Ka Nupepa Kuokoa, Volume XXXVIII, Number 11, 17 Malaki 1899 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

Ka Hui Alahao me Aina o Oahu

MAI A MAHOPE AKU O IUNE 13, 1895

Manawa Holo

WAHI* HOOLULU Mai Honolulu aku,)

 

Waianae, kaa huikau,

                na la apau koe ke Sabati.

Waialua, kaa ohua, na la apau.

Waianae, kaa ohua na la apau.

Ewa, kaa ohua na a apau.

 

                                A.M.       A.M.       P.M.        P.M.

Honolulu . . . .         7:10        9:15        3:10        5:10

Manana . . . . .        8:07        9:48        3:48        5:50

Wili o Ewa . . .         8:37      10:08      4:08        6:10

Waaianae . . . .       9:27      10:53      4:43        . . . . .

Waialua . . . . .         . . . .        12:00      5:38        . . . . .

 

WAHI HOOLULU. (Mai waho mai a i, Honolulu.)

 

Wili o Ewa, kaa ohua,

                koe ke Sabati.

Waialua, kaa ohua, na la apau.

Waianae, kaa huikau,

                na la apau, koe ke Sabati.

Waialua, kaa ohua, na la apau,

Wili o Ewa, kaa ohua,

                Sabati wale no.

 

                                A.M.  A.M.    A.M.  P.M.  P.M.  P.M.

 

Waialua . . . .         . . . .         6:12        . . . .         2:39        . . . .

Waianae. . . . .       . . . .         7:12        10:09     3:55        . . . .

Wili o Ewa . . .       5:50        7:49        10:59     4:32        12:45

Manana. . . . . .     6:15        8:07        11:34     4:52          1:10

Honolulu . . .  .      6:50        8:40        12:15     5:26          1:45

    G. P. DENISON

                Luna.     F. C. SMITH

                                Luna Kuai Palapala Holo

 

NU HOU HAWAII

 

  Ua ku mai ka mokuahi Auseteralia i Honolulu nei ma ka Poakolu iho la.

 

  Ke pii ae nei i ka maikai loa o Bonnie Judd i loohia ai i kekahi ena haule mailuna aku o ke kaa i kahi wa i hala ae nei.

 

  Ua lilo ae nei ia John Ouderkirk ka aelike no ka hana ana i ke kahua o ka Hale Kula ma Alanui Beritania no ka huina o $2,350.

 

  He la haluku pioo o na kanaka, elike me ka wai kahe, ka la Sabati aku nei, ke hele la a hooke na huina alanui i ka ua mea he kanaka.

 

  Ua komo hou aku nei ka mokuahi Zealandia iloko o na hookauwa ana a ke Aupuni o Amerika Huipuia ma ka lawe ana i na koa i ke kai o Manila.

 

  Ma ke ahiahi o keia la, hora 7 me 30 minute, e haiolelo ai o Loio T. McCants Stewart maloko o ka Y. M. C. A.  O kahi loio paele keia e kaulana nei i ka makaukau ame ke akamai ma ia oihana.

 

  He nui no na hunahuna waiwai nui i koe e pili ana i ke Kama'liiwahine Opio, aka, no ka loaa ole ana ia makou he wa kupono ma ko makou pepa o keia pule ua hoopanee makou a loaa he wa pono.

 

  He Aha Mele nui ke haawiia ana maloko o ka lunakini o Kaumakapili ma ka po o ka Poaha o keia pule ae. Ua oleloia o kekahi ana keia o na Aha Mele maikai loa i ikeia maloko o keia kulanakauhale.

 

  Ke haawi aku nei makou i ko makou mahalo ia Mr. Mahuka o ka Uapo ae nei no kona hoolako ana mai ia makou me ka papa inoa o na Poola i komo ai maloko o ka huakai hoolewa o ka la Sabati iho nei.

 

  Ke mau mai la no ka hakaka ana a na Pilipino me na Amerika ma Manila. O na Pilipino ia e pau la no i ka luu poo i ke kai o ka aina hanau o lakou, oia o Manila, a he wahi anoai ka make i loaa i na Amerika.

 

  O ka mokupuni kekahi o Keawenuiaumi i bapetizoia e na haule ku-a-ua elike me ia i ikeia ai ma Oahu nei ame Maui. Ma na kahawai o na Hilo, ua hueaia na piha-a o ke kuahiwi, a ua okalakala kunahihi na hana a ka wai.

 

  O ka Opuu Alii Opio mua o ke Karaunu o Ka Haku o Hawaii kona inoa, a o keia Opuu Alii Opio hoi i hala aku la. o Ka Lei o Hawaii kona inoa. Ka mua,, The Prince of Hawaii, a o ka lua hoi. The Crown of Hawaii.

 

  He hookuku paio ka na kaikamahine o ke Kula Kamehameha me na kaikamahine o ke Kula o Punahou ma keia Poaono iho. He kini popo puhenehene hinai ka lakou e ulele ai. Ea, opaha paha auanei na kini popo a ua. Kamehameha nei i na ui o Punahou?

