Ka Nupepa Kuokoa, Volume XXXIX, Number 17, 26 April 1901 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

Hoopukaia na kakahiaka Poalima a pau.

 

BUKE XXXIX - HELU 17.

HONOLULU , POALIMA APERILA 26, 1901.

NA HELU APAU 2856

 

Halawai Makaaina.

Haiolelo ka Elele Wilikoki.

NA OLELO A KALAUIKALANI. HUHU O ELUENE BUKI.

OLELO HOOHOLO A BOYD.

KA PUA.

  Mahope koke iho o ka hora 7:30 o ka po Poakahi nei ua hoomaka ka halawai nui a na Makaainana mawaho o ka Hale Paikau.  He nui na kane a me na wahine i akoakoa ae a ua aneane no paha e piha ka ekolu haneri ko lakou nui. a ua oi aku no paha.  O Kalauokalani ka haiolelo mua.  Ua kahea ae oia la Pua a me Boyd a oiai aole e wehe i ka hawai.  Penei kekahi o kana mau olelo:

  "E na Lede a me na Keonimana, Aloha oukou.  Ua kahea ia aku nei oukou e hele mai e noonoo pu me makou ni kekahi mau hana ano nui mamua o kakou a no ka lohe ana hoi i na olelo a ko kakou Elele i hele aku nei i Amerika.

  "Ke hoao nei makou e hana i na mea a makou i olelo aku ai ia oukou, ka lahui.  Ke hoao nei makou e hoopau i na auhau kino o oukou, ke hoao nei makou e hoopau i ke kanawai O no ka mea ua manao makou ke O ia nei kakou i na palahehe o ka ma'i Lepera a ola kekahi kumu laha nui o keia ma'i ma Hawaii nei.  Ke hoao nei makou e hoemi i ka auhau o na lilo wahine i ka hookahi dala.  Ke makemake nei no hoi makou e holo ka bila Kalana (County Bill) i lilo mai ai na hooponopono au puni iloko o ko kakou mau lima.  Ua hoao aku au e hooholo i ka Eha Hooponopono kuai Waiona (Dispensary Bill) a'u i manao ai e pomaikai ka lahui Ae la kakou e puhi i na waiona mai ka Ipuaia, Manako. a me na hua mea ai e ae i loaa ke kulu.  Kuai i na omole a hoi pololei i ka hale. a aole hoi e noho maloko o na hale inu lama e uhauha wale ai a noho mai ka ohana iloko o ka nele.  Aka, ua nana aku ka maka o kuu mau hou i ka mea poepoe a ua haule la bila.  Ke hoao nei makou e hooholo i ka Bila Pauahi i uku la aku ai na poho o ka poe i hoopoino ia ma keia mea.  Ke hoao nei makou e like me ka mea hiki ia makou aka, ua haiki ka manawa.  Ua hana makou i ka hana a oukou, ka lahui, i makemake ai.  Ua Vito mai ke Kiaaina i ka bila kanawai O a me ka bila auhau ilio. Ua hooholo hou makou i ke kanawai ilio, a koe ke kanawai O, aole i loaa ia makou ka elua hapakolu e like me ka makemake o ke kanawai.  Ua kupaa na Repupalika eono ma ka aoao e kakoo ana i ke Kiaaina a ua kupaa no hoi na Home Rula eiwa ma ka aoao e kue ana i kana Vito.  Ina i huli mai o Kale Aki me makou me nei ua holo aka ua kupaa aku no oia me na Repupalika."

  Hoolauna ia mai o S.K. Pua. hope Kakauolelo o ka Hale e Senatoa Kalauokalani. Penei kekahi o ka Pua mau olelo:

  Mamua a ko'u haiolelo ana aku e haawi mua aku ana au i ko'u aloha ia oukou e na Lede a me na Keonimana. aloha oukou.

