Ka Nupepa Kuokoa, Volume XXXVII, Number 42, 21 October 1898 — Page 4

This text was transcribed by:	Kate Motoyama
This work is dedicated to:	sister luna murakami

Ka Nupepa Kuokoa

KE KILOHANA POOKELA NO KA LAHUI HAWAII.

Ke Aloha o kuu Makuahine

KE ALOHA O KA'U MEA I ALOHA AI

Ka Mana o ke Aloha.

He Moolelo Walohia.

(Unuhiia e Hoolala-a-Ka-Ua-Kukalahale no "Ke

Kilohana Pookela o ka Lahui Hawaii")

MOKUNA V.

Elua la i hala ae, aole i loaa mai kekahi lono mai ke Kauna de Berene mai, aka, ma ke kolu o ka la, ua hoea kino mai la no ia i ka hale o Barona Mereceli.

I kona hoea ana mai, ua halawai iho la ia me ka Barona, a ua pane aku la hoi oia iaia:

"Ua hopohopo ino loa makou no ka loihi loa o ka manawa nei; aka, ua pau ae la nae keia pioo mamuli o kou hiki kino ana mai la."

"Pela io no," ahi a ua Kauna nei i pane mai ai," aka he ka'ula no nae no ke kanaka ola, a hiki no ke ikeia mai. I hele mai la au e ike ia oe, a e kuka hoi kaua ma kekahi kumuhana ano nui loa i pono ia oe ame a'u ke ike i kona hopena."

"Ua pono," wahi a ka Barona, "e noho iho oe maluna o ka noho, a ei ae no ke kika maluna o ke pakaukau. Ke ole au e kuhihewa, e kuu hoaloha maikai, he manao ano nui loa keia au i makemake ai e kamailio pu kaua."

"Ae; he manao ano nui io no, oiai ua pili ponoi loa keia manao ia oe ame a'u nei."

"E hoike mai oe ia'u." wahi a ka Barona.

"Auhea oe, e kuu hoaloha maikai, ua maopopo loa ia'u, mamuli o kou lilo ana he hoaloha oiaio no'u, ua lawa loa ia ma ko'u aoao nei no ka hoopili paa loa ana aku ia'u iho ia oe ame kou ohana. Aka, ua manao au, he mea hoi e hooi loa ia aku ai kou hanohano ame ka hanohano nohoi o kou ohana, ke pakui aku au i wehiwehi hiwahiwa hou maluna o ke kulana i loaa ia oe ame kou ohana i keia wa mamuli wale no o ko'u ano hoaloha a makamaka nou."

I keia wa i nana mai ai o Barona de Mareceli iaia me na onohi maka pahaohao, oiai hoi ua Kaun Berene nei i pane aku ai:

"E kuu hoaloha maikai, i hele mai la au imua ou no ke noi ana aku ia oe no ka lima o kau kaikamahine, ma ke kuahu o ka materemonio."

I ka lohe ana o Barona Mareceli i keia mau huaolelo mai ke Kauna mai, na like iho la ia me ka i'a i loaa i ka hola, ka malule malie, oiai hoi kona mau onohi maka i nana mai ai i ua Kauna nei me ka piha pahaohao loa. Aka, i ka hala au o kekhi mau sekona o kona noho malie ana, aia hoi, ua pane mai la ia:

"Heaha la ka hewa o kau noi e kuu hoaloha, aohe hewa oia. Aka, o ka mea pilikia wale no, oia ko Alice hoopalauia ana me George Lamabereta, a ua haawi aku hoi au i ka'u ae ana no keia hoopalauia ana o laua; a ua maopopo nohoi keia mea ia oe."

"No ia pilikia au i hoike mai la, e kuu hoa, e hai aku au ia oe i ka mea e hoopauia ae ia oia pilikia ou. O keia noi a'u i waiho aku la imua ou, mamuli no ia o ko Alice hoike ana mai, imua o'u e hele mai au imua ou, a nonoi aku la ia oe no kona lima."

