Ka Nupepa Kuokoa, Volume XXXVII, Number 20, 20 Mei 1898 — Page 2
| This text was transcribed by: | Jackie Ka`alohilani Amazaki |
| This work is dedicated to: | Kalei and da bes `Ike Kuokoa Team! Aloha no, Aunty Jackie |
Ka Nupepa Kuokoa
KE KILOHANA POOKELA NO KA LAHUI HAWAII.
Hoolaha Mana Hooko
OLELO HOOLAHA HOOPAU HUI.
No ka hoopau ana i ka Hui i ikeia e Waihee Sugar Company:
No ka mea, o Waihee Sugar Company, he hui i kukuluia a i hoohanaia i kulike me ke kanawai o ko Hawaii Paeaina, a oiai, ua waihoia mai he palapala noi ma ke Keena o ke Kuhina Kalaiaina, no ka hoopau ana i ua Hui la, ame kekahi palapala hooia kupono elike me ke kuhikuhi o ke Kanawai.
A nolaila, ke hoolahaia aku nei i na poe apau i kuleana ma na ano apau iloko o ua hui ia, ina he mau kumu hoohalahala kupono kekahi no ka palapala noi e hoopau, e waiho mai ma ke Keena o ke Kuhina Kalaiaina, ma a mamua ae o ka Poalima, Iulai 15, 1898, a o keia mae keia e makemake ana e hoolohe, e pono e hiki mai ma ke keena o ka mea nona ka inoa malalo iho ma ka Hale Mana Hooko, ma ka hora 10 o ua Ia Ua i oleloia, e hoike mai ina he mau kumu kekahi e hoole ana i ua palapala noi Ua.
HENRY E. COOPER.
Kuhina Kalaiaina Kuikawa.
Keena Kalaiaina, Mei 6, 1898.
2702-10t
HOOLAHA NO NA AINA AUPUNI.
Ma ka Poalua, Mei 31, 1898, ma ka hora 12 awakea, ma ke Keena o J. Kaelemakule, Kailua, Kona Akau, e kuai kudala ia aku ana:
Ka hoolimalima o kekahi lihi o ka aina o Puunanahulu, Kona Akau, nona na Eka he 12,000, oi aku a emi mai paha.
Nanawa hoolimalima, he 21 makahiki.
Uku hoolimalima maluna aku o $150 no ka makahiki, e hookaa mua ia ana i keia ame keia hapalua makahiki.
A ma ia manawa hookahi no, a ma ia wahi hookahi no, e kuaiia aku ai he @ Eka, ma Puunanahulu i oleloia, @o na aelike kuikawa, no ka hookaa dala ana ame na hana hou.
Kumukuai maluna aku $290.25.
No na hoakaka piha e pili ana i na kumu aelike o na aina maluna ae nei, na kii, a pela aku, e ninau ma ke Keena, Aina, Honolulu, a i ole, ia J. Kaelemakule, Kailua, Kona.
J. F. BROWN,
Agena o na Aina Aupuni, Honolulu, Mei 2, 1898.
2701-4t
Ma ke kauoha a na Komisina o na Aina Aupuni, ke hoolahaia aku nei ma keia, e malamaia ana ke kuai i hoikeia maluna ae nei ma ka Hale Hookolokolo ma Honolulu, aole hoi ma ke Keena o ka Hope Agena ma Kailua, ma ia la no a ma ia hora nohoi.
C. P. IAUKEA,
Kakauolelo Komisina Aina.
Keea Aina Aupuni, Honolulu, Mei 17, 1898.
HOOLAHA NO NA AINA AUPUNI.
Ma ka la 4 o Iune, ma ka hora 12 awakea, ma ke alo iho o ka Hale Hookolokolo, e kuai kudala ia aku ai:
Ka hoolimalima o ka Aina Aupuni o Wakiu, Hana, Maui.
Area 1.115 Eka. oi iki aku a emi mai paha.
