Ka Nupepa Kuokoa, Volume XXXVII, Number 7, 18 February 1898 — Page 3

KA HUI ALAHAO ME AINA O OAHU

MANAWA HOLO.

Mai a Mahope aku o Iulai 5, 1895.

Wili o Ewa, kaa ukana, na la apau, koe ka Sabati.

Hiki i Waianae, na la apau.

Hiki Wili o Ewa, na la apau.

Hiki Waianae, Poaono me Sabati no.

Hiki i Waianae, na la apau.

          A.M. A.M. P.M. P.M. P.M.

Haalele ia Manana 7:40 9:58 2:25 2:28 5:13

Haalele Wili o Ewa 8:10 10:19 2:49 2:49 6:14

Hiki i Waianae - 10:54 - 3:24 6:49

Waianae na la a pau.

Wili o Ewa.

Kaa Ukana.

Na la a pau.

Koe Sabati.

Waianae na la a pau.

Wili o Ewa, na la a pau.

Hiki i Waianae na Poaono no me Sabati.

          A.M. A.M. P.M. P.M. P.M.

Haalele ia Waianae 6:44 - 1:32 - 4:16

Haalele Wili o Ewa 7:19 9:10 2:07 3:51 4:51

Haalele ia Manana 7:50 9:48 2:38 4:22 5:22

Hiki i Honolulu 8:23 10:30 3:11 4:55 5:55

          E lawe ana na kaa ahi hali ukana i na kaa ohua o ka papa ekahi.

G. P. DENISON, Luna.

F.C. SMITH, Luna Kuai Palapala Holo.

 

NU HOU HAWAII.

          Paa hou no ua Pake paka pio ia Kaapa ma ka po Poakolu iho nei. Paakiki no.

 

          Ma ka la 9 o Aperila ae nei e malamaia ai ka hookuku kinipopo mua loa o kela kikina.

 

          O na lono i loaa mai, ua hoike mai no ia i ka ino puni o na wahi apau o na awa pae moku. E hoike ana o keia kona mau la.

 

          I ko makou ike ana aku i na hoa hanohano o ke Kau Ahaolelo, he nui ke ohohia, a he kilakila wale no ko lakou mau kulana.

 

          Ua manaoia e hoea mai ana no Honolulu nei o Sentoa Horner, mai Maui mai; a o Lunamakaainana Parisa hoi mai Kona, Hawaii mai.

 

          Ua haawi ae o Miss Annie Sheldon he wahi papa aina manawalea ma Iwilei i ka Lapule nei. He nui nohoi na hoaloha i hoea ae malaila.

 

          He elima no wahi Hawaii maoli o loko o ka Hale o na Makaainana. Oia na Hon. Kaulukou, Kaeo, Kaai, Kahaulelio ame Achi. I nui ke aho.

 

          Ua hanau mai na ka wahine a Toyo Jackson ma ka Poaono i hala aku nei he kaikamahine. O na hoomaikai no anui loa ka makou e haawi aku nei.

 

          Ke hopohopo nei o Luther Wilikoki aole paha e hiki ana iaia ke lawelawe pono i ka unuhiolelo o ka Ahaolelo mamuli paha o kekahi wahi keakea o na hana o kana Ahahookolokolo.

 

          Hiki ole ka paikau a na makai ma ke Kuea Halealii ma ke kakahiaka Poaha iho nei, oiai ua hele mai la na kamalii o luna e hoopakikiwai i na alanui o Honolulu nei. Ukele kela!

 

          He haiolelo ka Mr. P. C. Jones ma ka po Poaha nei, maloko o ka hale Y. M. C. A. (Hui Opiopio o Honolulu) nei, i mua o na poe e hele mau nei i na papa kula po e malamaia nei maloko oia hale.

 

          He kiekie ka ua o keia mau la e nee nei, mai ka po Poalima mai o kela pule a hoea wale i kela la. Huipu hoi me kela ka ukele ame ke ka-wa-u. No ia mea, he nui ka poe i loaa i e anu a me ke kunu.

