Ka Nupepa Kuokoa, Volume XXXIX, Number 25, 21 June 1901 — Page 1
This text was transcribed by: | Kau`i Peralto |
This work is dedicated to: | My Tutuwahine-Violet Kaui Kawai Waiau |
Ka Nupepa Kuokoa
KE KILOHANA POOKELA NO KA LAHUI HAWAII.
Hoopukaia na kakahiaka Poalima a pau.
HONOLULU, POALIMA IUNE 21 1901
BUKE XXXIX—Helu 25
KIULE IMI KIPE.
Komo ae ka Lakou Hoike.
Aole i Lawe na Lunamakaaina i ke Kala Kipe
I ka Poakahi o keia pule i wehe ia ae ai a heluhelu ia imua o Lunakanawai Gear ka hoike a ke kiule imi kipe ia o na Lunamakaainana. O kela malalo iho ka hoike:
Ua lilo ka la 13 ame ka la 14 o Mei i ka noonoo i kekahi mau bilo i haawiia mai e ka Loio Kuhina. i ka la 5 ua hoomaka makou e noonoo i ka lawe o na Lunamakaainana i ke kala kipe. Mai ia manawa mai a hiki i keia manawa ko makou huli pono ana i keia mea. Ua kahea ia aku a hiki mai imua o makou ka pe a pau loa i manao ia ua ike i na mea e pili ana i keia hihia. Ua oi aku mamua o ka hookahi haneri poe i ninau ia a o ka lakou mau olelo ike aole i like a ua waiwai ole. Ua lawe mai makou i na lohe ame na mea i kamailio nui ia a huli pono i ka oiaio oia mau mea.
Mawaena o ka poe i ninaninau ia ua hiki mai ke Kiaaina, ka Loio Kuhina, Kakauolelo o ke Teritori, ka Lunanui o na Hana Aupuni, ka Puuku, ka Lunanui o na hana Hoonaaao, ame ke Komikina o na Aina Aupuni.
Hoike mai ke Kiaaina i ka manawa ana i olelo ai i na Lunamakaainana ua lohe oia i ko lakou lawe i ke kala kipe he lohe kona mai ka poe i lohe mai ia hai. Aohe nae he mau mea maopopo loa e hiki ai ke hooia mai ua lawe na Lunamakaainana i ke kala kipe.
Hoike mai ka Loio Kuhina he lohe pepeiao no kona, aka ke huli pono nei oia i ka oiaio o kela mau lohe ona. Aole oia i makemake e hoike mai i ka mea ana i lohe ai o loaa ole i kona wa e huli ai.
Hoike mai ke Kakauolelo o ke Teritori ua lohe oia i ka lawe o na Lunamakainana i ke kala kipe, aka aole i maopopo loa. O ka mea i maopopo iaia ua lulu kekahi poe hale hana o ke kaona nei i kala no ka hooholo ana i kekahi bila a lakou i makemake ai e holo. Aole oia i hoike mai i ka inoa o ka poe i hana i keia hana i kona manawa i ninau ia aku ai.
Hoole mai ka Lunanui o na Hana Aupuni aohe ana mea e hoike mai ai oiai he lohe wale no kona a aohe waiwai. Aole oia i imi pono i kona mau wahi i lohe mai ai i ka pololei ame ka pololei ole o keia mau mea.
Hoike mai ka Puuku ua heluhelu oia ma na nupepa i ke kipe ia o na Lunamakaainana aka aole oia i maopopo i ka oiaio ame ka wahahee. Ua hele oia i ka halawai a na poo aupuni, aka aole i lohe i kekahi mau olelo e pili ana i keia ninau.
Ninau ia ka Makai Nui a hoike mai oia ua lohe oia i ke kamailio ia o keia mea ma ke ano nui, aka aole i loaa iaia kekahi mea e hooia mai ana i ka oiaio o keia mau me ana i lohe ai. i ka la 17 ame ka la 18 o Mei ua loaa mai iaia kek auoha mai ka Loio Kuhina mai e imi pono i ka oiaio o keia ninau. Ua huli aku oia aka aole he mea i loaa mai.
