Ka Nupepa Kuokoa, Volume XXXIX, Number 31, 26 July 1901 — Page 1
| This text was transcribed by: | Kau`i Peralto |
| This work is dedicated to: | Tutukāne Frank Bliss Wright Sr. |
Ka Nupepa Kuokoa
KE KILOHANA POOKELA NO KA LAHUI HAWAII.
Hoopukaia i na kakahiaka Poalima apau.
BUKE XXXIX—HELU 4 HONOLULU, POALIMA, IULAI 26, 1901. NA HELU APAU 869
HOOPII OKI A MRS. J. KUMALAE
No ka hanaino loa o J. Kumalae ke Kumu.
Aohe i Piha ka Elua Mahina o ka Noho pu ana Oki e no.
I ke ahiahi o ka la 28 o Mei, 1901, ua ike ia kekahi mare hanohano ma ka luakini o Kawaiahao. Ilaila ae na Lunamakaainana, na kanaka hanohano a me na lede hanohano, a ua piha maoli no ka luakini i na kanaka no ka ike ana i ka la hauoli o Jonah Kumalae me kana wahine opio, Miss Lena Akana. Mawaena o na keiki Hawaii opio, o keia paha kekahi o na mare hanohano loa, a ua nui ka mahalo ia. Nui na hoa`loha i olelo ae i ka laki o keia kaikamahine i ka loaa ana iaia o kekahi keiki maikai a he nui no hoi na makamaka i olelo ae i ka laki o Jonah Kumalae i ka loaa ana iaia o kekahi kaikamahine u`i e like me Miss Lena Akana. Ua nana aku na hoa`loha, ka ohana, ame na makamaka ia mua a ike aku ia aohe poino aka he hauoli wale no. Ua maopopo loa e pili ana laua kekahi i kekahi, oiai ua maikai like aka, aole i piha ae nei ka elua mahina, ke ike nei makou ua uhi mai kekahi aouli pouli maluna o keia home hauoli, a i keia wa ke koi nei keia wahine u`i opio e hookaawale ia oia mai keia kanaka mai ana i haawi ai i kona kino, kona aloha ame na mea maikai apau. Keia kanaka hoi ana i manao ai e lilo ana i makua nona no keia mua aku. Owai ka mea i manao mua e hiki mai ana keia hana? Owai ka mea i manao mua e hookaawale ia ana keia pili iloko o na mahina elua? Owai ka mea i manao mua e hanaino ana o Jonah Kumalae i kana wahine e like me kana i hana ai?
Ua puiwa ke kulanakauhale i ka lohe ana i ke noi oki a kana wahine. Kuai koke la na nupepa no ka ike ana i na kumu o keia pilikia, a malaila i ike ia iho ai keia mau kumu:
Kono ai ole ana me kana wahine ame ka ohana;
Ka pepehi ame ka hili ana i kana wahine me ka laa;
Ka hooweliweli e lawe i ke ola o kana wahine me ka pahi;
Ka huki ia ana o ka lauoho o kana wahine me ka peku ana iaia;
Penei ka mea i olelo ia ma kana palapala noi oki:--I kekahi ahiahi ua kali aku oia o ka hoi mai o kana kane a no ka lohi loa o kona hoi ana mai ua noho iho la lakou me kekahi o ka ohana e ai i ko lakou aina ahiahi. I ka hoi ana mai o Jonah Kumalae a ike ia lakou e ai ana, ua nui loa kona huhu a mahope o ke kapa ana aku i kana wahine me kekahi mau inoa pelapela, ua haalele mai la oia i ka hale a hele aku la i waho. Aole oia i hoi mai a hiki i ka hora umi oia po. Ua hana ia keia hana i ka la eha o Iune, hookahi no pule mahope iho o ko laua mare ia ana, ma ko laua home ma ke alanui Moi.
I ka la 11 o keia mahina no, hookahi pule mahope mai o keia hanaino mua ana ua haalele hou no oia i ka papaaina a mahope o ka pau ana o ka ai ana a kana wahine ua kauoha mai la oia e hoi iloko o ko laua lumi moe, a i ke komo ana aku o kana wahine ua pani ia na puka aniani ame ka puka a paa loa. Ia manawa oia i hoomaka mai ai e huhu ino me ka maopopo ole o ke kumu, a pepehi me ka ikaika i kana wahine ma keia pepehi ana ua uliuli ka lime ame ke kua o kanawahine, a ua mau keia uliuli no hookahi pule mahope mai o keia “hana keonimana ole.” Ua hili oia i kana wahine me kekahi pauku laau a nui ka eha i loaa i kana wahine.
