Ka Nupepa Kuokoa, Volume XL, Number 3, 17 January 1902 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

Hoopukaaia i na kakahiaka Poalima apau.

 

BUKE XL. - Helu 3.  HONOLULU, PAOLIMA, IANUARI, 17, 1902     NA HELU APA 2894

 

MAI MAKE O HOGAN A

ME KONA MAU HOA

HELE I NA OLEPE

 

Ai lakou i keia mau

Olepe i ka hora elua

o ka wanaao

Poakihi

 

Manao Loa Kela Paele Keaka Kaulana Ua Kokoke Mai ka Manawa Nona e Hoike Ai i Kona Ola Ana Ma Keia Ao.

 

            Mai poino ka Paele Keaka kaulana, Hogan, i na Olepe Kaleponi i palai maikai ia ma ka Hale aina e  kokoke ala i, ke kihi o Alanui Papu ame Alanui Hotele, ma ke Alanui Papu.  I ka hoike ana mai o na hoailana o ka ma'i he kakaikahi loa na kanaka ma ka Opiuma ia manawa ame ka hana nui wale no ame ka hoomanawanui o na hoa'loha i lohe aku i keia pilikia, ame ka ike hoi o na kauka i pakele ai ke ola o keia Paele kaulana ame kekahi o kona mau hoa I hele like ai a ai i keia Olepe maikai mai Kaleponi mai.

            Ua manao wale ia no o keia iho la ke kumu o ka pilikia oiai aohe he hana okoa aku i hana ia e kupono ai keia loaa ana i keia ma'i kupalanaha. I ke ahiahi Lapule ua hele aku la o Hogan ame kekahi mau Paele i keaka like iho nei me ia i ka holo kaa, no ka hana ana paha i na ea oluolu o ke ahiahi. I ka hora elua o ka wanaao Peakahi ua kipa ae la lukou me ke "Star Oyster House" he kale aina ma ke alanui Papu e kokoke aia i ke kihi me Alanui Hotele. Ua kauoha aku la lakou i mau olepe i paiai maikai ia, a hoonuu iho la me ka manao ole ae he poino keia a lakou e ai nei.  Pau ka lakou ai ana ua hoi aku la lakou no ko lakou mau lumi like ole me ka loaa ole o kekahi haawina pilikia.  I ka auwina la Poakahi ua hoomaka mai la ka pilikia e loaa like ia lakou.  Ua ikaika loa kona ma'i a hiki i ke kahea ana ia o na kauka e hele mai e nana i kona pilikia.  I ka nana ana ia ua ike ia iho la ka pilikia maoli a ina paha aole i kahea koke la na kauka me nei ua nui loa keia pilikia a poino paha ke ola o keia kanaka kaulana.

            I ka ninau ana ia aku o ke kuke nana i hoomakaukau keia mau olepe ma keia hale aina ua hoike mai la oia aole loa oia i ike i ke kumu o keia pilikia oiai he nui na kanaka i ai like i keia mau olepe mai keia mau pahu hookahi mai me ka loaa ole ia lakou o kekahi haawina pilikia o keia ano.  I keia po no a keia poe i ai ai i keia mau olepe ua hiki aku kekahi haole a ai maka i kana mau olepe a aole i loaa iaia kekahi haawina pilikia.

            Iloko o ka ikaika ole o ka pilikia i loaa i na hoa hele o Hogan ua hoike like ae la laua ua manao @.ua i loaa keia pilikia ia lakou mamuli o keia mau olepe, a pela no ka hoike a na kauka.  Lohe mai makou e hoomakaukau ana o Hogan i kekahi himeni e hoike ana i kona kokoke ana e hui me Petero ma kela aoao.

 

MAREIA O SAMUELA PAKA

ME MRS. CAMPBELL

 

Na ka Lunakanawai

J. C. B. Hebbard

i Hoohui ia laua

 

Puiwa ke Kulanakauhale Nei i ka Lohe Ana Mai i ko Laua Mare- Ua Manao Wale la No o ka Manao ia o ka Paka Huakai.

 

KAPALAKIKO, Ianuari 4.-I ka po nei ma ka Hotele Occidental, ua hoohui ia o Samuela Paka, kekahi o na Hawaii i kamaaina i ko Kapalakiko nei, ma ka berita maemae o ka mare ia Mrs. Jas. K. Campbell.  O Samuela Paka ka ona o kekahi mau miliona eka aina ma Hawai.  O kana wahine i mare iho la ka ona o kakahi mau miliona dala.

