Ka Nupepa Kuokoa, Volume XL, Number 34, 22 ʻAukake 1902 — Page 6
| This text was transcribed by: | Katy Darlington |
| This work is dedicated to: | For Aunty Aloha Lurbe Ho for whom I am named |
Ka Nupepa Kuokoa
KE KILOHANA POOKELA NO KA LAHUI HAWAII.
6 NUPEPA KUOKOA, AUGATE 22, 1902
------------
Mana ke kauoha a ke Komikina Gill.
---
KAUOHALA LAUA E HOI NO KO LAUA AINA.
---
Ma ka Poakahi nei, Augate 18, Imua o Komikina Gill i kauohaia ae ai na wahine Pake i hopuia iho nei no ke komo wale iloko o Hawaii nei me ka loaa ole o kekahi hoapono mai ke Aupuni Amerika aku, e haalele ia Hawaii nei a hoi aku no ko laua aina hanau, oia o Kina. Ma ia manawa hookahi no ua noi aku ka ioio o ka aoao hoopiiia e waiho aku i ka hoohalahala no ua hihia la,a ua haawaiia mai no ka ae, aka, ina no e holo pono ana kela hoohalahala aole no ia he mea e hakalia ai a hookuemi mai i ka hoihoi ana ina wahine Pake i ko laua aina. I ka manawa e ku mai ai ka moku mua loa e holo ana no Kina o ko laua hookauia aku no ia no ka hooko ana i ke kauoha a ke Komikina Gill. O ka inoa o keia mau wahine Pake oia o Ah Sue ame Ah Ngan, he kaikamahine o Ah Ngan na Ah Sue.
Ma ka olelo hooholo a ke Komikina Gill ua hoikeia ae aole i loaa ka hooiaio no ko Lum Pong ikeia aku he kane male io no oia na Ah Sue, pela hoi o Ah Sue he wahine hoi na ua kanaka la.
O kekahi mea i ulu mai iloko o ka noonoo ana i ua hana ia oia no ka hiki ole i ka hookaawale ana i ke kane ame kawahine ma ke ano he ohana. Eia nae, ua loaa no keia ike i ka aha ua kaawale no ka wahine Pake Ah Sue me ka laua keiki mai ke kane ae no 16 makahiki, oiai no ka wahine e noho ana i Kina a o ke kane hoi e noho ana i Hawaii nei. Mamuli o keia mau kumu ua haawi ae ke Komikina i kana olelo hope, oia hoi: Mamuli o ka lawe ana mai i na ike, e kalele ana i ke koikoi maluna o na mea i hoopiiia, ua loaa keia manao, ua a'eia ae ke kanawai o Amerika e pili ana i ka hoopae limahana, a oiai aia maluna o ke Komikina ke kaupaona ana i ke kaulike, ua loaa iaia ka manaoio ua kau aku keia haawina maluna o na mea i hoopiiia.
Ua hoike pu ae ke Komikina i ka like ole o na olelo ike a na hoike pela no hoi ka ka mea i hoopiiia, pili i ka hooiaio ana no ka lilo ana o na mea a elua he mau mea i maleia a wahi a Mr. Gill he mea paakiki loa ka manaoio ana i ka oiaio o ka pololei o ia kahua.
Mamuli o ka lawa ole o ka makemake o ka aha no ka hooiaio ana no keia wahine ame ke kaikamahine ua hoopuka ae la ke Komikina i kana olelo hooholo e kauohaia laua e haalele iho ia Hawaii nei a e hoi aku i ko laua aina kahi a laua i hele mai ai.
------------
Ka Hale Pohaku O'Neill
---
E KUKULUIA AKU ANA HE HALE POHAKU NANI MA KE KIHI MAUKA AME EWA O ALANUI PAPU ME MOI.
---
He hale pohaku puna ame iliili ke kukulu ia aku ana ma ke kihi mauka ame Ewa o na Alanui Papu ame Moi. He hale keia o elua hale ke kiekie, e hanaia ana no nae me ka makaukau no ka pakui hou ana iho maluna ke manao ia e hana pela ma keia mua aku. Elua no lumi akea ma ka hale malalo, a o ka lua o ka hale e maheleheleia aku ana i mau keena oihana. E hoomalamalamaia aku ana o loko o keia hale me na kukui uwila, a o waho ana o ke alo kekahi wahi nani loa e ikeia aku ana.
