Ka Nupepa Kuokoa, Volume XXXVII, Number 41, 14 October 1898 — Page 1
| This text was transcribed by: | Mele-aina Dancil |
| This work is dedicated to: | Ka Ohana Dancil/Gouveia |
Ka Nupepa Kuokoa
KE KILOHANA POOKELA NO KA LAHUI HAWAII.
Buke XXXVIL HELU 41 HONOLULU, POALIMA, OKATOBA 14, 1898. NA HELU APAU 724
Hoolaha Loio
W.R. KAKELA.
Loio a he Kokua ma ke Kanawai
HE LUNA HOOIAIO PALAPALA.
2370
LYLE A. DICKEY.
Loio a he Kokua ma ke Kanawai.
Notari n ka Lehulehu.
Kihi o Alanui Betela me Moi. Pahu Leta 286
Iloko o ke Keena o ka Loio Kuhina mamua, a he Loio Hoopii ma ka Aha Apana o Honolulu.
E hookoia na hana pili kanawai apau mai na Mokupuni mai.
O A. F. Tavares, Kakauolelo, Maheleolelo a Notere no ka Lehulehu. 1yr.
Hoolaha Kumau.
Papa! Papa!
Aia ma kahi o
LEWERS AND COOKE
(LUI MA.)
Ma ke Kahua Hema o na Alanui
Papu me Moi.
E LOAA NO NA
-Papa Nouaiki
-kela a me keia ano.
Na Pani Puka…. ____
Na Puka Aniani… ____
Na Olepelepe……. ____
Na Pou………….. ____
____ Na O ʻ a………...
____ Na Papa Hele….
____ Na Papa Ku…….
____ Na Papa Moe…
Na Pili Hale O na Ano apau.
A me na
Wai Hoohinuhinu Nani
O Na Ano Apau.
Na Palaki o na Ano he Nei Wale.
Ke haiia aku nei oukou e na makamaka a pau, ua makaukau keia mau makamaka o oukou e hoolawa aku ma na poe a pau e pili ana ma ka laua Oihana no ka
Uku Haahaa Loa
E like me ka mea e holo ana mawaena o Laua a me ka Mea Kuai.
E Hele Mai e Wae no Oukou Ike.
I Honolulu iho nei o Hon. S. Kaai o na Kona i keia wa, a ma ka Poalua nei no kona au hou ana aku i ke kai no kona home kamaaina a oiwi ma Hookena.
______
ma ke ku ana mai a ka mokuahi Daric i Honolulu nei ma ka Poakahi @, Okatoba 11, mai ke komohana mai, i hoea mai ai kekahi poe Kahuna Katolika Roma i Honolulu nei he ewalu paha ko lakou nui, a ua haalele aku lakou ia Manila, a e holo ana lakou i Barezila, Amerika Hema; e paahana hou ai.
KA MEA HUNA POHIHIHI
______
Unuhiia e Hooulumahiehie no "Ke Kilohaua Pookela o ka Lahui Hawaii"
______
Me he mea la, ua loohia hou ia ko ka Lede Beatirisia puuwai i kekahi ehieha nui, mamuli o kona lohe hou ana mai ka Haku Opio Rosevena aku a nalowale hou kana kaikamahine mai kahi ana i manao loa ai oia kona wahi e ike a ehuipu ai me ia; aole hoi oia wale no, aka, o kana wahi keiki uuku kekaahi Jose, ua ano e loa ae la kona helehelena, a me ka leo pihoihoi pane mai la ia imua o ka Haku Opio Rosevena:
"E hai mai oe ia 'u i na mea apau," me ka lalau hou ana mai i ka lima o Rosevena, a hoomau mai la nohoi i ka olelo ana: "E hoike mai oe ia'u i ka mea oiaio, i na no he ino kekahi i oi aku i ko na ino apau e hiki ole ai ia'u ke hoomanawanui e hai mai n oe ia'u."