            Na ka Lunakanawai J. C. B. Hebard o ka Aha Kiekie, laua i hoohui imua o ke Keiki alii Kawananakoa ame Miss Campbell, G. A. Davis, Lunakanawai Gia, Miss Anita Chrystal, Miss Ethel Gay ame Ernest Paka. i ka pau ana ae o na olelo e hoohui ana ia laua ua olii mai la na keiki a Mrs. Campbell a hooho like mai la.

            "Heaha keia?"

I ka hoika ana ia aku ia lakou, he papa hou ko lakou ua lele koke aku la lakou e honi i ko lakou makuahine ame ka papa-hou.

            Mahope o ko laua hoohui ana ia, ua kau ae la lakou apau maluna o na kaa a hoio aku ia no ka hale keaka, no ka hauoli ana.

            Mamua o ko laua mare ia ana ua malama ia kekahi papaaina maikai ma kekahi o na lumi maikai o kela Hotele. Ua hoohauoli ia lakou e ka hui himeni Kawaihau i kauoha ia mai nei e ke Keiki Alii Kawananakoa. Ua hoonani ia o loko o keia rumi me kekahi mau hoomani maikai.

            He kanawalu kumamalua makahiki i hala ae nei ua hiki mai i Hawaii nei o R. G. Paka, ka makuakane o Samuela Paka.  Me ka hooikaika ame ka hoomakaulii ua nui ino kona waiwai i kona make ana, a oia waiwai ua ili iho maluna o Samuela Paka. Ua kamaaina o Samuela Paka ia kakou a he makehewa wale no ke kamailio nui ana nona. Oia kekahi o na Hawaii waiwai. a ua like ke kala iaia me kekahi mea ulu iluna o na laau.  Ua haalele mai kana wahine i keia ola ana iloko o Iulai, he ehiku mahiaa i hala ae nei.

            O Mr.s Abigaila Kuaihelani Campbell, ka wahine Kane make a Kimo Ona Miliona, kekahi o na makuahine Hawaii u'i.  Ua haalele mai kana kane i keia oia ana he hookahi makahiki a oi ae i hala, a i kona make ana ua waiho iho he mau waiwai i hiki aku i ka $400,000.

            He  $100,000 a oi o keia mau waiwai aia ma San Hose Kaleponi. Ua waiho ia he hookahi hapakolu o keia mau waiwai no Mrs. Campbell i lilo ae la i Mrs. S. Paka i keia manawa, a he elua hapakolu no na keiki.

            Ua hiki mai o Jas. K. Campbell i Honolulu nei iloko o ka makahiki 1849, he kanalima kumamakolu makahiki i hala ae nei ma ke ano he kamana no luna o kekahi moku.  Ua hoohiki loa oia i ka nani o Hawaii nei a haalele i kona moku no ka noho loa ana maanei. Ua hoomaka koke oia e imi nui ma na mea e pili ana i ka mahiko, a mai laila mai kona wawai.

            E holo ana o Mr. ame Mrs. Parker no Nu Ioka e hoomaha ai mamua o ko laua hoi ana mai.  Ua puiwa loa na kanaka o keia kulanakauhale i ka lohe ana mai ua mare la laua.   Mamua o ka lohe ana aku nei o Samuela Paka, ua lohe wale ia ae no i hele aku nei oia e mare me ka wahine a ka ona miliona, aka he kakaikahi loa na kanaka i hoolalo i keia moolelo.

 

HON. SAM. PARKER.         MRS. SAMUEL PARKER, OIA  O MRS. JAMES CAMPBELL

 

HOOKAHI LA NO

KA HOOLE WAIONA

 

NA NA KANAKA NAAUAO E

E HOIKE MAI I KE INO

O KA WAIONA

 

E Heluhelu Mai Ana o William Hanare Ka Luna Paahoa i Kekahi, Pepa e Hoike Ana i ka Hana a ka Lama

ma ka Hoomahuahua Ana i na Hana Kalaima.

