Ka Nupepa Kuokoa, Volume XXXVIII, Number 21, 26 May 1899 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

PRINCE HOHENLOHE.

            Prince Hohenlohe, chancellor of the German empire, is still vigorous, though 80 years of age on March 31. He has been minister of state and premier for thirty-two years. His simplicity of dress and manner is attractive. He is proud of the fact that he never has worn gold braid and other gewgaws, so much affected by European officials.

 

Ka Liona o ka Akau

He Mooolelo no ke Au Manawa

-:o:-

Gustavus Adolphus.

Kakauia e G.A. Henty a unuhiia e

kekahi mea unuhi mooleloo

ke Kuokoa.

 

MOKUNA XI.

KA LAWEPIOIA ANA O OPENAHEIMA.

            Ua lilo keia kipu ana mai a ka enemi maluna o na koa Sekotia i mea hoopilikia nui loa ia mai ai lakou, a he nui hoi o lakou i pau i ka make. Oiai hoi o Hepburn ame Munero e noho nanea ana ua halahi ae la kekahi poka pukuniahi maluna pono ae o ko laua mau poo.

            Ma keia wa hoi, aia ka Moi Gustavus ke hoonee kaua la maluna o ke kakela, a ma ia wa i nee aku ai na koa Sekotia malalo o Hepburn no mua no kahi hahana lo ao ke kaua.

            Ma ia wa nae he mea pono i na koa o Hepburn ke ae aku maluna o na waapa a kau aku ma kela aoao o ka muliwai. Aia hoi i kela manawa, ua komo aku la ka regimana malalo o Sir James Ramsey iloko o ke kulanakauhale. A o ka poe hoi na lakou e paa ana ka hale kakela a ka Moi Gustavus e hoonee aku ana i ke kaua, he poe Sepania ame na Italia.

            Ia wa, e lana ana hookahi wahi waapa ma ke alo ponoi mai o ka papu a na koa Sekotia e ku kiai ana.

            "E Kapena Gerema," wahi a Hepburn i huli mai ai a kamailio mai la ia Makamu, "E lawe aku oe me oe i elua lutanela ame iwakalua koa maloko o kela wahi waapa, a e holo aku oukou no kela aoao o ka muliwai nei. A e hai aku hoi oe i ka Moi ma o kekahi elele au e hoouna aku ai i ona la, ua haawi pio iho nei keia papu ia kakou. E hoike pu aku hoi oe iaia, ua makemake loa au e kau aku ma kela kapa o ka muliwai, a he mea pono ke hoounaia mai kela poe waapa e lana mai la ma kela aoao o ka muliwai e kokoke la ma kapa o ke kulanakauhale.

            Elike me ke kauoha a Hepburn, pela no o Makamu i hooko aku ai. Mahope iho o kona hoouna ana aku i ke aliikoa ana i hoouna aku ai imua o ka Moi, a hoouna aku la nohoi iaia e lawe aku i na waapa a Hepburn i kauoha mai ai iaia, ua hele loa aku la ia iloko o ke kulanakauhale no ka ninaninau ana i na aliikoa o ka mahele koa o Ramsey no ke ano o ka nee ana o na hana. I kona hoea ana aku iloko o ke kulanakauhale, e ku ana na koa me ka makaukau.

            "Auwe, o oe mai la ka ia e Makamu Gerema," wahi a ke aliikoa Mekia i pane mai ai imua oia nei, me ka hoomau ana mai hoi i ke kamailio ana, "Laki maoli ka hoi kou hiki ana mai nei i keia wa, oiai, o ko makou wa keia e nee aku ai no kekahi hana lua ole o ke koa. He mea pono ia oe ke komo pu mai me makou ma keia hana."

            "Ua makaukau loa au," wahi a Makamu i pane aku ai, me kona ninau ana aku hoi, "Heaha ka kakou e hana aku ai?"

            "E nee aku ana kakou no ka lawepio ana mai i ka hale kakela," i pane mai ai ka mekia.

            Ua mino aka iho la hoi o Makamu no keia olelo a ka mekia i pane mai ai imua ona, oiai i kona haliu ana aku i ka hale kakela, a nana iho la hoi i ka nui o na wahi koa o ua mekia nei he 200 wale no ko lakou nui, aole hiki iaia ke ike ua lawa ia mau koa no ka lawe pio ana mai i ka hale kakela.