  "Ke aneane mai nei e pau na la hana o ka Ahaolelo. a ke makemake hui ia nei e holo ka bila Kalana.  He bila kela e haawi mai ana i ka mana iloko o ka poho o ka lima o ka lehulehu.  Na kakou ponoi no e koho na makai nui, na makai a me ka luna aupuni.  Nana pono ia na hana aupuni.  Maikai na alanui o kakou.  a aole hoi e like me keia manawa o kakou ka noho iloko o ka lepo a me ka pohopoho a o ke alanui o ka poe waiwai ke hana ia a maikai.  He mea keia na kakou e ike maka nei.  Makemake kakou e hana ia ka hana kaulike a aole hoi ka haawi ia o na pomaikai i ka poe waiwai a nele kakou.

  Ke ae wale nei na Lunamakaainana o ka aoao Home Rula e alakai hewa ia e na Repupalika.  Aole o lakou hooholo i na kanawai e pomaikai ai ka lahui He mea pono e noi aku kakou e hooholo ia keia bila Kalana kekahi o na bila ano nui loa Imua o kakou."

  Hoolauna mai o Kalauokalani ia Boyd.  ua haiolelo mua mai oia ma ka olelo Beretania. e wehewehe mai ana i ke ano o ke Aupuni Amerika. he Aupuni kaulike. he aupuni i kukulu ia e na makaainana, a no na makaainana.  O na pomaikai i hoomoakaka ia ma ka bila Kalana he mau mea ia i hana ia ma Amerika. e haawi ana i ka mana i na kanaka.  Makemake nui makou e holo keia bila kanawai a nolaila ua lawe mai nei au he olelo hooholo, na kakou e hooholo i keia po, e noi ana i na Senatoa e hooholo koke ia keia bila i loaa ai ka pono kaulike i ka lehulehu Ua heluhelu mai oia i ka olelo hooholo ma ka olelo Beretania a me ka olelo Hawaii.  Ninau ia i na ua ae ke anaina e lawe ia aku keia olelo hooholo e na komite imua o Hon Kaiue. ka Peresidena o ka Senate i ka hora 10 i ka Poaha e haawi i ko lakou ae ma ka hipahipa huro ana.  Ua haawi ia he huro nui. a e lawe ia aku ana keia olelo hooholo imua o na Senatoa."

  Hoolauna ia mai o Eluene Buki, ka mahele olelo o ka Aha Senate.  Penei kekahi o kana mau olelo:  "E o'u mau hoa makaainana Amerika, aloha oukou."

  "E noho oe ilalo he muhee oe, he moo o-e, Kill the Snake." wahi a kekahi leo mai ke anaina mai.

  Na keia mau olelo i hoopii ae i ko Eluene Buki inaina a ua kapa aku oia iaia he Repupalika, he palu kuha, he ai pilau. he hoohe wale, a pela aku.  Ina oia he Keonimana e hele mai a luna o ka wahi ana o ku aua a kamailio pu he alo a he alo.

  Ua kahea mai kekahi mea ia Kalauokalani o hoonoho ia Buki Hale oiai aole lakou i hele mai a hoolohe i na olelo ino.  Na kela mea i hoopii hou ae i kona huhu a hoomaka hou e nuku. a i nuku wale ia no a hikii ka noho ana ilalo.  Ua nuku aku oia i na Senatoa no ka ae wale e alakai hewa ia e na Repupalika ano ko lakou kakoo ole ia Kalauokalani, ka mea e hooikaika nui nei no ka pono o ka lehulehu.  Olelo mai oia aole i hiki i kekahi kanaka ke olelo ae ua oi kona aloha aina mamua ona, no ka mea oia ka mea i ike i ka ehaeha no ka pono o ka lahui. oia ka mea i hoopaa ia ma Kawa, a moe i ka papahele huihui, a pela wale aku.

  I keia manawa i hoolauna ia mai ai ke Elele Wilikoki, me na hulo ana he ekolu.  Ku mai oia me kela ano kulana maalea no ona, a penei kekahi o kana mau olelo:

  "Na Lede a me na Keonimana, aloha oukou.

  Makemake au e hoike au ia oukou i ke ohohia nui ia o ko oukou Elele ma Wahinetona.  Ua koho oukou iaia a ua lanakila iloko o na kue he nui a ka enemi.  Aole i lawa ka manao huhu ona enemi ma Hawaii nei aka ua holo aku kekahi o lakou ma Amerika no ka hoao ana e hoonele i ko oukou Elele ina pomaikai malaila, aka ua lanakila mau kakou.  Ua ikeia mai ola e na aoao Kalaiaina nui o Amerika.