 

            Oiai ua piha kakou i na Hale Inu Lama i keia mau la, ke hooikaika loa nei na kanaka i makamake e ike ia ka pono o ka lehulehu e kue i keia mau hale inu lama.  Ua hooholo lakou e haawi ia hookahi ia holookoa no keia hana. a o keia la oia no ka Paoha. Ianuari 30, 1902.  He ekolu hahawai e malama ia ana ma keia la hookahi.  I ke kahahiaka. i ka auwina la a i ke ahiahi.

            Ma ka halawai o ke kakahiaka ua manao ia e hiki ae ana na wahine ame kekahi poe hana oie e hoolohe i na haiolelo.   Ua manao ia e loaa ana kekahi mau olelo paipai maikai mai na kahunapule lehulehu mai e hiki aku ana ma keia halawai.

            I ka auwina la, mahope o ka hora eha, e malama ia ana kekahi halawai nui ma ka lumi maluna o ka hale o Kakela ame Kuke ma ke kihi o alanui Moi ame Betela.  Ma keia halawai e hoike mai ana o William Hanare, ka luna paahoa o Kawa, i kana mau mea i ike e pili ana i ka hana a ka waiona ma ka hoomahuahua ana i na hana kalaima ma Hawaii nei.  He kanaka oia ua huli pono i kei mau mea, a oiai aia malalo o kana malama ana na kanaka apau i loaa i na haawina pilikia o keia ano ua hiki loa iaia ke hoike mai i kekahi mau mea e wehe ia ae ai na pulou nana e paa nei ko kakou mau maka a ike aku'i ka ino o  ia mea.  Ma keia halawai no e haiolelo mai ana o Kiaaina Dole i kana mea i ike ma kona ano le luna aupuni no ka hana a ka waiona.  Oiai he kanaka naauao oia. a ua ike ia hoi kona makaukau, ua hiki loa ke loaa kekahi mau manao maikai mai iaia mai. O W. A. Bowen ana ka mea nana e hoike mai i ka hana a ka waiona ma na hale hana o keia kulanakauhale.  He hookahi haiolelo i koe aole i wae ia i keia manawa.

            Ma ka halawai o ke ahiahi, o ka haiolelo a W. R. Kakela ana ka haiolelo ano nui loa.  Ma kana haiolelo ua lohe ia mai e hoike mai ana oia i ka pilikia i loaa i kekahi mau hana ma keia Teritori mamuli o ka nui ino loa o na hale inu lama i kela manawa. E hoike mai ana oia ma ke ano nui i ke kumu

 

(E nana ma ka aoao 2)

 

Make o Joe Rosa ma kona Home

mamuli o kekahi kumu pahaohao

 

Hoolewai, Kanuia, a Huai ho ia kona mau iwi mamuli o ke

kauoha o ke Aupuni no ka huli pono ana i ki kumu

o kona make hikiwawe.

 

            Me ka mamaonao ua lohe ia mai la ka make ana o Joe Rose, ame ke kii, hou ana ia o kona kino make e na mana aupuni a huai hou ia mai no ka huli pono ana i kekahi mau mea i lohe ia mahope o kona kanu ia ana e pili ana no ke kumu o kona make ana, ame ka minamina nohoi ua lohe ia mai la ka hoopaa ana ia o Keoki Rosa, kona kaikaina ponoi. ame Mrs. Jose Rosa. ka wahine ponoi a ka mea i make. mamuli o ka manao ia na laua i hana kekahi hana kalaima a oia hoi ke kumu o ka make ana o keia Joe Rosa. Eia ke kino o Joe Rosa ke uwe mai nei no ke koko o na puuwai aloha oie i kaili ae i kona oia. a eia hoi kana wahine ponoi ame kona kaikaina ponoi, kana mau mea aloha, ke paa ia nei no ke kaii ana aku i ka olelo hooholo a na kiure e huli pono nei i keia hihia pohihihi.

            He olelo kaulana ia na kekahi lolo kaulana loa o Amerika. "Aole loa e hiki ke huna ia kekahi hana pepehi kanaka." ame keia make kupalanaha, e pololei hou ana paha keia olelo kahiko loa. Ma ka nana aku ua make o Joe Rosa, aole no ka ma'i, aole no ka inu lama e like me ka hoike a ke kauka nana oia i nana. aka, ua make oia mamuli o kekahi mau eha i loaa iaia mai ka lima mai o kekahi mau mea i maopopo ole.  Ua nalo ka hana ana ia. ua make oia, ua ka@uia hoi me ka lohe ole ia keia hana weliweli, aka aole i ae ia e nalo iho ia mau hana weliweli a nolaila ua hoike ia mai ia i ka manawa a laua i manao ole ai e ikeia ana.

