Ka Nupepa Kuokoa, Volume XXXVIII, Number 38, 22 September 1899 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

BUKE XXXVIII,  HELU 38.  HONOLULU, POALIMA, SEPATEMABA 22, 1899.  NA HELU APAU, 2773.

PAPA KUHIKUHI.

Manao Pepa:                                       Aoao.

Ka Hakoko ...                                      2

Kula Kaiulani ...                                  2

Na Luna Aupuni o Hawaii nei ...        2

Moolelo:

Ka Liona o ka Akau: Hopena ...         4

Ke Aloha o Kuu Makuahine ...                       1

Keia Ao, Kela Ao ...                           6

Na Mea Huna Pohihihi Ekolu ...         3

Na Mea Ano Nui:

Hala mai keia Ao aku ...                      6

He Ululaau i lilo i Pohaku ...               3

Hoahewaia o Dreyfus ...                     2

Hookolokoloia ka Lunahoopono-

  pono nupepa ...                                 2

Hunahuna o na Aina E ...                    4

Hunahuna Mea Hou o Pahala ...         6

Ki Gula o ka Baibala ...                                   3

La 16 o Sepatemaba ...                                    4

Lawe Haaheo ka Hoku ...                   1

Moolelo Hoike Kula Sabati ...                        5

Na Elele Hawaii no Bosetona ...         5

Nu Hou o na Aina E ...                                   2

Papa Hoike Manawa ...                       6

Wasinetona ma Amerika---Home

   Noho o Liliuokalani ...                    5

Ke Aloha o kuu Makuhine

KE ALOHA O KA'U MEA I ALOHA AI.

Ka Mana o ke Aloha.

He Moolelo Walohia

No keia mau huaolelo hope a Kauna de Berene i pane  aku ai imua o Alice, ua o puanuanu aku la ke puanuanu o na manao hoowahawaha a hoopailua iloko ona.  Ma ia wa nohoi i oni paa iho ai ka manao koa ame ka wiwo ole iloko ona.  Ike iho ia ia ma ia wa, aohe ana hana pono e ae e hana aku ai ma ia wa, oia no kona kue ana aku i na kane nei ana ma ke Kanawai o ka aina, elike me ka hiki iaia ke hana, mamuli o kahi ikaika wahine i loaa iaia.  Nolaila, me ka hiehie a kulana kilakila nohoi, ku ae la iluna, ame ka nanaina haaheo me ka ui lamalama e hoonenehiwa ana maluna ona ma ia wa, pane mai la ia:

"E Monesiu de Berene, e hoomaopopo iho oe, me ka hoohewahewa ole. ua make o Alice de Maraceli.  A e hai aku nohoi au ia oe, o ka wahine elike me a'u nei, ma kona wa e hooholo ai e hana a e hoopaa hoi i kona manao ma kekahi mea, aole loa auanei au e hoololi wale ae ia manao paa i hooholo pono ia e a'u, oia hoi, he wahine au i lauwili ole ia kona mau aoao apau.  O ka luakupapau, oia ka pahu hopu e hele aku ai au me na manao paa la o'u.  O kuu ola ana i keia wa elike hoi me kau i olelo mai la, he nohona huna---he nohona i piha i ka pouli---piha i ka "haeha ame ke kaumaha---he nohona hoi i kaawale ai au mai ka hua mai o kuu puhaka, kuu keiki aloha hoi---ke keiki a'u i hapai ai iloko o ka ehaeha, a'u hoi i noho hoomanawanui ai me oe, aohe mea e ae nana i haawi mai ia'u i keia nohona ehaeha, a'u e auamo nei; aka, o oe maoli no ka mea nana i hai-na mai ia'u iloko o keianohona au e olelo hoonaikola mai nei, he nohona huna keia a'u e noho nei.  Kai nohoi i huna au ia'u iho mamuli o kau mau hana lokoino ia'u ame kuu makuahine, ka mea a'u i aloha ai me kuu puuwai apau ame kuu uhane nohoi apau.  Aole loa au i aie i kekahi mae ia oe.  O ko ai i aiia ai e a'u he ai ia i ai ia me kuu waimaka e helelei ana ma kuu mau papalina.  O ka lole a'u i aahu ai mai ia oe mai, he lole no ia i aahuia e a'u me ka helu ia mai e oe.  e hai aku au ia oe, ua mare oe ia'u, aole mamuli o kou manao maoli ana e lilo au i wahine nau iloko o kou aloha---aole; aka, na mare oe ia'u no kou manao ana e waiwai ana oe ma o'u nei.  O ka waiwai ka hoi o kuu keiki, oia ka waiwai e loaa ai ka mea e pau ai ko'u mau pilikia, a e loaa ai hoi kau mea e uhauha ai oe me ko nana ole i kuu keiki.

