Ka Nupepa Kuokoa, Volume XXXVIII, Number 28, 14 July 1899 — Page 2
| This text was transcribed by: | Elephants |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA NO KA LAHUI HAWAII.
KA
NUPEPA KUOKOA
No ka Makahiki - - $2.00
No Eono Mahina. . .$1.00
Kuike ka Rula
| Puka Ana, | 1 Pule | 2 Pule | 3 Pule | 1 Mal | 2 Mal | 3 Mal | 4 Mak |
| Iniha.. | $1.50 | $2.00 | $2.50 | $3.00 | $5.00 | $6.75 | $12.00 |
| 2 Iniha.. | $2.00 | $2.75 | $3.50 | $4.00 | $7.00 | $9.00 | $15.00 |
| 3 Iniha.. | $2.50 | $ | $4.50 | $5.00 | $9.00 | $12.00 | $18.00 |
| 4 Iniha.. | $3.00 | $4.00 | $5.00 | $6.00 | $11.00 | $13.50 | $21.00 |
| 5 Iniha.. | $3.50 | $4.75 | $6.00 | $7.00 | $12.00 | $15.00 | $24.00 |
| 6 Iniha.. | $4.00 | $5.50 | $7.00 | $8.00 | $15.00 | $16.50 | $27.00 |
O na Olelo Hoolaha a pau e hoouna ia mai ana no ka Hoolaha maloko o keia Nupepa e hoouna pu mai me ka auhau, a ina aole, aohe hookomo ia.
--------------
HOOPUKALA O KA
HAWAIIAN GAZETTE CO.
A. W. PEARSON, Luna Nui.
JOSEPH M. POEPOE, Lunahooponopono.
Honolulu, Oahu.
----------------------------------------------------------------------------------------------------------------------------
POALIMA, - - IULALI 14, 1899
----------------------------------------------------------------------------------------------------------------------------
KA MAI AHULAU ASIA
---------
He ma’i keia e halihali ana i kekahi inoa ku i ka hoolele hauli, a hooweliweli nohoi. Ua kapaia keia mai e na poe ike lapaau, he “Black Plague”, he “Ahulau Eleelie” paha ia ma ka unuhi ana ae ma ka olelo Hawaii. O keia ma’i, ka makou i makemake ai e kamailio ma keia wahi o ko makou pepa.
I ko makou kamailio ana maluna o keia kumuhana, ke makemake nei makou e hoomaopopoia mai, aole makou i manao, e kamailio aku no ke ano e hoolaia ai keia kupueu hoomailo i ke ola o ka lahui; aole nohoi makou i manao, e hoakaka aku i mau rula e hiki ai ke honaauoia ka lahui oiwi o ka aina, no ke ano e hiki ai ia lakou ke hooponopono iho i ko lakou noho ana, oiai ua manao makou, aia iloko nei o ka aina, oia hoi, aia iloko nei o ke Aupuni, he poe i hoomana pono ia e ke kanawai o ka aina, ia lakou ke kuleana ame ka mana no ka hoomaopopo ana i ka palekana o ko ka lehulehu ola, mai na holapu ana mai a na ma’i lele mai waiho mai, a pela nohoi me na ma’i lele mailoko ponoi ae nei o ka aina; a o ua poe kanaka la a ke kanawai i hoaahu ai me keia mana, oia no ke kino i hoouluuluia o ua poe la iloko o kekahi aha, i kapaia he Papa Ola.
O keia ka Papa nana e kiai pono i na hoonee hana ana a kela ame keia ma’i ahulau e oili ana mailoko mai o ka mea a makou e kapa aku ai he Papa Make. O ka make mai ka ia Papa, alaila, o ke ola aku hoi ka ko kakou Papa. A no ia mea, ua hiki ke hoonohonohoia ke kulana o keia mau papa i kahi ame kahi, ma ke ano elike me keia: Papa Ola kue ia Papa Make; a i ole, Papa Make kue ia Papa Ola.
Aole keia mau Papa he hoaloha no kahi ame kahi. Maka oiaio a pololei maoli, aole hiki ia Papa Ola ke lilo i mea kokua i na hana a Papa Make; ke ole e lilo o Papa Ola i mea makemake io e kokua aku i na hana luku ana ole a Papa Make.