            Aia ka Home o Joe Rosa ma ke alanui Miller, a ma keia home nohoi ka wahi noho kona kaikaina Keoki Rosa Ua mare o Joe Rosa i ka wahine a ua loaa ia laua he keiki kane nona na makahiki i hiki aku i ka umi-kumamaha. Aole he maikai o ka noho ana o Keoki ame Joe Rosa, a he nui na manawa i hoike ia ae ai ko laua pilikia imua o ka aha hookolokolo.  Ua hoikeia mai o ka wahine a Joe Rosa, ke kumu o ko laua pilikia.  Aka iloko no o ka like ole o ko lakou noho ana ua hoomau no lakou i ka noho like ana ma keia hale hookahi.

            I ke kakahiaka Lapule, ua kahea ia aku la o Kauka Alvarez e hele mai e nana ia Joe Rosa. oiai ua ma'i loa ia oia.  Ua hiki mai la ke kauka a nana i ka ma'i, a haawi i kana laau, aka, aole i maikai ae ka mea ma'i a ua pii ikaika loa mai la kona ma'i a hiki hou ole i ka mana o ke kanaka ke paa mai i kona ola.  I ke kakahiaka Poakahi ua haalele mai la oia i keia oia ana.  Ua hoika ia aku la kona make ana I ke kauka a kakau mai la ke kauka i ka palapala e hoike ana ua make oia mamuli o kona inu nui loa i ka waiona.

            Ua hiki aku ia kekahi mau makamaka a kanikau no kona make ana, imi ia i wahi no kona kino e moe ai. a hoolewa ia a hiki i laila a kanuia me ka maopopo ole o kekahi hana weliweli i hana ia e kekahi poe okoa aku mawaho ae o ka mea nana i hana keia hana.

            Mahope o ke kanu ia ana, ua hele aku la o W. Keawe, he keiki Hawaii e noho kokoke ana i ka hale o ka mea i make, a hoike aku ia ia McGurn ua manao oia aole he ma'i ke kumu o ka make ana o Joe Rosa. Ua hoolohe mai la o McGurn i kana mau olelo no kekahi manawa, a no ke ano oiaio o na mea i hoikeia aku iaia ua noi aku la oia ia Keawe e hele like laua i mua o ka Hope Makai Nui Chillingworth.  I ko laua hui ana me ka Hope Makai, a mahope hoi o ka lohe ana o ka Hope Makai Nui i kana mau olelo. ua kauoha koke ia aku ia e kii ia o Keoki Rosa, o Mrs. Joe Rosa, ame ke laua keiki i hoike mua ia ae nei, a e lawe ia mai imua ona.

            Ma ka hoike a Keawe, oiai oia e

 

(E nana ma ka aoao 5.)

 

MAKEMAKE E INISUA I KE OLA

 

HAKI KA LIMA O KEKAHI

PANIOLO A LOAA

HE POMAIKAI

 

Nui ka Makemake o Na Keiki Paniolo

o Kauai e inisua ia ko lakou mau Ola.

 

            O ke kumu o keia makemake loa o lakou oia no ka loaa ana o kekahi mau pomaikai i kekahi o lakou mamuli o kona ae ana e lawe i kekahi inisua e haawi ana iaia i na pomaikai ina e haki kona lima a i ole la kekahi lala paha o kona Kino.

            I kekahi mau pule aku nei i hala ua hiki aku la kekahi o na Agena o kekahi o na hui Inisua o Hawaii nei ma Kauai, a malalo o kana pelo ana. ame kona hoikeike ana aku i na keiki o Kauai i ka nui o na pomaikai  e loaa ana ia lakou ina lakou e ae ana e inisua i ko lakou oia ua ae mai la kekahi o keia mau keiki e inisua ia ko lakou ola.  Ma keia palapala inisua ua hoakaka ia ina e loaa kekahi mau poino i kekahi lima, wawae, maka, ame kekahi mau laia e ae paha o ke kino i kupono no ka imi ana i na loaa, ua ae keia hui inisua e uku aku i kekahi huina dala elike me ka nui o na kala i inisua ai kekahi kanaka i kona ola pela no ka nui o na kala e loaa mai ana iaia.

