Ka Nupepa Kuokoa, Volume XL, Number 35, 29 August 1902 — Page 4

Ka Nupepa KuokoaKE KILOHANA POOKELA NO KA LAHUI HAWAII.

 

Lei Daimana

Ma Kona A'i.

Na kela mau olelo a ka barona ua pii koke ae la ka Iasepa inaina i hui pu ia oi me ka hilahila, a pane aku la oia:

"Ua pono ae la, e Sa John.  Ua lohe ae la au i kau mau olelo i kamailio mai nei.  E hana aku oe a e kamailio hele aku oe no'u nei iloko me kau mea i manao ai he pono.  O ka'u wale no e olelo ae maanei i ka wa e loaa ai o Amber ia oe, mai poina i ka hoike mai ia'u i ka lohe."

"Heaha ke ano o kau olelo?" wahi a Ralapa i ninau mai ai.

"Eia ke ano, e Ralapa.  O maua wale no na mea elua i ike i kona wahi e noho nei.  E huli wale no olua a make he mau mahina aole loa ola e loaa ia olua, a ke loaa ua lilo oia he wahine na'u."

"Ua ike anei oe i kona wahi e noho nei?" i ninau aku ai ka barona me ka oluolu.  "O, e hai mai, e hai mai ano, a e loaa no auanei kau mea apau i makemake ai."

  "Aole loa au e hai aku ia oe e ia Ralapa hoi.  O ko'u manawa keia o ka lanakila.  Aia a lilo o Amber he Mrs. Iasepa Lonaie alaila, o ko olua wa ia e ike ai iaia, aole mamua o ia manawa."

  Ua wiliau iho la ka barona i kona wa i lohe ai i keia mau olelo uahoa a Iasepa-aka, ua hawanwana aku la o Ralapa ma ke ano hoomalielie i ka manao o ka makuakane ma ka olelo ana ua hiki loa ke hookoloia na wahi apau a Iasepa a hele ai, a ma ia ano e loaa ai o Amber ame kona wahi i hunaia ai.

  A iloko o keia wa a Iasepa e hauoli nei no kona lanakila maluna o ka barona ame ke keiki, o ka wa no ia a kahi kauwa o Lopikana i wehe mai ai i ka puka o ke keena hookipa a hooho mai ia me ka leo nui a moakaka i mea e lohe ai ka poe oloko o ke keena a hoopau hoi i ka lakou mau olelo hoopaapaa hakaka.

  "Ka Makuisa ame ka Makuisa Wahine o Adenakota ame ka Lede Vaiolina Kalani!".

  He mau sekona mahope iho o ka hoohoia ana o ko lakou mau inoa ua komo aku ia lakou iloko o ke keena.

  He mea e hoi ka hoohikilele nuiia ana o ko Iasepa ame ko Blanche manao i ka ike ana mai iloko o ke kino o Lede Vaiolina Kalani ia Amber Kotene!

  He mea e hoi ka hoohikilele nuia ana Ralapa manao i ka ike ana i kana Miss Vale iloko o ke kino o ka Lede Vaiolina Kalani!

  Ua maopopo mua loa ia Iasepa ke kulana, ka hanau ana ame ke kulana kiekie o ko Amber mau makua, a no keia ike i loaa iaia ua hoohiki paa oia e lilo o Amber i wahine nana ma na ano apau, a i keia wa hoi ana i ike mai ai iaia ame kona mau makua e ku aku ana imua ona, a ua hoohokaia hoi kona mau manaolana apau, ua noho io la oia ilalo me he mea la ua lolo kona kino holookoa mai luna a lalo.

  "O, e Blanche, e kuu Blanche aloha!" wahi a Amber i hooho leo nui ae ai iaia i holo awiwi aku ai a puili ae la i kona hoaloha hookamani.  "Ua hele mai nei au e hai aku ia oe i ka nuhou hauoli ua loaa ia'u ko'u mau makua ponoi a---"

  Ua hooki koke iho la oia i ke kamailio ana i kon aike ana aole he mau minoaka hauoli e hekau ana ma ko Blanche mau helehelena, a oki loa aku hoi aole he mau hookipa ohaoha ana ma kona aoao, a o kona nana ana i keia manawa aia ma kahi okoa loa o ke keena.

  Huli ae la o Amber a nana aku ia ma kahi a Blanche e nana pono nei a ia manawa oia i ike aku ai i ka makuakane, ia Sa John, e nana pono mai ana iaia.

  No kekahi minute ua ku iho la o amber me he mea ia ua makai paa ia oia ma ia wahi, niniu ae la kona noonoo a li-o ae la na maka no keia aka-ku ana i moeuhane mua ole ai e haule aku ana ka nanaina a kona maka maluna ona, alaila, me ka leo hauoli o ka maopopo ana o ka mea ana e ike nei, ua holo aku la oia me ka puana pu ana ae:

  "O, e kuu papa, kuu papa aloha!"

  A he minute mahope iho ua paa mai la oia iloko o na apo aloha ana a na lima a ka makuakane a hoopili aku la iaia ma kona umauma.

