Ka Nupepa Kuokoa, Volume XXXVII, Number 11, 18 Malaki 1898 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE XXXVII.        HELU 11.                   HONOLULU, POALIMA, MARAKI 18, 1898.      NA HELU APAU 2694

 

Hoolaha Loio.

 

W. R. KAKELA.

Loio a he Kokua ma ke Kanawai

 

HE LUNA HOOIAIO PALAAPLA.

2370

 

LYLE A. DICKEY.

 

Loio a he Kokua ma ke Kanawai.

Alanui Kaahumanu, Helu 14. Tel. 682.

 

            Iloko o ke Keena o ka Loio Kuhina mamua, a he Lolo Hoopii ma ka Aha Apana o Honolulu.

 

            E hookoia na hana pili kanawai apau mai na Mokupuni mai.

 

            O A. F. Tavares, Kakuolelo, Maheleolelo a Notere no ka Lehulehu. 1yr.

 

Hoolaha Kumau.

 

Papa! Papa!

Aia ma kahi o

LEWERS & COOKE

(Lui Ma.)

 

Ma ke Kahua Hema o na Alanui Papu me Moi.

 

E LOAA NO NA

Papa Nouaiki

O kela a me keia ano.

 

            Na Pani Puka

            Na Puka Aniani

            Na Olepelepe

            Na Pou

                                                Na O'a

                                                Na Papa Hele

                                                Na Papa Ku

                                                Na Papa Moe

 

Na Pili Hale

O Na Ano apau.

            A me na

Wai Hoohinuhinu Nani

O Na Ano Apau.

 

Na Palaki o na Ano he Nui Wale.

 

            Ke haiia aku nei oukou e na makamaka a pau, ua makaukau keia mau makamaka o oukou e hoolawa aku ma na mea a pau e pili ana ma ka laua Oihana no ka

Uku Haahaa loa

 

E like me ka mea e holo ana mawaina o Laua a me ka Mea Kuai

 

E Hele Mai o Waa me Oukou Ike

 

KUU KA LUHI.

 

            Ma ka Poalua nei, Maraki 15, i hookuu mai ai o Mrs. Schmidt, i keia ola ana, a nee aku ia ma kela aoao o ka muliwai eleele o ka make.  Oia ka wahine a Senatoa Schmidt.  He @ ka nui o kona mau makahiki a hele aku la.  Ua haalele iho oia mahope nei, he kane ame ehiku keiki e kanikani a ula aku ana nona ma keia aoao aku o ke ola ana.

            Ma ka hora 3 o ka auina la o ka Poakolu nei, ua maneleia aku kona "kinowailua" no ka home mau o ke kanaka.

 

KA MEA HUNA POHIHIHI

 

Unuhia e Hoouhemahiehie no "Ke Kilohana Pookela o ka Lahui Hawaii"

 

MOKUNA XXXV.

 

            "He maka no a he maka, he alo no a he alo"   Ke aloha ole    Ka puu wai pupaa a naueue ole          Hoike o Adelo i ka mea huna pohihihi imua o ka Haku Tereveliana   Kipakuia o Alamira.

 

            O ka manao mua loa i ulu ae iloko o Alamira ma ka wa i hoea mai ai ka Haku Tereveliana, oia kona holo ana aku a puliki aku oia iaia, me ke noi ana aku iaia e kokua mai oia iaia.  Aka, mamuli o ka nui o na manao kaumaha pioo iloko on a, ua hiki ole iaia ke ku ae iluna, nolaila, ua noho pu iho la no ia ilalo.

            O adelo hoi, o ka mea mua loa i komo mai iloko o kona noonoo, oia kona holo ana mai ia wahi aku, aka, ua hoholo hou iho ia oia i kona noonoo, e aho no ia e halawai me ka Haku Tereveliana, he alo no a he alo, he maka nohoi a he maka.