I na wa i hala, ai kaa hope ae nei ma ka wa e ku ana ke Aupuni i kapa mau ia, he “Aupuni Popopo”, oia hoi, ke Aupuni Moi, ua ikeia ma kela wo ame keia wa e hana ole ai ka Papa Ola, i na keehina hana e kaohi, a e keakeaia aku ai ke komo ana mai o kekahi ma’i lele (m’ai/ma’i ahulau) ina no he uulu, a he nui paha ia ano ma’i-he nawaliwali a ikaika paha ia-ua lilo iho la kela hana hoopalaleha a ka Papa Ola i mea e ahewaia ai k Aha Kuke Aupuni Moi, ua ikeia m kela wa koke na paia o loko o ka luakini o Kaumakapili, a pela nohoi ma na wahi e ae o loko nei o ke kulanakauhale i na leo hooho inina o na haole ame na kanaka, puka ae la na olelo hooholo ahewa a hilinai ole i k Aha Kuhia, lu ia mai la n leo hookaukaweli no ka poino ame ka make o ka lahui kanaka, on ka hoohemahema a makaala ole a ka Aha Kuhina ame ka Papa Ola; a kapaia akula ka Papa Ola, a o ka Aha Kuhina oia wa, ua makemake no laua a i elua, e komo mai ka ma’i lele, ka ma’i luku, a o ke ahulau hoi iloko nei o keia Pae Aina i mea pepehi a luku i keia lahuikanaka. Piha na pipa ame na huina alanui o Honolulu nei i na leo hauwalaau inaina o n kanaka, mai ka ili-ulaula a na ili-keokeo, mai ka hune a ka waiwai; aohe ma koe. Hewa aku, hewa mai, wahi a na wa olelo ana. Lapuwale aku, lapuwale mai, wahi a na ke ana a ka lehulehu. Pono loa e hoopauia keia Aha Kuhina, e kipakuia, e olepeia, a e kaiehuia me ke ka’ulua a kahalia ole, oia na leo inaina e lalapa ana ma na waha o na kanaka.
Aka, i keia wa pehea la? Pehea hoi? E nana i ka wa i hala, a e hookuku ae i ko keia wa, a e loaa no ka ike ame ka naauao. Kaikoo ka mua, kaimake a maloo kahakai ka lua. Ooi ko-kala o ke kalaihi i ka mua, pipika ko-kala i keia wa. E mea hoi kau “Aole eu i ka haua e ke anu
Ua oni wale i ke oho o ke kupukupu,
I na hoaliko pua kaunoa,
I ka loiele ia e ka hau.”
O na poe iloko o na hale aniani, e pakele ana paha lakou, oiai, he lehulehu wale na wahi e ike mai ai lakou i kahi a ka ma’i lele e kolo aku ai, a hiki ia lakou ke alo ae. Aka, o na Hawaii maoli, pehea lakou?
Ma ka wa o na Papa Ola mua i ke “au Aupuni kapulu”, e ikeaia ana na hoolaha Rula Alakai a kuhikuhi no ke ano o ka malama ana o na kanaka ia lakou iho-ke ano me na ouli e hiki ai ke ikeia ua ma’i la maluna o ke kanaka-ka hana e pono ai ke hanaia e ke kanaka, a pela aku, ma ka wa i manaoia e komo mai ana he ma’i ahulau. Ua like keia me na kukuna like keia me na kukuna hoomalamalama maloko o na hale pili, na hale laau; a, aohe hoi olelo ana no na hale aniani, oiai e piha malamalama mau ana o loko oia ano hale.
Ke kali nei makou o ka puka mai o na Rula o keia ano mai ka Papa Ola mai o keia au, a makou i oleloai, he Au Holomua keia, he Au e pono ai ka Hawaii, ke Au hooponopono Aupuni Popopo ole, eia nae, mai ka wa i lohe mau ia ai, ua hoea mai he moku me keia ano ma’i, a hoea mai i keia wa, aole loa makou i ike iki he mau Rula a he mau Hoakaka kekahi o keia ano i hoopukaia mai e kela Papa, no ka pono o ka lehulehu. Ua milenio anei na Papa elua? Pulima aloha anei ka hooikaika e ola me hooikaika e ola ole?
