ia oe iho, hoolana i kou manao, hoolawa i kou mau makemake a pau au e makemake ai; a ina e ano mehameha loa ana oe, e hai koke ae oe iau la mea; alaila, o kou wa ia e kii koke mai ai ia oe.”

I kekahi minute mai mahope ua hala aku la oia. Ina paha oia i huli hou mai i hope, me nei ua ike mai oia ia Daisy kana wahine e waiho a make ana iluna o ka papahele, aka, aole oia i huli iki mai a nana iaia, ua hoomau aku la no oia i ka hele ana imua.

Nolaila, e na makamaka heluhelu ua ike like ae la no kakou aia o Sir Kilinetona ma kona alahele no Enelani. He mea hou ano nui ia o ka ike hou ana aku ia wahi, ka lohe ana aku i ka olelo makuahine o ia aina, ka ike ana aku i na kuahiwi i kamaaina a me he mea la ala oia i ka home ponoi kahi i luana ai. Nolaila he mau hora kakaikahi wale no ua hiki aku la oia i Ladana-i Ladana hoi kahi o ke aloha ana i haalele aku ai, a laila nohoi kahi o na manao kaumaha i loaa mai ai iaia. O kahi mua loa ana i kipa aku ai i kona hiki ana aku ilaila oia no kahi o ka ahahui ana; ilaila oia i manao ai o kona wahi ia e lohe ai i na nuhou a pau, a pela nohoi me na lono like ole e wawa ia ana ilaila, me ka ninau ole aku i kekahi poe ninau.

(Aole i pau.)

 

Ka Poka Nui

ame ka

Poka Iki

He Moolelo no kekahi mau Opio Elua iloko o ke Kaua Kuloko wawahi Mana Kauwakuapaa o Amerika Huipuia.

(Unuhiia e S.K. Nawaa.)

MOKUNA XII.

HONEE KAUA ULULAAU.

“E hoao no ka hopena, mai ku nana: Aole he mea huna nalo ke huliia.”

“E Wilimona, heaha la ke ano maoli o keia?” wahi a Kapena Buka iaia e holo ana me ka nui o ka hanu ma kou aoao.

“Me he mea la ua hoea mai nei na enemi mai kekahi wahi i manao ole ia me ko lakou heluna nui hewahewa,” wahi au me ke ano paupauaho i keia holo a makou.

“O keia no ke ano o ka lakou hana,” wahi a Kapena Buka me kona leo hoohalahala i maa mau ia makou.

“E hoomau e au keiki, e hoomau i ka holo ana!” wahi a Mekia Hadina me ka hauoli, iaia i hoohuli ae ai i kona lio mai kahi a kekahi koa i ku iho ai no ka pau o ke aho.

“Auwe no hoi oe e ka Mekia! Aole ka ou ike mai eia no hoi makou ke holo nei me ke koe wahi mauu ole iho malalo o ko makou kapuai wawae?” wahi a Denisa, a na keia mau olelo a Denisa i hooulu ae i ka aka mawaena o ko makou mau hoa.

Ia makou e nee aku nei aia ke pii mahuahua mai la ke kani ana o na pu raifela, a ke maopopo la ia makou iloko o na minute pokole e hiki aku ana makou i kahi o ka hana. O keia mau kani pu raifela, ka uina nakolokolo o na pukuniahi ame ka hihio o na apana hao e lele ana mai na poke pahu mai oia na hoailona o ke koikoi maoli o ke kaua a makou e lohe nei, nolaila me he mea la o keia paha ka hora kupilikii loa o ko makou pualikoa holookoa.

Aole i loihi loa mahope koke iho ua hoea makou ma kekahi kula oneanea, a iloko o ka wa pokole ua komo aku la ko makou regimana ioko o ke aluka o na pualikoa ame keia hana weliweli.

Aole keia he kahua okoa, aka o ke kahua no a makou i hoomoana ai i ka po mamua iho a i halawai ai me na enemi a hookuemi aku ia lakou i hope. Ma keia kahua e waiho ana na pukuniahi o kekahi o ko makou mau pualikoa pukuniahi me he mea la ua opeopeia ae a kapaeia ae ma kuono.

