Ka Nupepa Kuokoa, Volume XXXVII, Number 24, 17 June 1898 — Page 1
| This text was transcribed by: | Nadine "alohatita" Samorano |
| This work is dedicated to: | San Francisco Giants! |
Ka Nupepa Kuokoa
KE KILOHANA POOKELA NO KA LAHUI HAWAII.
BUKE XXXVII. HELU 24 HONOLULU, POALIMA, IUNE 17, 1898. NA HELU APAU 2707
Hoolaha Loio.
W. R. KAKELA.
Loio a he Kokua ma ke Kanawai.
HE LUNA HOOIAIO PALAAPLA.
2370.
---
LYLE A. DICKEY
Loio a he Kokua ma ke Kanawai.
Alanui Kaahumanu, Helu 14. Tel.682.
Iloko o ke Keena o ka Loio Kuhina mamua, a he Loio Hoopii ma ka Aha Apana o Honolulu.
E hookoia na hana pili kanawai apau mai na Mokupuni mai.
O A. F. Tavares, Kakauolelo, Maheleolelo a Notere no ka Lehulehu. 1yr.
-----
Hoolaha Kumau.
Papa! Papa!
Aia ma kahi o
LEWERS & COOKE
(Lui Ma.)
Ma ke Kahua Hema o na Alanui Papu me Moi.
---
E LOAA NO NA
Papa Nouaiki
O kela a me keia ano.
---
Na Pani Puka.... ---
Na Puka Aniani... ---
Na Olepelepe.... ---
Na Pou............. ---
--- Na O'a.............
--- Na Papa Hele...
--- Na Papa Ku.....
--- Na Papa Moe..
---
Na Pili Hale
O na Ano apau.
A me na
Wai Hoohinuhinu Nani
O Na Ano Apau.
-----
Na Palaki o na Ano he Nui Wale.
---
Ke haiia aku nei oukou e na makamaka a pau, ua makaukau keia mau makamaka o oukou e hoolawa aku ma na mea a pau e pili ana ma ka laua Oihana no ka
Uku Haahaa Loa
E like me ka mea e holo ana mawaena e Laua a me ka Mea Kuai.
-----
E Hale Mai e Waa no Oukou Iho.
-----
He mea pono i kela ame keia ohana ke loaa ona laau lapaau maman o na ma'i o ka opu. I laau lapaau puhili no ka "Moku ino loa o ka lepo" (Diarhea) Nahu, Umii Kolera ame na ma'i apau o ka opu, aole he laau lapaau oi aku o ka maikai aelike me ka PERRY DAVIS LAAU PENIKILA (Pain Killer). Ua lawelaweia keia laau no na makahiki he kanalima, a ke ka hana mau ia nei i kela ame keia la, ma na ina apau o ka honua nei. O ka Hui Kuai Lapaau o Hollister ka Agena.
KA MEA HUNA POHIHIHI
Unuhiia e Hooulumahiemahie ao "Ke Kilohana Poo keia o ka Lahui Hawaii"
MOKUNA XXXVII.
I keia wa i haalelo iho ai ka Haku Hametona ia loko o ka rumi hookipa ana e noho ana me kana kaikamahine, a hele aku la ia iwaho no ka halawai ana me ka Haku Tereveliana, kona hoaloha kahiko.
He mea oiaio, ua halawai aku la ia me ia, a ua komo like mai la laua iloko o ka rumi hookipa me ke kuikui lima pu ana.
Ua ku ae la nohoi ke Lede Beatirisia iluna no ka hookina ana mai i ka malihini. He mea oiaio, ua hookipa mai la ua Ui nei o Hametona Kakela me ka hiehie nui i ka Haku Tereveliana.
