Ka Nupepa Kuokoa, Volume XXXVIII, Number 4, 26 Ianuali 1900 — HE OIAIO ANEI? [ARTICLE]

HE OIAIO ANEI?

Ua laweia mai kekahi lohe ia makou, e kekahi mea i hiki i na paulele ana no kana mea i hoike mai ai ia makou, a no ia mea ke hoike aku nei makou i ua manao la. Ma ka wa i laweia aku ai kekahi poe no ka hoomaluia mauka ae nei o Kalihi, ua hookomoia aku la ke kino kane, a kino wahine iloko o kahi puhi hoomaemae, me ka wehela ana ae o na mea apau e pili ana i kona ill ia wa, a haaleleia iho la i waho o kahi ana i hookomoia aku ai. Ia ka wa e pau ai kona puhi hoomaemaeia ana, a puka mai iwaho, aole iho la kona mau mea pili kino. Ina he komo-lima, e nalowale ana; ina he mau dala, e nalowale ana. A o kahi i nalowale aku ai, oiai hoi aohe i puhalu ae ka ili honua, e poholo iho ai ia mau mea, aole i ikeia. Ina e ninau mai i na kiai, o ka hua e loaa aku, "Aole ike —No save, a pela aku, a he ole wale no ma na ano apau. Aole he poe no na aina e wale no' kai komohia iloko o keia popilikia, aka, o na kanaka Hawail pu kekahi. Manao makou, h6 mea pono ke huli aku na Luna Aupuni i ka oiaio o keia mea a makou e hoike aku nei. Aole i kana mai ka hoi, ua pilikia. Ka pilikia hoi a ke ahi, ame ka pilikia a ka aihue ame ka powa maoli. Ua hiki ia makou ke hoike /iku i ka mea nana makou i hoike mai i keia iono, ina e ninauia mai ana makou. •