 

  Aohe laau lapaau maikai e ae no na bebe elike la me ka Laau Kunu a Kamalena. O ka ono o keia laau ma ka wa e inu aku ai, oia kona mea i lilo ai i laau makemake loa ia e na makuahine ame na kamalii, a pela pu nohoi me ka hikiwawe o ke ola. E ola koke ana ko lakou mau kunu ame ke anu, a hoopauia hoi ka loohia ana i ka ma'i numonia, a mau mai e ukali ana i nei mea he anu ame ke kunu. E ola ana ka ma'i kunu ho, a ua inu ia keia laau e na poe ma'i he umi tausani ka nui o keia ano ma'i, aole he ma'i i nele i ke ola, wahi a ko makou hoomaopopo. Aole nohoi e hiki wale ana no i keia laau ke hoola i ka ma'i kunu ho, aka, ma ka wa e haawi mua loa ia ai keia laau i ka wa o ka hoomaka ana mai o ua ano kunu la, e kaohi koke ia ana kona kuene pono ana mai. Ma na ma'i kunu-kalea hoi, e hoopalupalu ana keia laau i ka male uaua, a oluolu ke kunu ina aku, a hoemi mai hoi i ka ume paupauaho ana a ke kunu ame kona pinapinai ana, a pela auanei e paleia ae ai na hopena poino oia ano ma'i. E kuaiia ana e Benson Smith & Co., Kaupalenaia, na Agena Kuai Kukaa.   *

 

Ke Aloha o kuu Makuahine

 

KE ALOHA O KA'U MEA I ALOHA AI.

 

Ka Mana o ke Aloha.

 

He Moolelo Walohia

 

  "E Mama, ina e huhu mai o Papa ia oe no keia hana au i kokua mai nei no'u, e hai aku oe iaia, ua ake ino loa au e loaa ia'u keia huina dala, i mea hoi e loaa ai ia'u ka maha ame ka oluolu, a manao no au, aole ia e huhu mai ana ia oe," wahi a George i pane aku ai i kona makuahine.

  Me na waimaka hoi e haloiloi ana ma na maka o uawahine la pane mai la oia imua o kana keiki:

  "E George, e kuu keiki, e hoao no au elike me ka hiki ia'u ke hana i mea e hookoia ai kou makemake. Ina e loaa mai ia'u kela huina dala au i makemake ai, alaila, e haawi aku no au ia oe, oiai o oe no ka'u mea nui."

  "Mama, e hooikaika loa oe i loaa ai ia'u keia huina dala. Nolaila, e haalele iho ana au ia oe i keia wa. E hoi aku au i kahi a'u e hauoli ai, a ka la apopo hoea hou mai au i ka hale nei, a ma ia wa e haawi mai ai oe ia'u i ka'u mea i makemake ai."

  "Auwe no ka hoi," wahi a Madame Lamabereta i hooho ae ai me ke pahaohao loa, a ninau mai la oia i kana keiki, "Ea, aole ka hoi kaua e noho pu iho ana ia nei i keia po, aia hoi a ka la apopo hoi aku oe?"

  "Auwe no ka hoi kou hoomaopopo ole e Mama i kuu mea huna pohihihi. Ua hai aku nei hoi au ia oe, he mea huna pohihi ka'u, a he mea pono hoi ia'u ke hoi ake e malama i ua mea huna pohihihi la. Nolaila, e Mama, e hookuu mai oe ia'u, mai aua oe ia'u o pilikia auanei au."

  Oiai nohoi laua e kamalio ana, hoi mai ana o Robata mai kana huakai o ka hele huli ana aku no George, a e kau ana maluna ona na helehelena o ke kaumaha. Aka, i kona ike ana mai i kana aikane e noho aku ana me kona makuahine, ua auhee aku la na manao kaumaha apau maiioko aku ona, a mohala mai la ka nanaina o ka hauoli ma kona mau maka.

  Mahope iho o kona lulu lima pua ana me George, ua hoike aku la o Madame Lamabereta imua ona i na. mea apau e pili ana ia George, oia hoi ka George mea i noi aku ai iaia.

  "E Madame Lamabereia, e hai aku au i oe i ko'u manao ponoi iho. Ma keia wa nae i ku ae ai o George iluna a hoike aku la oia i kona manao e haalele iho ia laua, oiai aohe ona manawa e kahi hou iho ai. Ia wa i huli ae ai ia a puka aku iwaho.

  I ka noho kokoolau ana iho hoi o Robata me Madame Lamabereta ia wa i pane aku ai ia imua o ka makuahine o George:

  "Manao au, he mea oiaio ka George i hai mai nei ia oe, aole hiki ia oe ke ninau aku iaia no ka mea e pili ana i ka mea huna pohihihi ana e huna nei i keia wa. He mea oiaio, mamuli o na mea au i hoike mai nei, ma ke ano hoi oia na olelo a George imua ou, aole i kana mai ka nui ame ka hohonu lipolipo o keia mea huna pohihihi e hunaia nei e George. Aole hiki i kekahi kanaka o loaa ole na haawina mana kupua ke ike i ke ano maoli o keia mea huna, aka, hookahi nae mea maopopo ia'u, o keia mea huna pohihihi a George i hai mai nei ia oe, oia ke kumu o kona hauoli ame ka loaa ana iaia he ikaika hou, e hiki ole ai ia oe ame a'u ke hopohopo nona. O ke kumu o kona huna ana i keia mea huna pohihihi mai a oe aku, kona makuahine ponoi, aole no hiki ia'u ke hai aku ia oe i kekahi hoakaka kupono e hoopauia ai kou pohihihi ame ke kanalua ma ia mea, aka, ua hiki nae ia oe ke hoomaopopo iho, he kumu nui io maoli no ka George i huna ai imua ou i keia mea huna. O ka kaua hana pono wale no e hana ai i keia wa, oia ko kaua manao ana, ua palekana oia keia wa, a malia e hiki mai ana ka wa e ike ai oia o ka hale ana i kukulu ai ma ke ano he hale ia no kona hauoli, e helelei ana ia me he hale la i kukuluia maluna o ke one."

