Ka Nupepa Kuokoa, Volume XXXVIII, Number 18, 5 May 1899 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

BUKE XXXVIII.  HELU 18.                       HONOLULU,POALIMA, MEI 5, 1899.

NA HELU APAU 2753

Hoolaha Kumau.

W. C. Achi.                             Enoch Johnson.

            ACHI & JOHNSON,

LOIO!             LOIO!             LOIO!

Keena Hana, Helu 10 aoao Komohana Alanui Mo!.

            W. R. KAKELA

Loio a he Kokua ma ke Kanawai

HE LUNA HOOIAIO PALAPALA.

                 2370

            LYLE A. DICKEY

Loio a he Kokua ma ke Kanawai.

   Notari no ka Lehulehu.

     A hookoia na hana pili kanawai apau mai na Mokupuni mai.

Kihi o Alanui Betela me Moi. Pahu Leta 786. Telepona 806.

            Papa!  Papa!

            Aia makahi o

LEWERS & COOKE

            (Lui Ma)

Ma ke Kahua Hema o na Alanui Papu me Moi.

E LOAA NO NA

     Papa Nouaiki

        O kela a me keia ano.

Na Pani Puka . . .

Na Puka Aniani . . .

Na Olepelepe . . .

Na Pou . . .

                                    Na O’a . . .

                                    Na Papa Hele . . .

                                    Na Papa Ku . . .

                                    Na Papa Moe . . .

     Na Pili Hale

     O na Ano apau.

A me na

Wai Hoohinuhinu Nani

     o Na Ano Apau.

Na Palaki o na Ano he Nei Wale.

     He haiia aku nei oukou e na makemake a pau, ua makaukau keia mau makemake o oukou e hoolawe aku me na mea a pau e pili ana ma ka la

ua Oihana me ka

Uku Haahaa Loa

E like me ka mea e holo ana mawaena e Laua a me ka Mea Kuai.

 

     E Hele Mai o Wae no Oukou I@

     Kani ka manu i ka uka o Olaa, he ono ke ko, he momona.  Lawe i mawele nou.

     Ma ka hora 6 o ke ahiahi Poalua nei i hoea mai ai no Honolulu nei, ka moku hoomoe uwea olelo moana, mai Kapalakiko mai.  Mai Honolulu aku nei, e holo aku ai ia no Midway Ailana, a i Guama, me ke kapakai hikina o Iuzona a hoea loa i Iokohama no ke ano hohonu ana.  He 10 mile e holo ai, e ku ia ke kulana ana hohonu.  O Neno ka inoa o keia moku.

Ka Liona o ka Akau

He Moolelo no ke Au Manawa

:O:

Gustavas Adolphus.

Kakauia e G.A. Henty a unuhiia e kekahi mea unuhi moolelo ke Kuokoa.

MOKUNA X.

Ke Au ana i na Wai Pu-anuanu o ka Muliwai Rine.

     Ma ka auina la o ka la 5 o Okatoba hoomakaukau iho la na koa no ka holo ana aku a pae ma kela kapa oka muliwai.  Ua kau ae la na koa malupa o na waapa a holo aku la, aka, ia wa i ki mai ai na Auseturia i ka lakou mau pu me ka ikaika loa.

     O kekahi poe koa hoi, nee aku la ma ka uwapo i hoohiolo kapakahiia, oiai no nae na poka a na koa Imeperiela e helelei mai ana ma ia wahi me he mau kulu paka ua eloelo la no ka hooilo.

     Aka, iloko o ka pouli a ka uwahi e hoopoluluhi ana ma ia hapa o ka muliwai a na koa o Gustavus e nee aku ana, aia hoi, ua kau aku la ka mahele koa malalo o Mekia Bothwell, ma keia aoao o ka muliwai.  A na keia poe koa i hoouka aku me ka ikaika maluna o na Auseturia e kipu mai ana ma kela kapa mai o ka muliwai, a hoauheeia aku la lakou.  Na keia kalehuia ana aku o na Auseteria mai ko lakou mau auwaha eli aku, i loaa ai he wa pono i na koa e alakaiia ana e Sir James Ramsay ame Sir John Hamilton, maluna o na waapa, e pae aku ma kela kapa o ka muliwai.