Ke manaoio nei makou, a he wa kupono e ae i ka Papa Ola o keia wa, e haawi mai a i na Rula Alaka’i a Kuhikuhi akea no keia “Ma’i Ahulau Eleele” elike la me keia wa.
Hilinai ia ke Keena Hulihonua o ke Aupuni, oia hoi, ke Keena Ana Aina Aupuni, malalo o Prof. Alexander, no ka hoike e ana mai oia keena, ma o Laiana Opio la, i kahi wa, aole no i liuliu aku nei, e hu, a e kahe hou ana ka “Pele” o Hawaii, no ja wa aole no i liuliu mai ia wamai; a eia io ke kahe nei ua “Pele” la.
Aole o makou ahewa i ka Papa Ola ma ke ano, ua hoohemahema ia ma ka hana e pili ana i ke pale i keia ma’i pili ana i ke pale ana aku i keia ma’i ahulau, aole e hehi mai kona mau wawae ma keia aina, oiai ua paulele no makou, eia no ia ke hawi nei i kana mau kiai ana ma keia hana; aka, aohe noe mea hewa ke loaa mai iia mai na Rula Alakai a Kuhikuhi e pili anai keia “Ahulau” a “Ma’i Lele” hoi, no ka pono o na kanaka Hawaii i ke “opu weuweu”, wahi a kahiko.
----------------------------------
NA HAWAII-AMERIKA.
--------
O ka inoa keia a kekahi mea kakau o makou mai Kona Hema, Hawii mai i kapa ai i na Hawaii oia apana i laulima pu ae ma na hana o ka La Eha (4) o Iulai nei, i malamaia ai ma ia apana.
Ma ko makou hooomaopopo ana he inoa keia i kapaia mai a e ia mea kakau, no na Hawaii apau-ilikeokeo, ulaulaa ano e ae hoi, i hawi i na kakoo ana ame na hooikaika ana e hoohui ia o Hawaii Aupuni me Amerika Aupuni, a lilo o Amerika i kahu malama i ko Hawaii nei palekana, a mau ke noho maluhia ana o ko Hawaii lahui, aole e holapu wale ia mai e na lahui e ae.
He Hawaii-1Amerika/Amerika ke kanaka Hawaii maoli i kakoo i ke kumuhana hoohui Aupuni, ma waena o Hawaii nei ame Amerika. He Hawaii-Amerika ke kanaka i hanau ma Hawaii nei, (no kah e mai nae na makua) i haawi i na kokua ana i mea e hookoia ai ko Hawaii nei hui ana me Amerika. He Hawaii-Amerika, ke knaka malihini i hookaukolo kana mau hooikaika ana e ko “ka upu i upuia ai” e hui o Hawaii Aupuni me Amerika Aupuni.
Ma keia wahi, ke makemae nei makou ke hoike aku i ko makou manao imua o na Hawaii-Amerika maoli, a oia keia:
He mea pono i kia poe Hawaii ke hoouna i Komisina no ko lakou aoao iho ma keia noho ana mai o ka Aha olelo Nui o Amerika, ma ka malama ae nei o Dekemaba, i mea nana e hoomaopopo i ko lakou mau pono Kivila, elike me ka mea e ikea ana he pono no lakou iho.
Ke kamailio nei makou i keia manao, aole mamuli o ko makou manao ana e loaa ole ana i ua poe Hawaii-Amerika maoli nei na pono Kivila, i ina no he Hawaii-Amerika ili-keokeo ke Komisina e hoounaia ana e ke Aupuni no Amerika Huipuia, elike me na mea e waw wale ia mai nei. Ua manao no makou, e hana ana no kela Komisina Aupun i ka mea pono no ka Hawaii-Amerika maoli; aka, aole nae he hana karaima ka ua poe Hawaii-Amerika maol nei e hana ai, ina no lakou e hoouna i Hawaii maoi ke komisina, ma ko lakou aoao iho, no ke kiai ana no ko lakou mau pono kivila maloko o ka Ahaolelo Nui o Amerika Huipuia. Ke manao nei makou, he hana karaima kiekie loa ka na Hawaii Amerika maoli nei na pono Kivila, hoopalaleha ana i ke kiai ana i ka hoopooponoia ana ame ke kaanaia ana maio kela mau pono kivila, maloko o ka Ahaolelo Nui, a pahola ia mai hoi maluna o na Hawaii-Amerika ma Hawaii nei.
