Ka Nupepa Kuokoa, Volume XXXVII, Number 40, 7 October 1898 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

BUKE XXXVII. HELU 40. HONOLULU. POALIMA, OKATOBA 7, 1898. NA HELU APAU 2723

 

Hoolaha Loio.

 

W. R. KAKELA.

Loio a he Kokua ma ke Kanawai

HE LUNA HOOIAIO PALAPALA.

2370

 

LYLE A. DICKEY.

Loio a he Kokua ma ke Kanawai.

Notari no ka Lehulehu.

Kihi o Alanui Betela me Moi.  Pahu Leta 286.

            Iloko o ke Keena o ka Loio Kuhipa mamua, a he Loio Hoopii ma ka Aha Apana o Honolulu.

 

            E hookoia na hana pili kanawai apau mai na Mokupuni mai,

            O. A. F. Tavares, Kakauolelo, Maheleolelo a Notere no ka Lehulehu.          1yr

 

Hoolaha Kumau.

 

Papa!  Papa!

Aia ma kahi o

LEWERS & COOKE

(Lui Ma.)

Ma ke Kahua Hema o na Alanui Papu me Moi.

E LOAA NO NA

Papa Nouaiki

O kela me keia ano.

 

Na Pani Puka....

Na Puka Aniani....

Na Olepelepe....

Na Pou .......

Na O'a....

Na Papa Hele....

Na Papa Ku....

Na Papa Moe....

 

Na Pili Hale O na Ano apau.

A me na

Wai Hoohinuhinu Nani

O Na Ano Apau.

 

Na Palaki o na Ano he Nui Wale.

 

            Ke haiia aku nei oukou o na makamaka a pau, na makaukau keia mau makamaka o oukou e hoolawa aku ma na mea a pau e pili ana ma ka laua Oihana no ka

Uku Haahaa Loa

E like me ka mea e holo ana mawaena o Laua a me ka Mea Kuai.

 

E Hele Mai o Wao no Oukou Iho.

 

KA BUKE AO PILIOLELO ENELANI.

 

            Eia ka mea kakau o ka buke A'o Piliolelo Enelani e hoopukaia nei ma na kolamu o keia pepa ke hooponopono nei i na mahele o ua buke la i pau i ke paiia, a e pa'i buke maoli ia aku ana keia alakai a kokua waiwai nui e loaa ai he ike olelo Enelani.  Ma ka wa e pau ai ka hooponopono hou ia ana, oia ka wa e waihoia aku ai ma ka lima o ka poe pai.  Ma ka wa e paa ai e hoikeia aku ai ke kumukuai o ka buke hookahi.

 

COUNT MURAVIEFF.

 

            The Russian Minister of Foreign Affairs, Count Muravieff, is one of the boldest and ablest diplomats in Europe.  He has beaten Lord Salisbury in the great struggle with England for supremacy in China.

            O keia ke kii o Kauna Muravieff, ka lua ole o na Kuhina akamai a wiwo ole nohoi o Rusia.  Oia nei ka mea nana i hoopuhili i ka ike kalaiaina o Haku Salisebure o Enelani.

 

KA MEA HUNA POHIHIHI

Unuhiia Hooulumahiehie no "Ke Kilohana Pookela o ka Lahui Hawaii."

 

            Ua uwe iho la o Mrs. Jones ia wa, oiai hoi o Rosewena i nana aku ai iaia me ke pahaohao nui, a ma ia wa nae komo iho la ka manao iloko ona, ua loohia ia kekahi pilikia maluna o Alamira.

            Pane hou aku la ia imua o ka wahine nona na maka e hiolaia mai ana e na waimaka:

            "E lawe aku oe ia'u imua ona!"

            "Hauoli loa au, e kuu Haku, ina e hiki ana ia'u ke lawe aku imua ona a hoike aku au ia oe iaia, aka, aole nae.  He la poino loa keia no'u," wahi a ka wahine i pane mai ai.

            "Heaha ka pilikia?  Auhea ka hoi o Miss Arevalo?"

            "Aole au i ike."

            "Aole oe i ike?  Aole ka ia o keia wahi?"