Me ka piha hoopahaohao loa ia o ka Barona no keia mau olelo a ke Kauna pane mai la ia:

"Auwe! He keu maoli ka hoi ka mea kupaianaha! Na Alice io anei hoi i hoouna ma ia oe, e kuu hoaloha, me keia puolo kupaianaha au i hoike mai la? Aole o'u kanalua iki no kela ame keia olelo e puka ana mai a oe mai, aka, ma keia iho la nae hoi a kaua e kamailio nei, e kala mai oe no ka'u hoohuoi ana'ku la ia oe."

"No kau ninau, ke ae aku nei au, me ka hooia ana'ku hoi, nana ponoi no i kauoha mai ia'u e hele mai imua ou; a oia nohoi ke kumu o ko'u hiki an amai la ia nei," wahi a ke Kauna Berene.

"Alaila, aohe a'u mea e olelo aku ai ia oe," i pane mai ai ka Barona, me ka hoomau ana mai, "Oiai ua holo mai la no ia mea ia oe ame kuu kaikamahine. Aka, he keu keiea a ka mea kupaianaha loa--aole maopopo iki ia'u keia mea."

"Alaila, o kau nei i pane mai nei, e lawe mai au ia mea a lilo, ma ke ano na ae oe i ko maua mareia ana? O kau pane anei ia?"

"Alia ho! E kuu hoaloha! No'u ponoi iho, aohe a'u kue no kou mareia ana me Alice. Aia no ia mea iaia. E koho no oia i kana mea e makemake ai e mare, a, o oe hoi nei o kuu hoaloha kahiko, heaha ia auanei ka'u e ae ole ai. AKa, e haawi mai nae hoi oe ia'u i mau la e kamailio a e kuka pu ai hoi au me kuu kaikamahine ame kona makuahine. Oia nohoi ka mea i kuleana maluna o kana kaikamahine, a oia ka'u e hopohopo nei e hoole ana paha ia."

"Ua maopopo ia mea ia'u; aka, o kou ae ana, ame ka ae ana o Alice, aole hiki ia Madame Maraceli ke hoole i ka makemake o kana kaikamahine."

"He mea oiaio ia, eia nae, e loaa ana no he hakoko ikaika ana mawaena o makou apau. U makemake loa ka'u wahine ia George Lamabereta i hunona ia nana. Aka, e kapae kaua i ka noonoo ana nona i keia wa."

Ma kela wa hoi, hooholo iho la o Barona Maracelia ame Kauna Berene, e kamailio mua o Maraceli i kana wahine, a ma ka palapala ia e hoike aku ai i na mea i hooholoia e ia ame kana wahine i ke Kauna, a mamua ae hoi o ka loaa ana aku o ia palapala iaia mai a Maraceli aku he mea pono iaia ke hele ole mai i kona (ko Maraceli) hale.

Ua haalele iho la ke Kaua i ka Barona Maraceli, a hui hoi aku la ia me ka piha hauoli o kona naau, oiai hoi ka Barona i hele holoholo ae ai maloko o kona rumi huli palapala me ke kupilikii o kona noonoo, a hala kekahi wa loihi, hookani ae la ia i ka bele kahea.

"E hai aku oe ia Alice e hele mai ia e halawai pu me a'u," wahi ana i kamanio aku ai i ke kauwa i hele mai ai e hooko i ka leo kahea o ka bele.

Aole hoi i liuliu hoea mai la o Alice.

"Ua makemake paha oe ia'u, e papa?" wahi a Alice i ninau mai ai i kona luaui makuakane, iaia hoi i hele mai ai a honi mai la iaia.

"Ae. E noho iho. Makemake au e kamailio aku ia oe," i pane aku ai kona makuakane iaia, me ke kuhikuhi ana aku hoi o kona lima i kekahi noho."

Nana mai la hoi o Alice iaia, a ike mai la he nanaina kuoo a hakanu ano e kau aku ana ma na helehelena o kona makuakane, a ia wa i o puanuanu ae ai kona naau me kekahi manao hopohopo a maka'u hoi.

"E kuu keiki," wahi a Barona Maraceli i pane aku ai i kana kaikamahine, "makemake au e kamailio ia oe no kekahi mea ano nui loa. O kekahi keia o na mea kupaianaha loa i hoea mai imua o'u."

"Heaha la ia mea, e papa? E hai mai oe ia'u."