Ma ia wa ua hoike aku la nohoi o Rosevena imua o ua Lede Beatiristia nei:
"Ua manaoio loa au, ua ahaiia o Alamira ame Jose mai Daletona mai a hoea i kekahi wahi kokoke i Penoka. A ua moopopo loa nohoi o ko laua wahi ia e loaa aku ai ia'u. Aole o'u kanalua ia mea. O ka'u wale no e nonoi aku nei ia oe, e haawi mai oe i kau paulele ana maluna o'u, a pela auanei e hoomamaia ae ai kou mau noonoo kaumaha. Ma ko'u manaoio loa, aole e loihi loa mai keia wa aku, a hoea mai no ka manawa e puili ai oe i kau mau keiki aloha."
Mamuli o keia mau olelo hoolana a ka Haku Rosevena i pane mai ai imua o ua Lede Beatirisia nei, ua hoonana hou ia ae la kona puuwai a kaalo aku la na noonoo poluluhi apau o ke kaumaha mai loko aku o kona houpo, a ma ia wa hoi pane aku la ia imua o ka haku opio me ka leo aloha:
"E kuu keiki, in a e loaa ia oe o Alamira ame kona wahi pokii kaikuanane, alaila, e mare koke no oe me Alamira. Ua maopopo loa, i keia wa, aole hiki ia'u ame kona makakane ke kiai hou n kona palekana; nolaila, o kou mare ana me ia, e kuu keiki, oia auanei kou mea e lilo ai i puuhonua nona e maha ai, oiai, e kuu keiki, ua ike no oe, o ko'u kulana e noho nei i kela wa me ko lakou makuakane, aole ia he kulana e hiki ai ia'u ke ku aku imua o ka Aha Hookolokolo no ke koi ana aku i na hoomalu ana mai a ke Kanawai maluna o Alamira mai na hoopilikia ana mai hoi a ka Haku Adelo. Hookahi wale no mea hoopauia ae ai o keia kumu hoonawaliwali ia'u, oia ka hoea ana mai o ka la ehiki ai ke hooiaioia imua o ke akea, ua hala ole ka luaui makuakane o Alamira ma, no ka hewa i hookauhiiia aku maluna on a. Nolaila, e kuu keiki, e hele oe a e hoopakele mai oe ia'u mau lei aloha."
Ua hoike mai la hoi o Rosevena i kona hauoli ame kana mau mahalo ana imua o ka Lede Bearirisia no kona ae ana'ku e mare oia ia Alamira.
ma keia wa hoi, ua hoea aku la lakou no Penoke, a lele iho la lakou ilalo.
Hoea aku lakou nei e ku mai ana ke kaa o ka Lede Beatirisia, a ike aku la o Rosevena ia Megi Fleck. Huli mai la ua U'i hoopahaohap nei o Hametona Kakela a pane mai la imua o ka Haku Opio Rosevena:
"E kuu keiki, e hele oe ma ke alahele e halawai aku ai oe me a'u mau lei aloha, o ke aloha auanei o ke Akua ka mea nana e kokua ia oe. Ke loaalaua ia oe e hoihoi mai oe, e kuu keiki, ma Penoke nei. Nolaila, e aloha auanei."
Ahuli ae la ua Lede Beatirisia nei a kau aku la iluna o ke kaa, a kau pu aku la nohoi ka wahine lawelawe i holo pu aku ai me ka Lede Beairisia.
Ma ka wa i ku hookahi iho ai ka Haku Opio Rosevena, ua noonoo wale iho la no ia iloko on a, a kamailio wale iho la no oia iaia iho:
"Malia paha, ua hupo loa ia au, no kuu manaoio wale ana i na olelo maopopo ole a kekahi poe kanaka kuaaina, ua ike lakou i ka Haku Adelo e huli hoi ae ana mai keia wahi ae. Malia paha, aia kai i hunaia ai o Alamira ma kahi kokoke aku no i Daletona, a i ole ia, ma kekahi wahi okoa loa aku no paha; a o ka hoolahaia ana ae o kela inoa o Penoke, he mea ia e alakai hewa ia ai ka noonoo oke kanaka, elike me a'u nei ke ano; a i ole ia,
(see original for picture)
Lunakanawai E.G. Hikikoki o Hawaii i make.
He Keiki Oiaio no Hawaii.
mamuli hoi o ka lokomaikai o na lani, ua haawiia mai la ia'u keia wahi inoa o Penoke i loaa ai ko'u alakai pololei no ke alahele e hoea aku ai au i kahi i hoopaahaoia ai o ka'u mea i aloha ai."
Hoomau aku la ia i kana hele ana ma ke alanui.