"O oe, e ku mai nei imua o'u, ua like oe me kekahi uhane lapu inoino loa imua o'u.  He mea oiaio, eia au ke auamo nei i na haawe o ke kaumaha ame ka pilikia, aka, ua pomaikai nae au, ua a'o mai oe ia'u iloko o kau mau hana pono ole apau, e ike au ia mea he hoomanawanui, a oia mea he hoomanawanui, oia ka mea nana au e kokua mai nei.  Nau au i hana ino.  Mai manao oe mamuli o ko kaua mareia ana a paa malalo o ke kanawai o ka aina, e hoole aku ana au ia oe i kou mana ame kou kuleana maluna o'u ma ia ano.  Ua ike no au, he kuleana kou maluna o'u, oiai hoi e mau ana ka paa ana o keia kanawai mare mawaena o kaua; aka, ua hiki loa ia'u ke oki a kaawale aku keia kanawai o ka mare, kaawale oe, kaawale hoi au mai ia oe mai.  Ke malama laahia nei no au i kuu kino elike me ka hoohiki a'u i lawe ai ma ka wa i ku ai au imua o ke kuahu mare me oe.  O ka Alice i mareia ai e oe, aia no ia iloko o ka luakupapau, aka, owau nei la, o ka Alice no ia i hoea, mailoko mai o ua luakupapau koou la au i kiola aku ai i ka Alice i mareai ai e oe me ke aloha ole.  E hana mai oe maluna o kuu kino nei elike me ka mea au i manao ai he mea ia e ko ai kou makemake; aka, aole loa au e hoi hou ana me oe.  Ina no oe e hoopii ana ia'u imua o na aha hookolokolo o Farani nei, elike me kau i hoike mai nei ia'u, e hana koke aku o e elike me kou makemake.  Hele oe imua o na aha o keia aupuni, hele no au imua o ia mau aha, a malaila auanei au e hoike ai i kou ano maoli.  E hoike aku ana au imua oia mau aha i kau hana lokoino lua ole i hana ai maluna o kuu makuahine:  Ua oi aku ko'u ae ana e hoi hou aku au a noho pu me oe.  Aole loa au e ae e hoi hou me oe.  Aole---aole.

"He wahine au mailoko mai o ka inakupapau.  Aole au nau i hoopakele, he okoa ko'u mea nana au i hoopakele, a iaia au e aie nui nei no kona lokomaikai.  O kau i hana ai, i lawa no a ike oe, ua pau ka hanu ana o kuu hanu, oia no kou wa i olelo iho ai iloko o kou naau pepehi kanaka, ua make ua wahi wahine nei, a ua pau kuu pilikia a e olokaa aku au i kona kino lepo iloko o ka luakupapau.  Aka, i oie ke aloha o ke Akua, hahao oia i ka uhane o ke aloha iloko o ke kanaka i kiolaia ai e oe maluna o ka moana, e hele mai oia e ike no ka wa hope loa i ke kino o ka wahine i paa ai kona manao aloha, aia hoi ua hoopomaikai ia kona huakai mamuli o ka hiki ana iaia ke lilo i mea nana au e hoopakele mailoko mai o kela luakupapau i kiola aloha ole iho ai oe ia'u:  a o ua kanaka ia nae ka mea au i olelo hoonaikola mai nei imua o'u, he ipo ia na'u.  E ke kanaka hilahila ole, heaha kou pilikia ina he ipo ia nau?  Heaha la ka hewa ina e lilo au i mea aloha aku iaia?  Aole anei ou hoomanao o ka'u kane hoopalau nohoi ia mamua aku o ko'u mohai ana aku i kuu kino ia oe, i mea e pakele ai kuu makuahine mailoko mai o kau mau hana lokoino apau iaia?  E hai aku au ia oe me ka oiaio loa, o kuu puuwai apau aia no ia me ke kanaka nana au i hoopakele mai loko mai o ka luakupapau.  O ka hanohano au i hoike mai nei ia'u, he lapuwale ia mau mea apau ia'u.  Ina no oe he kanaka ilihune a he kanaka nae oe i alohaia e au alaila, e noho ana no au me oe iloko o ka hauoli.  Aohe o'u nana ia mea he hanohano.  O ka nohona ilihune o ke kane ame ka wahine iloko o ke aloha o kekahi i kekahi me ka oiaio, ua oi loa aku ia mamua o ke kane ame ka wahine e noho ana iloko o ka waiwai ame ka hanohano e aloha ole ana nae kekahi i kekahi.  O keia ano nohona nae kekahi pili ana o ka olelo, lapuwale o na lapuwale, pau na mea apau i ka lapuwale.  O ko hanohano i olelo mai la ia'u, oia nohoi ka hanohano lapuwale a'u ponoi nei nohoi i ike ai, he lapuwale.  Olelo mai nei oe i ka nui o ka aloha i kuu mau mam.;mkua, he keu oe a ke kanaka hoopunipuni nui wale, a ua ike no kou lunikehala ia mea.  Aloha ka ananei oe i kuu mau makua.  E Kauna Berene, ke kane a Alice e waiho mai la iloko o ka luakupapau au i kanu ola ai iaia, aole loa au e hoi hou me oe, oiai no nae, owau no o Alice i ola hou mai mailoko mai o ka luakupapau, kahi hoi o'u i kanu ola ia ai e oe."