"Ua hele mai nei o Kauna Berene e ike ia'u i keia auina la, a ua nonoi mai nei oia ia'u, e ae aku au, e haawi aku oe iaia i kou lima."

Ua noho iho ia o Alice, aohe pane leo.

"Ua nonoi mai nei ia, e ae aku au, e mare oe me ia; a wahi ana i olelo mai nei, nau ka, i kauoha iaia e hele mai oia e nonoi ia'u."

"E papa, ke ae aku nei au ia oe, na'u io no i olelo aku iaia e hele mai ia e noi ia oe."

"Alaila, e Alice, ua hoopoina loa ia ka paha o George Lamabereta e oe?"

"Aole au i poina iaia, e papa."

"Pela io paha. Aka, ua aloha oe iaia, a ua ike na mea apau o Parisa nei ia mea. Ma ko'u manao, he mea kupaianaha loa ma kou aoao, no kekahi kaikamahine noonoo maikai, elike la me oe, kou kiola wale ana i ka berita i hoopaaia mawaena ou ame ia, ka aelike hoi a'u ame kou makuahine i apono ai."

"Ke mau nei no ko'u aloha no George, aka, he aloha nae ko'u iaia, elike me ke aloha ana a ke kaikuahine i kona kaikunanae. Oia ke ano o ko'u aloha, e papa, no ka mea a'u i aloha ai."

"Pela io paha; aka, aole nae oia ano aloha ka'u ame kou luaui makuahine i hoomaopopo ai mawaena e olua. Aole no paha oia ano aloha ka George i apo mai ai mai a oe aku. A in a he oiaio kena au i kamailio mai la, alaila, no ko George opiopio a kanaka ui ana, ua aloha aku oe iaia me he kaikunanae la ia nou; a he oi loa ae hoi ka lu'alu'a o na makahiki o Kauna Berene mamua o ko George, nolaila, ua aloha aku oe iaia, me he makuakane la ia hou. Aole anei hoi pela?"

Aole o Alice i pane aku i kona makuakane.

"Ma ko'u manao, aole paha e oi aku ka hauoli o kou mau la o ka nohona mare, ke mare oe me Kauna Berene, mamua o ka mea e loaa ana ia oe ma ia nohona laahia, in a e mare ana oe me George Lamabereta?"

I keia wa i pane mai ai o Alice:

"E papa, ma kou wa i mare ai oe me kuu makuahine, ua oi aku kou mau makahiki mamua o kona, eia nae, ua hana oe i na mea apau e hauoli ai kuu makuahine aloha."

"He oiaio paha ia; aka, ua hana au, kou makuakane nei i na mea a'u i manao ai, he mau mea ia e loaa ai ka hauoli ame ka nohona oluolu i kou luai makuahine," wahi a ua Barona nei i pane aku ai i kana kaikamahine, me ka olino ana ae o na hiona o ke aloha ma kona mau helehelena.

"Alaila, e kuu papa maikai, a, aloha nohoi, mamuli o keia mau hana ana au, ua pili paa maoli ko mama aloha ia oe. Aole anei?"

"Pela no," wahi a Maraceli i pane aku ai me ka nui o kona aloha i kana kaikamahine. "E Alice, e hai aku au i kuu manao maoli ia oe, in a no oe e makemake ana e mare aku i ke Kauna, aia no ia ia oe. Aka, no'u nei, ua oi aku kuu makemake e mare oe me George. Ke ike aku nei au i kou manao, e kuu Alice, nolaila, aohe a'u mea e olelo hou aku ai ia oe."

Ia wa honi aku la ua Barona nei i na papalina o kana kaikamahine, a haloiloi walohia ae la na waimaka ma kona mau maka, oiai kana kaikamahine i uwe iho ai, a helelei iho ia kona mau waimaka ma kona mau papalina, a pu ana ae la ia:

"Papa, dear papa! O! my poor, poor mother!"

I kekahi kakahiaka ae, mahope iho o ka pau ana o ko lakou aina kakahiaka, ua huli hoi koke aku la o Alice no kona rumi, a noho kokoolua wale iho la no ka Barona me kana wahine.