Oiai ia e hele ana, aia hoi, lohe ae la ia i ka nunuio o kekahi poe leo e noke ana i ke kamailio maloko o kekahi wahi hale inu rama, a ma kana hoolohe ana'ku he mau leo kekahi e noke ana i ka hoopaapaa.
Nolaila, ua ku iho la ia a kiei aku la ia iloko o ua wahi hale inu rama nei. Ike aku la keia he ekolu a eha paha poe kanaka e ku ana ma kahi inu rama, e inu ana a e kamailio ana no hoi.
Hookahi hoi o keia poe kanaka a ua Haku Opio Rosevena nei i ike aku ai, he kanaka ia i kamaaina iaia, a oia hoi o Bite o kahi hale i hoo[aa mua ia ai o Alamira e Haku Adelo, ma ka lad kahakai e kokoke ana i kona (Rosevena) wahi noho ma Maka-o-ka-Aeto.
Ia wa ana i ike aku ai i ua wahi kanaka nei, ua lele koke ae la ka hauoli iloko on a ma kona hoomaopopo ana iho ua alakai pololei loa ia mai ia e ka uila laki o ka manawa, a ke hookokoke aku nei oia i kahi i hoopaa pio ia ai o kana mea i aloha ai.
______
MOKUNA XLV
______
Ka Haku Rosevena ma ka Hoopakele.
Ma keia ike ana'ku a ua Haku Opio nei ia Bite, ka me hoi au, e kuu makamaka heluhelu, e hoomanao iho ai, oia no ke kane a Mrs. Bite e kiai la ia Alamira ma, ua hooholo koke iho la ua Haku Opio nei, ua hoea mai o Bite i kahi kulanakauhale o Penoke, n kekahi hana i makemakeia e Adelo, a nolaila, wahi ana i noonoo iho ai, in a ia e kali ana a hiki i ka wa a kahi Bite e hoi ai i kona hale, oia kona wa e hahai aku ai iaia, a me he mea la, wahi ana i noonoo honua iho ai, oia kona wa e hoea pono aku ai i kahi i hoopaa pio ia ai o Alamira ame kona kaikunane.
Nolaila, hoopio iho la ia i ka aleuleu mua o kona papale a luhe iho la, hooku pololei ae la ia i ka a-i o kona kuka iluna, a hele holoholo ae la ia ma ke alanui, mai kahi kihi a hoea i kahi kihi, me ka hoomau ana nohoi o kana hakilo ana i ka puka o kahi hale inu rama. I kekahi wa, ua hele aku la nohoi ia a nana aku la iloko o ua wahi hale inu rama nei.
Ua hoomau aku la ua haku opio nei i keia kiai hoomanawanui ana a hiki wale i ke ahiahi ana. Ho-ala ae la hoi na kukui oloko o ka hale inu rama. Ike aku la keia i ka puka ana mai o ka mea nona ua wahi hale nei a ho-a ae la i ka ipukukui nui e ku ana ma ke alo pono iho o kona hale. A ke lohe mau aku la nohoi keia i ka nunui mai o na leo walaau maloko o ua wahi hale "wai ili-ahi" nei.
Elua hora okoa paha ke kali hoomanawanui ana a ua haku opio nei o ka puka mai o Bite, aia hoi, i ka aneane ana e pau kona hoomanawanui, ua ike aku la ia i ka puka ana mai o Bite, a hauoli ae la kona naau.
He kokoolua ko Bite i keia puka ana mai, a e kuiee ana ia me ua kokoolua nei on a. E hele ana hoi laua me he mau pipi kau-o la i kauluaia a paa i ke kua, me ka hikaka ana i o a ia nei, me ka noke ana nohoi i ke kamailio me na leo nunui.
I keia wa i hahai aku ai o Rosevena mahope o ua mau kanaka la.
I ka hoea ana aku o ua mau wahi kanaka nei ma kekahi wahi i mamao loa aku mai ka hale inu rama aku, ua ku iho la laua malaila me ka noke ana i ke kamailio, oiai hoi o Rosevena i pili ae ai ma ka paia o kekahi pa laau i maluia iho e ka punonohu o na lau ame na lala o kekahi kumu-laau.