     I ka ike ana mai hoi o ka alihikaua nui o na koa Auseturia o loko o ka hale kakela i ka pae ana aku o na koa o Gustavas ame ka hoauheeia ana o na koa Auseturia ma na auwaha eli, ua hoouna mai la ia i kekahi mau mahele koa ona e lele kaua mai maluna o na “Sekotia,” a e kaili hou aku i na papu eli ma kapa o ka muliwai, mei ka paa ana aku a na Sekotia, aka, ua hoopahuaia aku ia manao o ua alihikaua Auseturia la, oiai ua hoauheeia aku la na koa Imeperiela ana i hoouna mai ai.  He mea maopopo loa ua hehi pono aku la na koa Sekotia ma ke kulana maikai, ma kela aoao o ka muliwai.  O na koa Sekotia, ka poe na lakou i waele ke alahele i loaa ai he alanui maalahi iki ke koena o na koa o Gustavas.

     I kekahi la ae, ua hoomaka aku la na koa Sekotia ame kekahi mau mahele koa Suedena  e hoouka kaua maluna o ka hale kakela i na koa Imeperiela e noke mai ana i ke ki i ka lakou mau pu meka hoomaha ole.

     Aole i liuliu keia hoouka kaua ana mawaena o na aoao elua, aia hoi, lilo pio mai la ka hale-kakela i na koa o Gustavas.  Ma keia hoouka kaua ana nae, ua ku iho la o Makamu i kekahi poka ma ka wawae, a hina iho la oia ilalo.

     I kona laweia ana aku a ma kahi kupono e waihoia iho ai kona kino, ua nana iho la ke kauka i kona wahi i ku ai i ka pu, a ike iho la ia mamuli o kona haha ana me ke kui haha, aole i lilo kahi a ka poka i waiho ai iloko o ka wawae o Makamu i mea nona e poino ai, a olelo aku la ia:

     “E ke kanaka opio aole no i haalele mai kou laki ia oe.  Aole i ku kekahi iwi o kou wawae i ka poka.  Aia keia poka ma kekahi wahi e ae mai ka iwi aku.  E hiki ana no ke unuhiia keia poka mai keia wahi mai.  E hoomaha oe no kekahi wa pokole, a e loaa no ia oe ka maikai o kou kino.

     Ua hooka’ulua iki iho la ka noho ana o ka pualikaua o Gustavas ma ke kulanakauhale o  Wurtzburg, a ua lilo ia wahi i kiko waena no na hoohana a hoolala kaua ana a ua Moi Liona nei o ka Akau.  Ua maau hele aku la na koa ma kela ame keia wahi o ka aina, a lawe pio mai la lakou i na papu he nui e nohoia ana e na koa Auseturia, me ka ohi pu ana mai hoi i na lako ai he nui ame na waiwai e ae.

     Aole i mamao loa aku mai keia kulanakauhale aku, a loaa aku kahi i hoomoana ai o Kenerala Tile me kekahi pualikoa i oi aku ka nui mamua o ko Gustavas; aka, mamuli o ka loaa ana mai iaia o kekahi kauoha paa mai kona mau poo mai, aole oia loaa e lele kaua mai maluna o Gustavas.  Ua hopohopo kona mau poo alihikana, ina mamuli o kona kaua hou ana me Gustavas, a hoauhee hou ia oia, alaila, e lilo ana o Geremania Akau, malalo o ka mana o Gustavas.

     I kekahi ahiahi, oia hoi ka wa i ola loa ae ai ko Makamu eha a hiki iaia ke hele me ka maikai, e noho ana ia ma ke pakaukau ai me Konela Munero ame kekahi poe aliikoa e ae, no ka paina ana i ko lakou aina ahihi, oia ka wa i hemo mai ai ka puka, a komo mai ana ka Moi Gustavus.  Ia wa i ku ae ai na mea apau iluna.