            Ia wa pane aku la o Makamu i ua aliikoa la:

            "E pani mai ana paha oe ia'u? Pehea oe i manao ai e hiki ana i keia poe koa 200 wale no ke lawe pio mai i kela hale kakela?"

            "Aole pela, aole keia he olelo paani wale, aka, he mea oiaio loa keia. Ua loaa aku nei i kekahi o ko'u mau kanaka he ala hele huna mai ka hale aku nei o ke Kiaaina a hoea i kahi e ku mai la keia hale kakela. Aia ponoi kahi e hoea aku ai ma ka puka ponoi o ka pa pohaku e hopuni la i ka hale kakela. A ke ike mai la no hoi oe, eia me makou kekahi mau alapii i mea e hiki ai ia kakou ke a'e aku maluna o ka pa pohaku. E lilo ana ko kakou hoea ana aku i keia wahi i mea e puiwa loa ai lakou, oiai aia ka lakou mau hoonee kaua ana i keia wa me ka ikaika maluna o na koa o ka Moi. E lilo ana ia kakou ka lanakila o keia kaua ana.

            "Ina pela, alaila, e hele aku ana au me oukou," wahi a Makamu i pane aku ai, aka, ma ia wa no nae ua komo iho la no iloko ona ka manao kanalua no keia hana pupuahulu loa ana a ka Mekia. Ua oi loa aku ka pono, wahi ana i noonoo iho ai, ina i kali ua Mekia la a loaa hou mai ona poe koa hou, aka, aole nae he wa hou aku ana e kali ai, oiai, ua kokoke mai la ka wa no ka nee ana aku.

            I kela wa, ua ku iho la ia mahope koke iho o ke aliikoa Sekotia a hoomaka aku la ko lakou nee ana ma ke alahele huna e hoea aku ai i kahi i makemakeia.

            Mahope iho o ka hala ana o kekahi wa loihi e ko lakou hele ana malalo o ka honua, aia hoi, hoea aku la lakou ma kekahi ala anuu e pii ana iluna e oili ae ai lakou iluna o ka ilihonua.

            He mea oiaio hoi, mahope iho o ko lakou pii ana aku me ke akahele loa ma ua ala anuu nei, a hoea i waho, ia wa e hele aku ai lakou me ke akahele loa a hoea i ka pa pohaku, a kukulu aku la i ka lakou mau alapii. I nei wa i ike mai ai na koa Italia me ke pahaohao loa i keia puulu koa e pinana aku ana maluna o ka pa, a o ko lakou wa ia i hoomaka mai ai e lele kaua mai maluna o na koa Sekotia. Aka, he makehewa wale nae ka lele kaua ana mai a ua poe Italia nei, oiai ua kau pono aku la na koa Sekotia maluna o ka hokua o ka pa, a aia lakou ke hoonee la i ka lakou mau mea kaua me ka ikaika loa.

            Ua haule aku lakou ma kela aoao o ka pa, a hoomaka aku la lakou e nee no mua me ka hoauhee ana i na koa Imeperiela. Pela no ka lakou hoonee kaua ana aku a hiki wale i ko lakou komo ana 'ku i ka lua  o na papohaku, a kau aku la hoi lakou maluna o ka uwapo huki o ka hale kakela. Ua hanaia keia mau mea apau me ka awiwi nui e na koa Sekotia, a mamua ae hoi o ka loaa ana he wa pono i na koa Imeperiela e huki hou ai i ka uwapo iluna.

            Ma keia wa i alakai aku ai kekahi mau koa Sekotia ma ka paio ana me na enemi me ka ikaika loa. Ua ike mai la na koa Imeperiela i ka uuku launa ole mai o na koa Sekotia i komo aku no loko o ka pa o ka hale kakela, a ia wa i lele pu mai ai lakou maluna o keia wahi puulu koa. He umikumamalua haneri ka nui o na koa Imeperiela i lele kaua mai maluna o na koa Sekotia. Ua paio aku la na koa Sekotia i ko lakou mau enemi me ka ikaika loa. Aia o Makamu ke kuu pau la i kona ikaika apau imua o kela mea e halawai mai ana me ia a ke poha mau la hoi kona leo kauoha i kona poe kanaka e nee aku imua me ka makau ole.

            Ma keia wa o ke kaua ana, aole i malamaia na rula maa mau o ke kaua, aka, ua paio aku la kela ame keia i kona hoa paio elike me ka ikaika ame ke akamei kaua i loaa iaia iho, aia ka pono o ka lanakila maluna o ka enemi.