E like me ka mea i hoike ia ma na nupepa ua hoike ae o Coerper i ka lawe ana mai ona i kana bila a noi aku i na Lunamakaainana e kokua a ua ninau mai lakou: “Heaha kahi pomaikai e loaa mai ana?” Ua ninau ia keia poe Lunamakaainana a ua hoole like mai lakou i ka oiaio o keia mau olelo. Ua hoike pu mai o Coerper ua uku oia i kekahi poe e lawelawe nei i ka hana ma keia ahaolelo e kokua mai iaia i kana bila. i ke noi ana ia aku e hoike mai i kona inoa ua hoole loa mai oia aole e hoike mai.
Ua hoao makou e huli ma na wahi a pau a makou i manao ai e loaa mai ana ka oiaio aka aole i loaa mai. Ua huli makou i na bila a pau e hiki ai ke manao ia aku e kipe ia na lunamakaainana aka aole i loaa hookahi.
KA BILA WAIONA.
Ua loaa mai ka hoike maikai ua lulu kekahi o na halekuai waiona o keia kulanakauhale i kala e hoolimalima aku ai i kekahi poe e imi pono i ke ku i ke kanawai o keia bila ame na mea e ae a lakou i makemake ai e ike, aka aole i hoike ia mai ua kipe ia na Lunamakaainana me keia kala. No na mea e pili ana i ke $65000 a Kauka Russell i olelo ai aohe he wahi io iloko o ia olelo.
AI AI WALE.
No na mea e pili ana i ka ai ai wale a na Lunamakaainana i uku ia e Pamawaho me Mokimana @ huli pono makou a ua ike ua uku ia no keia mai kekahi haawina kala a lakou i lulu mua ai mamua o ka noho ana o ka Ahaolelo a aole mai ke kala kipe mai. Ua olelo ae kekahi Lunamakaainana ua ai no oia i ke kala ana i lulu ai a aole i ke kala kipe.
KA LUMI O NA ALIIKOA.
He nui na mea i olelo ia no ka hooinu wale ia o na Lunamakaainana ma ka lumi o na aliikoa me ke ano kipe. Ma ka ninau ana ua ike ia aole o na Lunamakaainana wale no ka mea i kono ia aka o na kanaka kakau nupepa kekahi. ua ae ia lakou e komo i keia mau lumi a kuai i ka lama i malama ia malaila ma ka omole. Ua haawi ia i wahi e malama ai i kou mea inu a ae ia e hoounauna i na kaua hana o keia wahi. O keia wale iho la no ka manao o keia hana a aole he mea e hoia mai ana ua lawe lakou i ke kala kipe a ua hooinu ia me ka manao kipe.
KAAWALE NA HOA’LOHA PILIPAA.
(PICTURE)
NA MOKUAHI
Ua nina uia na mokuahi no ka haawi ana i na kikiki holowale i na Lunamakaainana@ a ua olelo mai laua he mea maa mau ia aole ma nei wale aka ma na aina e no kekahi. Hookahi o keia mau hui moku e loaa nei he eha haneri dala o ka mahina mai ke aupuni mai. Aole he mea e hooia mai ana ua haawi ia ma ke ano kipe. He makana wale no keia a he mea maa mau mai mnua mai a hiki i keia manawa.
KA OLELO IKE A PEARSON.
Ua nana pono ia ka pololei o ka olelo ike a Pearson a ua ae mai o Turk ame Lewis ua hele io no laua ilaila e noi ai iaia e hoao a loaa keia wahi ia Turk aka ma kekahi mau mea ua hoole loa laua i ka oiio. Ua ninau ia ka manao o ka Loia Kuhina e pili ana i keia a ua olelo mai oia aole no e hiki ke hoopii ia ina no he pololei na mea a pau i olelo ia maloko o keia olelo ike i hoike ia.
Nolaila o na olelo e olelo ia nei no ka lawe o na Lunamakaainana i ke kala kipe aohe he pololei aka he mau olelo hoopunipuni wale no. O ka hapanui o ka poe i kamailio ua kamailio i ka lakou mea i lohe ai mai ka nupepa mai ame na mea i olelo ia ma na alanui o keia kaona.
Kakauinoa ia e na lala o keia kiule ame J. O. Carter ka Lunahoomalu.
NA HEIHEI LIO.
He Ekolu La i Keia Makahiki.
Nui na Lio Maikai i Lawe ia Mai.
Maikai na Heihei.