He hana kupono anei keia? Ina keia he hana kupon ole, ke hanaia no ka pono o na Hawaii-Amerika, alaila, ua pono maoli ka hapai ole ana ae i na noonoo ana no keia mea; aka, ina hoi he hana keia i pono ke hanaia, alaila, he mea pono io maoli ke hana aku ia hana.
Ina lokahi like na Hawaii-Amerika, mai ka mokupuni mai o Hawaii a hoea aku i Kauai, e lawe ae i keia koikoi maluna o ko lakou mau hokua ponoi, na lakou ponoi e auamo i na lilo o keia Komisina, aole o makou kanalua iki, e hiki ole ana ia lakou ke hana aku i keia hana.
Ke ole makou e kuhihewa, he kumuhana ano nui loa keia a makou e hoala aku nei i na noonoo ana o na Hawaii-Amerika apau; a e hauoli loa auanei makou ke lohe ma keia mua kokoke iho, ua wheia he mau halawai kukakuka mawaena o kekahi poe naauao, mawaena o na Hawaii-Amerika, no ka noonoo ana i keia manao.
Ke manao nei makou, he mea maikai ke hapai ia ona mau halawai kukakuka o keia ano mawaena o na Hawaii, a hooholo lakou, he oi aku ka pono e haawi i ko lakou mau paulele ame na hilinai ana maluna o ke Aupuni, ma kana mau lawelawe ana ma na mea e loaa mai ai na kanawa kumu no ko Hawaii nei hooponoponoia ana. Ina e loaa ana ia lakou ka manao elike me keia, alaila, he mea makehewa ia lakou aoao ponoi iho i ka Ahaolelo Nui, aka hoi, ina manao lakou, oiai lakou e paulele nui ana i ka ke Aupuni Hawaii kiai ana no ko lakou mau pono, a, he mea hoi e hooi ia aku ai ka maalahi o ka loaa ana mai o ua mau poo (kivila) la mai ka Mana Kaukanawai mai o ke Aupuni Makua, mamuli o ko lakou hoouna ana i Komisina Kuikawa ma ko lakou aoao, alaila, e hooholo lakou pela, a e hana aku hoi.
---------------------
HOU PAHI.
--------
Ma ka po Poalua nei i lawelaweia ae ai he hana hou pahi makai ae nei o Kewalo mawaena o Antone Presa ame Jaciente Miguel, mahpe iho o ko laua hoopaapaa ana ame ke aumeume hahana ana. A ua hoomahuahua loa i ho keia hana mamuli o ke alu ana iho o kekahi poe Pukiki e ae, a ma ia wa e haluku ana na hana hoikeike oolea o ua poe nei i hanaia ai ka hana hou pahi e Muguela maluna o Antone Presa. Ua laweia o Antone Presa ma ka Halemai Moiwahine, a o Miguela i “Kalakaua Hale”.
------------------
MOKU A’O KAUA MOANA NO NA IAPANA
----------
Ma ke ahiahi Poakahi nei i ku mai ai no Honolulu nei ka mokukaua “Hiyei” o Iapana, ma kona alahele mai Kapalakiko mai, a hoea ae nei i Hilo, a mai laila mai hoi a ke awa nei o Kou. He elua paha pule e ka’ulu iho ai oia maanei, alaila, huli hoi aku oia no ka home. O kekahi keia o na mokukaua i komo ma ke kaua ana mawaena o Iapana ame Kina, ke kaua nana i hoolilo ia Iapana i apuni i heluia mawaena o na aupuni mana nui ka honua nei. O ka hoouka kaua i kaulana loa ai keia moku, oia no ke kaua o Yalu.
He 59 ka nui o kona mau “pikimana” a he 400 poe luina. He 21 ka nui o kona mau pu.
---------------------
AHA MEL MA KAUMAKAPILI.
