Ka Nupepa Kuokoa, Volume XXXVII, Number 46, 18 Nowemapa 1898 — Page 1

Nupepa Kuokoa

Ke Kilohana Pookela no ka Lahui Hawaii.

BUKE XXXVII. HELU 46. HONOLULU. POALIMA, NOVEMABA 18, 1898. NA HELU APAU 2729.

 

Hoolaha Loio.

 

WILLIAM C. ACHI

LOIO A KAKAOLELO MA KE KANAWAI.

Keena Oihana - Helu 10, Alanui Moi, Honolulu, H. I.

 

W. R. KAKELA.

Loio a he Kokua ma ke Kanawai.

HE LUNA HOOIAIO PALAPALA

2370

 

LYLE A. DICKEY.

Loio a he Kokua ma ke Kanawai.

Notari no ka Lehulehu.

Kihi o Alanui Betela me Moi. Pahu Leta 786. Telepona 806.

E hookoia na hana pili kanawai apau mai na Mokupuni mai.

 

Hoolaha Kumau.

 

Papa! Papa!

Aia ma kahi o

LEWERS & COOKE

(Lui Ma.)

Ma ke Kahua Hema o na Alanui Papu me Moi.

E LOAA NO NA

Papa Nouaiki

O kela a me keia ano.

Na Pani Puka

Na Puka Aniani

Na Olepelepe

Na Pou

Na O'a

Na Papa Hele

Na Papa Ku

Na Papa Moe

Na Pili hale

O na Ano apau.

A me na

Wai Hoohinuhinu Nani

O Na Ano Apau.

Na Palaki o na Ano he Nui Wale.

Ke haiia aku nei oukou e na makamaka a pau, ua makaukau keia mau makamaka o oukou e hoolawa aku ma na mea a pau e pili ana ma ka laua Oihana no ka

Uku Haahaa Loa

E like me ka mea e holo ana mawaena o Laua a me ka Mea Kuai.

E Hele Mai e Wae no Oukou iho.

 

          Ma ka mokuahi Coptic o ka Poakahi aku nei, i hala aku ai o James A. Waila ame Paul Numana no Kaleponi.

 

          Ua paani ae na opio o Honuakaha i ka Poakolu nei, o ko makou E-t kekahi o na lunakanawai o ia mau hana a na opio.

 

KA MEA HUNA POHIHIHI

Unuhiia e Hooulumahiehie no "Ke Kilohana Pookela o ka Lahui Hawaii."

          Ua kamakamailio iho la laua no kekahi manawa no ka mea e pili ana ia laua iho, a mahope olelo aku la o Pegi ia Negewina:

          "I keia wa ke ike nei au ua maikai oa oe. A ke lana loa nei ko'u manao mamuli auanei o ko'u malama pono ana ia oe, e hiki ana no ia oe ke hele aku ma kekahi huakai i keia la."

          "Auwe, e hele aku ana ka au i keia la? Pehea e kipaku mai ana ka paha oe ia?" wahi a Negewina i ninau aku ai ia Pegi me ka hoike ana mai o kona helehelena i ke kaumaha.

          "Aole au e kipaku aku ana ia oe mai ka hale aku i lilo i home nou. Aka, e hele ana kaua i keia la ma kekahi huakai."

          "I hea kaua e hele ai?"

          "E kuu George," wahi a Pegi i pane mai ai, "Na ke aloha o ke Akua i hoihoi hou mai ia oe i o'u nei, e kuu aloha, aole hoi e loihi loa na la mai keia la aku, a loaa no ia oe ka palekana loa ana. Ano hoi e hai aku au ia oe, aia kekahi lede hanohano ke kali hoomanawanui nei no na makahiki he umikumamawalu, a ke ake loa nei ia e hoihoi ia ae kana aloha e ikea e koke ao nei apau me ka hoohewahewa ole ia ame ka hoohuoi ole ia hoi; a nolaila, ua lilo keia mau makahiki he umikumamawalu ana i noho hoomanawanui ai i mea nona e haawi ai i kekahi kaumaha me ka ehaeha loa, a ke ole au e kuhihewa, e kuu aloha, ke hoomaopopo la no oe i keia lede a'u e hoike aku la ia oe. Ae - oia no ka Lede Beatirisia o Hametona."