  He kue ole ka kana ana o ka hana a na Lunamakaainana o Amerika.  Ua pau no ka nunui o na leo, a me na hoopaapaa i ka wa koho balota.  A i ka manawa e kaa ai o ka lanakila i kekahi aoao wehe kekahi aoao i ka papale a kunou aku.

  "Ua hoi mai au a hoololi i ka inoa o ka Home Rula, i ka Repupalika Home Rula.  Ua hui pu au me na Demokarata a ninau i ko lakou manao.  Olelo mai lakou e hui aku me na Repupalika oiai aia la lakou ka mana lawelawe aupuni i keia manawa, a ua hiki ole ia kakou ke kokua aku ia lakou oiai aole kakou i ae ia e koho balota no ka Peresidena o Amerika.  Ua hui au me na Repupalika a ua a'o mai lakou ia'u e hana e like me ka mea i hana ia.  Ua hui aku kakou me na Repupalika o Amerika a aole me na Repupalika hamopuna o Hawaii nei.  He mau Repupalika a me na Demokarata hamopuna wale no keia.  Aole i hiki aku ko lakou wahi ike mawaho aku o na poe ulehole. 

  "He aupuni kaulike o Amerika Nui ko

(Enana ma ka aoao 5.)

 

He Lawe Ola Weliweli.

Make o Muli Kanehoa i ka Pahi a ke Paniolo.

  Ma ka Poaha o ka pule i hala i hou ae ai o Beni McShane ia Muli Kanehoa i ka pahi.  Ua hana ia Keia hana i ka hora elua o ka auina la a i ka hora eono oia ahiahi ua kii ia mai e lawe ia aku ka hanu ola o Kanehoa.

  He Paniolo keia McShane. a ke nana aku i kona ano a me kana mau olelo aole hiki ia oe ke ike pehea la oia i hoao ai e lawelawe i keia hana puuwai eleele.  He oluolu kana mau kamailio ana a he oluolu pu no hoi me kona helehelena ke nana aku, eia ka o na muliwai lana malie oia na muliwai hohonu loa.

  O ke kumu o keia hou-pahi oia no keia.  Aole he hele o keia paniolo i ka hana.  he kakaikahi loa kona wa hele i ka hana.  Na kana wahine a me keia Kanehoa e imi ko lakou ola.  E hoouluhua mau ana keia paniolo i kana wahine i dala nana, a i ka manawa e loaa ai iaia keia dala i ke kiko-hua a me na mea waiwai ole.  Aole makemake o ka wahine e hoolilo wale ia kana dala i imi ai me kona kino wahine no keia mau mea waiwai ole. oiai o ko lakou wahi ole no ia.  Makemake ola e lilo i ka ai me ka i'a a me na mea e pono ai keia noho ana.  Kamailio mau oia i keia wahi paniolo, aka i ka wa no e loaa ai o ke dala ua pau aku la no i ke kiko-hua, a me na mea waiwai ole.  Nolaila, ua hooholo kana wahine e hoonele iaia a me kona mau makemake waiwai ole.  I ke kakahiaka Poaha ua hele ua wahi paniolo nei i ke kaona a hoi mai ua ano kahiohio. Komo aku oia iloko a e noho ana kana wahine.  Noi aku oia i dala. hoole mai kana wahine.  Nui kona huhu a hoomaka oia e aumeume me kana wahine.

  Ua hihia ka wawae o kana wahine i kekahi mea a hina oia i lalo, mawaena o ka moe me ka pahu.  I kona hina ana, ua lohe mai kona kaikunane a makuakane no hoi, oiai na keia kaikunane: malama keia wahine a hiki i kona mare ana i keia wahi paniolo hou-pahi.  Holo wikiwiki mai oia iluna a lele aku nei e uao i kela haunaele.  Nui loa ka inaina o keia paniolo no kona hele mai e ku mawaena o laua a huki koke oia i kana pahi a hou aku me ke aloha ole ma na helehelena o Kanehoa.  He eha paha puka, a ma ke kahi o keia mau puka na moku pu kekahi aakoko ma ka a'i a oia ke mea nana i lawe koke i kona ola.  Hele a wai ke koko a hoao oia e holo i ka hale o na makamaka e noho kokoke mai ana a komo oia i loko haule iluna o ka papahele a moe malie.  I ka wa a keia paniolo i huki ae ai i kana pahi ua kahea mai la o Polly kona kaikuahine e nana pono he pahi ka Beni, aka mamua o ka loaa ana o ka wa e hookaawale ai iaia iho ua loaa mai oia i na hauna pahi weliweli a ke aloha ole, a eia oia ke ku nei imua o ka Mea Mana Loa e hoike ana i na Kalaima weliweli o keia ao.