 

          Ma na lono o na Aina E, e ike ia iho ai ka ulu nui o na manaolana o na hoaloha o Hawaii nei no ke Kuikahi Hoohui Aupuni. He mea maopopo e holo ana no. O ka holo o ke kuikahi ko kakou pomaikai, aka, o ka make ana, oia no ko kakou make ana.

 

          Ua pae maalahi aku nei ka Hui Keaka Lio no ka Mokupuni o Kauai, ma ka Poalima aku nei o kela pule, mai Honolulu aku nei. A mamuli o na palapala i loaa mai ia nei mai laila mai, ua nui ka holomua o ke kuaiia ana o na palapala komo no ke keaka mai o ka Poaono.

 

          Nui ko makou mahalo i ko makou makamaka aloha J. M. Kaneakua. Eia oia ke pii ae nei a ma ke kahua like me ko na loio kiekie loa o ka aina nei. O kona makaukau ame kona hoopono ka mea nana e alakai nei iaia ma kela anuu kiekie loa a ke kanaka e kuko nui nei.

 

          He mau la i hala ae nei, ua ike ia he liu ko ka moku kalepa nui S. P. Hitchcock, a ma ka huli ia ana me ke akahele loa, ua loaa aku la. He elua kapuai malalo iho o ka laina wai, ma ka aoao loko nei o ka moku, aia malaila kahi o liu. Laki ka ike e ia ana. E hana ia aku ana kela pilikia iloko o keia mau la.

 

          Ke lohelohe wale ia mai nei no, e weheia aku ana he Aha Mele Nui maloko o ka Hale Mele Hou, ma keia mua koke iho, e kekahi mau puukani wae. O na pomaikai e loaa mai ana, no ka hoihoi ana mai ia Mr. J. K. Kaulia ame kona mau hoa "Roialiti," i loheia mai, aia ma ke kulana o ka hoohemahemaia e na "Roialiti" ulakolako o Honolulu nei.

 

          Poinoia kahi mokuahi uuku "Kaena" mamuli o ka ha'i ana o ka iho o ka epaepa, a me ka maalahi oia i holo ai a ku maloko o kekahi kuono e kokoke ana i ka Lae o Kaena. Mamua nae hoi o ka loaa ana mai o ka lono oiaio e pili ana no ua wahi moku la, he nui na lono like ole i hoea mai, aka, i ka hoea kino ana mai o ke kapena i ke taona nei, ua hoopauia na manao uluku iloko o kekahi poe.

 

          Mamuli o ka lono i loaa mai i kahi poe kanaka ua make ia he poe holoholona ma Moanalua ae nei ma kela po uwila nui a ino nui hoi i pau ai ke kikowaena i ke ahi uwila. He hookahi bibikane, elua bipi wahine a me hookahi lio. Wahi hoi a ka lono, ua ikeia o kekahi o na pipi wahine ua mo'a ka io, a o kekahi mau holoholona hoi aohe hoailona maluna o ko lakou mau kino. He make keia i ku i ka uwila. Kupaianaha na hana a ke Akua.

 

          He mea pono i kela ame keia ohana ke loaa ona laau lapaau mama no na ma'i o ka opu. I laau lapaau puhili ole o ka "Moku ino loa o ka lepo" (Diarhea) Nahu, Umii, Kolera a me na na'i apau o ka opu, aole he laau lapaau oi aku o ka maikai elike me ka PERRY DAVIS LAAU PENIKILA (Pain Killer). Ua lawelaweia keia laau no na makahiki he kanalima, a ke hana mau ia nei i kela ame keia la, ma na aina apau o ka honua nei. O ka Hui Kuai Laau Lapaau o Hollister, ka Agena.