He ana maikai ole na helehelena o ka Haku Tereveliana ia wa aole hoi e like me ka mea mau iaia ka maikai o kona mau nanaina. Me he mea la ma ka hoomaopopo ana aku, ua kau iho kekahi manao kaumaha a luuluu maluna ona, oiai e uhi ana ka haikea ame ke aiai pu ma kona helehelena. Aka, me ka leo ano hoihoi, pane mai la ia imua o ka Lede Beatirisia:
"Oia mau no kou ui e Beatirisia. Aole loa i hookumumu iho ke kila o ke au o ka manawa ma kou mau helehelena e ikeia aku ai hoi na maoli ano e like la me ko maua mau helehelena nei. Aka, no'u nei a no kou makuakane nei nohoi, ua ike maopopo ia na maiuu o ka manawa maluna o ko maua mau helehelena; a he mea maopopo loa hoi ua lilo maua i mau pio na ke au o ka manawa. Aole anei hoi pela, e kuu Hametona maikai?" i huli ae ai ua Haku Tereveliana nei a ninau ae la i ka Haku Hametona.
"No kaua nei, he oiai kau i olelo mai la, ua lilo kaua i mau pio na ke au o ka manawa, mamuli o kona hoominomino ana i ko kaua mau helehelena. No Beatirisia nei hoi, e hai aku au, ua loohia no ia i na maiuu lokoino o ke au o ka manawa. He oia mau no kona ano, aka, elike me kekahi kuahiwi i hookuaneaia kona mau papalina, aohe ka uliuli lipolipo o na mea ulu maluna ona, pela iho la ka anai ana a ke au o ka manawa ia Betirisia."
"Pela io no," wahi a ka Haku Tereveliana i pane mai ai, me ka hoomau ana mai, "aka, o kona kulana hiehie -ke kilakila hanohaweo o kona mau ano apau -oia mau no ke omamaka ulumahiehie oia mau mea maluna ona. Ke hoike mai nei nohoi kona helehelena aoau, oia mau no ka maikai o kona ola kino. Ua kaumaha loa ia nohoi au e ka Lede Beatirisia i ka loaa ole ana ia'u he wa pono e hele mai ai e ike ia oe i kela wa a'u i hoea mai ai i Ladana nei mamua kokoke aku nei no, oiai, mamuli o kekahi pilikia ano nui i hookui pu mai me a'u ia wa, ua haalele iho la au ia Ladana nei a hoi aku la no Tereveliana Pa me ka awiwi nui. O kekahi kumu nui nohoi o ko'u hoi awiwi ana, oia ka ikaika loa ana iho o keia wahi eha kahiko loa no o;u, oia ka rumatika. Aka, i keia wa nae, ua oluolu loa nae au."
Ma keia wa noho iho la ua elemakule Tereveliana nei maluna o kekahi noho paipai, ma kahi kokoke ma ke kapuahi hoopumehana.
Ua ninau aku la hoi ka Haku Tereveliana iaia: "He wahi hana ano nui paha keia au i hoea mai nei i ke kulanakauhale nei?"
"He wahi hana io no ka'u o ka hoea hou ana mai la i Ladana nei, a o ua wahi hana la, aia no ia mawaena ou ame ka Lede Beatirisia. A i mea hoi no olua e kali ole ai no ka ano o ua wahi hana nei, e hai aku no au ia olua me ka hakalia ole, oia hoi, ua makemake au e ike i kahi e loaa ai ia'u o kekahi wahine hana keaka, a i ole, he wahine himeni hoi, nona ka inoa o Kaunawahine Arevalo. Ua hiki anei ia olua ke kokua mai ia'u ma ke kuhikuhi ana mai i kahi e loaa ai keia wahine ia'u?"
"He inoa malihini loa kena au i hoike mai la ia'u, e kuu hoa," i pane aku ai ka Haku Hametona.
Alaila, me ke kuoo pane aku la ka Lede Beatirisia: "He wahi inoa malihini io no kena; aka, he inoa Sepania nae kena ma ka'u hoomaopopoana. I'a like nohoi ko'u haohao no kena inoa me ko Papa nei. Aole hiki ia'u ke hai aku ia oe i kahi e loaa ai o ka mea nona kena inoa."