-------------
Ua hai ia mai ia makou ka lohe e haawiia ana he Aha Mele manawalea maloko o ka luakini o Kumakapili, ma ke ahiahi o ka la 22 o keia mahina, e hoomaka ana ma ka hora 7, he Poaono ia.
Aia hoi ma keia Aha Mele e panai ia mai ana na me “hau karima” huihui, ame na bola kope helu ekahi o Kona, i hoomikomiko ia iho me na mea ono ame na “palaoa lauwalu” helu ekahi. A no keia mau mea ai mma kahi “kemu” e “kakiia” mai ai i ka poe makaikai himeni.
Ua hai ia mai nohoi ia makou, ua noiia aku o Miss Cecilia Kealoha Poepoe e kokua mai oia ma keia Aha Mele manawalea e haawiia a ma keia ahiahi i hoikeia ae la, a ua haawi mai oia i kona ae ana; a nolaila, oia kekahi e laulima pu ae ana ma kea Aha Mele.
O na pomaikai e loaa mai ana mai ka “ice cream” mai ame ka inu kope ana, no ka hana hou ana ia i kahi ha halawai o Kapalama.
Ke paipai nei makou i na poe Hawaii oiaio apau e ala e haawi i na kokua ana i mea e paa ai keia hale halawi khiko/kahiko o Honolulu nei.
------------------------
HOOKAHI NO HAMO ANA A O KA OLUOLU NO IA O KA
EHA
--------------
Olelo o Mr. P. Ketcham o ke kulanakauhale o Pike, Kaleponi: “Ma ka wa i ma’i ai kuu hoahanau i make aku nei, a he rumatika kona, o ka Laau Hamo a Kamalena, oia wale no ka laau e loaa ai iaia ka oluolu.”. He lehulehu nohoi ka po i hoike mai no loaa ana o ke ola hikiwawe loa ana o ka eha, mai keia laau hamo mai. E kuaiia ana e BENSON SMITH & CO., na Agena Kuai Kukaa o ko Hawaii Pae Aina, ame na poe hana laau pau, a kuai laau nohoi.
------------------------------------
HE AOO PAIPALAPALA-UA HALA AKU LA
------------
Ma ka la 1 o keia mahina i make ai o Robt. Grieve, ma ke kulanakauhale o Kapalakiko. A nona ke kii a makou e ikeia ana mahope iho nei.
He kamaaina keia no Honolulu nei, a oia nei kekahi o na kanaka i lawelawe i ka oihana hoonoho hua kepau no kekahi mau makahiki loihi, a hiki wale i ka lilo ana ona loaa a i haku no ka Halepai o ka Nupepa “Gazette”.
He kanaka Sekoia keia ma ka hanau ana. I kona mau la opio wale, ua hoe oia i Kanada, a mai laila mai, hoea i Amerika Hupuia. Ua noho hana oia ma ke ano kokua luna hana no na nupepa New York Tribune o ke kulanakauhale o Nu Ioka, e noho luna hooponoponoia ana e Horace Greely, kekahi o na olohe kakau nupepa aka mai loa o loko oia kulanakauhale.
Ma ka makahiki 1864 a 1865 paha, hoea mua mai la oia i Hawaii nei, a komo koke ma ka oihana pa’i-palapala, ma ka wa e hoopukaia ana na nupepa “Gazette” ame “Au Okoa” e ke Aupuni. Ua noho oia ma ka oihana pai-palapala a hiki i kona wa i hookuu mai la i kela ola ana.
He kanaka malama loaa keia. He akahele loa ma kana mau hana hoopukapuka wiwai. A laila i hala aku la, ua waiho iho no ia he huina waiwai mahuahua mahope nei.
-----------------------------------
ALAPAKI OPIO
-----------
Ua laulaha ae ka lono maloko nei o ke kulanakauhale i kahi wa i hala ae nei, e mareia aku ana o Alapaki Opio (Albert F. Judd Jr.), keiki nohoi a Lunakanawai Kiekie Alapaki, me Madeline Perry Hartwell, kaikamahine a Loio Hartwell, ma ka la 21 o keia mahina.
E lawelawe aku ana o Alapaki Opio i ka oihana loio ma Hawaii nei ma keia hope aku.