Ua puai ae la ka ula ma na kumu pepeiao o ke Kauna Berene i ka lohe ana aku i keia mau olelo i hoopukaia mai e Alice, ka mau olelo i hoopukaia mai e Alice, ka mea ana i manao ai e maliu mai ana la oia ma na olelo mali ana i olelo aku ai iaia.  He mea oiaio, ua piha loa kona naau i ka ukiuki ame ka huhu, eia nae, ike iho la ia he mea makehewa wale no iaia ke paio aku me Alice ma ia ano, nolaila, pane aku la ia:

"E Alice, aohe o'u nana i kau mau mea i hoopuka mai nei imua o'u; aka, manao nae hoi au mamuli o keia mau mea au i hoopuka mai nei imua o'u, ua ku oe ma kahi o kapaia ana hehena."

"Malia naha he oiaio kau i hoike mai la, o ka mea maopopo nae, ua lohe aku la oe i kuu manao nou; nolaila, e haalele mai oe ia loko nei o kuu hale."

Me na onohi maka e huilaia ana e ke ahi o ka inaina pane aku la ua Kauna de Berene nei:

"Pehea hoi ina au e hooholo ana e noho no au moloko nei o keia hale a hiki i ka hoea ana mai o George Lamabeta?  Pehea iho la ia?

Ua hoopuka aku la ua Kauna nei i keia ninau me ke ano hooioi a ku no hoi i ka hookano.

"Alaila, ma kou ano he kane oe na'u mamuli o ke kanawai o ka aina, o oe no ka ona maluna o ko'u mau waiwai apau, a oiai, ua makemake iho la oe e noho maloko nei o nei hale, alaila, e noho oe maanei, a e haalele au ia oe maloko nei.  E hana oe elike me kou makemake ma loko nei o keia hale.  Aka, e hoomanao nae oe, aole keia waiwai mai ia oe mai.  O ko'u waiwai ponoi no keia."

I keia wa i hiki hou ole iho ai ua Kauna nei ke uumi iho i ka nui o ka huhu ame ka inaina i oili mai mailoko mai o kona umauma i keia wa, ua like loa me kekahi luai pele e hanini ikaika loa, pela ka nui o ka huhu e baila ana iloko ona.  I keia wa i pane aku ai ua Kauna Berene nei me ka leo inaina loa:

"E makaala loa oe i ke ano o kau mea e olelo mai nei imua o'u.  Aole loa oe i ike i ka nui o ka ehaeha au e houhou mai nei i kuu uhane me kena mau huaolelo au e kamailio mai nei, a---"

Aole i pau pono aku na huaolelo a ua Kauna nei i makemake ai e pane aku imua o Alice i ka hoopukaia aku, aia hoi, ua huli ae la o Alice a anehe aku la e hele, a haalele iho la i ke keena, a ia wa i pane aku ai ke Kauna:

"K kaili loa ia ana e a'u ko keiki.  Aole loa oe e ike hou ana iaia."

Huli hou mai la o Alice ame ke kulana hiehie o ka wiwo ole, pane mai la ia:

"Elike me ka nui o ka eleele o kou puuwai, pela no oe e hana aku ai, aka, aole loa e nele kuu keiki, ka hua o kuu puhaka, i ka pule a kona luaui makuahine imua o ke alo o ke Akua o ka poe hoopono a o ke Akua hoi e kali ana i ka mihi ana o ke kanaka hewa.  E nonoi mau aku ana ka pule a kona luaui makuahine ehaeha i hainaia e oe, e lilo oia i kanaka naau hoopono.  O ke Akua auanei kona makuakane, a o ke Akua nohoi kona makuahine."

"E ao aku ana au iaia e kuamuamu, a e hoino oia i ka inoa o kona makuahine."  wahi a ua Kauna nei i pane aku ai me ka inaina.