I ka la 13 o keia mahina no, hookahi la mahope mai o keia hana ino mua ana i kana wahine, me ka pau ole ae no o keia eha mua, ua ala ae oia mai ko laua wahi moe mai a kii aku i kekahi pahi nui a lawe mai iloko o ko laua lumi moe. Olelo aku oia i kana wahine ua makemake oia e lawe like i ko laua ola. Ua ala koke kana wahine iluna a olelo mai ina oia e hoao ana e hana pela e kahea ana oia i kokua. Ua hoopau o Kumalae i keia manao kaili oia ana a waiho i keia pahi malalo o kona uluna. Aole i moe kana wahine a ao keia po no ka nui loa o kona maka`u.
I ka la 20 o keia mahina hookahi no, mahope o ka hoomaha ana no ewalu la, ua hoomaka hou no o Kumalae i kana hana. Ua hookuke ia aku keia wahine mai ka wahi moe mai, a noho oia i waho, i ke anu a hiki i ka hora ekolu o ka wanaao. I keia hora ua puka mai la o Kumalae a ike ua anuanu kana wahine a i mea paha e mehana ai, ua hoomaka hou oia e pepei iaia me ka huki pu ana i kona lauoho. Nui ka eha i loaa i ke kino opiopio o kana wahine.
Ma ka hoike a keia wahineopio hookahi wale no pule o ko laua noho hauoli ana mahope koke mai no o ko laua mare ia ana, a mahope mai o ia manawa ua pepehi mau la oia, kapa ia aku ma na inoa pelapela, a hoolilo ia ka noho na hauoli ana i manao ai i noho`na i loko o ka maka`u ame ka ehaeha. Ua manao oia aole e pau ana keia mau hana a nolaila ua makemake oia e hookaawale ia mai keia kanaka mai.
Hoike pu mai ka wahine ua hiki aku ka waiwai o Kumalae i ka $23,000 a ua makemake oia e malama ia aku kona ola a hiki i ka manawa e noonoo ia ai keia hihia oki. Ua noi mai oia e haa ia aku iaia i $15.00 i kela ame keia pule. Makemake oia e kaawale loa ia mai keia kanaka mai, a e uku oia i ka lilo o ka loio no keia hihia.
Ua kauoha ia mai o Kumalae e hiki aku imua o Lunakanawai Kaapuni i ka Poakolu nei no ka hoike ana aku ina kumu e uku ole ai oia i keia koi.
O J. T. De Bolt ka loio o keia wahine opio, a ma ka nana aku e ko ana kana koi.
He nui ka minamina ia o keia kaikamahine opio, ame kana kane. O kana kane kekahi o na Lunamakaainana o keia kau Ahaolelo iho nei. He kanaka naauao a hoopono. Aole ona inu, aole no hoi he uhauha i kona ola, a pehea la oia i hoao ai e hana i kana wahine e like me kana i hana ai? Ina la mua no, na la hauoli hoi o ka nohona mare, ua hoomaka e no oia e hoeha aku i ka wahine i haawi mai i kona kino, kona aloha, ame na mea apau a no ka noho pu ana me ka mea ana i manao ai e lilo ana i makua nona ma keia mua aku. Aka, aole i piha na mahina elua, ua makemake koke keia kane, e lawe ae i kona ola ame ke ola makamae o kana wahine. Ua hiki ole ina hoaloha ame ka ohana ke ike i ke kumu nui o keia mau hana.
I ka Poalua o keia pule ua hiki ae o Kumalae me W. C. Achi, kona loio i mua o ka Lunakanawai Gear e hoike i ke kumu e uku ole ai oia i ke koi a kana wahine. Ilaila ae kana wahine me kona kaikaina me ko laua loio. Ua noonoo like na loio a hooholo e uku o Kumalae i umi kala i kela ame keia pule. Ua kauoha koke ia o Kumalae e ka aha e uku i kela ame keia Poalua i keia umi kala i kana wahine, a e uku koke hoi i kanalima kala no ka loio o kana wahine.
