Ka Nupepa Kuokoa, Volume XXXVIII, Number 17, 28 April 1899 — Page 3
| This text was transcribed by: | Naomi C. Losch |
| This work is dedicated to: | Charles and Miulang Apo |
Ka Nupepa Kuokoa
KE KILOHANA POOKELA NO KA LAHUI HAWAII.
Ka Hui Alahao me Aina o Oahu
MAI A MAHOPE AKU O IUNE 13, 1898
Manawa Holo
WAHI HOOLULU. Waianae, kaa huikau, Waialua, kaa ohua, Waianae, kaa ohua, Wili o Ewa, kaa ohua
(Mai Honolulu aku.) na la apau koe ke Sabati na la apau. na la apau. na la apau.
A.M. A.M. P.M. P.M.
Honolulu ................ 7:10 9:15 3:10 5:10
Manana .................. 8:07 9:48 3:43 5:50
Wili o Ewa ............. 8:37 10:08 4:08 6:10
Waianae .................. 9:27 10:53 4:43 .......
Waialua .................. ...... 12:00 5:38 .......
WAHI HOOLULU. Wili o Ewa, kaa ohua, Waialua, kaa ohua, Waianae, kaa huikau, Waialua, kaa ohua, Wili o Ewa,
(Mai waho mai koe ke Sabati. na la apau. na la apau, koe ke na la apau. kaa ohua,
i Honolulu) Sabati. Sabati wale no.
A.M. A.M. A.M. P.M. P.M.
Waialua....................... ........ 6:12 ........ 2:39 .......
Waianae...................... ........ 7:12 10:09 3:55 .......
Wili o Ewa.................. 5:50 7:47 10:59 4:32 12:45
Manana....................... 6:15 8:07 11:34 4:52 1:10
Honolulu..................... 6:50 8:40 12:15 5:26 1:45
G. P. DENISON, Luna. F. C. SMITH, Luna Kuai Palapala Holo.
________________________________
NU HOU HAWAII
____________
Mai poina i na anaina pule o ka la Sabati ae nei.
____________________________
Eia mai "Ka Malolo." Ua lele i ka poai lewa. Ua pulu i a ua awa.
____________________
O keia ka la e ku mai ai ka mokuahi Moana mai ka Hema mai, a holo hoi loa aku no Kapalakiko.
______________________
E weheia ana na hana o ke kau kaapuni o Mei ae nei, ma ka Poakahi, maloko o "Aliiolani Hale."
________________
Ma ka Poakolu nei i ku mai ai ka mokuahi Mariposa mai Kapalakiko mai no Honolulu nei, a hala loa aku la no ka Hema.
______________________
Ua manao wale ia, e hooholoia aku ana na kaa hapaumi hou o ka Hui Honolulu Rapid Transit and Land Company mauli o na laina uwea i hoopaaia ma na pou, elike la no me na uwea kelepona.
____________________
Ua hala io aku no o Mr. Joseph Heleluhe ma ke alahele e hoea aku ai no Wasinetona. Ma ka mokuahi America Maru o ka Poalua o kela pule aku nei, haalele mai ai oia ia Honolulu nei.
______________________
Ua kukulu ae nei o C. Koelling ma Kaneohe, Koolaupoko ae nei, he hale hana aila koli (castor oil). Ua ku ka hale hana, a ua hoonohoia na mea paahana maloko ona. He elima paha mahina a oi i hala ae nei i lawelawe ai oia i keia hana.
_________________
He eono mau Loio Iapana kaulana i hoea mai i Honolulu nei, ma ka mokuahi America Maru, ma ka Poalima o kela pule aku nei, a hala loa aku la no Amerika Huipuia, a no Europa nohoi, no ka huli ike ana, ma na kanawai lahui o Amerika ame Europa.
________________
Aole ae ka Hui Kokua Hawaii e komo pu me na hui kokua a manawalea e ae o Honolulu nei, e manaoia nei e hoohuihui ae a malalo o ka hui nui hookahi, nona ka inoa, The Society of Associated Christians. Maikai no ka hoohuihui, a he maikai no hoi ke kuokoa ana.
__________________
Aia no kela kamaaina kahiko o Hawaii nei, James Campbell (Kimo Ona Miliona o Lahaina) i San Jose, Kaleponi, kahi i noho ai. Aole i pau kana mau hana hoomaiau hou i ka hotele i lilo mai iaia malaila, no ka inoa o Kimo Hemolele (St. James).
_______________
He La Puali Inu Wai nui ka Poaono o keia pule ae, no na Kula Sabati o Oahu nei. Oia ka la kai huakai hokahakaha oia poe. E alakaiia ana ka hua kai e ka Bana Puhi Ohe o ke Kula Kamehameha.