            "Aole; e kuu Haku.  I ka po nei kona hele ana mai ia nei aku; a he wa hoi ia e kilihune ana ka ua.  Ua hele pu aku hoi ia me kona wahi kaikunane.  Mai ia wa mai a hoea mai i keia wa, aole au i ike hou ia laua."

            I ka lohe ana o Rosevena i keia mau olelo mai ka wahine mai o kahi a Alamira i hono ai, ua ano e loa ae la kona noonoo, a ia wa nohoi, pane hou mai la ua wahine nei:

            "I ke awakea iho la nohoi o keia la i hoea mai ai ia nei kekahi kanaka e ninau ai nona.  I ko'u hoike ana aku hoi iaia, aole ka lede opio ma ko'u hale nei, ua piha loa oia i ka huhu.  Ua hoike mai oia i kona inoa ia'u o Haku Adelo."

            "Alaila, ua hoea mai o Haku Adelo ia nei nei i keia la?" wahi a Rosevena i ninau aku ai.

            "Ae; ua hoea mai o@a ia nei, aka, aole hiki ia'u ke hai aku iaia i kekahi mea.  Ua hoea mai nohoi ia nei he wahine.  O laua pu mai no nae ka hele ana mai.  Ua huli iho nei nohoi au i ke kulanakauhale nei no Miss Arevalo, e kuu Haku, aole oia ia loaa ia'u."

            "I ka hora ehia o ka po nei kona haalele ana iho ia nei?"

            "Mawaena o ka hora 7 a 8 paha.  Me he mea la, o ka'u wa ia e hoomaopopo nei, oia ko laua wa i hele aku ai mai ka hale aku nei."

            "Ua ike no anei oe i kana wahi i hele aku ai?"

            "Ma kana olelo mai ia'u, e hele ana laua i kahi o ke kauka.  Ua lawe aku laua he omole hele ame kekahi mau mea ono na kekahi kanaka ma'i."

            Ua nana aku la o Rosevena me na onohi maka piha pahaohao.  Alaila, hoomaka mai la no ua wahine nei i ke kamailio ana:

            "O kela kanaka ma'i ma ko'u hoomaopopo ma ka Alamira hoike ana mai ia'u, he hoaloha oia nona.  Ua loohia kela kanaka i kekahi poino ma kahi i kapaia o Burnt Downs, a ua laweia aku oia i ka hale o kuu hoaloha, oia o Pegi Wilise.  Aka, o ka huakai nae a Miss Arevalo i hele aku ai i ka po nei, aole ia i hoea aku i kahi o ke kauka, oiai, i keia kakahiaka iho la i loaa aku ai no ia'u ka omole hele ana i paa ka uai a e muu mokaki ana hoi ka mea ono ana i paa aku ai."

            "Alaila, ua hopu maoli ia oia me ka lima-ikaika, a he mea kanalua ole, ua laweia aku oia i kahi e, ma ke ano he pio?"

            "Pela ko'u manao," wahi a ka wahine nona ka hale puhi palaoa, me kona hooia ana mai hoi, e hoouna aku oia i kekahi mea e hele pu me Rosevena i kahi o ke kauka.

            Ua hele pololei aku la ua Haku Opio nei no kahi o ke kauka, a ua loaa aku nohoi ia ma kona keena oihana, a hoike koke aku la ia imua ona i ke kumu nui o kona hoea ana aku ilaila.

            "Aole i hoea mai ka lede opio maimai i ka po nei ia nei," wahi a ke kauka i pane mai ai.  "Ua hai mai no nae oia ia'u, e hele mai ana no ia e ike ia'u i kela ame keia ahiahi.  Aole nae au i manao e hoea mai oia ia nei i ka po nei, oiai he inoino loa o ka po nei.  He nui ka ua o makou nei.  Ina nae oia i hoea mai ia nei, ina ua loaa aku iaia he nuhou maikai no kela kanaka ma'i ana i hoolimalima mai ai ia'u e hele e lapaau.  Ua pau ka pii mahuahua ana'ku o ka ma'i fiva iloko o kela kanaka, a he meau la pokole wale no koe, a pau ae kela fiva.  I keia wa nae, he kulana nawaliwali loa kona, aka, aole o'u kanalua iki e palekana ana no ia."