Moku Lele i ka Lewa
Lilo ana ka Makana o $19,000 ia Dumont he Palani Naauao
O kekahi o na hana kupanaha e hana ia mai nei oia no ka huli ana a loaa kekahi moku i hiki ke lele i ka lewa a hiki aku i kekahi wahi i makemake ia me ka pololei loa ame ka pilikia ole. Ke noonoo ae kaua e kuu makamaka heluhelu he hana pohihihi maoli no keia e like no nae me ka manao ole o na kanaka i ka wa kahiko e hiki ana i ka mahu ke hooholo i ka moku maluna o ka ili o ke kai pela no keia e hana ia mai nei. Ke manao aku nei kakou aole loa e hiki ana ke hana ia aka i keia manawa ua hana ia kekahi moku ma Palani e Dumont i hiki ke lele pololei me ka pilikia ole. I ka la 12 o keia mahina ma Paris ua ike ia ka pii ana ae o keia moku mai ka Muliwai ae a lele maluna ae o na hale he 200 kapuai a oi ae ke kiekie mai ka honu ae. Ua hookele ia keia moku ma na wahi a pau ana i makemake ai me ka loaa ole o kekahi mau pilikia. Nui na kanaka i ku aku a nana i keia mea kamahao a lakou i manao mua ole ai e hiki ana i ka ike o ke kanaka ke hana. Mahope o kona hooholoholo ana no kekahi manawa ua hoihoi ae oia i kona moku no ka hooponopono hou ana i kekahi mau mea liilii ana i makemake ai. i kekahi la mai ua manao ia e lele hou ana oia me keia moku ana, i hana ia elike me ke ano o ke kika e puhi ia nei, he like loa me kekahi kika puhi nui e lele ana i ka lewa.
I kekahi manawa aku nei i hala ua ha awi ae kekahi haole i makemake nui e ike i ka hana ia a loaa kekahi moku lele i ka lewa he makana o $19,000 i ka mea mua loa e hiki ana ke hana i kekahi moku lele i ka lewa i hiki ke kia ia ma na wahi apau i makemake ia iaia e lele me ka pilikia ole. Ke manao loa ia nei e lilo ana keia makana ia Dumont. I ka hoi ana mai o Dumont mai kana huakai lewa mai ua olelo ae oia, “Ua hiki ia`u ke olelo ae ua lilo ia`u keia makana, oiai ua hiki loa ia`u ke hookele i ko`u moku ma na wahi apau a`u i makemake ai me ka pilikia ole.”
E pau ana ka poluea moku ma keia mua aku. I ka lewa wale no e lele ai a ku ana i Kauai. Mai Kauai ae no ma ka lewa hiki ana i Hawaii. Pau ka loloiahele ia ana e na ale kupikipikio o ka Moana. Pokole ka hana i ka ikehuli o na haole
Ke Alii Kalanianaole.
Kakau mai nei i Dala eli Daimana nana ma Amerika Hema.
E lilo aku ana ke Keiki Alii Cupid Kalanianaole i kanaka eli kaimana ma keia mua koke aku. Ua loaa mai nei kana leka e noi mai ana i kona malama waiwai maanei e hoouna aku i $50,000 no ke kuai ana i kekahi wahi eli kaimana. Ua manao oia e loaa ana iaia ka waiwai ma keia hana a nolaila e hoao ana oia e hana i keia hana. O kekahi keia o na hana nana e hoowaiwai nei i na haole Pelekane ma keia wahi. Ua olelo ia o keia A@erika Hema ka wahi waiwai loa ma keia mea he kaimana.
Ma ka nana aku ua hoohihi loa ke keiki alii Kalanianaole i na aina e a aole paha laua e hoi koke mai ana i ka aina hanau no kekahi manawa loihi e hiki mai ana. He nui na wahi a laua i hele kaahele aku nei, a ua aneane no e puni ka honua ia laua. Nani wale ka ike ana ia mau aina kaulana. Aka, e hele wale no ke kanaka Hawaii a puni ke ao nei aole loa e poina ka nani o kona aina hanau.
HALA IA MAKUAHINE.
Hoi Kinowailua i ka Aina Hanau
Hiipoi mai Kana Kane Aloha i Kona Kino Puanuanu a hiki i ka Home.
He mau pule ae nei i hala ko makou hoike mua ana aku i ka lono i loaa mai ia makou no ka make ana o kekahi o na makuahine i aloha nui ia, Mrs. S. Parker. Ua kamaaina oia ia kakou ma ka inoa o Panana Parker. Ke kali aku nei ka ohana me na hoa`loha lehulehu o ka hiki mai o kona kino, aka, aole i hiki mai i keia manawa. Ua manao wale ia no e hiki mai ana i ka lapule a i ole i kekahi mau la o keia pule ae. He ukana luuluu ka kana kane e hoihoi mai nei.