No kekahi wa loihi iki i hakok@ pu ae ai na noonoo kupilikii ana o ua Barona nei, mamua o ka hiki ana iaia ke pane mai imua o kana wahine:

"E kuu Adele aloha, he wahi mea ka'u e hai aku ia oe, e hoopahaohao nui loa ia ai kou noonoo."

"O kuu lohe ana'ku ia mea, oia auanei ka mea e loaa ai ia'u na hoomakaukau ana ia'u iho e mahuahua ole mai ai na hoee ana mai a ia mau pahaohao na."

"Ua nonoi mai nei ke Kauna Berene i ka lima o Alice no ke kuahu o ka materemonio."

Ua oni ino ae la ka Barona-wahine maluna o kona noho, ame na onohi maka e haka pono ana maluna o kana kane, pane aku la ia:

"Pehea? Ua noi mai nei oia ia Alice i wahine nana? Heaha kau pane? Aole anei oe i aka pahenehene aku nei iaia no ke olalau o kona noonoo?"

(Aole i pau.)

He Itamu Kuloko.

(Mai ka Nupepa Sydney Moraning Her-

ald mai.)

He nui wale o lakou.

Loaa i kela ame keia nupepa kona haawina.

He mau olelo paakiki ke manoioia, a pakela aku ka paakiki ma ka hooiaio ana.

He mau olelo hoike mai na wahi mamao mai.

Ka olelo a na kanaka ma Queensland.

Na manao akea mai Nu Kilani mai.

Pinepine loa ka loaa ana o na manao apono malaila.

Aka, aohe nae waiwai nui ma ka home nei.

Makemake na kanaka o Sidane i mau hooia kuloko iho.

Oia na olelo o na makamaka, na hoaloha ame na kamaaina.

Makemakeia na olelo hooia kuloko iho.

Pau ke kanalua o ka mea hoopahala, a hiki ole ke hoopaapaaia.

O keia ke ano kakoo e kokua nei ma kela ame keia poho o ka Aila Hamo a Doan. Eia kekahi hoike:

Penei ka olelo a T. W. Hickson o ka Helu 170 Cumberland Street o keia kulanakauhale:--"No kekahi mau pule i hoopilikia loa ia ai au e kekahi ma'i maneo ma ka uha, a ua loaa ole hoi ia'u ke ola ana mai ia ma'i mai. Ua hoolaha mua ia ae la hoi ka AIla Hamo a Doan ma ia wa, a ua kii aku la au i poho aila no'u. Ua hauoli au ma ka hoike ana aku, ua nalowale aku la ua ma'i meeau nei mai a'u aku mahope iho o ekolu wale no hamo ana, a, aole nohoi au i hamo hou mahope mai. Aole au e poino i ka haawi ana aku i ka leo mahalo no keia laau."

O na mea i ikeia no keia Aila Hamo a Doan i na wa i kaa hope ae nei, ua hoike mai la ia i ka oihana lapaau, a pela pu nohoi me na tausani o na poe i hoopilikiaia e keia ma'i meeau o ka uha, oia ka laau palekana a hololea loa o ke ola i haawiia aku i ka lehulehu, aole opiuma a laau make e ae iloko on a, aole ikeia kekahi ano e ma ka pa ana mai oia laau i ka ili, a ke kuaiia nei e ka poe kuai laau ma ka 2-9 no ke poho, a ma ia kumukuai, ua hiki ia ke loaa i kela ame keia mea i loohia ikeia ano ma'i.

Pinepine loa ke ola ana o na ma'i kau a paakiki loa hoi o ke ola ana elike ma ka wa e pau ai na pahu elua e ekolu a he poe ma'i hoi la i ola ole i na laau lapaau e ae no na makahiki he lehulehu.

Aole paha mai i oi aku ka paakiki ame ka uaua o kona hoolaia ana elike me na ano lehulehu wale o keia ma'i i kapaia i kahi wa he uha-hemo. Ua lilo ka Aila Hamo a Doan i mea nana e lawe ae i kahi o na laau ola ole apau ke hoopiliia i keia ma'i, a o kela ame keia mea i loohia i keia ano ma'i, aole loa he hana kuhihewa nana e hana ai, ke hoao oia i keia Aila Hamo a Doan.

