Ka Nupepa Kuokoa, Volume XXXVII, Number 42, 21 October 1898 — Page 3
| This text was transcribed by: | Michelle Lindberg |
| This work is dedicated to: | Kolu, Tita, Kale - For your future |
Ka Nupepa Kuokoa
KE KILOHANA POOKELA NO KA LAHUI HAWAII.
KA HUI ALAHAO me AINA o OAHU
MAI A MAHOPE AKU O JUNE 13, 1898
(PICTURE OF A TRAIN)
Manawa Holo
WAHI HOLULU Waianae, kaa Waialua, kaa Waianae, kaa Wili o Ewa, kaa
(Mai Honolulu na la apau, ohua, na la ohua, na la ohua na la apau.
aku.) koe ke Sabati. apau. apau.
A.M. A.M. P.M. P.M.
Honolulu.......... 7:10 9:15 3:10 5:10
Manana........... 8:07 9:48 3:43 5:50
Wili o Ewa....... 8:37 10:08 4:08 6:10
Waianae.......... 9:27 10:53 4:43 .....
Waialua........... ..... 12:00 5:38 .....
IWAHI HOOLULU Wili o Ewa, Waialua, kaa Waianae, kaa Waialua, kaa Wili o Ewa,
(Mai waho mai a i kaa ohua, koe ohua, na la kaa huikau, na ohua, na la kaa ohua
Honolulu) ke Sabati. apau. la apau, koe apau. Sabati wale no.
ke Sabati.
A.M. A.M. A.M. P.M. P.M.
Waialua.......... ...... 6:12 ..... 2:39 .....
Waianae......... ...... 7:12 10.09 3:55 .....
Wili o Ewa..... 5:50 7:47 10:59 4:32 12:45
Manana.......... 6:15 8:07 11:34 4:52 1:10
Honolulu......... 6:50 8:40 12:15 5:26 1:45
G. P. DENISON,
Luna. F. C. SMITH,
Luna Kuai Palapala Holo
______________________________________
KELA AME KEIA.
_________
Ma ka Poalua nei i hala aku ai ke Kahukula Nui Townsend no ka mokupuni o Maui.
_________
E lawelawe aku ana o Hon. John Lot Kaulukou ma ka oihana kuai waiwai paa.
_________
Eia mai no ka makou mau moolelo ekolu ke oili pulelo aku nei no ma ko makou pepa o keia la.
_________
Ua huli hoi aku o W. J. Rice Opio no Kauai, mahope iho o ka hala ana o kekehi mau la iaia ma Honolulu nei.
_________
Ke lawelawe mai nei o Mr. J. L. Kaulukou i ka oihana kalepa waiwai paa. Ola ia kini ke a mai la ke ahi.
_________
Ma ka hebedoma i hala, he 59,825 ka nui o na i'a i nanaia e ke - aula o ka Makeke Aupuni (Mr. D. L. Keliipio).
_________
Ke hoomaamaa nei ka Loio Kuhina i ke kakau ana ma kona lima hema. Aohe hewa oia, ike ka akau ame ka hema.
________
Ua hookohuia ae nei o Mr. John F. Colburn (Keoni Kolobana) i lunahooponopono waiwai no ka waiwai o Antone Rosa.
_________
Ua haawi ae ke Kanikela Pake hou ma Honolulu nei he anaina ike lahui ma ke ahiahi Poalima nei maloko o ka Hale Hui o na Pake.
_________
Ma ka hora 12 a oi o ka po Poakahi nei i ku mai ai ka mokuahi Gaelic mai Kapalakiko mai no Honolulu nei, ma kona alahele no ke komohana.
_________
E holo aku ana o Kenerala King ame na koa Amerika no Manila, maluna aku o ka mokuahi Arizona, e ku mai ana no Honolulu nei mai Honokaona mai.
__________
He 50 makahiki i hala ae nei, ua manaoia he 250,000,000 ka nui o na kanaka apau o Europa; aka i keia wa, ua oi aku na kanaka o Europa mamua o 360,000,000.
_________
Ma ka auina la Poaono aku nei i paani popo pekupeku wawae ai kekahi poe keiki o Honolulu nei me kekahi poe wae o ka poe Amerika, a ua lilo ka eo i ka poe Amerika.
_________
Ma keia Sabati iho e ku mai ai kekahi mokuahi lawe koa Amerika no Honolulu nei, a holo loa aku no Manila. Ua manao wale ia o ke "Senatoa" ka moku e ku mai ana.
_________
Iloko o 9 la ame 15 hora i holo ia mai ai mai Kapalakiko mai e ka mokuahi hou o ka Hui o Poka Ma, ku mai la ia no Honolulu nei. Ua lawe mai ia no keia awa, he 250 tona ukana.
__________
Ma ke awakea Poakahi nei, ma ke kuai kudala, ua lilo ae la he apana aina no Kepola wahine i mke, no na dala he 1,525 ia Mrs. Jane Clark, wahine a Mr. Chas. Clark.
