Ka Nupepa Kuokoa, Volume XL, Number 11, 14 March 1902 — I kekahi Hui Holoi Lole ame Kekahi Meu Mea e Ae. [ARTICLE]

I kekahi Hui Holoi Lole ame Kekahi Mau Mea e Ae.

Ua lohe mai makou me ka maopopo ua kukulul ae na Lede o Hookena, Kona Hema, Hawaii, i kekai Hui Holoi Lole, malalo o ka noho alakai ana a Mrs. Lazaro. Ke hoomaka ala lakou i ka hana, a ua ikeia ka holomua o ka hana. Mailoko mai o ko lakou mau loaa, ua malamaia kekahi hapalua no ka waihona o ka Hui, a o ka hapalua i koe iho, ua maheleia aku iwaena o na lala o ka Hui i mea e kokua ai i na lilo o ko lakou noho ohana ana. Aole wale ma ka hana holoi lole lakou e hana la, aka ua hana aku no lakou i kekahi mau hana e ae, e like me ke ku pia ana a me kekahi mau hana e ae, a mailoko mai hoi o ko lakou waihona ua kuai mai no lakou i kekahi mau mea e ae, e like me ka lanahu a me kekahi mau mea e ae, a ua kuai hou aku no hoi lakou me ka loaa mai no o ka puka. I ko makou lohe ana i keia mea, ua piha la makou me na manaolana hakukoi e ilha ae la ano hana ma na wahi a pau o Hawaii nei iwaena o na Lede Hawaii. Ina wa i hala'e nei, ua paipai mau aku makou i ko makou poe heluhelu a i na Hawaii no a pau, e hana i na hana e kokua ai i na lilo o ka noho ohana ana, me ko makou mau manaolana nae na na keonimana Hawaii e hooko mai ia mau paipai ana a makou: aka hoi, o ka makou e ike nei mamuli o keia lono i loaa mai ia makou, ua lilo ae la na na Lede e hooko mai nei ka makou mau kalaiolelo ana. Ke hauoli nei makou e lohe hou aku aia no he hui oia ano iwaena o na Lede Hawaii ma na wahi e ae o Hawaii nei. A he mea pono ia kakou na Hawaii ke hoomanao, o ka lima paa mau i ka haan, e hahai no ka lako iaia, a o ka mea palaleha he neo ka mea loaa mai. Ke haawi nei ka Lahui Hawaii ia oukou e na Lede o Hookena i na mahalo kiekie ana no ka hana a oukou e hana nei. A o ka makou kahoahoa ia oukou e na Lede mikiala o Hookena: E hoomau aku i ka hana me ka hoomanawanui a paupauaho ole. A e lilo hoi oukou i mau kumu alakai no na Lede Hawai e ae a puni ka aina. "Lahui Hawaii."