            Mawaena o na keiki o keia ano i lawe ua loaa ka pilikia mahope koke mai o kona lawe ana i keia inisua. O keia kekahi o na keiki i loaa ole i kekahi pilikia no kekahi manawa loihi o kona noho paniolo ana aka i kona lawe ana i keia palapala inisua ua loaa koke iho la iaia kekahi pilikia a loaa hoi na pomaikai o keia inisua ana.  I ka ike ana aku nei o kona mau hoa paniolo i ka loaa ana iaia o kekahi puu dala nui mamuli o ka haki wale ana no o kona wahi lima, ua ike iho la lakou he hana maikai loa ka ka inisua ana i ko lakou ola. a hooomaka koke lakou e ae e inisua la ko lakou ola.

 

O KA PULE HOPE LOA  KEIA E

LOAA AKU AI KA NUPEPA I KA

POE I UKU OLE MAI I KE OLA O

KA PEPA NO KEIA MAKAHIKI

MAHOPE AKU O KEIA MANAWA

O KA NUPEPA WALE NO A KA

POE I UKU MAI KE HOOUNA

IA AKU ANA. NOLAILA INA AOLE

OE I UKU I KAU PEPA MAI PUIWA

KE LOAA OLE AKU.

 

            Ke hoao nei o Prof. Jordan o Kaleponi e noi ia Kanagi. ka Ona Miliona e haawi nei i kana mau dala no na Hale Heluhelu, e haawi mai ia pomaikai ia Hawaii nei.

 

HOOPALAU KE KEIKIALII

KAWANANAKOA ME MISS

ABBIE CAMPBELL.

 

Hoike ia ko laua Hoo-

palau e Samuela

Paka ma kekahi

Ahaaina.

 

            I ka ia Eono o Keia Mahina Laua e Mare ia Ai ma Kapalakiko wahi a na Nupepa Kaleponi.

 

            KAPALAKIKO, Ianuari 4,- Ma kakahi ahaaina i haawi ia i ka po Hapenuia e Miss Abbie Campbell ma ke Hokele St. James ma San Hose (San Jose) ua kukala mai la o Samuela Paka ua hoopalau ke Keiki Alii David Kawananakoa me Miss Abbie Wahiikaahuula Campbell.  E noho ana o Miss Campbell ma ka aoao o ke Keiki Alii i ka manawa a Samuela Paka i ku mai ai a hoike i keia mea hou.  He mau pule mamua ae o ka lohe ana ia o keia hoopalau ua hoole ae keia kaikamahine aole oia i hoopalau.  Mamuli o ka ike o ka makuahine o keia kaikamahine i ka nui o ka uhauha o ke Keiki Alii. aole oia i ae e haawi i ka lima o kana kaikamahine a hiki i ka hoooponopono ia ana o kekahi mau mea ana i makemake ai e pili ana i na waiwai.

            Ua lohe ia mai i loaa keia kaikamahine u'i i ke Keiki Alii malalo o ka hooikaika o Samuela Paka, Lunakanawai Gia, ame Geo Davis.

            He elua haneri o na kanaka ame na lele koikoi o San Hose i hiki ae ma keia ahaaina.  Ua hoomoe ia na pakaukau e like me ka mea maa ma na luau a kakou, a ua hoonani ia me na pua nani i lona. Ua kui ia he mau lei nani, ame na lipine e welo ana ma o a maanei. Ua hoomalamalama ia keia lumi me kekahi mau kukui uila he nui.  Ua lu ia na pua nani o Kaleponi.  Ua noho na makamaka i kono ia e ai i ka hora 8:30 o ke ahiahi, a ia manawa i ku mai ai o Paka a hoike mai i ka hoopalau o ke Keiki Alii me Miss Abbie Campbell.

Penei kana i olelo mai ai:

            "Na Lede ame na Keonimana:  Me ka hauoli nui, ke hoike aku nei wau ia oukou i ka hoopalau o Miss Abbie Campbell i ke Keiki Alii David Kawananakoa.  Ke haawi nei wau i ko'u mau manao maikai a hoohauoli i ke kaikamahine, a i kana kane hoi o keia mua aku.  E inu kakou no ko laua oia loihi ana."

