Ka Nupepa Kuokoa, Volume XXXVIII, Number 44, 3 November 1899 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE XXXVIII.  HELU 44.

HONOLULU , POALIMA. NOVEMABA 3, 1899.

NA HELU APAU 2779.

 

Ke Aloha o kuu Makuahine

KE ALOHA O KA'U MEA I ALOHA AI.

Ka Mana o ke Aloha.

 

He Moolelo Walohia

  Ma keia wahi o ka kaua moolelo, e @ makamaka heluhelu, e huli ae ai kana a nana aku i ka Barona kane ame ka Barona wahine. oia hoi na makua o @hee.

  @la lana e hele ana i ka holo kaa, ua @  ae la he wahi kamailio ana mawaena o laua no ka mea e pili ana i ka @ana kaikamahine.  Ua manaoio loa no ka Barona kane. ua ola hou no o Alice, elike hoi me ka mea i hoikeia mai ai @a lana e ke Kauna Berene; aka, o ka Barona wahine. aole loa ia no i pau@ ele loa kona manao i ka oiaio oia mea e laua i lohe ai. koe wale no kona hoomanao ana ae i ka wahine virigine i hoea aku ai i o laua la i kahi wa i hala ae. a pela pu hoi me ka leo ana i lohe ai ma ka wa a ua wahine virigine nei o kamailio aku ai imua ona.

  "Pehea la kou manao," wahi a ka Barona wahine i ninau aku ai i kana kane, "ina e hoi mai ana ke kaikamahine a kaua, ina hoi he oiaio na mea a kana i lohe ai mai a Kauna Berene mai."

  Ua huli mai la kana kane a nana mai la @uo me na maka oluolu ole. a piha @ a nohoi. a pane mai la oia.

  E @  Adele aloha. aohe o @a ia kuleana maluna o ka kaua kaikamahine i keia wa. oiai ua mare oia ia Kauna de Berene."

  "Aole anei ou manao. mamuli o ke kana ia ana o ka kaua kaikamahine iloko o ka luakupapau, a puka hou hoi oia mailoko mai oia wahi, ua pau ko Kauna Berene kuleana maluna ona ma ke ano kane mare. a o kaua wale no na mea i kuleana i ka kaua kaikamahine?"

  @na e loaa ole he kuleana ia Kauna Berene maluna o kana wahine mahope iho o kona haalele ana aku i ka lua@ papau. alaila. elike ana no ko kaua kuleana ole maluna o na kaikamahine nei a kaua me ko Kauna Berene, no na mea. ma ka hanau ana i kuleana ai kaua iaia, ma ka mare ana hoi elike me ke kanawai o ka aina i kuleana ai a Kauna Berene i ka hua i puka aku mailoko aku o ko kaua puhaka.  Aole anei ou ike mai i ka oiaio o ka'u mea hoike aku nei ia oe?"

  Ia wa noho iho la ka Barona wahine me ka pane hou ole aku i kana kane. Ma ia wa nohoi pane hou mai la ka Barona Malatere i kana wahine:

  "Manao au i keia hele ana a kaua a hiki i ko kaua wa e hoi ai, alaila, o oe wale no o kaua ke hoi aku i ka hale, oiai hoi au e hele aku ana e ike ia Kauna de Berene."

  "Pehea la. e ae ana no anei oe e hoi nou aku ka kaua kaikamahine me kela kanaka i aneane e komo iloko o ke kulana banakarupa?"

  "Aole hiki ia oe ame a'u ke alo ae i ka mea a ke kanawai i hoopaa ai no ia mea he mare mawaena o ke kane ame ka wahine.  Pehea la, e manao ana anei oe, e hookaawale, a e hoopauia ana ho kaua berita mare mamuli o ko'u komo ina aku iloko o ka banakarupa?  Aole. Aohe mea nana e hoopau i ko kaua berita mare. o ka make wale no o kahi o kana a i ole, o ke oki ia o ko kaua berita mare elike me ka ke kanawai i kuhikuhi mai ai.  O kekahi o keia mau mea elua ke halawai me Alice, alaila, hiki oia ke kaawale mai kana kane mai.  O ka make, he kaawale ia no ka wa pau ole a hoea i ke ala hou ana mai o ke kino. a o ke oki hoi, he kaawale ia ma ka wa e ola ana kela ame keia o laua e hiki ole hou ai ia laua ke koi i ko laua mau kuleana kanawai maluna ekahi ame kahi."