Aole i liuliu, ua haalele mai la ke kokoolua o Bite iaia, a hele aku la ia he alanui okoa, oiai hoi kahi Bite i kuoe hikaka hele aku ai ma kekahi alanui okoa. A, aia o Rosevena ke ukali la iaia.
Hele aku la laua nei a hala mai la kauhale, waiho mai la imua o laua he kula oneanea, a ma keia kula i hoomau hoomanawanui aku ai ua haku opio nei i ka hahai ana ia Bite.
Ekolu mile i hala ia laua nei, ike aku la o Rosevena i ka pouli koliuliu ana mai a kekahi hale, a oia nohoi kahi au, e kuu makamaka heluhelu, e hoomanao iho ai, o kahi no ia i hoopaaia ai o Alamira ame kona wahi pokii kaikunane.
I ko Rosevena ike ana'ku i keia hale e ku mai ana, ua lele wale ae la no ka oili iloko on a, a manao wale iho la no ia, o kahi no ia i hoopaa maewaewaia ai o kana aloha. Oiai hoi e lilo loa ana kona mau maka i ka nana i ua hale la, lilo loa hoi kona noonoo ana ilaila, ua hoopuiwa loa ia ae la ia i kona lohe ana aku i kekahi halulu ame kekahi u ana mamua pono aku on a a i kona nana ana aku ike aku la ia i ka waiho malie ana mai o kahi pauku kino o Bite.
No laila, hele aku la keia a hoea ma kahi a ua wahi kanaka nei i hehee iho ai a haule ilalo, a kahea iho la:
"Heaha keia?"
Eia nae, aohe pane leo ae a ua wahi Bite nei, oiai ua ko'iko'i loa na umii ana a ka waiona maluna on a. Alaila, hoopekupeku aku la keia me kona kamaa ma ka aoao o ua wahi kanaka nei, a ia wa i onioni ae ai ia, me ka ninau ana mai:
"O, o, o, o-wai ke-i-a?"
"What is the matter my man?" wahi a Rosevena i ninau iho ai.
Ia wa i onioni ae ai ua wahi Bite nei a hiki i kona ala ana ae a noho iluna, me ka hi-o ana nohoi ma o a manei, e kunou a e kimo ai imua.
Ninau hou aku la nohoi o Rosevena iaia,
Nana pono mai la oia ia Rosevena, a kamailio mai la:
"He-le oe peal! No you business! You g'way!"
"E kahi hupo," wahi a Rosevena, "malia paha hoi he mea kekahi i hiki ia'u," a hoonakenake iho lk o Rosevena i ke dala iloko o kona pakeke.
"Mi no makemake iu moni! Ko we! Ko we, iu hamabaga mi. Kilau-we iu! Mi wani ko hom. Mi laiki si olo wuman. Ho! ho! olo wuman to maki huhu. No kude!"
"A ihea kou wahi e noho nei?" i ninau aku ai o Rosevena.
Pane mai la ua wahi Bite nei: "Iu si tat housi! Iu devil! Mi-mi-hsusi ova tea!" A i ka pau ana no o keia mau huaolelo i ka paneia mai e ua wahi Bite nei o kona kunewa aku la no ia i hope a waiho oni ole ana iluna o kahi no ana i haule mua iho ai.
(Aole i pau.)
______
Ke A'o Pili-olelo Beritania.
______
KA HAINA-THE VERB.
(Hoomau ana.)
He lehulehu loa na Haina Pili ole (intransitive Verbs) i lilo i mau Haina Pili mamuli o ke kau ana o kekani mau Inawaena (prpositions) mahope o lakou; a ma ia ano ua loaa ia lakou he Hope Haina (Aui Alo) e ukali ana mahope mamuli o ka ume a kauo ana a ka Inawaena i ka Haina e pili ana me ka Hope Haina. Penei:
1. The baby laughs. Ke akaaka nei ka bebe.
2. We laughed at the baby. Akaaka aku kaki i ka bebe.
Hoakaka: Ma keia mau hopunaolelo elua, e ikeia ana, o ka huaolelo "laughs" ma ka hopunaolelo mua he Haina pili ole ia; aka, ma ka hopunaolelo elua, ua lilo o "laughed" i Haina pili, mamuli o ka ume a kauo ana a ka Inawaena (preposition) "at," a pili aku ia "baby." Nolaila, ua pili pu loa ka Inawaena "at" me ka Haina "laughed," no ia kumu, ua kapaia ua Haina 'la, he Haina Hui, oiai, ua hui pu ka hana i hoikeia e ia me ka hana a ka Inawaena "at."