            E wawalo ana na leo hooho hiena o na kanaka o kela ame keia aoao, a e nakolo ana hoi na leo o na pukuniahi ma na wahi apau o ka hale kakela. E paapaaina ona ke kani a na pu kaupoohiwi, a e o ana na koele ahiu ana a na pahikaua i hookui ae i kekahi ame kekahi.

            O kela heluna nui hewahewa o na koa Imeperiela ua lilo iho la i mea uhalu i ka nui launa ole mai o ka makau ole ame ka wiwo ole o na kanaka Sekotia, i ahai pu ia hoi ko lakou ikaika e hookeleia ana e ke akamai ame ka makaukau kaua.

            He lehulehu loa o na koa Imeperiela i pau i ka lukuia. He nui loa hoi o ko lakou mau aliikoa i pau i ka make i na koa Sekotia. A ke ikeia aku la ke kuemi hope ana aku o ua poe koa Imeperiela la. Aohe hoi i liuliu ka hoomau ana mai o ua poe koa Imeperiela la i ke kaua ana i na Sekotia, aia hoi, ua puhee aku la lakou me ka holo pioo ana ma o a maanei o loko o ka hale kakela. Lele aku la kekahi poe o lakou maluna o na pa o ka hale kakela.

            Ma ka wa hoi i hookokoke mai ai ka Moi Gustavus me kona poe koa i na pa o ka hale kakela, a pela pu hoi me na koa o Hepburn, ua hoopiha loa ia lakou i ke pahaohao i ka lohe ana mai i na leo pu kaupoohiwi ame na hooho leo kaua lanakila maloko ponoi o ka hale kakela.

            Aole hoi i liuliu, ua hemo mai la na pani o ka puka pa e hoopuni ana i ka hale kakela, a ia wa i komo aku ai ka Moi Gustavus ma ke poo o kona mau koa me ka hanohano nui. E ukaliia ana hoi ua Moi la e kona mau alii ukali.

            I kela wa, aia na wahi koa o Sekotia o Ramsey ke ku mai la ma ka laina hoohanohano i ka Moi, oiai hoi kekahi poe o lakou i kiheahaia ai me ke koko ame na alina e ae o nei mea he kahua kaua. Me he mea la o ka nui o lakou i keia wa, he hookahi haneri wale no ia. O ka hapanui o keia poe apau e kakau mai ana na alina manaonao o nei mea he hakoko weliweli. A ma ka wa a ka Moi i komo aku ai, ua haawi mai la lakou i ke aloha iaia me ka haaheo nui. Me ka hauoli hoi ame ka ulumahiehie, pane aku la ka Moi Gustavus imua o lakou:

            "E kuu poe hoaloha Sekotia, ua eo au ia oukou. Ua oi loa aku ko oukou hikiwawe mamua o ko ke alii nei mau pualikoa."

            O loko keia o ka pahale o ua hale kakela la, ua hele a muu mokakiia e na heana kino make, ame ka poe i hoehaia. Ua hiki aku ka nui o na koa Imeperiela i pau i ka make i ka 500 mamua o ka wai i haawi pio mai ai kekahi poe o lakou, a pau aku hoi kekahi poe o lakou i ke auhee. O kekahi keia o na hoouka kaua i kaulana loa ai na koa Sekotia iloko oia kaua ana mawaena o na Hoolepope ame na Katolika. Ua lilo pio mai la he eha hae, hookahi hoi oia mau hae mai ka regimana mai o na koa Sepania, a o keia paha ka hae mua loa oia poe koa i lilo pio ia Gustavus mai ka wai i hoomaka mai ai ke kaua.

            Ua komo aku la ua Moi nei iloko o ka hale kakela a makaikai aku la i kona kulana, ike iho la ia, ina i hoouka ia ke kaua e like me ka mea maa mau o na hoouka kaua no ka lawe pio ana i kekahi papu ua maopopo iaia aole loa kela papu e lilo pio ana, koe wale no  ke alahele makau ole ame ka wiwo ole i hanaia e na koa ame na aliikoa o Ramsay, nolaila, ua hoouna aku la oia e hele mai imua ona na aliikoa o Ramsay i hiki ai iaia ke haawi aku ina hoomaikai ana ia lakou no ka hana a lakou i hana ai me ke koa loa i na enemi.