E ka makamaka heluhelu, ke ike nei kaua ma keia wahi o ka kaua nanea, eia ka Haku Tereveliana ke huipu nei me ka Lede Beatirisia ame ka Haku Hametona -ke ninau nei hoi ka Haku Tereveliana i kahi e loaa ai ke Kaunawahine Arevalo -a ua ike nohoi o Beatirisia i ua mea la nona ka inoa a ka Haku Tereveliana i hoike mai ai, aka, aole i hoike aku ua wahine pahaohao nei o Hametona aka, aole i hoike aku ua wahine pahaohao nei o Hametona Kaleka imua o ka Haku Tereveliana, oia no ke Kaunawahine Arevalo.
No ka hoole ana mai o ka Haku Hametona a pela nohoi ka Lede Beatirisia, aole laua i ike ia wahine o ke Kaunawahine Arevalo, ua hoholo ae la ka hiohiona haikea ma kona mau elehelena, a noho iho la ia me ka kahanu ana. A ia wa i ninau aku ai o Beatirisia me ke ano omamaka ana ae o kekahi wahi hiohiona hoihoi maluna ona:
"E kuu Haku, e hewa anei hoi au ke ninau aku ia oe, i ke kumu o kou makemake ana i keia wahine?"
"E Beatirisia," wahi a ua elemakule nei i pane mai ai me ka haloiloi ana ae o na waimaka ma kona mau onohi maka, "ua makemake loa au i keia
-----
James I. Dowsett, (Kinmo Pelekane) kekahi o na kamaaina kahiko o Honolulu i hala aku.
-----
wahine no ka mea e pili ana i kaua kaikamahine. He wahi kaikamahine ui keia, a ua hookama hoi au iaia ma ke ano he moopuna ponoi oia na'u. Ua aloha au i keia kaikamahine me kuu naau apau ame kuu puuwai nohoi apau; aka, e Beatirisia, ua haalele mai oia i kuu hale, a me ha mea la ua hoi hou aku no paha oia i kahi o kona mau makua?"
Me ka mau no o ke ano mahiehie maluna o na helehelena o ka Lede Beatirisia, ninau aku la ia i ka Haku Tereveliana:
"Alaila -aole pela. He anela keia wahi kaikamahine ia'u. Mamuli o kekahi ulia wale, ua loaa iho la ia'u kekahi mea i hooulu mai iloko o'u i ka inaina hupo loa, elike me ka inaina o kekahi ilio pupule, a na'u ponoi maoli no i kipaku aku i ua anela nei mai kuu hale aku, a ua hana au i keia hana me he mea la he ilio oia. O dear me, I was crazy at the time (Ua pupule maoli au ia wa). Aole au i ike i ka'u mea i hana ai. Ua makemake loa au e loaa oia ia'u, e hoi hou oia me a'u. O, e Beatirisia, aole hiki ia'u ke ola ke ole oia e loaa ia'u. I must have her back. Ina aole oia e loaa ia'u ma Ladana nei, alaila, e hele ana au ma ka iliakea o ke ao nei no ka huli ana iaia."
I keia wa i ano e ae ai ka helehelena o Beatirisia, a huna ae la ia i kona mau maka ma ka hapai ana ae i kona peahi palulu ae la mamua, a ia wa i hiolo iho i kona mau waimaka, oiai, ua hoomaopopo iho la ia, ua komohia io maoli no ke aloha oiaio iloko o ka Haku Tereveliana no Alamira, kana kaikamahine, aka nae, no kekahi wa pokole wale no, ua holoi ae la o Beatirisia i kona mau waimaka, a hoi hou ae la nohoi kona helehelena a like me ko ka wa mamua.
Ninau aku la ua Lede Beatirisia nei i ka Haku Tereveliana: "Alaila, he mea ano nui loa aku la nohoi kau i ike ai no ka mea e pili ana i ua lede opio la, i kepaku ai oe iaia mai a oe aku?"
"He mea ano nui io no, a ua pili hoi ia i kona mau makua; aka, aole e ili ka hewa a kona makuakane i hana ai maluna ona. Ma na ano apau, aole loa he wahi lihi launa iki aku o ke ano o keia kaikamahine i na ano eleele i hanaia e kona makuakane."