  Ua hoea maalahi aku la o George no kahi pupupu hale e noho ana kana aloha. Ma ia po iho, ua moe iho la no ia maluna o kekahi wahi noho, me ka makaukau mau e hooko aku i na Ieo kahea apau a Alice e kauoha mai ai iaia.

  I kekahi kakahiaka ae, na maikai loa ae la ko Alice ola. Ua hiki iaia ke ala ae a noho iluna. A ma ia la. ua elua manawa i hele holoholo ae ai oia iloko o ka rumi me ke kokua ole ia aku e kekahi mea.

  Mahope iho o ko laua kamakamailio pu ana no ka mea e pili ana ia laua iho, ua hooholo iho la laua e haalele laua ia Parisa a e hele aku laua i ka aina e, a malaila laua e noho ai malalo o na inoa kapakapa.

  Ma ka hora 1 o ka auina la, ua haalele iho la o George ia Alice a holo hou aku la ia noloko o ke kulanakauhale, no ka home o kona mau makua.

  I ka ike ana mai o kona luaui makuahine iaia, ua olino ae la ka hauoli ma kona mau papalina, a mahope iho o ko laua lulu lima aloha ana ame ka honi ana hoi o ka makuahine i kana keiki, ia wa i pane mai ai ua Madame Lamabereta nei imua o kana keiki:

  "I kii mai la paha oe i ka huina dala au i nonoi mai ai ia'u ma ka la inehinei? Ua hooko aku au i kau kauoha, a ua loaa io mai ia'u ka huina dala au i makemake ai. Eia me a'u i keia wa, he hookahi haneri tausani hapaha farani elike me kau noi."

   Ua haawi aku la ia i kana mau hoomaikai ana i kona makuahine, a ma ka wa hoi a kona makuahine i hoomahui hou mai ai iaia no ka mea e pili ana i ka mea huna pohihihi ana e huna ana, ia wa i pane aku ai oia:

  "E Mama, ina he mea hiki ia'u ke hoike aku ia oe i keia mea huna a'u e huna nei i keia wa mai ia oe mai, ina no ua hoike aku au ia oe ma ka la i nehinei, aka. he mea huna keia i hiki ole ia'u ke hoike aku ia oe i keia wa. Aia maluna o keia mea huna kahi i ku ai ko'u hauoii. Ina e ikeia ana keia mea huna a'u e aua loa nei i keia wa, aiaiia, o ko'u ola aku no ka moepuu ola mea."

  "E kuu keiki, e kala mai oe ia'u. Aole loa au e ninau hou aku ia oe no keia mea ma keia  mua aku," wahi a kona iuaui makuahine i pane mai ai.

  I ka loaa ana mai o ua mau hapaha farani nei he hookahi haneri tausani ia George, ua noho ike iho la ia me kona makuahine, a ma kona wa i makaukau ai no ka hoi ana aku no kahi o kana mea i aloha ai, ua noni aku la ia i kona makuahine.

  I ko George hoi ana, ua kipa ae la ia ma ka hale tela ame ka hale kuai lole ana i ohi ai i na lole he nui a lawe aku la ia mau mea me ia a hiki i ka hale.

  I ka hoea ana mai o ka la e haalele iho ai o George ame Alice ia Parisa, ua uku aku la o George ia Rikeke he kanakolu hapaha farani, ua like hoi ia me eono tausani dala. Ua a'o aku la o George iaia he mea pono iaia ke hoolilo i keia mau dala ma kekahi hana e waiwai ai oia.

  Aole i kana mai ka nui o ka hauoli o ua wahi Rikeke nei no keia makana makamae i loaa aku iaia mai a George aku, a ua haawi mai la oia i kana mau mahalo kiekie ana ia George. Ua hoike pu mai la nohoi oia i kona makemake loa e hele pu me laua, aka, ua olelo aku nae o George iaia, ua oi loa aku kona waiwai iaia e noho oia i Parisa e kiai ai i na hana a Kauna Berene.

  I ka auina la o ua la la, ua ikeia aku la kekahi kaa lio nani o holo mai ana a ku iho la ma kekahi hotele. Aia maluna o keia kaa he wahine i aahuia me kekahi aahu kilika eleele, a o Petero Rikeke kekahi mauna o ua kaa la. Aole paha i hala he elima minute o ke ku ana o ua kaa la malaila, oia ka wa i ikeia aku ai o George Lamabereta e hele aku ana a kau aku la iluna o ua kaa la, a holo aku la no kahi hoolulu kaa-ahi.

  Aole nohoi i liuliu ka holo ana aku o ua kaa la, aia hoi ua hoea aku la ia no kahi hoolulu kaa. E ku ana nohoi ke kaa ahi a e makaukau ana e holo aku. Ua kau aku la laua nei iluna o ua kaa la, a komo aku la maloko o kekahi keena hele ekahi, a maiaila laua i noho iho ai. Kani ae la ke oeoe a holo aku la ke kaa, haalele iho la i ke kulanakauhale o Parisa.

