Ka Nupepa Kuokoa, Volume XXXVIII, Number 6, 10 February 1899 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

BUKE XXXVLLL. HELU 6              HONOLULU, POALIMA, FEBRUARI 10, 1899. NA HELU APAU 2741

 

Hoolaha Kumau.

W.C. Achi       Enoch Johnson. 

ACHI & JOHNSON, 

LOIO!  LOIO! LOIO! 

Keena Hana, Helu 10 aoao Komohana Alanui Moi.

 

W.R. KAKELA

Loio a he Kokua ma ke Kanawai       

HE LUNA HOOIAIO PALAAPLA.

 

LYLE A. DICKEY

Loio a he Kokua ma ke Kanawai.

Notari no ka Lehulehu.

            E hookoia na hana pili kanawai apau mai na Mokupuni mai.

Kihi o Alanui Betela me Moi.  Pahu Leta 786.  Telepona 806.

 

Papa! Papa!

Aia ma kahi o

LEWERS & COOKE

(Lui Ma.)

Ma ke Khaua Hema o na Alanui Papu me Moi.

 

E LOAA NO NA

Papa Nouaiki

O kela a me keia ano.

Na Puni Puka

Na Puka Aniani

Na Olepelepe

Na Pou

                                    Na O’a

                                    Na Papa Hele

                                    Na Papa Ku

                                    Na Papa Moe

 

Na Pili Hale O na Ano apau.

A me na

Wai Hoohinuhinu Nani

O Na Ano Apau.

 

Na Palaki o na Ano he Nei Wale.

            Ke haiia aku nei oukou e na makamaka a pau, ua makaukau keia mau makamaka o oukou e hoolawa aku ma na mea a pau e pili ana ma ka laua Oihana me ka

 

Uku Haahaa Loa

E like me ka mea a holo ana mawaena @ L@ a me ka Mea Kuai.

 

E Hele Mai o Wao @ Oukou I@

            Ma ka la Sabati nei i ku mai ai ka mokukaua “Oregano” no Honolulu nei, mai Callao, Amerika Hema mai.  Aole i maopopo kona alahele moana e hele aku ai i keia wa.  Ua oleloia o kekahi keia o na “Kilohana” kaulana loa mawaena o na mokukaua Amerika.

            “Manao au, e holo pupule ana au no kekahi eha i loaa ia’u ina aole ka Laau Hano a Kamalena,” i kakau mai ai o Mr. W.H. Stapleton, Herminie, Pa.  “Ua loaa au i ka ma’i rumatika no kekahi mau makahiki he nui, a ua hoao nohoi i na laau i pau ole i ka heluia, aka, o ka Laau Hamo a Kamalena ka laau maikai loa.”  Hookahi no kau ana, o ka oluolu no ia o ka eha.  E kuaiia ana e Benson Smith & Co., Kaupalenaia, na Agena Kuai Kukaa.

 

Ke Aloha o kuu Makuahine

KE ALOHA O KA’U MEA I ALOHA AI

Ka Mana o ke Aloha.

He Moolelo Walohia.

(Unuhiia e Hoolale-a-Ka-Ua_Kukalahale no “Ke Kilohana Pookela o ka Lahui Hawaii”)

 

MOKUNA IX

            Oiai hoi ia, e hookunana ana no ka leo nunulu ana i lohe ai, aia hoi, lohe maopopo loa iho la ia i ka poha koliuliu ana ae o ua leo la mailoko ponoi mai o ka pahu kupapau.

            Hoomaopopo iho la ia me ke pihoihoi nui, he leo no ia no ke kanaka e mau ana no kona ola;  aka, ua pahola iho la nae ke puanuanu maluna o kona kino holookoa.  Okala kunahihi ae la hoi kona lauoho, a kuku ae ia, me he hulu l ano ka puaa ahiu.  Alaila, ku ino ae la ia ma kona mau wawae, a oili aku la ia mailoko ako o ua lua pao nei, a elua no ana leina ana mai lalo aku nei o ke alapi’i pohaku, kau ana ia iluna.