  Ua ike iho la ka Barona wahine i ka oiaio o na mea a kana kane i hoike mai ai iaia. aka. no ka nui no o kona a oha i kana kaikamahine, ua pane hou aku la no oia i kana kane:

  "O kau mau olelo i hoike mai nei ia'u no ka mea e pili ana i ka pau ole ana o ko ke Kauna Berene kuleana maluna o kuu kaikamahine. ina ua ola hou mai oia mailoko mai o ka luakupapau. ua ike no au ua oiaio ia mau mea, aka, aole no nae o'u makemake iki e hoi hou ka'u kaikamahine me kela kanaka lapuwale, a e hana aku ana au i ka hana e kaawale ai kuu kaikamahine mai kela kanaka mai."

  "Aka, alia paha kaua e hooholo loa i ka oiaio o ka mea a kaua i lohe ai mai a Kauna Berene mai no ke ola hou ana o Alice, a hiki i ko kaua wa e maopopo loa ai ia mea.  Nolaila, manao au a hele loa kaua i ka Pa Ilina e hoomaopopo ai ia mea."

  Ua holo aku la laua no ka Pa Ilina, a halawai aku la laua me ke kanaka e malama ana ia loko o ua pa la.  I ka ike ana mai o ua wahi kanaka la ia laua nei, ua luli e wale iho la no kona wahi poo, a huli iho la no ia pulumi i ka opala o ke alahele o loko o ka pa ilina.

  I ko laua nei wa hoi i kokoke aku ai ma kahi a ua wahi kanaka nei e pulumi ana, ia wa ninau aku la ka Barona Malatere iaia:

  "Aole anei oe i ike a hoomaopopo paha i kekahi mea e pili ana i ke Kauna wahine Berene i kanuia ai maloko o kela wahi?" Alaila kuhikuhi aku la ua Barona nei i ka hale kupapau o ka ohana Berene.

  Ua luli ae la no ke poo o ua wahi kanaka nei, a ma kahi hoi o kona pane ana mai i ka ninau a ka Barona i ninau aku la iaia.  hoomau aku la no ia i ka pulumi ana. me he mea la, aole oia i lohe mai i ua ninau la.  Aka, ninau hou aku la no ka Barona iaia:

  "E, aole anei oe i lohe i kekahi mea e pili ana i ke Kauna wahine Berene i keia mua kokoke i hala ae nei?"

  Ia wa aea mai la na maka o ua wahi kanaka nei a nana mai la i ka Barona ame kana wahine. a mahope pane mai la ia:

  "O ka'u wale no e hoike aku ia olua. aole oia  o loko nei o keia pa.  Aole oia maloko o ka lepo nei o keia pa. aole nohoi maloko o kekahi wahi o keia pa."

  "Heaha ke ano o kau olelo i kamailio mai la. aole oia maloko o ka lepo o loko nei o keia pa. aole nohoi maloko o kekahi wahi o keia pa?"

  "E kala mai kou hanohano ia'u." wahi a ua wahi kanaka nei i pane mai ai me ka hoomau ana mai nohoi i ke kamailio ana mai.  "ina aole oia maloko nei o ka lepo o keia wahi. aole nohoi maloko nei o keia pa, alaila, aia oia mawaho aku o keia wahi.  O keia ke ano o ka'u mea i hoike aku la ia olua."

  "Alaila, e olelo mai ana oe, aia oia i ka lani ea?"

  "E kala mai no olua ia'u.  Aole pela. Nokamea, ina aia oia i ka lani, alaila, eia kona kino ke waiho nei maanei, aka, aole kona kino maanei.  O ka olelo maopopo loa a'u e hai aku ai ia olua, ua haalele ke Kauna wahine Berene i ka luakupapau a ua puka oia mailoko mai oia wahi.  O kona wahi nae i hele aku ai maluna o ka ili o keia honua akea, aole hiki ia'u ke hai aku ia mea ia olua."

  Ua haikea pu ae la na helehelena o ka Barona wahine ia wa, a ano e pu ae la nohoi me ka helehelena o ka Barona kane.

  "Pehea i maopopo ai ia mea ia oe?"

  "He elua paha pule a oi i hala ae nei aole nae maopopo loa ia'u, ua hoea mai la ia nei kekahi  komisina koronero, e huli ai i ka pahu i kanuia ai ke Kauna wahine.  A ma ka weheia ana ae o ke pani o ua pahu la, ikeia iho la aole ke kino maloko.  O keia ka mea hoike maopopo loa, aole ke Kauna wahine maloko nei o keia pa, aole nohoi oia i pii aku i ka lani."