  I keia wa a ka barona e puili nei ia Amber me na waimaka o ka hauoli, aia hoi ka Makuisa ame ka Makuisa wahine ke pahola nei imua o Ralapa i na hoomaikai nui a palena ole no na hana aloha a ka makuakane i hana ai maluna o ka laua kaikamahine, a i kona lohe ana i ka Lede Vaiolina e kuhea ana i ka barona he makuakane nona, akahi no a maopopo pono iaia o Lede Vaiolina, o Amber ame Miss Vale he hookahi wale no mea kino i ona ia mau inoa.

  A nalu iho la oia iloko ino ona pehea no la hoi i hoomaopopo ole ai oia ia Amber i kona wa i hoolaunaia aku ai iaia ma ka inoa o Miss Vale.

  Me na helehelena ulumahiehie ua hoolohe aku la oia i na hoakaka ana a ka Makuisa e pili ana no Amber, a hoakaka pu aku la no hoi oia ma kona aoao i na mea apau e pili ana no kona makuakane, a i keia manawa apau aia kona maka ke uhai la ma na wahi apau a Amber e kuhi ai, a aole no hoi he hoohe leo hauoli i  nele i ka loheia e ia.

  I keia manawa no hoi aia ka hoopapau loa ana o ko Sa John noonoo a manao ana maluna e @ ae, a i mea nona e ike pono ai i kana Amber ua hooku aku la oia iaia no kahi mamao a kieki au ia me na nanaina o ka hauoli nui.

  "Aole no au e hoohewahewa ia oe i ka wa a ko'u nanaina i haule aku ai maluna ou," wahi ona i pane ae ai me ka akaaka.

  I keia wa ua manao iho la o Amber o ka wa pono keia e hoolauna aku ai ia Sa John i kona mau makua, nolaila, ua hana iho la oia pela, a ma ia manawa pu no hoi ua hookamaainaia mai la oia me ka moolelo oiaio o Amber ame na mea apau e pili ana iaia.

 

  I ka wa e hahaila i nei ka moolelo e pili ana no Amber o ka manawa no ia o Iasepa ame Blanche i puka aku ai mai ke keena aku.

  "He keu aku no hoi a ka mea kupaianaha o ko'u hoomaopopo ole i ka wa a Blanche i hoolauna mai ai ia'u ia oe ma ka inoa o Miss Vale?" wahi a Ralapa iaia i hele aku ai a lulu lima pu me Amber.

  He mau huaolelo maopopo ole ka Amber i pane mai ai me ka pii pu ana ae o ka ula ma kon apapalina ame ka akaaka pu ana no hoi.

  "O, e hoomaikaiia na lani! Ua hookoia ko'u makemake!  O amber no ka Ralapa i aloha ai.  O amber no ka ka Miss Vale ana i kamailio mai ai ia'u i ke ahiahi nei.  E na lani, mai ae i ka'u mau upu ana e hoohokaia!"

  Na ka barona keia mau kanaenae maluna ae.

  Na kou ahonui no e ka mea heluhelu e hoomaopopo iho i na hiohiona hauoli e hoopuni an ai ka ohana holookoa e akoakoa nei iloko o keia keena.

 

MOKUNA XLII.

 

"KE ALOHA A NA IPO"---KE NOI ANA A RALAPA I KA LIMA O AMBER, KA LEDE VAIOLINA KALANI---KA MARE ANA---KA HOPENA.

 

  I ka wa i pau ai o na hana ike ua hoike aku la ka barona i ka moolelo o kana huakai i Italia imua o ka Makuisa ame ka Makuisa Wahine o Adenekota, a iloko o keia manawa i hele aku ai o Ralapa a kamailio hawanawana iho la ia Amber me keia mau olelo:

  "E ae ana anei ka Lede Vaiolina e hoohala i kekahi mau minute pokole ma ka hoolohe ana i na olelo hoakaka ma ko'u aoao no ka'u mau hana maluna ou i ka wa i hala?  Ina ua holopono ia i kou noonoo ana alaila, e ae mai ia'u e alakai aku ia oe no ke keena malapua au no hoi i kamaaina ai."

  Ua ae koke aku la o Amber me ka pii koke ana ae o ka ula ma kona papalina, a ku ae ia laua a haalele iho la i ke keena hookipa me ka manao ua nalo ko laua puka ana mai ka ike ana a na makua.

  Ua alakai pololei aku la o Ralapa ia Amber no ke keena malapua kahi i kawowo ai iloko ona no ka wa mua loa ka manao hoomahie no Miss Vale, a ma ka noho no ana i hoonoho mua ai oiai o amber ma ka inoa kapakapa o Miss Vale, ua hoonoho hou iho la oia iaia malaila, a o kahi mea apiki aole iho la he maopopo ia Ralapa kana mea e hoomaka mua ae i kamailio ia Amber i akaka ai hoi ke kumu o kona koi ana e uahele mai laua iloko o ua keena nei.

  Ua hoomalamalamaia ke keena me na kukui e kakau ana ma na wahi apau o ke keena a ma na kumulaau laalaau hoi, a o ka ea ma na wahi apau ua kupaoa a ka launa ole mai me ke ala o na pua mohala o na ano like ole.

  A he mea oiaio, he wahi io keia i kupono loa no na hana hookaunu e hoapaapaia ai hoi ke kino o na "Ipo a Elua."