  Ike aku ia hoi o George i ko Alice hanu ana ae me he mea la e hoomaha ana ia i ka ikiiki o kona uhane e poluluhi ana iloko ona.

 

MOKUNA XIII.

 

  E kuu makamaka heluhelu, e haalele kaua i ka nana ana no Alice ma, a e huli ae ka kaua nana ana iloko o kekahi keena hookipa o loko o kekahi hale nani ma kekahi wahi mamao mai Parisa aku.

  Aia maloko o keia keena e noho ana kekahi wahine aoo o kona mau helehelena a o kona kokoolua he kauka.

  "E kuu kauka maikai," wahi a ua wahine aoo nei i pane aku ai imua o ke kauka, me ka hanu kaumaha ana ae hoi, "O kau olelo i hoike mai nei no'u, ma ke ano e loaa ana no la'u he mau loihi o ke ola ana ke hopohopo nei au i ke kulike ole oia mau olelo hoolana manao au i hoike mai la, me na mea maopopo a'u e ike maoli iho nei no'u. Ma ka hoomaopopo, aole paha e loihi aku ana na la o kou kaapa ana aku ma keia oia ana?"

  "O ke kaumaha ame ka luuluu o kou kino i keia wa, mamuli no ia o kau huakai hele o ka hele ana mai nei. Manao au elua a ekolu paha la mai keia la aku, a maikai loa no oe."

  Mino aka iho la ua luahine nei, a pane mai la oia imua o ke kauka:

  "He mea makehewa paha ia kaua ke paio ake me na hoike maopopo a ka make e hoike mai nei maluna o'u. He oiaio, he mau wahi hebedoma kakaikahi paha ka'u e nee aku ai, a loaa mai no au i ka make."

  "Mai hopohopo oe no ia mea. Ina he manao kou e hoopauahi okoa iho i kou ola ana, alaila, he mea koa paha ia. Aole hiki ia'u ke aua i ke ola o ka poe apau e hemahema wale ana i ko lakou mau ola."

  "He makemake loa au e loaa ia'u ka hiki pono ana iloko o keia mau la aku e noho me ka maikai a hiki i ko'u wa e hoomaha ai. Aole no i lilo keia ola ana i mea hauoliia e a'u, oiai ua hala ka mea nana e hoohauoli mai i kou mau la," wahi a ua luahine nei i pane mai ai imua o ke Kauka.

  "Aole o'u hoahewa ia oe no keia mea, oiai ua hala aku la no kau mea i aloha loa ai.

  "Ae; i keia wa ua makaukau au e hele aku ma kela ao. He mea oiaio, he wahine au i haawi ia'u iho iloko o na lealea o ka nohona o keia ao, a ua ike au i na ino he nui. Ua haaheoia e a'u na hanohano apau i ko'u mau la opio. He iwakalua o'u makahiki i noho ai iloko o ka hanohano ame ka haaheo, aka i keia wa ke nana aku nei au ia mau makahiki i nohoia ai e a'u ma ia ano, he mau makahiki ia i uhauhaia malalo o ka mana o Satana. O ka'u puni oia na opuu daimana anapa ame na waiwai makamae e ae he nui. O na aahu nani o na ano apau o ka'u mau mea makemake loa ia. O ka mahaloia mai e na mea apau oia ka huluaa hoihoi o koo'u manao. Aka, i keia la, he lapuwale o na lapuwale ia mau mea apau, pau na mea apau i ka lapuwale."

  "Ke hoike mai nei oe imua o'u i na mea huna o kou ola ana." wahi a ke Kauka i pane aku ai.

  "Pela io no. Aole paha au i hoike maoli aku la imua ou i na mea huna i pili ia'u ma ke ano he hana ia e hoohilahila ai ia'u iho me ka loaa ole ana o kekahi kumu kupono no ia hana ana. Aole. Ua hoike au ia oe i keia mea, ma ke ano e wehe ae ana au i kekahi mau mea ano nui i pili i ka waiwai a'u e noho ona nei i keia wa. Ua ike no oe he nui ka waiwai aka'u kane i hooili iho ai maluna o'u, ame ke kaikamahine i hala aku la iloko o ka make. Mamuli o ka make ana o keia kaikamahine, ua kau mai la keia waiwai holookoa apau maluna o'u. Ua haawi au i ka'u mau noonoo ana no ka'u hana e hana aku ai no keia waiwai a ua hooholo iho la au, e haawi aku no au i kekahi mau mahele o ua waiwai la i na halekula o na keiki ilihune ame na keiki makua ole. E haawi nohoi au i kahi o keia waiwai no na hale o na wahine kama ole a kanemake hoi. E haawi nohoi au i kahi hapa o keia waiwai i na halemai. Manao au mamuli o keia mau hana manawalea a'u e hana ai e loaa ai la'u ka hoolaulea hou ana me na Lani no na hewa a'u i hana ai i ko'u mau la opiopio. He ekolu miliona hapaha farani a kuu kane i hooili iho ai maluna o'u, a ua hooili nohoi oia he mau miliona hapaha farani maluna o Alice de Maraceli. O ka'u mau miliona hoi, ua manaoia no e hooiliia maluna o kela kaikamahine a'u i aloha loa ai, aka ua hala ia, a ke oia nei hoi au, a nolailia, heaha la ka ka waiwai o ko'u ola ana."

  "Aole ka he keiki a keia lede opio e ola nei i keia wa?"