_______________
Ma ka Poalua iho nei i hoomaka ai o Ilamuku Brown e hooko aku i ke kauoha kanawai e pili ana i ka ae ole ia ana o na ukana, na puolo ame na waiwai kalepa e ae e hoopilikia i na alahele aoao o ke kulanakauhale. He alahele maikai keia o ka hoomahui ana.
________________
Ke mahuahua loa nei ka manaoio mawaena o kekahi poe mea dala o loko nei o ke kulanakauhale e weheia aku ana ka hale e nohoia nei i keia wa e "Kuhina" Amerika Sewall, ma Waikiki ae nei, i hotele o ke kulana helu ekahi. O ke kumuwaiwai i manaoia no kela hana he $100,000.
______________
Ua malama ia ma ka Poalua nei he paikau hui o na pualikoa Hawaii ma ke kahua hookahakaha ma Makiki ae nei. Ua maki aku na puali apau mai ka halepaikau aku maloko nei o ke kuklanakauhale malalo o ke alakai ana a na Mekia Zeigler ame Camara. O ka Bana Auipuni ma ke poo o ka huakai.
____________________
NA EKALESIA.
________
UA PONIIA I KAHUNAPULE.
________
E ka Nupepa Kuokoa.
Aloha oe:--He puolo makamae ka'u no ka pono o kou poe heluhelu o kou mau kolamu mai Hawaii a hiki aku i Niihau.
Ma ka halawai ana o ka Ahahui Ekalesia o ka Mokupuni o Kauai ma ka la 12 o Aperila, 1899, ua hoomaopopoia kekahi mau lima kokua o na hana e poni ia no ka hana oia o Mr. J. M. Naeole ame Mr. Sam. E. Kaula, a ua apono ka Aha pela, a ma ke ahiahi ae o ka la 13, Hora 7:30 ua alakai ia na hana poni e ka Lunahoomalu oia Aha, Rev. Sam. Kaili, a penei na hana i hanaia imua o kekahi anaina o na hoahanau o ka Ekalesia o Lihue ia po:
Himeni 501--Himeni Hawaii.
Pule Pokole--Mat. 5:1-16, Rev. I. K. Kaauwai.
Himeni 502--Rev. Sam. Kaili.
Haiao--Mat. 5:16, Rev. O. P. Emerson.
Pule Hoolaa--Rev. Sam. Kaili ame ka Aha.
Lima Akau Aloha--Rev. J. B. Hanaike.
Olelo a'o i na Kahu Hou--Rev. J. M. Lydgate.
Olelo Paipai i ke Anaina no na Kauwa Hou--Rev. G. L. Kopa.
Himeni Hookuu 598--Rev. J. M. Naeole.
Pule Hookuu--Rev. Sam. E. Kaula.
O keia ka pau o na hana oia po. Hoolaha mai ka Lunahoomalu e hookuu ia ka Aha a akoakoa hou mai ma ka luakini o "Poni Moi" ma Koolau i ka Poakolu elua o ka malama o Okatoba, Hora 10 a. m.
O keia ae la ka'u puolo no ka pono o kou poe heluhelu me ke aloha ina keiki o ka mikini uwila.
Kou oiaio,
S. W. KAUANOE.
Hanalei-uka, Aperila 20, 1899.
____________________
KA MOOLELO O KE KULA O NA KAHUNAPULE AME NA LUNA EKALESIA O KA MOKUPUNI O KAUAI.
_______________
Hoomaka hou ke kula ma ka hora 10 a. m. o ka la 11 o Aperila, M. H. 1899, maloko o ka luakini o Lihue.
Rev. J. M. Lydgate, ke kumu, ma ka noho, ame Sam. Kaili, ke kakauolelo.
Na haumana i hiki ma keia kula ana: Rev. G. L. Kopa, J. B. Hanaike, I. K. Kaauwai, J. M. Naeole, Sam. E. Kaula, L. K. Kakani, H. K. Kahele, J. K. Hanuna, D. Puhi ame Hoewaa.
Weheia na hana me ka himeni ame ka pule. Hapaiia na haawina.
1. Heluhelu kumumanao e pili ana i ka "Oihana Kahunapule."
2. Heluhelu kumumanao, "Ka pili o ke Kula Sabati me na hana Ekalesia."
3. Ke kumuhana, "Ka Poino nui o Hawaii nei.'
a "Ka Hoomanakii i ike makaia."
e "Ka Hoomanakii i ike maka ole ia."
i "Ka moekolohe ame ka hookamakama."
4. "Ka Iwi Haiao ma Mat. 9:9," o na haumana apau.
5. "Ka Haiolelo ia Rev. Sol. K. Kaulili."