Manawa, he 21 makahiki mai Mei 2, 1899.
Uku hoolimalima maluna aku o $100 no ka makahiki, e hookaa mua ia i keia ame keia hapalua makahiki.
E paa ana ka hoolimalima malalo o na olelo kaupale no ka malama ana i na ululaau a no na apana aina hookuonoono.
No na hoakaka piha e ninau ma ke ma ke Keena Aina ma Honolulu.
J. F. BROWN,
Agena o na Aina Aupuni. Honolulu, Mei 2, 1897.
2701-5t
MAKE PAHA A OLA HOU.
E hoike ana kekahi lono mai Maui i kekahi make kupaianaha i ikeia ma Kamaole, Kula, Maui.
Ua loaa aku la ke kino o kekahi Pake, nona ka inoa o Ah Yung nona paha no makahiki he 40, ua make, maluna o kona wahi moe. I ka nana pono ia ana iho o kona kino, aohe hanu, a ua hele nohoi a keokeo pu. Ua laau ke kino. Ma na ano apau ua hoike mai ke kino ua hala aku ke oia.
Nolaila, ua hoomakaukau kona poe hoaloha e hana i na mea apau e pono ai ke kino make. Ua ho-a ia na ihoiho kukui Pake, ua hookomoia ke kino iloko o ka pahu. Aka, mamua o ka holopono loa ana o keia mau hana, oiai nae e waiho ana ke kino iloko o ka pahu, aia hoi me ka hikilele nui, ua puiwa ae ia na mea apau i ke ala ana mai o ua Pake nei a noho ana iluna iloko nohoi o ka pahu. Ua pai ae la hoi kona mau lima i na laau ihoiho kukui e aa ana a lele @ ana i kahi e. Ua nui launa ole mai ka maka`u o na Pake, a ua pau nui i ka holo i waho.
Malalo o ke kauoha a na Luna Aupuni o ia wahi, ua laweia ua Pake nei no ka Hale Hookolokolo ma Makawao. Ua manaoia he ano pupule keia Pake.
KA
Nupepa Kuokoa
No ka Makahiki $2.00
No Eono Mahina 1.00
Kuike ka Rula.
PCKA 1 2 3 4 5 6
ASA. Pule Pule Pule Pule Pule Pule
iniha.. $1.50 $2.00 $2.50 $3.00 $3.50 4.00
2 iniha.. 2.00 2.75 3.50 4.00 4.50 5.00
3 iniha.. 2.50 3.50 4.50 5.00 5.50 6.00
4 iniha.. 3.00 4.00 5.00 6.00 6.75 7.50
5 iniha.. 3.50 4.75 6.00 7.00 8.00 00
iniha.. 4.00 5.50 7.00 8.00 9.00 10.00
O na Olelo Hoolaha a pau e hoouna ia mai ana no ka Hoolaha maloko o keia Nupepa, e hoouna pu mai me ka auhau, a ina aole, aohe hookomo ia.
HOOPUKAIA E KA
HAWAIIAN GAZETTE CO.
C. G. BALLENTYNE, Luna Nui.
JOSEPH M. POEPOE, Lunahooponopono.
Honolulu , Oahu.
POALIMA........ MEI 20, 1898.
Ka Laikiniia ana o ka Opiuma.
Ma ko makou hoomaopopo ana eia ka Aha Senate ke haawi nei i na hooikaika ana no ka laikiniia ana o ka Opiuma iloko nei o ka aina, e like me ko kekahi mau wa i hala ae nei mamua.
Ma ko makou manao, he keehina hana kupono no keia e hiki ole ai ke hoahewaia ka Mana Kanawai no ka hooholo ana he kanawai elike me keia. He mea pono ke laikiniia keia waiwai kalepa e hana malu ia nei kona hoohanaia ana e kekahi poe iloko nei o ka aina, e like nohoi me ka laikiniia ana o ka waiona.