     “E Munero,” wahi a ka Moi i pane aku ai, “e hoakoakoa koke oe i na koa o kou mahele koa, me ka lako pono i na mea kaua.  E hoonoho ae hoi ia lakou ma ke kuea o ke kulanakauhale, a e kauoha aku oe ia Sir John Hepburn e halawai ae me a’u malaila.”

     Ua kani kapalili oe la ka pahu kahea, a ikeia aku launa koa e haalele aku ana iloko lakou mau wahi i noho ai, a holo mai la no kahi a ka pahu e kaui ana.  Iloko o ekolu ame eha minute, ua loaa ae ia he 800 koa, me ka lako i kona mea kaua, elike me ke kauoha a ke alii.  Ua alakaiia aku la hoi lakou e Hepburn ame Munero.  Ua hooikaika loa o Makamu, oia kekahi e hele aku ma keia huakai, aka, ua palpala mai la ia e Munero, nolaila, ua haule kope iho la ia.

     I ka hoea ana aku o keia poe koa ma kahi a ke alii i makemake ai, aia hoi, ua lilo ae la ke alakai o ua poe koa la malalo o ka Moi, a nee aku la lakou, ma ia po ma kekahi alahele i maopopo ole i na mea apau, koe wale no paha ka Moi.  E hiolo makawalu ana ka ua ma keia po.

     Elua hora ko lakou hele ana, aia hoi, hoea aku la lakou ma ke kapa o ka muliwai Maine, a ma ia  wa i lohe ae ai lakou i ka halulu o na kapuai lio o na koa kaua lio he 80 ka nui.  Akahi no ua Moi la a hoike mai i kona manao imua o Hepburn, a olelo mai la ia:

     “Ua loaa mai ia’u kekahi nuhou ano nui loa no Kenerala Tile, oia hoi, ua loaa mai nei iaia he mau koa hou, no lakou ka huina i hiki aku i ka 17,000, a e alakaiia ana lakou e ke Duke o Loreina, a eia ae lakou ke nee mai nei ma ke alahele e halawai mai me a’u a hoouka kaua mai.  Ina no i hoea mai nei ko’u mau koa apau ia nei, aole no ia he mea e loli ae ai ko kakou kulana panaiki e ku nei i keia wa.  Ua maopopo ia’u, ua like ka nui o keia poe koa e nee mai nei me 2 koa o ka enemi ia 1 koa o kakou nei.  Nolaila, ke ike nei oe me ka maopopo lea, he kulana pilikia ko kakou e ku nei i keia wa. 

     “Ua makemake loa au e lilo la kakou ka paa ana i kahi kauhale o Ochsenfurt.  He mea oiaio nae, aole no keia he wahi paa no ke palekaua ana aku, aka, o kona kulana nae i ku ai, aia ia ma kekahi uakee o ka muliwai, a e hiki ana no ke palekauaia aku ia no kekahi wa.  O ka poe i hiki ke hana i keia hana, oia no na koa Sekotia.  Ua lohe mai au, ua kokoke loa mai o Tile i keia wahi kulanakauhale.  Ua olelo mai ke kanaka nana i hai mai ia’u i keia lono, ma kona wa i haalele aku ai i ua wahi kauhale la, ua hoea mai la na koa hele mua o na Auseturia.  O keia iho la ke kumu nui o keia awiwi ana mai la o kakou. 

     “E paa oe me kou ikaika apau, e Hepburn i keia wahi, a ina e kuemi hope mai ana oe mai keia wahi mai, alaila, e nee no oe a hoea ae i ke kulanakauhale o Wurtzburg, a ma ia wahi au e ku mai ai a paio ia Kenerala Tile.”

     Hoomau aku la no ka pualikoa i ka nee ana ia po, a he umikumamaono paha mile, a’e aku la lakou ma ka uwapo e moe ana maluna o ka muliwai Maine, a komo aku la i kahi kauhale o Ochsenfurt.

