Ka Nupepa Kuokoa, Volume XXXVII, Number 31, 5 August 1898 — Page 4
| This text was transcribed by: | Kate Motoyama |
| This work is dedicated to: | sister rose baker |
Ka Nupepa Kuokoa
KE KILOHANA POOKELA NO KA LAHUI HAWAII.
MAJOR GENERAL MILES.
His former great commanding officer said of Nelson A. Miles, who is now general of the United States Army, "He is a born fighter, disciplinarian and tactician." When Major General Miles went to Cuba to assume direct command of our forces we felt that @ was doomed.
O ke kii maiana ae ai oia no Kekia-Kenela Miles o na pualikoa o Amerika i hoounaia i Cuba e alakai i na koa. Ua hanania mai oia i koa hakaka a ma on a ia na hilinai a ko Amerika
Lubiana Kasimila
--
"Gasepa o Velesebuga!" oia ka lua o na inoa i kaheia mai e ka Lunakanawai.
Aia hoi, ua alakaiia mai la ua Kauna nei imua o ka noho hookolokolo. Ua hele mai la hoi ia me na helehelena e hoike mai ana i ka maka'u ole ame ka wiwo ole, aka, aia nae iloko o kona houpo kahi i oni kapalili ai o ka hopohopo ame ka maka'u.
Oiai ia e ku ana imua o ka noho hookolokolo, uaheluheluia mai la imua on a ka palapala hoopii hoahewa no na karaima lehulehu wal i hanaia e ia.
Mahope iho o ka pau ana o ka waihoia ana mai oia mau olelo hoahewa imua on a, ia wa i ku mai ai ka hoa lunakanawai e noho ana ma ka aoao akau o ka lunakanawai nui, a wehe ae la i ka uhi maka i uhi iho i kona mau maka i ka wa mamua iho i kona mau maka i ka wa mamua iho, a ikeia aku la na helehelena o ka elemakule Manafereda.
Ua pane mai la hoi ia me ka leo moakaka:
"Owau, o Manafereda o Aledenaheima, ko Duke Nui o ke Aupuni o Bohemia nei, ka mea nana e hoopii hoahewa aku nei ia oe, e Gasepa o Valesebuga. A ke kahea ae nei au i ka inoa o ke Akua i hoike no ka oiaio ame ka pololei o ka'u hoopii hoahewa ia oe, e Gasepa."
Ma ia wa hoi i laweia mai ai imua o ka Aha o Wolasetona, Steinfurth ame kekahi poe kauwa lawelawe e ae a ua Gasepa nui. O keia poe hoi apau, e aahu ana lakou i na aahu oihana o ka Hui a na Naita o ka Lima Ulaula.
Ua hoike pakahi mai la keia poe apau no na karaima a lakou i ike ai e hanaia ana e ua Gasepa nei, a mai ka mua a ka hope o ka lakou mau olelo hoike, aole hiki i ka mea i hoopiia ke kue aku a hoole hoi.
Ua hoopihaia oia me ka ukiuki nui, a ua kohu helena maoli oia i ka nana aku. Ua hoao ae la hoi ia e hoopuka i na huaolelo hailiili, eia nae ua hiki ole iaia ke hooko aku i kona makemake hehena, oiai ua haawi koke ia iho la na rula ana maluna on a i mea e hooko ole ia ai kona makemake.
Ua alakaiia aku la ua Gasepa nei no kahi e hoopaaia ai oia.
Alaila, lawela mai la imua o ka noho hookolokolo na'lii apau i noho maluna o ke Aupuni o Bohemia, malalo o ka mana o ka Moi Oto. Ua hoikeia ae la hoi ka lakou mau hana hewa e na hoike he lehulehu loa, a ua hiki ole ia lakou ke alo ae ia mau olelo hoike.
He iwakalua-kumamalua ka nui o keia poe alii i pau i ka hookolokoloia, a ua pau lakou apau i ka hoahewaia, a ua pau lakou apau i ka hoahewaia.