Mamuli auanei o ka aeia ana o keia kumuwaiwai e kalepaia malalo o ka mana laikini e kaa ana maluna o ka mea paa laikini kekahi koikoi o ka makaala ana i na poe haihai kanawai. He kumu hoowaiwai mai nohoi keia i ke Aupuni.
Ke Komite Hookipa i na Koa Amerika.
Ma ka po Poakolu nei i noho ai kekahi halawai nui o na poe kuonoono o Honolulu nei, maloko o ka Hale Paikau Aupuni, no ka noonoo ana no ke ano e hookipa mai ai i na koa Amerika e hoea mai ana ma ka apopo, a ma ka la Sabati paha.
He halawai ohohia nui ia keia e ka poe apau i akoakoa ae malaila.
He lehulehu loa na olelo paipai ulumahiehie i kamailioia mai e ka poe kamailio, a ua piha uwila na mea apau.
Mawaena o na poe i kohoia i poe kokua pu i na hana hookipa mai i na koa Amerika, ua ike iho makou i keia mau inoa kanaka Hawaii maoli: John Ena, H. L. Holstein, J. Kea, J. L. Kaulukou, S. K Ka-ne, S. K. Kaeo, A. N. Kepoikai, D. L. Naone, Robert W. Wilcox, J. M. Poepoe ame kekahi poe e ae.
O ka hoea ana mai ia nei he poe kanaka koa i hiki ko lakou nui i na tausani he puulu ia e loaa ai he ohohia nui ana mawaena o ko kakou poai nei. O ka ikeia ana o kekahi huina koa i hiki aku i ka 6,000 a 7,000 ma ka wa hookahi ma Honolulu nei, he nanaina nuhou loa ia ia kakou nei o keia wa.
KA LAAU MAIKAI LOA NO KA RUMATIKA.
(Mai ka nupepa Fairhaven (N. Y.) Register mai.)
Ua hoike mai o Mr. James Rowland o keia kulanakauhale, no iwakaluakumamalima makahiki i loohia ai kana wahine i ka rumatika. He mau pule i hala ae nei, ua loohiaia iho la oia i ka eha, a ua ku-a-pupule maoli ia. Hoouna aku la ia ia Mr. Roland e kii i kauka, eia nae, ua heluhelu hoi ia i ka Laau Hamo a Kamalena, a ma kahi o kona kii ana aku i ke kauka, hele aku la i ai ka halekuai a loaa hookahi omole laau hamo. I kinohi aole i apono iki kana wahine no keia hana ana i hana ai, aka, ua hamo no nae ia, a iloko o hookahi hora ua hoi aku la ia e hiamoe. Eia oia ke hamo mau nei i ua laau la i keia ame keia wa e ike ai oia i ka eha ame ka hu`i, a e loaa mau ana nohoi ka oluolu. Ua olelo oia aohe ana laau i lawelawe ai elike me keia ka maikai. E kualia ana e na poe kawili laau apau ame na poe kuai laau lapaau. O Benson, Smith & Co., na Agena ma ko Hawaii Pae Aina.
Ke ole e loaa na kuia, alaila, e ku mai ana ka mokuahi “Kina,” no Honolulu nei, mai ke kukulu komohana mai. Maluna mai paha ona e loaa mai ai he mau nuhou ano nui no ke kaua ma Manila.
Ua hoike mai kekahi makamaka ia makou, mai Kalauao, Ewa, mai, oia o Mr. Kukulahu, i kono piha hauoli ma ka Poaono i hala i kona ike ana i ka nui o ka poe heluhelu i ka Nupepa Kuokoa, maluna o ke kaa-ahi mai lalo mai o Ewa. Ua pau pono na kanaka Hawaii iloko o Ekolu kaa ohua i na nupepa (Kuokoa) ma ko lakou mau lima. He oiaio, eia ke Kuokoa ke pii nei i keia wa.
NUHOU O NA AINA E
KE KAUA MA PILIPINE.
Na Oni ana o ke Kaua ma Cuba.