E loaa ana keia laau mai kela a mai keia mea kuai laau lapaau aku, oiai he laau kaulana loa keia no ke ola o ka ma'i uha-hemo, a ke ninau oe iaia, e hoike mai ana ia no kekahi poe kanaka i ola loa mamuli o ke kau ana i keia laau.

E kualia ana ka Aila Hamo a Doan e na poe kuai laau apau. He 50 keneta no ke poho, a i ole he 6 poho no $2.50. E hoounaia aku no ma ke Eke Leta ke loaa mua mai ke kumukuai. Hui Kuai Laau a Hollister, Honolulu, na Agena no ko Hawaii Pae Aina.

He ahaaina la hanau kai malamaia e Mr. ame Mrs. Keoni o uka ae nei o Leleo, ma ke ahiahi o keia Poaono aku nei. He hoomanao no ka piha ana o ka makahiki hookahi o ka laua keiki helu elua. Ua nui na mea ai ono i hoomakaukauia, a ua lehulehu nohoi na puu i hooma'u kemioia me la mau mea kaikai wale.

Ka Liona o ka Akau

He Moolelo no ke Au

Manawa

-:o:-

Gustavus Adolphus.

---

Kakauia e G. A. Henty a unuhiia e

kekahi mea unuhi moolelo o

ke Kuokoa.

MOKUNA IV.

E Hoomanao ia Brandenburg Hou.

Ua noho iho la o Fakuhara ame Makamu Gerema ma ka home a laua i noho aku ai malalo o ka mana o ka oihana koa.

He ekolu paha pule mahope iho o ka lilo pio ana mai o ua kulanakauhale la i na koa Sekotia, ua hoea mai la ka lono no ko Kenerala Tiely, kekahi o na alihikaua kaulana loa o na koa Imeperiela, nee ana mai no laila.

A e nee mai ana oia no keia kulanakauhale me ka awiwi nui, me kekahi pualikaua nui.

Ua eleu ae la ho na Sekotia i ka hoomakaukau ana i na kulana pale apau e pono ai ke hanaia no ke kua ana'ku ia Kenerala Tiely ame kona poe koa.

I cela âme keia la, ua hoea mai la na elele mai waho mai o ke kulanakauhale me na lono e hoike ana, ua pau aku la i ka lilo pio he lehulehu wale o na kulanakauhale e ae ia Tiely, oia hoi na kulanakauhale i hoonohoia ai na koa Suedena o ka Moi Gustavus Adolphus. Aole nohoi i liuliu iho, ua ikeia aku la ka pualikoa Imeperiela e hookokoke mai ana i ke kulanakauhale o Bradenburg Hou.

Ua maopopo i na koa Sekotia he 600 i hoonohoia e kiai ia wahi, aole loa e loaa mai ana la lakou he mau kokua ana mai a Gustavus mai, nokamea, he umu la i hala ae, ua hala aku la ia i ka aku me kona pualikaua nui, nolaila, hookahi wale no a lakou hana, o ke ku aku a paio aku i ka enemi elike me ka hiki ia lakou.

O na kanaka keia o loko o ke kulanakauhale, ua hoopii kaumaha loa ia iho la ko lakou mau noonoo no ke poino ame ka pilikia e kau mai ana maluna o lakou. Ua ike no lakou, ma ka wa e lilo pio aku ai ko lakou kulanakauhale maloko o na lima o ka enemi, oia ka wa e alahula mai ai na hana hao wale a lawe wale ia hoi o ko lakou mau wahi pono ai, pono aahu ame na pono e ae; a ma ia wa hookahi nohoi e ulu mai ai na hana aihue a pakaha a na poe haihai kanawai o loko ponoi iho o ke kulanakauhale.

Ua hoouna mai la o Kenerala Tiely he elele i ke kulanakauhale e nonoi mai ana e haawi pio ia aku ua kulanakauhale la maloko o kona lima, aka, ua hooleia aku ia kauoha e Lindsay ke aliikoa kiekie o na Sekotia.