  "Ae, ua lohe au he keiki kana. Aka, o ka mea pilikia, oia ka lilo ana o Kauna de Berene ka luaui makuakane o keia keiki, moopuna hoi a'u. Aole o'u makemake iki e loaa i kela kanaka he wahi keneka hookahi o keia kala. O ka'u e manao nei e hana i mea e loaa ole ai i kela kanaka he wahi keneta hookahi, oia no ko'u hana ana i palapala kauoha. Maloko hoi o kela palapala kauoha auanei e haawi ai au i na huina dala a'u i makemake ai e haawi ai au i na huina dala a'u i makemake ai e haawi aku i na halemai ame na hale malama i ka poe ilihune ame na wahine kanemake, a o ke koena aku o ua mau dala la e haawi aku no au i ka poe i pili ia'u ma ke koko oia nohoi ko'u poe hooilina ma ke kanawai. Aole i kana mai ko'u aloha i kuu kaikamahine, ina paha ia ke ola nei, aole la he olelo ana, ina he ua pau loa iaia keia waiwai o'u."

  Ikeia aku la ke kahe ana iho o na waimaka ma kona mau palalina, a mahope kamailio hou mai la ia:

  "Nokeaha no la hoi ka make ikii ole mai ai ia'u? O ka wahine opiopio aku la kana e kikoo aku ai. He iwakaluakumamalua wale no makahiki o Alice a make aku la ia. O ka make he waiwai nui ia nou nei ka mea i lualua na makahiki, aka, no Alice la, he keu a ka manaonao i ka hoomaopopo ana iho, aia wale no ia iloko o kona mau makahiki opiopio wale no."

  "He mea oiaio no paha ia au i kamailio mai la, aka, o nei mea he make, aohe ana mea kamawae, e pau ana no iaia ka hapauea ame ka mea opiopio, ka mea iluna o ke kulana hanohano ame ka mea i lalo lilo loa."

  "Ae hoi, he mea hoi ia i ike mau ia e kakou apau i kela ame keia la," wahi a ua luahine nei i pane ai meka hoomau ana hohoi i ka uwe ana.

  Mahope iho o keia mau kama. io ana a ua luahine nei me ke kauka, ua haalele iho la ua kauka nei i ua wahine aoo nei.

  Ua noho iho la ua wahine nei ma ke kapuahi hoopumehana me ka hoolilo nui loa ia ana o kona noonoo no Alice. A oiai oia e kupouli ana ma ia ano, ia wa i hoopuiwala ae ai oia mamuli o kona lohe ana aku ka leo o kekahi o kana mau kauwa e kahea mai ana iaia, me ka hoike ana mai hoi, ua makemake kekahi wahine i aahuia me ka lole eleele e ike iaia, a pane mai la nohoi ua wahine la:

  "He keonimana kona kokoolua i hele pu mai nei."

  Ia wa nana iho la ua wahine nei i kana wati, a ike iho la ia o ka hora 10 ia o ka po. A ia wa pane ae la ia:

  "Aumoe maoli ka hele ana mai nei a keia Virigine e noi i wahie manawalea no kana ohana pilikia. Aole hiki ia'u ke hoole aku i na noi o keia ano. O kela hana maikai keia hana maikai e hiki wale ana no ia ke hanaia i na hora apau o ka po."

aku la i ka wahine lawelawe e hookomo mai i na malihini.

  Emoole hoi, komo mai ana ua mau malihini nei iloko o ka rumi. Ua aahuia ka wahine i kekahi aahu eleele, a he koloka eleele ke uhi iho ana mawaho ona, a he uhi maka nohoi ke uhi iho ana ma kona maumaka.

  Hoomaopopo aku la o Madame Hardy (o keia ka inoa o ka wahine aoo) he mau keehina wawae ano haalulu ko ua. Lede malihini nei i komo mai ai, oiai hoi kona kokoolau i ku iho ai ma kahi kokoke i ka puka komo.

  "E hele mai oe a kokoke la'u, e kuu hoaloha maikai," wahi a Madame Hardy i pane aku ai.

  Hele iki mai la ua wahine nei o ka uhi maka, a kokoke i kahi a Madame Hardy e noho ana, a kku iho la.

  "E hai mai oe ia'u i kau mea i makemake ai," wahi a Madame Hardy i pane aku ai imua o ka lede aahu eleele me ka hoomau nohoi i ke kamailio anaaku. "Ina ua hele mai nei oe e noi ia'u i mau kokua ana no ka poe ilihune, alaila, ua makaukau loa au e hooko aku i kou makemake. Ua mahuahua no ka waiwai i loaa ia'u, a ua ike ole hoi au i kau mea e hana aku ai me ia waiwai i keia wa, koe wale no ko'u hoolilo ana aku ia waiwai no na hana kokua aloha i ka poe ilihune Nolaila, e hai mai oe ia'u i ka huina dala au i makemake ai a e haawi aku no au ia oe elike me kau noi?

  Aka, ma ia wa aia ka lede malihini ke uwe la, aole nae he, ike aku o ua Madame Hardy nei i keia uwe ana a ua lede nei. Aole nohoi i pane aku ua lede nei no ka ninau a Madame Hardy i ninau aku ai iaia.

  Ia wa olelo mai la no ua wahine aoo nei, "E, e@hele mai oe a noho ma keia wahie kokoke ia'u. a e hai mai oe ia'u i ka poe pilikia."