          "Ae; ua ike au iaia," i pane aku ai ua wahi Negewina nei.

          "hoomaopopo iho oe, e kuu Georfe, iloko o keia mau makahiki he umikumamawalu i hala ae nei i hono ai ka Lede Beatirisia ma ke ano he wahine ia i mareia i ke kane, a he wahine hoi ia i lilo i luaui makuahine; aka, he wahine ia a he makuahine hoi e noho ana ma ke ano hu-na iaia iho. O kana kane oia no o Mr. George Terevelina, hiki iaia ke hoike ae iaia iho. Ke pee nana e hoopau aku i keia pilikia mamuli o kou lawe ana ae i kekahi karaima i kau iho maluna ona. Aole pono ia kaua ke hoohakalia i ka haawi ana aku i ke kokua ana ia laua. Ua hai mai o Mrs. Pumetona ia'u eia ka makuisa ame ka Haku Adelo ke uhaiaia ka Lede Beatirisia i Hametonavila, nolaila, i keia la e hele aku ano kaua ilaila."

          Nana pono aku la hoi o Negewina ia Pegi a liuliu olelo aku la ia:

          "E Pegi, pehea la auanei e hiki ai ia'u ke hoakaka aku i ke kumu o ko'u noho mumule ana iloko o keia mau makahiki he umikumamawalu? Aole loa paha e kala mai ana o Mr. Geofere ame ka Lede Beatirisa ia'u?"

          "E kuu George aloha," wahi a Pegi, "e hana oe i ka hana pono, a e nana aku kaua i ka hopena oia pono i hanaia aku. Ano, e hoao kaua i ka nui o kahi ikaika i loaa ia oe i keia wa. E komo oe i kou mau aahu."

          Ia wa kii aku la o Pegi i na lole komo o ua wahi Negewina nei, a kokua aku iaia i kona komo ana ia mau mea. Alaila, holoi iho la ia i ka maka ame na lime o Negewina, kahi iho la i kona mau lauoho ame ka umiumi, a hookaukoo ae la iaia a noho iho la maluna o kekahi noho paipai.

          Alaila, kii aku la o Pegi i ke bola supa ana i hoomakaukau ai, lawe mai la a hanau aku la ia George me he wahi keiki uuku la.

          Pau ka ai ana i ka supa, hoohainu aku la o Pegi iaia he wahi waina, a he mea oiaio, ua mohala mai la na helehelena o ua wahi Negewina nei me ka maikai.

          I nei wa hoi, huli ae lo Negewina a ninau aku la ia Pegi:

          "Aole paha e hiki ana ia kaua ke kali a hiki i ko'u ikaika loa ana ae? E kahi paha kaua a hoea aku au ia manawa, alaila, hele kaua."

          "E George, e noonoo mai oe, aohe wa kupono e ae e hooko aku ai oe i keia hana, o keia manawa wale iho no. Eia na enemi o Geofere Tereveliana ke hahai nei mahope ona. Aia ka Lede Beatirisia ke noho la me ke kaumaha. Nolaila, e kali anei kaua a hiki i ka wa e komo aku ai laua iloko o ka pilikia? O George!"

          No keia mau olelo a Pegi ua hiki ole i ua wahi Negewina nei ke hoopaakiki hou iho, nolaila ua ae aku la ia.

          Ia wa no puka koke aku la ia iwaho, a kauoha aku la i kahi keiki kahuhipa e holo oia me ka awiwi loa i ke kulanakauhale o Daletona, a e lawe mai oia i mau lio ikaika me ona kaa kupono no ke kanaka mai. E lawe pu mai nohoi i kalaiwa kaa makaukau loa.

          Me ka eleu loa haalele iho la ua wahi keiki kahuhipa nei i ka hale, maluna o kahi hoki, a no Daletona ke alahele o kahi "kaaka."