  Aka nae, o keia alakai ana mai a Ralapa ia Amber iloko o keia keena aole ia no kamanao ana e kukuli aku ana oia imua o Amber a e waiho hamama aku i kona puuwai me na huaolelo o ke aloha ma kona lehelehe.  Ina no ua maopopo pono ia Ralapa ua huikaia mua loa no o Amber, i kana mau hana pono ole i hana ae maluna ona, aole no he hiki iaia ke manaolana iho eia no ke mau nei ke aloha iloko o Amber nona.  O kekahi no hoi, ua maopopo no ia Ralapa aole loa i kupono i ke keiki a ka barona ke lilo i kane na ke kaikamahine a ka Makuisa, oiai, ina e huiia ae ka ui, ke kulana kiekie, ame ka waiwai he mau kumu keia nana e kono aku i na makua e koho i kane na ka laua kaikamahine mai waena ae o ka poe kulana kiekie loa, a mahea iho la oia e komo aku ai ka mea hoi nona kahi kulana aole no i ke kiekie loa.

  Iloko o kana kukai kamailio ana me ka makuakane i ke ahiahi mamua iho ua nui kona inaina ame ka hilahila pu iaia iho no kana mau hana i hana ai maluna o Amber.  O kana hoehaeha ana i ka puuwai akahai o Amber ua hoehaeha nui loa mai no ia i kon puuwai ponoi iho.  Ua hoahewa loa oia iaia iho no kona puni wale ana i na olelo oiaio ole a Blanche, nolaila, ua lawe ae la oia i keia manawa i wa kupono loa nona e nonoi aku ai i na huikala piha ana ma ko Amber aoao.

  "I alakai mai nei au ia oe, e Amber, iloko o keia keena, e hoike aku ia oe i ko'u kaumaha nui no ka'u hana i kokua ai i ko kipakuia ana mai ko Kotene Holo aku.  O na olelo a Blanche i kamailio mai ai he mau olelo hoopunipuni wale no ia apau."

"He mau olelo hoopunipuni?" wahi a Amber.

  "Ae, he hoopunipuni ma na ano apau.  I keia ahiahi aku nei no ka maopopo ana ia'u, a i maopopo pu ai no hoi kana mau hana ohumu kipi.  Ua imi no au ia oe ma ke ano o ke aloha kaikunane i ke kaikuahine a nele kou loaa ana ia'u.  O ka'u mau olelo kakana i hoopuka ai imua ou ua ulu mai  no ia a ua hoopukaia mamuli o na olelo epa ekaeka haalele i hoopihapihaia mai ia'u e Blanche, a e hai aku au aole loa i poina ia'u ke aloha ohana i ulu ae mawaena o ke kaikunane ame ke kaikuahine.  A ia'u i noonoo iho ai no na popilikia i kau iho maluna ou mamuli o keia mau hana lapuwale a Blanche i kokuaia hoi e a'u me ka maopopo loo, a pela hoi i hoemuia aku ai oe mai kou home ponoi aku, ua hopohopo nui ko'u manao no ka loaa o na huikala ana ma kou aoao  no'u nei a no ua mau hana la a'u."

  "O, e loaa no ia mea mai ia'u aku," wahi a Amber.  "Aole loa he manawa i komo ai na manao hoahewa iloko  o'u nou, a ke huikala aku nei au ia oe me ka oiaio me na huaolelo i puai ae mai loko lilo ae o ko'u puuwai.  Hemea ano e ia'u ka noonoo ana iho no Blanche, ka mea hoi a ko'u manao i lawe ai he hoaloha maikai, e kulou iho ana oia a pehi mai i na hana pono ole maluna o'u."

  "Ke hoomaopopo nei au ma kau mau olelo mua ua loaa ia'u na huikala ana no ka'u mau hana kokua hewa i hana ai me ka maopopo mua ole, e hoike mai nae, e Amber e mau aku ana no anei ko kaua kulana hoaloha kekahi no kekahi?"  a i keia manawa no hoi i haawi aku ai o Ralapa no ka luluia mai.

  Ua kunou aku la o Amber me ka waiho ana aku i kona lima iloko o ko Ralapa puili malie ana.

  Me he mea ia pahe hoi aole he wa e ae i oi ae ko Amber aloha no kana Ralapa i like me keia wa, no ka mea, ua mao ae la na nanaina hakumakuma mai ko Ralapa helehelena ae a o mai la he nanaina mahie luna a ua lia oloko ana hoi i hiki ole ai ke mawahewehe pono ae i kona kaona maoli, a ina i hiki iaia ke hana pela ina la ua hoala hou ia ae na manaolana i lolii iloko o kona puuwai no na makahiki i hala ae.                                   (Aole i pau.)

 

Maleiano ke Aloha

 

HE MOOLELO NO KE

KAIKAMAHINE ALII IETIWA

 

Ka Ui nohea i ahai ae i ka puuwai.

 

MOKUNA I.

 

KA HUAKAI MAKAIKAI A GERENEFOLO LORE.