Alaila, poha mai la ka leo o ka lunakanawai keikie, me ka i ana mai:
"Ano, e lawe mai imua o ka noho hookolokolo ia Oto, ka mea i kapala, ka Moi o Bohemia!"
Ua haalelle iho la ka Naita Mamiona i kana wahi e ku ana, a hele aku la ia no ka hooko ana i ke kauoha a ka Lunakanawai Kiekie. Aole hoi i liuliu huli hoi mai la ia me ka ukaliia ana e Oto. Ua hoaahula ua 'lii la i kekahi aahu elele loihi, a he kaula kai hoopuniia ae ma kona puhaka.
Nana ae la ua 'lii la ma o a maanei o loko o ka hale, a pahoia iho la ka nanaina o ka maka'u ame ka weliweli maluna on a, aka, hoomaloeloe wale ae la no ia iaia iho.
"E Oto o Bohemia!" i poha mai ai ka leo o ka lunakanawai, ma ka wa i hala ai he mau minute pokele o ke ku ana iho o ua 'lii Oto nei ma kahi a Mamiona i lawe aku ai a hooku iho iaia, me ka hoomau ana hoi i ke kamailio ana mai, "ua hoopii hoahewaia mai oe no kou hana ana i na karaima he nui, oia hoi, ka pepehi Moi ana, ka pephi hoahanau ame ka hao wale ana ame ka pakaha wale ana hoi i ke Aupuni. Ua hewa oe i ke karaima mua mu kou ohumu manao ino ana e pepehiia a Moi Ioane o Bohemia nui. Aole paha i hoohaumiaia kou lima i ke koko o ua Moi la, ma ke ano nau ponoi no i pepehi aku iaia, aka, ua hewa no nae oe i ka hewa i like me ia ka elele mamuli o kou ae ana e laweia kona oia. Ua hewa hoi oe ma ka lua o ke karaima, oiai o kou hoahanau ponoi no ia. A ua hewa hoi oe no ke kolu e ke karaima mamuli o kou hao wale ana ame kou kaili wale ana i ke Aupuni me ke kuleana ole, a--"
"Aohe oiaio o keia mau mea apau i hoikeia mai la imua o'u," wahi a ua Oto nei i pane aku ai me ke ano pukalaki a piha i ka inaina, a ninau aku la hoi. "Owai ia ko'u mea nana e hoahewa mai?"
"Owau no!" wahi a ka lunakanawai kiekie i pane mai ai me ka leo koikoi ame ka ikaika.
I keia wa hoi ku ae la ia iluna, wehe ae la ia i ka puloulou e uhi ana iaia, a ia wa i waiho molaelae mai ai ka helehelena ui hiehie o ua lunakanawai ia imua o ka ike ana aku a na mea apau. Aia ma kona umauma, mahope iho o ka hemo ana ae o ka uhi eleele, ike ia aku la he aahu kila kona e aahu ana, a ua hookinohinohiia hoi ua aahu ia me ke gula i omauia ma na wahi e nui. Aia ma kona umauma e anapa mai ana he hoku Imeperiala. A ua omauia ma ua hoiku la na pohaku rube ame ke daimana.
"Owau nei, o Heneri o Geremania, a kea e hoahewa aku nei ia oe! Ua haawi au i ka'u mau kokua ana i keia Ahahui, a owau no ka lunakanawai nui i noho ma na kau hookolokolo o keia Aha, i mea e hiki ai ia'u ke ike pono no'u iho, a no ka pono hoi o Bohemia nei, i ka hooilina oiaio i kona nohoalii."
Aole hoi i kana mai ka piha pahaohao o Oto i kona ike pono ana'ku, me kona mau maka, i ka Emepera Heneri o Geremania. Aole hoi oia wale no kai komohia ia e keia manao pahaohao, aka, o na 'lii kekahi o ua "Moi" Oto nei i pau ai i ka hoaheweaia i ka wa mamua iho. Aole hoi o lakou wale no, aka, o ka hapanui loa o na hoa o ka Anahui o na Naita o ka Lima Ulaula kekahi i hoopihaia me ka haohao nui, oiai akahi no lakou a ike, o ka Emepera ka o Geremania ke kanaka e noo mana nei maluna o ka Ahahui a lakou i noho ai he poe hoa.