 

          Ua loaa mai nei ia nei kekahi palapala mai Wasinetona mai, mai kekahi makamaka mai o kahi o ko makou mau hoaloha oiaio o loko nei o ke kulanakauhale, e hoike mai ana, aole i maopopo loa ko Senatoa Cannon koho ma ka aoao kokua i ke kuikahi hoohui Aupuni, ke ole e loaa aku iaia he pane maopopo mai Hawaii aku nei, mai na kanaka Hawaii maoli aku, ma ka aoao hoohui Aupuni, no na pono a lakou i makemake ai e hoomaopopoia iloko o ke kuikahi, ina he mau kekahi oia ano i makemakeia e lakou.

 

          I ka wa i haalele iho ai o ka moku kalepa Tillie E. Starbuck ma ke kakahiaka Sabati aku nei me kona piha kopaa no New York, ua hiki ole ke neeu ae oia mai kona wahi e ku ana ma ka uwapo o Dilinahama. Nolaila, ua kauohaia ka mokuahi Iwalani e kii e kolo i ka moku poino. Iloko o na hooikaika ana no na wa he nui, ua hemo mai la ua moku la mai ke ahua lepo nenelu mai, kahi a kona kila i paa ai. Nolaila, ua kaa no ka lanakila ia Iwalani, ka wahine hee nalu o na kai o Kona i na la i hala, a o ka eueu hoi nana i alo na kai o Nihoa me kana ukana makamae.

 

          Maloko o kekahi palapala hou loa mai nei, mai Wasinetona mai, Apana o Columebia, i kakauia i kekahi hoaloha, ua hoike mai la o Mekia G. A. Studer i noho Kanikela Amerika ma Singapore, penei: "Oiai au ma Des Moines, ua kamaaina iho la au i ka laau hamo i ikeia, ka Laau Hamo a Kamalena, a ua ike au he laau maikai loa ia no ka Ma'i Rumatika, a pela nohoi no ka eha o ka umauma ame ka puu, (ua maikai a oluolu ko'u hanu ana). Aole loa au e ae e nele iki au ia laau." E kuaiia ana e na poe kuai laau lapaau apau a me na poe kawili laau. O Benson, Smith & Co., na Agena ma Ko Hawaii Pae Aina. *

 

          Ua malamaia ka hoolewa o Chas. W. Day, ka luaui makuakane o Kauka F. R. Day, me ka maikai e na hoa o ka Hui malu, ame na makamaka. Mamua iki iho o ka hora e hoolewa ai, ua haule mai la he kuana nui, aka, iloko no nae oia ua holopono no na hana mahope iho o ka mao ana ae a ka ua. Ua waiho ia kona kino lepo maloko o kekahi lua pao no ke kali ana a hoea mai kana keiki mai Kapalakiko mai, alaila maopopo pono kahi e waiho ia ai ke kino o kona luaui makuakane aloha.

 

KE ALAHAO UWILA.

          Ua huli hoi mai nei o Luna Nui Paine o ke alakaa Hapaumi, mai Ladana mai me na nuhou hauoli no ka loaa ana ia Hawaii nei, a ma ke kulanakauhale hoi o Honolulu nei, na kaa ohua i huki ia e ka uwila.

          Ua hooholo na poo o keia Hui ma Ladana e hana kokeia ka hana, oiai ua makaukau ke dala no ka hoomaka ana i keia hana nui. E hoololi ia ae ana na alakaa e huki ia nei e na holoholona, a na ka uwila e panee ia lakou me ka maalahi ame ke kuko ole, ame ka haukae ole hoi i na lepo pakipaki mai na wawae mai o na lio ame na hoki.

          Aole e liuliu loa ka wa a ike kakou i kela mea hou kamahao ma ko kakou mau pae aina nei.

 

THOMAS A. EDISON, JR.

          Young Edison, son of the famous "Wizard," is only 21 years old, but he has already shown inventive talent of a high order. He has worked with his father twelve years and has not received a college education.