            "Owai la keia kanaka i haawi ai o Miss Arevalo i kana mau kokua ana?" ninau aku ai o Rosevena i ke kauka.

            "He wahi moolelo pahaohao no ko keia wahi kanaka," i pane mai ai ke kauka.  "Ma ka oleloia, he kane hoopalau oia na Pegi Wilise.  He 18 makahiki o ko laua kaawale ana, a kahi no laua a hui hou.  I Ausetarilia paha oia i noho ai.  O kona inoa, oia o George Negewina."

            Ike iho la o Rosevena, oia ke kanaka a ka Lede Beatirisia i makamake loa ia e loaa, aka, aole nae ona manawa e hele aku ai e imi i kahi i noho ai ua wahi kanaka la.  Hooholo iho la ia, he mea pono iaia ke imi mua a loaa o Alamira, a mahope aku oia wa e kii ai laua ia George Negewina.

            Haawi aku la ia i kana mau hoomaikai ana i ke kauka, a hoi mai la ia no ka hotele.

            I kona hoea ana'ku i ka hotele, ua kauoha aku la ia iaia, ua makemake oia e ike i ka Haku Adelo, eia nae ua pane mai la ka mea hotele, ua haalele iho o Adelo i ka hotele mahope koke iho no o kana ka Rosevena hele ana aku, me ka hoike ana mai nohoi aole o Adelo e hoi hou mai ana ilaila.

            Ua ano e ae la na helehelena o Rosevena, a ua maikai ole hoi.

            "Heaha oia i hele aku ai?"

            "Ua hala aku oia no ka akau, a o kona lio ponoi no kana o ka lawe ana aku.  Aole oia i hoike mai i kana wahi i hele aku ai."

            Manao loa iho la no nae o Rosevena, ua hala aku o Adelo no kahi ana i hele aku ai ma ka po mamua iho, elike me ka mea a ka ona hotele i hai mai ai iaia.

            Oiai hoi o Rosevena i nana pono aku ai i ka mea hotele, ua mino aka iho la ia a pane mai la:

            "O ko makou la makeke keia, a elua a ekolu poe kanaka mahiai mai ke kuaaina mai nei i hoike mai ia'u i keia awakea iho nei, ua ike laua i kuu mau lio ua hele a auau i ka hou, a e holoia ana laua mai Peneko mai i keia kakahiaka."

            Ua hooholo iho la o Rosevena i kana mea e hana ai.  Ua lilo keia mau olelo a nei kanaka i hoike mai ai iaia i mea nona e ike ai i kana mea e hana aku ai.  Ma ia wa no, uku aku la ia i kona bila aie i ka mea hotele, a holo koke aku la ia no kahi hoolulu kaaahi.  Malaila, kau aku la ia no ke kaaahi e holo ana i Caredifa, a i kona hoea ana aku i laila, holo aku la ia no Peneko.

            O ke kaa ana i kau aku ai, he elua mau mea e noho ana iloko.  He mau wahine.  A ua hoopuiwa nui loa ia hoi oia i kona ike ana aku i ka Lede Beatirisia o Hametona, a o ka lua o ka wahine, oia o Mary fleck.

            Me ka hauoli, haawi mai la ua Lede Beatirisia nei i kona lima aloha i ka Haku Opio Rosevena, me ka olelo ana mai e noho iho ma kona aoao.

            Pane mai la ia:  "Eia au ma ko'u alahele no Hamptonwold.  E holo aku ana maua a lele iho i Peneko, malaila kau aku maua maluna o ke kaa no kuu home ma ke kuaaina.  I ka wa hea oe i haalele ai ia Maka-o-ka-Aeto?"

            "I keia kakahiaka nei no ko'u haalele ana aku ia laila.  Ua hoea maalahi mai ka'u mau malihini i ke ahiahi nei.  Ma ko'u manao, mamuli o na keehina naauao a hoomanawanui nohoi i lawelaweia e laua, aole e manao loa ia ana, aia laua i hoea ae i ko'u wahi," i pane aku ai o Rosevena.