            Oiai na Sekotia e lawelawe ana ma na hana e loaa ai ia lakou ka makaukau o ka lele kaua ana aku maluna o na enemi, aia no na pu ke ki hoomaha ole mai la maluna o lakou mai ko lakou poe enemi mai, aka, ua lilo nae keia mau kipu ana a ia poe he wai auau wale no no ka poe Sekotia. I ka hoea ana mai hoi o ke kakahiaka, ua kuene pono loa ae la na koa Sekotia ma kekahi kulana maikai loa, ua kaa pono mai la lakou mahope o kekahi kuapa lepo, a ua lilo hoi ia mea i papu pa@e no lakou.

            Ua hoomau aku la no na Sekotia i ha hoonee ana i ka lakou mau hana imua, oiai hoi na batari pukaa a na koa Imeperiela e hoomau mai ana no i ke ki ana maluna o na koa Sekotia.

            I kekahi la ae hoi, i ka ike ana mai o ke Kiaaina Imeperiela o ua wahi la, ua lehulehu loa na batari pukaa i kukulu ia ae e na koa Suedena, a e hoomakaukau ana hoi ka Pualikoa Omaomao o na Sekotia no ka lele kaua ana aku maluna o na koa Imeperiela, ua hooholo iho la ua Kiaaina la e haawi pio mai i ke kulanakauhale iloko o na lima o ka poe Suedena ame na Sekotia.

            Ua hoikeia mai la keia manao o ua Kiaaina la imua o ka Moi Gustavus, a ua aeia aku la oia ame kona mau koa e haalele iho i ka pakaua, me elua pukuniahi. Ua haule pio mai la iloko o na lima o Gustavus he kanawalu ka nui o na pukuniahi, a ua loaa pu mai la hoi iaia he heluna dala mahuahua loa mai na kanaka mai o loko o ke kulanakauhale i mea e hoopakeleia ai ko lakou kulanakauhale mai ka hana ino ia mai e na koa Suedena. Ua loaa mai la no hoi mai na kanaka Iudaio mai oloko o ua kulanakauhale la he puu dala nui hewahewa i mea e hana ino ole ia ai ko lakou mau wahi i noho ai. Ma ka la 14 o Dekemaba, 1631, oia nohoi ko Gustavus la hanau, a ma ia la hoi i piha ai kona mau makahiki he kanakolukumamahiku, ua komo aku la ia iloko o ke kulana kauhale me ka hanohano nui.

            Aole hoi i kana mai kona piha haohao i ka ike ana mai ia Makamu e ku aku ana imua ona.

            "Auwe, eia ke oe ia nei, e Makamu Gerema. Ea, heaha kau hana maanei?"

            "Ua komo mai au iloko o kela pualikoa ma ke ano kuikawa wale no." wahi a Makamu i pane aku ai imua o ka Moi, me ka hoomau ana i ke kamailio ana aku: "Ua hoea mai au ma keia aoao malalo o kekahi kauoha a ko'u aliikoa kiekie no ke kii ana mai i mau waapa no ka lawe ana mai i kona mau koa ma keia aoao o ka muliwai, a i ka loaa ana o ka mea a ko'u alii i kauoha mai ai ia'u, ua manao iho la au, ua pau ka'u hana ma ia wahi, a i ko'u ike ana aohe a'u hana, ua manao iho la au he mea maikai no'u ka imi ana i hana na'u; nolaila, i ko'u ike ana i na koa o Ramsay nei e homaka ana lakou e hana i kekahi hana waiwai nui, ua hooholo iho la au i ko'u manao e hui au me kona mau koa. Mamuli o ka ae ana mai o Ramsay ia'u e lilo au i koa pualu no loko o kona puali, ua komo aku la au, a hele mai la i keia wahi malalo o kana kauoha."

            I keia wa hoi i hoike mai ai o Ramsay imua o ka Moi no na hana wiwo ole i hanaia ai e Makamu Gerema, a ua nui ka mahalo o ka Moi ia Makamu.

            Mai keia wahi aku hoi i nee aku ai na koa o Gustavus no kekahi wahi e ae. Mahope koke iho no o ka haule pio ana mai o ke kulanakauhale o Openaheima, ua nee aku la lakou no Maintz.

            E paaia ana keia wahi e na koa Sepania he elua tausani ko lakou nui malalo o Don Pilipi de Silva, a he wahi oolea loa hoi keia i paaia e ua poe Sepania la.