O ke kahua e paa ana i keia hale, mai ke kihi aku no ia o ke alanui e holo ana no kahi e ku nei ka hale o ka hui Odd Fellows ma alanui Papu. Ma ke alanui Moi hoi, mai ke kihi alanui a hiki i kahi alanui liilii e holo la mahope o na hale e ku nei i keia manawa. Eia ekolu mea kuleana i keia wahi. He ekolu-hapaono o ke kuleana aia ia Thomas Douglass, elua-hapaono ia Mrs. Cooper a he hookahi-hapaono ia Bruce Cartwright. Mamuli o keia lehulehu o na mea kuleana malaila i ulolohi ai ke ku ana o keia hale, aka, i keia manawa ua pau ke pohihihi a e kukulu koke ia aku ana keia hale.
Eia na haku kamana ke hoonohonoho mai nei i ka lakou mau lilo no ke kukulu ana aku i keia hale, a e lilo aku ana ka hana ana i ka mea koho haahaa. O ke kaha-kii nana ke kii o keia hale oia no o O. G. Traphagen, ka mea nana ke kii o ka hale o Lui ame Kuke i kukulu iho nei ma ke alanui Moi ma ke kahua o ka hale mua o Kulika, e kokoke ia ma alanui Alakea. Ke paa ae keia hale, e maikai ana ke kulana o keia kihi, pau ae hoi keia mau wahi apulu hale e ku mai nei i keia manawa.
Ma ka manawa i weheia ae ai ke koho ana no ke kukulu ana i ua hale nei ua lilo ae la i ka Hui Honolulu Engineering ame Construction. E hana aku ana lakou i ua hana la no ka huina o $16,699. O kekahi mau pono i komo ole iloko o keia koho ana, ua hoouna mua la, a e hoounaia mai ana iloko o ka manawa kupono a ke hiki mai lakou o ka hoomaka koke no ia o ke kukulu ana. Aka aole no e kaliia ana ka hana ana i ke kahua no kela maub pono, aka, i ka manawa e kakauinoaia ai ka aelike alaila o ka hoomaka koke no ia o ka wawahi ana i na wahi apulu hale e ku mai nei, a pau ae ia o ka hoomaka no ia no ka hoohana ana i ke kahua.
------------
HOALOHALOHA.
---
He walohia kumakena a he u aloha keia no David Trask i pauoho mai i keia ola ana.
Ua hala a ua hoi aku la i ke ala polikua a Kane, ua moe i ka moe kau moi hooilo.
Ia Mrs. Liza Trask ame na keiki i hooneleia i ka makuakane ole me ka luuluu. O makou iho me ka haahaa, na hoahanau o ke ekalesia huiia o Koolau, Kauai, ma o ko makou komite la:
Oiai, ma ka Poaha, la 7 o Augate, 1902 ma Kalihi, Oahu, ua kipa ae la ka anela o ka make a lawe aku la i ka hanu hope loa o ko makou hoaloha i aloha nuiia David Trask, a he hoa paahana pu hoi ma na hana o ka uhane, a he koo ikaika hoi no ke ekalesia oia huuia o Koolau, he luna ekalesia oia a he hope Kahu Kula Sabati no ka luakini o "Poni Moi," he puuwai hamama maopopo oia.
Mamuli o kona haia ana ua pau ka lohe ia ana o kona leo i ka haawi mai i na manao paipai i na hoahanau ame na haumana Kula Sabati.
E ke Ahi o Kalalea e—Aole oe e ike hou ana iaia e maalo ana ma kou alo pali; a e ke Koahihi o Kahilikolo e—aole e hehi hou ana kona mau kapuai maluna o kou mau iaia kamehai; a e ka malu kukui o Koolau e, ka home aloha o ko makou hoaloha, ua ike anei oe i kana wahi i hele aku nei? Ae ua lawe ke Akua i Kana o ka Uhane, a e hoi ka lepo i ka lepo; a e
Hooholoia, 1. Ke komo pu aku nei makou e kumakena pu me ka wahine, na keiki ame na ohana apau n oka mea i hala.