Mamua o ko laua holo ana aku nei ua ike ia no ke ano nawaliwali o ke ola o Panana a ua manao ia oia no kekahi mea nui nana i kono mai ia laua e hoomaha aku ma na aina anu me ka manaolana oia ka mea e loaa mai ai o ka oluolu. O kekahilohe mai o makou i holo aku nei laua no kekahi wahi ma Kelemania i kaulana i ka maikai no ka poe nawaliwali, aka, i Nu Ioka no ua haalele mai la oia i kana kane e kankau aku nona. Ua kahea ia na kauka akamai loa ma keia kulanakauhale nui aka, ua hiki ole i ka ike o ke kauka ke paa mai i ka uhane a ke Akua i hana ai. Nana no i hana a Nana no i kii mai a lawe aku, e hoomaikai ia Kona inoa.
Picture of Mrs. Samuel P. Parker.
I ka ike ana o Kamuela Parker i kana ukana luuluu ua makemake loa oia e hoihoi koke mai no Hawaii nei a Telegalapa koke mai oia i ka Onamiliona ma Kapalakiko e paa ia ka moku mua loa e holo ana no Honolulu i loaa mai ai iaia me ke kino puanuanu o kana wahine, aka, ua loaa aku la ka pane ua hiki ole iaia ke paa i ka moku mai kona manawa holo maa mau. Na keia mea i houlolohi aku i ka laua huakai. Ua makemake oia e hoihoi mai i keia kino o kana wahine i aloha nui ia a hoihoi loa aku no Mana, Waimea, Hawaii, e moe pu me kekahi o ka laua mau keiki i hala mua aku. Me keia manao paa ke hoihoi mai nei oia i ke kino o kana wahine, a ua hiki loa paha ia makou ke olelo ae eia laua i ka moana i keia hora.
Ua hanau ia o Panana Parker ma Wailuku, Maui, i ka la 19 o Maraki, 1852, nolaila ua piha iaia ke 49 makahiki a oi i kona hanu ana i kona hanu hope loa maka aina malihini. He pua rose mohaha maikai oia i puka mai ka puhaka mai o Kitty Keliikuaai na Richardson.
O Napelakapu-o-Namahana-i-ka-leleonalani kona makuakane. Ma o kona mau makua he pua`lii oia no keia mau alii kaulana. No Hawaii ma o Liloa, no Maui ma o Kihapiilani, no Oahu ma o Kakuhihewa.
Penei ka mookuauhau o kona ohana. Na Napela-o-nanahana-kalele0kalani (k) me Kitty Keliikuaaina Richardson oia. O napela (k) he keiki na Hawailiwaaole (ke) me Waiwalokalani (w). O Hawaiiwaaole he keiki oia na Keluluohine helu ekolu a Kakuihewa (k) Moi o Oahu, o Lonoikamakahiki (k) he keiki oia na Kalaniokaoao (k) me Pueopokii (w).
Mahele o Pueopokii ke kupuna kuali ma o Panana. O Pueopokii (w) he keiki oia na Makakaualii (k) he keiki oia na Kukailani (k) me Kaohuikiokalani (w). O kukaikalani (k) he keiki oia na Keliiokaioa (k) me Makuahineopalaka (w), o Keliiokaloa (k) he keiki oia na Umi (k) me Kapukini (w). O umi (k) he keiki oia na Liloa (k) me Akahiakuleana (w). Ua komo o Panana iloko o ka Papa Alii kiekie o Hawaii oia o Liloa ma o Pueopokii (w) ia, ke kupuna kua lima o Hattie Panana Hianaioli o Kauhanenuiohonokawailani, Kawaiokalani Parker.
Mahele Elima ma o Kaoao (k) ia a Pueopokii (w) ke kupunakane kualima o Panana, o Kaoao (k) he keia oia na Makakuikalani (k) me Ikeakaponoole (w) o Makakuikalani (k) he keiki oia na Kauhiokalani (k) me Kauamanuu (w), o Kauhiokalani (k), he keiki oia na Kiapiilani (k) me Koleamoku (w), o Kihapiilani (k) he keiki oia na Piilani (k) me Laielohelohe (w), o Piilani (k) he keiki oia na Kawaokaohele (k) me Kohipalaoa (w), o Kohipalaoa (w) he keiki oia na Piliwale (k), me Paakanilea (w) na alii o Kukaniloko, Lihue, Oahu, o Kawaokohele (k) he keiki oia na Kahekili (k) me Hauanuihoialawahine (k).