            Ua hoomakaukau koke aku la o Gustavus i ka hoonee kaua ana aku maluna o keia kulanakauhale. Ua eliia ae la na auwaha a puni ke kahua hoomoana o na koa. Elike no hoi me ka mea mau, ua lilo iho la no i ka Pualikoa Omaomao o na Sekotia ke kulana e haliu pono ana imua o na enemi.

            Maloko o keia kulanakauhale i malama ai oia i ka hauoli Karikimaka, a ua hoopihaia mai la kona alo alii e na alii koikoi apau o Geremania mawaena o ka poe Hoolepope. Mawaena nae o keia poe hanohano he eono o lakou he poe alii poo no Geremania a he umikumamalua poe Kuhina Elele mai kekahi mau aupuni e mai.

            Mawaena nohoi o na'lii o ka aina, o Kauna Manasefela kekahi, me kana wahine ame ka laua kaikamahine. He ekolu la mamua ae o ka malamaia ana o ka ahaaina ma keia la Karikimaka, ua hooneeia mai la ke pualikoa Omaomao o na Sekotia mai ka hoomoana ana mawaho aku o ke kulanakauhale a iloko ponoi o ke kulanakauhale. A ma ka wa i hoea mai ai o Kauna Manasefela ame kona ohana no ua wahi la, ua hele koke aku la ia e ninau i ke Konela ame na aliikoa no ka hiki iaia ke ike a ke huipu me Makamu.

            Ua pane ia mai la hoi oia e ka mea ana i ninau aku ai no Makamu Gerema:

            "E loaa no ia oe o Kapena Gerema maloko o keia hale lole."

            Aka, me ke ano pahaohao pane aku la ua Kauna Manasefela nei: "Aole o Kapena Gerema ka'u mea i makemake ai e ike; aka, o Makamu Gerema, he kanaka opiopio loa oia."

            Alaila, pane hou mai la ke koa kiai imua o ke Kauna me ka mino aka ana iho:

            "Alaila, o ua kanaka la no ia a'u i hoike aku nei ia oe. O ke Kapena koa no ia o makou. He wahi keiki wale no kona ano ke nana aku, aka, iloko nae o ka pualikoa holookoa apau, aole kekahi aliikoa i oi aku kona wiwo ole mamua o keia aliikoa opio. Aole no i oi aku ka makau ole ame ka wiwo ole o ke Konela mamua o kona."

            I kela wa hoi i huli ae ai ua wahi koa nei a kamailio aku la i kekahi koa e ae, ma ka olelo ana aku:

            "E Donala, e oluolu oe e hele aku a hai aku ia Kapena Gerema, ua makemake ia oia e keia keonimana."

            Aole nohoi i liuliu iho oili ana o Makamu mailoko mai o ka hale lole a ku ana imua ponoi o ke Kauna.

            "A, o oe io no ka keia e kuu hoaloha opio," wahi a ke Kauna i hooho ae ai. "Ka, he keu ko'u haohao loa i ka olelo ana mai nei a keia koa iau no Kapena Gerema. Aole loa au i manao ua lilo aenei oe i Kapena koa. Aka, ke ike nei nae au, aia oe ma ia kulana i keia wa. Ke haawi aku nei au i ka'u mau mahalo ana ia oe no keia hanohano kiekie i loaa ia oe i keia wa opipio wale no o kou kino. E hai aku au ia oe, ua hoea mai la au me ka'u wahine i keia wahi no ke kaana ana i na hauoli e paholaia mai ana e keia Moi Puuwai Wiwo Ole o Suedena. Ea, e hiki ana anei oe ke hele pu mai me a'u no kekahi wahi wa pokole wale no? Ua makemake loa ke Kauna wahine e ike ia oe, a e hauoli auanei oia ke ike ua pakele oe mailoko mai o ka poino. O ka maua kaikamahine pu mai nei no kekahi i hoea mai nei no onei. Aole ona wahi manaka iki i ka ninau mau mai nou, a no ke kamailio no hoi kekahi no kau mau hana koa loa i ikeia maloko o na nupepa. E hai aku nae au ia oe, oiai ua loaa ia oe ke kulana Kapena koa i keia wa, he mea pono iaia ke kuoo ma ke ano o kana mau kamailio ana mai ia oe."

            (Aole i pau.)