  I kela wa i haule iho ai na kuli o ka lede aahu eleele ilalo maluna o ka papahele imua ponoi hoi o ke alo o ua wahine nei, me kona uwe ana ae, a pane aku la hoi:

  "Kuu mama bapatema e. E kuu makuahine uhane hoi."

  Me ka hikilele a puiwa hoi. ala ae la ua Madame Hardy nei iluna a pane mai la:

  "Auwe, o ka leo keia o Alice a'u e lohe aku nei."

  Ia wa i ku ae ai ua wahine nei iluna, a lalau mai la oia i ka uhi maka o Alice a huki ae la. He mea oiaio, ua hemo ae la ka uhi maka; a ua waiho wale aku la hoi ka helehelena o Alice. Aka, ua lilo keia ike ana mai o ua wahine la ia Alice i mea nona e puiwa loa ai, ua manao iho la ia he kinowailua kana i ike ai. Aka, me ka awiwi nui, pane aku la o Alice:

  "E Mama, owau no keia o Alice. Aole au i make, ke ola nei no au."

  Me na waimaka e hiolo ana ma na papalina o Madame Hardy pane mai la ia:

 

  "Pehea? O Alice io no anei keia, ka mea hoi nona ke kino a'u i ike ai e hookomoia ana iloko o ka pahu kupapau? Ua ola hou mai anei kuu Alice aloha? Auwe no ka hoi. E kuu Akua e, aole hoi au i make mamuii o ka ehaeha i loaa ia'u no ko'u ike ana e waiho ana ke kino o ka'u kaikamahine iloko o ka pahu kupapau. aiaila. e make anei hoi au no ka hauoli?"

  Maanei hoomaha iki iho la ua Madame Hardy nei i kana kamailio ana. a nana mai la maluna o Alice a liuliu, olelo hou mai la oia:

  "Aole ka hoi i kana mai ka nui o ko';u nawaliwali mamuli o ko'u kanalua ana aole keia o kuu Alice. He oiaio o oe no kela o kuu Alice. Ua hana mai nei ke Akua he hana mana loa, a ua hoopomaikai mai hoi Oia ia'u. Ua manao iho nei au, e haalele iho au i keia ao, aka, mamuli nae o kou hoea ana mai nei imua o'u, nolaila, ke manao nei au e hoopipili hou au ma ka aoao maikai o ke ola ana. Aole au e hoi koke aku no kuu home lua kupapau elike me ka'u i manao kmua ai. Ea, e Alice, ua maluhiluhi paha oe, a e pono ia oe ke hoomaha. I keia wa, o oe ka hakuwahine o keia hale apau. E kahea aku oe i na kauwa o loko nei o ka hale a e hooloheia mai no kau mau kauoha apau e haawi aku ai ia lakou."

  "E kuu Mama maikai, aohe o'u pilikia. O ka'u wale no i makemake ai oia ko'u noho ana iho ia nei ma ke ano malu loa."

  "E hana no au elike me kou makemake e kuu kei," wahi a Madame Hardy i pane mai ai.

  "E ae mai oe ia'u,, e Mama, e hoolauna aku au ia oe ko'u hoaheie. O George Lamabereta keia."

  "Auwe. Oia nei anei kela kanaka opio nona ka inoa a'u i lohe nui ai no kana mau hana kaulana loa ma na kai o Kina?"

  Ua hele mai la hoi o George a kunou haahaa mai la imua o ua Madame Hardy nei.

  "E a'u mau keiki aloha," wahi a ua Madame nei i pane mai ai me ka hoomau ana mai nohoi i ke kamailio ana, "ke hauoli loa nei au no ko olua hoea ana mai imua o'u i keia po, aka, o keia halawai pu ana iho la nae a kakou aia no ia malalo o kekahi mea huna pohihihi loa, i hoike ole ia mai nei ia'u e Kauna-wahine Berene. Ma ko'u wa ma Parisa, ua lohe au i na mea he nui mai a Madame Maraceli mai e pili ana nou e kuu keiki, aka. mamuli hoi o kou hoea kino ana mai nei ia nei, e hoomahuahuala mai ana ka nui o ko'u ike no kou ano. Nolaila , e Mr. Lamabereta, e hiki ana anei ia oe ke hoopau ae i kekahi pohihihi nui e nalu nei iloko o ko'u naau no Alice nei, a nou hohoi?"

               (Aole i pau.)

 

Hela ame Keia.

 

HOOLAHA I KA POE AIE.

 

  Oiai, ua hookohu pono ia mai ka mea nona ka inoa malalo iho nei i Lunahooponopono Waiwai no ka Waiwai o Hana Keoki, o Honolulu, Oahu, i make.

  Ke hoolahaia aku nei ma keia i ka poe, apau e waiho mai i ka lakou mau koi i ka Waiwai o Hana Keoki i oleloia, i make, i hoolalo pono ia, ina paha ua hoopaaia ma ka moraki a ano e ae, i ka mea nona ka inoa malalo iho nei, ma Honolulu i oleloia, iloko o eono mahina mai keia la aku, a i ole, e hoole mau loa ia aku no lakou. A o ka poe apau i aie i ua waiwai la, ma keia ke kauoha ia aku nei e hookaa koke mai i ka mea nona ka inoa malalo nei.

               ROBERT PARKER WAIPA,

  Lunahooponopono Waiwai o ka Waiwai o Hana Keoki.