            Ma ha manawa i hoea mai ai ka Haku Tereveliana a ku mai la imua o Alamira ame ka Haku Adelo, a nana mai la maluna o laua me na onohi maka pahaohao, aia hoi, pane mai la ia imua o ka Haku Adelo:

            "A-ah!  Eia ka oe ia nei?  Heaha keai a'u e ike aku nei?  Aole ka i loaa aku kuu palapala ia oe, oia hoi ka palapala a'u i hoouna aku ai ma o Wigby la, ma ia palapala e papa aku ana au ia oe, aole loa oe e hele hou mai i Tereveliana Pa nei, oiai au e ola ana.  E keia kanaka lapuwale, pehea la oe i aa ai e hoike hou i kou mau maka imua o keia kaikamahine hala ole, mahope iho hoi o kou lima eleele ana iaia?  Ua oi loa ka pono ia'u e kau aku i hoopai maluna ou no ka hana puuwai eleele au i hana ai me ka hilahila ole."

            Ia wa i hapai ae ai ua elemakule la i kona kookoo, me ka hoopololei pu ana ae o kona kino, me kona helehelena hoi i hele a piha pu i ka inaina.

            Aka, me ka makau ole ame ka wiwo ole hoi pane aku la o Adelo:     "He oiaio no, ua loaa mai kau palapala ia'u, a ke hoomanao nei no au i kau kauoha i hoike ae ai maloko oia palapala, oia hoi, aole au e hele mai ia nei, aka e hoomanao oe, e kuu haku, o ke kumu nui o ko'u hiki ana mai nei ia nei, oia ko'u makemake ana e halwai me Miss Alevaro nei."

            "Ae; a o keia wa nae au i makemake ai e halawai pu me ia, oia kona wa e noho mehameha ana, aohe kokoolua?  A ma ko'u hoomaopopo nae i ke ano o kau hana, me he hea la e makemake ana oe e lawe malu hou aku iaia, a oia hoi ke kumu o kona uwe ana ae nei, a in a hoi aole au i hiki mai nei, in a o kou hana aku nei no ia elike me kau i hana ai i kahi wa i hala ae nei, aole no i mamao loa mai keia wa aku nei."

            Maanei hoomaha iho la ua elemakule nei no kekahi mau sekona a liuliu pane hou mai la oia:

            "O kou lawe malu ana i kuu moopuna nei mai keia wahi aku me kuu ike ole, ua manao au o kou hele hou ole ana mai ia nei, ua lawa ia nou.  Aka, o ka hoopai a'u i manao ai e kau aku maluna ou no keia hana hewa au i hana hou mai nei, ke manao nei au e kau koke aku no ia hoopai maluna ou, a lilo ia i mea hoomanao poina ole nou i na la apau o kou ola ana.  Nolaila, e koho oe i ka hoopai au e lawe aku ai mai a'u aku, o kuu hoopii paha ia oe imua o ka kanawai a i ole ia, o ko'u hahau aku paha i keia kookoo maluna ou?"

            Me ka ula hoi e puai ana ma na papalina o Adelo, pane aku ia ia imua o ka Haku Tereveliana me ka hopohopo ole nohoi:

            "Ea, e malama loa oe no kau mau olelo i hoopuka mai la imua o'u, oiai, mamua o kou manao ana ua hewa au i keia hele ana mai ia o'u ia nei, he mea pono loa ia oe ke ike pono, aole au i hiki mai nei maanei, aka, mamuli no ia o ke kanoha ana ae nei a Miss Arevalo nei"

            Ia wa huli ae ia oia a ninau aku la ia Alamira i ka i ana:

            "Aole hiki ia oe ke hoole, aole au nau i kauoha ae nei e hele mai a halawai pu me oe ma keia wahi.  Aole loa e hiki ia oe ke hoole mai ia mea."