KA OLELO HOOHOLO HUI NO KA HOOHUI AUPUNI.
KA HOIKE PILI OIHANA A KOMODOA DEWEY I KE KEENA KAUA MOANA O KE AUPUNI O AMERIKA.
Wasinetona, Mei 7. – O hoike pili Aupuni a Komodoa Dewey i hoouna mai ai ia Kuhina Long, he elua mau lono kaokoa ia. Hookahi mai Manila mai, a hookahi mai Cavite mai, a penei ua mau hoike la:
“Manila, Mei 1. – Ma ka wanaao o keia kakahiana i hoea mai ai ke aumokukaua. Ua hoouka kaua koke aku no au i ka enemi, a luku aku la i keia poe moku Sepania: Reina Cristina, (Moiwahine Kilikina), Castilla, Ulloa, Isle de Cuba (Mokupuni o Cuba), Genrela Lozo (Kenerala Lozo), ke Duero, Correo, Velasco, Mindanao, hookahi moku lawe koa, ame ka batari pu ma Cavite. Aole i hoopoinoia ke aumoku kaua, a he mau wahi kanaka kakaikahi loa kai hoeha malaniia. O kahi wale no e hiki ai ke telegarapa aku, oia no ke Kanikela Amerika ma Hong Kong. E launa kamailio aku ana au me ia. “DEWEY,”
“Cavite, Mei 4. – Ua lilo mai ia`u kahi hoolulu moku ma Cavite, ma na Mokupuni Pilepine. Ua pau i ka ulupaia na papu ma ka nuku o ke awa. Ua hoonohoia aku na koa. Eia malalo o ko`u mana ke awa holookoa, a ua hiki ke lawe i ke kulanakauhale ma ka wa, i makemakeia. He maikai ke ola o na kanaka apau o ke aumokukaua, a ua ulumahiehie nohoi na manaolana. Aole i maopopo loa ka nui o na poina o na Sepania, aka, ua koikoi no nae. Me he mea ia nae, he 150 ka nui o ka poe i make. O ke Kapena hoi kekahi o ka Reina Cristina. Eia au ke kokua nei ma ka hoomalu ana ame ka malama ana i ka poe Sepania i ma`i a i hoehaia. He elua haneri ame kanalima-kumamaono ka nui o ka poe i hoehaia maloko ponoi nei o ko makou mau laina. He nui ke pioloke ma Manila. E nana aku ana au i ka maluhia o na kanaka o ko na aina e maanei.
“DEWEY.”
KA PAPA HOIKE HANA POKOLE A. DEWEY.
Poakahi, Aperila 25. - Loaa mai la ka lono no ke kukalaia ana o ke kaua. Haalele iho la i na kai malalo o Beritania Nui.
Poakolu. - Holo aku la no Manila, ma ka holo mama loa e hiki ana ke hanaia e ka lako lanahu o na moku.
Poano. - Hala hope ae la na batari pu ma ka nuku o ke Kaikuono o Manila.
La Sabati. - Hoopiholo aku la, puhi aku la i ke ahi, a hopu pio aku la hoi i na moku apau o ke aumoku kaua Sepania, paniku aku ia a luku aku la ekolu mau batari pu.
Poakahi. - Noho aku la makou i kahi hana moku. Hoopahuia eono batari pu ma ka nuku o ke awa. Oki iho la i ka uwea telegarapa. A hoonoho iho la i ke paniku ana ia Manila. Hoauheeia na koa Sepania mailoko aku o Cavite.
Poalua ame Poakolu. – Huli aiaa-papa aku la i ka aoao malalo o ke kaikuono ame kahi i hoomoeia ai na topido. Hoomaha aku la i na kanaka. Hoomakaukau iho la i n a hoike oihana.
O ka poino o na Sepania, he umi mau moku apau, lehulehu loa na moku topido, elua mau moku lawe koa, hookahi wahi hoolulu moku a he eiwa mau batari pu.