            Holo aku la ia me ka mama loa, me ka noonoo pono ole nohoi i kana wahi e holo ana.  Hookui aku la ia me ke kihi i kekahi pa kupaupau a kuwala aku la ilalo; ala ae la nohoi a hoomau no i ka holo ana iloko oia pouliuli.  Pa aku la kona kapuai wawae i kekahi pohaku a hina aku la nohoi, aka, ala ae la no, a holo aku la no, oiai, e ake loa ana ia e loaa kekahi mea nana e kokua mai iaia ma ka wehe ana i ke pani o ka pahu kupapau.

            O kana i noonoo ai i kinohi, oia kona holo pololei ana a hoea i ka pukupa a hoala aku hoi i ke kiai, me ke koi ana aku iaia e kokua mai oia iaia, aka, ua holo koke ae la kekahi noonoo iloko ona, a no ia mea, ku iho la ia, e hoomaha ana iaia iho.

            Ma ia wa, ua oili pono ae la ua noonoo nei i komo mua mai ai iloko ona, oia hoi, ina paha ia e kii ana i kekahi mea kokua iaia no ka hoopakele ana ia Alice, a ola hou oia, he mea maopopo e kii hou mai ana no kana kaneiaia, nolaila, wahi a kela manao i poai puni ae ai i kona lolo, ua oi loa aku kapono e waiho malie no oia ia Alice iloko o kona luakupapau.

            Aka, oiai ia e noonoo ana pela, olino mai la ka malamalama o ka mahina wanaao, a ia wa i lohe ae ai oia i ka nu a ka makani mawaena o na kumu laau, a me he mea la hoi, ua lohe oia i kekahi leo hanehane e lele ana iloko o ka lewa, ma ma eheu o ka makani e hea ana:

            “E kuu aloha, e aha ana ka hoi oe?”

            Na keia kani-a-ula i hoopuoho ae i kona noonoo me ke pihoihoi nui, a olelo ae la ia:

            “E lilo anei au i mea nana e lawe i ko Alice ola?  Auwe!  Na’u ponoi no anei e pepehi aku i kuu Alice!  E haalele anei au iaia me kona hanu ola iloko o kela lua kupapau puanuanu?  Aole-aole!  E hoopakele no aui iaia.  O! may Alice-na’u mau loa oe.  Ua make oe i keia wa.  Aole kuleana i koe o kau kane maluna ou-aole hoi kou mau makua-aole no ke kanawai o ka aian-aka, o ke kanawai o ke aloha mawaena ou ame a’u, o ke kanawai hookahi wale no ia e mana ana maluna o kou kino.”

            Maanei hoomaopopo koke iho la ia i kana me ae hana ai.  Ike iho la ia, he mea pono ke loaa iaia na mea paahana no ka wehe ana i ke pani o ka pahu.  Hoomaopopo iho la nohoi ia, aole pono iaia ke houlolohi wale ma ka holo pu-a-a wale ana no, oiai o ka paa ana o ke pani o ka pahu, he mea ia e loaa ole ai he ea no ka hanu ana o Alice.

            Ike aku la ia i kekahi ke ahao e ku mai ana ma kekahi hale kupapau, a me ka hauoli lele ‘aku la ia maloko o ka pa e hoopuni ana i ua he kupapau la, a lalau aku la i ke kea hao, a hoomaka iho la hoi e hoohemo mai ia mea mailoko mai o kona wahi e paa ana.

            Oiai hoi ia e noke ana i ka ueue i ua kea la, ike aku la ia i ka poha ana mai o ka malamalama o kekhi kukui, a i kona nana pono ana aku, he kanaka ka mea nona ka malamalama ipukukui ana i ike aku ai, a e hele pololei mai ana hoi ia ma kana wahi e hoao ikaika ana e hemo ke ke’a hao.

            Ike iho la ia, o kona loaa ana mai i kela kanaka e hele mai ana, ka mea ana i hoomaopopo loa ai, o ke kiai no ia oloko o ka pa ilina, he mea ia nona e pilikia ai, oiai aohe ona kuleana ma ia wahi ia hora o ka wanaao, nolaila, manao iho la ia, o ka hana pono wale no ana e hana ai, oia kona hoao ana, ina paha e hiki ana ke hoohuli mai i ua wahi kanaka kiai pa ilina la ma kona aoao, a e kokua pu mai hoi iaia ma ka hoopakele ana ia Alice.  O kana hana i manao ai i mea no ua wahi kanaka kiai la e ae mai ai i ko ia nei makemake, oia kona lele ana’ku a uumi aku i ka puana-i o ua wahi kanaka la.  Malia o kona maka’u ana iaia nei kona kumu e ae ai e hooko i kana mau kauoha.