     Eia no keia wa a na koa Sekotia i komo aku ai i ka po.  E aaki ana ka pouli nui maluna o ke kulanakauhale.  O kahi a lakou i puuluulu ae ai, oia no ke kahua makeke, a, oia kahi a na koa i hoomaha iho ai, me ka manao ana, aia a ke kakahiaka ae e hoouka kaua ai lakou.  Ua hoouna aku la o Hepburn he 50 poe kaua lo e holo aku e hai i ka lono, no ka hookokoke ana mai o na Auseturia.  Aole hoi i liuliu, ua lele kaua ia mai ai lakou e na koa Imeperiela.

     O ka wa iho la no keia i hoomaka ai ka hoouka kaua mawaena o na aoao elua.  Ua hoounaia aku la hookahi lu@nela me kanalima koa o ka mahele e Lumsden no ke kokua ana i na kaua lio, aka, ua nee mai la no na koa Imeperiela me ka ikaika, a hookuemi hope ia mai la na koa kaua lio ame na koa helewawae o ka poe Sekotia.

     I keia wa i nee aku ai o Konela Munero me hookahi haneri poe koa Sekotia, a hoouka kaua aku la maluna o na Auseturia, a mamuli o ka ike ole ana o ua poe la i ke ano o na koa a lakou e paio mai nei, ua kuemi hope aku la lakou.

     I ke ao ana ae, ua hele aku la ka Moi Gustavus ame Hepburn e nana i na pa pohaku e hoopuni ana i ke kulanakauhale, a ike iho la laua, he kulana nawaliwali loa ko ua pa la.  Oiai hoi laua e nana ana i ua pa la, aole laua i ike aku i na koa Auseturia, a manao iho la ka Moi (Gustavus) ua hala ae paha ua poe koa Imeperiela la ma kekahi alahele okoa e hoea aku ai i ke kulanakauhale o Wurtzburg, nolaila, hooholo iho la ia i kona manao e hoi koke aku oia no ke kulanakauhale.  Kauoha ae la ia ia Hepburn e kiai paa loa oia i ka uwapo, a, ina e ike ana ia, aole hiki iaia ke paa

i kahi kauhale, alaila, e wawahi oia i kela uwapo.

     Mahope iho o ko ka Moi haalele ana iho ia Ochsenfort, ua hoomaka koke aku la o Hepburn e pahonohono i na wahi papalu o ka pa pohaku.  E kukulu hou hoi i mau pakaua hou.  E wawahi i na hale e kuku ana mawaho aku o ke kulanakauhale, a oki hoi i na kumulaau.  Ekolu la i lilo okoa ai na koa i keia hana, a i ke kolu mai o ka po, oia hoi, ka po o ke kolu o ka la, lohe aku la o Hepburn, eia na enemi ke hookokoke mai nei ilaila.

     O na wahi koa helewawae hoi keia o Hepburn ame na koa kaua lio, i hoounaia aku no ke kiai ana ia waho o ke kulanakauhale, ua hookuemi hope ia mai la lakou e na koa Imeperiela, a hiki i ko lakou hoea ana mai i na pakaua i hanaia ai e Hepburn me kona poe kanaka.  A mai keia wahi aku i hoolu’e aku ai na koa Sekotia maluna o na koa Imeperiela i na poka mailoko aku o ka lakou mau pu, a na ia mea i hookuemi hope aku i ua poe Auseturia la.

     Mahope iho hoi o kekahi wahi hoouka kaua nuku ana mawaena o na Sekotia ame na Auseturia, ua unuhi hou aku la o Kenerala Tile i kona poe koa, no kona manao ana, aole ka Moi Gustavus ma ia wahi kauhale.  Nolaila, ua nee aku la ia (Tile) no Nuremabuga.  Elua la mahope iho o keia haalele ana mai o Tile i kahi kauhale o Ochsenfurt,  ua huli hoi aku la ia me kona poe koa no Wurtzburg.

     Alaila, haalele iho la ka Moi Gustavus i kona hoomoana ana ma Wurtzburg, a nee aku la ia no Fran-fort-on-the-Maine.  Ua waiho iho la nae ia maloko o ke kakela o Marienburg he 8000 poe koa, malalo o Ilamuku Horn, no ka paa ana i Franconia.