Ke huipuia me na poe i poino mauka o ka aina, ua like me 1,200 poe Sepania i make a i hoehaia.
O ka huina waiwai io o na waiwai o na poe Sepania i pau i ka poino, a i lawe pio ia hoi, aia i ka huina o $6,000,000.
Ma ka aoao hoi o ka poe Amerika, he eono poe kanaka i hoehaia a he $5,000 no ka poino i loaa i na moku.
NO KA MOKUKAUA BALTIMORE
NA KANAKA I HOEHAIA.
He ewalu ka nui o na kanaka i hoehaia o luna o ka mokukaua Baltimore, oia o Lutaneia Frank W. Kellog, R. W. Barlow, R. P. Corelet, W. O. Keefe, R. Ricciardelli, E. Snellgrove.
O ka mokukaua Amerika i loaa na palapu koikoi, oia no ka Baltimore. Ma ka lua o na hooukakaua ana, ua nui na poka a na moku Sepania i loaa mai iaia, a ua hoopoinoia hoi kona mikini. A na ia poino i loaa iaia ma keia kaua ana i hookuemi hope aku iaia no ka paahanaia ana o kona mikini, a i ka hala ana o hookahi hora ame ka hapa ua komo hou oia iloko o ke kaua. A ma ka wa hoi i pau ai ke kaua ana, ua hiki pono loa i kona poe paahana mikini ke hoopau i kona pilikia.
OKIIA KA UWEA TELEGARAPA.
Ua okiia ka uwea telegarapa e Dewey, ma kahi he umikumamalima mile mai Manila mai, ma ka nuku ponoi hoi o ke awa. Aole pilikia ma ka imi ana a loaa ka uwea tlegarapa. Ua makaala loa o Dewey no keia mea.
HE NUI KA HANA A DEWEY E HANA AKU AI.
Nu Ioka. Mei 8. – Ua telegarapa mai ia ka mea kakau o ka nupepa Herald mai Wasinetona mai, penei: Mamuli o ka manaoia ana e hoouna aku i pualikoa i Manila, ua kauoha aku nei ke Komisina Hoolako Ai o ka Oihana Koa e hoomakaukauia a e hoounaia i Kapalakiko i 60,000 haawina ai, e lawa ai na kanaka he 5,000 kanaka no eha mahina.
Ua hooholo pono loa ia hoi e ka Papa Kaua Moana i keia la iho la, aole ka mokukaua Charlestone holo aku ana no na mokupuni Pilepine mamua o keia pule ae, nolaila, e liio ana ia i moku e holo pu ana me na moku lawe koa ame na lako ai e hoounaia aku ana i Manila.
He nui ka hana e hanaia aku ana e Dewey, mamua o ka ulupa loa ia ana o ka mana o na Sepania ma ka pea Hikina o ka Hapa Poepoe Hikina. He mea pono ke lawe pio ia e ia ke kulanakauhale poo o ka Mokupuni o Panay, oia hoi o Iloilo. Ua paa keia wahi i ke kiai pono ia e na koa Sepania. He mau wahi okoa ae nohoi kekahi e pono e lawe ia e ia me ka ikaika o kana mau pu. He mea maopopo nae, ua hoonawaliwali loa ia ko Sepania mana ma na Mokupuai o Pilepine. mamuli o ka lanakila i loaa ia Dewey ma Manila. Ua kauoha aku hoi na Poo Aupuni maanei iaia e noho oia malaila, me kona mau moku a hiki i ka wa e hoea aku ai na puaiikoa e manaoia nei e hoounaia aku i poe kokua iaia.
KE KULANA AUPUNI I MANAOIA NO MANILA.