          He ekolu hora okoa paha mahope iho, hoea mai ana na mea apau a Pegi i kauoha ai.

          Ia ka hiki ana mai nohoi o na lio ame ke kaa i kauohaia aku, ua makaukau loa o Pegi ame Negewina no ka hele aku. Aole nohoi o Pegi i hoopoina i ka lawe pu ana me laua i wahi waina, ke ti io-pipi ame ona mau wahi uluna no Geoki. Ua hana nohoi ia i na mea apau maluna o ke kaa e loaa ai he oluolu ia Negewina.

          Ua kaikaiia aku la o Negewina e ke kahukaa ame kahi keiki kahuhipa a hoomoeia iho la maluna o kona moe, a mahope iho o ko Pegi haawi ana aku i kahi keiki i ke ki o ka hale, ame ka hoike ana aku hoi iaia i na mea ana e hana aku ai, ua kau aku la ia maluna o ke kaa.

          Ua hele aku la ke kaa me ka nee malia loa, a iloko no nae oia hele malie ana e akuku ana no ke kaa ma kekahi mau wahi o ke alahele, a ua lilo ia mau oni ana a ke kaa i mea e pilikia loa ai o Negewina, aka, ua hoomanawanui no nae ia. Aia hoi ko Pegi mau lima ke paa ia iaia.

          Ua hoomau aku la no laua nei i ka hele ana a he aneane hookahi hapakolu wale no paha ka loa o ke alahele i koe, alaila, hoea aku i Hametonavila, ua nui loa mai la ka ikaika o ka pii hou ana mai o ka fixa maluna o George, nolaila, ua noho iho la laua ma kekahi wahi hale hookipa iloko o kekahi wahi kauhale uuku e kokoke aku ana i Hametonavila.

          Ua kiiia aku la kekahi kauka, a ua lilo iho la na hooikaika ana a ke kauka ma ka hoemi ana i ka pii ikaika ana a ka fiva.

          Ua lilo keia kaulua ana i mea hoopilikia loa i ko Pegi noonoo. Ma ia wa i ala mai ai iloko ona na manao pihoihoi me he mea la e kahoahoa okoa mai ana no iaia ua kokoke loa o Geogere Tereveriana e paa pio iloko o na lima aloha ole o kona mau enemi.

          Ke ike maopopo la nohoi ia o ka hoea ana aku o Negewina ma ka wa pono ma ka wa i hopuia iho ai o Geofere, a ma ka wa paha e hooloheia ana kona hihia, oia wale no ka mea e hoopakele ae ai iaia me ka maalahi.

 

NA LETA.

 

NA MEA HOU O NORTH KOHALA.

          E ka Nupepa Kuokoa.

          Aloha oe: - E oluolu mai oe i wahi lumi kaawale no'u me ka'u wahi puolo, a nau hoiia e uila aku i ka nui manu o kaua mai ka la puka ma Haehae a ka welona a ka la i Lehua. A oia keia:

          Ma ka wanaao Poaono hora 4 o ka la 5 o keia mahina lele loa ae la ka hanu hope loa o Mr. Keo o Honomakau, North Kohala. He nae ka mai a hala aku la.

          Ua hanauia oia ma Kahua i ka la 5 o Nov., A. D. 1821 mai ka poli mai o Keahinui ame kana kane o Mihiole, he alii keia kanaka no Hilo. Nolaila, ua piha iaia na makahiki he 77 me ka maikai. Ua hoonaauao ia oia, a oia kekahi kanaka naauao loa. Nolaila, he keiki papa oia no Kahua ame Kohala holookoa nei no a puni.

          Ua kamaaina ia oia ma kana mau hana, he mikiala hana, he hoopono. He kue ino loa oia i na mea i pili i ka hewa i ko ke Akua mau Kanawai. Ua male wahine no oia mamua, ua loaa no he mau keiki ia laua, ua make hookahi, i Kalawao hookahi, a ke ola nei hookahi, oia o Chas. H. Halopuhehu, ko makou makamaka maikai.