Ia makou i komo aku ai iloko o ke kahua kaua, ua ike iho la makou ua alaiia mai ko makou alahele e ka nui manu o makou e pioloke ana mai o a o a iloko hoi o ke kulana kupilikii maoli a e hakoko maoli ana no mawaena iho o lakou oia ko mua mai poe e hoao ana e kuemi mai no ka owelawela maoli o na hana a na poka nui ame na poka iki. I keia wa aia ka la ke hoi la i ka mole o Lehua, a ua hiki kupono ia kee ike aku i ka pilipu o na koa me he mau puaa la iloko o ka pa puaa, a o na koa hoi e auhee ana ua like lakou me na pu-a kao aole hoi o ke ano o na kanaka koa wiwoole ka nee aku imua. Ua kiola ae kekahi poe koa i ka lakou mau mea kaua a o ka manao nui iloko o na mea apau oia no ka ahai ana ae i ke ola. O keia kekahi hapa o ka Mahele Umikumamakahi i kauaia ma ko lakou aoao a no ia lele kauaia ana ma ko lakou aoao ua hoopuiwaia lakou a loaa ia lakou keia haawina kupilikii

Iau i nana aku ai maluna aku o ke poo o ko makou puali a ma kahi hoi e kau ana ke aoula o ke ano ahiahi ua ike aku la wau i na pualikoa o na Konofedereta e nee mai ana me ko lakou hiehie a e paa ana hoi i ke kahua kaua me ka ikaika maoli no, a e hekau ana na manaolana maluna iho o lakou e kaili ae i ka makou mau pukuniahi kaumaha ma ke ano he p@o no ke kahua kaua. Aka, ua lohi loa lakou, no ka mea, ua oili koke aku la ka Mahele Elima (kou mahele hoi) a ku ana imua o na enemi a lawe ae ia i ke kahua kaua i ku ai ka Mahele Umikumamakahi.

He hana paakiki maoli no ka makou i hana ai, oia hoi ka onou ana aku iwaena o na pualikoa e auhee mai ana a ua hoohana aku makou i ka makou mau mea kaua maluna o ko makou mau hoa o ka auna hookahi. He hana kupono ole io no na makou i hana ai o ka hookau ana i ko makou mau mea make maluna o ko makou mau hoa, aka, ua oi aku ka pono ame ka hanohano o ko makou hae aloha mamua o na pualikoa he mau tausani i auhee e haalele aku i ua hae la e hehi ku ia e na enemi, nolaila, ua hoolilo aku makou i ko makou mau hoa e auhee nei he mau enemi no makou a hana aku makou i ka hana makamaka ole no ka pono ame ka hanohano o ka hae a na kupuna i hana ai a i kaua ai a waiho aku na iwi me ko lakou mau ola i ka moe kau hooilo.

O ka aoao akau o ka makou mahele ka i hiki mua i kahi o ka hana, kahi hoi aku ai he alo a he alo me na enemi a paio aku me ka wiwoole. I ka hiki ana o ko makou pualikoa i kahi i kauohaia ai ma @ekah, kula akea, no ke kakoo ana i na pualikoa pukuniahi, ua paio aku makou a hiki i ka maluhiluhi ana e nee ana hoi imua i na manawa apau a e hoemi hope ana i na enemi. O ko makou koomo koke ana aku oia ka mea nana i hookuhau iho i ka nee ana mai o na enemi, a ua nee aku makou imua a hiki i ka wa i lilo hou mai ai na papu lepo a makou a me na pukuniahi kaumaha a na enemi i ake nui ai e lilo aku ia lakou.

Me he mea la aole paha he mea okoa ae nana e hoao i ka oiaio o ke kanaka koa e like me ka paio ana i ka po. He mea oiaio aole e hiki ke hooleia ka oiaio o ke kanaka koa oiaio iaia e paio ana i ke ao, aka, oia paio ana ua hiki i ke kanaka ke ike aku i kona enemi ame kona kiina kaua a hoomaopopo iho i ke ano o ka paio ana, Ilokoo ka pouli aole loa he manawa e ike aku ai ke kanaka i kona hoa paio a iloko o ka hilikau o ka hopu hewa e hakoko maopopo ole ai.

I ka wa i uhi mai ai ka malu po a e hakoko ana no na aoao a i elua me ka maopopo ole, ua uhi pu iho la ke ano makau maluna o na mea apau, oiai, aole he mea i hiki ke koho aku i kahi o na enemi e paa ana a e hoonee ana paha ma ko lakou heluna nui no ka paio ana mai ia makou. A oiai no hoi ua kamaaina makou i ke ano o ke alakai ana o na generala o ka aoao Hema, he hoopuhili ma ka hoouna ana i ka heluna nui o ko lakou pualikoa ma kekahi aoao a lele kaua mai ia makou oia kekahi hapa uuku e hoomau ana i ka paio mai i mea na makou e kuhihewa aku i ko lakou kulana oiaio maoli, aole i nele ke komo ana mai o na manao makau iloko o makou apau.