            "Ua mohala maikai ae la na helehelena o ua Lede Beatirisia nei, a pane mai la ia imua o ka Haku Opio:

            "Aole no i maikai loa ko'u noonoo no laua, aka, ua maha nae au ike eia wa.  Ua holo malu mai la au mai Ladanamai, oiai no nae ua nonoi aku au i ka Haku Tereveliana e hookuu mai oia ia'u e hoomaha no hookahi pule.  Aia nohoi ka Haku Tereveliana ke noke la i ka huli no ke Kaunawahine Arevalo a no Alamira nohoi.  Me he mea la, e hoi aku ana paha ia i Tereveliana Pa i ka la apopo."

            "I Daletona aku nei au i keia la," wahi a Rosevena i pane aku ai.

            "A pehea, ua ike aku nei nae paha oe i a'u mau keiki aloha?  Aia anei o Megi me laua?"

            "Aole, aka, ilaila no nae o Megi i keia kakahiaka.  Oia ka, ka kela wahine i kuhihewa ai he kahui hanai no ka Haku Adelo.  Mai pihoihoi oe, ke hai aku au, ua paa hou o Alamira ame kona wahi pokii kaikunane ia Adelo."                (Aole i pau.)

 

HOOLAIA KA MA'I HI MAU.

 

            He mea hoike aku keia, ua loohia au i ka ma'i hi mau mai ka wa mai o ke kaua huliamahi.  No ka nui loa o ko'u nawaliwali, aole hiki ia'u ke hele a hana i kahi mea.  Hookahi no omole o ka Laau Ola a Kamalena no ke Nahu, Kolera ame ka Hi, ua ola loa ae la au a maikai.  J. R. Gibbs, Fincastle, Va.

            Ua loaa au i ka ma'i hi mau no 12 makahiki.  Ekolu omole o ka Laau Ola a Kamalena no ke Nahu, Kolera ame Hi o ko'u oia no ia.  S. L. SHAVER, Fincastle, Va.

            O Mr. Gibbs ame Mr. Shaver, he mau kanaka mahiai koikoi laua e noho ana na kahi kokoke i Fincastle, Va.  Ua kuai laua i ka laau mai a Mr. W. E. Casper mai, he kanaka kawili laau no a wahi, a i kamaaina loa hoi me laua ke hooiaio ana hoi i ka oiaio o keia mau olelo ae la.  E kuaiia ana e na poe kuai laau apau.  O Benson, Smith & Co., na Agena ma Ko Hawaii Pae Aina.

 

Ke Aloha o kuu Makuahine

KE ALOHA O KA'U MEA I ALOHA AI.

Ka Mana o ke Aloha.

He Moolelo Walohia.

(Unuhiia e Hoolale-a-Ka-Ua-Kukalahale no "Ke Kilohana Pookela o ka Lahui Hawaii.")

MOKUNA IV.

 

            "Alaila, ua paa loa no kou manao e mare mai oe ia'u me ko'u makemake ole ia oe, ame ka loaa ole ana nohoi he wahi huna o ke aloha iloko nei o'u nou?" wahi a Alice i ninau aku ai.

            "He mea ole no ia'u nei ke ano oia mea he aloha, aka, ina no oe e ae mai ana, alaila, ua lawa no ia i ko'u manao."

            "Aole i kana mai ka lapuwale o kou noonoo ana pela, wahi a Alice."

            "Aole i like ko'u manao me kena au e hoike mai la.  O kou ae ana oia ka mea e hemo mai ai kela mau palapala e waiho mai la iloko o ka pahu ume; a oia hoi na palapala a'u i hoike aku nei ia oe.  Pehea la ua poina anei oe i ua mau palapala la?"

            "Aole, aole au i poina ia mau mea, a ke mau nei nohoi ko'u manaolana e haawi mai ana no oe i ua mau palapala la ia'u."

            "E haawi aku no au i kela mau palapala ia oe, a i ole ia i kou makuahine, ma ka la o kaua e mareia ai."