          O keia ke kii o ke keikikane opio a kela kaeaea nui o keia keneturia. He 21 makahiki wale no ona, aka, ua hoike mai no nae kona hahai ma ke anuu kiekie loa. Ua hana pu oia me kona makuakane no 12 makahiki, a aole hoi oia i komo ma na kulanui i keia manawa.

 

Hoolaha Hooko Moraki.

 

HOOLAHA HOOKO MORAKI.

          Mamuli o kekahi mana kuai i hoike ia maloko o kekahi palapala moraki i hanaia mawaena o Hinawale o Kailua, Oahu, o ka aoao mua, a me F. C. Lowrey o ka aoao elua, ma ka la 30 o Iune, 1892, i kakau kope ia ma ka buke 138, aoao 195, a mamuli o ka uhai ia ana o na kumu aelike o kela Moraki, oia hoi ka uku ole ia o ke kumupaa a me ka ukupanee ma ka wa e hookaa ai, nolaila, ke hoolahaia aku nei e ka mea nona ka aoao elua o ua moraki nei, e hooko ana oia ia mana kuai.

          A ke hoolaha hou ia aku nei, aia mahope aku o na pule ekolu mai keia la aku, alaia, e hoolahaia aku na aina i hoike ia ma ia moraki no ke kudala ana, ma ke keena kudala o Jas. F. Morgan, ma Honolulu, ma ka la 26 o Feberuari, 1898, hora 12 o ia la.

          Aia ma kahi o W. R. Kakela na olelo hoakaka no keia mea.

P. L. WEAVER, Loio no ka Mea Paa Moraki.

Penei na aina i moraki ia:

          1. Kela aina apau ma Kailua, Oahu i hoakakaia ma ka Palapala Sila (Aina Aupuni) 1167 ia Kahunahuna, maloko o laila, he 12 21-100 eka, a i hooliloia e ka mea nona ka Palapala Sila Nui i ka mea moraki mai (Mortgagor) ma ka Palapala Kuai, i hanaia ma Aperila, 1875, a i kopeia ma ka Buke 41, aoao 392.

          2. Aneane 2 eka ame 45-100 o ka eka, ma Kailua, i hoikeia ma ka Palapala Sila Nui 2527, Kuleana 2588 ia Panaewa, i hooliloia aku i ka mea moraki mai, ma ka Palapala Kuai i kopeia ma ka Buke 136, aoao 183.

2688-4t

 

          AHA KAAPUNI, APANA HOOKOLOKOLO Kaapuni Ekolu o Ko Hawaii Pae Aina. Ma ka Hooponopono Waiwai. Ma ka Hana o ke Kahu Malama a Hanai o Kanoelehua (k) ame Isaaca (k), he mau keiki oo ole.

          Ma ka heluhelu a me ka waihoia ana mai o ke Noi a D. S. Kahookano, ke Kahu o ke kino ame ka waiwai o Kanoelehua (k) ame Isaaca (k), mau keiki oo ole, e nonoi ana i kauoha no ke kuai ana i kekahi waiwai paa o ua mau hanai la, ame ka waiho pu ana mai hoi i na kumu e kuaiia aku ai ua waiwai la.

          Ke kauohaia aku nei ma keia na poe apau he kuleana ko lakou ma ka waiwai i oleloia ae nei, e hele ae imua o keia Aha, ma ka Poaono, la 9 o Aperila, A. D. 1898, ma ka hora 9 a.m., ma ke Keena, ma ke Keena Hookolokolo ma Kailua, Kona Akau, Hawaii, oia ka wa a malaila hoi e hoike mai ai i mau kumu ina he mau kumu ka lakou, nokeaha la e ae ole ia ai ka haawiia ana aku o keia kauoha no ke kuai ana i ua waiwi paa la.

Hilo, Feberuari 8, 1898.

Na ka Aha: DANIEL PORTER, Kakauolelo.

2690-3t

 

          AHA KAAPUNI, APANA HOOKOLOKOLO Kaapuni Ekolu o Ko Hawaii Pae Aina. Ma ka Hooponopono Waiwai. Ma ka Hana o ka Waiwai o Keliihelepo (k) o Kona Akau, Hawaii, i make.