 

  Aia o Gerenefolo Lore (Greenfall Lorry), he kanaka opio ma kekahi kulanakauhale o Deneva e hanu ana i na ea no ka hoolanalana no ke ano pahemo wale o kona noonoo.  Ua makaikaiia e ia aneane e puni ke ao, aole no i nele loa kona waihona, eia nae, ua lilo kana mau hana i hana ai ame na manao ana i hoohana ai ma ka huakai ana i kaahele ai he 2,500 mile aina i mea hookuha'u mai iaia.  O na kii o na aina o na wahi ana i makaikai ai, o ka nani o ko lakou mau hiohiona e ake aku ai hoi ke kamahele, ua nalohia aku ia mau iini mai ko Lore noonoo aku.  I kela ame keia manawa e maalo ae ai kamaili kuai nupepa o ke kulanakauhale, a onou aku i na mea hou ame na anoai o ka manawa iaia, ua nana ole ia mai ia mau mea ano nui, a ke noonoo ae e hauoli pu me na hoaloha kaahele ona, e loaa mai ana iaia ka manao e aho no e noho hookahi iho oia nona iho.  Nolaila i kela ame keia keehina ana e ka'i aku ai, e hehi aku ana oia maluna o ke one o na ano hoonaluea manao, a ua lilo maoli no na ano molohai ame ke ano hoihoi ole, me he mea la ua hooluhiia oia iloko o ka hana nui.

  Aole no i mau loa keia mau ano haawina maluna ona, oiai, iaia i kau aku ai maluna o ke kaa-ahi, ua loaa koke mai la oia i kekahi haawina, nana i hoohikilele ae i kona noonoo iloko o ka manawa pokole loa.  Ua loaa iaia ka manao e ee aku ma ke kaa-ahi a holo aku no kahi ana i manao ai, a i kona hooko io ana aku, ku ana oia ma ka puka o ke kaa-ahi ohua, a iaia i hele aku ai no kona noho ana i manao ai e noho, ua halawai aku la kona mau maka me ko kekahi kaikamahine e hilinai ana i ke kikina puka aniani o ke kaa; halawai like ae la ko laua mau maka e nana ana kekahi i kekahi a haule iho la ka nana ana o ko ke kaikamahine i lalo, hakui ikaika aku ia ka iini iloko o ka puuwai o ke kanaka opio Gerenefolo.  Ua loaa like keia mau haawina ia laua a elua mamuli o ko Lore (Lorry) hele ana aku i kahi ana i manao ai e noho, a ma ke aia a ke kanaka opio e hele aku ai e hiki ai i ua wahi ia he mea pono i ke kaikamahine e ku-ae iluna i hiki o Lore ke hele aku, nolaila ua ku ae la ua wahine opio la pela i loaa ai na haawina i hoakaka mua ia ae nei.

  M ko Lore aoao, ua kaaheleia e ia, a hala he mau mahina iaia i Mekiko a i Kaleponi, ua makaikaiia no hoi e ia o Cambridge a mai ilaila aku mahope o ka haalele ana iho, hoea aku la oia i Nowe (Norway), noho lawaia iki malaila, alaila, holo loa aku i Inia me ka hookaulua iki ana iho ilaila, he uhai holoholona ka hana, pela ka mau ana ma ia ano a hiki wale i Sekokia ma kona mau oawa ame na kualapa o ke kuahiwi.  Ua heleia e ia na kulanakauhale ame na kuaaina o Aferika Hema a komo loa aku i Rusia a i ka oawa o Rone (rhone) ame Biritine (Brittany) a i Damaseko.  Ua ike oia ia mau wahi apau---ame ka moeuhane mua ole ona e loaa ana iaia kekahi mea hoohikilele i kona noonoo ma keia ala ana e huli hoi nei no ka home, oiai, ma na wahi apau ana i hele ai he mau haawina hooluhi manao wale no ka i loaa iaia.  O na manao malohai i loaa mau iaia ke noonoo ae oia, aole e pii hou mai lakou aka uhi paa ia ae la, a hookahi mea kau nui ia, oia na hiohiona o ke kaikamahine e hilinai ana i ka puka aniani o ke kaa-ahi.

  Ma keia huakai makaikai ana, ua noonoo oia e hoopau i keia hele wale ana, a e hoi aku e hana e like me na kanaka e ae apau mamua o ka hele wale ana no e like iho la me ia.  O Mr. Gerenefolo Lore (Greenfall Lorry), he kanaka opio oia malalo o 30 makahiki, he kanaka opio ui o ka helehelena i kaukai ole aku i kona noho mahope o kekahi poe, a e hiki ai no iaia ke hoomau ma ka kaahele ana.

  I kekahi manawa, ua ulu mai no na manao no ka loaa ole o na manaolana a pane iho no oia iaia iho, e i ana he nui no na mea e hauoli ai, aka ua hela ka manawa kupono no lakou.  A ina no e hoolala au ma ko'u ala honua me ka nui no nae o ka' loaa e piha ai ka miliona dala, alaila e lawelawe no wau i ka oihana pa'i nupepa, aole e nele ka loaa o na mea hou pioo a hoopuiwa i ka noonoo a malaila paha e loaa ai ia'u na mea e ala ai ka noonoo.  Aka aole pela ko'u kulana, nolaila o ka'u hana kupono iho la no ia o ke kaahele apuni ka honua.