"E hiki mai ana no ka la e ike pono ai oia, kuu lei aloha, i ka moolelo walohia a ehaeha o kona luaui makuahine, a nana no auanei e hooholo iho iloko o kona naau hoopono i ka mea o kaua i hewa.  Oia auanei ka lunakanawai mawaena ou ame a'u."

Me na onohi maka e puu ana, me ka helehelena i puniaia e ka huhu ame ka inaina, ka leo hoi i haaluiuia e ke kuakoko o ke ano hehena, lele ae ia ua Kauna nei iluna a pane aku la imua o Alice:

"Wahine lapuwale.  Manao anei oe e pakele ana oe mai a'u aku?  Aole.  O ka'u uhai hele iho la no ia mahope ou, a hiki i kou wahi e loaa ai oe ia'u:  a paa hoi oe iloko o kuu lima nei.  Ina aole oe e loaa ana ia'u i keia la, alaila, ei aku no ua wa ou e loaa ai ia'u.  Aka, i keia wa e hai aku au ia oe, e pepehi ia ana e a'u ko ipo aloha.  Lohe aku la oe?"

"Alaila, he karaima hou no ia ou e ku aku ai oe imua o ka noho hookolokolo o ke Akua, ina e kau ole ana ko ke ao nei hoopai maluna oui hoopai no ia hana hewa au e hana ai.  O ke Akua hoopono ka puuhonua o ka poe pono," wahi a Alice i pane mai ai, me ka maikai, aka, me ke kuoo nae ame ka hiehie.

No keia kulana hanohano a haaheo a Alice i hoike mai ai imua o ke Kauna, aole i kana mai ka piha hehena loa o ua Kauna Berene nei i ka ua mea o ka huhu, a ua lilo hoi keia hana a Alice i hana mai ai imua ona, me he mea la he i'a ia i lomiia e Alice i loko o kona mau lima, ka hele a palupalu, a ku hoi i ka hoka.

Nana aku la hoi ia maluna o ua wahine nei ana, ike aku la ia i ka ui e lamalama mai ana maluna o kona mau ano apau, ka hiehie e haiamu mai ana maluna ona, a he nani maoli no o Alice i kana ike aku.  He haaheo ma kona oiwi, a he ui maoli no.

"Alaila," wahi a na Kauna Berene nei i pane aku ai imua o Alice.  "Aole oe e hoi pu ana me a'u?"

"Aole loa au e hoi aku me oe.  Aole ka oe i lohe i ka@ mea i ha'i mua aku nei ia oe?"

I kela wa i kahuli ano e loa ae ai ke ano apau o na Kauna nei.  Nana aku la kona mau onohi maka iaia me ka hulili ana o ka inaina, a ua like ka o ana o na kiei ana a kela mau maka, me ka o ana a ka pahikana oi loa.  He ano e wale no ke ano o keia nana ana aku o ua Kauna nei iaia.  A ma ia wa i kokolo ae ai he hopohopo puanuanu iloko o kona houpo, a hauli wale iho la no ia iloko ona, aia he manao eleele loa o ka lapuwale iloko o ua Kauna la.  A oiai no ia e noonoo ana, ia wa i hoopuiwaia ae ai oia i kona lohe ana aku i kekahi leo uwe kapalili e pae walohia mai ana mai loko mai o ka ululaau hua a hooho ae la ia me ka pihoihoi nui:

"Heaha la hoi ke ano o keia?"

Holo aku la ia i ka puka aniani, a nana aku la iwaho.  Ike aku la ia me ka weliweli nui, e waiho mai ana kekahi o kana mau kauwa iluna ke alo, ma kekahi alahele o loko o ka ululaau, a aia hoi he elua mau kanaka e kupee iho ana iaia me ke kaula, ma kona mau wawae ame na lima.

I wa hoi huli mai la ia ma kahi e ku ana ke Kauna, a ike mai la ia i ka mino aka hehena ana aku a ua Kauna nei iaia.  Ike koke iho la (Alice) i kona pilikia, a ia wa oia i pane mai ai imua o Kauna Berene:

"E ke kanaka lapuwale!  E ke kanaka lima koko.  Aole loa e hiki ia oe ke lawe aku ia'u mai loko aku o keia hale me ke ola e mau ana iloko o kuu kino.  Nau ponoi i waiho i kuu kino nei iloko o ka pahukupapau, a e haawi aku no au i ua kino la ia oe he kino puanuanu na ka make.  E ka pepehikanaka.  Eia mai kuu kino.  Kii mai oe."