          Oiai, ua waihoia mai he Noi e Naholua e noi ana e hoopukaia ka palapala hookohu lunahooponopono waiwai no ka waiwai i hoikeia ae nei maluna, ia Naholua i oleloia, ma keia ke hoolahaia aku nei kalohe, o ka Poaono, la 9 o Aperila, A. D. 1898, ma ka hora 10 o ke kakahiaka, ma ka Hale Hookolokolo ma aKilua, Kona Akau, Hawaii, oia ka manawa ame kahi e hooloheia ua Noi la, a ma ia wa a malaila hoi e hele e ai na poe apau a hoike mai i kumu, ina he kumu ka lakou, nokeaha la e ae ole ia ai ua noi la.

Na ka Aha: DANIEL PORTER, Kakauolelo.

2690-3t

 

          ILOKO O KA AHA KAAPUNI APANA Kaapuni Ekolu o ko Hawaii Pae Aina. Ma ka hana o ke Kahu Malama o Laniana a me Api, he mau keiki oo ole o Kohala Akau, Hawaii.

          Ua waihoia mai ka Palapala Noi e D. W. Pae, Kahu Malama o ua mau keiki oo ole la, maloko o laila ua nonoi mai oia e nanaia a e aponoia kana moohelu, a e hanaia ona kauoha no ka hahele ana o ka waiwai i koe iloko o kona lima, a e hookuu loa ana hoi iaia mai na koikoi mai apau o ua Kahu Malama la.

          Ua kauohaia, o ka Poaono, la 9 o Aperila, M. H. 1898, ma ka hora 10 a. m., ma ke keena iloko o ka Hale Hookolokolo ma Kailua, Kona Akau, Hawaii, oia ka wa ame kahi i hooholo ia no ka hoolohe ana ua palapala noi la ame na moohelu, a o na poe apau i kuleana, a e hoea ae malaila ia wa, a e hoike ae i ke kumu, ina he kumu kekahi, e ae ole ia ai ke noi.

Hilo, Feberuari 8, 1898.

Na ka Aha: DANIEL PORTER, Kakauolelo.

2690-3t

 

          ILOKO O KA AHA KAAPUNI APANA Hookolokolo Ekahi o ko Hawaii Pae Aina. Ma ka hana o ka waiwai o Kaheana Punahoa (k) ame Keliiaiai Punahoa, he mau mea oo ole.

          Ma ka heluhelu ana ame ka hookomo ana i ka Palapala Noi a Punahoa (k), ke kahu, e nonoi ana no ke kauoha o ke kuai ana i kekahi waiwai paa o ua mau hanai la, penei: O ka apana 3 apau loa o ke Kuleana Halu 2550, Palapala Sila Nui 2283, i haawiia ia Waikui, nona ka ili he 29-1000 o ka eka, a he pa kahua hale nohoi ia ma Waialae iki, Oahu.

          Me ka waiho pu ana mai i kekahi mau kumu kupono ma ke kanawai e hoole ole ia ai ka hoolilo ana i ua waiwai paa la.

          Ke kauohaia aku nei, o na poe a pau i pili i ua mau hanai la, ame na poe e ae i kuleana i ua waiwai la, e hoea mai imua o keia Aha ma ka Poalima, la 18 o Maraki, M. H. 1898, ma ka hora 10 a.m., ma ke keena hookolokolo o keia Aha, maloko o Honolulu, Oahu, a ma ia wa a ma ia wahi e hoike mai ai ina he kumu kupono kekahi e ae ole ia ai ona kauoha no ke kuai hoolilo ana aku i ua waiwai la.

          Hanaia ma Honolulu, H. I., February 16, 1898.