            I keia wa i ku ae ai o Alice iluna ame ke kulana hiehie hele mai la ia imua o ke Kauna de Berene a pane mai la hoi:

            "E hoopau oe i kou manao e mare ma ia'u, a e haawi mai i kela mau palapala, a e lilo nohoi kaua i mau hoaloha."

            A ma ia wa nohoi haawi aku la oia i kona lima i ua Kauna nei, aka, aole i lalau mai ua Kauna nei i ka lima o Alice, a o kana mea o ka hana ana mai, oia kona hoole ana mai me ka leo oolea.

            "Aka, e hoomanao oe, aole au e mare me oe," wahi Alice i pane aku ai iaia.

            "Alaila, ke hai aku nei au ia oe, he hana pilikia loa kau i hana mai ai nou iho, a no kou mau makua nohoi.  E hoolohe pono mai oe.  Aia iloko o keia mau palapala he mau olelo e poino ai kou makuahine, a e lilo ai nohoi ka hanohano o kou makuakane i mea ole.

            Ua ku iho la o Alice me na helehelena kaumaha me ka pane ole ana'ku hoi imua o ke Kauna, alaila, pane mai la ua Berene nei:

            "Ina oe e lilo i wahine na'u, aole loa e hoikeia ae imua o ke akea na mea huna o loko o keia mau palapala.  Aka, ina oe e haalele iho ana i keia hale, kahi hoi au i hele mai nei mamuli o kou makemake iho, me kou ae ole ana hoi e lilo oe i wahine na'u, alaila, ke hoike aku nei au imua ou, iloko o ekolu la mai, keia la aku, e haawi aku no au i keia mau palapala i kou makuakane."

            "Aole oe e hana ia hana kumakaia i kuu makuahine." wahi a Alice i pane aku ai.

            "Aohe mea nana e akeakea mai ia'u mai ko'u hooko ana aku ia manao a'u i hoike aku la ia oe."

            I kela wa i hoholo ae ai kekahi pouli nui ma na maka o Alice, kunewa ae la ia i hope, a i ole ka hapapa ana ae o kona lima a paa i kekahi mea, ina ua haule loa oia ilalo i ka papahele.

            Holo aku la ke Kauna a hookaukoo aku la iaia a hoonoho iho la iaia maluna o ka noho, a ola hoi ka wa i hiolo iho ai o na waimaka ma na papalina o Alice, a pane ae la ia:

            "My poor mother, my poor mother.  Ua ike no au, aole he mea nana e kaili aku i ka nui o ko'u aloha nou.  I ko'u mau la i hiki ole ai ia'u ke hana i kahi hana no'u iho, ua haawi mai oe, e kuu makuahine i kau mau hooikaika ana no'u me kou nana ole ana ia oe iho.  O, dear mother."

            O na huaolelo mua, ua hoopuka ae oia me ka lohe o ke Kauna Berene, aka, o na huaolelo hope ana i kaukau ae ai no kona luaui makuahine, ua hoopuka ae ia me he mea la e hoomaha ana ia i ka ikiiki o kona uhane no kona aloha i kona luaui makuahine, aole hoi i lohe o Berene ia mau huaolelo.

            Ua hu mai la hoi iloko ona na hoomanao ana no na ehaeha i alo hoomanawanui ia ai e kona makuahine iloko o na makahiki he lehulehu i kaa hope ae no ka paa ia ana o keia mau palapala e keia kanaka.

            Ua pane iho ia hoi ua Kaune nei: "E Alice, ina he aloha io oe i kou makuahine, alaila, aia iloko o kou lima ka hana e loaa ai ke ola hou ana i kou makuahine."

            "A pehea ia au?" wahi a Alice i ninau ae ai.

            "O kou pomaikai ma kou mare ana mai ia'u, oia ka maha ana o kou uhane ma kou hoomaopopo ana iho, ua hala ka pilikia mai kou makuahine aku a ua maha hoi kona uhane mamuli o kou alana ana ia oe iho."