__________
O ka hoopii a S. Ahmi, kekahi o na keiki lalawai o Maui, kue ia Henry Holmes, ame kekahi poe e ae, no kekahi aina ma Honolulu nei, mawaena o na Alanui Ema ame Papu, oia kekahi hoopii lehulehu loa o na loio ma kela ame keia aoao. Ma ka aoao hoopii he eono loio; ma ka aoao hoopiiia he ehiku loio, ua like me unikumamakolu loio ma keia hihia imua a oka Aha. He papa kiure maopopo keia o na olohe Kanawai o Hawaii nei.
__________
Ma ka hopii a ka Hui Mahiai Hawaii (C. Brewer & Co.) kue ia Samuel Morris, kela haole nona ka aina hanai holoholona o Kahuku, ma Kau, Hawaii, e noi ana i ka Aha Kaulike, e hooko mai ka mea hoopiiia ia ka aelike kuai ino ua aina hanai holoholona la i ka aoao hoopii, ma o kona kakauinoa ana i kekahi palapala kuai a hoolilo, ame @ka ukuia ana aku o ke kumukuai i helikeia, ua kaa ka pono o ka 'olelo hooholo a ka Aha i hoopukaia e Lunakanawai Perry no ka aoao o ka mea i hoopiiia.
Ua kuaiia he 55 mahele o ka Hui Mahiko o Honokaa, Hamakua, no ka huina o $18,700, ua like me $340 no ka mahele hookahi.
___________
Ma ika mokuahi Kinau o ka la "Sabati" aku nei i huli hoi mai ai o Mrs. Emma M. Nakuina, Komisina o na Ala Liilii ame Pono Wai Honolulu nei, mai ke kulanakauhale lu-lehua mai o Hilo.
___________
Ua oleloia ae, ua loaa mai nei i kekahi haole o Honolulu nei, nona ka inoa o Nick Breham, he kuka ili (pipi) mai Kona, Hawaii mai. A he kuka ka ia no Kamehameha I. Iloko o kekahi ana ma Kona i loaa ai keia aahu kahiko. Peia io anei?
___________
Ua hala aku nei ke kauoha hua kepau pai-palapala a ka Hui Lahui Hawaii no Kapalakiko, a me he mea la, he mau ia wale no koe a hoea mai ia mau mea paahana hou o ka oihana pai no Honolulu nei.
___________
Ua manaoia, ma ka la apopo, e ulele hou ai ka hui kinipopo peku wawae o Honolulu nei me kela kamalii Amerika na lakou i hamabaga ko Honolulu nei poe i kela Poaono aku nei. E wela ana paha kahi hao, a ala ka uwea.
___________
E paio kipu pololei ana na koa Hawaii o na mahele B ame D ma ka la apopo, a o ka puali o laua e lanakila ana e ai wale ia i na mea ono kuhinia i hoomakaukauia e na hoa o ka puali ki-makaahewa. Fire Away B - Wela ka hao D.
__________
(Ke mahalo aku nei makou ia Mr. Sol. K. Kino, ke kakauolelo, no kona hoouna ana mai ia makou ia ka mooleleo i hoikeia ae la. E na opio ame na makua, e ala nui oukou a paa ia ka Hae o Karisto ma ke Kula Sabati i laupai mai ko ia la aloha maluna o ka aina. L. H.)
__________
"E hoopau e na anee alii i ka manao ana e hoihoi hou ia mai ana e Amerika ke Aupuni Monakia, oiai aole makemake o Amerika ia mea. E pono ia oukou e hoopau loa ia manao kuhihewa o oukou." Mai "Ka Elele Hawaii" mai, Oct. 6. Pololei, pololei oe, pololei loa, wahi a ka Piliolelo.
_________
Ua hoole o Mr. J. M. Vivas i ke noi a na Pukiki o Honolulu nei e holo oia no Wasinetona, no ke kiai pono ana i ka lakou palapala hoopii imua o ka Ahaolelo Hui ma ka malama ae nei o Dekemaba. E lilo ana paha keia hana i kekahi kanaka oia lahui e noho mai la no ma Wasinetona.
__________
Ke hoomaamaaia mai nei kekahi poe koa Amerika o waho ae nei o Kaimana Hila i ka noho ana o loko o Kalakaua Hale ae nei. Ma kela Poaono i hopuia ai kahi poe o lakou a hahaoia aku la ilaila, a pela no ma ka po iho. Malia o lilo keia i mea e hookeonimanaia ae ai lakou.
__________
Ua aa mai nei kekahi koa o ka puali M o na koa Amerika mai Nu Ioka mai, e noho nei maanei, e heihei baisikala me ko Manoa keiki hulu-aa ma ia hana, oia hoi o John Silva. He 11 paha mile ka loa o ka pahu e holo ia ai e laua. O ka laua pili, aia mawaena o $10 ame $25 e aumeume nei.
__________
Ua kipakuia mai kekahi mau halelewa waiu onioni e ku nei ma kahi kokoke i kahi hoomoana o na koa Amerika, e Konela Barber. Elua haole a hookahi kanaka maoli, koe kekahi mau wahi mea oia ano piepiele hookahi, n wahi mea oia ano piepiele hookahi, no ke ku ana o ka laua waiu onioni ma na aina Aupuni ole.