"Owai la kona makuakane?" wahi a ka Haku Hametona i ninau aku ai. Aka, aole nae i pane mai ka Haku Tereveliana i haina na ke ninau a ka Haku Hametona i ninau aku ai, oiai, ua lilo loa kona noonoo apau ia wa maluna o Beatirisia.
O Beatirisia hoi ia wa, ua ano e ae la kona helehelena ia wa mamuli o ka oili ana ae o keia ninau mai kona luaai makuakane ae.
Oiai hoi, ka Haku Tereveliana e nana pono ana maluna o ka Lede Beatirisia, ame kona pane ole ana mai hoi i ka ninau a ka Haku Hametona i ninau aku ai iaia, ua ninau aku la ia ia Beatirisia:
"Ke mau nei no anei kou aloha ia Oremona Adelo?"
Aole i kana mai ko Beatirisia hoopahaohao loa ia no keia ninau a ka Haku Tereveliana, a me ka hoopihaia ana o kona puuwai me ka ukiuki ame ka huhu launa ole no Adela ua pane aku la ia me ka helehelena kuoo imua o ua Haku Tereveliana la:
"Ua aloha anei au i ka Haku Adelo, wahi au i ninau mai nei ia'u e kuu Haku. Aka, aia au ma kekahi welau i kue loa i kau mea i ninau mai nei ia'u e kuu Haku. Aole o'u makemake iaia, a ua hoowahawaha maopopo loa au iaia."
I keia wa i ikeaia aku ai ka mohola ana ae o na helehelena o ka Haku Tereveliana.
"I hookahi a'u wahi ninau hou i koe ia oe, e Beatirisia, ke mau nei no anei kou aloha ia Geofere?"
No keia ninau a ua Haku Tereveliana nei ua hoohuli ae la o Beatirisia i kona mau maka ma kahi e, oiai hoi i mae ano e loa iho ai kona helehelena, a mahope huli pono hou mai ia ia imua o ka Haku Tereveliana a pane mai ia:
"Aohe a'u haina kupono e pane aku ai ia oe no keia ninau au i ninau mai nei imua o'u."
Ia wa hoi i loloku iho ai ka manao ana iloko ona, ua hoike paha ka Haku Adelo i na mea apau e pili ana iaia ame kana kane imua o ua Haku Tereveliana nei, a oia paha ke kumu o kona ninau ana mai iaia i keia ninau. Aole i kana mai ka nui o kona pilikia iloko oia sekona, me he mea la ma kana hoomaopopo io, ua umiiia iho kona pu-ai e kekahi mau manamanalima oolea, a ia wa i pahemo wale iho ai no ka peahi mai kona lima iho a ua nho pu iho la ia me ka punia o kona noonoo i na manao pihoihoi launa ole.
"Nani ka nui o ko'u aloha ia oe, e Beatirisia Hametona, ina eia no oe ke aloha nei i keia ino," wahi a ka Haku Tereveliana i kamailio mai ai me ka hoomakuekue ana iho o kona mau kuemaka. "Ua maopopo loa ia'u, ua kanikau oe nona me ka oiaio. Ua hookuuia kou mau waimaka me ka walohia ma kou mau papalina no ka mea a kou naau i paulele ai. Ua mohai oe ia oe iho e noho hookahi i ke ao nei no kou aloha iaia, a ua kapae oe i na leo uwalo he nui e poloai aku ana ia oe e alana oe ia oe iho ma ke kuahu hoano o ka materemonio. Aole loa i komo iki iloko ou ka manaoio ana no kona hana ana i kekahi karaima eleele loa maluna o kuu kino elemakule nei. A e Beatirisia, eia oe ke ohi nei i ka uku panai o kau mea i haawi ai i kou paulele ana. Aka, e Beatirisia, e hoomakaukau oe no kekahi mea huna pohihihi a'u e hoike aku ana imua ou. Eia no o Geofere Tereveliana ke ola nei i keia la."