  Ua holo pono keia manao kaahele ona i kona noonoo e ike aku no i na wahi i koe iaia, kahi hoi i hele ole ia e ia.  Ua ulu mai keia mau noonoo like ole iaia ma na manawa ana i hele makaikai ai, a iaia ma kona ala huli hoi i ka home, ana e noho ana ma ka noho o ke kaa-ahi, e waiho mai ana na opeope ona me ka pahu nui ona i makaia me na inoa like ole o na wahi i kaaheleia ame na inoa o na hotele ana i hoomaha ai, ma kekahi aoao o  ke kaa-ahi ua hali'a hou mai no ia mau mea, aole nae e like ka ikaika me ko na wa mua, a aole no i liuliu ua nalowale aku la ua mau haawina la mamuli o ka uhi paa ia ana e keia mau hoohikilele noonoo.  O na hiohiona o ka wahin eopio i halawai ai na maka me ko ianei ua lilo loa ia i pulakaumaka na ko ia nei noonoo e hakukoi ai, me he la aia he mau kanaka iloko ona e papa olelo ana.  E i aku ana kekahi i kekahi---he keu ka hoi ka ikaika ume o keia mea he wahine ui ke lilo ka manao malaila; a me he mea la e hooia aku ana ke kokoolua, oiai, ke nana aku i ua kanaka opio la ua kaukahi kona manao maluna o ka mea hookahi oiai mamua aku ua like wale no na wahine apau iaia.

  Heaha la ke kumu o ka lilo ana o kekahi poe kaikamahine i mau mea huki manao a hoolilo i ke kanaka me he la he mea hoomana aku ia lakou?  I kekahi mau manawa ua kuko mau no ua kanaka opio nei e pili ana i ka male ana i ka wahine a ua lilo ia mea nana i aloha nui ai, eia nae, ke noonoo ae i na kaikamahine ua like wale no lakou apau iaia.  Aia i keia manawa ua haalele mai ia ano manao iaia a o ka wae ana i ka papa, kahi ana e kau aku ai i ka wahine opio e hilinai ana i ka pukaaniani oia no ka papa ekahi.  Iloko o kona puuwai ua piha i na manao uluku o ke aloha, e pikokai ae ana iloko o kona noonoo a he kuku okoa mai no na lihilihi maka o ua kaimamahine ia, me na papalina i puaiia me ka ula nohea a ua ahai maoli ae no ka ui o ka wahin eopio i ka puuwai o Lore iloko o kela manawa i halawai mua ai na ike o na maka o laua.  I ka manao o Gerenefolo e haawi aku oia iaia iho ma ke kukuli ana imua ona no ka lawe ae i ka lima akau i lilo ai oia nana, aka, ua komo koke iho la no kekahi noonoo iaia o ka mea e loaa ai iaia ka lanakila oia no ka hilinai a aloha mai o ka mea ana e kau nui aku nei.

  O ka lua o ka manawa a Mr. Gerenefolo i ike ai i ua nohea la oia no ka manawa e noho ana ma ka papaaina i ke awakea.  E noho pu ana me ia he mau mea aoo, a me he mea la, he mau makua laua nona.  I ka hapanui o ka manawa ana i lohe ai, e kamailio mau ana lakou ma ka olelo Farani e okomo aku ana he mau mamala-olelo Geremania i kekahi manawa.  O ke kane he kanaka aoo oia o ke kulana keonimana o ke ano maka oolea nae.  He kanaka oia o ke ano nui i papaleia hoi me ke ohohina, na ka umiumi puheuheu e hoike ana he kanaka ui i kona mau la opio.  O kona mau kue maka, ka auwae ame kona mau papalina, ke nana aku kekahi he helehelena maikai kona.  A o ka wahine hoi he wahine oia o ke kulana, hiehie o ke ano lede, a e aahu ana lakou apau mai ke kaikamahine ame na mea aoo i na aahu o ka wa kaahele, o ke ano okoa loa, aole o ko Amerika ano aahu kaahele.

  Ma ko Lore aoao ua lilo keia poe ekolu apau he mea nui iaia.  Elua manawa a ka wahine opio i noho ai ma ka papaaina, elua no manawa ana i nana mai ai ia Gerenefolo, a kuu wale iho la no na maka ona ilalo me he la aole oia i ike a hoomaopopo mai i ke kanaka opio.  A ia lakou i haalele ai i ka papaaina a hele aku la no kahi hoonanea, oia nohoi ko ianei manawa e alawa aku ai me ke ano pihoihoi.  Aka panai mai la ka wahine opio iaia nei me na mino aka, a ua lilo iho la ia mea no ianei e hilahila loa ai oiai ua loaa iho la ka manao iaia nei ke kiloi amai la ka ia nei nana ana.  E alawa mau ana no hoi keia ma ka puka aniani aku me he moeuhane la ia iaia a poina oia no kona paina awakea aole i ai.

  Haalele iho la oia i kona wahi noho a hoi aku ia i kona keena alaila hookani ikaika aku ia oia i ka bele no ke kanaka malama ukana, a e paa ana oia he mau apana dala ma kona lima, a pane aku la i ua kanaka malama ukana nei i kona hoea ana mai, ina paha e hiki iaia ke hai mai i ka poe e noho la ma ke keena mamua iho ona.  A pane mai la ua kanaka la:  "Aole au i ike ia lakou, pela me ko lakou mau inoa.  Eia nae ka mea maopopo loa ia'u e holo ana lakou no Nu Ioka me ka iini nui e hiki koke lakou ilaila.  Aohe wau i manao e ninau no lakou, oiai, aia he ano like ole o ko lakou ano a'u i manao ai aohe pono ia'u ka ninau ana.  Aole au i manao he mea waiwai kou e hooheno i kela wahine opiopio.  Aole oia ka ipo e hoomahui ai oe, i ko'u manao ana.  He nui na kaikamahine a'u i ike ai  ko'u mau---"

  "Heaha ke ano o kau mea e kamailio mai nei?"  kahamaha aku ai o Lore.  "Aole au e uhai ana mahope o kela kaikamahine.  He makemake wale no wau e ike i kon ainoa--ma ke ano he mea hou."