__________
Ua make mai nei ma Hilo, Hawaii, o A. K. Kaiwi, kekahi hoa o ka Puali Puhi Ohe Lahui, a keiki hoi a ko makou makamaka a hoaloha Mr. James H. K. Kaiwi o Lihue, Kauai, a ua hoihoiia mai kona kinowailua no Honolulu nei e ka mokuahi Kinau. E malamaia ana he anaina hoolewa nona ma keia Sabati ae, Oct 23, a ma ka hale hana pahu kupapau o E. W. Wiliama o Honolulu nei e akoakoa ae ai ka Puali Puhi Ohe Lahui e hoohiwahiwa ana i ka huakai hoolewa.
_________
Ua olelo ae o Kapena Tanner i hoounaia mai nei ia nei e ke Aupuni makua, ma Wasinetona, no ka hakilo pono ana no ke ano e hiki ai ke hoakea a hoohohonu hou ia iho ka nuku o Honolulu nei, a pela nohoi ke awa, he kulana maikai a holomua loa ke hoohanaia nei e ko Honolulu nei mau mea paahana, a he mea makehewa i ke Aupuni maku ke nana aku i kahi e i mau kokua hou no keia hana.
__________
Ua laweia mai e kekahi o na lima paahana o loko o ka Hale Leta o Honolulu, nei ma ka la "Sabati" aku nei, he heluna lehulehu loa o na hu'ahu'a kai, mai ka aekai ma ka huli ma Ewa nei mai o Waianae mai. Ua olelo ae kekahi poe kamaaina ia ano limu kupaianaha, he mau hu'ahu'a kai ia i pae olulo ae ma ia mau aekai.
___________
He pane pili hoomana ka ka Bihopa o ka Ekalesia "Anegalikana o Honolulu" nei (Ekalesia Enelani) i ikeia maloko o kana wahi buke nupepa o keia mahina nei, e kue ana i ka manaoio ana o na "Moremona" he mea kino moteria ke Akua. Ua loheia mai hoi, e paneia ana keia manao e kekahi o na alakai oia aoao hoomana ma Hawii nei.
___________
Ua hoopii ae nei o Kailikea, he wahine ihepa a noonoo maikai ole, ia Keoni Hapa ame Kapali, e hoopau i kekahi palapala kuai aina i hanaia e Kailikea a ia Keoni Hapa, no kekahi apana aina ma Moanalua, ma ke ano he palapala epa ia. O ka waiwai io o ua aina la he $1000 ia, aka, ma ka palapala kui he $101 wale no. O Samuel Keka, ka mea i lawe mai i keai hoopii ma ka aoao o Kailikea.
______________________________________________
NA EKALESIA.
__________
Ka Ahahui Kula Sabati o Maui, Molokai amd Lanai.
_________
E halawai ana keia Aha maloko o ka Luakini Kaahumanu, ma Wailuku, ma ka Poalima hope o ka la 28 o Okatoba 1898, ma ka hora 10 a. m. Nolaila, ke kauohaia nei na lala apau o keia Aha e akoakoa ae ma ka manawa i oleloia.
M. P. Waiwaiole,
Kakauolelo.
Wailuku, Oct. 11, 1898.
_________________
Hoike Kula Sabati o Kalihi ame Moanalua.
__________
Ua malamaia ka hoike o na Kula Sabati huiia o Kalihi ame Moanalua maloko o ka luakini. "Hau o Helemona" ma ka la 9 o keia mahina iho nei. O J. K. Malao Jr. ke Kahu Kula Sabati; S. Paaluhi ka Hope Kahu Kula Sabati; Sol. K. Kekino, Kakauolelo; S. Paawela, ka Puuku; Isaac Sherwood, ke alakai himeni; a o J. Kaaiohelo, he hoa kuka. Ua hoomaka na hana ma ka hora 10 o ke kakahiaka.
Na ke Kula Sabati o Kapalama i hoomaka mua i na hana, e alakaiia ana e W. Kaahi ame ke Kakauolelo. He eono wale no haumana o keia papa. Pau kaia papa, o ka papa Kula Sabati mai o Puuhale, malalo o ke alakai ana a Mr. Isaac H. Sherwood. Maikai na himeni a keia papa. He eha (4) wale no wahi haumana o keia kula. Alaila, o ka papa Kula Sabati mai Makiki mai, malalo o ke alakai ana a Mrs. Kaaialii Nawaa. He elua papa - he poe pokii, a he poe makua. He elua no pokii, a he 7 na makua; huina he 9. Mahaloia no ka lakou mau hana.
Ua ku mai ka Apana II o Kalihi-waena. O na haumana, oia na luna nui o ke Kula Sabati ame na kaikamahine o Kamahameha. Alaila, ku mai ka papa Kula Sabati o Moanalua mallo o ke alakai ana a Mrs. Julia Bowers. Maikai ka lakou mau himeni.
Ma hope iho, hoike mai ke Kakauolelo, he 75 ka nui o na haumana mai kela a mai keia apana mai. O na loaa ma ka lulu ana, he $6.10.
_______________________
Hoike Hui o na Kula Sabati o Waioli, Kauai.