  Ua holo mai na makamaka kokoke a ike i kea mea weliweli.  Ua holo hou aku kekahi o lakou no ko lakou mau home me ka maka'u.  Na kekahi o lakou i kelepona i ke kauka a he manawa loihi keia kali ana.  ua puhi ia i ka paka kekahi o na puka i paa ke koko aka aole i ike ia ka puka ma kona ai ka puka hoi nana i lawe aku i ka wai o ke ola a hoopuanuanu iho i kona kino mehana.  Hiki mai ke kauka a nana hoouna koke la ke kaa o ka hale-wai a lawe ia aku o Kanehoa i ka hale-ma'i.  I ka hora eono oia la no ua hanu ae la oia i kona hanu hope loa.  Ua hoolewa ia oia e kona ohana, a ma ka olelo mai a ka poe i ike i kona hoolewa he poe maikai wale no ka poe i ukali aku i kona kino wailua

  Na Mrs. Peabody. kona kaikuahine i hooponopono kona hoolewa a waiho aku la iaia ma kona wahi moe mauloa.

  Eia keia wahi paniolo i ka hale-wai e kali nei no kona hookolokolo ia no keia hana lima koko ana. He wahi paniolo poupou wale no oia, he uuku no kona wahi kino, a ke nana aku he oluolu, kona wahi helehelena.  Ua hiki no ia oe ke ike aku he paniolo oia.  He oluolu a waipahe kana mau olelo, a i na i olelo mai kekahi mea ia'u he puuwai eleele ko kela paniolo ua hiki loa ia'u ke kapa aku iaia he hoopunipuni, eia ka ola kona ano.  He lei mau oia i keia pahi ma kona a'i a ke nana aku oe e manao ana oe he kaula uwaki keia ana e lei mai nei eia ka he pahi lawe ola.  Ua kaulana ke paniolo i ka hou pahi. a eia hou no keia paniolo hou pahi. 

  O Polly McShane, kana wahine, he oiwi oia.  He wahine oluolu a akahai ma ka noho ana.  He like i kona mau hoaloha a he hookipa no hoi.  Ala ma ka Halepupule kana hana, o ka malama ana ia lakou a me ka hoomaemae ana hoi i ko lakou noho ana. He wahi loaa uuku wale no kana, he kanakolu no paha wahi dala o ka mahina, a me keia mau wahi konikoni uuku oia o hoolawa ai i ko lakou noho ana.  Kue nui loa oia i ka uhauha o kana kane i ko lakou wahi ola ma na mea waiwai ole.  I na e pau ae ana e noho ana iloko o ka nele a me ka pololi.

  O keia Kanehoa. he hapa haole oia.  He kaikunane oia no keia Polly.  He hookahi makuahine a he elua makuakane.  Na keia Kanehoa me kana wahine male i malama o Polly McShane mai kona wa opio mai a hiki i kona male ana i keia wahi paniolo hou pahi.  Ua noho pu lakou ma Maui a hiki i ka make ana o ka wahine a Kanehoa.  Mahope hoi like mai no lakou a noho pu i Honolulu nei.

  Ua olelo ae kekahi nupepa Olelo Beretania ua loaa pono aku o Kanehoa me Polly i keia paniolo oia kona mea i hou ai i ka pahi.  He mau olelo wahahee ia, a ole i nana pono ia wahi haole kakau nupepa a loaa ka oiaio a oia kana e hoike aku ai i ka lehulehu.