Na ka Aha: P. D. KELLETT, JR., Kakauolelo

2690-3t

 

          AHA KAAPUNI O KA APANA KAAPUNI Elima o Ko Hawaii Pae Aina. Ma ka Hooko Kauoha. Ma ke Keena. Ma ka Hana o ka Waiwai o G. B. Meheula (k), o Anahola, Kauai.

          Oiai, ua waihoia mai kekahi palapala i oleloia he Palapala Hooilina a Kauoha Hope Loa ia na G. B. Meheula o Anahola, Kauai, i make, ma ka la 31 o Ianuari, A. D. 1898, i ka Aha Hooko Kauoha, ame ka Palapala Noi e hookoia ua kauoha la, a e hoopukaia hoi na Palapala Hooko Kauoha ia W. H. William, i waihoia mai e Pupuawa (w), ka wahine kane-make a ka mea i make.

          Ma keia, ua kauohaia o ka POAONO, la 12 o Maraki, A. D. 1898, ma ka hora 10 a.m. o ua la 'la, ma ke Keena Hookolokolo o ua Aha la, ma Lihue, oia kahi ame ka manawa e hooiaioia ai ua kauoha la, a e hooloheia ai ua noi la.

          Hanaia ma Lihue, Kauai, Ko Hawaii Pae Aina, ma keia la 31 o Ianuari 1898. Na ka Aha:

P. W. T. PURVIS, Kakauolelo

2689-3t

 

          AHA KAAPUNI ELUA O KO HAWAII Pae Aina. Ma ka hana o ka waiwai o Kamakala (k) o Paia, Makawao, Maui i make kauoha ola. Imua o Lunakanawai J. W. Kalua. He Kauoha Hoolaha no ke noi e mahele i ka aina.

          Ma ka heluhelu ana ame ka waihoia ana mai o ke noi a Koba Kamakala (k) o Makawao, Maui, ma Paia, Makawao, Maui, ma ka la 7 o Maraki, A. D. 1891, me ka waiho ana iho he waiwai maloko o Ko Hawaii Pae Aina, a e nonoi ana e maheleia ua waiwai la mawaena o ka poe kuleana ia waiwai.

          Ua kauohaia o ka POALUA, la 15 o Maraki, A. D. 1898, ma ka hora 9 a.m., oia ka manawa i hookaawaleia no ka hoolohe ana i ua noi la, maloko o ke Keena Hookolokolo o keia Aha, ma Wailuku, Maui, a ma ia manawa a ma ia wahi e hele mai ai na poe a pau i pili i ua hana la a e hoike mai i kumu, ina he kumu ka lakou, no keaha la e ae ole ia ai ua noi la.

Na ka Aha: H. TALLANT

Wailuku, Hope Kakauolelo Aha Kaapuni Mahele Elua.

Wailuku, Feberuari 4, 1898.

2689-3t

 

          AHA KAAPUNI O KA APANA HOOKOLOKOLO Elima o ko Hawaii Pae Aina. Ma ka Hooponopono Waiwai. Ma ka Hana o ka Waiwai o James Gilman o Eleele, Kauai, i make.

          O ke noi ame ka hoike a ka Lunahooponopono Waiwai o ka waiwai i oleloia ae la, maloko o laila i nonoi ai oia e nanaia a e aponoia kana hoike no ka mahelehele ana i na waiwai e paa nei ma kona lima i ka poe i kuleana ia mau waiwai, a e hookuu ana hoi iaia mai na koikoi mai apau oia ano Lunahooponopono.

          Ua kauohaia, o ka Poaono, la 12 o Maraki ae nei, ma ka hora 12 a.m., ma ke Keena, ma ka Hale Hookolokolo ma Lihue, oia kahi i kohoia a o ka manawa nohoi no ka hoolohe ana i ua noi la ame ka hoike, a e hele ae na poe apau i kuleana i ua waiwai la ma ia wa a ma ia wahi, a e hoike mai i kumu, ina he kumu ka lakou, nokeaha la e ae ole ia ai ke noi.

Lihue, Ianuari 29, 1898.

Na ka Aha: R. W. PURVIS.