MAKE MA KE KULA O KAMEHAMEHA.

            Ma ka auina la Poalua nei i make ai o Joseph Nahale, kekahi o na haumana o ke kula o Kamehameha. Kekahi keia o na keiki a Mr. J.K. Nahale, Hope-makai Nui o Kona Akau, Hawaii.

            Ua loohia no oia i ka mai no kekahi mau la i hala aenei. Aole nae i ikeia ka pilikia a hoea wale i ka Poalua nei. O ka hoike oia kula ma keia mahina ae nei o Iune, oia kona wa e puka ai, aka, ua hala e aku la oia. E hoouna loa ia kau ana ke kinowailua o ka opio i hala aku i kahi o kona mau luaui i keia Poalua ae. Aloha wale no ka hoi. He ohana oia i pili i ka Lunahooponopono o keia pepa.

 

NA ANOAI AINA MAMAO.

NU IOKA, Mei 12.-Ua loaa mai kekahi lono kuikawa mai Sana Petoroboro mai i ka nupepa Sun, a e hoike ana ia lono: Ua papa aku la ke Aupuni i na Iudaio, aole lakou e noho maloko o ke kulanakauhale. He lehulehu loa na Iudaio Farani e konoia ana e haalele iho i ke kulanakauhale nei o Sana Peteroboro.

            Eia i Honolulu nei i keia wa kekahi kanaka akamai i ka oihana hakaka kuikui puupuu lima, nona ka inoa o Martin Denny, a he moho oia ma ia hana mai Auseteralia mai. Mai Kapalakiko mai oia i holo mai ai me ka ana e huli hoi loa aku no kona home ma ka hema, aka, ua halawai oia me kekahi hoaloha kahiko ona maanei, a ua hookaulua iho la oia no Honolulu nei.

            Mamua aku nei mai Honouliuli e laweia aku ai ko Waianae io pipi kuai, a pela hoi ko Waialua, aka, ua loheia mai e hapai ana no o Waianae ponoi i ka pepehi pipi ana ma ia wahi iho no, a pela nohoi me Waialua.

 

            Ke mau nei no ka hialaaiia ana o ka halekeaka "Opiuma" i keia mau la.

 

            Barenaba a hoi aku la no kona home. Ua lilo aenei i ke Keikialii Kalani-

 

            Ua nana hou ia ka puali makai kau lio i ke kakahiaka Poaha nei.

 

            Eia ka malama ana o ka Ekalesia o Waialua aenei malalo o na kiai makaala ana a Rev. S. Oili.

                       

            O ka Ilamuku Brown ka mea nana i nana na koa kau lio o loko o ka oihana makai o Honolulu nei.

 

            Ua piha hauoli ka hale keaka ma ka Poakolu nei i na poe makaikai i ke keaka paele i hala aku la no Kikane.

 

            Ua manaoia e ku mai ana ka moku kiapa Irmgard to Honolulu nei mai Kapalakiko mai, a i ole, i ka la apopo paha.

 

            He aha mele manawalea kai haawiia ae maloko o ka luakini o Kaumakapili ma ke ahiahi Poaha nei malalo o ke alakai ana a Rev. Timoteo.

           

            O kela mau keiki Pukiki i hopuia ai ma ka Poalua nei ma ka mea e pili ana ika hale o Sam Nowlein, ua hoopaneeia mai ko laua hihia a keia la.

 

            Eia ke hoikeikeia nei ma ka hale kaawai helu ekahi mua iho nei na kii hooleleaka kupaianaha loa i kela ame keia po e hoihoi ai na ona oia mau kii.

 

            Ua haawi makana e nei ka Oihana Makai he makana hoohiwahiwa ia Mr. W. O. Kamika, ka Loio Kuhina mua iho nei. He paa pa inu ti ka lakou o ka makana ana ae.

 

            He nui ka noohalahala o kekahi poe no ke komo nui loa o na olelo hoolaau lapaau maloko o ka makou nei pepa, aka, e hoomanaoia ae wahi oia maopopoia no ka pepa.

 

            Mauka aenei o Puu Ohia i kekahi mau la i ka hope ae nei i nanea aku ai ka Lunakanawai Wilikoki o ka Aha Apana o Honolulu nei no ke onawaliwali o kana wahine.

 

            Ua loheia mai e bapetizoia ana kekahi kanaka mulato iloko o ka Ekalesia o na la Hope i Hoonohonoho hou ia ma ke kakahiaka o ka la Sabati ae nei e Lunakahiko Greene oia hoomana.