6. "Na Hoike Kihapai no elua malama."
Hooholo ke kula e hoolahaia ma ka nupepa ke kumumanao 2 ame ka moolelo o keia kula ana. Hoopau ia ke kula ma ka himeni ame ka pule a Mr. Moewaa.
SAM. KAILI. Kakaumoolelo.
_________________________
KA MOOLELO O KA AHAHUI KULA SABATI O KA MOKUPUNI O KAUAI.
_________
Noho ka Ahahui Kula Sabati ma ka luakini o Lihue i ka hora 11 a. m. o ka la 13 o Aperila, M. H. 1899. Rev. I. K. Kaauwai ma ka noho. Hoomaka na hana me ka himeni ame ka pule.
Hoomaopopoia na hoa o ka Aha: Kula Sabati o Waioli, S. W. Kauanoe, kahu; M. Puulei, elele; Koolau, P. Migell, elele; Moikeha, C. K. Haae, elele; Lihue, W. H. Rice, Jr., kahu; H. K. Kahele, elele; Koloa, Kahoewaa, elele; Hanapepe, J. Maliakai, kahu; Mrs. Malani, elele; Waimea, W. B. Opunui, elele.
Na hoa mau oia na hoa o ka Ahahui Ekalesia o ka Mokupuni o Kauai.
Kohoia o Rev. I. K. Kaauwai i Lunahoomalu ame S. W. Kauanoe i kakauolelo. Koho ka Lunahoomalu i na komite.
1. Komite Imi Kumuhana--Rev. Sam. aKili, H. K. Kahele, C. K. Haae.
2. Komite Hoalohaloha--Rev. S. K. Kaulili, P. Migell, W. B. Opunui.
Na Kaili i ka hoike a ke Komite Imi Kumuhana: Hapaha hora haipule, ka hoike a na Kahu Kula Sabati Nui, ka hoike papa helu a na Kahu Kula Sabati Apana, ka hoike a na Elele Kula Sabati, ka hoomaopopo ana i na komite no Honolulu, ke koho ana i na Elele no ka Aha Paeaina, ka hoike a na komite o keia Aha, ke koho ana i na Kahu Kula Sabati Nui, ke koho ana i na luna nui o keia Aha, kahi ame ka manawa e akoakoa hou ai.
Hapaiia ke kumuhana 2, 3, na ke Kakauolelo i heluhelu mai i ka hoike a na Kahu Kukla Sabati Nui ame na Kahu Kkula Sabati Apana, aponoia.
Hoomaha ka Aha a hiki i ka hora 1 p. m. me ka pule a ka Lunahoomalu.
Hoomaka hou na hana elike me ka hoomaha ana me ka himeni ame ka pule. Kumuhana 4, ka hoike a na Elele. Na Opunui, Mrs. Malani, Kahoewaa, Kahele, Haae, Migell, Puulei i heluhelu mai i ko lakou, aponoia.
Kumuhana 5, na komite o ka Aha Paeaina. J. A. Akina, no na hoike Kula Sabati; S. W. Kauanoe, no ka moolelo o ka Aha. Kumuhana 6, koho ka Aha ia Puulei, Migell, Kahoewaa ame Opunui. Kumuhana 7, na Kaulili i kona. Na J. K. Apolo no ke kia hoomanao o G. B. Meheula. Na Kaili no ke kumukanawai ame na rula no ka Ahahui Kula Sabati o Kauai, aponoia, noi ia mai e pai ia ke kumukanawai ame na rula ma ka buke. E hoomau aku ke komite no ke kia hoomanao o G. B. Meheula.
Kumuhana 8, na Kahu Kula Sabati Nui, kohoia o Wm. Huddy no Kauai Hikina, ame G. L. Kopa no Kauai Komohana.
Kumuhana 9, koho ana i na una nui. I. K. Kaauwai ka peresidena, S. W. Kauanoe i kakauolelo, e noho laua no hookahi makahiki.
Kumuhana 10, kahi ame ka manawa e noho ma kahi e noho ai ka Aha makua i ka malama o Okatoba. Noi mai o Kahele e heluheluia ka moolelo, heluheluia a aponoia. Noi ia mai e hookomo i keia moolelo ma ke "Kuokoa" ame "Ka Loea Kalaiaina." Hookuuia na hana me ka himeni ame ka pule a Sam. Kaili.
S. W. KAUANOE. Kakauolelo.
_____________________
NA ANO AI O KOHALA--KUDALA AINA O KA LEHULEHU--PONIIA ANA I KAHUNAPULE.