  I keia wa nanao iho la ka Barona iloko o ka pakeke o kona lole wawae, a unuhi ae la he dala gula Farani, a haawi aku la i ua wahi kanaka nei me ka olelo ana aku:

  "Eia ka maua wahi makana ia oe no kou hoike ana mai ia maua i ka mea e hoopauia ai ko maua pohihihi nui."

  Ia wa huli hoi mai la laua nei, a lilo iho la ia i mea na laua e kamailio nui ai. oia hoi ka mea e pili ana no ka oiaio o na mea a laua i lohe ai mai ke Kauna.

  "O, e kuu Alice aloha!" wahi ana i ike ai.

  "O. e kuu Alice aloha. wahi ana i hooho ae ai a kahe iho la kona mau waimaka ma kona mau papalina.

  Hoi mai la laua a hiki i kahi a ka Barona i huli mai ai a kamailio mai la i kana wahine he mea pono iaia ke hele aku i kahi o ke Kauna, a e huli hoi loa mai hoi ia (Barona wahine) no ka hale.  Ua ae aku la ka Barona wahine i keia manao o kana kane.

  Nolaila, huli hoi loa mai la ua Barona wahine nei no ka hale a hala aku la hoi kana kane no kahi o Kauna de Berene.

  Nolaila, e kuu makamaka heluhelu, maanei kaua e huli ae ai a nana aku i ka Barona wahine ma kona wa i hiki ai i ka hale.

  I ka hoea ana aku o ka Barona wahine i ka hale, ua halawai mai la ia me ka wahine lawelawe e loko o ka hale me ia, a hai mai la ia no ka hiki ana aku o Madama Lamabereta, aia oia ke kali mai la iaia maloko o ka rumi hookipa.

  I ko Alice lohe ana i ka leo o kona luaui makuahine, ua haalele koke iho la ia ia loko o ka rumi hookipa, a komo koke aku la ia no loko o kona rumi moe.

  O ka Barona wahine hoi keia, ua komo koke aku la ia e halawai me kona hoaloha maloko o ka rumi hookipa.  Hele aku la ua Barona wahine nei a honi aku la i kona hoaloha. me ka olelo ana aku:

  "My dear Josephine. nani ko'u hauoli i ka ike a huipu ana me oe i keia wa."

  Nana mai la hoi kona hoaloha iaia. a ike mai la oia i kona ano e loa. me he mea la ua okala kunahihi kona mau ano apau, a ninau mai la ia iaia:

  "He ano pihoihoi hoi ka'u e ike aku nei maluna ou e kuu hoaloha?  Heaha keia?"

  "Ae.  Ua hoano-e loa ia ko'u noonoo.  Ua hele au a piha pihoihoi.  Ma kekahi olelo ana hoi, e puple ia aku ana paha au."

  "Auwe no ka hoi," wahi a Madama Lamabereta i hooho pihoihoi ae ai.  "Heaha hoi keia pilikia nui ou e kuu hoaloha e hoinoinoia ai kou noonoo?  Nani ka hoi ko'u pihoihoi ia oe!"

  "E hai aku au ia oe.  O ko'u hoi ana mai la no ia mai ka pa ilina mai.  Owau no ame ka Barona kai hele aku nei ilaila.  O ke kumu nui o ko maua hele ana aku nei ilaila. no ka loaa ana ia maua he mea na maua i pihoihoi nui ai, oia hoi ka mea e pili ana ia Alice -aka, e hoopokole au i ka'u mau olelo. a e hai aku au ia oe i ka mea ano nui o ka maua huakai aku nei i ka pa ilina.  Ua hai mai nei ke kanaka kiai o ka pa ilina ia maua, aole o Alice o loko o ka pa ilina.  Aole oia iloko o kona pahu kupapau i kanuia ai oia.  Ma kana hoomaopopo mai ia maua eia o Alice ke ola nei no i keia wa.  Nolaila la, e kuu hoaloha, ke ike mai la oe i ke kumu nui o ko'u piha pihoihoi.  Ua hala aku nei ka Barona e ike ia Kauna de Berene no keia mea.  He oiaio no nae, ua hoike mai no ua Kauna laia maua i kahi wa i hala ae nei no kona manao ana ua ola hou o Alice. aka, aole no nae hoi i manaoio loa ia kana mea o ka hoike ana mai ma ia wa."