2688-3t

 

Kela ame Keia.

 

OLELO HOOLAHA.

          O ka poe apau he mau koi ka lakou i ka Moiwahine Kanemake Kapiolani ma ke dala a ano e ae paha, a hoea mai i ka la 10 o Feberuari nei, 1898, ke kauohaia aku nei ma keia, e waiho mai ia mau koi ma ke keena oihana o na mea no laua na inoa malalo iho nei, ma Honuakaha, kihi o na Alanui Moiwahine ame Puowaina, me ka hookaulua ole.

(Kakauinoaia): DAVID KAWANANAKOA,

JONAH KALANIANAOLE.

2690-2t

 

HOOLAHA HOOPONOPONO WAIWAI

          O ka mea nona ka inoa malalo iho, ka mea i hookohuia i lunahooponopono waiwai no Kepola (w) i make kauoha ole, ma keia ke hoike aku nei, e waihoia mai na koi iaia iloko o na mahina eono o hoole loa ia auanei, a o ka poe i aie i ka mea i make, ke kauohaia aku nei e uku koke mai lakou i ka mea nona ka inoa malalo.

Honolulu, Feberuari 11, 1898.

W. L. WILCOX, Lunahooponopono o ka waiwai o Kepola (w). 2690-5t

 

HOOLAHA HOOPONOPONO WAIWAI

          Owau o ka mea nona ka inoa malalo iho, a ma o ka waiwai la o MISS KEA (w) i make kauoha ole, ma Kukuihaele, Hamakua, Hawaii. A ua hookohu pono ia mai au e E. G. Hitchcock, ka ka Lunakanawai Hookolokolo o ka Apana Eha o ko Hawaii Pae Aina ma ka la 18 o January, A. D. 1898. Nolaila, ina he mau aie ko ka mea i make i kekahi poe, ke kahea aku nei au e waiho koke mai i na bila me na hooia kupono iloko o Eono Mahina. Ina aole, e hoole mau loa ia aku no.

MRS. PIHANA, Luna Hooponopono Waiwai o Miss Kea (w) i make.

Kukuihaele, Hamakua, Hawaii, February, 1898. 2690-5t

 

OLELO HOOLAHA HUI.

          Ke hoolahaia aku nei ma keia, ua hoohui ae nei na mea no laua na inoa malalo iho nei, i keia la, malalo o ka inoa hui, "Kiemme ame Juen," no ka lawelawe hana ana ma ka oihana kuai waiona ma Honolulu, Oahu.

Hanaia Feberuari 7, 1898.

H. KLEMME, Honolulu, K. H. P. A.

H. A. JUEN, Honolulu, K. H. P. A.

 

NALOWALE AEA A AIHUEIA PAHA

          He lio eleele, me kahi kiko hoku keokeo ma ka lae, kuniia PC, ma ka uha hope. E ukuia aku no he uku makana ke hoihoiia mai ia i ka mea nona ka inoa malalo iho nei.

A. PERRY, Hale Hookolokolo.

2689-3t

 

HOOLAHA HUI.

        Ke hoolahaia aku nei ma keia, ua hoohui ae nei na mea no laua na inoa malalo iho nei, malalo o ka inoa hui "Bergan ame Gorham," he Mau Mea Hana Aelike Laula, ma Honolulu, Mokupuni o Oahu, Repubalika o Hawaii.

M. W. BERGAN, Honolulu K. H. P. A.

W. G. GORHAM, Honolulu, K. H. P. A.

Hanaia Feberuari 7, 1898.

2689-2t

 

CURES WHILE YOU SLEEP

Vapo-Cresolene

        MAMULI o ka haawiia ana o ka laau CRESOLENE ma ka hanu ana, oia ke keehina hana palekana loa no ka lawelawe ana i na Ohe Makani o ka puu. He kamahao launa ole ka holo pono o kana hoola ana i ke Kunu-Kalea ame ke Kunu Ho. He laau maikai loa ia no ke pale ana aku i na ma'i lele, a pela aku. E loaa no na buke hoakaka me ke kumukuai ole, i huipu me na palapala hoomaikai. Kuaiia e na poe kuai laau a pau.