__________________
E ka Nupepa Kuokoa:
Aloha oe:--E oluolu hou mai oe i wahi itamu kaawale no'u ame ka'u makakila, i hooakaka pokole aku ai au i mea ou ame na kini makamaka o kaua, mai ka la pua a ka la komo i Lehua, a penei no ia:
Ma ka hale hookolokolo o Kaapau, N. Kohala, Maraki 25, ua akoakoa ae la ma ia la, he mau haole kaka'kahi ame na kanaka; aole hoi o ke Pukiki he manuahi ia no ka la-i.
Ma ka hora ame ka minute e paku ae ai i ka hora 12, ua ku mai la o Charles Williams a hoakaka i ke ano o ka aina, ke kumukuai o ka eka, ka hoopuni ana i ka pa, kanu ana i na laau maluna iho, kukulu ana i ka hale; aole e emi malalo o ($50.00) dala.
I ka wa e lilo ai o kekahi apana aina, e uku mua ia ka hapalima o ua aina la; i kela ame keia makahiki e uku hou ia ai ka hapalima me ka uku panee o ke dala; o ka oi loa aku nae o ka nani, o ka hookaa pau i kinohi, aohe noonoo uku panee hou ana aku mahope.
Mahope iho o keia mau hoakaka ana ua pane hou mai la o Charles Williams penei: "E hoomaka ana kakou ma ka apana helu 4, he 12 eka o keia apana me .08 hapahaneli; he ekolu dala o ka eka, ua like me $36 dala; a maluna ae o keia ua ae ia kela ame keia e koho, ma ka pakahi dala a pii aku a ka inoa hookahi." Oia ka wa i ike ia aku ai kela ame keia e kuene pono ana ma kona wahi. I ke poha mua loa ana a ka hamale a ka luna kudala, oia ka wa i koho ae ai kela ame keia ma ka pakahi dala, peku hoi kekahi e $4 dala, hamale hoi kekahi e $5 dala, a na Mrs. Annie Chas. Pulaa i haawi ae i $12 dala no ka eka, ma ka inoa o papa Peahi.
Eia iho ka nui o na apana i lilo, ka nui o na eka, ka poe nana i koho, ame ko lakou kumukuai pakahi:
Apana 4, 12.08, Mr. Peahi ........................$121
" 5, 6.65, Jures......................................20
" 5 (a), 6.65, Timoteo............................21
" 7, 17.01, C. Gomes.............................52
" 8, 23.23, H. R. King..........................160
" 9, 18.31, Mrs. Paitano.......................105
" 10, 12.80, F. Paitano...........................39
" 11, 10.00, Faran@a.............................31
" 12, 7.90, H. M. Kaniho.....................24
" 14, 10.00, Nakoholua..........................31
" 17, 13.60, Kuamoo..............................41
" 18, 14.70, Kalawa...............................45
" 19, 13.34, A. K. Eldridge....................40
" 21, 12.10, R. Lang..............................47
" 22, 10.34, Sam Hook..........................32
" 23, 14.25, Peter Nelson.......................43
" 24, 13.00, Mrs. A. Pulaa.....................40
" 25, 7.17, Kawaimaka........................22
" 33, 25.50, Liwai Manu.......................95
" 36, 36.00, Anton Luis........................109
" 37, 38.89, S. Kahalekui......................117
" 38, 35.85, Mrs. E. Atkins....................87
" 39, 28.85, White Atkins......................87
" 40, 38.26, R. H. Atkins......................120
" 41, 32.26, F. Atkins.............................97
" 3, 9.50, Anton.....................................30
O keia mau apana ae la i hoikeia maluna, he mau apana nani a maikai; o kela mau apana hoi 37, 38, 39, 40, 41, oia no ke kukla o ihuanu ponoi e pii la a hoea i ke alanui o Mahukona mai Nunulu ae; o ka apana 23 hoi, oia kela apana inoino ma keia koho ia ana, he ahua ku makani, a he kualapa no hoi. Ua manao kuhihewa ka mea nana i koho he wahi kkupono ia no kona hale amala e kukulu aku ai ma keia mua iho. Ke waiho ia nei hookahi apana nona na eka 4 a oi, i wahi no ka hale kula e kukulu aku ai. A oia no ka apana helu 6 i hoikeia ma ke kii. O ka mea kupanaha nae ma keia koho ana, oia no ka ae ia ana o kekahi poe mea aina, e koho ae i mau apana no laou [lakou?] ma keia wahi, kahi hoi i hookaawale ia no ka poe nele. Ke liuliu nei o Chas. H. Pulaa i ke one a me na pono pa, a pono hale iloko o keia mau la. Aloha no ia hoa ke hoi aku.
PONIIA ANA I KAHUNAPULE NO KA HOOMANA I KAPAIA "HE ALOHA AINA."