Hooholoia, 2. O ka makou pule i ka Makua Lani e hoomama mai i na naau luuluu o ka wahine, na keiki ame ka ohana apau no ko lakou makua i haalele mai.
Hooholoia, 3. Me keia mau mea ke hoonani ae nei makou i ke Akua, ka mea nana i hana na mea apau.
Geo. W. Mahikoa, S. M. Heha, J. Koani, H. W. Pukalo ame S. K. Kane, komite ma ka aoao o na kane.
Mrs. Emy Mahikoa, Mrs. J. E. Kamakai, Mrs. Mary Kane, Mrs. Kalua Pauole, Mrs. Keamalu Kupnane, komite ma ka aoao o na wahine.
"Poni Moi," Augate 10, 1902.
------------
Me he la he Popoki ke kumu o ka Pauahi.
---
WAHI A KA MOOLELO A AH SUI I KA PAPA KIURE PAUAHI.
---
Ma ke kahea ana a ka Ilamuku Brown, ua akoakoa ae la na kiure i wae pono ia mailoko mai o kekahi poe o ke kulanakauhale nei. Messrs. E. O. White, Frank McIntyre, E. R. Adams, J. S. McCandless ame C. Gilman, he mau kiure ninaninau pono ame ka imi pono ana ike kumu o ka pau ana o keia mau hale i ke ahi i ka wanaao o ka po Lapule iho nei i hala.
O ke kanaka i kahea mua ia no ka hoolohe ana o na kiure, oia o Ah Sui, he Pake, ka mea nona kekahi halekuai pipi ma ua wahi la i pau aku la i ke ahi. Wahi ana, ma ka manawa ana i hele ai mai kona halekuai pipi aku mahope o kona wehe ana i ka puka o ua halekuai nei ona, e hele ana oia no kekahi halekuai e aku no ke kuai ana i mea ai lau nahele nana, ua ike aku la oia i kekahi ipu kukui ua hina, a e au ana ka aila i ka loa ame ka laula o kahi hiki iaia ke kahe aku, a e holapu ana ke ahi me ka loaa ana aku o ka paku-makika o ke kanaka e moe ana iloko olaila, a mamuli o ia ahi, ua uwa leo nui ae la oia me ka hooikaika nui ana e wawahi i ka puka a oia hoi ke kumu o ka haawi mau ana mai o kela kanaka iaia i na hoomaikai no ka pakele ana o kona ola mailoko mai o ka make a ke ahi. Ma ka olelo a Ah Sui he popoki ke kumu o ka pilikia mamuli o kona holo ana malaila a pa ke kukui ke kumu hoi o kona kahuli ana a au ai ka aila a puoho ae ai ke ahi, ke kumu o ka lilo ana o kela mau hale o ke kulanakauhale i mau puu lehu.
Wahi ana he popoki ano hulu iole ia, a o ka lohe ana o ka Ilamuku ame kona hope ua ano like ia me ka laua ike ana i kekahi kino popoki make e waiho ana ma ke alanui Muliwai i ke kakahiaka Poakahi ae. O ke kumu o ka hoomaopopo ia ana, mamuli no ia o ke @inoino a maea a i ka nana pono ia ana aku he popoki nona ka hulu ano iole, e like me ka hoike a ka Pake Ah Sui; a i ka manawa a ka Hope Ilamuku i hooholo ai e kii e kioia i ua holoholona la oia kona manawa i hele aku ai no ka hooko ana, eia nae, ua nalowale aku la ua popoki la. Ua hoopaneeia ka noho hou ana o ke kiure a hiki i ka manawa e ikeia ai ke kanaka nona ke keena kuai kahi i kahuli ai ka ipu-kukui, i wahi e loa ai ka oiaio.