            "Aole loa au i kauoha aku ia oe e hele mai oe e halawai pu me a'u me keia wahi.  Aole.  He keu oe a ke kanaka hilahila ole.  Aole au i ike i kou hele ana mai nei, oiai au e noho ana maanei owau wale no.  I kou hiki ana mai nei, ua kamailio mai nei oe ia'u e ae aku au ia oe e mare au ia oe, a no ko'u hoole ana aku nei ia oe, oia kou wa i olelo mai nei ia'u, e lawe malu oe ia'u mai Tereveliana Pa aku nei, i kou wa i hele mai nei e hopu ia'u oia ko'u wa i uwe ae nei."

            No keia mau olelo a Alamira, ua nana aku la o Adelo maluna on a me na maka i hele a piha i ka huhu.

            I keia wa hoi i puea pono ae ai ke poo o ka Haku Tereveliana a oni pono me ka naue ole, hele mai la ia me kona kookoo i hoala pono ia ae a kau pono maluna o kona poo, me ka makaumau loa e hoomoe mai maluna o Adelo, aka, oia ka wa a ua Adelo nei i pane aku ai imua o ka haku Tereveliana:

            "Ua oki.  He mea ano nui kau e hoike aku ana ia oe.  E hoike aku ana au ia oe i kekahi mea huna pohihihi oa; a oia hoi ka mea nana e hoanoe ae i kou noonoo."

            He mea oiaio, ua kaohi iho la ka Haku Tereveliana i kona inaina a hoihoi iho la i kona kookoo ilalo.  A pane aku la o Adelo:

            "O keia mau mea apau au e ike nei, ame ke kumu i ano e ai oe nou nei, aia no ia maluna o ke poo o Alamira nei.  No na wa he nui i hala ae nei, ua hoao au me ka ikaika e hana i na hana apau e nalowale ai ka mea huna ana i hunakele loa ai mai a oe mai, mamuli hoi o ko'u lilo ana i hoaaloha oiaio loa nona, eia nae aole oia i ae mai ia mea.  Ae; he mea huna ka ia nei, a he mea pono hoi ia oe ke lohe ia mea huna.

            I kela wa i pane ae ai o Alamira me ke pihoihoi nui, ma ka olelo ana:

            "E kuu haku, a Adelo, e aloha mai oe ia'u."

            Alaila, huli ae la ua haku Adelo nei a olelo aku la ia Alamira:

            "Pehea la, e ae mai ana anei oe i ko'u manao, oia hoi, e mare mai oe ia'u, a owau ka'u kane?"

            "Aole! Aole au e ae aku i kou manao e Adelo.  Aole loa au e lilo i wahina nau.  Aole! Aole!."

            Ua hoopiha loa ia hoi ka noonoo o ka Haku Tereveliana me ke pahaohao nui no keia mea ana e ike aku nei imua ponoi o kona alo a no ia mea ninau aku la ia:

            "Heaha ke ano o kea mea a'u e ike aku nei?"

            "Eia ke ano e kuu haku"          alaila, huli ae la ua Adelp nei a ninau ae la ia Alamira            "Pehea la, ke hai nei au i na mea apau i ka Haku Tereveliana    ame kahi leo hawanawana pane mai la ia imua o Alamira: "Aole anei ou aloha i kou makuakane?  Aole anei hoi oe, e ae mai e lilo oe i wahine na'u, a pela hoi e pakele ai kou makuakane?"

            Ua ulu mai la hoi na noonoo ano e ana he nui iloko o Alamira ia wa.  Ala mai ia iloko on a ke aloha o kona luaui makuakane a pela hoi me kona makuahine ame kona mau kaikunane.  Ike iho la ia, o kona ae ana aku i ka manao o Adelo oia ka mea e pau ae ai ka pilikia o kona mau makua, aka, aia nae ka manao paa iloko on a kahi i punohu ai me ka ikaika nui, a ma ia wa hookahi nohoi, ala pu mai la kona mau manao aloha ana no ka haku opio Rosevana, a no ia mea, pane aku ia ia:

            "Aole hiki ia'u ke hoopakele i o'u mau makua.  Aole loa au e mare ia oe."