HOLLISTER DRUG CO.,

Honolulu, H. I., Agents.

 

KUAI O NA HOOLIMALIMA AINA KOPE.

        Mamuli o ke kauoha a na Kahu Waiwai o B. P. Bishop, e kuai kudala aku ana o James F. Morgan i na hoolimalima no ka manawa o iwakalua-kumamakahi (21) makahiki, i kekahi mau apana aina waiwai nui no ke kanu kope ame na huaai, e waiho ia ma ka mahele o Keei 1 ame 2, Kona Hema, Hawaii.

        E malamaia ana ke kuai ana ma ka Poakolu, Maraki 23, 1898, ma ka hora Umikumamalua o ke awakea, ma ka hale kudala o Morgan, Alanui Moiwahine, Honolulu.

        E ikeia no na Kii o na Aina ame ke ano o ka palapala hoolimalima, ma ke Keena Aina o ka Waiwai o B. P. Bishop, Alanui Kalepa, Honolulu, a ma kahi o Mr. J. D. Paris, ma Napoopoo, Kona, Hawaii. 2689-td

 

HOAKAKA O KA BANAKO O HAWAII, KAUPALENAIA.

        Ke koi nei ka Pauku 14 o ke Kanawai Banako o 1884, ma ka Poakahi hope o Ianuari o kela ame keia makahiki, e hoike ai na Banako i ke kulana o ka lakou mau hana, ma ke ano no ka la 1 ia o Ianuari.

        Eia iho ka Hoakaka o na Hana o ka Banako o Hawaii i Kaupalenaia, no Ianuari 1, 1898:

        O ke kumuwaiwai kumupaa o ka Hui he $450,000, i maheleheleia iloko o 4000 mahele kuleana, he $100 no ka mahele hookahi.

        Ua auhauia hoi a loaa ka huina o $75 no ka mahele hookahi, a mamuli oia, ua loaa mai he $300,000.

NA AIE - LIABILITIES.

Kumuwaiwai kumupaa i hookaaia.....$300,000

Na dala i hoohuiia mai.....93,712.59

Na Aie e ae.....823.03

$394,535.62

NA KUMU LOAA - ASSESTS

Na Bila Kikoo Dala i ko na Aina E ame na Nota Aie.....$88,077.82

Dala ma ka lima.....$254,247.70

Na Bila Kikoo, &c. 5,601.44 259,849.14

Na mea hoopaa e ae.....46,608.66

$394,535.62

P. C. JONES, Peresidena.

Honolulu, Poakahi, Ianuari 31, 1898.

Kakauinoaia a hoohikiia ma ka la 31 o Ianuari 1898.

E. A. MOTT-SMITH, Notere no ka Lehulehu.

2688-3t

 

Theo. P. Severin

(KAPOLEMA MA).

He Mea Pa'i Kii Hooleleaka.

        E hana ana oia i na kii nani loa ma Honolulu nei no ka uku haahaa loa. E paiia ana na Kii Ahaaina, Mare, Hoolewa, na Hale Noho, a pela aku.

        E hoonuiia ae ana na kii mai na kii liilii mai.

        Alanui Nuuanu, ma kela aoao aku o ke Alanui Pauahi. Aia iluna.

2664-12ms

 

Makemake Makou i ka Oukou Hana

Pa'i ana ame

Ka Humu ana

I na Buke.

E HANAIA ME KA NOIAU LOA.

Na Pepa Keleawe Inoa me na Hua Kuni Wai Gula.

E hanaia no ia ma ko makou nei Keena a kulike me ka mea i makemakeia.

KA HUI HAWAIIAN GAZETTE

Na Poe Hoolaha.

Hale Pohaku o Von Holt, Alanui Moi, Honolulu.