O Kahekili (k), he keiki oia na Kaulaheanuiokamoku (k) i me Kapohauola (w), o Kaulaheanuiokamoku (k) he keiki oia na Kakae (k) ke kaikaina o Kapaalaneo (k) ka Moi nui o Maui na no lakou nei ka pela kapu o Iao, Maui nolaila ua puka mai o Panana maioko mai o ke Ewe o keia kapa kupuna alii.
Mahele Eono ma o ka makuahine o Kanekapolei (w) oia hoi o Umiaeamoku (w) o Umiaeamoku (w) he keiki oia na Kanekuilani (w) me Mahiololi (k), o Kanekukailani (w) he keiki oia na Akahikakanuenoa (w) me i (k), o Akahiakanuenoa (w) he keiki oia na Keliiohiohi (k) me Maauakoko (w), o Keliiohiohi (k) he keiki oia na Akahiilikapu (w) me Kahakumakaliua (k), o Akahiilikapu (w) he keiki na Umi me Makuahualeiakea (w) o Umi (k) he keiki oia na Liloa (k) me Akahiakuleana.
Ua hoohala ia kona mau la kamalii ma Wailuku, malalo o ka malama ana a kona makuakane hookama H. Kuihelani, e hono ana ma o a maanei. He milimili oia na kona mau hoa kamalii no ka maikai o kana mau hana ame ka nui o kona u`i. i kona nui kupono ana ua komo oia i ke kula makuahine o Makawao, a malaila oia i hoonaauao mua ia ai. Mai laila mai ua komo oia i ke kula Kiekie o Punahou a malaila i huikau ai na makau a kalawaia me ke keiki o ka ua Kipuupuu o Waimea, Hon. S. Parker. Ua paa ko laua hoopalau a hiki i ka hooko ia ana o ka iini ma Wailuku e ka makua Alekanekero, iloko o Iulai 1871, ua like me kanakolu makahiki o ko laua noho mare ana. Ua hooko laua i ka olelo hoohiki. O ka mea i hoohui ia e ke Akua, aole e hiki i ka lima o ke kanaka ke hookaawale, o ka make wale no ka mea nana e hookaawale ae.
Ua pili ia e laua i keia mau makahiki kanakolu ma ka aina hanau nei a ma na aina malihini he nui. Ua hele makaikai aku laua ina aina nui o ke ao nei, a e hele ana no, kii ia mai la a kaili ia ae ke ola, ka mea makamae. E like no me ka maemae o kona helehelena pela no ka maemae o kana mau hana. He makuahine aloha i kana mau keiki lehulehu, he makuahine heahea i na makamaka i hele aku ma kona wahi, he makuahine kokua i ka poe iloko o ka nele ana i ike, a he makuahine aloha i ka ohana. E like me ka maikai o kana mau hana pela no e mau ai kona noho ana iloko o ka hoomanao ana o ka poe i ike iaia.
Iloko o na makahiki o ko laua noho mare ana ua loaa ia laua keia mau hua maemae 1.—Mary Kihalaninui Parker. Ua hoohui ia oia ma ka berita maemae o ka mare me Charles Maguire. Ua haalele mai oia i kana kane me ka laua kaikamahine u`i e malama ia nei e ka makuakane o kana kane, John Maguire, ma Huehue, Kona Akau. 2.—Eva Kalanikauleleiaiwi K. Wood. Ke ola nei oia a ke noho nei laua me kana kane ma Kahua, mahope aku o na puu haelehua. 3.—John P. Parker. Ua mare keia keiki i kekahi o na kaikamahine a Kimo Pelekane, a mahope o ka noho hauoli ana me kana wahine ua haalele mai oia iaia me ka laua kaikamahine e kanikau aku nona. 4.—Helen Umiokalani, ua mare ia Carl Widemann. Hookahi a laua keikikane. 5.—Palmer Kuihelani, ua make. 6.—Hattie Kaonohilani, ua make. 7.-Sam Keaoulilani Parker Jr., eia no oia ke ola nei. 8.—Earnest K. Konakaimehalai Parker, eia no ke ola nei. 9.—James Kekooalii Parker, eia no ke ola nei. Ma keia ua hiki ia kakou ke ike ae he eiwa hua maemae i puka mai kona puhaka maemae mai, eha i hala aku ma kela ao, a e hui aku ana me ko lakou makuahine aloha, a he elima e ola nei, e kanikau aku i ko lakou makuahine.