 

            Ua hookokuia o J.H. Barenaba i keia la 24 o Mei, 1899 i Hope-luna Pa Aupuni no ka Apana o Koolauloa no ka manawa e kaawale aku ai o ka Luna Pa Aupuni mai ka Apana aku.

           

            Ua lilo aenei ko makou makamaka a hoaloha, oia o Aberahama Fernandez i luna nui no ka halekuai ana e noho lawelawe nei i keia wa. He kanaka kupono io no ia ma ia kulana.

 

            Mai poina oukou e na makamaka i ka hele ana i ko oukou mau halepule pakahi ma ka la Sabati aenei. E aho la mamua o ko oukou noho wale iho no iloko o ko oukou mau hale e hiamoe ai.

 

Hoolaha Hou.

 

Ka Ayer

Laau Kunu

 

            No ke Anu, Kunu, Ma'i ma ka @ Puu Eha, Anu ame ka Ma'i Ai Ak@ maka hou. Aohe lua e loaa a@ Laau Kunu a Ayer. O keia ka @ kunu kaulana loa i ikeia ka hololea @ na lapaau ana maloko o ka Oihana @ paau, a ua apono loa na Kauka la@ ma kela ame keia wahi. E hooma@ ana ia i ka aai ana i ka pale l@ i pili aku ai ka ma'i, wawaia i ka @ paakiki e kunukunu a e @ puu, hoopau i ke kunu an @ loaa ka oluolu. Ma ke ano laa@ kokoke lea noloko o ka @ nana @ AYER LAAU KUNU ka @elu @ Aohe lua o keia laau no ka hooia @ ke Kunu Ho, Kunu Kale@ Puu @ ame na ma'i apau o ke @ mau@ loohia mau ai ka poe opiopio. @ ohana i palekana, ke ole i loaa ia @ kou

KA AYER LAAU KUNU

-OIA HOI-

KA AYER

CHERRY

PECTORAL,

I homakaukauia a

DR. J.C. AYER & CO.

Lowell, Mass., U.S.A.

 

            E makaala lo ano na laau hoohalikelike kumukuai emi. Ka inoa o keia laau, oia ka AYER CHERRY PECTORAL. E ikeia ana keia inoa mawaho o ka wa-hi, a maloko nohoi o ke kino o kela ame keia omole.

 

Ke pookela o na laau no ka malama

ana, ka hooulu ana me ka hoo-

nana ana i ka lauoho, oia ka

Ayer Laau

Hooulu Lauoho.

            Aole e kepia ke poo, oia na ma'i puupuu, aole hoi helelei ka lauoho, lae maloohaha mai ka lauoho, hinawenawe a ano hina mai, alaila, na keia laau e ho'iho'i hou ae a kona ano mua, a hooulu lupalupa ae la i ka lauoho. Ma na wahi apau, o keia Laau Hooulu Lauoho a Ayer ke pookela, a ua @ ia i punahele a i hoapili no na lede ame na keonimana.

Ayer's Hair Vigor

I homakaukauia o

DR. J.C. AYER, Lowell, Mass., U.S.A.

 

Na Medala Gula mai ae Maikeike Mai o ke Ao

Hollister Drug Co. Lt.

Na Aena ma ka Paeaina Hawaii.

 

KAKELA ME KUKE.

(KAUPALENAIA.)

 

Poe Kalepa ma ke Komisina,

A HE

Poe Lawelawe Kopaa.

AGENA.

2736-tf

 

Metropolitan Meat Co.

(Hui Kuai Pipi Metropolitan.)

G.J. WALLER, (Wala) - Luna Nui

108 Alanui Moi.

 

Poe Kuai a Hoolako i na Moku

ME

Na Io Pipi, Hipa a pela'ku.

 

E loaa mau ana na Manu ame na Ka-

mano i hoohu'ihu'iia iloko o

ka Hau.

            Makepono ke Kuai i na I'o Pipi maanei.

TELEPONA HELU - - 46

 

            I ko makou nei keena iho la o J.@ anaole ka I'o heihei Vaiolina no ke kumukuai o $1.000. Aole i maopopo e komo aku ana paha ia ma ka hoouka heihei lio o Iune ae nei. Aohe no he hewa o ka hoao ana i ke kuolo kani o ka Vaiolina.