            U ainu like ae la lakou i ko lakou mau kiaha a mahope o ka inu ana ua noi ia mai la o Mr. Geo. Davis e haiolelo pokole.  Penei kekahi o kana mau olelo "Aole he hana maikai nau ka pai ana aku imua o oukou i ke keiki alii oiai he hoa'loha maikai oia no'u, a ua ike hoi a ua hoomaopopo i kona waiwai ma ke ano he hoa'loha. ame ka maopopo o kona ano la'u, aole loa wau i puiwa i ko'u lohe ana aku nei ua lilo ae ia iaia ka puuwai o kekahi o na Kaikamahine o kona aina hanau.  Aka he mea kupaianaha loa ia'u a ka ike ana aku na ka Moho Elele o ka aoao Repupalika e hoike mai ka hoopalau o ka Moho Demokaraia o ka paio mua loa ma Hawaii.  Ua piha keia keneturia i na mea pahaohao.  E hui mai ana me a'u na poe apau o Honolulu i ike i ke Keiki Alii ma ka haawi ana aku i na manao hoohauoli oiai he alii oia ma kona ano ame kona inoa.,  i ko laua wa e marela ai."

            I ka pau ana o ka Davis ua ku koke mai la o Lunakanawai Gia Penei kekahi o kana mau olelo:  "Ma  ko'u ano he iaia no ka hui hookahi. a he hoa'loha oiaio hoi no ke keiki alii ke hauoli nui nei wau i ko'u lohe ana aku nei ua lilo ae nei iaia kekahi o na kaikamahine u'i loa o Hawaii, a ua pahaohao hoi wau i ka hiki ole ana i na keiki o San Hose nei i kupono i ka mare ke paa iho i keia kaikamahine ma Kaleponi nei. Ua lilo ae la i ke Keiki Alii kekahi makana i hiki ole ke kau ia he kumukuai. Ke hooki nei wau e ke Aloha.

            I ka pau ana o ka Gia ua ku hou mai ia o Sauela Paka a penei kana i pane hou  mai ai:  "Ua hauoli loa wan i ka lilo ana pa'u e hoike keia nuhou hauoli.  O ke Keiki alii ko'u hoapaio ma ke kau koho balota i hala aka he hoa'loha mau oia no'u.  Ma ko maua ano he mau hoa'loha aole i hiki ia'u ke hoike piha aku i kona ano maikai.  Ina aole i hui o Hawaii me Amerika me nei i keia la ke noho nei oia ma ke ano He Moi.  Aole loa e loaa ana iaia keia kulana, aka ua hiki loa iaia ke hoopomaikai i kona lahui ma ke kokua ana ma na hana maikai i hiki iaia . Ua maopopo loa ia'u e kokua ikaika ia ana oia e Miss Campbell ma kana hana.  Ua lawe me ke Aloha."

            He elua mau mea okoa ae i kamailio pokole e pili ana no keia nu hou hauoli.

            Mawaena o ka lehulehu i hiki ae ua ike ia aku o Mrs. James Campbell, Miss Abbie Campbell. Keiki Alii Kawananakoa, Herbert Kidder, George Hooper, C. T. Burr, Miss Romera, Mrs. Burr, Miss Alice Campbell, Dr. Edward Holbrook, Mrs. Ada Rhodes, Mrs. Joseph R. Ryland, Miss Edith Gay, Earnest Paka, James Paka, Mrs Alice Kamikela, Harry Bradley ame Mrs.  WIlliam Hunt, Joseph R. Ryland, Esther Cummings, Miss Esther Chrystal.

            I ka pau ana o ka lakou ai ana ua kani mai la ka pila a maki like aku ia lakou i alakai ia e ke keiki Alii me Miss Abbie Campbell no ka lumi hulahula.  A  ilailo i hoohaia ia ai kekahi manawa.  Ua hoonani ia keia lumi hulahula me na hae Amerika ame ka Hae Hawaii ame na pua nani nohoi o Kaleponi. Na ka hui himeni o na keiki mai Hawaii nei aku i haawi ae na leo hulahula.

            Nui na manawa i ninau ia ai o Miss

 

(E nana ma ka aoao 5)