            Ua pono koho wale iho la no ua Kauna nei i na mea e noonooia ana e Alice ia wa, a no ia kumu oia i hoopili iho ai i ke ano o kana pane no ka hauoli e loaa ana i ka makuahine o Alice ina e ae ana oia e mare mai iaia.

            A ma ko Alice aoao hoi, ina oia i ike pono i na olelo oiaio maoli o loko o kela mau palapala ana i makemake loa oi e loaa mai ke Kauna Berene mai, ina no ua kanalua oia i ka hoomau ana aku i kenoi ana.  Ua maopopo loa aole oia i ike i na olelo o loko oia mau palapala, aka, mamuli o kona aloha i kona luaui makuahine no kona lohe ana iaia e kamailio ana no ua mau palapala la, ua komohia iho la ka noonoo iloko ona he mea pono iaia ke hoao e loaa ua mau palapala la mai ke Kauna Berene mai ma ka hele ana e nonoi iaia, aka, ke ike nei nae ia me ka maopopo loa, ua ku oia ma ke alo o kekahi pali nona ke alahele hookahi ana i ike ai a i hoomaopopo ai ia wa, oia kona ae ana e mare i ua Kauna nei, ina e manao ana ia e hana i ke hana e loa i ka huoli i kona makuahine.

            Nolaila, i ka hala ana o kekahi mau minute o kana noonoo ana, ia wa oia i ku aeai iluna, me ka leo kuoo a hopohopo ole nohoi, ua pane mai ia oia imua o Berene:

            "No ke aloha o kuu makuahine, ke kauoha aku nei au ia oe e hele aku imua o kuu makuakane, a e nonoi aku oe iaia e ae mai oia ia oe e mare au ia oe."

            Alaila, ku ae la ia iluna, me ke kulana haaheo a hiehie nohoi, i haliiia iho e ke kuoo, kunou aku la ia imua o ke Kauna Berene, a haalele aku la ia i ke keena ana i noho pu ai me ua Kauna nei.

            Me ka olino ana hoi o na manao hauoli iloko o ua Kauna nei, ua ku koke ae la ia iluna, hele aku la me ka awiwi nui e wehe aku i ka puka komo no Alice e puka aku ai, aka, ua hemo e aku la nae ua lede opio nei iwaho, a iho aku la ma ke alapii me ka awiwi nui, a hoomau aku la no oia i ka hele ana no ka puka pa.

            Oiai hoi ia e hele ana me ke ano pupuahulu nohoi, ua poina iho la ia i ka uu ana iho i kona uhimaka ilalo, a me ia ano no oia i hele aku ai a kau aku la iluna o kekahi kaa.

            Ma ka wa hoi i oili aku ai ua lede opio la mailoko aku o ka rumi ana i kamailio pu ai me ke Kauna, a hiki i kona kaalo pono ana ae ma kahi kupono i ke keena aina, kahi hoi a na hoaloha o Kauna Berene e noho ana, e kiei mai ana kekahi poe o lakou ma ka pukaaniani, a ike pono mai la iaia me ka hiki hou ole ia lakou ke hoohewahewa.

            Me ka piha pahaohao loa, ua huli ae la kela ame keia o lakou a nana ae la i kahi ame kahi.  Ma ia wa nohoi pane ae la o Robata de Malatere, he aloha pili paa loa ia no George Lamabereta.

            "He oiaio anei ka ike a ko'u mau onohi maka, o Alice de Malaceri ka'u i ike aku nei?"

            Ua hooia mai la hoi kona mau hoa, me ka olelo ana mai, o ua lede opio la ka lakou i ike ai, a ma ia wa puiwa ae la lakou i ka pane ana mai a kekahi leo ma ka puka komo mai:  "O Alice de Maraceli io no ka oukou i ike ae nei, e na keonimana?"                       (Aole i pau.)

 

            Ua manaoia he poe kanaka o na aina e ka poe na lakou i lawe i ke ola o Kiki Ringer, a eia ka oihana makai ke hanu nei ma ia alahele.  Ua pau ka manaoia ana he poe kanaka Hawaii maoli ka poe na lakou i lawelawe ia hana.