He mea pono no nae, ke makaala loa, aole e hoohuikau pu i keia ano Haina-pili-ole, i lilo i Haina Hui mamuli o ka ukaliia ana e ka Inawaena, me ka Haina oia ano hookahi, e ukaliia ana nohoi e ka Inawaena i okoa kona kulana ume a kauo ana i ka Haina i pili aku ai ia, i ko ka Inawaena ma ke kulana mua i hoikeia ae nei; oia hoi, ma ke kulana mua, ua pili ka ume ame ka kauo ana a ka Inawaena i ka Haina e pili aku ana i ka Hope Haina, oia ka Aui Alo; a ma ka lua, ua pili ka ume ame ke kauo ana a ka Inawaena i ka Haiinoa, oia ke Kumuolelo a Aui-ku-mu hoi i pili aku ai ka Haina, me ka Haiinoa a Paniinoa mahope on a, a ku keia Haiinoa (Paniinoa) ma ka Aui-alo, aole hoi, o ka Haina-pili-ole (i ka paia ae nei he Haina Hui) kai hoomalu i ka Haiinoa a Paniinoa paha e ukali ana mahope mai. Penei:
1. Boys laughed at him. Akaaka na keiki iaia.
2. Boys laughed in the house. Akaaka na keiki iloko o ka hale.
Hoakaka: Ma ka hopunaolelo mua, ua lilo o "laughed" i haina-hui, mamuli o ka pili ana mai o ka inawaena "at" a lele like laua e hoomalu i ke paniinoa "him" ma ka auialo. Ma ka hopunaolelo elua hoi, ua ku mau o "laughed" he haina pili ole (intransitive) oiai, aohe ana Hope-haina (a Auialo) i hoomalu aku ai, nokamea, o ka Inawaena "in" ka mea nana i hoomalu i ka haiinoa "house" ma ka auialo. E hoomanoia, ma keia kulana hope, i hoikeia ae la, aole pono ke oleloia o "house" he Hope-haina ia, aiai, aohe haina (verb) nana i hoomalu mai iaia; aka, ua pono ke oleloia, aia ia ma ka auialo (objective case), mamuli o ka hoomaluia ana e ka Inawaena "in."
O ka Loina ano nui e pili ana i ka hoomaopopo ana i keia kulana Haina Hui oia keia:
Ina e ku ka haina pili ole ma ke kulana hoohana a hoomalu aku i ka Haiinoa a Paniinoa ma ka auialo, mamuli o ka me hoopili ana a ka inawaena, alaila, he haina hui ia, i ku ma ke kulana haina pili aku. Penei:
Robbers fell upon him. Lele aku la na power maluna on a.
Ina e ukaliia na Haina pili (Transitive verbs) e na Paniinoa Huli Auikumu (Reflexive Pronouns), elike me myself, himself, a pela aku, ua kapaia kela ano Haina, he Haina Huli Auikumu (Reflexive ; nokamea, ua huli hope ka hoohana ana, a o ka hoomalu ana hoi a ia ano Haina i kona Auikumu, oia hoi, ke kumuolelo. Penei: John struck himself with his fist. Ku'i no o Ioane iaia iho me koa puupuu (lima).
Na Haina-pili-lua (Verbal), oia na Haina i pili aku ko lakou hoolawa loa ia ana i kekahi mau mahele nui e ae o ka olelo, elike me ka inawaena, ka haiinoa, haiano, haina, a hainalea no hoi.
He elua mahele o keia ano Haina-pili-lua: Haina-pili-haiinoa (Verbal Noun), i kapaia he Haina Ku-wale (Infinitives); a he Haina-pili-Haiinoa (Verbal Adjectives).
O ka Haina-pili-Haiinoa, he haina ia e hoike ana i ka hana a o ke kulana paha i hooiaia e ka haina. Penei: to read, e heluhelu; reading, heluhelu ana.