            Nolaila, ua alakei hou ae la keia mai loko mai o ka pa ilina, a ku hou ana iwaho.  Aole hoi i liuliu iho, kokoke loa mai l aua wahi kanaka nei ma ka ia nei wahi e ku aku ana.  I kela wa i lele aku ai keia me ka mama loa a paa ana ka puana-i o ua wahi kanaka la.

            Aole hii iaia ke uwe ae, a ke hooho ae paha i kekahi leo.  Ua opa ia ae la ‘ia e na lima pukani oolea o George, a ua hoohinaia iho la ia ilalo, oiai hoi ka ipukukui i pahemo iho ai mai kona lima aku a kakaa aku la maluna o ke one.

            Hoomoe ia iho la ia ilalo, a paa iho la o George iaia.  Ia wa olelo iho la o George:

            Ma kou wa e hopuka ae ai i kekahi huaolelo, e lilo no kou ola ma ka poho o kuu lima.  Aole oe e pakele.”

            I keia wa unuhi ae ai o George i kana pu panapana a oneu iho la i ua wahi pu la ma ka lae o ua wahi kanaka la.

            “Heaha la kou makemake ia’u e hana aku ai nou?” wahi a kahi kanaka i ninau ae ai me ka piha makau, oiai hoi kona kino e oni ana me ka haalulu nui.

            “E ae mai oe, aole oe e kahea ae me ka leo nui, a hoopuoho oe paha.”

            “Ae.”

            “Alaila, e ku ae ou iluna, e laiau aku i ko wahi ipukukui.  Aole au e hana aku i kekahi hana ino ia oe; aka, ina kokua oe ia’u, a lilo hoi oe i hoaloha no’u, alaila, e uku no au ia oe i kekahi uku nui e waiwai ai oe, a pau hoi kou noho ana ma keia ilina kupapau.”

            “Owai oe?  E oluolu oe e hai mai ia’u i kou inoa.  Pehea la oe i komo mai nei iloko nei?”

            “Aohe e kaua olelo no ia mea i keia wa.  E kokua mai ana anei oe ia’u?”

            “Ae; ina nae ha hana karaima ole kau i manao ai e hana aku au.”

            “Ke hoomanao l anohoi paha oe, he hoolewa nui ko nehinei?”

            “Ae; oia ka hoolewa o ke Kauna wahine de Berene.”

            “Ae; a e hai aku au ia oe, ua kanu ola i akela Kauna wahine; aole oia i make.”

            I kela wa i kuemi hope aku ai ke kanaka kiai p ailina, a naholo ae la ka haikea pu ma kona mau papalina.

            Nolaila,” wahi a George i hoomau aku ai o George i ke kamailio ana, “he mea pono ke hoopakeleia kela wahine.  O kau hana a’u i makemake ai, oia kou kokua ana mai ia’u ma keia hana.  Pehea, e ae ana anei oe e kokua mai ia’u?”

            “Ae.”

            “Ina e holopono ana ka kaua mau hooikaika ana, alaila, e hoolilo no au ia oe i kanaka waiwai.  Nolaila, aohe pono oia kaua e apa hou aku, aka, e hele koke kaua e wehe i ke pani o kela pahu kupapau.  e loaa anei ia oe kekahi kolopa?”

            “E hahai mai oe ia’u,” wahi a kahi kanaka kiai i pane mai ai ia George.

            Hele aku la laua me ka awiwi nui i ka hale i waihoia ai o na mea paahana o loko o ka pa ilina.  He wahi ia, aole no i mamao loa mai kahi aku i ku ai ka hale kupapau i waihoia ai o Alice.

            Aole hoi i liuliu, hoea aku la laua nei i ua wahi hale la, a kii aku la kahi kanaka i ke kolopa, alaila, me ka eleu nui holo ae la laua no kahi i waiho loa ai o Alice.