He ekolu la heihei lio i keia makahiki. Ua hoike mua aku makou i na heihei o ka la 11 a koe na heihei o ka la 14 ame ka la 15. Aole i like ka nui o na kanaka i hele ae i keia mau la e like me ko ka la 11, aka ua like no ke ohohia me ka hoihoi ke ike aku e oi ana ka lakou lio i manao nui ai. E like me ka mea maa mau he nui na poe i pili mahope o ka lakou mau lio i manao nui ai. E like me ka mea maa mau he nui na poe i pili mahope o ka lakou mau lio i manao ai oia ka oi. Nui ka poe i hoi hauoli mai a nui no hoi ka poe i hoi kukule mai. Mawaena o na lio holo loa o ka Poalima o ka pule i hala ua ike ia aku o Venus kekahi wahi lio makemake loa ia. i ka la 11 aole i ike ia kona holo, aka i keia la ua hoike mai oia i ka poe i hele aku e nana ua hiki iaia ke hana lealea mai i kekahi o keia mau lio holo loa, a he mea hoi e hoopuiwa mai ana i ka poe i pili mahopeo na lio holo o ka la 11.
Mawaena o na lilo holo loa ma ka holo kaa ua ike ia aku na lio o Quinn. Aole holo hou o Waldo J., kela lio like me ke kaa mahu aka o kahi kaa mahu uuku o Wayboy ka mea nana i ahai ka lanakila. I na hoomaka ana a pau loa e haule mau ana oia mahope, aka ke hoi mai i ka phuhopu ua ike ia aku oia i ka nee maila mai a hiki i ka haalele ia ana o kekahi poe lio mahope. Nui ka mahalo ia o keia wahi lio e na kanaka a e paipai mau ia ana oia me kona kalaiwa i kona wa e hoi mai ai mai ka heihei mai.
NA HEIHEI O KA LA 14.
O ka lio o Kealia ka mea nana i lawe ka heihei mua. i ka hoomaka ana ua haule loa ua Amethyst nei i hope aka i ka loaa pono ana mai o ka holo he manawa pokole ua loaa mai na lio o mua a hiki i ka oi ana. Aole oia i loaa hou a hiki i ka pahu hopu. He 51 kekona i holo ai mai ai ka hapa mile.
He heihei kaa ka heihei elua a ua haawi ia keia heihei ia Edna G me ka hoopaapaa ia no nae. He 2:251/2 ka manawa o keia heihei a he laki wale no ka lilo ana. Ina no i lohi iki mai hookahi kekona me nei ua lilo i ka lio okoa no ka mea ua like no ko lakou pii ana mai.
Heihei ekolu. O Virgie A ka lio punahele i keia heihei aka ua lilo i mea ole i na lio o Billy Konawela. i ka hookamak ana no ua lilo ke alakai ia Venus. Ua paa oia i keia wahi a hiki wale no i ka pahu hopu. O Gatalina mai ka helu elua ao Virgie A ka helu ekolu. O Venus kekahi wahi lio maikai loa. I ka Poalua, la 11 o Iune, aole ike ia kona mama holo a nolaila ua nui ole ka poe pili mahope ona. 1:02 1/2 Eono-hapawalu mile.
Heihei eha. Lilo keia heihei ia Aggravation (Huhu). He lio holo keia a o Kenelala Kronje ka helu elua. 1:45 ¾ Ho`okahi mile.
Heihei elima. O ka lio o ke Keikialii o Wood ka lio holo, aka ua hiki ole i ke Keikialii ke kalaiwa pono a haule keia lio holo i ka lio o Chris. Holt. O Waita-Little (E Kali-iki) ka inoa o keia lio holo. He nui ka poe i pili mahope o ka lio o ke Keikialii i keia heihei.
Heihei eono. Ua lilo keia heihei ia Weller, ka lio holo lo o ke Keikialii. Aole i haule iki keia lio i na heihei a pau loa ana i komo ai, aka ua lwe mau aku i ka lanakila. He 2:39 ka manawa holo. Ua haule ino o Lady Amanda.
NA HEIHEI O KA POAONO.
Heihei ekahi. Ua manao loa ia e lilo ana keia heihei ia Dixie Lana, aka ua kaili ia ae e Watossa. i ka hoomaka ana no ua oili mai la ua Watossa nei a aole i loaa hou a hiki wale no i ka pahu hopu. He heihei lele pa keia. Hookahi mile a oi iki ka wahi i holo ia iloko o 2:01 1/@
Heihei elua. Eono hapawalu mile. i ka hoomaka ana ua lilo ia Molly Conners ke alakai aka i ke kokoke ana i ka pahu hopu ua pii mai o Virgie A ame Racery. Haule o Molly Conners a lilo ia Virgie A ka helu ekahi a ia Racery ka helu elua. 1:16 1/2 ka manawa.
