Ka Nupepa Kuokoa, Volume XXXVIII, Number 32, 24 August 1900 — HE MAHALO. [ARTICLE]

HE MAHALO.

E ke Kuokoa Maikai: Ua ike au ma kou helu i hala i kekahi manao akea mai ka peni mai a Mr. Moses Palau no na inoa ana i manao ai he poe kupono e lilo i mau Wahaolelo Lahui no ke Kau Ahaolelo e hiki mai ana. Aia mawaena o na inoa "moho" Lunamakaainana ana i hoike mai ai no Oahu nei, o ko'u inoa kekahi. No'u iho, me ka oiaio, ke hoike aku nei au i ko'u mahalo ia oe, e Mr. Moses Palau, no kou hoike ana mai i keia hilinai maluna o'u. Ke haawi pu nei no hoi au i ko'u mahalo i ka makamaka nona ka manao o kei ano hookahi no maloko o ke "Kuokoa" o Augate 10 i hala aku nei. I mea hoi e hoohewahewa ole ai ka lehulehu koho balota o Oahu nei no ko'u kulana holo balota ma keia kau koho balota e hoea mai ana ma Novemaba ae nei, he mea pono ia'u ke hoike aku, aole o'u aoao kalaiaina e ku nei ma ia hana. Aole au no ka Aoao Repubalika, aole hoi no ka Aoao Demokalaka, aole no ka Aoao Kuokoa Home-Rula, a, aole nohoi no ka Aoao Liberala; aka, ua nana aku au i ka lahui koho balota o loko o ka Apana Koho Balota Eono, (ma ka mokupuni o Oahu nei), oia ka aoao e ku ai au. O ka lakou kauoha, o ka'u ia e hooko aku ai no ka pono o ka lehulehu a ma ia ano ke ku nei au ma ke kulana holo balota pili Ahahui Kalaiaina ole. Ua manao au o ke kulana palekana loa keia o ke kanaka e holo balota ai, oiai, ina he aoao kalaiaina ko kekahi moho holo balota i kohoia ai a puka oia, e lilo ana na haku kakaikahi e noho alii ana maloko o kela Ahahui Kalaiaina, na haku koikoi na lakou e hookauwa i kela Wahaolelo Lahui, a nana ole ia ka poe koho balota na lakou i koho a puka ai ua Wahaolelo Lahui la. Malia paha ua kuhihewa au ma keia olelo ana, aka, aole no nae au i poina i na hana kuluma i maa i ka hanaia e like me ka'u i hoohuoi ae la, i na wa i hala hope ae nei. O ka Lahui Koho Balota maloko o ka Apana Koho Balota Eono, ma Oahu nei, ko'u mau haku pili kalalaina, aole o kahi Ahahui Kalaiaina a Kalai Aupuni paha. O ka leo o kela poe koho balota ka'u e hoolohe ai, aole o na hoounauna ana a na Luna o na Ahahui Kalaiaina a Kalai Aupuni hoi. Me ka haahaa, J. MOKUOHAI POEPOE — — Pakele kekahi mau keiki opio mai ku i ka pu ia Hopili—he wahi keiki no, no kai aku nei o Kewalo. Ua kaena no ua wahi keiki nei, he hiki loa iaia ke ki a make loa ka mea e aa aku ana e hakaka me ia. I ka lohe ana o ka makai e ku kokoke mali ana, ua hopuia ua wahi sanana nei, a eia ke noho mai nei i "Kuapapanui" — — Ua hoala mai nei kau haole kuonoono o ke kaona nei l hui holokaa na lakou. No ka lakolako wale mai no kela.