            “Na ka lokomaikai o na lani i hoouna mai i keia wahi kanaka i o’u nei i keia wa,” wahi a George i pane ae ai, “ina aole o loaa mai nei ia’u kana mau kokua ana, aole loa paha e hiki ana ia’u ke hoopakele i kuu Alice.  Ina paha o ka’u hana wale iho la no ia e holo pu-a-a ai i o a ia nei, me ka maopopo ole o ka’u mea e hana ai.

            I kela wa hoi, paa hou ae la ka mahine i ke ao.

            Aole i liuliu, ku ana laua nei ma ke pani hao o ka hale kupapau o ka ohana de Berene.  Alaila, waiho iho la kahi kanaka i ke kolopa ilalo, huli mai la ia a nana mai la ia George.

            Pane aku la hoi o George iaia me ka hookikina ana:

            “E aha ana ka hoi oe?  E iho hoi paha kaua ilalo.”

            “Ea,” wahi a kahi kanaka, “owai laoe?  Aole au i ike ia oe.  Aole anei ou hoomaopopo, o ka wehe ana i kekahi lua a he kupapau, he karaima nui loa ia e laweia ai ke ola o kahi kanaka maluna o ka amana.”

            I kela wa hoikeike aku la o George i ka pahi puhaka imua o ua wahi kana ka la, aka, pane mai la ia:

            “Ua hiki no ia oe, ke lawe i kuu ola.  E hana oe i ka hana pepehi kanaka maluna o’u, aka, aole loa au e ae e lilo au i mea kokua ia oe, ma keia karaima kiekie loa au e makemake nei e hana kaua.  Aole.”

            “Pehea; he hana karaima anei ka hoao ana e hoopakele i ke ola o kekahi wahine opio?” wahi a George i nimau mai ai i kahi kanaka, me kona hoomaopopo ana iho, ua lilo na hana hooweliweli i mea ole imua o kahi kanaka.

            “O ka poe i make, o kolakou wahi keia.  Aole keia he wahi no ka poe ola,” wahi a kahi kanaka.

            “Aka, aole anei hoi au i hai aku nei ia oe, ua kanu ola ia ke Kauna wahine ma keia wahi?”

            “O kau io no ia i hai mai ai ia’u,” wahi hou a kahi kanaka, me ka luli ana ae o kona poo, “aka, aole paha i lawa ia mau huaolelo no ko’u haawi ana iho i ka manaoio,  Ea, e hai mai oe ia’u, owai la oe?  He ipo anei oe na ka wahine e waiho nei maloko o keia hale, e ake ana hoi e ike i kona mau helehelena no ka wa hope loa?  Pele anei?  Ma kou mau helehelena, ke ike nei au he kanaka hoopono oe, a he kanaka nohoi i manao ole e hana i kahi haua aihue i mea e loaa ai iaia he mau wahi apana dala mai loko mai o na luakupapau.  Aka, ke nonoi aku nei nae au ia oe, e haalele oe i keia manao uluahewa ou a e haalele iho kaua i keia wahi.”

            “He keu ka hoi oe, a kahi kanaka lapuwale nui wale,” wahi a George i pane aku ai me ka ehaeha nui launa ole mai o kona naau, “O oe auanei ke kumu o ka make loa ana o keia wahine.  Ea, e ae mai oe i ko’u manao, mai i haalele mai oe ia’u.  E kokua mai oe ia’u ma ka wehe ana i ke pani o ka pahu kupapau o kela wahine.  I hoohiki aku hoi au imua ou, aole au i hoike aku ai oe i ka mea oiaio ole.”

            “Heaha la ka mea hoike e hiki ai ia’u ke manaoio he oiaio kau e hoike mai nei ia’u?”

            “Ua lohe ponoi hoi au i ka leo uwe mai loko mai o k apahu kupapau!”

            “Ua kuhihewa paha oe i ka nu a ka makani mawaena o na lau laau,” wahi a kahi kanaka i pane mai ai.

            “Auwe noka hoi!” i hooho ae ai o George, me ka hiolo ana iho o kona mau waimaka ma kona mau papalina, a pane ae la ia, “Pehea la ka hoi au e hana ai i mea no nei wahi kanaka e manaoio ai. O my oGd! Help me!”