  Ua pii loa ae la ka ula o ko Lore papalina mamuli o ko ke kanaka hookui ana aku.

  "E kala mai i'au, e ke keonimana," wahi a ke kanaka malama ukana.  "Ua manao wau la, ua like oe me ka hapanui o na kanaka opio i ka hooha'i i na wahine opio i ka poe ui e like me kela.  E kala mai oe ia'u mamuli o ko'u mahaoi i ke kamailio ana aku ia oe ia mea.  Aole no he maopopo ia'u o kau mea e iini nei.  O kela wahine opio a kaua e kamailio nei he mea oia no ka aina mamao loa, aole no Amerika nei.  E hoi awiwei ana lakou no ko lakou wahi, aole lakou e noho ana i Nu Ioka, a o ka mea wale no o lakou e ulolohi ai oia ka lele ana aku mai kahi kaa aku a i kahi kaa aku."

  "A ihea lakou e lele mua ai?" i ninau aku ai o gerenefolo.  "E lele ana lakou i Sana Lui, ma ka holo ana kau i Cinacinati ame Wasinetona," i panaiia aku ai no ka haina.

  Noonoo iho la o Lore ina paha e hiki laia ke kuapo i kona kikiki no ka holo ana no Sana Lui, oiai, o kona kikiki e lawe ana ia iaia i Kikako.

  Ninau hou aku la o Lore, "Pehea, e holo ana paha oia me na makua pu kekahi?  Aole laua he mau makua ponoi no ka wahine opio, aka he mau makua hanauna laua," i kahamaha aku ai kona hoa kukai olelo.

  O ka inoa o ke kane o Casapa.  Aohe maopopo ia'u ka olelo a na makua, me he la he olelo o na aina e, aka o ke kaikamahine he makaukau loa oia i ka olelo ahole.  Ua hele lakou i ka makaikai a hiki i Mekiko.  He wahine kala nui kela wahine opio a i kela ame kela manawa he wahi aka iki kana e haawi mai a ia'u ke noi mai oia ia'u e hana nona.  No'u iho ea, aole o'u nana i na mea e ae, aka o ka loaa wale mai no o kela mino aka ia'u, aka he poe lawelawe kahi o makou e hele pu nei."

  "He kauwa lawelawe anei ko lakou ma ka lakou alahele makaikai?" i ui aku ai ke kanaka opio i kon akokoolua.  "Ae, he mau kauwa hana ka lakou, he kane a he wahine.  Aia laua ma o aku o ko lakou keena a he mau mea ike ole i ka olelo haole."

  "Aole oe i ike i ka inoa o ka wahine opio?" wahi a Lore.

  "Aohe au i ike, a aohe no he hiki ia'u ke huli aku."

  "A aia ihea o Europa kahi i noho ai keia poe?"

  "Manao wau aia i Auseturia (Australia.")

  "Oia hoi o Osturia (Austria), pela anei?"

  "O, e kala mai oe ia'u, aole nohoi au i ike i ko lakou wahi.  He koho wale aku nei no keia a'u."

  "A aia anei ia oe kekahi o lakou, a aole nohoi he kala Amerika, aka he kala okoa loa, o 75 keneta kona waiwai io, pela i haiia mai ai ia'u.  A ua olelo mai oia ia'u e malama wau i keia kala a hiki i ko'u manawa e hele ai ilaila, alaila e loaa no ia'u kona waiwai io.  a haawi mai ia oia ia'u me ka panai pu mai he wahi mino aka.

                                                (Aole i pau.)

 

HELE MALIHINI ANA O KEKAHI KEIKI

OPIO AUWANA I KEIA AO

A HIKI I KELA AO.

 

  "Oiaio no," wahi a Holowale, "aia a kokoke aku nei maua imua e moe mai ana na liona elua ma ke alanui e hiaa ana paha, e hiamoe ana paha, aole maua i ike; a manao no hoi maua, e pau paha auanei maua i ka haehaeia, ke kokoke maua ma ia wahi."

  I aku la o Kristiano:  "Ke hoomakaukau mai nei olua i kokua au no olua, auhea la ka'u mea e hoopakele ai i pakele olua mai ka waha mai o ka liona?  Nolaila, eia ka'u ia olua, ina olua e koho ana ia Iesu Kristo oia ko olua kokua nana e hoopakele i na poino apau o ko keia ao.  O ka hoi hope, he make io na ia; o ka hele imua, malaila ka makau o make, aka, he ola mau loa ma o aku."