O ka makou e kalokalo ae nei , e pani o aii ka makalua o kona luaui makuakane ma ka oihana hookolokolo o Hawaii nei.
----------------------------------
LOAA KA MAHA
----------
Me ka hauoli makou e hoike aku nei i mua o ko makou poe heluhelu, ua loaa ka maha ame ka oluolu i ka Lunakanawai Kiekie Alapaki i keia wa, mai na kipona ehaeha i hoolawelawe ae ma kona mau wawae.
------------------------------------
NO KE ANU OMAHA
--------------
Ma ka noonoo ana a ka Hui Kalepa o Honolulu nei, ua kohoia iho la o Mr. Towse, ko makou hoa o ka maka peni, maloko nei o keia keena, i Peresidena no ke Komisina Hawaii e holo aku ana i ka hoikeike nui o Omaha.
Aloha nui oe-
Mai poina oe ia’u-
Ke ike oe i ke anu o Omaha,
Hoomanao ae no oe-
Aia no ka mehana i Hawaii.
Goodbye! Till we meet again.
-------------------------
HE MAKA PENI HOU, HE KAHIKO NO NAE.
---------------
Mamuli o ke kaawale ana aku o Mr. Ed. Towse, ke kokua lunahooponopono o ka nupepa puka la “P. C. Advertiser”, o keia Halepai, ma ke alahele no ka hoikeike o Omaha, ua kohoia aku la o Mr. George Manson o loko o keia kulanakauhale, he keonimana nohoi i maamaalea a i kamaaina ma keia hana e pani iho ma ka makalua i hoohakahakaia.
-----------------
HE MAKANA
---------
Ua haawi makana aku nei ka Lunakanawai Kiekie Alapaki, i ka waihona Buke Kanawai o ka Oihana Hookolokolo he 3 mau buke alakai kanawai i kakauia e Mr. Randolph, kekahi kanaka kakau kanawai kaulana no keia mau la e nee nei. He mau buke keia no na Kanawai ame na Rula e pili ana i na Palapala pili Oihana Kalepa.
-------------------
AOHE WA E PAHU’A AI.
--------
lunahooponopono o ka Press, Anthon, Iowa: “Ua hoohana mau au i ka Laau a Kamalena no ke Nahu, Kolera ame ka Hi, iloko o ko’u ohana no na makahiki he umikumamalima, ua hoike aku nohoi i keia laau i na poe e ae he mau haneri ka nui, a aole au i ike iki i kona pahu’a ana”. E kuaiia ana e BENSON SMITH & CO., na Agena Kuai Kukaa o ko Hawaii Pae Aina, ame na poe hana laau apau, a kuai laau nohoi.
NA RULA
--: O :--
KA POE MAIKAI
-------
(Hoomauia.)
-------
48. He hana ku ole i ka rula kou noke ana i ka akaaka no kau mau olelo hoomakeaka ponoi iho. Ina aole e haawiia mai ana na akaaka ia ana no ua mau olelo hoomakeaka la au i hoopuka ai e kekahi poe e aku, alaila, e manao iho oe, aole no i hoihoia a lealeaia kau mau olelo i hoopuka ai, ao ka hana pono, o kou noho malie iho no.
49. He hana ku ole i ka rula ka hookikii ana i ka noho i hope ma kou wa e noho ana ma ka papaaina. Peia nohoi i kou kuiai ana i ka noho imua a i hope ma kou wa e kamailio ana me kekahi mea. O ka hoopai kupono loa e pono ai ke loaa ia oe no kou hokikii ana i kou noho, ame kou hookaiue ana ae ia mea imua a i hope, oia kou palaha ana iho iluna o ka papahele.
50. Ina he wahine oe, a e noho ana hoi oe iloko o kekahi anaina pule, a anaina maikai e ae paha, alaila, mai ae oe ia oe iho e hoonioni i kou kuli e uwehewehe ai i o a ia nei, a i ole, e noke ai paha i ka hoopanapanau imua a i hope, oiai e kau ana kahi kuli ou maluna o kahi kuli ma kou wa e noho ana maluna o kou noho. He hana hilahila loa keia a kahi wahine e hana ai.