________
Mamuli o ka lokomaikai o Mr. Sam'l Kanewanui, Kakauolelo o ke Kula Sabati o Waioli, Kauai, ua loaa mai la ia makou ka moolelo o ka hoike hui o na ula Sabati oia Ekalesia i malamaia ai ma ka la 25 o Sepatemaba aku nei, a ke hoolaha aku nei makou i na mea waiwai nui o ha hana a ia mau kula:
O ke Kahu Kula Sabati Nui, oia o W. B. Huddy, a o ke Kaukauolelo, oia o Samuel Kanewanui.
Ua malamaia na hana maloko o ka luakini o Waioli, e hoomaka ana ma ka hora 10 ame 50 minute, a ma kapule a ke Kahu Kula Sabati.
O ka nui o na haumana i akoakoa mai, he 55, na kumu 4. O ka nui o ka poe makaikai he 15, ua like me 74 poe i ohohia i ka pono o Iesu.
Eia na Kula Sabati i akoakoa ae:
1. "Ka Lei Momi o ke Au Hou," mai Wanini a mai Kalihikai mai, he 15 haumana ame 1 kumu; ka lakou lulu he 80 keneta.
2. Kula Sabati "Ka Wai Aniani o ke Ola Hou," no ka Poli Lauae o Makana ma Haena, he 9 haumana, 1 kumu; ka lakou lulu he 50 keneta.
3. Kula Sabati o Salema o ka wai uina o Namalokama, ma Waioli, he 23 haumana, 1 kumu; lulu Kula Sabati, $1.90.
4. Kula Sabati "Ka lau Oliva," no ka makani Lupua Pahele Hala o Naue ma Wainiha, 4 haumana, 1 kumu; lulu he 25 keneta. O ka na makaikai lulu he 55 keneta. Huina loaa $4.00.
Mahope iho o ka pau ana o na hana hoike a kela ame keia papa Kula Sabati, ua haawi ke Kahu Kula Sabati he manao paipai o hoolana i na Kula Sabati, me ka hoolaha ana mai i na haawina e hoopaaia ai e kela ame keia kula no ka hoike hapaha ma ka malama o Dekemaba ae nei, a peia hoi na himeni.
Ua paipai nohoi o Rev. J. M. Lydgate imua o na Kula Sabati, e haawi ana i kona mahalo no ka hoomanawanui o na haumana ame na kumu i na hana a ka Haku. He wahi paina ma ka hora 12. A ma ka hora 1:30 p. m. hoomaka hou na hana. Kohoia he elele no ka Ahahui Kula Sabati o ka Mokupuni o Kauai, e noho ana ma Waimea, Kauai. Kohoia o J. K. Lota. Hoike ke kakauolelo i na loaa Kula Sabati he $18.55, na lilo $8.05, koena he $10.50. Pela no ka hoike a ka Puuku. Hookuuia na hana.
_________________
(Ke lana nei ko makou manao e hoomahuahua loa ia aku ana ka holomua o keia mau Kula Sabati ma keia mua aku. Mahalo i ke kaukauolelo i ka hoouna ana mai i ka heluna o na haumana me na kumu, me ka huina o na lulu dala. Makemake makou ia na mea ano nui o keia ano. Aole i na olelo kookuanui wale. L. H.)
___________________________
HE MANAWA KUPILIKII.
___________
Ma ka wa Hoouka Kaua ma Santiago Ma'i a Ola aha, he Po a he Ao Nee Awiwi.
___________
O ka poe Lawe Ukana apau ma ka wa i hooukaia ai ke Kaua ma Santiago de Cuba, he poe Olali wale no lakou apau. O ka lakou mau hooikaika ana apau e hoea na lako kaua ame ka ai ma ke kahua kaua, he mau hana koa loa ia.
Penei ka P. E. Butler, o ke Kaa Ukana Helu 3, i kakau mai ai mai Santiago de Cuba mai, ma ka la 23 o Iulai, i kakau mai ai: "Ua loaa makou apau i ka hi, ma ke ano ikaika a ikaika ole nohoi, a ma ko makou wa i pae mai ai, aole o makou manawa e ike aku ai i kekahi kauka, oiai e pupuahulu ana makou i ka nee ana, a e nee ana makou me ka awiwi i ka po ame ke ao, no ka hoolawa ana'ku i na koa me na lako kaua ame ka ai, aka, e hoomaikaiia ka LAAU OLA A KAMALENA no ke NAHU, ke KOLERA
ame ka HI, i ole ia, ua hiki ia makou ke hana a malama i ko makou mau ola; o ka mea oiaio, ma ko'u manaoio maoli, i kekahi wa i pilikia loa ai makou, o keia ka laau nana i hoopakele i ko makou pualikoa, nokamea, ina i hiki ole i ka poe lawe ukana ke hana, ina ua loaa ole ka poe na lakou e lawe aku i na lako kaua ame na lako ai i ke kahua kaua. Aohe mau alanui e hiki ai i ke kaa ke hele. Ua laki au ame ko'u mau hoa i ko makou hoolako mua ana ia makou iho ma keia laau mamua o ko makou haalele ana'ku ia Tampa, a ua ike au, iloko o eha ma'i e ai ana i keia laau, e palekana ana no ke ola."