I kela wa no i hoomaka mai ai na koa Imeperiela e kipoka mai me ka lakou mau pukuniahi maluna o ke kulanakauhale. Ua ikaika launa ole keia mau ki pu ana mai a ua poe koa Imeperiela nei. Ua hoomauia ka lakou mau ki pu ana mai ke kakahiaka mai a hoea i ka poeleele, a o kahi i hoolele nui loa ia mai ai o na poka o keia mau pu, ma ka pa pohaku puna no ia e hoopuni ana i kekulanakauhale.

E hoomaopopoia hoi, ma ka wa mua loa i loaa mai ai ka nuhou i Bradenburg Hou no ka nee ana mai o Tiely no ia wahi, ua hoouna aku la ke kanaka nona ka hale a Makamu ma i noho aku, i kana mau kaikamahine i Stralsund, kahi a kana keikikane e lawelawe oihana ana.

He eono la o ka noke hala ole ana mai o na pu a na koa Imeperiela i ke ki ma ka pa e hoopuni ana i ke kkulanakauhale, ua ikeia aku la ke ano nahaha mai a helelei mai hoi o ua pa la. I kekahi wa, ua lele makawalu mai la na poka a na enemi, a haule mai la iloko oke kulanakauhale, hoopoinoia ae la kekahi mau hale a pela pu hoi me na kanaka. Ma na wahi o ka pa pohaku i hoohioloia a hakahaka, oia na wahi a na koa Imeperiela i nee mai ai me ka ikaika, aka, ua hookuemi hope ia aku la lakou e na koa Sekotia e alakaiia ana e ko lakou mau alii eleu ame ka wiwo ole.

Aia ka pualikoa Sekotia o na laau ihe ke ku aku la imua o lakou me he pakaua nee la imua o na enemi, a ua hiki ole i na koa Imeperiela ke wawahi i keia pualikoa. Aia hoi na poe kipu pololei o na Sekotia ke hoouna mai la i ka lakou mau poka, mai luna mai o na hale, a haule iho la maluna o na enemi me he mau kulu paka ua'la.

O na Sekotia hoi keia maluna o ka pa pohaku, me ka wiwo ole ame ka maka'u ole, uaku aku ia no lakou imua o ko lakou mau hoa paio, he alo a he alo, a ki aku la i ka lakou mau pu.

He oiaio, ua nui ka make ame ka poe i hoehaia ma ka aoao o na koa Imeperiela, mai na hoolele kaua ana'ku a na Sekotia, aka, elike me kekahi muliwai nui e kahe ana, pela i mau ai ka nee ana mai o na koa Imeperiela no mua.

Elua la âme ekolu po o ka paio hoomaha ole ana o na Sekotia i na Imeperiela, me ke pale ana kau ia lakou mai ke komo ana mai iloko o ke kulanakauhale, aia hoi, mamuli o ka loaa oie ana ia lakou he mau kokua hou, ame ka nui launa he mau kokua hou, ame ka nui launa ole o ka hahana ikaika o ka lakou mau pale ana, aia hoi, ua kuemi hope mai la lakou iloko o ke kulanakauhale, a ia wa i holomoku mai ai ke komo ana mai a na koa Imeperiela. Ua hoomau aku no nae na Sekotia i ka hakaka ana me lakou.

Ma ka wa a na koa Sekotia i kuemi hope mai ai, mai na wahi a lakou i ku aku ai a pale aku i na koa Imeperiela, ua nee hope no lakou me ka hoomau ana no i ka paio ana i ko lakou mau enemi. E paniku ana nohoi lakou i na alanui, a he lua ole ka weliweli o ka make ame ka poino a lakou i kau aku ai maluna o na enemi.

I ka hala ana o na hora he umikumamalua o ka paio hoomaha ole ana o na wahi koa Sekotia i koe iho, ua puuluulu ae la lakou ma kahi makeke oloko o ke kulanakauhale a he wahi hoi ia mawaena kona ponoi o ua wahi kulanakauhale nei. Ua hoopuniia na aoao apau o na Sekotia e ko lakou poe enemi. He lehulehu hoi na wa i kani ae ai na o-le a na Sekotia e hoike ana i ko lakou poe enemi e hooki i ka paio ana, aka, mamuli o ka piha inaina loa o Kenerala Tiely no ka nui hewahewa o na poe i make a hoehaia o kona poe koa e na Sekotia, aole oia i ae aku i ka lakou noi, elike me na rula maa mau o ke kaua, a ua hoopuka ae la ia i kekahi kauoha paa, aole loa e hoopakeleia kekahi kanaka Sekotia. Nolaila, ua lele kaua mai ia na koa Imeperiela maluna o na wahi koa Sekotia uuku i koe iho.