I kela wa i lele aku ai oia ma kahi e ku mai ana ka puka uwahi o ke kapuahi i hoopumehana, a, aia hoi malaila e kau ana he pahi puhaka uuku, nona hoi ke kuau i hanaia me na ponhaku momi.  Elike hoi me ka hikiwawe o ka lele ana aku a Alice e hopu i ua pahi la, pela nohoi ka hikiwawe o Kauna Berene i lele aku ai a paa aku la o Alice i lele aku ai a paa aku la o Alice iloko o kona mau lima.  Huki mai la oia ia Alice a paa pono iloko o kona mau lima, huki ae la ia a hemo ka pahi mai loko aku o ka lima o Alice, alaila, uhae ae la ia i ka lipine e paa ana ma ko Alice puhaka.  Me ia mea hoopiha iho la ia i ka waha o Alice, i hiki ole ai iaia ke uwe ae.

Ua oni ae la hoi o Alice me ka ikaika a hemo ae mailoko ae o na lima o Kauna Berene, aole nae he hiki, ua paa loa iho la oia i na puili ikaika loa ana a ua Kauna la.

He mea oiaio, e haluku ana o loko o ka rumi ia wa, oiai na kapuai o Kauna Berene e nee ana me ka hauhalaki ana i o a ia nei elike me ka ikaika o na nee ana o kona kino i wahi e loaa ai iaia na lanakila palekana ana maluna o ka wahine ana i kii mai ai.

I ka lohe ana hoi o ka wahine italia e hana ana ma ka hale oluna i ka halulu launa ole mai ma ke keena o lalo, ua holo iho la ia ilalo.  Iaia nae i hoea iho ai ilalo, ike mai la ia i ke komo ana aku a keia mau kanaka malihini elua.  Mamuli hoi o ka pupuahulu loa o ke komo ana aku a keia mau kanaka a i ko laua ike ana aku i ka holo pu@ki ana mai a kela wahine mai luna mai, ua manao wale ae la no laua he @ loa aku no paha kanaka i koe e holo mai ana mai luna mai, ua huli ae ia laua a haalele iho @a @a loko o ka rumi a laua i komo aku ai.

O kahi wahine Italia noi kela, elike me ka lionawahine a@u ua lele mai la @a maluna o ke Kauna Berene, ame kona mau maliuu ame ke nahu ana haawi mai la oia i kekahi kulana hakaka ikaika loa i ike ole ia e ua Kauna la i kona mau la opiopio.  O ke koe ame ka uwalu ana a ka popoki aniu, he hapa iho la i na uwau ana a keia wahine.  Aole hoi oia wale no, aka, ua hoopili mai la oia i na oi o kona mau hiho, a e kuu makamaka heluhelu, he oiaio paha ka olelo, o ke hahu ame ka uwau, he eha no ia.

Aole hiki ia Kauna Berene ke ku lomaloma iho ia wa.  O kana nana pono wale no e hana ai, oia kona haawi ana i mau puupuu mahanahana loa i ua wahi wahine Italia nei.  Aia nohoi ua wahi wahine nei ke hoke la ia wa i ke kuhea me ka leo nui:

"E kokua!  E kokua!  He pepehikanaka!  He pepehikanaka!  E kokua!

He aneane he ekolu mau puupu oolea loa a Kauna Berene i kui aku ai i ua wahi wahine Italia nei, a haule aku ia ia iluna o ka papahele.

O Alice ia wa, oia hoi ka wa i hoomaka ai ke Kauna e kui i kahi wahine Italia, ua maule iho @a @a, a ua like oia me ka mea ua make.  Aohe ona oni ae ia wa.

I ka haule ana aku o kahi wahine Italia ilalo, ia wa i komo mai ai kahi ai puupuu o ua Kauna nei me ka pioo nui.  A ma ia wa nohoi i loheia aku ai ke kani ana mai o ka bele kahea ma ka puka mai ma 'ke alo o ka hale.  Ia wa i kauoha koke ae ai ua Kauna Berene nei i kana kauwa e holo koke aku oia e kii aku i ke kaa e hookoke mai ma ka puka pa a laua e hemo aku ai iwaho.

Poi mai la ua Kauna nei i kana wahine a paa pono iloko o kona mau lima, a haalele iho la ia ia loko o ka hale.  Holo aku la ia mahope o Laplace e holo la mamua.  Hoea aku la ia me kana ukana makamae e hii ana me ka pupauaho nui, eia nae, aole ona ike aku i ke ku mai o kona kaa.  O kana wahi kauwa hoi keia ua nalowale honua aku la oia mai ka ike ana aku a kona maua maka.  A, lala i hemo aku ai i waho ma ka puka pa, ua lohe aku la ia i ke kakani ana mai a kekahi mea, a ku iho la ia.