Ua kakauia mai ka palapala maluna ae i na poe lakou, i hana i keia laau, oia ke Chamberlain Medicine Co., Des Moines, Iowa. E kuaiia ana e na poe kuai laau lapaau apau. O Benson, Smith & Co., na Agena Kuai Kukaa no ko Hawaii Pae Aina.
__________________
Ma kela Poaono aku nei, a ma ka la Sabati mai nohoi, i make ai he elua mau koa Amerika maloko o ka Halemai Koa Amerika mawaho ae nei o Kulaokahua. Ua ialoa ia ke kino make o Charles H. Thompson, ke koa i make ai ma ka Poaono, a e waiho ia ana ia kino ma kekahi "lua pao" mauka ae nei o ka Ilina Kupapau o Nuuanu, o hoouna loa ia aku i Utica, ma ka mokuaina o Nu Ioka. O kona kokoolua, e waiho loa iho ana na iwi i Hawaii nei.
__________________________________________
Hoolaha @ Moraki.
________________________________
HOOLAHA MANAO HOOKO MORAKI
A KUAI AKU A KA MEA PAA MORAKI.
___________
I kulike ai me ka mana kuai ame kekahi mau olelo a mau kumu aelike e ae i paa maloko o kekahi palapala moraki i hanaia Augate 1, A. D. 1895, mai a Dick Chew mai o Kapaa, Kauai, ia Kealia Store, ma o George H. Fairchild la o Kealia, Kauai, oia hoi ka Makee Sugar Company, he hui i hoohuiia a e lawelawe hana ana malalo o na kanawai o ko Hawaii Pae Aina, a ua kopeia ua moraki la maloko o ke Keena Kope Palapala ma Honolulu, Mokupuni o Oahu, maloko o ka Buke 180, ma na aoao 485 a hoea ia ka 487.
Ke hoolahaia aku nei ma keia, ke makemake nei hoi ka mea paa moraki (Mortgagee) malalo o ua moraki la, e hooko aku i ua moraki la, no ka uhaki ia ana o na kumu, oia hoi: ka uku ole ia ana o ka ukupanee ame ke kumupaa ma ka wa e hookaa ai.
Ke hoolahaia aku nei nohoi ma keia, e kuaiia aku ana na aina apau, na pono ame na mea apau maluna iho a e pili ana ia lakou; ame na waiwai apau i paa a i hoakakaia maloko o ua moraki nei, a i hoikeia nohoi mahope ae nei, ma ke kuai kudala akea ma ka Hale Hookolokolo ma Kapaa, Kauai, ma ka Poaono, ka la 5 o Novemaba, A. D. 1898, ma ka hora 12 o ke awakea o ua la 'la.
No na mea i koe e ninau ia Kinney & Ballou, na loio o ka mea nona ka inoa malalo iho nei.
Hanaia Honolulu, K. P. A., Okatoba 7, 1898.
THE KEALIA STORE,
Na George H. Fairchild o Kealia, Kauai, The Makee Sugar Company.
HOAKAKA O KA WAIWAI E KUAI IA AKU ANA.
O kela aina apau ma Kapaa, Kauai, malalo o ka hoolimalima ma ka la mua o Augate, A. D. 1898, ia Tuck Chew Company, me ka wili raiki, ame na mikini ame na mea paahana i pili i ua wili raiki nei, ame na hale apau mamua iho o ua aina 'la i hoolimalimamaia aku, elike me ia i hoikeia ae nei, mai ka Makee Sugar Company mai, oia ka aina apau i paa ma kekahi hoolimalima i hanaia ma ka la mua o Iulai, A. D. 1894, mawaena o ka Makee Sugar Company, Kealia, kauai, ma o kona Luna Nui la, o William Blaisdell, ame ka Tuck Chew Company o Kealia, Kauai, ma o kona Luna Nui la, Tuck Chew, a penei i hoikeia ai na palena maloko o ua palapala hoolimalima la:
Kela apana aina apau e waiho la ma Kealia, Kauai, maloko o laila aneane Kanaono-kumamalua (62) Eka, oi aku a emi mai paha, a i ikeia hoi, ka Aina Naku o Kapaa (Kapaa Swamp); 28 eka aina o ua kuleana hoolimalima la., i ikeia Mahele I, a he 34 eka o loko o laila i ikeia he Mahele II.
2724-4t
______________________________
HOOLAHA NO KA HOOKO ANA I KA MORAKI.
________________
Ke hoolahaia aku nei ma keia, i kulike ai me kekahi mana kuai maloko o kekahi palapala moraki i hanaia, Iune 26, 1894, e Joseph Nawahi ame Emma A. Nawahi, kana wahine, no Honolulu, ma ka Mokupuni o Oahu, ia H. A. Widemann oia wahi hookahi no, kakau kope ia ma ka Buke 147, ma ka aoao 350 a pela aku, a i hooliloia mai hoi e H. A. Widemann i oleloia ia Louisa Ahrens, ma ka la 30 o Okatoba, 1894, a oia ka ona o ka nota aie ame ua moraki la, a no ka uhakiia ana o na kumu maloko o ua palapala moraki la, oia hoi, ka uku ole ia ana o ke kumupaa ame ka ukupanee i hoopaaia malaila, nolaila, mahope iho o ka manawa i kaupalenaia, e kuai kudala akea ia aku na aina apau, na pono ame na mea apau maluna iho a i pili i ua poe aina la, i hoikeia maloko o ua palapala moraki la, no ka uhakiia ana o na kumu i hoikeia ae nei maluna.