Ma waimea, Hawaii ko laua wahi i noho ai, aka, he hoohala mau no laua i ka hapanui o ko laua manawa ma ko laua home ma ke kaona nei. He punahele oia i na alii o keia au ame na alii hala. No ka nui o ka u`i o kona makuahine ua kapaia oia i keia inoa “Panana,” oiai, wahi aka Moi Kauikeaouli Kamehameha III, ua like kona u`i me ke panana aia maluna ona ka nana mau a ka mea e hookele ana i ka moku E like me ka maamae ame ka u`i nui i haiamu iho maluna ona pela no ka ikaika huki o ka makeneki o kona kino nani i ka maka o na kanaka e leha mau aku aku a ike i kona nani. Ua kaulana oia no ka nui o kona u`i i kona mau la. Aole no i pau kona u`i a hiki wale no i kona haalele ana mai la i keia ola ana. Ke komo pu nei makou me ka ohana i ke kanikau ana aku nona a oia ka makou e puana ae nei i keia mau leo uwe,
Ne-i nakolokolo ka Lani,
Uina ka hekili ma na kukulu o Kahiki
Hamama na ipuka o Kulanihakoi,
Hiolo na omaka Wailani,
He waimaka helelei,
No kuu lei, kuu minamina hoi-a,
Ua hala, ua nalo loa,
Kupouli ke aloha e Kanehoa,
Aohe au i ka hana a ke anu.
Ua hala aku la oia i ke ala aole e hoi hou mai, aka, e mau ana kona hoomanao ia. Ua hoonele ia mai la kakou e like me ka ka baibala i olelo ai ma Ezekiela 24:16.—E ke keiki a ke kanaka ea, ke lawe nei au i ka mea aloha a kou mau maka.
NA KAA OTOMOBILE
Ke Hoomakaukau ia nei e Hoouna hou i Amerika.
E Hiki ana ia Lakou ke Lawelawe ina Hana ke Paa Keia mau Hoolilo
Hoi hou na kaa Otomobile i ko lakou mau wahi i hele mai ai. E hauoli ana ke ike aku i na mea nana lakou i hana mai. Ke hookomo ia nei iloko o na pahu i keia manawa no ka hoihoi hou aku la lakou i na hale nana lakou i hana me ka makemake ia e hoololi hou ia kekahi mau hana.
I ka hiki mua ana mai o keia mau kaa ma Honolulu nei ua nui ka ohohio o na kanaka aka aole i loihi ua ike ia ka hiki ole ia lakou ke hana i ka hana e like me ka maikai o na kaa pio. Ua hiki ole ia lakou ke pii i na piina nunui, ua hiki ole ke holo a mamao loa. No keia mau kumu ame kekahi mau kumu e ae ua nele loa keia mau kaa i ka hana. Ua ike ka hui nana e hoohana nei keia mau kaa e nui loa ana ke pono ina aole e hooponopono koke ia keia mau hemahema nolaila ua hooholo lakou e hoouna i ka luna nui o keia hui e nana pono ina he hiki ke hooponopono ia keia mau hemahema.
I kona hiki ana aku nei ma Amerika ua ike oia he hiki loa ke hooponopono ia keia mau hemahema liilii, no laila ua kauoho mai nei oia e hoouna koke ia aku keia mau kaa. Ke wehewehe ia nei a apanapana liilii a hookomo ia ma na pahu no ka hoouna hou ana ia lakou i ko lakou mau wahi i hele mai ai. Ke hoi hou mai lakou e hiki ana ia lakou ke paio aku me na kaa lio. Ua manao mua ia e poho ana na kaa pio aka i ka ike ia ana o ka maikai pono ole o keia mau kaa ua lanakila no ka lio.