Me ka hookanaaho wale ana ae nohoi, pane aku la o Oto imua o ka Emepera Heneri:
"E ka Emepera o Geremania, aole au i ike …, ma ke ano hea la i ala mai ai keia hana kipi pahenehene iloko ponoi o ko'u Aupuni? Na ka wahahee hea la noi, ame ka hoopunipuni hea ia hoi i alakai hewa ia ai kou noonoo e ke Alii? Ua hoahewa mai nei oe ia'u, ma ke ano he mea hao wale au i ka nohoalii o Bohemia nei. Nolaila, ua hiki anei ia oe e ke Alii, ke lawe mai i kekahi kanaka a wahine paha i oi aku ke kuleana oiaio, a ku i ke kanawai i loaa iaia i ka nohoalii o Bohemia nei mamua o ko'u nei, ma ke ano owau ke koko alii hookahi e ola nei i keia wa i pili ponoi loa i ke koko alii nana i nohoalii ma Bohemia nei?"
"Ua hiki ia'u ke hooko aku i kau mea i nonoi mai la. E nana aku iaia!" wahi a Heneri i pane mai ai.
Ma ka wa i puana ae ai ua Emepera nei i keia mau huaolelo, oia ka wa i weheia ae ai kekahi paku lole eleele mahope pono aku o ua Emepera nei, a oili mai la mai la wahi mai he wahine me kekahi Naita, a ku ana laua ma ka nuu a na lunakanawai ekolu e noho ana me ka ihiihi nui.
O ka wahine ka mea i kaa iki mai mamua o ka Naita, a oia kai wehe ae i ka uhi maka e kuuwelu ana mamau on a, a ike aku ia na mea apau i ka helehelena o ka Lunawahine o ka Hale o na Virigine o Maria Hemolele.
I keia wa hoi i puiwa ae ai o Oto, hamama ae la kona waha, a pane ae ia ia me ka li-o ana o kona mau maka:
"Auwe! O Magarita!! Ka Moiwahine o Bohemia!!!"
Ia wa huli mai la ua Moiwahine Magarita nei ma kahi a Oto e ku ana make ano e loa o kona mau helehelena a pau mai la.
"Ae--owau o keia o Magarita, ka mea i noho Moiwahine no Bohemia nei e ke kanaka pakaha a hao wale. I keia wa, he kauwa wahine au na ka Haku a ke noho nei au he kauwa o na kauwa ma ka Hale Hoohiki o Maria Hemolele. Aka, e nana mai. Ke lawe mai nei ka Moiwahine mua o Bohemia nei i kekahi mea ana i hiki iaia ke haawi i kana mau paulelel ana, no ka oiaio o kana mau olelo, a e lilo hoi la i hoike no ka hooilina oiaio o ka nohoalii o Bohemia nei."
Ma keia wa i nee mai ai ka Naita no mua, a ma ia wa nohoi i weheia ae ai na paku eleele i uhila aku ma kekahi o na puka aniani hikina o ka luakini. O ka manawa ia i o pololei mai ai na kukuna o ka la, a pa pono iho la maluna o kahi a ua Naita la e ku ana, a huali ae la na kukuna olinolino mai ka aahu kila ae o na Naita la.
O ka aanu kila o na Naita nei e aahu ana, oia no ke kapa kila alii o ka Moi oiaio o ke Aupuni Bohemia. Ua Moi oiaio o ke Aupuni o Bohemia. Ua omauia ma na wahi he nui o ua kapa ia na mea hoonani hiwahiwa loa o ua Aupuni la. Mamua ponoi iho o kona mau maka, e uhi ana kekahi palulu maka-aha kila, a na ia mea hoi i huna aku i kona mau helehelena mai ka ikeia ana aku e na kakaka e noho ana iloko o ka luakini.
Aka, aia maluna ponoi iho o kona poo, e kau ana ke karaunu hoi i nalowale mai ke Aupuni aku no kekahi wa loihi loa. A o ke karaunu i kauia ma ke poo o ka Moi Ioane ame Oto nohoi he karaunu la i imi hoohalikelikeia aku me keia karaunu e kau nei maluna o ke poo o ka Naita.
