Ka Nupepa Kuokoa, Volume XXXVIII, Number 10, 10 March 1899 — KA MINAMINA! KA MINAMINA!! [ARTICLE]

KA MINAMINA! KA MINAMINA!!

"Nakulu, uina, ku'i ka hekili, Paapaaina aku la i Kukaniloko; Oloko ua naha, ua mokuhia I ke aloha a— Anapa, owaka, weli ke ahi, Malamalama na Hono o Piilani. He la-ni ua hemahemaia A lilo la—loaa ole. He ipo lauae na ka lahui.

I kupaoa i ke ala me ke onaona, Onaona ke aloha e newa hai malule nei a— Alo—ha—aloha ke Alii Wohi Eia ka, nou no ka uhane, I owe nehe newa aku la, Ua ikea aku la i ke ao opua, Opua hinano ua lokuia e ka ua Haha hewa ke kani-a-ula i ka paia, Ua hala —Ua paa—Kuu Minamina e — Alo—ha a—aloha no!

Mahope iho ka hala ana o kekahi mau la koliuliu wale o ko ke Alii Wohi Kalaninuiahilapalapa waiho ana iloko o na hoomailo ana a ka ma'i, aia hoi ma ka hora 2 o ka wanaao Poakahi nei. Maraki 6, ua lele pua-o aku la ka uhane o ua Lani Wohi la a Hawaii a hala aku la ma keia aoao o keia ola ana. Oiai kona mau la?e waiho ana iloko o na puliki ana a ka ma'i i kona kino, aole i hoohemahema kona luaui makuakane, na pilikana kakaikahi ona e ola nei i keia wa, ame kona mau hoaloha lehulehu i ka makaala ana ma na mea e hiki ai oia ke hoopakeleia mailoko mai o ka pilikia. Ua hoonuanuaia aku maluna o kona kino ihi kapulani na lapaau ana a kekahi mau kauka makaukau o Honoluln nei, a ua paio keia poe, me ko lakou ikaika apau. me ka make e holapu ana maluna ona. Aka, "ua hala aku la ia, ua pahu'a ka ike o ko keia ao, a ua hoihoiia mai ka nele, ke kaumaha, ka luuluu, ka lihaliha, ka manewanewa, ka paumako, ka minamina maluna o kona luaui, na pilikana. na hoaloha ame ka lahui holookoa. "Lele ana pio ke aho ka lama o ke kino. Waiho iho la i ke anu. ka maeele me ka paumako. He ukana ia na makou e haawe ai––e–– E hoomanao lihaliha ai nou––a— nou—e— I ka aui ana nalo ka wahine he oa no ka hale I Alii o Hawaii— Oia kana e inea nei, e kumakena nei e Aloha —aloha ino!" Ua hookuu mai la ke aho o ke Alii ma kona wahi noho ma Ainahau, Waikiki ae nei. A ma ia wa i mokuhia ai ke kaula gula o ke ola mai kona kino aku. e noho ana nui ka aoao o kona moe a iloko o ke keena i waiho ai ia, kona luaui makuakane ka Mea Hanohano ke Kiaaina A. S. Cleghorn (Ake), Mr. ame Mrs. Jas. W. Robertson. Jas. H. Boyd (Kimo Poe) ame Mrs. Boyd, Miss Kate Vida, Miss Helen Parker. Konela S. Parker (Samuela Paka), Kauka D. G. St. Walters. Mrs. D. G. St. Walters, Dr. F. L. Miner, Keikialii David Kawananakoa, ke Alii Lumaheihei, Miss Elsie Robertion ame ka wahine lawelawe o ke Kamaliiwahine. He hora keia no ka ehaeha, ka walohia ame ka waimaka, a ua ko ae la ka olelo elike me keia: "Ua moku ae la ke kaula kala. Ua naha ke kiaha gula. Naha ka hakeke ma ka puuwai. Ua naha ke kaa ma ka luawai, Alaila. ua hoi ka Uhane i ka Mea Nana mai ia, O ke kinowailua i ka honua koou. He U—he Aloha e." Ua hanauia ke Alii Wohi Opio ma ka la 16 o ka malama o Okatoba, makahiki 1875, a nolaila, ua piha iaia na makahiki he 24 a oi ma keia ola ana. Ua hanauia mai oia e ka puhaka Alii, o ke Kamaliiwahine Miriama Likelike Kapili. I ka 14 o kona mau makahiki, oia paha ka makahiki 1889, ua haalele iho oia i ka aina hanau nei, a holo aku la i Enelani no ka imi naauao ana. Me ka hoomanawanui, ua alo aku la i na inea apau o ka nohona o ka aina malihini, no ka imi ana i ka ike. He oiaio, ma kona wa i waiho aku ai i ka imi a huli naauao ana, ua hehi oia ma na kulana kiekie o ka makaukau ma ka ike mele, ike pena kii, makaukau i kekahi mau olelo "alii" o Europa, a he ike paa rula nohoi. Ma ka malama o Okatoba, la 9, makahiki 1897, ua huli hoi mai la oia i ka aina hanau nei, nolaila, o ka nui o kona mau la ma ka "aina kulaiwi a one hanau o ke kino," he hookahi makahiki ia me 5 malama paha. Minamina no! Aole paha i poina iki ka lahui, ma ka wa i lele ai ke aho o kona "ma kuakane Moi" ma Kapalakiko, ua hoouna mai la oia i keia huaolelo Hawaii| kahiko i manewanewa nana i kona makua Alii a Moi hoi, a o ua huaolelo la— *