          Mamuli o ka loaa ana iaia o kela ma'i he maka hapopo, oia kona ma'i i ano palupalu ai a haule wale aku la. Aloha no. A na kana moopuna ponoi na lilo pahu, na Rob K. Naipo, o na lilo e ae na kana keiki ponoi no. Nui ka poe i akoakoa ae ma ia la malaila ae o S. W. Kekuewa ame kana ewa, ame na hoaaloha no apau i akoakoa ae ma ia la, a ma ka hora 4 p.m. i hoi aku ai oia no kona hale lua no ka wa mau loa. Aloha wale ia papa.

HE AIHUE.

          Ma ka po Poalua la 8 nei, hoao ae la ka piko pau iole e komo i ka hale kuai kukaa o John Hind a puehu ae la he mau eke laiki, mamuli o ka makaala o ke kiai po koe ai kekahi.

          Ma ke kakahiaka nui Poakolu ae la 9, i oili ae ai na lilo bulu hanu meheu o ko makou apana, oia o Leina Hiu, Chas. H. Pulaa, Es., a me Kapena Kaohi Jr. A ma ka laua nowelo ana ua loaa pono ke kalohe ame ke eke laiki i laweia, i ko'u manao ekolu o keia poe piko pau iole, a o lakou no apau kai laweia ae na kapuahi, e kali ai no ka hookolokoloia.

          Ke nana aku i ko makou Kapena, he kohu kanaka maauauwa ka hele wawae me ka lio hoounauna kapiki, eia ka auanei o na eke laiki, he poe Kepani ka poe nana i aihue.

NA LUA WAI ELI.

          Eia keia mau lua wai ke ali ia nei e na keiki poheo kani o Kohala nei, oia o John Hind ame R. H. Renton, ua loaa iho nei ka wai o kekahi mau lua, ke hoomaka hou nei he mau lua hou. Kahu ke ahi i keia mau keiki ke nana aku i ka mea eli wai a ke keiki o Hawi, kohu ao opua ke kiekie, he mahu ka mea nana e eli.

WAI MOMONA.

          Ke holo pono nei ka hanaia ana o ka wai momona ma kahi o E. P. Low ma Kapaau, i kahi iho nei o Naihe, maikai no, ua noeau no ka hana ana a ke kaaka waihi. He wahi hana wela nae.

          Nolaila, me ka Lunahooponopono ko'u aloha, ame na keiki oniu hua mekala ko'u welina. Ohai-o oukou apau loa, me ka oiaio.

ENOCH P. KAHIHIA.

Kapua, Honomakau, North Kohala, Nov. 11th, 1898.

[Unua hou ia mai ua mau mea ono o ua Aina Haaheo nei, ia Kohala iki, Kohala loko, Kohala Makani Apaapaa, ia Pili me Kalahikiola. Aloha no. L. H.]

 

HOAKAKA MANAO KEKAHI RABI MALUNA O KEKAHI NINAU ANO NUI A HOIKE MAI LA I KEKAHI MAU MANAO WAIWAI.