     Ma ka wa a ua Moi Gustavus nei i nee aku ai no kahi ana i makemake ai, ua lawe pio ia mai la e ia he mau kulanakauhale i nohoia e na koa Auseturia, a ua nui nohoi na waiwai pio i loaa mai ia lakou.  I ka hoea ana aku o Gustavus me kona mau koa ma Frankfort, ua wehe mai la ia kulanakauhale i kona mau puke me ke kue ole mai.

     Oiai ka pualikaua o Gustavus e noho ana ma keia kulanakauhale, ua hui mai la me ia he elua mau regimena koa Sekotia, malalo o Sir Ferederika  Hamiletona ame Alexander, Master of forbes, a hookahi regimena poe koa Pelekane malalo o Kapena Austin.  Eia i keia wa maloko o ka pualikaua o Gustavus, he umikumamakolu mau regimena poe koa Sekotia, a o ka hapanui hoi o na’liikoa ma na mahele koa e ae o loko o ka pualikaua, he poe aliikoa Sekotia.  He elima ona mau regimena koa Pelekane ame na koa Airiki.  O ka nui nae o na koa Pelekane apau, he umi-

kumamawalu regimena apau.

     Ua makemake iho la o Gustavus e hoouka kaua aku maluna o na koa Sepania, ma ka aoao kokua i na Auseturia.  Ua hoouka kaua aku la ia maluna o keia poe, a ua hookuemi hope aku la ia lakou, a hiki i ka muliwai Rine.  Ma keia wahi i pau ai i ka wawahiia na waapa ame na moku e lana ana iloko o ka muliwai, i loaa ole ai ia Gustavus he moku a he waapa e kau ai ma kela kapa o ka muliwai.  Na keia mea i hookaulua mai i ka nee ana aku o na koa Suedena no kela aoao o ka muliwai, oiai nae, ua pae mua aku la na Sepania ma kela kapa o ka muliwai.

     O na la hope keia o Novemaba, a ua hele ka hau a paa-pu maluna o ka aina, a o kahi a na koa Suedena i hoomoana iho ai, he wahi ia he elua mile makai mai o Openaheima.  O kela kapa mai hoi o ka muliwai, ua paapu i na lau nahelehele ame na opu laalaau liilii.  Aia maluna o kekahi puu, aole no i kaawale loa aku mai ia lihi aku o ka muliwai, e hoomoana ana na koa Sepania iloko o ko lakou mau hale lole.

     I kekahi la, oiai o Nigela Gerema ame Makamu e holoholo ana ma kapa o ka muliwai, huli ae la o Nigela Gerema, a kamailio ae la ia Makamu i ka i ana:

     “Ina paha he wa mahana keia, elike la me ke kau Makalii, ina nohoi ua hiki ia kakou ke au aku maloko o keia muliwai a pae ma keia aoao.  He oiaio, he muliwai akea keia, aka, ua hiki nae i ke kanaka akamai i ka au ke au aku a pae ma kela aoao, ina nae he wa malie.

     “Ae,” wahi a Makamu i pane aku ai, me ka olelo ana aku, “aohe no he pilikia o ka au ana, eia nae, aole me keia mau lako kaua e au aku ai; aka, aohe waiwai o ko ke kanaka pae ana ma kela aoao, ke ole e hoea pu aku oia ma ia kapa me keia mau lako kaua, elike me ia e paa nei maluna o’u.  Manao au, o ka loaa ana ona waapa, oia ke alahele e hoalaia ai ka hiamoe lealea ana o kela poe Sepania me ka hikilele nui.”

