Ka Nupepa Kuokoa, Volume XXXVIII, Number 38, 22 Kepakemapa 1899 — Hala mai keia Ao aku [ARTICLE]

Hala mai keia Ao aku

Ua loaa mai ia makou ka lono kaumaha no ka make ana o Akeneki Nunehiwalani Kalua, kaikamahine a Lunakanawai J. W. Kalua ame Mrs. Kalua. Ua haalele mai keia opio i keia ola ana, ma ka hora 2 o ka wanaao Poalua o ka la 12 o keia xjiahina, ma kahi noho o kona mau makua, ma "Halaulani Home," Wailuku, Maui. Iloko no o ka ma'i oia i waiho ai, mai ka malama mai o Mei aku nei, a hala wale aku la. Ua hooikaikaia na lawelawe lapaau ana a na Kauka,.aka, ua pahu'a ia mau lawelawe hoola ana i ka.nui no o ka ma'i i paa iho iloko o ke kino o ka mea i hala aku la ipa kela aoao. O Kauka Armitage kai haawi i kana mau hooikaika ana e pakele ae ke ola o ua -wahinē opio nei, aka, ua nele na manaolana, a ua ha'iha'iia na noonoo maikai, oiai, ua lalau mai ka Anela o ka make i kana, a ua lawe aku la. Ma ke kakahiaka Poakolu mai malamaia ka anaina haipule hoolewa maloko o ka luakini "Kaahumanu." O na Rev. A. Pali me Beckwith ma ka awai haiolelo. He ku na himeni .i meleia ika maikai ame ke aloha. Ua nui na waimaka i hoohaniniia. Aloha, aloha ia opio ou. e Hawaii! e Hawaii! Ma ka huakai hoolewa, ua komo mai na haumana o na kula Aupuni o Waihee, Waikapu ame Wailuku iho nohoi; o na keiki kula kekahi o ka Misiona Pake; a o na keiki nohoi o ke kula o Sana Anatoni (Kula Katolika). Na haumana e alakaiia ana e ka lakou poe kumu. O na poe hapai pahu, oia o Senatoa A. N. Kepoikai, Konela Keoni Likikini, Konela W. H. Cornwell, Makai Nui L. M. Baldwin, na Lunakanawai W. A. McKay ame S. E. Kaleikau, Sam Kalama, E. H. Rodgers, Henry Robinson, Geo. Hons, Kalei Kahaulelio ame John T. Aluli. " Ua hanauia o Akaneki Nunehiwalani ma Wailuku, ma ka la 27 o Maraki, 1875, a nolaila, ua haalele mai la oia i keia ola ana i ka 24 a oi o kona mau makahiki. Ua hoonaauaoia oia ma ke Kula Kaikamahine o Maunaolu; a ua noho i hookahi paha makahiki ma ke ,Kula Kaikamahine o Kamehameha. Ma ka hapa hope o ka makahiki i hala, waiho oia i ke kula no ke onawaliwali o ke ola, a hoi no Wailuku.