Mamua o ka panina o na hana a na kiure ua ninauia aku la ka luna nui o ka oihana kinai ahi Mr. Thurston oiai oia kekahi i kaheaia e ka aha kiure no ka hoike ana i kana ike pili i ka like ole o ke kani ana o ke oeoe hoailona pauahi ame na mea like ole, oiai, aole i pono loa ka hana a ke oeoe hoopuiwa pauahi ma kana hana i kela po pauahi ai.
Ma kana pane, ua hoike ae oia i ke kumu o ka pilikia, oia no ka piha ana o ke oeoe i ka wai mahu a ano e ke kani ana i kela po.
I ka manawa e weheia ai ka pahu haawi hoailona pauahi ua hiki ia ae ka huka e kau lou ana malaila, alaila, o ka manawa no ia e kani makawalu aku ai ma na wahi apau, alaila huikau ae la a oia kekahi kumu nana e hoopii ae i ka wai mahu i kahi e kani ai ke oeoe pela hoi i loaa ai kela ano hemahema. I kela po ua loaa io no kela haawina like i kinohi, aka, mahope mai ua kani pono aku la. Ma kekahi manawa ua hoao aku la oia i kekahi o na pahu haawi hoailona pauahi ma ke kaomi ana i ke pihi a o ke kani aku la no ia a lohe ana na hale kaawai apau, a mahope o ke kali ana no umi sekona ua huki iho la oia i ka huka e kau ana a o ke kani pololei aku la no ia i kahi o ke oeoe ke kumu hoi e ko ai ka makemake.
Wahi ana, ua loaa iaia ka manao e kau i palapala kuhikuhi no na rula ma kela ame keia pahu i hiki ai ke lawelawe pono ia ka hana ke hiki mai na ulia e like me kamau, i mea e hoomakaukau ai i ka lehulehu me ia mau mea.
------------
O SENATOA BURTON KEKAHI KOMIKINA NANA IA HAWAII EIA I HONOLULU NEI ME KAKOU.
---
SENATOA J. R. BURTON
------------
Ma ka Poakolu, Augate 20, i hiki mai ai ke Senatoa J. R. Burton ame Senatoa J. M. Thurston ame ka laua mau wahine i Honolulu nei ma ka mokuahi Sierra, he mau malihini ano nui na ko Hawaii nei e pulama ai, no ka mea, aia iloko olaila ka mana e nowele pono mai ai ia kakou pili i ke Teritori o Hawaii nei.
O Senatoa Burton oia kekahi o na komikina a Amerika i hookohu ai no ka hele mai i Hawaii nei e nowele ai ia Hawaii nei a o ka ike e loaa ana oia ka mea e hoiholia aku ai a hoike aku ia Amerika. Oinei ka mea o na komikina i hoea mua mai nei a aia a hiki mai ka hapanui o lakou alaila hoomaka aku ka lakou hana no ka hooko ana i ka leo kahea i haawiia mai ia iakou e hana.
O ke kumu o kona holo mua ana mai nei i Hawaii nei oia no kona makemake e hoohala i kekahi manawa hoomaha ona ma ka Paredaiso o ka Pakipika a oiai o ka manawa e hiki mai ai ka hapanui o na komikina he manawa wale no ia e hoohalaia ai no ka imi pono ana i ke kulana o Hawaii.
E hoohala aku ana i ua manawa hoomaha la ma ka mokupuni o Hawaii malalo o ka hooponopono ana a ka Hon. Samuela Paka no ka uhai holoholona ma ke kuahiwi i kamaaina i ke keiki Hawaii S. Paka. E hala ana kekahi manawa malaila aka e hoi mai ana ke komikina mamua o ka noho ana o ka aha elele o ka aoao Repubalika iloko o ka pule mua o Sepatemaba no kona makemake e ike a e lohe i na mea e hanaia ana e ia aoao no ka pono o ka lehulehu.
Ua loaa mua keia hoonohonoho hana ana i ka Hon. Samuela Paka no ka hookipa aloha ana, nolaila ua ka-uaia ka mokuahi Helene no ke kali ana i ke Komikina Burton a o ko lakou holo ana aku nei no ia i ka Poaha iho la, Augate 21, a me he la ke lualai la lakou ma na kai o Alenuihaha no ka pae aku i Hawaii a hanu aku i na ea huihui o Waimea.