     I kekahi kakahiaka ae, ua hele huli aku la o Makamu no kahi e loaa ai ona waapa iaia, ma kapa muliwai ma keia aoao aku.  He ekolu mile ka loa o kapa muliwai i hele ia e ia, aole nae he wahi mea a loaa he waapa.  I kona hoi ana mai, ua hakilo pono loa aku la kona mau maka, ma kela kapa o ka muliwai, no ka nana ana no i waapa.  I kona hele ana mai, a he hapalua mile paha koe hoea mai oia i ko lakou kahua hoomoana, ia wa i ike aku ai ia i kekahi mea eleele maloko o ke opu laalaau, ma kela kapa mai o ka muliwai.  I kona ku ana iho, a nana pono loa aku, ike aku la ia i ua mea eleele la, he waapa ia i hoopaeia aku ma ia wahi.  Aole i kana mai ka nui o kona hauoli i kona ike ana aku i ua waapa la.  Hoomaopopo iho la ia, o ka loaa ana o ua waapa la; oia ke alahele e hiki ai i ko lakou poe koa ke kau aku ma kela kapa, aka, pehea la auanei e loaa ai kela waapa, oiai aia ma kela kapa o ka muliwai.

     Ua lilo keia i ninau na ua wahi Makamu nei e noonoo nui ai.  Hoomaopopo iho la hoi ia, aole e hiki ana iaia hookahi ke hoolana i ua waapa la, oiai ma kona hoomaopopo ana aku, he waa nui maoli la.  Nolaila, i kona hoea ana aku i ko lakou kahua hoomoana, ua kahea aku la oia i kekahi kanaka opio nona ka inoa o James Grant, a oia nohoi ke alii kakiana o kona puali.

     I keia wahi kakiana o Makamu i hoike aku ai i kona manao no ke kii ana i ka waapa ma keia kapa mai o ka muliwai.  Ua hooholoia iho la keia manao ia wa.  A i kela wa nohoi ua wahi Makamu nei i hele aku ai imua o ke Konela o kona puali, a hoike aku la no ka mea e pili ana i ka waapa ana i manao ai e kii ma kela kapa o ka muliwai.  Ua laweia aku la hoi keia lono a hoea i ka Moi, a ua hoohauoli loa ia oia no keia nuhou i loaa aku iaia, nolaila, ua haawi koke ae la ia i ke kauoha e hoomakaukau na koa Suedena he ekolu haneri ame hookahi haneri koa Sekotia o kela ame keia regimena o Ramsay, Munero, ame ka Haku o Wormiston.  O ka aliihikaua maluna o keia mau mahele koa apau oia no o Kauna Brabe.  O ka lakou wa e ku ai me ka makaukau, oia ka wa mahope iho o ka uhi ana mai o ka pouli, a na ua Moi la nohoi e nana pono i ke ano o ko na koa nee ana aku ma ia po.             (Aole i pau.)

KELA ME KEIA AIOLE OIA NO

Aloha oe e Mr. Lunahooponopono.

     Ma ka Mauna Loa o ka la 13 o Aperila, haalele aku la kou mea kakau ia Kailua, hora 8:15 p.m., a ua ka Mauna Loa ka hana, hora 3 a.m. hoolele ia aku la ka Hon. W. C. Aehi i Kihei, a

koe iho la au, a ma Maalaea lele aku la o Yates no Waihee, hora 8:30 a.m., Aperila 14, hiki aku la i Lahaina, a ilaila i apa ai a ma ka hora 13:30 a.m. eku aku la no na ale o Kaiwi, a ma ka hora 7:15 p.m. hiki aku la i Honolulu.  Ua hele a luhi, a ma ka Poaono holoholo wahi aona aku la, a ma ke kakahiaka Sabati, hora 9:15 a.m., kau ma ke kaaahi helu 1, no Kahuku, Oahu.  Oiai, ua uku e ia ke kaa e ka Hon. W. C. Achi, a ke nee la ke kaaahi, a lohe aku la au i ka olelo la Moanalua Station, kie@ aku la au no ka manao ihea la i haki ai ke au, o ke oki aku la no ia.  Eia ka o Aiea la, hiki i Waikele, a lele he lehulehu o na ohua, a ko@ iho la no o Hu-a  ma e okuu ana.  Nana aku la o ke awa o Puuloa, a ulu mai la na hoomanao ana no ka ia kuhi lima o Heaha ka a Kuhilima o Ewa?  He okupe oia hoi mai kuhia no a Palea.

            Mai Kuhia no a Palea,

            Ohi hewa ka ia hamau leo.

            Oia la hamau kanaka ilaila oe.