            Aole i kaua mai ka piha ukiuki o ka Haku Adelo 'ia wa, a ma ka manawa hoi a ka Hake Tereveliana i ninau aku ai ia Adelo no ke ano o kana mea e kamailio hawanawana aku ana ia Alamira, ua pane mai la ua Adelo nei:

            "E hoike aku ana au imua ou i ka mea huna a'u i hai mua aku nei ia oe.  I keia hora a'u i hai mua aku nei ia oe.  I keia hora a'u ame oe e kamailio neim ke ola nei no kela keiki limakoko au, oia hoi o Geofere."

            I keia wa i uwe ae ai o Alamira, a o ka Haku Tereveliana hoi keia hina aku la ia i hope a kalele aku la i kekahi kumulaau e ku pono ana mahope on a, me ka haka pono ana mai o kona mau maka ia Alamira, a pane mai la:

            "Ke ola nei no o Geofere.  He mea oiaio anei ia?"

            "E Alamira," wahi a ua Adelo nei i huli ae ai a pane aku la imua o Alamira. "aole no i hala ka manawa pono nou e hoike mai ai i kou manao, i mea hoi e pakel ai kou mau makua.  Nolaila, e mare ana anei oe ia'u?"

            Me na waimaka hoi e hiolo ana ma na papalina o Alamira, ua hoike mai la oia i kana pane, mamuli o ka luliluli ana ae o kona poo.

            I nei wa i hoike mai ai o Adelo i na mea apau e pili ana ia Geofere a ua hoomaka mai la oia ia ka olelo ana penei:

            "Eia no o Geofere ke ola nei i keia wa maloko nei o Enelani.  O kela palapala i loaa mai ai ia kaua o kona make ana ma Berazila, aole he oiaio.  He hana akamai ia i hanaia e ia.  Ua hoi hou mai no oia no Ladana nei, oia hoi, no Enelani nei, a eia oia ke noho nei ma ke ano huna, malalo o kekahi inoa kapakapa, a ke kali nei oia o kou make ae, a oia no kona wa e komo mai ai iloko o ka waiwai, a lawe ae hoi maluna on a i ka inoa alii o ka ohana alii o Tereveliana."

            "Pehea? Eia oia ke ola nei ma Enelani nei i keia la?  Ke ola nei no oia ma kahi kokoke loa ia'u iloko o keia mau makahiki he nui me ko'u ike ole.  He mea kupanaha keia."

            "Ae: ke ola nei oia ma Enelani nei.  A ke noho nei oia elike me kekahi nanana e moe malie ana ma kona home punawelewele, e kali ana o ka loaa o ka wa e lele mai ai oia a popoi maluna o ka waiwai o ka ohana Tereveliana. Ae; ke kali nei oia o kou make ae a kona manawa ia e komo mai ai iloko o ka waiwai."

            Ua lilo keia mau olelo apau a Adelo i pane aku ai imua o ka Haku Tereveliana.  A me ka hulili enaena ana o ka inaina maloko o kona mau onohi maka, ninau mai la ia me ka leo piha i ka huhu:

            "Auhea la ia?  Eia anei oia ma keia wahi kokoke mai nei?"

            "Aole. Aia no ia i Ladana kahi i noho ai me ka hanohano nui.  I kona wahi aku nei au e ike ai iaia e noho ana me he alii nui la no ka aina nei.  He home nani kona, a ua lako nohoi i na mea maikai apau o kela ame keia ano.  Ua ike mai nohoi oia ia'u, a ua ike aku nohoi au iaia, oiai nae he aahu ano e kona ia wa, a he nanaina ano e nohoi.  O kana mau huna ana iaia iho me kona manao ana paha he mea ia nona e ike ole ia aku ai e a'u, ua lilo i mea ole loa i ko'u mau maka hiaa a hiki ole hoi ke hoopuhili ia e kana mau hana hoanoe.  Ma ko maua wa i kamailio ai, ua ninau mai oia ia'u no kou ola me ka ninau pu ana mai nohoi ia'u, no ko'u manao no ka loihi o kou mau la e ola ai."