Aole i kana mai ka hoohikilele ia o mau huaolelo hope i hoopukaia mai ai e ka Haku Tereveliana, a ua aneane e puka ka leo hooho o ke kupilikii i lele ae ai iloko o kona houpo, aka, ua kaomi iho la ia me ka hoomanawanui iloko ona.
Nana aku la hoi ia maluna o ka Haku Tereveliana me na onohi maka pihoihoi loa.
I kela wa i kuae ai ua Haku Tereveliana nei iluna, hele aku la ia ma kai a Beatirisia e ku ana, a lalau iho la i kona lima a kaikai ae la iluna, me ka olelo ana aku hoi:
Ae, e Beatirisia, ke ola nei no o Geofere Tereveliana. Eia nooia maloko nei o Enelani."
Aia hoi na onohi maka o Beatirisia ke nana mai la iaia me ka pohina ana ae o ka waimaka ma ia mau onohi maka. Alila, pane hou iho la ua Haku Tereveliana nei:
"E Beatirisia, e hiki ana anei ia oe ke hoomanawanui hou aku. Alaila, e hoolohe mai. Aole loa i like kona kupaa mamuli ou elike la me kou kupaa ana mamuli ona. Ua mareia oia i ka wahine. O keia Kaunawahine Arevalo a'u i ninau mai nei ia olua, oia kana wahine."
"Pehea?" i hooho ae ai ka Haku Hametona. "Ke ola nei no o Geofere, a ua mareia oia i ka awine? Ea, aole i kana mai ko'u kanalua no keia mea. Pehea, ua ike anei oe iaia, e Tereveliana?"
"Aole; aka nae, ua ike au i kana wahine, me ko'u ike ole ana nae o kana wahine ia. He wahine nui puipui keia, he loloa kona mau lauoho. He wahine ano geremania keia, a he ui nohoi, a he kulana hiehie kona me ke kilakila."
"Alaila, ua kaamilio pu oe me ia?" wahi a ka Haku Hametona i ninau aku ai.
"Ae. Ua kamailio pu au me keia wahine elike no me a'u e kamailio nei ia Beatirisia. Ua hoike mai nohoi keia wahine he mau keiki ka iaua. A e Beatirisia, o keia kaikamahine a'u i olelo aku nei ia olua, oia kekahi o na keiki a Geofere me keia wahine. Aka, o keia kaikamahine nae he anela oia imua o ko'u mau maka. Ua aloha au iaia elike no me ko'u aloha ana ia Geofere i kona mau la i paumaele ole ai kona mau lima. Ua pili maoli ko'u naau i keia kaikamahine, a o ka mea i oi loa ai, ua loaa ia'u keia haawina aloha no keia Lede opio ma ko'u wa elemakule. Makemake loa au e loaa oia ia'u."
Na keia mau huaolelo hope a ua Haku Tereveliana nei i hoopuka ae ai i hoomama ae i ko Beatirisia manao, a ninau aku la ia:
"Pehea, mamuli anei o kou aloha i keia Lede opio au i olelo mai nei e hookipa aku ai oe i kou aloha no kona laaui makuakane? E kala aku anei oe i ka makuakane o keia kaikamahine au i aloha loa ai."
I keia wa i hoholo ae ai ka ula ma na papalina o ua Haku Tereveliana nei, a me ka leo i piha i ka huhu ame ka inaina, pane mai la ia:
"Aole, aole. Aole loa au e apo hou i ka lima o kela keiki limakoko a puuwai eleele. Aole loa e hiki ia'u ke hiamoe pu me ia malalo o ke kaupoku hale hookahi. Aka nae, ina e loaa ana ia'u o Alamira aole au e hana i kekahi hana e kau ai ka hoopai a ke kanawai maluna ona. Ina e hoihoi mai ana ia ia Alamira ia'u nei, e hookuu aku no au iaia e noho me ka maluhia ma kahi ana e noho nei i keia wa. Aka, aole o'u makemake iki e kamailio mai oia ia'u no ke kala ana aku iaia. Aole loa he mea nana au e oolaulea me ia. No. no."