          O Rabi L. Liebman o 745 South Fourth Street, Hamilton, O., he kanaka kamaaina loa ia oia maloko oia kulanakauhale, ma na aina no hoi ma na palena o Inidiana, na aina hoi ma na kaiaulu o ka muliwai Ohio, e holo komohana ana a hoea i Scioto a e holo akau ana a hoea i Springfield. Pehea la ka nui o ka paio ana a ke kanaka e manaoio ana i na olelo a Konela Ingersol ma ka aoao kue aku i na olelo a keia keonimana kahunapule, he mea auanei ia nona e koiia ai e hoi hou i hope i na ao ana a ka poe hoomaloka, ina hoi oia e manaoio ole ana i na mea hoike maopopo i ikeaia e kona mau maka iho. Ke aa nei ka Rabi e huliia ka oiaio o kana e hoike nei, a e hauoli loa ana hoi ia e kakoo aku i ka mea e hoolaha akea ia aku nei ma keia, mamuli paha o na kukai palapal ana a mamuli mpaha o ke kamailio maoli ana. Ano, e heluhelu i kana i olelo ai: "Aole no i kukonukonu loa ka umii ana a ka pilikia o na puupaa iloko o'u, aka nae, ua loohia au i ke kikala hanene maoli. Ma ka wa hoi e nui loa ai ka eha o kuu kua, oia ka wa e loaa mai ai au ike poniuniu ame ka nalulu. E hiki mau ana nohoi ia'u ke hai me ka maopopo loa e loaa ana au i ka pilikia o na puupaa mamuli o ko'u mau maka. Ma ka wa a'u i kuai aku ai i na Huaale a Doan no ke Kikala Hanene ame na Puupaa, oia ko'u wa i ike ai i ka launa ole mai o ka eha i loaa ia'u, aka, aole no i nui loa na huaale a'u i ai ai, o ko'u ola loa ae la no ia. I keia wa, ua palekana loa au mai ka eha mai o kuu kua a pela nohoi ke ano maopa. Ua hiki wawe loa ke ano o ka lakou hooia ana, ua manaoio loa au he laau maikai loa keia no na Puupaa. Mamuli o kuu ike maka maoli ana i keia laau ame kana hana, aole o'u wahi kanalua iki no ka hoike ana aku i ke akea no ke kupono io maoli o keia mau huaale, a, aole nohoi au e kue aku ina oe e hoike aku ana i kekahi kanaka no ka hele ana mai e ninau ia'u no keia mau huaale."

          E kuaiia aku ana na Huaale a Doan no ke Kikala Hanene ame na Puupaa no 50 keneta o ka poho, a i ole, he 6 poho no $2.50, e na poe kuai laau apau, a i ole ia, e hoounaia aku no maloko o ka Eke Leta i kela ame keia mea e kauoha mai ana ke loaa mai ke kumukuai ia HOLLISTER DRUG CO., ma Honolulu. O lakou na Agena no Ko Hawaii Pae Aina.

 

          O kela haole nona ka inoa o W. J. Coon i lawelawe ai i ka oihana kaa lawe ukana ma ke alanui Moi, e nohoia nei e Larsen ma, a i hopuia ai no ka hewa malama opiuma, a pakelo ai nohoi mai ka lima aku o kona mau hope ma ka bona, eia oia ma ke kulanakauhale o Oakland kahi i noho ai. He halekuai o na hua-ai kona ma ia wahi.

 

HUAKAI I KA AINA E.

Umikumamaha La ma Kapalakiko.

(Hoomauia)

KA MAUNA TAMALPAIS.

          O keia kekahi o na wahi kupono loa i ka malihini ke hele e makaikai, he mauna keia aia ma ke kukulu komohana akau mai ke kulanakauhale aku o Kapalakiko; e holo ana oe ma ka ferryboat no 12 mile, iloko o hookahi hora, alaila, e kau aku ana oe ma ke kaa ahi e pii ana iluna o keia mauna; he 2592 kapuai ke kiekie o keia mauna, a aia ma kahi he 210 kapuai mai ke kiko kiekie loa mai o keia mauna ke ku nei ka hotele o na kamahele e lua@ moe paha; he maikai maoli na mea @ o keia hotele, a o ke ea o luna o keia mauna ua ano like no me ke ano o ke ea o kela mauna kilakila o Haleakala ma Maui; he anaanapuu ka hoomoe ia ana o ke alanui e pii ai iluna o keia mauna, nona na anapuu he elua haneri me kanahiku, a o ka loa hoi o keia alanui puu he ewalu mile; elike me ka pii ana o ke alanui iluna pela no ka pii mau ana ae o ka mama o ka ea. Ia oe e pii ana maluna o ke alanui hao e pii nei iluna, e huli mai ana oe a nana i ke kulana kauhale o Kapalakiko e moe ana ma ka hikina hema; a e kahela mai ana hoi ke kulanakauhale o Okalana; a e uiuiki mai ana hoi ka puu i kapala o Mauna Diabolo, me he mea la ua like me ka uiuiki mai a "Pili me Kalahikiola na puu haele lua o kuu one hanau ke huli a nana mai Kona mai i ka lai a Ohu," a e waiho mohala mai ana hoi ka moana Pakipika ma kou lima akau oiai oe e huli ana e kilohi i ke kulanakauhale o Kapalakiko; e ku mai ana hoi ka puu i kapaia o Sana Helena ma ka akau; e ike moakaka ana hoi i ke Cliff House a me na kiekie a Sutro; e waiho kalae mai ana hoi o Berkeley me kona kulanui kaulana, o Alameda hoi me Euakinala; e ku mohala mai ana hoi o Sana Aneselemo me kona mau ahua pohaku lehulehu; e halii mai ana hoi o Sana Quentina me kona hale paahao nui; e kuono mai ana hoi iloko na kulanakauhale o Sana Rafael, Sausalito, Larkspur, Belvedere, Norato ame na kauhale e ae ma na kapakai o ke kaikuono nui o Kapalakiko.