  Mahalo makou i ka nui ole o na Hawaii i hana i na hana puuwai eleele o keia ano.  Minamina ke ola makamae oia kanaka i lawe ia ae e ka lima koko o kela paniolo.

 

Ma'i Hepera ma Lihue.

Loaa kekahi Porto Riko i keia Ma'i.

    Loaa mai ka lono maluna o ka Moku-ahi Mikahala ua loaa kekahi Porto Rico i ka ma'i hepera (small pox) ma Lihue, Kauai.  a eia oia ke hoomalu ia nei.  Ua loaa mai keia lono mai a Coney mai ka makai nui o Kauai, a ua hoouna pololei ia i ka Papa Ola.  Ua noonoo keia papa no keia mea ano nui.  Na Kauka Goodhue a me Kauka Watt i nana a hoola mai he ma'i Hepera keia.  Ke hoomalu la nei kahi i noho ai kela Porto Rico, ma ka hoao nui ia e laha ole keia ma'i.

  E hoouna koke ia aku ana na mea hana a ke kauka no keia ma'i maluna o ka moku mua loa e haalele ana ia Honolulu nei.  E kauoha pu ia aku ana ka Makai Nui Coney e nana pono loa i na wahi i hoomalu ia, a aole e ae wale ia na poe o kahi i loaa ole keia ma'i e huikau me keia poe a hoi aku no ko lakou mau home.

  Noonoo ka Papa Ola no ka Puhipuhi ana i na leka mai Kauai mai a na hooholo lakou e nana pono loa ia keia hana e puhipuhi pu la ana no kanaka o na wahi kokoke i keia ma'i mamua o ko lakou ae ana ia e hele mao a maanei.

  Aole e hoouna ia aku ana na kauka mai Honolulu nei aku oiai ua hilinai nui ka Papa Ola. i ka ike o Kauka Goodhue a me Kauka Watt.  a ua manao lakou ua pololei ka laua hoike a ua hiki no hoi ia laua ke lawelawe i ka hana.

  Noonoo ia ke O ana i na kanaka o Kauai i O ole ia oiai he mea keia e hoopakele ana mai kela ma'i mai.  A oiai eia no ke kanawai O ke ku nei ua kauoha ia aku nei e O la na paahana o na Mahiko a me na kanaka e ae i O ole ia.

  He mea hou kaumaha keia no na poe e noho ana ma Kauai a me na poe he mau ohana ko lakou malaila.  Pehea la i loaa ai keia ma'i i na Porto Rico oiai, kekahi keia o na poe mua loa i lawe ia mai ai a ua loihi ka noho ana ma ka aina nei?  Ke manaolana nei makou e pakele mai ana na ola makamae ma ia Aina.

 

Make o Keoki Q. Pukuniahi.

I Hawaii Nei Oia no na Hana o na Mamona.

E HOOUNA IA ANA KONA KINO I KOKO PAAKAI

MAI MONTEREY AKU.

  Monterey, Kaleponi, Aperila 12. - Ua haalele mai i keia ola ana o Keoki Pukuniahi, kekahi o na Alakai o na Mamona, mahope o ka moe ana i ka ma'i no kekahi mau pule.  Ua maopopo loa kona make no kekahi mau la i hala, a ua kahea ia kona mau ohana a pau e akoakoa mai.  Ilaila lakou a pau i kona wa i hanu ai i kona hanu hope loa.  Ua "la loa" ia kona kino make a e hoouna ia ana i Kapalakiko a mai laila aku e lawe loa ia ai no kona Home ma Loko Paakai. Ka wahi e malamaia ia ai kona hoolewa.

  I ka la 11 o keia mahina ua loaa iaia ka moe oluolu no kekahi mau hora loihi a ua manao ia e loaa iki ana iaia ka oluolu.  Aka, ua ike kona kauka, Dr. Clift ua kokoke mai ka wa e hanu ai oia i kona hanu hope.  Kekahi mea i hiki-wawe loa ai kona make ola no kona ano elemakule a nawaliwali.