  Hanaia Honolulu, Oahu, Maraki 10, M. H. 1899.           5174-6m

 

KUAI WAIWAI PAA NA KE KAHU

MALAMA WAIWAI.

 

  Mamuli o kekahi olelo kauoha a ka Aha Kaapuni Apana Hookolokolo Elua o ko Hawaii Paeaina, e kuai aku ana ka mea nona ka inoa malalo ma ke akea i ka Poakolu, la 29 o Maraki, M. H. 1899, i ka hora 12 awakea oia la, mamua ponoi iho o ka hale leta ma Wailuku, Maui, i ka mahele huikau he hookahi-hapakolu o Hana (w), keiki oo ole, iloko o na aina a pau i hoakaka ia penei:

  1. Apana aina i hoakakaia ma ka Palapala Sila Nui Helu 3128, Kuleana Helu 3548 no Naheana, ili 5 7-10 eka, oi aku a emi mai paha.

  2. Elua apana aina i hoakakaia ma ka Palapala Sila Nui Helu 1145 no Naheana, huina o ka ili 19-100 eka, oi aku a emi mai paha.

  3. Ekolu apana aina i hoakakaia ma ka Palapala Sila Ni Helu 3123, Kuleana Helu 3508 no Kuheleloa, huina o ka ili 3 21-100 eka, oi aku a emi mai paha.

  4. Apana alna i hoakakaia ma ka Palapala Sila Nui Helu 1517 no Kuheleloa, ili 31-100 eka, oi aku a emi mai paha.

  Aia keia mau apana aina iloko o ka Ili o Ohia, ma Waikapu, Mokupuni o Maui. No ka Hui Mahiko o Wailuku ka elua-hapakolu o keia mau aina, he aina kalo a he aina kula. Ua lawa keia mau aina i  ka pono wai, a no ke kokoke loa i ke alanui aupuni, ua kupono na apana aina maloo no ke kukulu ana i mau hale noho. O na lilo palapala me ka poe koho no ia, a aia ka mana o keia kuai ana a hooholoia pela e ka Aha. Dala kuike ka rula, dala gula o Amerika Huipuia. No na mea e ae, e ninau ia Hon. A. N. Kepoikai, ka loio o ke kahu malama waiwai.

                  AKUHUNA.

  Malama Waiwai o Hana, keiki oo ole.

 

HOOLAHA HOOPONOPONO WAIWAI

 

  I ka mea nona ka inoa malalo iho lunahooko o ka palapala kauoha hope loa o Kekapa Robinson, o Honolulu, Oahu, ame Kona, Hawaii, i make, ma keia ke hoike aku nei oia i ka lono i na poe apau i aie aku i ka waiwai o ka mea i make, ina he mau koina ku lakou, e waiho mai ia mau koi il@l@o o na mahina eono, o hoole loa la a@anei. A o ka poe i ale i ka waiwai o ka mea i make, ke kauoha ia @ nei e hookaa koke mai.

  Honolulu, Oahu, Feberuari @, 1@8.

                     M. P. ROBINSON,

    Lunahooko Palapala Kauoloa @po

             loa o ka mea i Make.

2743-5t

 

Hoolaha Hooko Moraki

KE KUAI A KA LUNA HOOKOKAUOHA

I KA WAIWAI PAA

 

  Ke hoolahala aku i@ m@ a@ malalo a i kulike ai hoi me ke k@u@ha i hoopukaia e ka Aha Kaapuni o ka Apana Kaapuni Ekahi ma ka hana o ka Waiwai o Manuel A. Bare@e, i make. Ua kau@haia mai aa e Autonio Richard, ka Lunahooko Kanoha o ua Waiwai la, i kulike ai me ua kauoha ia, e kuai aku ma ke Kudala Akea i ka mea koho kiekie loa no ke dala k@ike, ma ka Poakahi, la 10 o Aperila, 1899. ma ka hora 12 o ke awakea o ua la la, ma kuu Keena Kudala ma Alanui Moiwahine, maloko o ke kuianakauhale o Honolulu, i keia apana aina apau e waiho ia ma Kalihi, Honolulu i oleloia ae nei, a he hapa hoi ia o ka Palapala Sila Nui 3546, Kuleana 10,498, a i hoike ia hoi na palena penei:

  "E hoomaka ana ma ke kihi Akau Komohana o keia aina a e holo ana: Ak. 53 00 Hik. 148 kapuai ma Kahauiki; Ak. 85 00 Hik. 336 kapuai ma ke Alanui Hao: Hem. 19 30 Kom. 566 kapuai ma ko W. L. Wilcox: Ak. 32 00 Hik. 490 kapuai ma ko W. L. Wilcox a hoea i kahi i hoomaka a@ Ili 3 3-10 Eka.

  Kuike ke Dala.

  O na lilo palapala kuai i ka mea ia e lilo aku ai ka aina, a e ku ana hoi kela kuai ana malalo o k@ apono ana mai a ka Aha Kaapuni o ka Apana Kaapuni Ekahi.

  No na mea aku i koe a ninau ia Cecil Brown, ka Loio o ka Lunahooko Kauoha.

  Hanaia Honolulu, Maraki 14, 1899.

                     JAS. F. MORGAN.

2746-4@           Luna Kudala.

 

KA HOOLAHA MAKEMAKE @OOKO

A KA MEA PAA MORAKI.