A ke hoolaha hou ia aku nei ma keia, ma ka Poakahi, la 14 o Novemaba, 1898, ma ka hora 12 o ua la 'la, ma ke Keena Kuai o Jas. F. Morgan, Luna Kudala, ma Honolulu, ma ka Mokupuni o Oahu, e kuai kudala ia aku ai na waiwai apau loa i hoikeia a i hoakaka ia maloko o ua moraki la, no ka uhaki ia ana o na kumu i paa maloko o ua moraki la.
Hanaia Honolulu, Okatoba, 1898.
LOUISA AHRENS,
Ka mea i hooliloia mai ai o ka Moraki e H. A. Widemann, ka mea moraki mai (Mortgagee).
O ka waiwai paa i hoikeia a i hoakakaia maloko o ua palapala moraki la, penei no ia:
1. O kela aina apau e waiho la ma Kalapana, Puna, Mokupuni o Hawaii, maloko o laila he Ili o 158.95 Eka, a i hoakakaia na palena maloko o na Palapala Sila Nui Helu 875 ame 1942 ia Kekua.
2. O kela aina apau e waiho la ma Kaunaloa, Puna, Mokupuni o Hawaii, maloko o laia he 296 Eka, a i hoikeia na palena maloko o na Palapala Sila Nui 2165 ame 2807.
3. O kela aina apau e waiho la maloko o ke taona o Hilo, Mokupuni o Hawaii i oleloia; a oia nohoi ka aina i hooliloia mai ia Joseph Nawahi e BenJamin Pitman ma ka palapala kuai i kopeia ma ka Buke 33, ma ka aoao 67, a maloko a laila he 2 Eka, oi aku a emi mai paha.
O na aina e waiho nei ma Puna, ua kaulana ma ke ano he poe aina kope maikai. O ka aina ma Hilo, oia no kahi noho hope loa iho nei o ka mea moraki mai (Mortgagee) ame kona ohana.
No ma mea i koe e ninau ia CECIL BROWN, Loio o ka Waihona (Assignee) o ka Moraki.
2724-5t
___________________________________________
Hela ame Keia.
___________________________________________
HOOLAHA.
____________
Ke hoolahaia aku nei, ua hookohuia o Ed. Hoffmann i Agena no ka ohi ana @ na uku hoolimalima o ko'u mau aina ponoi iloko o ka Ahupuaa o Wailuku.
O na rikiki hookaa uku hoolimalima mai a mahope iho o keia la aohe mana @e ole i kakauia ka inoa o Ed. Hoffmann i oleloia.
CLAUS SPRECKELS.
Ma o kona Agena Wm. G. Irwin & Co., Kaupalenaia.
2725-3t
_____________________________________________
HOOLAHA I KA POE AIE.
_________
Oiai, ua hookohuia mai ka mea nona ka inoa malalo iho nei e ka Mea Hanohano A. Perry, Lunakanawai Mua o ka Aha Kaapuni o ka Apana Hookolokolo Ehaki, i lunahooko no ka palapala kauoha a Nahinelua Keliipio (w) o Honolulu, Mokpuni o Oahu, i make ma keia ke haawiia aku nei ka lohe i ka poe apau ia aieia aku ai e Nahinelua Keliipio (w) i oleloia, e waiho mai i ka lakou mau koi i hooiaio pono ia ame na palapala hooia kupono, ina a loaa ana, ina paha ua hoopaaia ua poe koi la ma ka moraki, aole paha, i ka mea nona ka inoa malalo iho nei ma kona wahi hana, ma ka Makeke Kuai I'a, ma Alanui Alakea, ma Honolulu i oleloia, iloko o eono mahina mai ka la aku i puka mua ai keia hoolaha, a i ole ia, e hoole mau loa ia aku no lakou.
L. D. KELIIPIO,
Lunahooko o ka Palapala Kauoha a Nahinelua Keliipio.
Honolulu, Okatoba 19, 1898.
2725-5t
_______________________________________________
HOOLAHA.
_____________
Ma keia, ke hoolahaia aku nei, ua hookohuia na keonimana Enoch Johnson a me Patrice Silva e lawelawe i ko'u mau hana, a i ole, na hana o ka Hui o W. C. Achi & Co., oiai au e kaawale ana mai Ko Hawaii Pae Aina aku. W. C. ACHI.
Oct. 12, 1898.
2724-1m
___________________________________________
OLELO HOOLAHA NO KA MAKEMAKE E LAWE AINA.