            I kela wa i poha mai ai he leo uwe nanahe mai lalo mai o ka hale lua.

            (Aole i pau.)

 

Ka Liona o ka Akau

He Mooolelo no ke Au Manawa

Gustavus Adolphus

Kahauia o G.A. Henty a unuhiia e kekahi mea unuhi moolelo o ke Kuokoa.

MOKUNA VIII

Ka Hoouka Kaua ma Mansfeld

            “E oluolu anei oe e hele aku i ka hale kakela?” wahi a ke alakai o na kauaka o ke kulanakauhale i pane mai ai imua o Makamu, me ka hoomau ana mai nohoi i ka olelo ana mai, “O ka hoouna ana mai la no ia o ke Kauna i kekahi mea e ninau i ke kumu o ke kani ana ae nei o ka hele kahea.”

            “Ae,” wahi a Makamu i pane aku ai, “e hele koke aku ana au ilaila, a halawai pu hoi me ke Kauna, ke nonoi aku nei au ia oukou e nana ae oukou no kuu mau hoahele, oiai he loihi ke ala a makou i hele mai nei, a he mea pono ke loaa ia lakou ona wahi mea ai, oiai nohoi, aohe makou i ai iki mai ka wa a makou i haalele aku ai ia Glogau.  Aka nae, mamua o ko’u hele ana aku i ka hale kakela, e hiki ana anei ia oukou ke hai mai ia’u, ina paha ua ike oukou i kahi hoomaoana ai ka poe Imeperiela?”

            “Aia lakou i keia wa ma kekahi wahi kauhale, aneane hookahi mile mai keia wahi aku,” wahi a ke alakai o na kanaka o ke kulanakauhale i pane mai ai.  “I nehinei, ua helu aku makou i ka nui o na kauhale i pau i ke puhiia i ke ahi e ua poe la a ua hiki aku ka heluna i ka umikumamawalu.  He nui nohoi na kanaka oia mau kulanakauhale i hoea mai ia nei, a na lakou i hai mai ia makou i ka nui hewahewa o na kanaka o ko lakou mau kulanakauhale i pau i ka luku mainoinoia e kela poe koa Imperiela.”

            “He mea oiaio ia, oiai he poe kanaka kela i maa i ka pepehi hoomainoino ana i ko lakou mau hoa kanaka.  Hookahi wale no hana pono e hana aku ai me kela poe kanaka, oia ka haawi ana aku ia lakou i ka oi o jka pahikaua ame ka uina o ka poka hao maluna o ko lakou mau lae,” wahi a Makau i pane aku ai.

            I kela wa i haalele iho ai o Makamu a hele aku la ia no ka hale kakela no ka halawai ana me ke Kauna.  Aka, mamua o ko Makamu hoea ana aku i ka hale kakela, aia hoi, ua hoea aku la ka lohe i ua Kauna la, he poe koa Sekotia ka poe i hoea aku ilaila.

            Ma ka wa hoi a Makamu i komo aku ai ma ka puka pa nui o ka pa e hoopuni ana i ka hale kakela, aia hoi, e ku mai ana ke Kauna ma ka puka.

            “E ke kanaka opio,’ wahi a ua Kauna ia i pane mai ai imua o Makamu, “e hele mai oe me na kapuai kamaaina i keia wahi.  Ma ko’u hoomaopopo ana, me he mea la, ua oili mai nei oe ame kou mau hoa mailoko mai o ke ao kaalelewa o ka lani no ke kokua ana mai ia makou.  Ua lohe makou, aia ka Moi o Suedena ame kona pualikaua kaulana ma Brandenburg Kahiko kahi i hoomoana ai.