Ma ka manawa i hiki mai ai ke Komikina Burton ua nui na makamaka i hookipa aloha mai iaia ame kona mau hoahele a na kekahi i haawi aku i kona keena hana i keena hana no ua komikina la oiai oia e noho ana i keia manawa ianei. Ua manao pu ia ae e haawi ana ke Teritori o Hawaii nei i kekahi keena nui o ka halealii, ka Hale Mana Hooko o ke Teritori, oia ka hale o na lunamakaainana i keena hana no ua poe komikina la ke hoea mai ka hapanui
He nui na manao i hoikeia ai e ke Komikina Burton a o kekahi o lakou oia keia malalo iho nei: "No'u iho aole e hiki ia'u ke hoike piha aku i na hoolala ana a ke komike a Amerika i hooholo ai e imi pono i ko Hawaii nei kulana a hiki mai ka hapanui o makou, aka, hookahi a'u mea hiki ke hoike ae oia ka loaa ana o keia manao e kapae loa aku i ka hoolohe ana i na mea pilikino o na ano apau ma keia hana a makou, aka, ua hauoli loa makou i na mea apau e hoikeia mai ana ia makou e pili wale ana no no ka pono o ka lehulehu. O ka oiaio maoli o ka makou hana oia no ka imi ame ka huli ana i na mea oiaio, ka mea hoi e loaa ai a e hoopomaikai ai ia Hawaii nei, olai, oia no ka hua o ka makou misiona i makemakeia ai e hua mai."
------------
HE MAKAI KONA HOOPAKELE
---
(Mai ka aoao 1 mai.)
ope o lakou, i puka mai ai mailoko mai o ka hale ma kekahi o na puka aniani o ka hale oluna, a i ka nanaia aku, me he la , e hooholo ana kona manao e lele mai i pakele ai oia mai na lima mai o ke ahi, a oia no hoi ka manawa i ike aku ai ke Kapena Makai Kanae i ka wahine Kepani iloko o ka pilikia ua kahea aku la oia me ka leo nui aole e lele mai aka e ku no peia; no ia mea, ua haawi aku la oia i kana pu panapana i kekahi wahine e ku kokoke ana malaila a o kona hoomaka aku la no ia e pii ma ka pou uwea-olelo a kau ana ma ka lanai o ua hale la kahi hoi a ka wahine e naka ana i ka maka'u.
Ua kanalua no ka wahine no ke kali ana, oiai, aia ke ahi mahope pono ona, a aia no hoi malalo pono ae, a aohe wahi o kona pakele, hookahi wale no oia kona lele mailaila mai a he eha no hoi ka mea e loaa ana iaia. Aka, iloko o na manao pihoihoi, ua hiki aku la kona hoopakele a o ka lele mai la no ia o ka wahine a puili i ka a-i o ka makai a paa ia mai la no hoi oia iloko o na lima kokua aloha a me ia ano ka makai ame ka wahine Kepani o ka iho ana i ka honua. I ka manawa a ka makai i ui ae ai no kana pu ua ike iho la oia ua holo ka wahine me ka pu.
Ua ikeia o Mr. Kanae, oia ka lima ikaika loa o loko o ka oihana makai. Ua ikeia keia ikaika ona ame na hana hookalakupua ana ma ka manawa ana e noho ana i ka oihana makai kau lio, oiai, oia ka manawa i halawai ai oia me kekahi mau hana i ikeia ai ka ikaika ame ka wiwoole, a oia no hoi ke kanaka e hiki ke hopu i na haunaele ikaika ke ku iho i kahi o ka hana.
------------
Ua hala aku nei ka Lunakanawai Kiekie Frear me kana Eva i ko na aina e ma ka mokuahi Sonoma o ka Poalua iho nei.
---
Ma ka la 23 o keia mahina i holo aku ai ke Kanikela Kepani M. Saito no Iapana e hoohala ai eha mahina no ka hoomaha ana.
---
Ma ka Poalua iho nei i hoolohe ai na kiure i ka hihia laibila o ka Lunahooponopono Y. Kimura o kekahi nupepa Kepani no ka pono o ka hoolohe ana o ka aha i ua hihia la.