            Ua hapai ae la ka Haku Tereveliana i kona mau lima me ka piha pihoihoi nui a paa ae la i kona umauma, oiai hoi kona mau ano apau i hoike mai ai i ke ano e.

            Hoomau aku la nohoi ua Adelo nei i ke kamailio ana imua o ka Haku Tereveliana.

            "Ua mareia o Geofere i ka wahine, a ua nunui kana mau keiki.  Nolaila, in a oe e hoouna aku ana iaia e hoopaaia iloko o ka hale paahao, aole no ia he mea e hoonele ia ai kana mau keiki i ka waiwai o ka ohana alii o Tereveliana.  Aka, ua oi nae kona maalea ame ke akamai mamua o ko kaua, aole paha e hiki ana ia oe ke hookau aku i ko'u inaina maluna ou me kou hookui ole ia ana me kekahi pohaku e kuia ai kou mau kapuai, a ke ole au e kuhihewa ua hiki loa ia'u ke hai aku ia oe i ka hana maalea loa ana i hana ai."

            "Heaha la ia hana akamai ana i hana ai?" i ninau mai ai ka Haku Tereveliana.

            I keia wa i huli ae ai ua Adelo nei a nana ae la ia Alamira, me he mea la e koi aku ana iaia e ae mai oia e lilo ia i wahine nana, a no ko Alamira nana ole ana aku iaia, pane aku la ia:

            "He kaikamahine kana.  He wahi kaikamahine u'i a naauao nohoi.  A ua manao o Geofere mamuli o ke kokua ana a keia wahi kaikamahine e hoopuhiliia ai kou mau manao inaina apau nona."

                                                                                                                                                (Aole i pau.)

 

            Ua hooka'ulua iki ia ka makou moolelo Ahaolelo a puka aku ma ko makou pepa o keia pule ae.

 

Lubiana Kasimila

 

MOKUNA XIII

 

            Alaila, hele mai la ua mau wahi kukini nei no ka hooko ana i ka hana i haawiia mai ia laua, oiai hoi ua Duke Rupereto nei i huli ae ai a haawi aku la i na kauoha i kona mau aliikoa e hoomakaukau ia lakou iho, oiai e hele aku ana ia ma kekahi huakai hele loihi.  E lawe ana oia i na koa helu ekahi apau on a ma keia huakai.

            Mahope iho o kona haawi ana i keia kauoha, ua noho hou iho la ia me Valesebuga, a hala he hapalua hora o ko lau kamailio ana no ka laua kuakai hele, aia hoi, komo aku la o Harold, me na helehelena i hele a na-nanakea pu a ia wa i ninau mai ai ke Duke Rupereto iaia:

            "Pehea; ua loaa aku nei nae paha laua ia oe?"

            "E kuu Haku," wahi a kahi kauwa i pane aku ai, me ka leo i hele a haalulu i ka ua mea o ka maka'u, @ua loaa aku nei no o Itiela ame Dagobeta ia'u.  O ko laua wahi i loaa aku nei ia'u, ma ka nu'a ia o ka ululaau.  E kau ana laua iluna o ka lala laau, me ka lewalewa ana iho o ko laua mau puuwai i na pahi puhaka a ka Lima Ulaula.  E paa ana no ua mau pahi la ma ko laua wahi i houia aku ai."

            Ua puiwa ae la ke Duke Nui Rupereto no keia mau olelo a Harold i hoopuka aku ai, a ku ae la oia iluna, a lalau mai la i ke kipoohiwi o ke kanaka kiu, me ka ninau ana mai hoi:

            "E Harold, he oiaio anei keia?"

            "He oiaio loa keia mea a'u i hoike aku la ia oe, e kuu Haku.  O ke Akua wale nohoi ka Mea i ike i ko'u wa e owiliia aku ai iloko oia haawina.  O ka'u mea e hoomaopopo nei, o ka poe apau i hooko pono i kau mau kauoha apau, o lakou ia e lukuia mai nei."