Ia wa, i wehe ae ai ua Naita nei i ke po'i kila e uhi ana mamua o kona maka, oiai ua hoopaaia ae ia mea mahope o kona a-i, a ma ka lihilihi nohoi o ka ipu poepoe i upoho iho ai ke karaunu. Alaila, kaikai ae la ia i ke karaunu mai kona poo ae, e waiho wale mai ia kona helehelena apau me ka laelae imua o ke anaina kanaka e nonoho aku ana mamua pono o ka noho hookolokolo.
Ma keia wa i owe ae ai oloko o na luakini ia i na leo hamumu o na kanaka, e nee ana mai kekahi aoao a kekahi aoao, mai mua mai hoi o ka nohonoa o na kanaka a hiki i hope. Ua like keia haale ana ae o na wa olelo aheahe malie mawaena o na kanaka, me ka pahola pu ana iho a ka malanai maani aheahe maluna o na lau laau i kekahi kuluaumoe i papaheaia e ka pohu lai malie.
O ka mahalo i ka ui, o ka hookani no ka hiehie o ke kulana o na Naita la, oia ka mea apau i hoomapu leo ae ai me ke pahaohao nui.
Ua naka haalulu ae la hoi na kuli o Oto i kona ike ana aku i na helehelena o ua Naita nei, ame ka lehelehe aalulu pane ae la ia:
"O! Godfrey!--Kuukaikuaana!"
"Aole, aole keia o Godfrey," wahi a ka Emepera Heneri i pane mai ai. "O keia o Luoiana Kasimila, kana keiki, ka mea i kapaia ka Liona Gula o Bohemia nei. O keia kahooilina oiaio no ka leialii o Bohemia, a oia nei nohoi ka Moi oiaio o ke Aupuni o ka lahui o na Bohemia. No ka pono o ka leialii, ka nohoalii, ke Aupuni ame ka lahuikanaka o Bohemia nei i kukuluia ai ka Ahahui a na Naita o ka Lima Ulaula. O keia ka ikaika ume nana i hoakoakoa i na puuwai aloha aina oiaio apau o Bohemia nei. A e ke kanaka hao wale a pakaha wale hoi i ka nohoalii o Bohemia, e ike a e hoomaopopo oe, ua komo iloko o ko makou ahahui nei na 'liikoa makaukau apau o kou mau pualikoa. O kou alihikaua nui, oia hoi o Kenerala Zach, ka mea nona ke aloha i pili paa aku ia Godfrey, ke aloha hoi no kana keiki, ame ke aloha no ka pualikaua o Bohemia, oia kekahi o na koo ikaika o keia Ahahui, oiai o kekahi hoa kuka ia o ka Aha hooko o keia Ahahui."
"Aka," wahi a ua Emepera Heneri nei i hoomau mai ai i ke kamailio ana, mahope iho o kona nana ana ae ma kona aoao, "malia paha eia iwaena o keia anaina he nui ka poe i makemake loa e lohe i ka moolelo e pili ana i ka Hooilina Moi o Bohemia nei. Malia he pohihihi ko kekahi poe ma keia mea, he mea kupono no e hoakakaia ae. Nolaila, ke kahea aku nei au i ke Duke Manafereda o Aledenaheima e hoakaka mai no keia mea."
Ma keia wa i noho hou iho ai o Heneri maluna o kona noho, a ku mai la hoi o Manafereda a hele mai la ia imua o ka nuu o kahi noho hookolokolo. Wehe ae la ia i kona uhi maka, a pela hoi me ka aahu eleele e uhi iho ana maluna on a, a ikeia aku la e aahu ana ia he aahu kila.
A ua hoohoia ae la na leo hooho o ka hauoli ke ka poe apau i kamaaina me ua haku alii koikoi nei o ka aina, alaila hoomaka mai la ia i ke kamailio ana: (Aole i pau.)