Nu loka, Mei 9. – Ua hoouna mai la ka mea kakau o ka nupepa Herald mai Wasinetona mai i keia Iono: Ua noonoo ka Aha Kuhina ma keia la iho la, no ka mea e pili ana i ke ano o ke kulana Aupuni e hoonoho aku ai ma Manila, oia hoi ma na Mokupuni Pilepine. Ua kaheaia aku ka Aha Kuhina e ka Peresidena, elike me ka mea maa mau, no ka heluheluia ana o kana palapala imua o ka Ahaolelo no ka mea e pili ana i ka hoouka kaua ma ke kaikuono o Manila, a mahope iho o ka pau ana o ka heluheluia ana o ua palapala la, ua hapaiia keia noonoo ana no ke ano o ke Aupuni kupono e hoonoho aku ai ma ia mau mokupuni. Ua manaoia hoi, e hoonohoia i Papa Komisina, oia hoi o Hope Adimarala Dewey, Kanikela Wildman ma Hongkong ame Kanikela Williams, i noho mua ai ma Manila, ma ke ano na lakou e hooponopono a e hoomalu ia mau mokupuni, eia nae aole i aeia keia manao.
Ua hooholoia hoi me ka maopopo loa, e hoouna aku nolaila i 6,000 poe koa, malalo o ka noho poo ana a Mekia-Kenerala Merriam, no ke kokua ana ia Hope Adimarala Dewey ma ke kukulu paa ana i ka mana Amerika ma na mokupuni Pilepine. Ua pau iho nei i ka hooponoponoia e ka Puuku na hana no ka hoouna ana i na lako ai, na koa ame na pono e oe no na koa o Kenerala Merriam.
O na mokuahi apau o na laina mokuahi Pakipika ame Panama, ua pau i ka hoopaaia e ke Aupuni, a ua hai ia mai au e hiki ana i keia mau hui ke hoolako mai i ke Aupuni i ka heluna moku i makemakeia. He mau moku nunui keia a holo nohoi.
Ma ka halawai ana a ka Aha Kuhina i keia la, ua hooholoia ka hoonohoia ana aku o kekahi Aha Hoomalu Koa ma Manila. Aia ana maloko o keia Aha, hookahi aliikoa moku, a i ole ia, he aliikoa aina paha, a e loaa ana iaia ka mana piha ma na hana kuloko ma Manila. Aole nae i koho ia kekahi mea i keia wa no keia oihana.
HE HOOUKAKAUA MOANA MA CUBA.
Ki Komohana, Felorida, Mei 8. – He nui ka hauoli maanei i keia po, ma ka wa i hoea mai ka moku ahailono, me ka nuhou no kekahi hoouka kaua moana i kaua ia mawaho ae o ke kaikuono o Cardenas, ma ka auina la o nehinei, mawaena o ka mokukaua topido Winslow ame ekolu mau mokukaua Sepania. Hookahi o na moku Sepania i hoopoino ia, a o kona kokoolua iho hoi ua holo aku.
Mamua o ka hooiliia ana o ke kaua, ua kia pololei aku la ka holo ana o ua wahi mokukaua Amerika nei noloko o ke awa, a i ka ike ana mai o na poe Sepania, o ko lakou wa ia i haawi ae ai i na hoailona i na mokukaua Sepania, e hoike aku ana ia lakou no ka hookokoke ana aku o ka enemi, a oia hoi ka wa i puka mai ai he ekolu mau mokukaua Sepania no ka halawai ana mai me ia. Ua manao loa na Sepania e pau ana kahi mokukaua Amerika i ka hoopahuia e ko lakou mau mokukaua, aka, mahope iho o kekahi paio hahana ana mawaena o ua mau moku Sepania la ekolu ma ke mokukaua Winslow, hookahi ma kekahi aoao, ua hoopoinoia hookahi moku Sepania, a hoauheeia elua.
UA HAALELE IO ANEI NA KOA SEPANIA IA MANILA?
Maderida, Mei 8. – Ua laulaha ae ka Iono, ua loaa mai kekahi Iono mai Manila mai, e hoike ana ua haalele iho la na koa Sepania ia Manila, me ka lawe pu ana aku me lakou i ko lakou mau pono kaua apau ame na lako kaua nohoi apau, me na lako ai.