            "Aole   e kuu kauwa maikai, aole oe e make ma ka lima o keia poe limakoko.  E hele pu ana oe ame Saulo me a'u ma keia huakai hele a'u e hele aku nei.  E hele oe a hai aku i kou kokoolua, ia Saulo, e hoomakaukau olua ia olua iho."

            Huli ae la kahi kanaka kiu a hele mai la e huipu me kona kokoolua, oiai hoi o Rupereto i huli ae ai a ninau aku la ia Valesbuga:

            "Heaha la ka'u hana pono, e hana ai?"

            E haalele koke iho oe i keia wahi i hoopuniia e na mookiko, a e hele kaua no ka'u hale kakela.  Malaila, e loaa ai ia oe ka maha ame ka oluolu.  Aohe nalo kiko luuwai eleele e hoea ilaila.  Aole loa i aa iki keia poe puuwai eleele e hoea ae ko lakou poo mawaena o ko'u poe kanaka.  Aole loa hookahi kanaka mawaena o lakou i komo iloko o keia ahahui limakoko."

            Ia wa noho iho la o Frankenstein maluna o kona noho, a kulou iho la kona poo ilalo, me ke kakoo ana ae o kona mau lima, oiai hoi ka nananakea e pahola ana ma kona mau papalina.

            A liuliu kona kulou ana, aea ae la ia iluna, a pane mai la:

            "Hookahi a'u mea e hana ai mamua o ko'u haalele ana iho i kuu halekakela nei, oia hoi, e kinai e au i ke oia o kekahi o keia poe mookiko, oia hoi, e make ana o Drosendorf, kela elemakule lapuwale nui wale e paa nei iloko nei o kuu hale kakela."

            "He manao maikai loa keia ou i hoopuka mai la e kuu hoaloha." wahi a ke Kauna Valesbuga i pane mai ai me ka hoomau ana mai, "O ko'u manao kahiko loa no keia, aka, ua uumi wale iho no nae au ia manao iloko o'u, aole au i hoopuka aku ia oe."

            "E hooko koke aku ana au i keia hana.  Aole loa au e hookuu hou aku ana i wa hou nona e oia ai."

            I kela wa i hookani ae ai ua Duke nei i kekahi pa keleawe i ano like loa me ke pa hookanikani a na Pake, a ia wa i komo mai ai kekahi keiki lawelawe.

            "E hele koke aku oe a kauoha aku ia Isamaela am Gutaga e hele mai imua o'u.  Makemake au e ike ia laua."

            Ua hele aku la ua wahi keiki lawelawe nei, aole noi i liuliu hoea mai la o Isamaela imua o ke Duke.

            He kanaka Aigupita keia.  He kino nui puipui kona a he mau lala nui hoi kona i hoopihaia me ka oolea.  Aole hiki iaia ke kamailio, a he kuli nohoi kona mau pepeiao.

            Iaia i hoea mai ai imua o ke Duke, ua kulou iho la ia, me ka paa ana ae o kona mau lima i kona umauma.  Aka, ua ani peahi mai la nae ke Duke i kona lima, e hoailona mai ana iaia, e kali iki.

            Aole hoi i liuliu, hoea mai la o Gatuga, ka lua o na kanaka a ua Duke nei i makemake ai.  He kanaka ano bipi bulu keia o kona ano, he nui no'uno'u kona ai, a he helehelena kona i like loa me ko ka hiena.

            I keia wa i kamailio mai ai ke Duke Frankenstein iaia:

            E aGtuga, aia iloko o kekahi o na keena pouli o loko nei o ka halekakela, he elemakule, a oia ka'u i makemake ai e hooko aku oe i ka hoopai maa mau ma kau oihana.  He kanaka keia i ahewa kahiko loa ia e ka Moi e make, aka, mamuli hoi o kekahi kumu, ua hoolaia oia e a'u.  Aka, i keia la he mea pono ke laweia kona ola.  Maloko no o kona keena i hoopaaia ai e hookoia ai keia mea.  Na Isamaela nei ehoike aku ia oe i kona keena i hoopaaia ai, a nana nohoi e kuhikuhi aku ia oe i ua kanaka la.  Mai haawi oe i wa nona e hoopuka mai ai i kekahi huaolelo, aole hoi oe e haalele i kona keena a hiki i kou ike ana ua make oia."