------------
O KE ANO ANU E LOAA ANA I KEIA KAU LA he mea hoopilikia loa la, a he mea kupono ole e hoohala ia. O ka Laau Kunu a Chamberlain he hoola ia no ke akemama i pilika, he hiki ke holoi hikiwawe io na eha a hoihoi hou i ke oia kino iloko o ke ano mau. Ua maopopo loa kona ikaika hoola a he hikiwawekana hana hoola ina. e loaa ia ano laau ma ka Halekuai o ka Hui o Benson ame Smith. He oluolu ke kumukuai.
------------
Eia mai ka Mea Hou
---
E Kuai i Mikini Lole nau a ma ka Pule ka Uku.
---
E loaa no na Mikini lole like ole no ke kumukuai kupono ma ka halekuai o WATSON AME WEST, Helu 162 e ku la ma ke Alanui Hotele, a he @ki no ke uku liilii i ka waiwai 10 o ka Mikioi hookahi i kela ame keia pule me ka hoopaa pu ia aku o na hooiaio no ko lakou maikai. He mau Mikini kahiko o ke ano helu elua kekahi i makaukau no ke kuai. E hele e ike nou iho.
--HALEKUAI O—
Watson ame West
Helu 162-- -- Alanui Hotele
K@@ke i k@h o Harts.
------------
..O KE..
Koko Ino ka mea e loaa ai na Pilikia ma ke Kino.
---
E Heluhelu i keia mau Manao.
---
O KA LAAU
AYERS SARSAPARILLA
--KA—
laau nana e hookaawale na ma'i ino maikou koko aku. He laau hoonoono ai, a he laau e hooikaika ana i kou mau lala apau. O ka laau Ayer's Sarsaparilla ka laau kaulana loa a puni ke ao holookoa. Ina e hoomau ia ka lawelawe ana i keia laau e loaa ana ka ke ola kino maikai a me ke koko maemae, hoi hou mai ka ula o kou mau lehelehe, pu'ipu'i maikai kou mau papalina, a loaa ke kulana ola kino maikai.
He loaa na pu'u paa o ke kino i ka laau Ayer's Sarsaparilla, e hoopakele ana mai ka ma'i puu paa (Brights' Disease ame na ma'i oia ano. Ke koi ikaika aku nei makou e lawe ia keia ano laau ma kahi i ike ia na ma'i Puu paa apau.
Hoomakaukau ia e Kauka J. C. Ayers & Co., Lowell, Mass. U. S. A.
E loaa no keia mau Huaale ma na halekuai laau a pau.
------------
He Panai Kupono
---
HE KUA HOU, MA KAHI O KE KUA KAHIKO, MA HONOLULU NEI E HANAIA AI.
---
I kahi wa e loaa ana i keia kikala hanenee, ke ano naluea, hoihoi ole: kahi wa holo ae la ka eha ma ka iwikuamoo, e kokoke ana ma kahi o ka puu-paa, a me na hookuina, a he ano maui la, aole i kana mai ka eha ke kulou. Makehewa ke kau ana i ka makeke, a anaanai ana i ke kua. aohe loaa kahi o ka eha. No ka loaa ana he kua hou a ikaika, e oluolu e hoao e hahai i na kuhikuhi ana a keia mahainana o Honolulu nei:
Mr. A. J. Cahill o ke alanui Papu, ma keia kulanakauhale, kiai po kana hana ma kahi o Messrs. T. H. Davies & Co., Kaupalenaia, wahi ana: He sela moku au i ko'u mau la opio, a i kahi manawa, ua hana au no ka Hui Moku Piliaina. Mamuli o keia loaa ana o'u i ke kikala haneenee me ka mai ma ka puu-paa ua haalele au i ko'u hele ana i ke kai.
No keia kumu, ua hoao au i na ano laau a pau, a o ka laau nana au i hoomama keia mau luuluu i loaa ia'u, oia no kela Huale a Doans no ke Kikala Haneenee me ka Puu-paa. Eia ke kuai ia nei ma ka halekuai laau o Hollister's. Ola loa ko'u mai, pau na ehaeha i loaa ia'u. Ina e manao ana kahi mea e ike ia'u, e loaa no au ma kahi kuai lako moku, o Van Dorn's, alanui Papu.