Oiai e hoomau ana ko makou mau pualikoa pukuniahi i ke ki poka ana i ka ululaau mamua aku o makou a e anapu ana hoi ka malamalama o ka lakou mau poka pahu, ua ike aku la au i ka paakiki mali no o ka hoao ana o na alakai o na pualikoa i auhee e houluulu ae i ko lakou mau koa. Mamuli o keia mea i ikeia ua hoounaia kekahi mau pualikoa kaulio a na lakou i paa mai i na koa auhee a hiki i ka puka ana mai o ka malamalama o kekahi ia ae.

Ia makou i hoi ae ai mahope o na pualikoa pukuniahi, akahi no a loaa mai iau he wahi noonoo no ko makou kahua e ku nei, me ka hoomaopopo ana i kahi o na poke paa e lele mai ana a e hihio ana hoi, me he mea la ua pau pono na huahele o ke panana holomoku i ka heluia e lakou. E lele ana mai ka akau a i ka hema, mai ka hikina a i ke komohana na poka nui ame na poke iki, a i kekahi manawa me he mea la ua like me kau hihio ana iho, eia iho ka bibi bulu hahai mahope koke iho o kou kua. Iloko o kela ame keia sekona e nakolokolo ana ka leo o na pukuniahi a na enemi, iloko o kela ame keia minute e haihai ana na lala laau a e opeapeaia ana i ka lewa e like me na apana pepa, a i ka houluulu ana ae i keia mau mea apau me he mea mea la o ka hopena ia o ke ao a o ka hanee ana hoi o na paia o ka halepakui o Babela. Aia pu iloko o keia mau mea na leo o na aliikoa e kauoha ana i ko lakou mau koa e paa iho i ke kahua a hiki i ka uhi ana iho o ka lepo maluna iho o ko lakou mau kino, a o na lea hailiili ame ke kuamuamu ana i na koa aole loa i hoohalaia i hookahi sekona, a me ia mau leo e pu-a pu mai ana na leo uwe o ka poe i hoehala e na poka a na enemi.

Iau e ku ana me ke kalele ana iho maluna o kau pahikua, e hoolohe ana i keia mau mea apau, ua hoopihoihoiia kou puuwai i ka uwe mai a kekahi o ko makou mau hoa malalo iho o kou mau kapuai wawae. Ua hoopuiwa pu ia au i ka lohe ana i ka leo o kekahi lio i eha a e paa ana i kekahi o na kaa pukuniahi e ku ana mamua iho o makou. Ma na ano apau he po io no keia no ka pihoihoi ame ke kaumaha no hoi. No ekolu hora ko makou ku ana iwaena o keia kahua kaua ame na poka e lele nei maluna o makou, a iloko o keia ame keia manawa aia kekahi poe o makou ke hoi uhane la i ka home aloha o na makua ame ka lakou mau ipo aloha a hoa luhi o na la inea.

Iloko o keia kulana aole loa he wahi poka a makou i hoolei aku ai maluna o na enemi. Mahope mai, ua a ia ae la ka ululaau e ke ahi, a o keia ka hoi ka mea nana i hooi ae i ka pihoihoi iloko o na koa apau.

“O, e Wilimona! lapuwale maoli no keia hana!” wahi a Kapena Buka me kela ano mau no ona. “Eia kakou ke ku wale nei no me ke kali ana e like me na holoholona i makaukau no ka unuunuia. Lapuwale maoli no keia poe Democarata hoopunipuni a kipi hookahuli aupuni!”

“E pono oe e hauoli e Kapena Buka, oiai ua loaa mai ia ka mea i hoohalahala mau ai, a aole hoi keia o ka wa e hoonaukiuki ai, he wa keia no ka hana ma kou aoao, a mai hoohalahala oe,” wahi au.

He mea oiaio ia, aka, ua oi aku keia mamua o ke kupono, a aole no hoi ou makemake i keia ano,” whai hou a Kapena buka.

“Huli akau, hele aku imua!” wahi a ko makou konela i kauoha mai ai.

Ua hoolohe aku makou i ke kauoha a nee iki aku la ma ka aoao akau; a mahope mai ua hoihoi hou ia aku makou ma kahi no a makou i ku ai. Ua haohao makou i keia ano hoonee kaua a ko makou konela, aka nae, ua hoopauia ae ia pahaohao o makou, oiai ia makou no a kaawale ae, oia no ka manawa i holo mai ai o kekahi pualikoa pukuniahi a ku iho ma ke kahua a makou i ku ai, ame ka lakou mau pu i piha i hoomaka aku ai lakou e kipoka

 

(Nana aoao 4 kolamu @.)