I kona nana pono loa ana aku mamua, aia hoi, ike aku la ia e ku mai ana kekahi kanaka elemakule imua ona, a e kau pololei mai ana ia i ka waha o kekahi pu panapana imua ona.  Ia wa kahea ae la ia me ka leo nui:

"E Laplace, e kokua!"

He mea oiaio, ua hoea mai la malaila ia wa no me ka hikiwawe loa he elua mau kanaka.  Ike aku la ia i kekahi kanaka.  Ike aku la ia i kekahi kanaka, oia no o Robata de Malatere; a o ka lua o na kanaka, oia no kahi kauwa Italia o loko o ka hale.

I keia wa i pane mai ai ke kanaka poohina me ka leo kuuoo imua o ua Kauna la:

"E ke Kauna, mai hilinai oe i na kanaka i hookauwaia e oe mamuli o ke dala ame ka ai.  Elike me na popo ao kaalelewa i puhiia aku e ka makani, pela lakou i nalowale aku ai mai keia wahi aku.  O ka'u e hoonaauao aku nei ia oe e hookuu iho oe i ka lede au e paa la me ka menemene ole iloko o kou mau lima oolea."

"Owai oe e kena ino lapuwale nui e hoao mai nei e noho lunakanawai maluna o'u.  Aole loa au e ae e haalele iho i kuu wahine ma keia wahi.

I kela wa i lele mai ai ke kauwa Italia a Alice me ka ahiu launa ole a paa mai la i ke kani a-i o ua Kauna la, me ka ikaika loa.  Ua haalulu ae la ua ua Kauna la, a hookuu iho la oia i kana paa ana ia Alice, la wa i onou ino aku ai ua kauwa Italia nei iaia iwaho me he onouia ana la no kekahi ilio i hoowahawahaia, a oili aku la ua Kauna nei me he pua la i hooleleia aku mai loko aku o kekahi kakaka a hee nalu aku la kona pauku kino nui maluna o na hua lepo o ke alanui.  Paniia aku la ka puka pa mahope ona.

(Aole i pau.)

LAWE HAAHEO KA HOKU

Ka Paani Ohohia i Ike ia---Haule Hilo

I na Malihini.

(Mai ka nupepa "Ka Elele Hawaii"

mai.)

Mahope iho o ka hala ana o na la loihi o ke kakali hoomanawanui ana o ko Hilo nei, o ka hoea mai o ka hui kinipopo Hoku, aole no ia he mea e hoopau ia ai ke ohohia ia a hiki wale no i ke kakahiaka Sabati iho nei, ka la hoi i hoike ia mai ai e ke telepona, ua ku ae la o Helene ma ke awa haulani o Mahukona, a ua lilo iho la ia lono i hiki mai i mea hoohauoli i ke kulanakauhale.  I ka hora 5 oia la pili ana ua nene aukai la ma ka uapo o Lei Lehua me kana mau malihini, ka mea hoi a ko Hilo nei i kau nui aku ai na maka, a hookipa pumehana ia mai la lakou e ko Hilo nei mau kini no ka hotele.

He kalae a maikai ia la, a he ahuwale hoi na kualono me ka hene o na kuahiwi, a ma o na kukai olelo ana, hooholo ia iho la o ka Poakahi ae ka la e uniki ai laua ma ke kahua hoonou popo ma ke Kula Hanai.  Aka, i ka oili ana mai oia la, ua haule mai la kamalii kolohe o na aina ua kaulana nei, a hooma-u iho la i ka honua, a na hoomau ia mau omaka wai a hiki wale no i ka Poalua a po ia la, a ano poho ka manaolana ina e mau ana ka na-ha o na mano wai o luna@ Ma kahi nae oia manao, ua mohala ae la he hauoli, nokamea, ua oili mai la ka Poakolu me kona nani kilakila, kalae na paia lani, oili mai la ka la me kona mau kukuna olinolino a hoopumehana iho la i ka honua, ike ia aku la o Mauna Loa me kona mau hene ohuku e lapuu mai ana me he puhi la, oiai hoi o Mauna Kea me he moa uakea la i ka malie, a lohe ia mai la ka lono hauoli e paani ana na hui kiuipopo i ka hora elua me hapa o keia auina la.  Ua like keia lono me he uhiwai la i uhipaa iho a ka'i ae, e ake ana o ka hiki mai o ka manawa a ike ia aku la hoi na keiki kaeaea o Honolulu ma ke kahua hookuku.  A o ka ninau nui o ka la, nawai ana la na ai a laua, na na malihini paha, na na kamaaina paha?