  I kela wa i pane mai ai o Madama Lamabereta: "Me he mea la he oiaio no ka kela kanaka o ka hai ana mai la ia olua, eia io no o Alice ke ola nei i keia wa."

  "Ea. e kuu hoaloha oiaio, mai hoopu-a mai hoi oe i manao oia ano imua o'u.  Ua hele au a pioloke - ae -ua ano uluahewa maoli au no ke kaikamahine a kaua."

   Oiai ua Barona wahine nei e kamailio ana, aia na waimaka ke hiolo iho la ma kona mau papalina.

  "E kuu hoaloha," wahi a Josephine i pane mai ai imua o Adele me ka haloiloi ana ae nohoi o na waimaka ma kona maka, "ua ike no oe, a pela nohoi au i ka nui palena ole o ko ke Akua aloha no kakou nei.  E kanalua anei oe ame a'u i ka hiki ole ana Iaia ke hana mai i kekahi hana mana iloko o keia mau la, i mea hoi e hoohauoli hou ia ai kou mau la hope?"

  I kela wa nana aku la o Adele maluna o kona hoaloha me na onohi maka kuoo, a pane aku la ia:

  "Ma ke ano o kau mau olelo e kamailio mai nei imua o'u, me he mea la ua ike oe i kekahi mea ano nui loa e pili ana i ke kaikamahine a kaua. nolaila, ma ka inoa o ke Akua aloha, ame ko kaua noho hoaloha ana nohoi ke nonoi nei au ia oe, e hai mai oe ia'u i ka mea oiaio, i ole ai e hoehaehaia kuu uhane no kekahi mau sekona hou aku.  E Josephine. e hai mai oe ia'u?"

  "E kuu Adele. e hai aku au ia oe, he mea oiaio loa, eia io no ke ola nei ke kaikamahine a kaua, elike nohoi me ke ola ana o ke keikikane a kaua.  Aohe a'u mea e hai hou aku ai ia oe.  I hoea mai la au ia nei no ka hoike ana aku ia oe i keia nuhou hauoli lua ole."

  Ku iki iho la ka Barona wahine a liuliu, alaila, pane mai la: "Auhea oe, ke ike nei au ua aloha io mai ke Akua ia'u.  He oiaio ua ola hou mai kuu kaikamahine mailoko mai o ka make.  Aka, auhea la ia?  E hai mai ana anei oe ia'u i kahi ona e loaa aku ai ia'u.  a i ole, i kahi hoi a'u e ike aku ai iaia me ko'u mau maka ponoi nei no la?"

  "Aole no i mamao loa aku kau kaikamahine mai a oe aku, a e ike ana no oe iaia i keia la."

  I kela wa kulou iho la ua Barona wahine nei ilalo, paa ae la ia i kona lima ma kona lae, a pane mai la:

  "Ae, ke ike nei au, o kela wahine uhi maka eleele a'u i ike ai ma kahi kulanakauhale o Brunoy, oia no ia - ae -o ka wahine nona ke pihi daimana i loaa ai ia'u iloko o ka hale keaka, oia no ka ia.  He oiaio o Alice no ia, ua hoike ae no ua pihi la ia mea.  A o ka wahine virigine o ke aloha i hoea mai ai ia nei, a'u no i lele ai ka hauli o Alice no ia, eia io no ka, o kuu lei aloha no ia.  Hui au me kela wahine ma Brunoy. a ike no au i ka oni a ko'u puuwai me ke pihoihoi nui, me he la e olelo okoa ae ana no iloko o'u o Alice no ia.  Pela no hoi ka hana hookahi a ua puuwai la o'u ma ka wa i halawai ai au me kela wahine virigine i hoea mai ai ia nei.  O, auhea la ia?"

  "He oiaio, o Alice no ia.  He nui na wa ana i makemake ai e hui ma kona mau makua me ka ike ole ia ana hoi e na poe e ae, a no ia mea i hoanoe ai oia iaia ma na aahu like ole au i ike ai iaia.  O ke kumu nui o kona huna ana iaia iho. aole oia i hoike kumaka maoli mai iaia iho imua o olua. oia no kona makau loa i kana kane.  Me he mea la o ka umikumamawalu paha keia o na mahina o kona hoike ole ana iaia iho imua o kakou apau kona mau makua.  Aka, i keia la, e haalele aku ai oia i kahi ana e noho nei ma ke ano huna. a hele mai oia ia nei i o olua ponoi nei. a nonoi mai oia i kona luaui makuakane e malama aku oia iaia. a e hoopaaku o kona mau kuli ilalo.