Aka, oia wahi puulu koa uuku nae, ua lawa loa no ko lakou wahi ikaika panaiki i hoohuihuiia ae, e pale aku ai no i na Imeperiela. Aole hiki i ko lakou heluna nui ke wawahi i ke kuea a na Sekotia i kukulu ae ai me ka lakou mau laau ihe. Ina paha o keia wale no ka pilikia a ua poe keiki puuwai wiwo ole nei o Sekotia i pale aku ai, in a no ua loaa no ia lakou he wahi palekana, aka, aia kekahi make o lakou mai luna ku o na hale, oiai mai laila aku kekahi poe koa Imeperiela e ki aku ai i ka lakou mau pu maluna o lakou.

Ua ku iho la o Konela Lindsay i ka pu. Ua haule a make iho la hoi o Kapena Moncrieff, Lutanela Keith, ame Fakhara ma kahi kokoke ia Makamu. Ke olowalu mai la na leo hooho o na koa Imeperiela, a pula ae la ka lewa i na leo kupinai hehena o lakou, me na huaolelo--

"E pepehi, e pepehi, aole e hoopakele."

Aole nohoi na Sekotia i ae e make me ka paio ole ana aku i ko lakou mau enemi, aka, me ka piha o ko lakou mau umauma i ke ahi lalapa o ka inaina wela ua lele aku la lakou maluna o ko lakou mau hoa paio me ka ikaika loa.

I ka hele ana keia a koe he kanalima wale no poe Sekotia mailoko mai o kela heluna o 600, ua hoohui ae la lakou ia lakou iho, ameka lakou mau laau ihe e o ana imua, ua nee aku la lakou me he oni ana la na kekahi kaa mahu holo loa, a oki pu aku la mawaena o ko lakou mau enemi. A i ko lakou puka ana mawaho o ko lakou poe enemi, ua hoomaka ae la lakou e kau liilii, a holo kela ame keia o lakou ma ke alahele e loaa ai ka pakele, oiai, hoi kekahi poe o lakou i paio ae ai, he alo no a he alo, a he lima no a he lima me ko lakou pae enemi.

Ma keia wa i puka ai keia poe Skotia, ua pakele aku la o Kapena Innes ame Lutanela Lumsden. O laua kai holo aku, a lele aku la ma ka auwaha wai e hoopuni ana i ke kulanakauhale, a na laua i lawe aku i ka lono walohia no ka lukuia ana o na koa Sekotia ma Bradenburg Hou imau o Gustavus. Ua lilo keia lono weliweli a manaonao i mea hookaumaha loa i na kanaka Sekotia o loko o ka pualikaua o ka Moi o Denemaka, a ua hoohiki iho la lakou, e lilo ke koko ame na ola o ko lakou mau hoakanaka a hoa hoi ma ka aina kulaiwi hookahi mai i mea na lakou e hoomanao poina ole ai, ma ekla wa ame keia wa, e halawai ai lakou ma ke kahua kaua me na koa Imeperiela. Ua puana ae la lakou, "Hoomanao ia Bradenburg Hou," i moto poina ole ia lakou.

O Makamu hoi, oiai oia e paio ana no ka wa hope loa o ke ku ana o na koa o kona puali ma ka makeke, a ma ae alo ponoi iho hoi o kekahi hale, ua huli ae la ia i hope, lalau ae la i ke poheoheo o ua puka la a wehe aku ia, he oiaio ua hemo aku la ia.

Ua piha o loko o keia hale i na koa Imeperiela i holo aku iloko o laila i pakele ai lakou mai ka ulaa pu ia ana aku e na ihe a na koa Sekotia he kanalima i nee aku ai mawaena o lakou me he makani wili ahiu la mai ke kukulu akau mai.

ani mai la oi o Makamu i ka puka, a ku iki iho la ia me ka noonoo nui ana no kana mea e hana ai, a no ka hoomaha iki ana nohoi. Iloko o ekolu la o kona paio ana me ka ikaika me kona mau hoa o ka puali hookahi, aole ia i hoopoinoia, koe wale no ka opaha ana o kona wahi papale kila ame kona aahukila e komo ana.