            “Ua lohe nae au ua nee komohana aku la ua Maoi kaulana nei no ke komohana.  O makou nei hoi, e kala ko makou haalele ana aku i ka pualikaua, a nee mai la makou i kekahi wahi he mau mile he iwakalua a oi ka mamao mai keia wahi aku.  He aneane hookahi mahina okoa ko makou noho ana ma keia wahi kauhale uuuku.  O ko’u mau kanaka, he poe lakou i loohia i ka mai fiva, a i aeia hoi e hele pu me a’u no ka hooluolu ana ma kela wahi a’u i hoike aku la ia oe.  I keia wa mahope iho o ka hala ana he hookahi mahina o ko makou noho ana malaila, ua loaa ia makou apau na oia kino maikai, a ua kupono loa makou i keia wa no ka lawelawe ana i na mea kaua.  Ma ke ahiahi iho ia no o ka la inehinei i lohe ai au na makemake loa ka poe Imperiela e lele kaua mai maluna o ko oukou kulanakauhale nei, nolaila, ua haalele aku la makou i awahi, a hele mai la no onei me ka hoomaha ole.  He uuku no makou i hoea mai la i anei, aka, e hai aku nae au ia oe, o kela ame keia mea pakahi o makou, ua hiki ke hilinaiia no nei mea he kaua.”

            “Ke hookipa mai nei au ia oe amu kou poe kanaka me ka piha o ko’u naau i ka hauoli nui no ko oukouhele ana mai nei e kokua ia makou.  E hai aku hoi au ia oe, ua aa loa no na kanaka o ke kulanakauhale nei e hakaka a e paio aku i ko lakou poe enemi e like me ka hiki ia lakou, aka, o ka pilikia wale no, aole lakou he poe makaukau ma ia hana h ekaua.  O na wahi koa e noho pu nei me a’u maloko nei o ka hale kakela nei, he poe koa kahiko loa, aka, ua aa no nae lakou e paio me ko makou poe enemi a hiki i ka hopena.  He kanalua loa nae au no ka hiki ia makou ke pale aku i ko makou poe enemi me ka holoiea loa.  Aka, e kala mai oe ia’u, no kou ku loihi loa ana maanei.  E komo kaua iloko.  Aole e ole ana ka hauoli o ka’u wahine ke ike mai i kekahi o na alihikaua o ka Moi kaulana o Suedena, ka hoopakele hoi o na Karistiano oiaio o Geremania nei.”

            Ia wa komo aku la o Makamu, ma ka hele pu ana aku hoi me ke Kauna, a hiki i ko laua komo ana aku iloko o ka rumi aina o loko o ka hale kekela.  Aia hoi maloko o keia rumi e noho ana jhe wahine helehelena ui a maikai, a he kulana hiehie hoi kona me ka hanohano.  Aia hoi ma kona aoao, e ku ana kekahi kaikamahine ui opio, nona paha na makahiki he umikumamaha.  Oiai hoi i hele aku ai o Makamu me ke Kauna ua hoike e aku l ao Makamu i kona inoa imua o ke Kauna, a oia inoa nohoi ka ke Kauna i hai aku ai i kana wahine ma ka wa i hoolauna aku ai ia i ke koa opio.  Me ka hoike ana o ka hauoli ma ua maka ame na helehelena o ua Kauna wahine la, ku mai la ia iluna haawi mai la i kona lima o ke aloha ia Makamu, a ma ia wa hookhi nohoi pane mai la oia:

            “Ua nui loa ko makou lohe no na koa Sekotia oloko o ka pualikaua o ka Moi wiwo ole o Suedena, a ua piha ko makou mau naau i ka mahalo no lakou; aka, aole nae makou i moeuhane iki, e loaa ana ia makou ka hanohano o ka ike ana i kekahi poe o ua mahele koa kaulana loa ia mai Sekotia mai.  O ko oukou hoea ana mai nei mawaena o makou i keia wa, ua like no ia me ka hoea kupaianaha ana mai o kekahi puali anela mai ka lani mai.”

            “Mamuli o kekahi ulia laki i loaa ia’u ma ka la inehinei i hoohalawaiia ai au me ka lohe no ka mea e pili ana i ka manao ana o na koa Imperiela e lele kaua mai maluna o ko oukou kulanakauhale nei, a mamuli hoi o ka lilo ana o na inoa o ke Kauna Mansfeld ame kana aliiwahine i mau inoa i makamae nui loa ia e na poe Hoolepope apau o europa nei, nolaila, ua manao iho la au, aole loa ka Moi Gustavus e hoahewa mai ia’u ina au e hele mai me ko’u mau wahi koa kakaikahi e haawi i ka makou mau kokua ana i kela kulanakauhale.”