  "A e nonoi aku nohoi i kau kala ana mia ia'u, e kuu Mana aloha," wahi a kekahi leo i pa-e mai ai, a holo mai ana he wahine opio a puliki mai la i ka a-i o Adele. a uka iho la.

  Ua puliki aku la hoi ka makuahine i kana keiki. a hooho ae la ua makuahine nei me ka leo uwe.

  "My child!"

  Aohe mau huaolelo hou i puka ae mai ka Barona wahine ae.  A oiai ka makuahine ame ke keiki e puili ana i kahi ame kahi iloko o ke aloha. ia wa i hemo mai ai ka puka a komo mai la ka Barona.

  Ma ia wa hoi i hookuu ae ai o Alice i ka paa ana i ka a-i o kona luaui makuahine, a huli ae ia e holo mai a paa mai hoi i kona luaui makuakane. aka, elike ma ka olapa ana o kekahi uwila, pela i kakia ia iho ai na wawae o Alice maluna o ka papahele aole hiki iaia ke oni hou aku imua, a puili ae la oia i kona mau lima ma koua umauma. me ke pahemo pu ana aku hoi o na huaolelo mai keia wahi aku: "Auwe no ka hoi!"

  Aia kona luaui makuakane ke nana mai la maluna ona me na helehelena piha inaina loa.  He puanuanu kona mau ano apau.  A na keia ano e o ua Barona nei i hookuia mai ia Alice aole oia e hopu mai i kona makuakane.  Ma ia wa hookahi nohoi ua huli ae la o Alice me na waimaka ma kona papalina, a nana ae la i kona luaui makuahine, me he mea la e olelo aku ana iaia:  "Ea, e Mama, pela ea au?"

  Ma ka hiehie nui. me ke kuoo. ame ka olino ana mai o ka nanaina ma na onohi maka o ua makuahine nei o Alice. ia wa oia i hele mai ai a ku mai la imua o kana kane a pane mai la:

  "Ea, heaha keia au e hana nei i kuu keiki. ka hua o kuu puhaka, ka hua ponoi nohoi mai kou puhaka mai. Heaha kou manao?  Aole o'u oluolu iki ia oe, no keia hana au e hana mai nei i kuu lei aloha. ke keiki hoi i alana aiai iho no kona aloha ia'u nei, kona luaui makuahine a hooko hoi i kou makemake no kela Kauna lapuwale?"

  E kuu makamaka heluhelu. e hoomaopopo iho oe.  i ke ano o na mea apau a kou mau maka e ike la, ina he mea hiki ia oe ke ike aku me kou mau maka ponoi, ia Alice e ku ana me na waimaka o ka ehaeha e hiolo ana ma kona mau papalina, ka Barona Malatere e ku ana me ka uahoa. ka Barona wahine hoi me kona kino i hoopuniia e ke aloha lipolipo o kana kaikamahine, ame ka luaui makuahine hoi o George e ku aku ana me ke aloha no Alice ame kona makuahine, e hiki ana ia oe, e kuu makamaka maikai. ke hoomaopopo iho, he hiohiona walohia kau e like aku ana.

  Ma ka wa a ka Barona wahine i ninau mai ai i kana kane, ia wa i pane aku ai kana kane imua ona:

  "E Adele. ua make ka'u kaikamahine. ua make ka kaua kaikamahine. Aoha a kaua kaikamahine i koe.  Aohe au kaikamahine. aohe nohoi a'u kaikamahine.  Ua nele kaua i ke keiki ole."

  "Malia paha ma kou noonoo ana, ua nele au i ke keiki ole Aka, e hai aku au ia oe.  Aole. Ua hoihoi hou mai nei na Lani i kuu lei haule ole. he keiki, a eia oia me a'u i keia wa, a o ka mea hoi a'u e hoike mai nei i kou aloha ole.  Ua noke wale mai nei paha ke Kauna Berene i ka hoopiha ia oe i ka olelo a hoi mai nei oe. a o kau hana iho la ia i kuu keiki."

  "E hai aku au ia oe, ua hoopili kaumaha loa ia au ame ke Kauna no ka ia nei mau hana iloko o kekahi wa loihi i hala ae nei.  Ae, oia nei, hookahi oia nei wa i kapaia ai o Alice de Malatere, aka, aole nae oia kona inoa i keia wa."