--
Mawaena o na mea hou o na Aina E i loaa-mai ia makou, o ka lono e pili ana i ka hui ana o na mana Aupuni o Europa e komo mai e kue ia Amerika ma na mokupuni o Pilepine, me ka hui ana o Enelani, Amerika ame Iapana ma kekahi aoao e kue aku i kela mau mana, oia ka mea ano nui loa.
NUHOU O NA AINA E
--
Kukuli o Sepania imua o ka Aeto
Amerika.
--
KOKOE MAI KA WA E PAU AI
KE KAUA.
--
Hehihehi Kulana ka Aeto ma
Porto Rico.
--
Nu Ioka, Iulai 26.--Ua hoouna mai ka mea kakau o ka nupepa Herald e ka mea kakau o ka nupepa Herald e noho ana ma Wasinetona i keia lono mahope ae nei: Ua nonoi mai nei o Sepania e loaa on a haluhia. Me ka hoomaopopo ana hoi i ka waiwai ole o na keehina hana oolaiau wale, no ka poloai ana mai i na Amerika, e ae aku i na kumu e loaa ai on a maluhia, ua oili maopopo mai la na mana Aupuni ma Maderida, me ka ae laelae ana mai i ko lakou hoauheeia ana, a nonoi pololei mai la ia Amerika Huiia e hoakaka no na kumu e hookahuaia ai kana ae ana mai e hookiia ke kaua. Ua haawiia mai keia hana ano nui a nihinihi nohoi ia M. Cambon, ka Elele Kuhina Farani, ko Sepania wahaolelo pili Aupuni ma Wasinetona, ma ka wa i hoomaka mai ai ke kaua. Mahope koke iho o ka hora 3, ua hele aku la ka Elele Kuhina Cambon, e ukalila ana hoi e M. Thiebant, ke kakauolelo mua o ka Oihana Kuhina Farani, i ka Hale Keokeo, a haawi pili oihana aku la ia Peresidena MaKinile he palapala mai ke Aupuni Sepania mai, a o ka manao o ua palapala 'la ua hoikeia mai ia, ma ke ano pili Aupuni, mahope mai, e na huaolelo a ka Elele Kuhina, penei:
Ke waiho aku nei ka Elele Kuhina Farani, ma ka aoao o ke Aupuni o Sepania, a mamuli hoi o ke kauoha a ke Kuniha Sepanian o ko na Aina E, i keia auina la he palapala mai ke Aupuni Sepania mai, me na manaolana e hooki ia ke kaua, ame ka hooponoponoia ana o na kumu o ka maluhia.
O ke ano nui o keia palapala oia no keia:
"Aia ke Aupuni o Amerika Huiia ame ke Aupuni o Sepania iloko o ke kaua, ma ke ano oia ka hua i hoea mai mamuli o ke koi a America Kuiia e unuhi aku o Sepania i kona noho mana ana mai Cuba aku, ke koi hoi a Sepania i hoole ai, aole e hooko aku. Iloko hoi o ka paioia ana o na mea kaua, ke ae nei o Sepania ua loaa iaia ka mainoino, a o kona mau ehaeha no ia hana pela, aole i kana mai ka nui. Ke manaoio nei ia, ua hoea mai nei ka wa pono e nonoi aku ai oia i ka Amerika Huiia kokua pu ana mai ma ka hooki ana i ke kaua, a nolaila, ke nonoi aku nei ia e haawiia mai iaia, ma o ka Elele Kuhina Farani la, na hoakaka no na kumu e ae ia o Amerika Huiia i ka maluhia."
NA KUMU A MAKINILE E AE AI I
KE KUIKAHI.
Wasinetona, Iulai 26.--Ua manao wale ia, o keia iho na kumu a MaKinile e waiho aku ai imua o Sepania i mea nona e ae ai e pau ke kaua:
E kuokoa holookoa o Cuba malalo o ka hoomalu ana a Amerika Huila, ka haawi kaokoaia ana mai o Porto Rico ame na mokupuni Ladrone, i wahi hoahu lanahu no Amerika Huiia ma na mokupuni Pilepine.