            “Ke ike nei au ma ke au o kau kamailio ana,” wahi a ke Kauna wahine i pane mai ai, “me ka mino aka ana iho nohoi, a hoomau mai la i ke kamailio ana.  “Ua maa oe i ka hoopuka ana i na huaolelo hoomailani hiwahiwa.  E ke kanaka opio, e ae mai oe ia’u e hoolauna aku au ia oe i ka’u kaikamahine nei.  O Tekela keia.”

            Me ka eleu ame ka maikai pane mai la ua kaikamahine nei imua o Makamu:

            “Hauoli loa au no ko’u halawai pu ana me oe.  Aka, e kala mai nae hoi oe ia’u, ke hai aku au ia oe no ko’u piha pahaohao loa no nei mea he poe koa Sekotia a’u i lohe nui loa ai.  E kuhi ana au he poe kanaka nunui maoli keia poe Sekotia e kaulana nei, a o ko lakou mau helehelena noi he ku i ka weliweli, ela ka aole.  Ua oi aku no ko Papa nei nui mamua o kou, ua oi aku nohoi ko Papa loihi mamua o kou.  He opiopio loa maoli nohoi kou mau ano apau.”

            “He wahi ano kuaaina paha keia ou, e Tekela,” wahi a kona makuahine i huli ae ai a pane aku la i ua kaikamahine la.  Ma ia wa nohoi i pane aku la o Makamu:

            “Ua pololei loa kau mau olelo e ka lede opio.  He mea oiaio he kanaka opio wale no au.  O ka umikumamawalu no keia o ko’u mau makahiki, a ke ole au e kuhihewa, owau paha kahi aliikoa opiopio loa mawaena o na koa Sekotia apau e noho nei maialo o ka Moi Gustavus.”

            Nana mai la nohoi ke Kauna wahine iaia a ninau mai la: “Pehea ia, eia wale iho nei no paha kou komo ana ae nei iloko o ka pualikoa?”

            “E kala kahiko loa au i komo ai iloko o ka pualikoa o ka Moi Puuwoi Wiwo ole o Suedena.  Ua nui ka’u mau hoouka kaua i komo ai, a ua alo aku nohoi au iloko oia mau hoouka kaua weliweli me ka hoomanawanui.”

            Maanei hoakaka pokole aku la o Makamu imua o ke Kauna wahine no ka hoouka kaua o Brandenburg Hou, a i ka pau ana, ua olelo mai la ke Kauna kane iaia no ka mea e pili ana i ka aina kakahiaka.  I ka pau ana hoi o ka lakou ai ana ia wa no i kani ma ai ka pahu kahea a ko ia nei mau wahi koa, a kani kui-ke mai la nohoi ka @ o ka hale-pule, e kahea ana i na kanaka e ala e ku a e makaukau, ei au ka enemi.

            “E hele kaua,” wahi a ke Kauna i pane mai ai imua o Makamu.  “M@ he mea la e noi mai ana lakou, e haawi pio aku makou i ke kulanakauhale ia wa i hoea mai ai kekahi aliikoa ma ka puka pa, a kamailio mai la:

            “Ma ka inoa o ka Emepera o na Katolika, ke kauoha aku nei au e weheia mai ka puka pa, a e haawi pio mai hoi oukou malalo o kona mana a malalo hoi o kana kauoha i keia kulanakauhale.”

            “O ka uwahi o na kulanaklauhale a’u e ike aku nei e muu mokaki mai la, ma kahi aole no i kaawale loa aku mai ia makou aku nei aole ia he mea hoike imua o ko makou mau maka no ka lilo ana o ko makou haawi ana aku i keia kulanakauhale i ka Emepera, i mea e loaa ai ia makou o ka palekana mai kona poe kanaka mai.  M@ kahi o ko makou haawi pio ana aku i ke kulanakauhale nei ia oukou, e ah@ makou e make.  Aka, ke ae nei nae au me kuu naau apau e haawi aku ia oukou i kekahi puu dala nui kupono ia oukou ma ke ano he puu dala uku panai ia no ko oukou @ @ kaua ole ana mai maluna o makou, a e hele aku nohoi oukou ma kekahi uahele okoa aku.”