  Ia wa i uwe ae ai o Alice me ka ehaeha loa, a holo mai la ia a puliki mai la ia Madama Lamabereta.  Alaila, me ka makau ole noho ame ka wiwo ole, ninau aku la ka Barona wahine i kana kane:

  "Alaila, ua olelo mai nei ko hunona ia oe, ua hewa kuu kaikamahine nei me ka mea a kona naau eleele i kuhihewa ai?"

  "He mea ia nau ame a'u e hiki ole ai ia kaua ke hoole iho.  Ua noho pu kau kaikamahine nei. ka wahine hoi a ke Kauna Berene, me kekahi kanaka nona ka inoa o George Lamabereta." wahi a ka Barona i pane mai ai ke ka mau ana o ka uahoa o kona mau ano apau.

  "E ke kanaka puni wale i na olelo a kela ino lapuwale loa.  Aole oe i kamaaina i kela kanaka.  Owau ka mea i kamaaina iaia.  He kanaka puuwai eleele kela.  He kanaka ino loa kela.  Aohe ona lua ma ke ao nei no ke ino haalele loa.  E hai aku au ia oe, aole loa i lawehala kuu kaikamahine nei. elike me ka kela kanaka lapuwale e manao mai la."

  I kela wa huli ae ia ua Barona wahine nei a kahea aku la ia Alice. e hele aku ma kahi ana e ku ana:

  "E kuu lei aloha, e hele mai oe ma kahi a kou luaui makuahine e ku nei.  Ua mohai oe i kou ola no kou luaui makuahine nei, a nolaila, e kuu keiki, e hana ae kou Mama nei i na mea apau e ike ai ka Makua ou ame a'u aohe ana keiki hou aku i like me oe ke ano e kuu Alice.  Ua komo kou kino iloko o ka luakupapau no kou aloha ia'u, ame kou aloha nohoi iaia nei, e hoomaka ewaewa nei oe i keia wa.  Alice. come to Mama." 

  Ia wa hele aku la o Alice a paa aku la i ka a-i o kona makuahine. me ka pane ana aku:

  "E Mama, mai olelo ikaika loa oe ia Papa.  E akahele.  Ua ike no au ua kuhihewa o Papa, aka, owai la ka mea hiki ke kapae ae i ke kuhihewa no ko George malama ana ia'u no kekahi wa loihi loa.  Ua hala ole no nae o George.  O ke Akua i ka Lani ko maua hoike.  Me ke kulana o ke keonimana oiaio i kiai a i malama ai oia ia'u.  O kona aloha ia'u ma ko'u ano owau no kana mea i hoopalau ai. oia no kona wahi kuleana o ka malama ana ia'u.  Ua aie au iaia no ke ola a'u e ole nei.  Nolaila, e Mama. e akahele oe."

  Honi iho la kona luaui makuahine iaia, a olelo iho la:  "E kuu keiki. ua ike au i kau mau mea e kamailio mai nei. aka. e hookuu mai oe ia'u. e kamailio au me ia nei, ka makua o kana mamua aku nei. a o ka makua hoi e kaawale aku ana mai a kaua aku.  E like me kou aloha ana ia'u. e kue keiki, pela au e ku nei ma kou wa o ka pilikia."

  Alaila, huli ae la ua Barona wahine nei a kamailio aku la no i kana kane:

  "Ina oe a kipaku i kuu kaikamahine mailoko aku nei o ko hale. alaila. hele ia mailoko aku nei o keia hale, hele pu no wau me ia.  Nolaila, mamua o ko maua haalele ana iho i ko hale nei, a auwana hele aku maua. e hoolohe mai oe i kuu leo hope ia oe.  E hai aku au ia oe. o ke kaikamahine au e hana ino nei. aole ia no keia ao, aka, he anela hemolele paha kona hoa e like ai.  Ua alana oia i kona kino ame kona ola nou ame a'u.  O ka ehaeha o kona puuwai no kana mea i aloha ai, ua haawe hoomanawanui no oia ia mea iloko iho ona.  Ano e hoolohe mai oe. e kuu kane, i ka moolelo nana i onou i ko kaikamahine iloko o kekahi poino weliweli loa au i ike ole ai.  Ma kuu mau kuli nei e hoike aku ai au ia oe i ua moolelo nei."