HOOLEIA KA LONO HOOPAI KAUA.
Maderida, Iulai 26.--Ua hoole ke Aupuni i ka oiaio o ka lono, ua noho ka Aha Kuka Kuhina no ka noonoo ana i ka ninau pili i ka hooki ana i ke kaua, a no ka loaa ana o ka maluhia, eia nae, ua haiolelo loihi o Senor Gamazo, Kuhina Ao Palapala ame na Hana Aupuni no ka mea e pili ana i keia manao.
HE LAUAHEA NO KA HAAWIPIO
ANA O MANILA.
(Laweia noloko mai o ka Nupepa Call
o Kapalakiko, Iulai 27.)
Maderida, Iula 26 (11 p. m.).--Ua loaa mai nei ka lono ia nei e hoike ana, ua haawi pio aku la o Kapena Kenerala Augusti i ke kulanakauhale o Manila iloko o na lima o ka mana kaua Amerika e alaikaiia ana e Adimarala Dewey ame na Kenerala Anderson ame Greene.
Ua pokole na lako poka me pauda a na koa Sepania i hoonohoia malaila, pela pu nohoi me ka ai ame ka wai, oiai ua lilo i na kipi kahi pauma wai a ua hoopuni ae nohoi lakou i ke kulanakauhale, ua akeakea ia ka hoounaia ana aku o na lako ai i na enemi (Sepania).
Nolaila, ua hooholo ke Kapena-Kenerala, e haawi aku oia i ke kulanakauhale i na Amerika, mamua o ka haawi ana aku ma ka lima o na kipi.
HE mau ia i hala ae nei, ua loaa mai la i ke Kuhina Kaua he palapala mai a Augusti mai, e hoike ana he wa wale no e lele kaua aku ai na Koa Amerika, a e ulu mai ana hoi he mau mea ano nui loa. Ua manaoia kela, he olelo hoakaka keia i ka Aha Kuhina, e haawipio ia ana ke kulanakauhale i mea e kapaeia ae ai ka hookaheia ana o ke koko.
Ua lilo nohoi ke kulana ma Manila i mea hopohopo nui ia i keia mau la iho la. Ua manao ke Aha Kuhina ua kipokaia ke kulanakauhale e na mokukaua Amerika, a ma ia wa hookahi nohoi, ua lele kaua ia mai ia ma ka aina e 12,000 poe koa Amerika ame 20,000 poe kipi.
Aia malalo o Kapena-Kenerala Augusti he aneane @) poe koa Europa. Ua lawa loa ia me ka ikaika e pale aku ai i ka enemi no kekahi wa loihi koe wale no ka pilikia i ka ai ole, a pela oi ka wai. Oia na mea nana e kono iaia e haawi pio, i mea e paleia ae ai ka popilikia e kau mai ana maluna o na kanaka o loko o ke kulanakauhale. A ua hoomaopopoia no nae, e haawi pio ana ia iloko wale no o na lima o Adimarala Dewey.
E KALI ANA NO NA LONO MOI MA-
NILA MAI, A MAI PORTO
RICO MAI.
Wasinetona, Iulai 26.--Aumoe ke kaii nei na Keena Oihana Kaua Aina me Aumokukaua, me ka hiaai nui no na lono ano nui mai Porto Rico, a mai Manila mai. Mamuli o na lono i loaa mai nei, mai ia mau wahi mai elua i keia po iho la, e hoike ana ia i na hoonee hana eleu loa ana a Miles ame Dewey. Ke upuia aku nei e loaa mai ana i kela ame keia hora, aka ina e hoea mai ka hora hana o ke kakahiaka.
KE KAUA MUA MA PORTO RICO.
Wasinetona, Iulai 26.--Hora 11:30 p. m. hoolana ae la ke Keena Kaua i keia lono mahope ae nei:
"St. Thomas, Iulai 26.--9:30 p. m. Kuhina Kaua. Wasinetona: Mamuli o na kumu kupono a'u i hoomaopopo ai, ua manao iho la au hemea pono ke lawe mua ae i ke awa o Guaniea, he 15 mile ma ke komohana o Ponee, a ua holohea hoi ia hana mawaena o ka wa e kau ana ka la ame ka hora 11. Ua hoopuiwa loa ia na Sepania. Ua komo mua aku ka mokukaua Gloncester, Kapena Wainwright, iloko o ke awa; halawai oia me kekahi wahi kue ia ana mai uka mai o ka aina; ua ki aku nohoi oia he mau poka.