            Aole hoi i kana mai ka huhu o ua wahi lunakea Imeperiela nei a pane mai la ia:

            “Malama loa oe i kau mau huaolelo i pane mai la.  Ua makaukau loa au me na koa e hiki ai ia’u ke haawi aka i na kauoha e hookoia ai e oukou, a e keia kulanakauhale hoolokoa hoi.  A ke hai aku nei au ia oukou, e kau mai ana he poino weliweli maluna o na kanaka o keia kulanakauhale ina e hoomau aku ana oukou i ka haawi pio ole ana mai elike me ka’u e @ aku nei ia oukou.”

            “Aole o’u wahi kanalua iki no ka haawina lokomaikai a oukou e haawi mai ana maluna o makou, oiai he poe maa oukou i na hana oia ano elike me ka makou e ike kamaka aku nei i kela poe kulanakauhale e moe mai la iloko o ka lehu.  O kela mau pau lehu na mea hoike maopopo loa o ka nui launa ole mai o ko oukou aloha i na kanaka oia mau wahi i haawi pio mai ia oukou me na manaolana kuhihewa no ko oukou aloha hoa-kanaka.  O ka’u olelo hope loa e hai aku nei ia oe, e lawe aku oukou i kekahi huina dala kupono mai a makou aku, i uku panai no ka palekana o kela kulanakauhale.  E noonoo hoi oukou i kekahi puu dala kupono, a hai mai ia makou, a na makou hoi ia e noonoo a hoike aku imua o oukou i ko makou ae ame ko makou hoole; aka, no ko makou wheh aku i ka puka pa nei no oukou e komo mai ai, aole mako ue ae.”

 

Palanehe ka Hana’ua

A na Huaale a Doan no ke Kikala Hanene ame au Puupaa.

            E o mai ana ia me he mau kukuna ia no ka la.

            Hauloi na poe hapauea.

            A olioli pu hoi na opio.

            Mama ae la ka haawe o ke kua.

            Palanehe nae ka hana’na.

            Aohe apa ma ia hana.

            A heaha la ia mea?

            Kahaha! Na Huaaie hoi paha a Doan, no na Puupaa.

            Kahi puupaa hana kamahao.

            Heaha ka lakou hana?

            E heluhelu iho: Penei ka olelo a Mrs. Margaret Moses o 1602, Alanui Washburn, Hyde Park, Scranton, Pa., U.S.A. (Amerika Huipuia): “No na makahiki he lehulehu i hala ae nei, ua ike au i na ouli maopopo o ka ma’i ma na puupaa.  O keia mau ouli, oia no ka hu’i ame ka uawaliwali ma kuu kua, e kokoke ana i ka puhaka.  Ke kulou iho au, a ke hooikaika ae paha e mahuahua ae ana ka eha, a i kahi wa, mamuli o ka nui o ka eha, ua aneane hiki ole ia’u ke hana i kahi mea, a nolaila, ua kii au i kauka.  He kou ka uluhua i ka po no ka pilikia maoli o na puupaa.  Ua ike au i ka hoolaha ia o na Huaale a Doan no ke Kikala Hanene ame na Puupaa, a ua oleloia mai hoi au e ai ia mau Huaale.  Na Mrs. Jenkins o 143 S. Alanui Filmore i olelo mai ia’u e ai.  Kuai io aku la au i poho, a ai iho la nohoi, a ua loaa ia’u he pomaikai nui, a no ia mea kuai hou @ku la au.  Ke hoike aku nei au me ka manao maikai, he laau maikai loa na Huaale a Doan no ke Kikala Hanene ame na Puupaa, no kela ame kela kanaka i loohia i na ma’i o ka Puupaa.  Hauoli no au e hoike aku i na mea apau e pili ana o ko’u ma’i i kela ame keia mea e hele mai ana e ike la’u.”

            E kualia ana na Huaale a Doan no ke Kikala Hanene ame na Puupaa e na poe kuai laau apau.  Kumukuai, 50 keneta.  E hoounaia aku no ma ka Eke Leta e Hollister Drug Co., Honolulu, na Agena, ke loaa mai ke kumukuai.

            E nana no ka huaolelo BACKACHE ma ka inoa o na huaale.