 

  Ke hoolahaia aku nei ma keia, mamuli o ka mana kuai i paa maloko o kekahi Moraki i hanaia ma ka la 27 o Dekemaba, A. D. 1892, i hanaia e Emma A. Kempster ame Charles E. Kempster, kana kane, o Kohala Akau Mokupuni o Hawaii, ia Theo. H. Davies, T. R. Walker ame F. M. Swanzy, o lakou apau no Honolulu, Mokupuni o Oahu, he poe hoahui e lawelawe hana pu ana malalo o ka inoa hui o Theo. H. Davies & Company, a i onaia hoi e Theo. H. Davies & Co., i kaupalenaia, a ke makemake nei hoi o Theo. H. Davies & Co., i kaupalenaia, e hooko aku i ua moraki ia no ka uhakiia ana o na kumu aelike i paa maloko o ua moraki ia, oia hoi: Ka hookaa ole ia ana o ke kumupaa ame ka uku-panee.

  Ke hoolahaia aku nei nohoi ma keia o na aina apau, na pono ame na mea apau i pili i ua aina la i paa maloko o ua palapala moraki la, a i hoakakaia hoi maloko olaila, e kuai kudala ia aku no ma ke akea maloko o ke Keena Kudala o James F. Morgan ma Alanui Moiwahine, maloko o Honolulu i oleloia ae nei, ma ka Poakahi, la 10 o Aperila, 1899, ma ka hora 12 awakea o ua la 'la.

  O ka aina i paa maloko o ua moraki la, oia no kela apana aina e waiho ia ma Ohanaula, ma Kohala i oleoia ae nei, a i hoakaka pono loa ia hoi ma mokuna ame ua palena elike me keia:--E hoomaka ana mai ke kihi Akau Komohana aku o ko Kapeia aina, mai ka pohaku aku i hoailouala X a e holo ana Hem. 79 Hik. 2 kaulahao ma ka aoao mauka o ke Alanui Aupuni, alaila, Hem. 14 30 Kom. 4.87 kaulahao i ka pa o Kekapa a i ka pohaku i hoailonaia X; alaila, Ak. 82 Kom. 2.32 kaulahao a hoea hou i ka aina o Kapela, a mai keia pohaku hou mai a i kahi i hoomakaia ai, e holo ana Ak. 16.30 Hik. 5 10 kaulahao, maloko o laila he Ili o Hookahi Eka, oi aku a emi mai paha.

  He Kuike ke Dala ma ke Dala Gula o Amerika Huipula. O na lilo palapala i ka mea ia e lilo ai ka aina.

  Hanaia Honolulu, Maraki 8, 1899.

THEO. H. DAVIES & CO. KAUPALENAIA.

                   Mea Paa Moraki.

  No ua mea i koe e ninau i@ Cecil Brown, Honolulu.        2745-4t

 

Hoolaha Mana Hookolokolo.

 

  ILOKO O KA AHA KAAPUNI APANA HOOKOLOKOLO EKAHI O KO HAWAII PAE AINA.--MA KA HOOPONOPONO WAIWAI.

  Ma ka Hana o ka Waiwai o Aehi K. Akau, o Honolulu, Oahu, i make.

  Oiai ua waihoia mai ka Palapala Noi ame ka Hoike Waiwai a ka Luna Hooko Kauoha o ka waiwai o ka mea i make i oleloia ae la, ma ia palapala i noi mai oia e nana ia a e apouo ia kana hoike waiwai a e hoopukaia ke kauoha hope loa no ka mahele ana i kawaiwai e koe nei ma kona lima i na poe i kuleana ma ia waiwai, a e hookuu ana iaia mai na ko'iko'u mai apau ma kona ano Luna Hooko Kauoha.

  Ua kauohaia, o ka Poakahi, la 17 o Aperila, M. H. 1899, hora 10 o ke kakahiaka, ma ke Keena Hookolokolo. Aliiolani Hale ma Honolulu, oia kahi ame ka manawa i kohoia no ka hoolohe ana i ua noi la ame ka hoike waiwai, a malaila a ma ia wa hoi e hele ae ai na kanaka apau i kuleana ma ia waiwai a hoike mai i na kumu ina he mau kumu ka lakou e ae ole ia ai ua noi la.

  Honolulu, ,Maraki 9, 1899.

  Na ka Aha:

                       GEORGE LUCAS.

2746-3t                 Kakauolelo.

 

  ILOKO O KA AHA KAAPUNI, APANA HOOKOLOKOLO EKAHI O KO HAWAII PAE AINA--MA KA HOOPONOPONO WAIWAI.

  Ma ka Hana o ka Waiwai o John N. Ilae, o Honolulu, Oahu i make kauoha ole.

  No ka mea, ua waihoia mai e D. K. Ilae, ke keiki a ka mea i make, he palapala noi no ka Hookohu Lunahooponopono Waiwai no ka waiwai i oleloia, a e hoopukaia aku ia palapala iaia, nolaila, ma keia, ke hoolahaia aku nei i na poe apau i kuleana ma ua waiwai la, o ka Poalima, Aperila 7, 1899, ma Aliiolani Hale, Honolulu, hora 10 o ke kakahiaka, oia kahi ame ka manawa e hele mai ai lakou, a o koike mai i na kumu ina he mau @ ka lakou e ae ole ia ai ke noi.

  Honolulu, Maraki 7, 1899.

  Na ka Aha:

                      GEORGE LUCAS.

2745-3t              Kakauole@