Ka Nupepa Kuokoa, Volume XL, Number 11, 14 March 1902 — Untitled [ARTICLE]

He hewa anei ia ina e nahu kekahi haole i ka pepeiao o kekahi wahine Hawaii? Ina aole ia he hewa, pehea ana la ka pepeiao o na wahine Hawaii e mare ana i na haole ma keia hope aku? E noonoo mai kakou, e na kaikamahine Hawaii, i keia. ♦ Ua hala na la makani ame ka ua, a ua hoi hou mai nei ka malie o Kou nei. Iloko o ka ino aole he poino ano nui i loaa ma Honolulu nei, a he mea ia na kakou e hauoli ai. Ma na mokupuni okoa aku ua kaili ia ke ola o kekahi poe, a ua nui hoi na poino i loaa i na waiwai. Aole ma Hawaii wale no keia ino, aka ua piha na nupepa o Kaleponi i na hoike ana o ka ino ame na poino i loaa malaila. ♦ Iʻa hoi aku ka Lunahooponopono o ka nupepa namu Advertiser ma ka Hale paa me ka wiwo le. He olelo mau ia nana. o ka hana nupepa he hana makamaka ole, ina e hana ka Lunahooponopono i ka hana pololei oia hoi ina aole ola e hoopilimea ai ole Ma na wahi ana e ike ai i ka hewa malaila oia e paio ai, o ka poe ana e ike ana e kue ana i ka pono ame ka pololei, oia kana e kue aku me ka ikaika o kana makakila. ♦ E o mau aku na nupepa, na wahaolelo hoi o ka lehulehu. I ka lakou i manao ai oia ka pono no ka lehulehu me ke keakea ole ia. Ua ike ka poe hana kanawai i ka waiwai o ia mea he nupepa ame ka lohe ana i ka manao o ka lehulehu a nolaila ua hookuu laula lakou i na nupepa e pane, a e hoahewa i kela ame keia a lakou i ike ai ua hewa. Aole loa he Aha hookolokolo, ma Hawaii nei, a mawaho aku paha. I hiki ke pani i na manao akea o na nupepa no ka pono o ka lehulehu. e paio ana no ke kue ana i na hewa. ♦ Ua loaa hou kekahi kino make makai o ka uapo me ka loaa ole o ka mea a mau mea paha nana i kaili ae kona ola. Ua maopopo loa aole ola i hiki malaila mamuli o kona manao iho, a aole hoi oia i make me ka lawelawe ole ia e ka lima o kekahi poe, aka owai lakou a i hea lakou e loaa ai? Aole keia o ka mua loa o ka make ana o kekahi kanaka ma Honoluiu nei me ka loaa ole o na kalohe, a ina aole e loaa koke ana ka poe na lakou e hana nei kela ano hana alaila ehoomau ia ana keia ano hana ma keia mua aku. Ke haawi ia nei. a i ole e haawi ia aku ana paha. he makana o elima haneri kala, aka aole oia makana wale ka mea nana kakou e paipai mai e kokua i ka oihana makai i ka huli ana i na kalohe, aka o ka hoopai ana i keia poe na lakou e hana nei keia ano hana iloko o Hawaii aloha. Malia. Ina e hookuu laula ia ana lakou, e hiki mai ana ka lakou manawa e hoopoino mai ai ia oe ame kau, nolaila e huli a hoopai ia lakou, mamua o ka hiki ana mai oia mau pilikia.