Ke lohe ae la ia i ke ka-ka-ni paapaaina o na pu ma ka hale maluna, ka nakeke paiakuli o na mea kaua ame ka leo have o na koa Imeperiela.

(Aole i pau.)

Hoolaha Kumau.

Koko

Maemae

OIA KE KUMU O KE OLA

KINIO MAIKAI . . . .

KA AYER SASAPARILA

Ka mea e maemae ai ke koko, ikaika na aa-lolo, ono ka ai, pau ka poiuiuhi a maikai maoli ke ola. He mau tausani o na kanaka i hoike no ke ola o ka Laau Sasaparila a Ayer. Ke hoea mau mai nei ka lakou mau palapala ma kela ame keia eke leta. Aohe keia he laau no ka hoao wale ana. Ke hooia mai nei kela poe leta apau, "Ua ola au i ka Laau Sasaparila a Ayer." O kekahi

WAHINE NAWALIWALI

i hele a pili mau ka ili i ka i ela moe, i loohia i ka ma'i palalahu ai ili, i hele hoi a wiwi, a pela hoi me ka ma'i i loohia mau ai lakou na wahine, kakau mai la oia no kona ola loa ana. Ina makemake oe e hoopomaikaiia oe e ka pomaikai i ikeia e kela poe a loaa ia oe ke ola kino maikai a ikaika, alaila, e inu oe i ka laau hoomaemae koko a hooikaika kino hoi.

Ka Laau

Sasaparila a Ayer.

E makaala loa no na laau hoohalikelike kumukuai emi. Ka inoia o @ laau, oia ka AYER SASAPARILA. E ikeia ana keia inoa mawaho o ka wa-hi, a maloko nohoi o ke kino o kela ame keia omole.

NA HUAALE AYER I u@iia me ke ko, he

* @ ka ai ana.

No Keaha I HOOKAWELWE-

LE LOA AKU AI

OE I KELA

ANU, KUNU

AME PUU EHA?

Ua kaulana loa ka LAAU KUNU A AYER (Ayer's Cherry Pectoral) iloko o na makahiki he aneane 60, ma ka hoola ana i na Ma'i o ka Puu ame ke Akemama, ke Anu, ke Kunu, ka Ma'i La Grippe, ame ka Ma'i Mala o ka pale Akemama. He ono keia laau ma ka inu ana, a he oiaio ke ola.

AYER'S CHERRY PECTORAL

Na Medala Gula mai na Hoikeike Nui o ke Ae

Mai lawe i na Laau Emi i Hoohalikeia me keia

Hollister Drug Co. Lt.

Na Agena ma ke Paeaina Hawaii.

Kakela

ME Kuke.

Ka Halekuai Nui.

-:O NA:-

Waiwai Like Ole

* * O na Mea * *

HANA KAMANA A PAU

Na Lako Pili Hao Kukulu Hale,

Na Kepa bela,

Na Lei Ilio,

Na Kaulahao Ilio,

Na Pahi,

Na Upa,

Na Kope Hulu,

Na Pulupulu.

Na Palau Lio *

Moa Mahiai,

Na Au Ho, Na Au Koi,

Na kua bipi, Na lei bipi, Na kalahao bipi

Na uwea pa, Na kaa palala,

Na mea piula, Na

Ipuhao.

Makau ME Aho Lawaia

Na Iliwai . . . . Na Pakeke . . .

Na Kula . . . Na Pakeke Hao . . .

Na Hulu Pena Na Kapu Hao . . .

Na Pulumi . . Na Pauda . . .

Na Pena me Aila Na Kukaepele . . .

Na Kopa . . . Na Uwiki a me . . .

Na AIla Mahu Na Ipukukui . . .

Mikini Humuhumu Kau-

lana a

Wilcox & Gibbs

Hookai Lopi,

KA REMINGTON, Elua Lopi.

A me na ukana he nui wale e kela a me keia ano.

Kakela me Kuke.