Heihei ekolu. Ua lilo keia heihei ia Wayboy me ka maalahi loa. Aohe wahi kokoe mai o kekahi mau lio i keia lio. i ka hoomaka ana ua oi ino loa kekahi mau lio i keia lio aka manawa pokole i kii ia aku ai ua lilo ka hanohano o ka la.
Heihei eha. Hookahi mile. Ua lilo ia Amarino me ka maikai. He wahi lio keia i kaulana i ka holo no kekahi mau makahiki loihi e noke ia nei, eia no nae oia mau no i ke alo pali. 1:47 ka manawa.
Heihei elima. Lilo no ia Weller. Ua hoao mai kekahi mau lio e uhai, aka aole i loaa mai kona holo. Ua kaili ae ua Weller nei me ka hiehie nui. 2:11 ½.
Heihei eono. Heihei keia o na lio liilii. Ua lilo ia Eileen. Ua holo no keia poe lio liilii i holo mai ai. He pomuku ka huelo o ka hapa nui o keia mau lio.
i hilo ana ka heihei o ka la eha o Iulai. E lawe ia aku ana kekahi o keia oe lio e hooheihei ma keia wahi. I na me keia ka maikai o na heihei i keia makahiki ae e nui ana ke ohohia ia e na kanaka i maa i ka hele e nana i na lio holo o ka aina. O ka mea maikai ole wale no o ka lohi loa o ka puka ana mai o na lio. Moloa na kanaka i ke kali a loihi loa mamua o ka puka ana mai. Pau ia kali hou aku o ka holo mai he manawa loihi okoa ia e mili mai ai mamua o ka holo ana.
HOME O NA KAIKAMAHINE.
He mea@i Makemakeia.
Kupono e kokua kakou i keia Hana Maikai.
Eia ma keia kulanakauhale he nui o na kaikamahine e hele auwana ana. Kekahi o lakou ua make na makua a aohe nana pono ia e ka ohana, nolaila ua hele aku lakou ma o a maanei a hiki i ka lilo ana i ka lealea kupono ole i na kaikamahine maikai. Hui aku lakou me na wahine inu suaipa a hookahi ka inu pu ana a mai laila aku hele loa aku a hiki i ka lilo ana o ke kino maikai a ka makua i malama ai i mea ole. Kekahi o keia mau kaikamahine ua lalau aku mamuli o ka ike aku i na hana ana makua. Hele ka makuakane i ka ono hele pu no me ka makuahine a koe iho na keiki e noho hookahi ana i ka hale. Pela aku a hiki mai i ka manawa e hiki mai ai o na hoowalewale ua lilo pu aku na keiki i ka lealea. i kekahi manawa ua lawe mai na makua i ka lakou mau mea inu me na hoaloha inu o lakou a hoike aku imua o ka lakou mau keiki i keia hana. kekahi o lakou ua hooinu maoli aku no i ka lakou mau keiki i hookahi ka lealea pu ana wahi a lakou. Pehea e maikai ai keia mau keiki? Aole o keia wale no aka i kekahi manawa ike keia mau kaikamahine i ka nele a hoao lakou i lawe mai i ka mea a hai. He aihue ia a ina e lawe ia aku imua o ka aha i hea oia e hoopaa ia ai? Aole i hiki ke lawe aku oia a hoopaa ma Keoneula me na keikikane a he hookahi wale no wahi a Kawa. Aka aole ia he hana kupono ka hoopaa ana aku i keia kaikamahine opiopio me keia poe i hana i na kaiaima inoino. Ina paha e loaa ana kekahi wahi kaikamahine haalele mau i ke kula a makemake ia oia e hoopai e hoopaa pu ia ana no oia me keia poe i hana i na hana ino. No na keikikane ua loaa ko lakou wahi e a`o ia mai ai me ka hui ole me keia poe ma Kawa, ua loaa ko lakou wahi e a`o ia mai ai e hookanaka ia lakou iho.
