Ka Nupepa Kuokoa, Volume XL, Number 39, 26 September 1902 — Na mea hou o Maui a Kama. NUI KA IA LOAA-KAHE KA AILA ILUNA O KE KAI-HAPA NA MOKUPEA-KELA AME KEIA. [ARTICLE]

Na mea hou o Maui a Kama.

NUI KA IA LOAA - KAHE KA AILA ILUNA O KE KAI - HAPA NA MO- KUPEA-KELA AME KEIA.

MAUI, Sept. 20. - He nui ka puni o ka i'a i keia mau la apuni o Maui nei, ma ka Poakolu nei, Sepatemaba 17, ma Kahului ua oi mamua o hookahi haneri hinai i piha i ka i'a a kuai ia aku no $2 o ke eke, a ma Kihei hoi ua kuaiia aku no 25 keneta o ke eke. Ke ai nei o Maui i ka i'a a ku i kahi o ka hoomaunauna. KAHE KA AILA ILUNA O KE KAI. I ka wa a ke kuna lawe aila e ku ana ma Kahului ua hanaia he paipu e moe ana mai ka moku aku no ka aina no ka pauma ana aku i ka aila no na kula i hoomakaukauia. I ka wa e paumaia ana ka aila ua puka aku la ka aila ma kahi i paa ole o ke paipu a paa pu ae la ke kai i ka aila. Ua huliia aku kahi i poino a hoponopono ia. Mai ia wa mai ua nui ka hoohalahala o na kanaka no ka poino o ka oihana lawaia. HAPA NA MOKUPEA. Aole nui o na mokupea e hiki mai ana ianei ma keia mua aku. Eia ka waapa o na Hoahanau Young o Honolulu ianei kahi i hooponopono ai i ka poe no ka hoomakaukau ana no ke kau ku mokuahi, oiai ke manao wale ia nei e pau ana ke ku nui ana o na mokupea maanei a o na mokuahi aku ana na moku nui ma keia mua aku. PEPE PU KONA WAWAE. Ma ka Poaono Sepatemaba 13, oiai kekahi Kepani me kona mau hoa e hana ana ma ka halewiliko o Puunene, ua haule mai la kekahi mikini oloko o ua hale nei a pepe pu iho la ka wawae o ua Kepani nei. Ua okiia kahi i eha e Kauka Dinegar. KELA AME KEIA. Ma ka la 14 o keia mahina ua ulele iho na hui kinipopo Maile ame Aloha ma Lahaina a ua lilo aku ka eo i ka hui kinipopo Aloha ma o na ai-puni he 10 ia 3. O W. Searle o Wailuku ka nou popo o ke Aloha. Ua hoi mai nei ka poe haiolelo o ka aoao Repubalika i holo aku nei no ka mokupuni o Molokai i ka Poaha nei maluna o ka waapa huelopokia. Ke manao wale ia nei e holo hou aku ana no kekahi poe haiolelo no Molokai i keia mau la iho, ke hele aku ka Papa Hoopaainoa ma ka mokuahi Lehua. Mamuli o ke koi ikaika o na hoaloha o John Rikikini o Lahaina e holo balota oia i keia kau ke manao wale ia nei e ae ana oia e lilo i moho Senatoa. Ma ka po o ka la 13 o keia mahina ua malamaia ae he halawa nui no ka aoao Repubalika ma ka Makeke o Lahaina, a malaila i akoakoa ae ai he heluna nui o na kanaka no ka hoolohe ana i na haiolelo. O ka poe na lakou e haiolelo i keia halawai oia no o Keaweamahi, Philip Pali, Jas. H. K. Kaleo, N. W. Aluli, Samuel Keliinoi ame D. K. Kahaulelio. Malaila ae kahi i hoonanea ai kekahi hui himeni maikai loa.