  Alaila holo kiki aku la o Makauwale laua o Holowale ilalo o ka puu, a hele aku la o Kristiano i kona aoao.  I kona noonoo ana i ka mea ana i lohe ai, haha iho la ia iloko o kona poli i kana owili e heluhelu hou ai a oluolu ka manao, aole i loaa i kona poli.  Alaila, he nui ka pilikia o Kristiano, aole ia i ike i kana mea e hana'i, no ka mea, ua hemahema oia i ka mea e oluolu ai ka naau maanei, ame na mea hookomo ia iloko o ke kulanakauhale lani.

  Nolaila, ua nui loa ka lauwili o kona manao, no ka ike ole i ka mea pono e hana ai.  Mahope iho, hoomanao kela i kona hiamoe ana iloko o ka auolo, ma ka aoao o ka puu.  Kukuli koke iho la kela, a noi aku la i ke Akua, e kala mai i kela hana lapuwale, alaila hoi hou aku la ia e imi ana i kana owili.  Aka, owai la ke ike i ka ehaeha apau o ko Kristiano naau ma ke ala a apu ana i hoi aku ai?  I kona hiki ana ma ka auolo, aole kana owili ma ia wahi, nui i ho la ka hanu, ka uwe, e hoohewa ana iaia iho no kona hiamoe ana ma kela wahi, i hoomakaukau wale ia no ka hooluolu i na mea hele.  Nana pono iho ia ia ma keia kapa a ma kela kapa o ke ala, amalia paha e loaa hou ka owili i oluolu pinepine ai oia i  ka nana iho.  A hiki aku ia ia i ka auolo, kahi ana i noho ai a hiamore, ua nui loa ae la kona ehaeha, i kon ahiamore hewa ana.  Olelo iho la, Auwe! he kanaka poino wau! i hiamore wale ai au i ke ao a iwaena hoi o kahi paupauaho.  He nui kuu luhi makehewa!  Pela hoi ka Isaraela ma ka waonehele, ua hoihoi ia aku lakou a ke Kaiula.  Owau hoi ke hehi nui nei i keia ala no ka pilikia o ka maau, kahi pono au e hehi iho ai, me ka olioli, ke ole kela hiamoe hewa.  Ke hehi pakolu nei au i ke ala hookahi, he pono no ke hehi hookahi ia; oiaio, ua kokoke poeleele au no kuu hiamoe ana.

  Noho iho la oia iloko o ka auolo, a uwe iho la i kekahi manawa.  Nana iho la ia ma kona uwe ana, ike aku la ia malalo o ka noho kana owili, hopu koke ae la ia me ka wikiwiki ame ka haalulu, a hahao ia mea iloko o kona poli.  Nani ka olioli o ua kanaka nei, no ka loaa ana mai o kana owili.  Oia no ka hooiaio ana o kona ola, ame ka hookomo iloko o kahi maha.  Na ke Akua no i hoike ia mea i kona maka, lalau aku, a hele hou me ka olioli.  Mama ia wale no kon apii ana i ke koena o ka puu!  Aka, aole ia i hiki iluna o napoo e ka la, a oia kekahi mea i paipai ai kona manao i ka hewa o kona hiamoe ana.  A penei oia i hoohewa iho ai.  Auwe! he hiamoe hewa!  Ka mea ia hele nui ai iloko o ka po, aohe la, e uhi mai ana ka pouli maluna o ke ala o kuu wawae, a lohe auanei au i ka uwo ana o na holoholona hae, no kuu hiamoe hewa!  Alaila hoomanao iho la oia i ka olelo ana a Makauwale laua o Holowale, no na liona.  I iho la o Kristiano, e hulihuli ana ia mau holoholona iloko o ka po i ka lakou mea e ai ai.  Ina halwai laua me a'u iloko o keia pouli, pehea la au e pono ai?  Pehea la au e pakele ai i ka haehaeia a weluwelu?  Alaila hele aku la ia.  Aka, i kon akaniuhu ana i keia pilikia, alawa ae la kela i kon amau maka iluna, aia hoi, ku mai la he halealii imua ona, o Nani ka inoa o ia hale, e kokoke ana ma ke alanui.

  (Hoikeana 3:2.  E makaala a e hooikaika i na mea i koe, na mea aneane make; no ka mea, aole i loaa ia'u kau mau hana he pono io imua o ke Akua.

  Tesalonike 5:7.  No ka mea, o ka poe hiamoe, ua hiamoe lakou i ka po; a o k@ poe ona, ua ona lakou i ka po (8).  Aka, o kakou ka poe o ke ao, kuoo kakou, e komo ana i ka pale umauma o ka manaoio ame ke aloha; a i ka papale koa hoi o ka manaolana i ke ola.)

  Alaila, wikiwiki aku la kela i ka hele ana aku, i moe paha ia malaila i ka po.  Aole ia i hele loihi aku, a komo no ia iloko o kekahi aia ololi, hookahi paha Setadia ka mamao o ka halekiai o ke Kiaipuka, a i ka nana pono ana imua ona, ike aku la kela i na liona ma ke alanui.  I iho la ia, ke ike nei au i na mea i hoi hou aku ai, o Makauwale laua o Holowale.  E paa ana na liona i na kaulahao, aole nae ia i ike i na kaulahao, aole nae ia i ike i na kaulahao.  Alaila, makau iho la oia i na liona, a manao iho iloko ona e hoi hou aku mahope o laua, no ka mea, kuhi kela he make wale no ia imua ona.  Aka, ike mai la ke Hiaipuka ma kahi kiai, o Maala kona inoa, ike mai la kela, ua ku malie o Kristiano, me he mea a hoi hope ana ia, kahea mai la kela iaia, pela no anei kou manaoio uuku?

