Ka Nupepa Kuokoa, Volume XXXVIII, Number 21, 25 May 1900 — KE PAONIONI KA MOLE O KA HOINO [ARTICLE]

KE PAONIONI KA MOLE O KA HOINO

He mea oiaio o ke paonioni ka mole o ka hoina, a he mea hoi keia nana e wawahi i ka nohona maikai o na mea apau. E like no hoi me ka nohona ohana ana, pela no ka nohona lahui ana. I ka wa malalo o hookahi mana, ua lilo na mea apau i hookahi, no ka mea, aia he Leo mana maluna ae. I keia wa e na makamaka, eia kakou ke au nei iloko o ke kai hohonu i kuia ole iho i ka papaku o lalo, a ke lana nei kakou me ka pau aho, a maopopo ole kahi e pae ai. Ke olelo mai nei kekahi "e au kakou mao loaa koke ka aina paa," i mai kekahi "mao ka-

kou, o ke kokoke ia," a pela no auanei paha e paialewaia ai a hik[i] i ke piholo ana. Aka, he mea pohihihi loa keia i ka poe i loaa ole na ike elua e hiki ai ke hoomaopopo iho i na kalaimanao ana o na alakai ma ka olelo namu, a no ia kumu ua hilinai loa lakou maluna o na mea e loaa aku ana maloko o na kolamu o ka kakou hiipoi ame na hoapaahana e luhi pu nei. E like hoi me ko makou ike ana i na mea i hanaia a i hookahuaia no ka pono ma na hookele aupuni ana, peia no makou i ohohia ai malalo o ka Aoao a makou i komo ai, a malalo oia mau manao hilinai makou i lawe mai ai i ke koikoi o ka paio ana no ia pono. E i mai ana paha kekahi poe "Ka! o ka poe no kena na lakou i hapuku i na kuleana o makou apau ana!" He oiaio no, ua komo pu, a aole nae na keia poe i hookumu mai ia manao iloko o lakou. Na ka hana hewa i hanaia ame kekahi mau kumu e ae a kakou i kamaaina ai, i hookumu mai i ka poino maluna o ka lahui: "Na kakou i hookipa, a o kakou no ka luahi." Ke olelo mai nei kekahi poe, "he oi aku ka maikai o ka Demokarata, no ka mea, na Cleveland i hoao e hoihoi i ke aupuni Moi." He oiaio no ua hoao oia ia hana, a eia nae ka hewa: Aole oia i kauoha e hoo[k]oia ua kauoha nei ana. Ua hoohe wale oia. A pela pu no hoi me ka Aoao Demokarata e kakoo ana iaia i kela wa, oiai lakou e noho mana ana ia kau. Eia hou no kekahi, he mea pono loa no ka hapanui ka pili ana me ka Aoao Ikaika ma na hana pili kalaiaina, mamua o ka pipili aku me ka nawaliwali, oiai, o ke ala ia e loaa koke ai ia kakou ko kakou mana piha o ka nohona Mokuaina (State.) He mea keia e loaa ole ana ia kakou malalo o ka Rula ana a na Demokarata no ka mea, he poe hookae loa keia i na ili like ole me ko lakou. E ninau oukou i na poe i hele ma na mokuaina waena, a e lohe no oukou i ka moolelo pololei e pili ana i na hana a keia poe. Aka, o keia mau mea apau, ua ulu mai no ia mamuli o ka hoinoia ana o ka lahui i hoopakeleia e na Repubalika mai ka nohona kauwakuapaa mau ana. Pela no i kau ai a hiki ia kakou nei ka hoona i ka inaina no na hana i hanaia i ka wa i hala iho nei. He hoomau ia, a he mea kupono ole i na Kanawai o ka Haku. He mea paakiki loa ka pale ana i keia kuia o ke kanaka, aka, e pono nae e hana i ka mea pololei. Ina aole i makemake o A ia E alaila, ke hiki ma ka pahu balota, mai koho o A ia E. Aole e pono e hele ma ke alanui a ma kekahi wahi e ae paha, a kukala ae imua o ka lehu"O! he mea kela a pela aku." Malia paha e puka ana he mau huaolelo kupono ole, a kau mai no ke kanawai me ke koikoi. A malia no paha ma ia wa e lohe mai ana kekahi mea i hilinai mai, a mamuli oia mau olelo pono ole, ua lilo ka hilinai i mea ole.

Nolaila e na makamaka! Ina ua pono ole ka Repubalika i ko oukou manao, mai hoino wale i ka hoakanaka. Aka, e noonoo pono a e hoolilo i ka manawa ma na hana e hiki ai ke hoomaopopo pono i ke ala e loaa nui mai ai na pomaikai iloko nei o ka aina.