Ua kulou iho la ke poo o Beatirisia ilalo, a liuliu pane mai la ia:
"A pehea hoi, ina ua hiki ke hooiaioia ua hewa ole oia, elike hoi me ka'u i manao ai nona?"
"E Beatirisia maikai, aole ou hoahewa iki ia oe no kou hoao ana e imi mai iloko nei o'u i wahi mea no'u e hoohuliia ae ai mai ka hoohiki a'u i hoohiki ai me ka laahia loa. E hai aku au ia oe, ua hewa maoli no oia. Aole kanalua iki o ko'u noonoo ma ia mea. Aka ina hiki ia Geofere Tereveliana ke hooiaio me ka hiki ole ke kanalua ia, ua hewa ole ia i ke karaima i loaa pono ai oia ia'u me ka hiki ole ia'u ke hoohewahewa, alaila, o ko'u wa auanei ia e huikala aku ai iaia. E kukuli no au imua ona, a nonoi aku iaia e kala mai oia ia'u, a no ka'u mau hana hoomaau iaia. Ae, e kukuli e Beatirisia, ua loaa pono pono o @ @ hoi, ua ike pono au e paa ana oia i ka pahi ma kona lima imua ponoi o ko'u alo ma kela po weliweli i hanaia ai kela karaima. No keia wa nae, ke hoike aku nei au ia oe, e Beatirisia, mai keia la aku a hoea i ka la e puka mai ai ka oiaio, ina he oiaio aku kekahi i koe, he mea pono iaia ame kana wahine ke hookaawale mai a'u aku. Mai noho laua a hookokoke mai ia'u. Ua hai mai hoi o Adelo ia'u, eia ka keia mau mea ke imi nei ma na ano apau e pahele la ai au. Ua hoolilo laua i kela kaikamahine hala ole i moepuu imua o'u i mea ka e hookoia ai ko laua mau manao apuhi. E hai aku au, aole i kana mai ko'u inaina ia laua a i elua."
I keia wa i hookuu iho ai ua Haku Tereveliana nei i ka lima o ka Lede Beatirisia, a noho iho la hoi ia maluna o kona noho, oiai hoi o Beatirisia i maule aku ai a waiho kohu make iho la maluna o ka noho ana e noho ana, me ka hoomaka ana hoi e hehee iho ilalo. (Aole i pau.)
-----
NA KUMU E LILO AI KA CHAMBERLAIN LAAU NO KE KOLERA, KE NAHU AME KA HI I LAAU POOKELA LOA.
---
1. E loaa koke ana no ke ola ame ka oluolu o ka nahu ma ka opu, ka eha ma ka opu ame ke kolera morbus.
2. Nokamea, oia wale no ka laau e puhili ole ana ma na ma'i ikaika loa o ka hi koko ame ka hi maoli.
3. Nokamea, oia wale no ka laau e ole ai ka hi mau.
4. Nokamea, oia wale no ka laau e ola ai ke nahu kau mau.
5. Nokamea, oia wale no ka laau e ola ai ka hi koko laulata puni.
6. Nokemea, oia wale no ka laau e ola ai na ma'i kolorea infantur.
7. Nokamea, oia ka laau ola koke o ka ma'i o ka opu.
*. Nokamea, aohe e loaa mai ana na hopena ino.
9. He oluolu a maikai ka inu ana.
10. Nokamea, ua oi aku na oia i pakele i keia laau mamua o na laau e ae. E kuaiia ana e na poe kuai laau lapaau apau. O Benson, Smith & Co., na Agena no ka Hawaii Pae Aina.
-----
Ma keahiahi Poalua nei i haawi ae ai kela haole hana kupua i kana mau hana hoikeike noeau maloko a ka Hale Mele Hou. O kona inoa kapakapa, "Ke Kupua Moramona." He kanaka opio wale no keia, o kana mau hana mae, ua ku i ke akamai lua ole