Ka Nupepa Kuokoa, Volume XL, Number 9, 28 February 1902 — Na Keaka mai na Moolelo Kahiko mai KE HOOMAKAUKAU NEI KEKAHI MAU KEIKI HAWAII NO KE KEAKA ANA MAI. [ARTICLE]

Na Keaka mai na Moolelo Kahiko mai

KE HOOMAKAUKAU NEI KEKAHI MAU KEIKI HAWAII NO KE KEAKA ANA MAI.

Eia kekahi mau keikl Hawaii o kakou ke hoomakaukau mai nei i kekahi mau keaka mai na moolelo Hawaii mai o kakou. O na keaka a na haole ua hana ia no ia mai loko mai o na moolelo maikai a lakou i ike ai, a ma ke keaka ana ia mai ua hiki loa ia oe ke ike aku i kekahi mau wahi like me na wahi i hoike ia ma na moolelo, ua hiki hoi ia oe ke loha aku i na olelo i hoike ia ma keia mau moolelo ame na hana no apau. Ma keia ano ua maopopo i kela ame keia e ike aku ana ke ano maoli o keia mau moolelo. Ke hauoli nei makou i ka ike ana i keia mau keiki Hawail e hooikaika ana e hana i keia hana, oiai he hana la e mau ai ka hoomanao ia ana o kekahi o na moolelo maikai o kakou mai kahiko mai e llke me Laieikawai, ka Moolelo nohoi o Kapena Kuke, Lohiau, ame Kaala. O ka moolelo paha o Laieikawai kekahi o na moolelo maikai loa mawaena o na moolelo kaao mai kahiko mai. Ma ka lakou keaka ma ka Haie Mele Hou o ka po Poaono, Maraki 15. 1902, e keaka mai ana keia mau keiki i keia mau mooleio maikai. Ua keaka ia no o Laieikawai ame Kaala mamua aku nei, a ua nui ka makemake ia, a no ia makemakeia ke hoao hou nei kela mau keiki e hana hou ia hana. Ma ka hoike mai a ka poe i ike i ke keaka mua ame ka hana a keia mau keiki e hana mai nei i keia mau la ua oi loa ae ka maikai o ka keia mau keiki mamua o ke keaka mua ia ana mai. Eia mawaena o keia mau keiki na Hui Hawaii kaulana o kakou, ka hui Kawaihau, ame Quintette, a e lohe ia ana na leo kaili puuwai o ua mau Kahuli leo le'a nei o ka ia'i o Kou. E hoomanao e na Hawaii i ka po o kela keaka a e hele aku i ike i ka nani o na moolelo Hawaii kakou, a e ike hoi i na hana maikai ola po le'a o Halalii. E maopopo ana i ka poe ike namu ole na mea e hana ia mai ana oiai ua walewaha keia mau moolelo ia kakou.