"I keia wa, eia na moku lawe koa apau iloko o ke awa, a ke nee awiwi nei, na pualikoa helewawae me na koa pukaa no uka o ka aina. Ua lawa pono no ka hohonu o ke awa no na moku lawe koa apau ame na moku nunui no ke kua ana, ma kahi he 200 i-a mai uka mai o ka aina. Hora 11 o keia la, ua hukila iho la ilalo ka have Sepania a uu ia ae la iluna ka have Amerika. Me ka makaukau ame ka eleu i haawi mai ai o Kapena Higginson, me kona mau mokukaua, i na kokua ana. He maikai ke ola o na kanaka a he hauoli nohoi na noonoo. Aohe make.
"MILES, Mekia-Kenerala, Alihi-
kaua o na Pualikoa."
AOLE AE NA MANA NUI O EUROPA.
Ladana, Iulai 27.--E hoike ana ka mea kakau o ka nupepa Daily Mail mai Maderida mai, penei: O ka hopena o na launa ame na kukakuka ana mawaena o na mana o Europa, elike me i i waihoia mai ai e Geremania, ua aelike lakou e kue aku i ka hoohuiia ana aku o na mokupuni. Pilepine me Amerika, aka, no Sepania no ia mau mokupuni.
NEE NA MOKUKAUA RUKINI ME
IAPANA.
Ladana, Iulai 25.--E hoike ana kekahi lono kuikawa mai Shanghai mai, ua haalele aku la he eha mau mokuaua Rikini ia Port Arthur, a na manao wale ia o na mokupuni Pilepine ko lakou pahu hopu.
E hoike ana nohoi kekahi lono mai Shanghai mai, ua hoouna awiwi loa ia na mokukaua Yoshino, Chin Yuen, Itsukushima ame Sai Yen i Saiseho no ka hoopuipui ana aku i ke aumoku-kaua Iapana malaila i keia wa, oia ke aumokukaua ikaika loa ma ia mau kai i keia manawa. Ua kauohaia lakou e hui pu aku me namokukaua o na Adimarala Beritania ame Amerika, ke ulu mai na hihia pili lahui.
HAAWI PIO O GUANTANAMO, MA
CUBA.
Santiago de Cuba, Iulai 25.--I keia la i waiho iho ai na koa Sepania he 7,000 ma Guantanamo i ka lakou mau mea kaua. Ma nehinei hoi, ua haawi pio aku la he 3350 kanaka mai Palma Soriano mai, San Luis ame Longo ia Lutanela Miley, a i keia la hoi, ua hoouna ia aku la he mau lako ai ia lakou. O na poe e ae i koe, aia ma Maracoa he 2,000 a ma Sagua he 1,000. Aole lakou i haawiia mai, aka, aia lakou i keia wa maloko o na palena o ko Kenerala Garcia wahi. I keia la ua hoea aku oia i Jiguany me ka halawai ole ana me kekahi hoouka kaua me na Sepania. Ua hoole loa o Kenerala Shafter ia ka oiaio o ka lono e olelo ana ua lele kaua aku o Garcia maluna o na koa Sepania i hele mai ai e haawi pio, a hoauheeia oia (Garcia).
KE KUHINA BISIMAKA.
Hamburg, Iulai 27.--Ua komohia hou mai ka hopohopo iloko o na haoloha o ke Keikialii Bisimaka, no ka mea e pili ana i kona ola. Ekolu on a la o ka waiho ana maluna o kahi moe, a ua loaa oia i ka ma'i insomnia.
AOLE I HOEA KE KEIKIALII HE-
NERI O PERUSIA I MANILA.