          Aia no hoi maluna o keia mauna, he hale a ke Aupuni i kukulu ai no ka nana ana i na mea e pili ana i ka mama o ka holo ana o ka makani, a pela aku.

          I ke kamahele maluna o keia mauna, e nana ana ma o a ma o, he mea e kahaha ai, i ka ike ana i ke akamai o ka noonoo o ka mea nona i noonoo mua e kukulu i ke alahao e pii ai iluna o keia mauna, no ka mea, i ka nana aku he nui maoli no ka lilo o ka hana ana a me ke akamai pu o ka hana ia ana o na mikini e hiki ai ke pii iloko o 8 mile a loaa ke kiekie i 2592 kapuai, ua like ia me ka pii ana he 324 kapuai ke kiekie i kela ame keia mile, ma ke ala e pii ai aia no na awawa kuholo ma na aoao, a o na laau hoi e ulu ana ma na aoao, a o na laau hoi e ulu ana ma na aoao me he mea la i ka nana aku, ua ulu paha ia mau laau mamua aku o kela hanauna o ka honua nei; a o ka ke kamahele nae e olelo nei, keia kekahi o na wahi kupono loa a ka malihini e pii ai e makaikai; he elima dala na lilo apau no ka pii ana a hoi mai, e komo ana iloko olaila na lilo apau no kou alakai ame na lilo ferryboat, kaa ahi, a paina ana ma ka hotele iluna o ka mauna; e loaa no ia oe na mea ai apau ma ua hotele la elike me ka loaa ana ia oe ma ke kulanakauhale o Kapalakiko. Ua hiki no oe ke haalele i ke kulanakauhale o Kapalakiko i ka hora 9:30 a.m. a holo aku ma ke kaikuono, a pii ma ke kaa ahi a hoomaha ma ka mauna no aneane elua hora a hiki hou no i Kapalakiko i ka hora 3:30 auina la. (Aole i pau.)

 

          E hooia koke ia ana me ka hikiwawe ka Eczema, ke poo kepia, meeau ame ka meneo o ka ili, o kela ame keia ano. Laau Hamo a DOAN. Aia no ma kahi o ka mea pa-ipa-i laau. 50 keneta.

 

NA EKALESIA.

 

HE KEIKI NA KEKAHI HOA O KA PAPA UMIKUMAMALUA.

          Ma ke ku ana mai o ka moku lawe Penesilevenia mai Kapalakiko mai, ma ka Poalima o kela pule aku nei, i hoea mai ai ke keiki a Lunakahiko W. H. Kelly, kekahi hoa o ka Papa Umikumamalua o ka Ekalesia o Iesu Karisto i Hoonohonoho hou ia no na Poe Hoano o na La hope nei. Ua komo keia keiki i ka oihana koa o kona mokuaina, oia o Iowa, a eia oia ma ke alahele no Manila.

 

KA BUKE A MORAMONA.