______________
I ka poe apau e nana mai ana i keia: E hoomaopopoia, ke makemake nei ka Hui Alahao a Aina o Oahu, mamuli o ka mana i haawiia a hoonohonoho ia iloko ona e kona Palapala Hoohui, e ke Kanawai i aponoia ma ka la 11 o Sepatemaba, A. D. 1888, i kapaia "He Kanawai e hoomana ana a e hoohoihoi ana i ke kukulu ana i na Alanui Kaa Mahu ma ka Mokupuni o Oahu," ame na mana e ae i loaa iaia ma keia ano, e lawe a e hoonaha aku no ka pono o ke Alanui Hao i hoomanaia ai ia e kukulu aku, a no ka pono hoi o na hana e pili ana ia oihana, i na apana aina i hoakakaia penei:
E hoomaka ana ma kahi i komo aku ai ka laina waena i hoomoeia o ke Alanui Hao o Oahu, ame ka palena komohana o ke Kuleana (Grant) 232 ma ka Apana o Waialua; alaila, holo aku ma ka laina waena e holo hikina ana 1320 kapuai maloko aku o ke Kuleana (Grant) 232 ia Naaihelu, e kuleanaia nei e Henry Waterhouse; 675 kapuai maloko aku o ke Kuleana (Grant) 246 i koi kuleana ia e Pea, Kahau, Kanewahine ame Henry Waterhouse; 8075 kapuai maloko aku 'o ke kuleana (Grant) 244 ia Pukai, o ke Kuleana (Grant) 232, Apana 1, Kuleana 228 ia Opunui, Kuleana (Grant) 243 ia Kila ame Hoonapuni.Kuleana (Grant) 458 ia W. H. Rice, Kuleana (Grant) 353 ia Nahoa ame kekahi poe e ae ame Kuleana (Grant) 338 ia Hikiau ame Kana, a maloko aku o ke Kuleana (Grant ) 339 ia Huaailani ame kekahi poe e ae, i kuleanaia e Henry Waterhouse; 708 kapuai maloko aku o ke Kuleana (Grant) 333 ia Manana ame Mekulu i kuleanaia e Keawe, Kaiona ame Kaiaiulaula; 600 kapuai maloko aku o ke kuleana (Grant) 343 ia Kaluaohaena ame kekahi poe e ae, i kuleanaia e Kaiona, Napuakau, Maile ame Kaaemoku; 680 kapuai maloko aku o ke Kuleana (Grant) 279 ia Mahiahume ame kekahi poe e ae, i koi kuleanaia e W. R. Castle, Mokuhia, Kekuanoni, Nakeawalu ame Henry Waterhouse; 440 kapuai maloko aku o ke Kuleana (Grant) 260 ia Kaakau ame ke Kuleana (Grant) 259 ia Haule i kuleanaia e W. R Castle ame Henry Waterhouse; 220 kapuai maloko aku o ke Kuleana (Grant) 258 ia Kane, i kuleanaia e W. R. Castle; 6335 kapuai maloko aku o na Kuleana (Grants) 240, 456, 459, 457, 241, 457 me 270 i kuleanaia e Henry Waterhouse; 700 kapuai maloko aku o ke Kuleana (Grant) 1123 ia Poli ame kekahi poe e ae i kuleanaia e Kaaemoku ame Henry Waterhouse; 3650 kapuai maloko aku o na Kuleana (Grants) 231, 230, 233, 342 ame 273, i kuleanaia e Henry Waterhouse; 7940 kapuai maloko aku o na Kuleana (Grants) 340, 242, 502, 201, 341 ame 239, i kuleanaia e Joseph P. Mendonca a i hoolimalimaia aku ni na Kahu Waiwai o ka Waiwai o James Gay; 1380 kapuai maloko aku o ma Kuleana (Grants) 276 ame 281 i kuleanaia e Hilahila, i hoolimalimaia aku e Robert Halstead; 685 kapuai maloko aku o ke Kuleana (Grant) 268 ia Kaoo, ia kuleanaia e Robert Halstead; 685 kapuai maloko aku o ke Kuleana (Grant) 267 i kuleanaia e Robert Halstead; 685 kapuai maloko aku o ke Kuleana (Grant) 235 ia Kuemanu i hoolimalimaia aku ia Robert Halstead; 685 kapuai maloko aku o ke Kuleana (Grant) 272 ia Kepahu i kuleanaia e D. Kawananakoa ame J. Kalanianaole i hoolimalimaia aku ia Robert Halstead; 685 kapuai maloko aku o ke Kuleana (Grant) 264 i kuleanaia e Robert Halstead; 685 kapuai maloko aku o ke Kuleana (Grant) 263 ia Ile, i kuleana hapa ia e Robert Halstead; 80 kapuai maloko aku o ke Kuleana (Grant) 262 ia Kapahu, i kuleanaia e Robert Halstead ame Kahanawali; ma ka hikina akau aku 990 kapuai maloko aku o ke Kuleana (Grant) 647 ia J. H. Smith, i kuleanaia e Helela, i hoolimalimaia aku ia Edgar ame Frank Halstead; 240 kapuai maloko aku o ke Kuleana (Grant) 1976 ia Haalilio, Apana 3; 26,200 kapuai maloko aku o ke Kuleana Alodio 7713, Apana 