KAU KEKAHI PUALIKOA CUBA MA KA MOKUPUNI O CUBA.
Wasinetona, Mei 9. – Ma ka po nei i hoea mai ai o Kenerala Nunez o ka puaiikaua Cuba noonei nei, mahope iho o kona huli hoi ana mai nei mai Cuba mai, ma ka wa i hoopae maalahi a aku ai ka puali koa Cuba. Ua hoea aku keia poe koa he elua pule i hala ae nei, mahope mai hoi o ke kukakuka pu ana o Kenerala Nunez, Kenerela Miles ame Senor Quesada, ka elele Cuba ma Amerika nei, a o ua huakai la no ke kukakuka ana ia me na Kenerala Garcia ame Gomez. Mahope iho o ko Kenerala Nunez kamailio pu ana me Mr. Quesada, ua haalele iho ia oia ia a nei no Nu loka no ka waiho ana aku i kana hoike imua o Peresidena Paima. Aole hoi i loheia kekahi mea e pili ana i keia huakai ua huna loa ia. Ua hoomaopopoia nohoi, e hoomau aku ana oia i ka ohi ana i na poe Cuba po ka hele ana aku i ke kaua, a oia maoli no ke noho alihikaua nui maluna oia poe koa, oiai hoi na koa e ae o Cuba i keia wa malalo o Garcia ame Gomez, malalo no ia o laua.
NA MOKUKAUA AMERIKA MALALO O ADIMARALA KAMEKONA.
Nu Ioka. Mei 8. – E hoike ana kekahi Iono mai Wasinetona mai, penei:
Ua loaa mai la na lono telegarapa mai a Hope Admimarala Kamekona mai, ma ka la i nehinei i hoea aku ai kona aumokukaua mawaho aku o ka mokupuni o Hayti. Ma ia wahi oia e ku kiai ai a hiki i ka wa e loaa aku ai iaia ke kauoha mai ke keena kaua moana aku no kahi ana e nee hou aku ai. a i ole ia, ua loaa mai paha iaia kekahi lono mai kekahi moku hoomakakiu mai o loko o kona poe moku, na ka mea e pili ana i na moku Sepania i haalele aku ai i St. Vincent, he eiwa ia i hala ae nei. Ua hoike ae na nupepa, ua hoea mai la ua mau moku Sepania nei no Sana Juan. a, aia hoi lakou mawaho aku o Martinique, eia nae aole loa ke keena kaua moana i lohe iki ia mea ma ke ano pili aupuni. mai na mokuahi kiu i hoonohoia aku no ia hana, aole nohoi i hoike mai na keena kanikela o keia Aupuni e noho ana ma Inia Komohana. Ua haawiia na kauoha i na keena kanikela apau e hoike ae i na lohe apau e pili ana i na mokukaua Sepania.
OLELO HOOHOLO HUI NO KA HOOHUI AINA.
Wsinetona, Mei 5. – I keia la i waiho aku ai o Lunamakaainana Newlands o Nevada he olelo hooholo hui no ka hoohui aupuni me Hawaii, iloko o ka Hale o na Lunamakaainana.
Aia maloko o keia olelo hooholo, e apono ana i ka Hawaii haawi ana mai i ka mana Aupuni oia wahi ia Amerika nei, pela hoi me kona mau oihana aupuni apau, me ko Amerika nei lawe ana hoi i kona aie lahui i hiki aku ka huina i ka $4,000,000; a e papa ana hoi i ke komo hou ana mai o na Pake ilaila; a e koho ana i Komisina o elima lala, he elua nae o lakou mai Hawaii mai.
KIPOKA PAHU IA O CIENFUEGOS.