     Nolaila la, he okupe ka ia hamau leo o Ewa, aole he pipi, hala hope ae la ka nana ana no Ewa ku ana o Puuohulu mamua, a hoohiki aku la i Waianae, i ke ahi a ke Kaiaulu, a hii iho la me Rev. J. Kekahuna, a kau pu iho la ma ke kaa, e holo ana oia i ka pule no Makua, a kuhikuhi mai la i ka maile laulii o Kolahi ame Malolokai, na hana lapuwale o keia au pouliuli, a hiki aku la i Makua, a noho ua makua la, a kuoe hookahi aku la au, a hiki aku la i ka lae o Kaena, a hoomaopopo pono iho la au aia la ihea kahi i olelo ia ai Mokuhololua Kaena i ke kai?  A hala ae la ka lae o Kaena, huli ma kela aoao eia ka o Kawaihapai keia, a hiki aku la i ke kula ia o Mokuleia, hoomanao ae la au.

     “Ke nana iho ia lalo o Kawaihapai.  Me he moena pawehe la ke kula i Mokuleia, &e.”

A hiki aku la i Waialua, nana aku la mao, a mao, a ike aku la i ke ehu kai o Puaena, me kuu manao he oiaio la he nui o Waialua, pela io paha, aka, no’u iho, aole no e like aku me Kona kai opua i ka lai; a haalele ia laila ne Kahuku Plantation, hiki Waimea, a ma ka hora 1:30 p.m. hiki i ka mahiko o Kahuku.  He keu ka wela a ano kohu ole keia wahi, a o ka mea kupaianaha aohe nui o na Hawaii e holoholo ana, iloko o ka Pake ame na Iapana ua ike au he mau kane a he mau wahine, aka, aole e hiki ia’u ke olelo he Hawaii paha lakou, a i ole, he poe Samoa paha, oiai, o ka nana mai no o na maka nunui kohu kaele paoo, aohe ekemu mai.  Ina he mau Hawaii lakou, alaila, he mau Hawaii o ke kulana haahaa loa, nana wale aku la no mao, eia ka o kahi ia o ka puaa k--- o Koolau, ke kupu o Kaliuwaa, a aia malaila o Kualoa, ame ke kai lumalumai.  Hora 2:15 p.m., kau hou mo ke kaa, a goodbye ia Kahuku, hiki hou ma Honolulu hora 5:30 p.m. a hiki ma kauhale na moa na mea ai, a haupa iho la nui ka eha o ka maka i ka lepo.

     Poakahi, Aperila 17, holoholo wahi taona hou iho la a ma ka Poalua, Aperila 18, hora 12 m., kau ma ka oneki o ke Kinau, a he mau lole hou ana ia a hora 2:15 p.m. haalele i ka uwapo, a eku mai la o na ale ahiu e lole ana io a ianei, a hora 10 p.m. ku i Lahaina, a ma ka hora 8:30 a.m. lele i Mahukona a kau ma ke kaaahi no Kohala, a noho ma ka home nani o ke Deputy Sheriff Pulaa; malaila maua e noho nei, iloko o na puili ana a Mr. and Mrs. C.H. Pulaa.  He malie ka aina haaheo, koe hoi ka lepo, e lele ana mao a maanei me he ao opua la.  Nolaila, eia kou mea kakau i Kohala, a ke ole na ulia hiki ole ke alo ae, ma Kona au e telegarapa hou ae ai ia oe.  O na mahalo a nui no Hon. W.C. Achi ame Mrs. Achi, ame Mrs. J.N. Robinson, ame Mr. ame Mrs. C.H. Pulaa.

            No kahi wa aku.

Kohala , Hawaii , Aperila 21, 1899.

     E hoomaka ana ka wili ana o k@ Wiliko o Oahu, ma Ewa ae nei, ma keia la paha, a i ole, ma ka la apopo paha.  Ma ka Poakolu nei i hoaola ai ka hooheleia ana o kona mau mea paahana, a ua ikeia ka holopono.  Ua manao ia, o ke oo ko i makaukau no ka wili, e hiki ana i ka 8,000 a 10,000 tona.