Berelina, Iulai 26.--E hoike ana kekahi lono o keia la no mai ke kaikuono mai o Kiaochou, ma ka la inehinei i holo aku ai ka mokukaua Deutschland, e lawe ana i ke Keikialii Heneri o Perusia no Fusan, Corea.
Hoolaha Kumau.
Ka Ayer Laau
Hoomaemae Koko.
SARSAPARILLA.
. . .
E hoomaemae oe i kou koko me ka Ayer Laau Hoomaemae Koko (Sarsaparilla), o keia ka laau pahu'a ole o kona ikaika hoola. Kupono maoli kela laau no ka ma'i Alaala, ma'i Hehe, Puha, ma'i Aai, ma'i Kuapuhi, ma'i Puupuu oolohu, ma'i Kane pohaka, ame na ma'i no apau e ulu mai ana mailoko mai o ke koko ino. He kupono loa nohoi keia LAAU HOOMAEMAE KOKO A AYER no ka ma'i nalulu (catarrh), rumatika ame ka rumatika pehu.
Ma ke ano he laau hooikaika kino ia, aohe on a lua. E kokua ana ia i na mea paahana o ka opu ma ka hoowaii ana i ka ai, hooikaika i ka hana ana a ke ake-paa nawaliwali mamuli o ka luhi ame ka hoomailo ana a ka ma'i Ua ike na kauka lapaau ma na wahi apau, he Laau maikai loa keia Laau Hoomaemae Koko a Ayer. He laau keia i loaa no loko mai o ka pa'ipa'i ame ke kawili a hoohuihui naauao ia ana o na laau hoomaemae koko a hooikaika kino ikaika loa. Aohe laau hoomaemae koko elike me keia, a i makemake nui ia nohoi elike me keia.
Ka Ayer
Sarasparilla
Hoomakaukauia e
DR. J. C. AYER & CO.,
Lowell, Mass, U. S. A.
--
Oia ka Ma'i Awa- * Huaale a Ayer
awahia o ka Opu i na
--
No Keaha I HOOKAWELWE-
LE LOA AKU AI
OE I KELA
ANU, KUNU
AME PUU EHA?
--
Ua kaulana loa ka LAAU KUNU A AYER (Ayer's Cherry Pectoral) iloko o na makahiki he aneane 60, ma ka hoola ana i na Ma'i o ka Puu ame ke Akemama, ke Anu, ke Kunu, ka Ma'i La Grippe, ame ka Ma'i Mala o ka pale Akemama. He ono keia laau ma ka inu ana, a he oiaio ke ola.
AYER'S CHERRY PECTORAL
--
Na Medala Gula mai na Hoikeike Nui o ke Ae
--
Mai lawe i na Laau Emi i Hoohalikeia me keia
--
Hollister Drug Co. Lt.
Na Agena ma ke Paeaina Hawaii.
--
Kakela
ME Kuke.
Ka Halekuai Nui.
-:O NA:-
Waiwai Like Ole
* * O na Mea * *
HANA KAMANA A PAU
Na Lako Pili Hao Kukulu Hale,
Na Kepa bela,
Na Lei Ilio,
Na Kaulahao Ilio,
Na Pahi,
Na Upa,
Na Kope Hulu,
Na Pulupulu.
Na Palu Lio *
Na
Moa Muhiai,
Na Au Ho, Na Au Koi,
Na kua bipi, Na lei bipi, Na kalahao bipi
Na uwea pa, Na kaa palala,
Na mea piula, Na
Ipuhao.
Makau ME Aho Lawaia
Na Iliwai . . . . Na Pakeke . . .
Na Kula . . . Na Pakeke Hao . . .
Na Hulu Pena Na Kapu Hao . . .
Na Pulumi . . Na Pauda . . .
Na Pena me Aila Na Kukaepele . . .
Na Kopa . . . Na Uwiki a me . . .
Na AIla Mahu Na Ipukukui . . .
Mikini Humuhumu Kau-
lana a
Wilcox & Gibbs
Hookai Lopi,
KA REMINGTON, Elua Lopi.
A me na ukana he nui wale e kela a me keia ano.
Kakela me Kuke.