E loaa no ia oe, ka laau i ola ai o Mr. Cahill, me ka nana pono ana i ka inoa piha like me keia ma ka wahi:--Doan's Backache Kidney Pills.
Doan's Backache Kidney Pills, ke kuai ia nei ma na hale haawi laau a pau ma ke 50 keneta o ke poho, 6 poho $2.50, a i ole e leta mai no i ka halekuai laau o Hollister Co., ma Honolulu, Agena no ka Pae Aina Hawaii.
------------
Eia mai ke ano hou loa aohe Eha ma ka hana ana a na Kauka Huki Niho
W. E. Allen, D. D. S F. L. Ferguson, D. D. S
------------
Papa Niho Piho pono $5.00.
Huki ana i ka Niho 50c
Hoopiha me ke Kala - - 50 keneta
Hoopiha me ke Gula $1.00 a pii aku
Papa Niho Gula - - -
Papa Niho Kala - - - $5
Papa Niho Maoli - -
------------
Ina e makemake oe i ka lawelawe hana o ke ano maikai—oia hoi, he hana a loaa hou ole ai oe ika pilikia mahope aku, alaila, e hele mai oe ia maua a na maua e hooiaio aku i ka maikai o ka maua hana e like me ka maikai ma kekahi poe kauka huki niho e ae, no ka mea, oia ka maua hana ike a lae oo ma ia mea. He maikai ka maua may mea hana o ka oihana kauka huki niho.
O ka poe e hele mai ana, e naua ia no ko lakou niho a ha'iia aku na mea pili poino ame na hana e hana aku ai i pau ia mau eha, me ka auhau ole.
O na hana apau e hooiaio aku ana no ka maikai a o na hoohana hou ana e hanaia aku no me ka auhau hou ole aku.
------------
E loaa no maua ma ARLINGTON HALE, 215, ALANUI HOTELE ma kahi aoaa o ka huina o na Alanui Hotel ame Uniona, Honolulu, H. I.
------------
HOOLAHA KUMAU
------------
O
Keia ka wa
no ka
Hoahu ana..
---
HUI HAWAIIAN REALTY AME MATURITY, KAUPALENAIA, HONOLULU.
---
He pepa keia e hoolauna aku ana ika Hui Hawaiian Realty ame Maturity, e hoikeike aku ana i na hoa i ka pomaikai e ala mai ana mahope o ko lakou komo ana i keia hui. He hui keia ua kaupalenaia no ka poe ilihune me ka poe waiwai e makemake ana e hoouluulu i ka lakou kenikeni no ka noho ana o keia mua aku. Ua like pu loa keia hui me ka Banako e hookomo ana kela ame keia $2.50 no ka mahina mua a $2.00 mahope aku i na mahina apau a hiki i ka piha ana o na mahina he 75, alaila, hoihoiia mai ia mau dala i houluuluia ai a kela ame keia me $50.00 mawaho ae, ka puka o ke dala o ka mahele hookahi, huina pau loa $200.00. He nui no mea maikai o keia hui a pomaikai no hoi. I ka wa o ka lawe ana o ke kanaka i hookahi mahele, e uku ana oia he $2.50, ka waiwai io he elua dala, a ua hookauia kela hapalua no ke pooleta o ka palapala hookuleana e haawiia ana i kela ame keia e @ ana i mahele i mea hookaa no ka lak@ dala a e paa lakou i keia palapala hiki i ka piha ana o kela mau mahina i kauohaia ai. Ina paha e ma'i a@ kekahi kanaka i komo i ka hui a no waliwali a hiki ole iaia ke imi i ola nona, i ka wa ona e hai ai i ka hui, @ hoihoiia ana na dala ana i hookon@ mai ai i ka hui me 1-4 hou aku.