NA KAA UWILA
I kekahi manawa o ka la apopo e hooholo ia ana ke kaa uila mua loa ma Honolulu nei, oia hoi na kaa nunui maoli e like me ko na aina haole. No kekahi manawa loihi e hana ia nei keia mau kaa a akahi no a makaukau kekahi o lakou. Ae hooholo ia ana kekahi mau kaa mai ko lakou hale hana mai a hiki lo i ke kaona no ka hoikeike ana i na kanaka i ka nani o keia mau kaa. He mau kaa `lii maoli no keia ke hookuku ia me na kaa hapaumi pelapela, leop o ka hui kaa hapaumi.
Hauoli loa makou ke ike aku i keia mau kaa e holo ana apau ke kau ana i keia mau kaa hapaumi lohi a ka launa ole. E kali aku a makahiamoe mamua o ka hiki ana mai o kekahi kaa, i ka oni ana aku napoo ka la. He hewa na kaa uila, he imo ana na ka maka hiki ana i kau wahi i makemake ai.
Aole e nele ka nui o na kanaka e nana ana i keia mea hou i ka la apopo Nolaila e na makamaka heluhelu o ka Nupepa Kuokoa ke hoike mua ia aku nei ia oukou ka lohe, a mai pahaohao i ka manawa e ike ai i keia mau kaa nani.
HE MOOLELO KUPANAHA.
Hoike ia ma Kansas, E ke kahi kanaka kakau nupepa
Hoike oia i ka Hiki Ana Iaia Ke hana i Kekahi Mea i Hiki Ole i na kanaka Lehulehu ke Hana.
Ua kamaaina o Jack Williams o ke alanui Delware, helu 401, Kansas City, Mon., ma ke ano he hanu mea hou kaulana no keia wahi. No kekahi mau makahiki loihi kona noho ana iloko o ka ehaeha o ka ma`i a hiki wale no i kona hoao ana i ka Huaale Akala a Kauka Williams, akahi no a loaa iaia ka oluolu a hiki i keia manawa. Penei kana i hoike mai ai:
“No elua makahiki ua loaa ia`u kekahi eha kumu ma ko`u kua, nana i hoehaeha mai mai ia`u i na manawa apau Aole i maopopo ia`u ka laua e ola ai a hiki wale ni ko`u ike ana i kekahi hoo laha e pili ana i ka Huaale Akala a Kauka Williams iloko o na nupepa. Ua hooholo koke wau e hoao a ike i ka hana maikai a keia laau e hana mai ai no`u. Iloko o hookahi pule wale no ua pau loa keia eha a hiki wale no i keia manawa, aole i hiki hou mai, a lawe hou paha wau i kekahi laau okoa ae.”
O ka ma`i kidney oia kekahi ma`i ino loa. He eha i ke kua ka hoomaka ana mai a ino aole e nana pono koke ia e nui loa mai ana a hiki i ka hiki ole ana ia oe ke hana i kau hana a he make no hoi i kekahi manawa. Nolaila he mea pono loa ke loaa e kau koke ia i ka laau.
Ua lawe o Williams i ka laau maikai loa, a loaa iaia ka oluolu iloko o hookahi pule wale no. Aole keia he mau olelo haku aka, he oiai a ua hoohiki ia ia mau olelo imua o Lionel Moise, he notari no ka lehulehu. Oiai he laau hoo maemae keia i ke koko, ua hiki loa iaia ke hoola ina ma`i i hoomaka ia mai ka inoino mai o ke koko, elike me ka eha iloko o ke kua, ka lolo o kekahi lala o ke kino, ka rmatika, eha o ke poo, ame na ma`i kamaaina ina wahine. E loaa no keia laau ma na Hale Kuai laau apu loa, a i ole e kakau pololei mai no ia Dr. Williams Medical Co., Schenectady, N. Y. He 50 keneka ko ka pahu, eono i ka $2.50.
HE KOKUA I KA WA PILIKIA.
I ka wa wela o ka aina e loaa mau ana na keiki liilii i ka ma`i a he mea pono no e kuai koke i ka Laau a Chamberlain, no na ma`i like ole e loaa mai ana. O kekahi keia o na laau maikai loa a he mea pono e malama ia ma na home apau loa i kokua no ka wa pilikia. Aole makou e hoike aku ana i keia i kuai ia ka laau aka he mau olelo kokua keia no ka poe e loohia ana i na pilikia a maopopo ole ka laau e loaa mai ai o ka oluolu. He mea maikai loa e molomo ia keia laau ma na home apau loa i kokua no na pilikia like ole e hiki mai ana. E loaa no keia laau ma ka hale kuai Laau o Benson Smith & Co., na Agena no Honolulu nei.