Nu Ioka, Mei 5. – Ua loaa mai kekahi lono kuikawa mai Ki Komohana mai, ehoike ana penei: Ua kipoka pahu ia o Cienfuegos e ka mokukaua Marblehead (Poo Mabala), ma ka auina la o ka la 20 o Aperila aku nei. Ua kipoka maoli ia aku ke kulanakauhale, a ua paniku ia aku hoi na batari pu o ka aina. Ua nui na hale i pau i ka lukuia, a ua puhee aku hoi he mau tausani kanaka mailoko aku o ke kulanakauhale.
MAKAUKAU NA MOKUKAUA SEPANIA E KAUA AKU I KA MOKUKAUA AMERIKA OREGONA.
Nu Ioka, Mei 5. – E hoike ana kekahi lono mai Ki Komohana mai o keia la iho la no, penei:
Ua hoikeia mai, aia he eha mau mokukaua mawaho aku o Barbadoes, me ka makaukau e holo aku e hopu pio, a i ole, e hooukakaua aku i ka hokukaua Aorgona.
KA MOKUKAUA TOPIDO SEPANIA TAMARARIO.
Nu Ioka, Mei 8. – E hoike ana kekahi lono mai Buenos Ayres mai, no ka haalele ana aku o ka moku kaua topido Tamarario ia Montevideo ma ka auina la. O ka moku Sepania keia e ku ana ma ia wahi ma ka wa i ku aku ai ka mokukaua Oregona.
KELA KAUOHA ONIPAA.
Mr. Lunahooponopono o ke Kilohana Pookela.
Aloha oe: - ma ka`u moolelo i hoouna aku ai e pili ana i ke Kau Kiure ma Kailua, imua o ka Lunakanawai Hon. J. W. Kalua, o ke paniwai o Iao, ua olelo aku au e kakau aku ana au i na mea e pili ana i keia olelo kauoha kaulana a ua ahi nei o Wailuku, e pili ana i ka hoopii oki mare o Spencer kue ia Spencer, a penei ke ano nui a`u e hoomanao nei:
O kekahi o na keiki a Frank Spencer (Pakana), o Waimea, ua hoopiiia e kana wahine mare ma ke ano e oki ia ko laua noho kane a wahnie mare, a e noi ana hoi e hoopukaia i olelo kauoha mai ka Lunakanawai mai e kauoha ana i ua Spencer nei e uku aku oia i hookahi haneri dala ($100) i keia ame keia mahina i ka wahine no kona ame ko na keiki oia a hiki i ka wa e hooholo ia ai keia hoopii oki mare, a e uku pu hoi i na lolo o ua wahine nei i elua haneri me kanaiima dala ($250.00).
Ua waiho ia keia mau noi apau imua o Lunakanawai Hikikoki ma Hilo, oiai oia e waiho ana i ka ma`i, e na loio o ua wahine nei, e ka loio Wise, o ka Hui o Hikikoki me Wise, pela ko`u hoomaopopo ana, a mamuli o na hoakaka a ua loio ‘la, Wise, ua hoopuka iho la ka Lunakanawai Hikikoki i kana olelo kauoha maluna o Spencer ke kane a keia wahine, e kauoha ana iaia e uku koke ae i keia huina o hookahi haneri dala no ke ola o kana wahine ame na keiki i keia ame keia mahina ame elua haneri me kanalima dala i no loio o ua wahine la me ke ano o ko laua uku ia no ka lawelawe ana aku i ka hihia oki ma ka aoao o ua wahine ia.
I ka hoea ana imua o ka Lunakanawai Kalua ma ke kau ma Kailua nei, ua noi mai ia ka loio o ka wahine (Wise) e hoopaneeia ka hihia a keia kau ae no ka makaukau ole. O na loio o Spencer, oia hoi o C. Creighton ame A. N. Kepoikai, ua kue laua i keia noi, a ua waiho mai i ka laua mau kumu. Aia ia manawa hookahi, ua hoakaka ia mai imua o ka Aha me na hooiaio i lawe kupono keia moolelo penei:
Aia i ka manawa a ka Lunakanawai Hikikoki i hoopuka ai ikana olelo