Ma na aina nui ua kukulu ia kekahi mau hale no ka malama ana i na keiki. I ka manawa e ike ia ai o kekahi mau makua aole i malama pono i ka laua mau keiki ua lawe ia aku keia mau keiki mai ia laua aku a malama ia ma keia wahi. Malaila lakou e hoonaauao ia ai a hiki i ko lakou nui ana a imi i ka hana e pono ai o keia oia ana. A`o ia lakou i na hana e pono ai. A`o ia i ka noho`na maikai. i ko lakou nui ana ae ua lilo lakou i mau makuahine maikai. Lilo lakou i mau makuahine hana aa`o aku hoi i ka lakou mau keiki e nono me ka hoopono. He hana maikai keia. i ka manawa e ike ia ai o kekahi kaikamahine e haalele mau ana i ke kula, ka wahi nana oia e a`o mai i na mea e pono ai kii koke ia oia a hoopaa ia ma keia kula a malaila oia e a`o ia ai i na hana maikai. Hiki hou ole iaia ke holo a hiki i kona ike ana i ka waiwai oia mea he naauao. He nui na kanaka e noho nei ma Hawaii nei i keia manawa ua nui loa ko lakou minamina no keia hana hupo a lakou e imi i ka naauao aka ua hala ka manawa holo o ka noonoo ana.
Ke hoao ia nei e kukulu kekahi home no na kaikamahine ma Honolulu nei no ka hoopakele ana mai i na kaikamahine i malama maikai ia, a i hookuu wale ia ma o a maanei. O ka makemake nui o na kanaka nana e hana nei keia hana ola no ka hoopakele ana mai ia lakou mai na poino mai o keia ola ana. Ua koho ia o Mrs. Nakuina i peresidena no ka manawa no keia poi maikai e hoao nei e hana i keia hana i makemake nui ia.
He home keia aole no na haole a aaole no hoi no na Hawaii wale no, aka no na kaikamahine o na lahui like ole a pau loa e ike ia aku ana ua kupono e malama ia. Oiai o kakou Hawaii no ka nui loa ma keia mau pae moku o kakou ana no ka mea e loaa mai ana o na pomaikai nui mai keia hana mai a nolaila he mea kupono e kokua i keia hana.
Aia no kekahi mau laau maikai i pono e malama mau ia maloko o na home. Mawaena o keia mau laa, e like me ka makou i ike mai kinohi mai, he mea kupono e malama ia ka laau Pain-killer. Ua kupono keia laau no ka pilikia mawaho o ke kino ame na pilikia maloko. Oi loa aku kona maikai no ka hoopau anu, Rumakika, na moku ame na eha like ole.—Christian Era. E nana pono i na laau okoa ae. He hookahi no Pain-killer pololei oia hoi ka laau a Perry Davis. He 25 kekona a ka pahu liilii a he 50 keneka o ka mea nunui.
Iloko o ka makahiki 1900 he @,000 Kelamania i lawe i ko lakou ola iho. O ka pilikia ame kekahi mau poino e ae ke kumu nui o keia hana.
Ke nana mai nei na aupuni nui o Europa i ka pii ino o Amerika ma na hana a pau e holomua ai ka aina.
O KAMEHAMEHA NO KA OI
Lilo ia Lakou ka Hae o ka Lanakila.
Kukule na Keiki Kinipopo o Punahou. Pau ka Uaua ana a Hoi aku me ka kaumaha.
Ma ke kahua kinipopo o na Kamehameha i ka Poaono o ka pule i hala i hoike akuai na moopuna a ka Na`i Aupuni ia Punahou ua makehewa ka hoonana ana mai ma ia mea he kinipopo me lakou. Ua kaulana keia kula i ka ike kinipopo, aka ke makemake nui nei o Punahou e kaili ae la hanohano mai ia lakou mai. Ua paio aku o Punahou me kahi ike kinipopo i loaa ia lakou a hiki i ka like ana o na hui elua. Ua loaa ia Kamehameha he elua lanakila ana a ua loaa nohoi ia Punahou he elua. i ko lakou ike ana ua like lakou ua hooikaika nui loa nakeiki o Punahou e lawe ae i ka hanohano.