34, ame Apana 33 e paaia nei e na Kahu Waiwai malalo o ka Palapala Kauoha a Bernice Pauahi Bishop, Apana 34, Paaiaa i hoolimalimaia aku ia Amara ame kekahi poe e ae, ame Apana 33, Kawailoa, i hoolimalimaia aku ia M. P. Robinson ame B. F. Dillingham; maloko aku o ke Kuleana 8349, Ap. 2 ia Koha; maloko aku o ke Kuleana Alodio 2903 Ap. 3 ia Kaula; maloko o ke Kuleana Alodio 9917 ia lohe, i kuleanaia e Amara; ma ka hikina akau aku 2000 kapuai maloko aku o Waimea, e kuleanaia nei e James Campbell, Mrs. Julia A. Paty ame kekahi poe e ae, i hoolimalimaia aku i ka Hui Alanui Hao me Aina o Oahu; maloko aku o ke Kuleana (Grant) 33, Ap. 1, i ka Papa Hoonaauao; 21,000 kapuai maloko aku o Pupukea, Paumalu ame Waialua e kuleanaia nei e ke Aupuni Hawaii i hoolimalimaia ia ka Hui Alanui Hao me Aina o Oahu; maloko aku o Pupukea, Kaunala, Pahipahialua, Opana, Kawela, Punalau, Kahuku ame Keana e kuleanaia nei e Jas. Campbell a i hoolimalimaia aku i ka Hui Alahao a Aina Oahu; Kuleana Alodio 4369 ia Kaahamoa, i kuleanaia e Kulia Apana; Kuleana Alodio 3776 Ap. 1 ia Opuni, i kuleana ia e Maria Kahai; Kuleana Alodio 4381 Apana 1 ia Kalaiku, i kuleana ia e Louiki Apaa, -- Kuleana Alodio 3777, Apana 1 ia Apaa; kuleanaia e Louiki Apaa; Kuleana Alodio 3950 ia Naonohiuli, i kuleanaia e Louiki Apaa; Kuleana Alodio 3808 Laipo, i kuleana ia hoi e Kulia Apana, Kuleana 2756 Ap. 2 ia Kahuaka; Kuleana 2721 ia Pahua; Kuleana 2728 ia Poonui; Kuleana 2179 ia Kelukui; Kuleana 2821 Ap. 2 ia Kanaoihuiia; Kuleana 27666 Ap. 2 Naloloa i kuleanaia e Kinokii, e komo pu ana he laula o 40 kapuai, 20 kapuai ma kela ame keia aoao o ke kaha waena, ame na akea hou aku hoi e pono ai ka hana ana o ua Alanui Hao la.
OAHU RAILWAY AND LAND COMPANY.
Ma o S. C. Allen ia, kona Peresidena. Ame W. G. Ashley, kona kakauolelo.
Honolulu, Okatoba 4, 1898.
2724-4t
______________________________________________________
OLELO HOOLAHA.
__________
O kela ame keia mea e ikeia ana e komohewa ana maluna o keia mau aina ma Lahaina, Launiupoko, Keaalii, Hahakea, Wahikuli, Hanakaoo, a maluna paha o kekahi aina malalo o ka mana o ka PIONEER MILL CO., LAHAINA, MAUI, me ka palapala ae ole a ka Luna Nui (Manager) e hoopiiia no ma ke kanawai.
PIONEER MILL CO.
Lahaina, Maui, Sept. 24, 1898.
2722 -4t
______________________________________________________
Hoolaha Mana Hook@@
___________________
ILOKO O KA AHA KAAPUNI APANA
Hookolokolo Elua o ka Hawaii Pae Aina. Ma ka Hooponopono Waiwai.
Ma Ka hana o ka waiwai o S. D. Kapono o Keoneoio, Honuaula, Maui,
ka mea i make kauoha ole.
No ka mea, ua waihoia mai e J. D. Keamo he palapala noi no ka hookohu Lunahooponopono Waiwai, no ka waiwai i oleloia, a e hoopukaia aku ia palapala iaia.
Nolaila, ma keia, ke hoolahaia aku nei i ka poe apau i kuleana ma ua waiwai la i ka Poaha, la 10 o Novemaba, 1898, ma ka Hale Hookolokolo o Wailuku, Maui, hora 10 o ke kakahiaka, oia kahi a me ka manawa e hele mai ai lakou, a e hoike mai i na kumu, ina he kumu ka lakou e ae ole ia ai ke noi.
Wailuku, Oct. 5, 1898.
Na ka Aha:
A. F. TAVARES,
2724-3t Kakauolelo.
___________________________________________
(Note: This Ad with picture at bottom of 2 right columns.)
Vapo-Cresolene
MAMULI o ka haawiia ana o ka laau CRESOLENE
ma ka hanu ana oia ke keehina hana palekana loa no ka lawelawe
ana i na Ohe Makani o ka puu. He ka nahao launa ole ka holo pono
o kana hoola ana i ke Aunu-Kalea ame ke Kunu @@. He laau maikai
loa ia no ke pale ana aku i na ma'i lele, a peia aku. E loaa no na buke
hoakaka me ke kumukuai ole, i huipu me na palapala hoomaikai.
Kuaiia e na poe kuai laau a pau.
HOLLISTER DRUG CO.,
Honolulu, H. I., Agents.
___________