E like pu me keia, ina he umi dala i ukuia, e loaa aku ana he umi-kumamalua me hapalua, a pela wale aku. Ina e make ana, e hoihoiia aku ana iaia na dala apau ana i hookomo ai o ka nui pu oia mau dala hou e like @ keia: Ina he $100.00 ana, e haawiia @ iaia he $200.00. Ina paha e make@ ana kekahi kanaka o ka hui e ala, @ hiki no iaia ke ale i ka piha ana o @ makahiki, ma ka hapa nae o kana n@ kenikeni i hookomo ai i ka h@, aka hoao oia e hoihoi hou mai ia mau i @ ana i aie ai iloko o eono mahina a hookahi makahiki paha. He hui keia e hoopomaikai ana i na kanaka: o ka poe nae e makemake ana e hookuo@ ono ia lakou iho no keia mua aku. He nui na dala a na kanaka e loaa n@ aka, aole nae lakou e noonoo ana no k@ lakou pono o kela mua aku. Loaa mai no kahi kenikeni, i o no ianei, pau ana a hala ae la keia pule, mahina, a hiki i ka hoea hou ana mai o ka makahiki hou, aole wahi dala i houluuluia. Ina no hoi e lawe ana oia i hookahi mahele, e uku ana ia he elua dala o ka mahina hookahi; a ina e piha ka makahiki ua loaa iaia, he $24.00, me ka puka pu oia mau dala. Ina ia e hele mai ana i ka hale o ka hui, e loaa ana iaia ka hana o keia uala me ka puka pu, a he mea no hoi ia e hookalaia ai kahi pil@ @ na kanaka, e pono kakou e @ @ pono a malama i na wahi kenikeni @ he aupuni Amerika keia, a ke hele @ nei ka poe o ka aina e a ke hao @ nei i na aina o kakou: nolaila, e p@ kakou e hookuonoono i hiki ia kakou pu ke pale aku ia lakou, a aohe hoi @ hiki ia lakou ke hoonaikola mai, e like me ka maa mau. Houluulu kahi kenikeni no ka pono o na wahine me na keiki. Ina aole e hiki i ka mea hookahi e uku liilii i na mahina apau, e uku mua mai he $10.00 paha, elima paha iwakalua-kumamalima paha, aia no i ka mea e loaa ana i ke kanaka: ka@ aku la a piha na mahina oia mau dala ma ka elua dala o na mahina apau ailaila, uku hou. Ina kakou e hana ana me keia, aole kakou e mihi ana i keia hana maikai a kuonoono pu. He poe kuonoono na alakai o keia nui, nolaila mai minamina i na kenikeni, a ina aole oukou i komo mua i ka hui, e komo mai i keia wa. Kakau mai i ka Hale hana o ka Hui, oia hoi ka Rumi 3 ame 4, McIntyre Building. Ina oukou e hopohopo ma kahi mea, e kakau mai a ua hiki ia makou ke hoakaka aku i na mea apau. ua hiki ke kanaka ke lawe e like me ka nui o kana mau kea (shares) e makemake ai. Ina ia e makemake ana e uku mua i $150.00 a $100.00 paha, ua hiki no e haawila aku i likiki nana no ia mau dala. Ina ia no Hawaii a Hilo paha, a i ole, no kekahi aina e ae, e hoouna ana ia i kana dala ma ka Bila Hale Poo Leta, a e loaa aku ana kana likiki. Nolaila, mai hopohopo i ke komo ana i keia hui maikai.
HUI HAWAIIAN REALTY AME MATURITY, KAUPALENAIA, Rumi 3 ame 4 McIntyre Building, Honolulu
L. K. KENTWELL,
General Manager
------------
S. OZAKI
---
--WAIHO I KA—
OIHANA KUAI PAPALE.
---
Kuai Hoemi Loa
I NA PAPALE
---
35c NO KA PAPALE $1.00
---
HALEKUAI 178 – ALANUI HOTELE
------------
KA LAINA KAA OHUA O HONOLULU AME KUALOA
---
E lawe ana i na eke leka o ke Aupuni ame na ohua ma ka haalele ana ia Honolulu i kela ame keia la, hola 9 a. m. E ike ae i ka Hui o Lovejoy no na ukukaa.
J. CROWDER, Ona.