Mai ke komo mua ana a hiki wale no i ka lima o na komo ana ua hoonele ia mai o Kamehameha i na aipuni. He hua kaka wale no ka mea i loaa ia lakou a hiki i ka pau ana o ka lima o na komo ana. Ua loaa aku ia Punahou he elima puni i ka hiki ana i keia kome ana. Ua pau ae la ka manaolana o na hoaloha o Kamehameha aka o ka mea piki loa, me keia nele no o lakou a hiki wale no i keia manawa aole loa i ike ia aku lakou e haawi pio mai ana a paani inoino mai, aka ua hooi loa ia ae ko lakou makaala ame ka hooikaika nui e loaa ia lakou kekahi mau aipuni. i ke ono o na komo ana ua loaa ia lakou he elua puni a loaa hou ia Punahou he hookahi puni. I ka hiku o na komo ana ua loaa hou ia Kamehameha he ekolu a he hua kaka ka mea i loaa ia Punahou. i ka walu o na komo ana loaa hou ia Kamehameha he ekolu puni a loaa ia Punahou he hookahi. i ka iwa o na komo ana o Punahou ke komo mua a loaa ia lakou he elua puni. Hui ia na aipuni i loaa ia lakou ua hiki aku i ka eiwa. Hui ia na aipuni i loaa ia Kamehameha a hiki i ka paua ana o ka walu o na komo ana he ewalu. Nolailai ina e loaa ana ia Kamehameha he hookahi puni e kai ana laua. Ina hoi e loaa ana he elua puni o ka lilo no ia o ka hanohano ioa lakou. Ua ike iho la ua mau hanauna nei a ka Na`i Aupuni o ka manawa keia e kuupau ai o ka ike i loaa ka lanakila. i ke komo ana o ke keiki mua e hili i ka popo ua hili ia mak a wahi e loaa ole ai a pakele oia. i ke komo ana mai o ka elua o na keiki hookahi no hili ana lele ka popo i kahi e loa. Holo oia a puni me ka loaa ole o ka popo a o ka pau ae la no ia, pio ka oe ahi, pau ka oe hana. He umi aipuni i loaa ia Kamehameha me ko lakou lilo ole a ina i hoomau ia aku ka paani ana me nei ua oi ino loa aku, no ka mea ua pii ka wela o ua mau keiki nei.
Ua hoi kukule aku o Punahou no ko lakou home hoonaauao a noho iho no o Kamehameha e hauoli i kolakou lanakila ana.
NA MAKAHIKI i LILO AI KA LANAKILA.
1897—Kamehameha.
1898—Punahou.
1899—Kamehameha.
1900—Kamehameha.
1901—Kamehameha.
Iloko o elima makahiki he hookahi wale no lilo ana ia Punahou a ia makahiki i lilo ai ia lakou he kamalii liilii wale no ka hapanui o Kamehameha ia manawa. i keia makahiki ua loaa aku ia Punahou he elua lanakila ana aole nae me ka maalahi maikai e like me ka Kamehameha lawe ana i ka hanohano. i ka lilo nua ana ia Punahou o ka lanakila i keia makahiki he paani ia i hoopaapaa ia a ua haawi ia aku ia paani ana na lakou me ka pau ole o ka paani ana. i ka lua o ko lakou lanakila ana ua eha he elua o kekahi o na keiki akamai loa o Kamehameha ia la a he poe hou wale no ka mea i hookomo ia aku ma ko laua wahi. Nolaila ua hiki pono ole ia Punahou ke kaena ae no ia mau lanakila maikai ole.
i keia paani hope loa ana iho la ua eha o D. Harbottle, ka pahu elua o Kamehameha, a kekahi hoi o na keiki ike loa o keia hui i ke kinipopo. Aka me ia eha no ona ua kaili ia ae no ka hanohano a lilo ma ko lakou mau poho lima.
Kula o Kamehameha.
i ka po Poanono, hora 8 p. m., e malama ia ai na hana hoike ma ke Kula Kaikamahine o Kamehameha. Oia ka la 22 o keia mahina. i ka po Poalua, Iune 25, i keia hora hookahi no e malama ia ai ka hana o ka papa e puka ana o keia kula hookahi no. E malama ia ana ka hoike o ka papa e puka mai ana o Kamehameha i keia makahiki o ke kula keikikane i ka po Poaha, Iune 27, i ka hora 8 p.m.
He hana maikai ka ka Keena o na Hana Aupuni e hana nei ma ka hoomaemae ana i ke Alanui Papu. O kekahi keia o ka wahi alanui apuupuu loa o keia kulana kauhale i keia mau @a.
Ua ike ia aku ka welo mai o ka hae ma na hale hana ame na home i ka Poalima o ka pule i hala, ka la i olelo ia he la kau hae. O na moku kekahi i ohu i na hae like ole.