  Ma kona make ana ua lawe ia aku kekahi o na kakoo ikaika loa o ka Hale pule Mamona.  He Mamona oia mai kona wa kamalii mai, a oia ka mea nana i hoomaka na hana o keia hoomana ma Hawaii nei.  Ua kukulu oia i na hana ma Hawaii nei i ka makahiki 1850 he kanalima-kumamakahi makahiki i hala ae nei.  Iloko o Dekemaba o ka makahiki i hala ua holo mai oia, kana wahine a me na keiki e hoomanao i ka piha ana o ke kanalima makahiki o ke ku ana o keia hoomana ma Hawaii nei mai ka manawa ana i hookumu ai.  Ua malamala he mau halawai nui ma Honolulu nei, no ka hookipa ana a me ka lohe ana i na olelo paipai mai iaia mai.  Ua hele oia i keia mau halawai a pau. e hoeueu ana i na hoahanau o kona Ekalesia.  Ua noho oia me Aberhama Fernandez oiai ola ma Honolulu nei.  Ua hoohala oia i kekahi mau la ma Maui, kahi i hana ia ai o kekahi o kana mau hana mua loa ma Hawaii nei Ua aloha hui ia oia e na poe a pau i ike i kona ano a me kana mau hana.

  Ua manao wale ia no, o kela huakai ana i Hawaii nei kekahi o na kumu nana i lawe koke aku i kona ola.  Ua noe noo nui loa oia no na hana ana e hana ai maanei, a aole oia wale aka o ka au ana mai i ka moana me kona kino elemakule.  Ua hoomaka kona ma'i ma hope koke iho no o kona hoi ana aku mai nei.  a aole oia i oluolu hou a hiki i kona haalele ana mai i keia ao.

  I kona wa i Hawaii nei ua kahaha loa kona manao i ka make nui o na kanaka Hawaii. I kona holo mua ana mai ua piha ka aina i na kanaka Hawaii kino oolea me na wahine nunui.  aka i keia holo hou ana mai nei ua emi ino ka lahui. a na huikau me na hana lapuwale a na aupuni e ae.  Ua makemake nui oia e hookaawale ia na Hawaii ma kekahi wahi e hiki ai ia lakou ke noho o lakou wale no, i ike ole i na hana pono ole o na Aina e, a huikau ole me lakou ma na mea e make ai lakou.  Ua manao oia i na e noho na oiwi o lakou wale no ma kekahi wahi e ulu hou no a laupai na Hawaii.  Ua makemake nui oia e hooikaika na Mamona ma keia hana.  Malia paha ua pololei kana mau olelo oiai oia kae ike i na kanaka o ka makahiki 1850 me ko lakou mau kino ikaika a me na kanaka haikea o keia makahiki.

  Ina oia i ola loihi me nei ua lilo ola ka Peresidena Nui o na Mamona ma Loko Paakai a me na wahi e ae a pau i laha keia hoomana.  Ua koho ia ola ka mea e nee aku maluna o keia noho mahope o ka Peresidena Lorenzo Snow o keia manawa.

  Manaoia e malama ana na Halepule Mamona a pau o Hawaii nei i halawai hoomanao nona.

 

  Kekahi o na haole kamaaina loa ma Honolulu nei oia no o Ben Burns, kahi haole i holo nua mai ai me ka hui kuai laau Kikapu.  Ua hoi aku oia no Amerika maluna o ka Moku Mohigan.

 

  E ukali ia ana ka Moiwahine Liliuokalani e kekahi mau wahine holo lio mai kona home noho ma ke Alanui Beretania a hiki i Waikiki hookahi pule ma ka la apopo aku.  He holo ana lakou me na pa'u holo Ho o ka wa kahiko.  He luau ke hoomakaukau ia ana no lakou i ke kakou hiki ana ma Waikiki.

 

KEIA WAHI BIBI KEIKI OIA NO KA NUPEPA BULETINA.  KEIA WAHI KAO OIA NO KA NUPEPA REPUPALIKA.  KE HOOMALIMALI NEI LAUA I KA HOME RULA I LOAA MAI NA HANA O KA AHAOLELO IA MAUA.  EIA IHO KA HOME RULA KE HOOHAKAKA ALA IA LAUA OWAI KA MEA IKAIKA I KA OUKOU IKE IHO?  KE OLELO NEI LAUA HE MAU AIKANE EIA NAE HE HULUMANU.