(Mareko 4:40.  I mai la oia ia lakou. No keaha la oukou i makau ai?  Pehea ko oukou manaoio ole ana?)

  Mai makau oe i na ilona, ua paa no laua i na kaulahao, a ua hoonohoia malaila i mea hoao i ka manaoio o ka poe mea manaoio, a i mea hoike mai hoi i ka poe manaoio ole.  E hele mawaena kona o ke ala, aole e eha iki oe ia laua.

  Alaila, hele haalulu aku la oia no ka makau i na liona, aka, malama pono no ia i ke kuhikuhi ana a ke kiai puka, lohe kela i ko laua uwo ana, aole nae ia i eha iki ia laua.  Alaila, pai ae la kela i kona mau lima, hele aku la a hiki i na halekiai a ku aku la imua o ke Kiaipuka.  Ninau aku la o Kristiano i ke Kiaipuka, E kuu Haku, he hale aha keia?  E hiki paha ia'u ke moe maanei i keia po?  I mai la ke Kiaipuka, ua hana ia keia hale e ka Haku nona ka puu, hana no oia i mea e hookipa ai, a e hoomalu ai i na malihini. 

  Ninau mai la hoi ke Kiaipuka iaia i kona wahi i hele ami ai, ame kona wahi e hele aku ai.

  I aku la o Kristiano, mai ke kulanakauhale mai nei au o Make, a e hele ana au i ka Mauna o Ziona.  Ua napoo aku nei ka la, a ke noi aku nei au, e hookipaia mai maanei e moe i keia po.    (Aole i pau.)

 

HOOLAHA KUMAU

 

EWA A TOWNSEND

 

No na kana hoolewa ame Palea o ka Ahahui Hoolewa o Honolulu.

Keena Hana 393 Kihi Alanui Beritania ame Miller.

 

Telepone Blue 571.

 

Ka Hui Banako Ho hu

Mala D la o Haw ii

(KAUPALENAIA.)

 

Huina i hoahuia                                   $250.00 @

Peresidena                                           Kikila Ba@ lunu

Hope Peresidena                                 W. P. Robikana

Puuku                                                  W. G. Cooper

 

Keena Hana Nui:

Alanui Papu, kokoke i Alanui Kalepa.

Keena Lala ma Hilo, Hawaii.

E lawelawe ana i ka

Oihana Banako Hoahu Dala

 

ma Honolulu a me Hilo

 

  E laweia mai no na huina hoahu me ka haawiia o na ukupanee no na hoaku makahiki ma ka huina o 4 1/2 pakeneta no ka makahiki.  E loaa no na Rula a me na hooponopono ana ke ninau ae ma ke Keena Hoahu.                            2828-1yr.

 

Dr. T. Mitamura

  Keena Oihana 1468 Alanui Nuuanu.  Telepone 152.  Pahu Leta 842.  Wahi noho, kokoke i ke Keena Oihana, Alanui Nuuanu.

Na hora keena:  1-4 p.m.  6-7:30 p.m.  Aohe kakahiaka, koe ka Lapule.

KAUKA J. UCHIDA

HE LOEA MA KA OIHANA LAPAAU Keena:  Alanui Beretania, mawaena o Papu ame Nuuanu.

  Manawa hana, 8 a 12 A. M. 7 a 8 P. M.

  Telepona Helu 1211 White

 

LEWERS & COOKE

LUI A ME KUKE, Kaupalenaia

 

Na Mea Hookomo mai a Kuai aku i na

LAKO HANA HALE

O kela ame Kena Ano.

Malaila a loaa ai na mea malalo iho:

 

            NA PAPA  N. W., NA PAPA HOLE. PILI HALE, NA PUKA, NA OLEPELEPE AME NA PONO PUKA ANIANI, NA KUI, AME NA MEA PILI I KA OIHANA KAMANA, NA PONO PENA.

            NA PENA LIKE OLE AME NA HULU PENA, NA ANIANI, NA PEPA HALE, PALE PUKA ANIANI, MOENA, ETC.

O na kauoha pono hale apau loa e hiki mai ana ia makou e hooko koke ia no me ka eleu ame na KUMUKUAI HAAHAA LOA.

 

LEWERS & COOKE

 

O NA OULI KOLELA, e pono e p@le ikaika ia aku i ka manawa e ike imua ia aku ai na hoailona o ke ano opuopu opu a hi o ke keiki liilii.  I na kau la, e hiki pono ole ai i n amakuahine ke makaala loa i keia ano pilikia o ke keiki liilii, nolaila e pono e makaumaku me kekahi laau lapaau.

Aohe laau kupono e ae e like me ka Laau Lapaau Colic, Cholera, ame Diarrhoea a Chamberlain.  A he kupono loa e malamaia ma na kauhale.  E @  i keia la, malia  e loaa ke ola i kekahi i loaa i keia pilikia.  Aia ma ka Halekuai o ka Hui o Benson ame Smiths e loaa ai.  He oluolu ke kumukuai.