51. Ina ua haawiia mai kekahi buke heluhelu ia oe no kou heluhelu ana a hoihoi aku, alaila, mai noke oe i ke kakau i kou mau manao ponoi iho maloko o ua buke ia.
52. E kapae loa oe mai a oe aku i nei mea he nuku ana. Oia hana na ka poe paa rula ole. Ina he wahi manao inaina kou i kau waiwai ponoi iho, alaila, e waiho kou huhu a he wa okoa aku, a ma ia wa e huai aku ai oe imua o kou hoa, a oe ame ia ke ike iho no ka hewa ame ka hewa ole paha o ka mea i ulu mai ai kou ma-inaina.
53. He hana ku ole i ka rula no kekahi keonimana, ka wehe ole ana ae i kona papale ma kona wa e kokua ai i kekahi lede no ke kau ana aku iluna o ke kaa.
54. Ina e noho luna hana ana oe maluna o kekahi poe limahana mai hoohaahaa oe ia oe iho, mamuli o kou hoolilo ana ia oe iho i kanaka lapuwale mamuli o kou nuku a olelo ino ana i ua poe limahana la. Pela nohoi ina he kanaka oe no ke kulana kiekie, mai noho no oe a hoike ae ia hana haahaa ma kou hana ana i na hana nuku, a hoowahawaha i ka poe i like ole ke kulana me kou.
55. Ina e kono ia oe e hele i kekahi ahaaina, a anaina maikai e ae paha o ka poe maikai, alaila. Mai hoike oe i kou ohilhila/ohilahila iwaena oia anaina: aka, e noho oe, e kamailio a e hana oe i na hana ku i ka maikai maloko oia anaina me ka makau ole ame ka hilahila ole hoi, oiai, he kanaka no oe elike me na kanaka e ae i akoakoa ma ia anaina.
56. Mai hoike oe i kou helehelena kaumaha a hoihoi ole paha ma kou wa e noho ana ma kekahi anaina i poloaiia ai oe e hele aku. Ina he mea nui ka kou noonoo i hoohanaia ai mamua o kou wa i hele aku ai i kela anaina, a ua mau ka lulumiia ana o kou noonoo e ia haawina, alaila, ua kue loa oe i ka rula o ka poe maikai, mamuli o kou ae ana e hele aku i ke anaina i konoia mai ai oe me ka lulumiia o kou noonoo e ia mea. Mai halihali oe i na homakuekue inoino ana a kou mau maka iloko o kekahi anaina o ka poe maikai.
57. O na hana ulala ano hi-o maloko o kekahi anaina, aole ia he mea maikai.
58. Ina ua ike a ua maopopo oe he mau kinaunau kekahi ou e pono ole ai oe ke hele aku i kekahi ‘anaina i akoakoa ai kekahi poe maka hanohano, a he mau kinaunau kela i ikeia e kekahi poe, alaila, he hana naauao a ku hoi i ka rula o ka poe maikai kou kaohi ana ia oe iho, aole e hele aku ma kela anaina.
59. He hana ku ole i ka rula o ka poe maikai, kou hoike ana ae i kou kulana ho-oioi a hookelakela, me he mea la o oe ka “best” imua o na poe e ae apau o loko o kekahi anaina. Ina he Hawaii oe, alaila, ina e kamailio ia mai oe e kekahi hoaloha ma ka olelo Beritania, alaila, mai pane aku oe ma ka olelo Hawaii, ina ua ike oe ia olelo; a ina hoi ma ka olelo Hawaii oe i kamailio ia mai ai e ka haole, alaila, ma ia olelo no oe e pane aku ai, ina no he ike oe i ka olelo Beritania.
60. Ina he opio oe i hoonaauaoia ma na kula olelo Beritania, a e noho ana oe ma ka home o kou mau makua ame na kupuna ike ole i ka olelo Beritania, alaila, he hana ku ole i ka rula o ka poe maikai kou noke ana i ka namu pakake imua o kou mau kupuna ame na makua ou. A ke huhu oe mai noho oe a namu imua o lakou i na mea lapuwale. E hoomanao oe, o ke dala i luhi hoomanawanuiia ai e kou mau makua, a mau kupuna paha ke kumu i loaa ai ia oe ka ike olelo Beritania. aole hoi oe e hoolilo i keia ike i loaa ia oe mamuli o keia dala i luhiia ai e kou mau makua, kupuna hoi i moo-nahesa wela e nahu aku ai iaia.