  Ia wa haule iho la na kuli o ua Barona wahine nei ilalo maluna o ka papahele.  A nona hoi ke kukuli, kukuli pu iho la nohoi o Alice ma ka aoao o kona makuahine me ka hoomau ana no i ka paa i kona a-i, a o Madama Lamabereta hoi keia, aole hiki iaia ke aua iaia iho mai ka haule pu ole ana

  I ka ike ana o ka Barona i ka hana ana a kana wahine elike me keia. ua ano e loa ae la kona mau helehelena. a pane iho la ia me ke pihoihoi nui:

  "E na Lani e. heaha keia?"  Lalau iho la kona mau lima i kana wahine a hapai ae la iaia iluna. aka, olelo ae la nae kana wahine me na waimaka e hiolo ana ma kona mau papalina:

  "Aole. E hookuu mai oe ia'u, e hoike aku ia oe i ka mea huna pohihihi nana i hai-na i ko kaikamahine nei nou ame a'u.  E lohe oe e kuu kane, kuu makua hoi. i kuu hoike no ua mea huna la."

  "E Mama, e Mama. ua oke. E aloha oe ia Papa. Mai hoike oe i ka mea a'u i kanu ai iloko o ka luakupapau.  E Mama e, aole, aole.  Ua oki. ua pau hoi."

  Alaila, huli iho la ua Barona wahine nei a honi iho la i kana kaikamahine. a pane iho la:

  "E kuu keiki, e hamau anei kou makuahine, ma kou wa e komo ai iloko o ke ahewa kuhihewa wale ia?  Aole loa au e hana pela.  No'u nei, no kou luaui makuahine ke kumu o kou luaui makuahine ke kumu o kou aloha ia'u. a me kou makuakane, ua haawi oe i kou kino e hai-naia e kela kanaka ino a lapuwale loa.  Hookahi wale no mea nana e hooki mai i kuu hoike ana aku i keia mea, oia ka lalau ana mai o kou makuakane nei ia oe, a paa hou aku ia oe ma ke ano o oe no kana kaikamahine, a i ole, e kipaku mai oia ia oe ame a'u, a haalele iho kaua i kona hale.  kana a-i ame kona mau pono apau.  Ma kahi au e hele aku ai e kuu keiki. malaila aku no au e hele aku ai. E uhai a holo no au ia oe ma na wahi apau au e hele aku ai e kuu lei."

  "Nolaila, e hoolohe mai oe:  @  hewa au-"

  A mamua o ka puka hou ana mai he mau huaolelo hou mai kona waha mai. aia hoi, lalau hou iho la kana kane iaia. a hapai ae la me ka olelo ana:

  "Aohe oiaio o kena mau olelo au.  Ua nana aku au ia oe, he wahine i kinaunau ole ia e ka

hewa." wahi a ka Barona i pane iho ai i kana wahine.

  "E kuu kane, e hoolohe mai oe, a e hookolokolo mai hoi oe ia'u. wahi a ua Barona wahine nei i pane aku ai."  "I ka umikumamaono o ko'u mau makahiki. ua hele aku la au e ike i kekahi hoaloha o'u e noho ana mawaho aku ne o Parisa. Ilaila i halawai pu ai au me kona kaikunane.  Na keia kaikunane hoi i kaualako aku i kuu naau e pipili aku iaia, a kau aku la au ma ke alahele o kuu poino ame kuu pilikia.  I kahi la, hai aku la au i kuu aikane, ua loaa mai ia'u he palapala mai kuu makuahine hoahanau mai. e kauoha mai ana ia'u e hoi mai i Parisa nei.  Nolaila, ma ia la no, ua holo aku la au ame keia kaikunane o ua aikane nei a'u i Normandy, kahi hoi e beretaia ai maua ma ka hipuu o ka mare. a o kahi  hei a maua e hoohala ai i na la mua o ka nohona mare ana-

  I nei wa i hoomaha iho ai ua Barona wahine nei, a liuliu, pane hou ae la ia me ka leo haalulu:

  "Aka. i ko maua hoea ana ilaila, aole maua i mare ia.  A me ke aloha ole u keia kanaka ia'u. ua haalele mai oia ia'u, me ka olelo ana no'u no ka hewa o ka puni wale ana aku no i kana mau olelo hoalohaloha i waiho mai ai imua o'u.  Me ka waimaka e hiolo ana ma kuu mau papalina, me ka ehaeha walohia e olepe-ku ana iloko o ko'u houpo. aia hoi, ua nonoi aku la au iaia, e hooko nohoi maua i ka mea a maua i hooholo like ai, aka, ua akaaka pahenehene mai la oia ia'u.  Ua haalele iho la oia ia'u ma kahi kulanakauhale a maua i hoes aku ai. a noho hookahi iho la au ia wahi. aohe makamaka, aohe hoi hoaloha. a'u i paa pu aku ai me a'u.  Kakau mau aku la hoi au i palapala iaia, e nonoi, a e uwe aku ana nohoi imua ona, e ae mai oia e mare mana i pau ai hoi kuu hilahila ame ka wai-a o kuu inoa, aka, he ole nae kona ae mai.  I kuu ike ana, aole oia e ae e mare maua. ua kakau aku la au iaia e hoihoi mai oia ia'u i kuu pu-a leta a'u i kakau aku ai iaia i kela ame keia wa. o ko maua mau la e noho hoalohaloha ana. aka. aole oia i hoihoi iki mai i kela mau palapala ia'u.  O keia na palapala e ahewa ana ia'u, ma ke ano ua haule au i ka hewa me ia. aka nae. aole pela.  Ua ana au ia'u iho. me ka manao. aia au ia hoi ma ke kuahu o ka mare e laa ai au i kona makemake. a pela hoi oia ia'u.  Ua lilo keia mau palapala i mau mea hoehaeha loa mai ia'u.  Me ke kaumaha ame ka luuluu. huli hoi mai la au no kahi o kuu makuahine ohana.  He mau makahiki loihi mahope mai, aia hoi. ua loaa iho la ia'u ka hauoli ame ka maha ma kou poli, e kuu kane: aka. o kela mau palapala weliweli a'u i kakau ponoi ai me kuu pulima nei, e hoikeike ana i ka pupule ame ka hehena o nei mea he aloha hupo. ua lilo lakou i mau akua lapu imua o'u i na la apau o ko kaua noho ana mai a hoea wale i ka hanau ana o ka hua mua a ko kaua mau puhaka.  Pela hoi a hoea mai i ko ia nei nui ana. a lilo i wahine ui. elike nohoi  me kau ame ka'u i ike pu iho ai.  @ hai aku au ia oe, o ua kanaka la, o Kauna de Berene no ia.  He iwakalua makahiki o ko kaua noho pu ana he kane a he wahine.  O waho o'u kau i ike mai ai. e hauoli ana au i ka hauoli o ka uhane i hoehaeha ole ia: aka, aia iloko o kuu puuwai kahi i aai ai ka ehaeha ame ke kaumaha.  Me ka lawehala ole ana o kuu kino i kela kanaka. aia hoi, ua olelo mai la oia ia'u, me ka naau a puuwai eleele e hoike mai no ia i kela mau leta a'u ia oe, ina aole au e ae e lilo o Alice nei, kuu lei. kuu hiwahiwa, i wahine nana, a-"

  Ma keia wahi ua pio iho la ka leo o ua Barona wahine nei. a hiki ole iaia ke pane hou aku; ke paa 'la hoi o Aliee i kona luaui makuahine. me ka hoopili ana iho i kona mau lehelehe ma kona mau papalina. me ke kahea ana iho:

  "E Mama, e mama!  Ua ikeia ae la no ka mea pohihihi au ame a'u i huna ai!  Nolaila, e hele anei kaua, a haalele kaua ia Papa e noho hookahi iho mahope nei?"

  "Ae," wahi a kona luaui makuahine i pane ae ai, "E hele kaua.  Aohe o kaua home ma keia hale.  Ua nana ole mai ka makua o kaua i ka wa i hala ae.  E kuu lei, e hele kaua!"

  I keia wa i ku ae ai ua Barona wahine nei. paa iho la i ka lima o kana kaikamahine. a nana aku la ia i kana kane, me ka pohina ana o kona mau maka i ka waimaka: aka, aia ma na papalina o Barona Malatere.  e hiolo mai ana he mau kulu waimaka. a wehe ae la ia i kona mau lima elua, ame ka leo haaluu pane ae la ia:

  "Kuu wahine. kuu kaikamahine. mai haalele mai olua ia'u Owau. owau ka mea i hewa: owau kai aloha ole i kuu kaikamahine.  E kuu keiki. e hele mai. eia no au o kou Papa. kou makua. Come to my arms!"

  Alaila, holo aku la ia a puili ae la i kana wahine ame kana kaikamahine. Kana wahine ma kona aoao akau. a o kana kaikamahine hoi ma kona hema: a hookuu like iho la lakou i na mapuna o ke aloha-na makua i ke keiki. ke kane i ka wahine. ke keiki i kona mau makua; o lakou hoi ekolu ia lakou ino.

(Aole i pau.)