            Mahope iho o ka haalele ana mai o ua mau kanaka nei i ke Duke Frankenstein ame kona kokoolua, ia wa i huli ae ai ia a kamailio aku la i ke Kauna o Valesbuga:

            "Ke make key kanaka, oia ka pau@ loa ana o na kanaka pili alii apau ma ka aoao o Godfrey!"

            "Pela paha, aole paha," wahi a Kauna Valesbuga i pane mai ai.  "Aole hiki ia'u ke hooia aku ia mea ia oe, aka, o ka me nae i maopopo ia'u, wahi a ko'u lohe, eia no ka ke ola nei i keia wa o Aledenaheima."

            "Pehea?  Aole anei i make kela kanaka?" i ninau ae ai ke Duke Nui me ka pioo nui.

            "Pela ko'u lohe."

            "Ina pela, he oiaio kena loe ou.  Ke hoomanao nei au i keia wa, ua ike au i kekahi helehelena i like loa me kona.  Ae; ke hoomanao nei au i ko'u ike ana i kekahi kanaka elemakule i kela mau la aku nei, i like loa me ko Aledenaheima; a ke hoomanao nei nohoi au i ko'u ike ana i kekahi kanaka opio me ia.  Eia, he mea kamahao maoli keia.  Pehea la hoi au i makapo loa ai."

            "E Sir Rupereto!"

            Mamua ae o ka hiki ana ia laua ke hoomau hou aku i ka laua kamailio ana, aia hoi, ua hemo mai la ke pani puka me ka pukalaki nui, a holokiki mai la o Gatuga, oiai no ia e paa ana i ka pahi ma kona lima; a mahope mai hoi on a o Isamaela.

            "Pehea keia, e Gatuga?  Emoole maoli ka pau o kau hana," wahi a ke Duke Rupereto i ninau mai ai, a olelo mai ai ia Gatuga.

            "E kuu haku," wahi a ua kanaka la i pane aku ai imua o Rupereto, "aohe a'u mea e hiki ai ke hana aku.  Aohe kanaka o loko o ke keena a Isamaela i alakai aku nei ia'u."

            No keia mau olelo a Gatuga, ua ku iho la ke Duke Rupereto me ke ano e o kona helehelena, a liuliu pane mae mai ia ia:

            "Aohe kanaka oloko o keia keena pouli?  Ua hemo anei ke pio mailoko aku o kona wahi paa?"

            "Aole loa i loaa ia'u kekahi mea kino ola ma ke keena pouli o'u i lawela aku nei."

                                                                                                                                                (Aole i pau)

 

 

LAAU KUNU A KAMALENA

 

                        Ua hana maoli ia keia laau no ke kunu, enu, kunu kalea, kunu ho, ame ke anu.  Kaulana loa ia no ke ola o keia poe ma'i ma ka hapanui o ke ao nei i nohoia e ka naauao.  Ua loaa mai na palapala hoomaikai lehulehu no ka holopono o kana mau hana; ke ola ana o ke kunu oolea loa; pela me  ke anu ikaika i hoopaula mamuli o kona ikaika hoola, a me ke ola ana o ke kunu kalea, a e pakele mau ana nohoi ke ola o ke keiki liilii.  O ka inu laulaha ia ana o keia laau, he mea hoike ia no ka hoopahu'aia ana o ke kunu ho, ame kona mau hopena awahia.  E kuaiia ana e na poe kuai laau lapaau apau.  Benson, Smith & Co., na Agena ma ko Hawaii Pae Aina.