61. Ina i kulike ole kou manao me ke kekahi mea, ma kekahi manao ana e kamailio ana imua o kekahi poe e ae, mai noho oe a o-a wale aku i kou manao hoole aku i ka oiaio ole oia manao.
(Aole i pau.)
Hoolaha Hou.
---------------------------------------------------------------------------------------------------------------------------
Ka Ayer Laau Kunu
No ke Anu, Kunu, Ma’i ma ka Puu. Puu Eha, Anu ame ka Ma’i Ai Ake hoomaka hou. Aohe lua e loaa ai ka Laau Kunu a Ayer. O keia ka laau kunu kaulana loa i ikeia ka hololoa/hololea e na lapaau ana maloko o ka Oihana Lapaau, a ua apono loa na Kauka lapaau ma keia ame keia wahi. E hoomahani ana ia i ka ani ana i ka pale lahilahi i pili aku ai ka ma’i, wawahi i ka male paakiki e kunukunu a e maneo ai ka puu, hoopau i ke kunu ana, a loaa hoi ka oluolu. Ma ke ano laau pale pilikia kokoke loa noloko o ka ohana o ka AYER LAAU KUNU ka helu ekahi. Aohe lua o keia laau no ka hoola ana i ke Kunu Ho, Kunu Kalea, Puu Eha, ame na ma’i apau o ke Ake-mama i loohia mau ai ka poe opiopio. Aohe ohana i palekana, ke ole e loaa ia lakou
KA AYER LAAU KUNU
-OIA HOI-
KA AYER CHERRY PECTORAL,
I homakaukauia a
DR. J. C. AYER & CO.,
Lowell, Mass., U. S. A.
---------------
E makaala loa no na laau hoohalikelike kumukuai emi. Ka inoa o keia laau, oia ka AYER CHERRY PECTORAL. E ikeia ana keia inoa mawaho o ka wa-hi, a maloko nohoi o ke kino o kela ame keia omole.
---------------------------------------------------
Ke pookela o na laau no ka malama ana, ka hooulu ana me ka hoonani ana i ka lauoho, oia ka
Ayer Laau Hooulu Lauoho.
Aole e kepia ke poo, oia na ma’i puupuu, aole hoi helelei ka lauoho. Ina maloohaha mai ka lauoho, hinawenawe a ano hina mai, alaila, na keia laau e ho’iho’i hou ae a kona ana mua, a hooulu lupalupa ae la i ka lauoho. Ma na wahi apau, o keia Laau Hooulu Lauoho a Ayer ke pookeia, a ua lilo ia i punahele a i hoapili no na lodo ame na keonimana.
Ayer’s Hair Vigor
I hoomakaukauia e
Dr. J. C. Ayer, Lowell, Mass., U.S.A.
------------------------
Na Medala Gula mai na Hoikeike Nui o ke Ao
-----------------
Hollister Drug Co. Lt.
Na Agena ma ka Paeaina Hawaii.
---------------------------------------------------------------
Kakela Me Kuke
(Kaupalenaia.)
-------------
Poe Kalepa ma ke Komisina,
A HE
Poe Lawelawe Kopaa.
------------
AGENA.
2736
---------------------------------------------------------------------------------
Metropolitan Meat Co
(Hui Kuai Pipi Metropolitan)
G. J. WALLER, (Wala) - Luna Nui
108 Alanui Moi.
-------------
Poe Kuai a Hoolako i na Moku
Me
Na Io Pipi, Hipa a pela’ku.
-----------
E loaa mau ana na Manu ame na Kamano i hoohu’ihu’iia iloko o ka Hau.
Makepono ke Kuai i na I’o Pipi maanei.
TELEPONA HELU - - 45
--------------------------------------------------------------------------------------------------
E hoola koke ia ana ke ka hikiwawe ka Eczema, ke poo kepia, meaaii ame ka meneo o ka ili, o kela ame keia ano. Laau Hamo a DOAN. Aia no ma kahi o ka mea pa-ipa-i laau. 50 kanaka.