Maalo ae la ka hora 12 iloko o ke aheahe malie, a hookokoke mai la hoi ka manawa a ua mau olohe nei e hui ai he alo a he alo, a ike ia aku la na kanaka o na lahui like ole, e momoku ana no ke kahua lealea.  Mamua ae o ka wa e paani ai, ua hoopiha ia ae la ke kahua e na poe makaikai e ake ana o ka ike aku i ka paani ana a na keiki o Kauakukalahale o Honolulu, ka hui hoi nana i lawe haaheo mai nei ka inoa moho o keia kikina kinipopo o Honolulu.

I ka hiki pono ana i ka manawa, ua hookuene pono ae la na aoao elua, a ia wa i ike ia aku ai o na malihini ka mawaho, a o na kamaaina maloko, a he wa pihoihoi loa ia o ke anaina, e hauoli ana a e paipai ana hoi, oiai hoi kekahi poe e ikuwa ana ko lakou mau leo me he la e haehae ana i ke kaomi malie ana a ka Malanai.

I komo mua ana a ka hui Hilo, he eleu no nahili ana, e wili ana, e lapuu ana, e uhau ana i ka makani oiai hoi na kino e lele ana i o a ia nei me ka lapuu ana, oiai hoi ka aoao kue (Hoku) e lawelawe malie wale mai ana no.  A i ka hope loa ua ike ia aku la he hua palahu ka mea e kau mai ana ma ka papa eleele.  Komo hoi ka Hoku, a he hookahi a lakou puni, a kipaku nui ia ana e hoi iwaho.

Komo elua ana he pahee wale no ia i ka pa a ka makani he Onou, a loaa ae he elua omaka a ko Hilo nei mau keiki, oiai hoi ka Hoku ia komo ana he hua kaka ka lakou, a hoi nui ana iwaho e lelele ai.

Komo ekolu ana a Hilo, loaa hou ia lakou he hua kekake, a pau nui ana i ka holo.  Komo mai ka Hoku no ke kolu o ka manawa, a he elima a lakou puni.  Pokeokeo no! Wela ka hao!!

I ka eha o na komo ana, he ekolu a Hilo, a he elua hoi a ka Hoku.  A ke hele wale ala no i ka nani.  Oia!

Komo elima ana, he hua pelehu ka Hilo, a he hookahi manu nene ka ka Hoku.

I ka eono o na komo ana, loaa hou ia Hilo he ekolu puni, oiai hoi kona hoa paonioni he elua wale no ana puni.  Pau keia komo ana me ka piha hauoli mau no o ke aniani i na wa apau, mai ka hoomaka ana a hiki wale no i keia komo ana, e olo ana ka pihe a haalele wale.

I ke komo ehiku, ewalu, me eiwa a ka Hilo he mau mahina poepoe wale no, me he la o ka po ia o Mahealani.  Komo ehiku ame ewalu ana a ka Hoku ua loaa like ia haawina he mahina poepoe.  Aole lakou i paani i ka lakou komo eiwa ana.   I ka hoike ia ana mai e ka papa eleele, he 8 puni a Hilo i ka 11 a ka Hoku.  A ia wa i olino iho ai na kukuna o ua Hoku nei me ka haaheo nui maluna o Hilo iloko o ka hauoli o ka hanohano.

Eia iho na inoa o ka hui Hili ia paani ana:  Easton, Brown, Supe, Rowland, Marshal, Baldwin, Soule, Makaimoku, Brush.

Eia iho ko ka Hoku:  Gorman, Jackson, Davis, Moore, Thompson, Price, Kiley, Holt, McLean.

I ke kilohi a nana ana i ka paani a na aoao a elua, aohe mea e nema aku ai, aka, o ka haawi wale aku no i na mahalo ana.  Aole hoi he olelo ana no ka hui kinipopo Hoku, oiai, he moho oia no Hawaii Pae Aina.  No ka hui Hilo hoi he mahalo nui ia kona, oiai, aole i upu mua ia pela iho la ke kulana e loaa ana iaia ma ia la.  Ua hana lakou i ka hana me ka hooikaika, aka na lawe a lilo ae la no na malihini.

Aole no hoi i lilo kela kahua huinahio i mea no na malihini e kaukaulua iho ai, aka, ua like no me ke kahua i maa ia lakou, oiai hoi ko kakou mau keiki kinipopo ua hele a paulehia i kela kahua apuupuu a alualua no hoi.  A iwa paha a hele aku i ko lakou la kahua, ua like ko kakou mau keiki me he mea ole la, a lilo hoi i mea paani lealea wale ia no.