(Unuhiia noloko mai o ka Hawaiian Gazette, Nov. 15)

          O ka pau pono ana iho nei no ia o ke paila ana he mau haneri buke o ka "Buke a Moramona" i unuhiia ma ka olelo Hawaii, e na luna o ka Ekalesia (o Iesu Karisto. - L.H.) i Hoonohonoho hou la no Poe Hoana o na La Hope, he olelo hoike maopopo paha auanei imua o kekahi poe, ke hoomaopopo iho lakou, o ka poe o keia ekalesia, aole loa lakou i kuikahi iki me ka ekaelisa o Uta, aka, he poe lakou i pili paa loa i na ao kumu ana ame na puaku manaoio o ka ekalesia, eike me ka mea i manaoio a i lawelaweia malalo o Iosepa Kamika, ma ona la hoi i oleloia ai, i loaa mua mai ai i ko ke ao nei ka buke a Moramona.

          O na mea i hoikeia maloko o keia buke, ua manaoia e kekahi poe he mau manao uluahewa wale no ia, aka, ua ikeaia no nae, aia no he poe e ae i nana aku i ua buke la me ka manao pulama eehia elike nohoi me ia i haawiia aku ai i ka olelo a ke Akua i manaoio laulaha ia, elike me ka mea i ikeia iloko o ka Baibala.

          Ke hoike nei ka Buke a Moramona i kekahi moolelo pokole o kekahi lahuikanaka, i hoea i ka aina o Amerika, mamuli o ke kauoha ame ke alakai ana a ke Akua, (ma ka wa i hookahuliia ai ka olelo a kanaka ma ka wa o ka hale-pakui o Bbela. - L.H.) no aneane 1500 makahiki, aka, mahope mai, aneane 600 makahiki paha mamua aku o Karisto, ua pau lakou i ka luku ia no ko lakou hewa. A mahope aku hoi o lakou, wahi a keia moolelo, ua paulia ko lakou mau makalua e kekahi poe kanaka e ae o ka hale o Isaraela, a he poe mamo hoi lakou na ka ohana a Iosepa (i hono ai ma Aigupita. - L.H. ) a me keia poe hoi na kupuna i alakaiia e ke Akua e hoea aku i ko lakou "aina o ka olelo hoopomaikai," mai Ierusalema mai B. C. 600. Ma ko lakou moolelo, e nee ana a hoea i ka A. D. 430 paha, ua hoikeia ko lakou pii ana ae ma ke ano he lahui ikaika a naauao hoi, a pela pu hoi me ko lakou haulehia ana; a oia hoi ke kulana e loaa nei a ikeia nei mawaena o na Ilikini o Amerika, ka poe hoi i oleloia, he koena lakou oia poe. O ka manao maoli o keia buke elike me ia i hoikeia ai maloko o ka olelo hoakaka mua, oia no ka hooia ana i ka "Iudaio ame ke Genetile o Iesu oia no ka Mesia, ke Akua Mau Loa, e hoike ana Iaia iho i na lahui apau."

          E hoonai mua ia aku ana keia buke imua o ka poe Genetile (o ko na aina e) a mahope aku hoi i na Iudaio, a ma ka hoohui ana i kona moolelo me ka Baibala, e lilo auanei ia i auwaha hoikeike no ka hoihoi hou ana i na Isaraela i hoopuehuia i ko lakou ma na aina hooilina (ma Kanaana. - L. H.)

          He mea paha e pahaohao loa ai kekahi poe lehulehu wale, aole loa o ka Buke a Moramona ke kumu i ulu mai ai ka Mare Lehulehu, aka, ke hoahewa loa nei ia buke i ka hana mare lehulehu ame na hana o ia mau ano apau, ma na olelo oolea loa.

 

          Ma ka hora 10 a oi o ka Poakahi nei i milo paa ia ae ai o Keoki Hapakela ame Misasa Peke Lopikana, ma ka ikoi o ka mare awiwi a "kaukaulua ole." O ka hoa pili mua o kela "mama maikai" oia no o Mr. Beni Haaheo, ka mea nona ka hale hana piula ma o aku o ka uwapo o Haaliliamanu, aka, mamuli o ka hemahema o kahi mea hoopaa, ua hihi ae la kaunaoa hihi aku la iluna o Keoki Hapakela.