Mamuli hoi o ke ku ana o keia ano haina ma keia kulana, me ka pili ole hoi i kekahi aui o ka olelo; nolaila, ua kapaia he Haina-Kuwale. Ua like me ka olelo ana; e holo; e hele; e inu; holo ana; noho ana; hele ana; inu ana. Aole lakou i pili aku i kekahi kumuolelo a hope haina hoi, a apana e ae hoi o ka olelo; aka, ua hoike no nae lakou i kekahi hana i koiia e ka Haina i ku ai lakou.
(Aole i pau)
______
KA MEA I MAKEMAKE LOIHIIA
______
(Mai ka Nupepa Evening News mai.)
Ua hoomaopopo anei oe, ma kou wa e nana iho ai ma na kolamu o kau nupepa puka ahiahi i ka nui maoli o na hooikaika ana a na poe hana laau lapaau, na poe malama halekuai, ame na hui kuai laau nohoi, ma ka hoolaha ana aku imua o ka lehulehu i na mea a lakou i makemake ai e kuai ma na huaolelo ono a pahee o ka miloia ana. O ka olelo Anglo-Saxon he olelo ia i piha me na huaolelo ame na hopunaolelo e mohala pono ai na ano manao apau, a maka wa e ikeia mai ai e lakou ua loaa ka pono ma ia hana ana, o ko lakou hoomau aku la no ia? Ua hoomaopopo anei oe, o na Huaale a Doan no ke Kikala Hanene ame ka puupaa (Doan's Backache Kidney Pills) oia wale no ka laau hookahi e haawi aku ana ia oe i na hooiaio kuloko ana, ame na mea hoike ao ke alo ame ko ka home iho nei, a pela nohoi mai Sidane mai? Ina aole pela, alaila, e hoomaopopo pono oe i keia wa. E hoomanao mau loa oe. Eia kekahi mea hoike aku ia oe:
Aia ma ka Helu 309 o Alanui Sussex o loko o keia kulanakauhale kahi i noho ai o Mr. R. Ryan. He kanaka ia i mareia i ka wahine, a no kekahi mau makahiki loihi kona noho ana malaila. He mau la i hala ae nei, penei kana mau olelo n na Huaale a Doan no ke Kikala Hanene a Puupaa:
"Eono mahina i hala ae nei, ua loohiaia, iho la kuu mau puupaa i kekahi ma'i ma ka opu a ma ka uamauma. Ua pii mai la ka ikaika o keia mau pilikia maluna o'u, a hele loa aku la au i k a pono ole, oiai no nae hoi i hoao ai au i na laau lapaau kamaaina mau no ia ano ma'i, eia nae, aole no he ola. Eia wale iho nei no, aia hoi, kuai aku la au i keia mau huaale, a ua loaa io maoli ia'u ka pono. Ua lola loa ae la ka eha ame ka hu'i o kuu kua, a pau loa ae la nohoi na eha apau a'u i ike ai. Ke olelo ae nei au, he keu keia a na huaale maikai loa no na ma'i pili i na puupaa, a o ka poe apau i loaa i na ma'i oia ano, aole hewa lakou ke hoao i keia mau huaale."
He kakaikahi loa na ouli hoike no ka ma'i pili i na puupaa, eia nae he mau ouli kupono loa ia e makaala ia, a, aole hoi e pono e hoohemahemaia.
He wahi nalulu uuku, he wahi poniuniu uuku, he pouli pu a uulukai malalo iho o na maka, maikai ole ka paahana ana a ka opu, mulea ka waha, maloo ka ili, pii mai ka puupuu pohaka liilii ma ka ili, haikea mai ka helehelena, ike ka maka i ka naholo ae o na mea liilii, e lalao ai mamua o ka maka, anu mai na wawae ame na kapuai, powehiwehi ka ike. O keia mau ouli apau e hoike mai ana lakou ua ma'i ia na puupaa.
Ke hoike e mai nei keia mau hoailona ia oe i ka pilikia a hoea mai.
E kuaiia ana na HUAALE a DOAN no ke Kikala Hanene ame na Puupaa e na poe kuai laau apau. He 50 keneta no ke poho, a i ole ia, he $2.50 no 6 poho. E hoounaia aku no ma ka Eke Leta, ke loaa mai ke kumukuai. O Hollister Drug Co., Honolulu, na Agena o ko Hawaii Pae Aina.