I ka hora 2:30 o keia auwina la e wlele hou ai ua mau hui la, me kekahi mau hoololiloli hou paha ma ko hilo aoao.  O ka paani hope keia a huli hoi aku na poe keiki la no ko lakou mau home ma ka mokuahi Helene o ka la apopo e haalele iho ana ia Hilo nei.  Ke upu ia aku nei o kekahi ana keia o na paani wikani ana i ike ole ia e ko Hilo nei no kekahi wa.  A oiai he la kulaia aupuni keia, aole no e nele ana ka hoopiha ia o ke kahua paani e na poe makaikai, a loaa hoi he wa mua a hope loa e ike ai ko Hilo nei poe, pela ka e paani ai, a he hoihoi a hauoli ka maka ke nana aku.  ua nui ko lakou mahalo no na hookipa a ko Hilo nei, oiai lakou me kakou i keia mau la.  Ua hoohihi nui no i ka lei lehua o Hilo.

Ma ka paani ana a keia mau hui kela Poaono i hala, na lilo hou no keeo i ka Hoku.  He 3 wale no puni a Hilo ia 13 a ka Hoku.

Ka Lolo.

E ikaika loa ana keia ma'i, mamuli o ka hana nui loa ana, ma ka noonoo a ma ka hana kino maoli paha.  he nui loa nohoi na kumu e ae, a hoeueu mai ana i keia ma'i, oia ka waiho wale ana i ke anu, ka hookina loa ana i ka haua, ka maikai ole nohoi o ka noonoo ana i kekahi wa a pela wale aku.  O ka hoea ana mai o keia ma'i, e nee mai ana no ia ma ke ano nee liilii.  O ka mea mau nae, oia ka hoea mua na mai o ka nalulu, ka nawaliwali a malohi o ke kino.  O na huaale Akala a Dr. Williams no ka poe Nananakea, na mea e loaa hou ai ka ikaika i na lapaau e ae   O ke kaulana laulaha o keia laau, he kumu ia e nana pono ia ai kona ano oiaio maoli.

Me he mea la, aohe paha he kanaka e ae i kamaaina loa ia maloko o ke kulanakauhale o lawrence, Kansas, elike la me Mr. G. H. Snyder.  Hoike mai la o Mr. Snyder imua o kekahi mea kakau nupepa i kekahi moolelo kupaianaha.  penei kana olelo:

"I keia wa he kanahiku ka nui o ko'u mau makahiki.  He ekolu hoi makahiki i hala ae nei, ua ike iho la au i ke anu ame ka maeele ma na kapuai wawae, alaila, pii mai la keia anu ame keia maeele a hoea iluna i ke kino.  Wiwi mai la ko'u kino, ono ole nohoi ka ai, a kanea pu mai la nei mea he ai   A Mahope mai, nui loa mai la ka ma'i maluna o'u, a hiki ole ia'u ke hele ma o a maanei.  Hele aku la au imua o kekahi mau kauka kaulana loa, olelo mai la kekahi, he ma'i ataxia ko'u; olelo mai la hoi kekahi he mai'i lolopanee ko'u.  Ai iho la nohoi au i ka lakou mau laau, aole nae he wahi mea a loaa ia'u kahi pono.  Nui loa mai la ka ikaika o ka ma'i maluna o'u.

"I kekahi la, olelo mai la kekahi hoaloha o'u e hoao au i na Haaale Akala a Dr. Williams no na Kanaka Nananakea.  Hoomaka koke aku la au i ka ai ana i ua mau huaale la.  Mamua o ka pau loa ana o na huale o ke poho mau i ka ai ia e a'u, ike iho la au i ko'u oluolu.  He umikumamaha ka nui o na poho i pau na huaale i ka ai ia e a'u, a o ko'u ola loa no ia.

Mai ka nupepa the Journal mai, Lawrence, Kan.

Ua hanaia na Huaale Akala no na Kanaka Nananakea ma ke ano panaiki, a, aia hoi maloko o laila na hunahuna waiwai nui e loaa ai ke ola hou ame ke koko hou.  Maikai hou ke koko, a hooikaika hou ia na aa lolo i hele a nawaliwali.  He mau laau puhili ole keia no na ma'i elike me ka locomotor ataxia, lolo hapa, St. Vitus dance, sciatica, nuralagia, rumatika, nalulu, ka hopena mai o ka ma'i grip, ke kapalili o ka houpo, helehelena nananakea, ame na ano ma'i apau pili i nawahine ame na kane nohoi.

E kuaiia ana na Huaale Akaia a Dr. Williams no na Kanaka Nanakea e na poe kuai laau lapaau, a e hoounaia ku nohoi maloko o ke eke leta, ke loaa mai ke kumukuai.  50 keneta no ke poho, a he eono poho no $2.50, (aole lakou e kuaiia ana ma ke ano e ae).  E kauoha mai ia Dr. Williams Medicine Company, Schenectady, N. Y.