Ka Nupepa Kuokoa, Volume XXXVI, Number 27, 2 July 1897 — Page 2
| This text was transcribed by: | Rob Escuadro |
| This work is dedicated to: | ko'u hoaloha Abraham Wailani Kalilikane o Nanakuli |
Ka Nupepa Kuokoa
KE KILOHANA POOKELA NO KA LAHUI HAWAII.
Hoolaha Mana Hooko
I kulike ai me ke kuhihuhi o ka Mahele 4, o ka Pauku 103 o ke Kumukanawai:
MA KEIA KE HOOLAHAIA aku nei o ka hoololi i manaoia malalo nei i hooholoia ai kona heluhelu ekolu ia ana e ka Hale o na Lunamakaainana i ka la 12 o Mei, 1896, a iloko o ka Hale Senate i ka la 16 o Mei, 1896, penei:
HE HOOLOLI I MANAOIA I KA PAUKU 63 O KA REPUBALIKA O HAWAII E LIKE ME KA PAUKU 103 O IA KUMUKANAWAI.
O ka Pauku 63 o ke Kumukanawai o ka Repubalika o Hawaii, ma keia ke hoololiia nei i heluheluia ai elike me keia mahope iho nei:
PAUKU 63 - NA POO O NA KANAWAI. 'I hookahi no manao ma kela ame keia Kanawai, a e hoakakaia ma kona poo."
J. A. KING,
Kuhina Kalaiaina.
Keena Kalaiaina, Iulai 1, 1897.
2657-12t
I keia la i hookohuia aku ai o W. J. LOWRIE Esq. i hoa no ka Papa Alanui no ka Apana Ohi Auhau o Ewa ame Waianae, Mokupuni o Oahu, ma kahi o Mr. Louis Warren i waiho mai.
J. A. KING,
Kuhina Kalaiaina.
Keena Kalaiaina, Iune 19, 1897.
2656-3t
Oiai ua hoopaaia ka la 4 o Iulai he la "Kiulaia Aupuni" e ke Kanawai 66 o na Kanawai o 1896, a e haule ana hoi ia la ma ka la La Sabati ma keia makahiki; nolaila, e malamala ka Poakahi, Iulai 5, i la "Kiulaia," a e paniia na Keena Aupuni apau ma ia la a puni ka Repubalika.
JAMES A. KING,
Kuhina Kalaiaina,
Keena Kalaiaina, Iune 17, 1897.
2655-3t
HOOLAHA PA AUPUNI.
I kulike ai me ka Pauku 1 o ka Mokuna XXXV o na Kanawai o 1888, i keia la ua hoololi ae nei au i ke ku ana o ka Pa Aupuni ma ka Apana o Kaupo, Mokupuni o Maui, a i ka aina i kuleanaia e J. W. Kawaakoa, ka Luna Pa Aupuni o keia wa, a i ikeia o ka aina o "Kumunui," e waiho ana mauka o ka aina Aupuni o Kumunui, ma Kaupo, Maui.
J. A. KING,
Kuhina Kalaiaina.
Keena Kalaiaina, Iune 21, 1897.
2656-3t
NA KOHO I SILAIA.
E laweia mai no lakou e ke Keena o ke Kuhina Kalaiaina a hiki i ka hora 12 o ke awakea Poakahi, Iulai 12, 1897, no ke kukulu ana i ka Hale Hookolokolo ma Koloa, Kauai.
Aia ke kii ame na hoakaka ana ma ke Keena o ka Luna Nui o na Hana Hou, a ma ka Hale Leta nohoi ma Koloa.
Aole ke Kuhina i hoopaa iaia iho e ae ia o ke koho haahaa kana e lawe mai ai, a koho e ae paha.
J. A. KING,
Kuhina Kalaiaina.
Keena Kalaiaina, Iune 26, 1897.
2657-3t
HOOLAHA NO NA AINA AUPUNI.
Ma ka Poaono, Iulai 17, ma ka hora 12 o ke awakea, ma ke Keena Oihana o E. D. Balauwina o Hilo, Hawaii, e kuai kudala ia aku ai ma ke akea:
Ka Apana Aina ma Kehena, Puna, Hawaii, maloko o laila he 31.05 Eka.
Kuike ke Dala.
Kumukuai oi aku mamua o $93.15.
No na mea i koe, e ninau ia E. D. Baldwin, ka Hope Agena ma Hilo, Hawaii, a i ole ia, ma ke Keena Oihana o na Aina Aupuni ma Honolulu.
J. G. BROWN,
Agena o na Aina Aupuni.
2655-3t
HOOLAHA AINA AUPUNI
Ma ka Poaono Iulai 17, ma ka hora 12 o ke awakea, ma ke Keena o J. Kaelemakule, Kailua, Kona Akau, e kuai kudala akea ia aku ai malalo o na hookaa dala ana i aelike maopopo ia a pela pu hoi me na hana hou, he elua mau apana ma Waiaha, Kona Akau, penei:
Apana Helu 4, 395 Eka. Kumukuai oi maluna o $395.
Apana Helu 5, 43 Eka. Kumukuai oi maluna o $344.
No ke kii o keia mau apana aina ae la, no ka mea e pili ana i na kumu aelike, e ninau ia J. Kaelemakule, ka Hope Agena o Kailua, a i ole ia, ma ke Keena o na Aina Aupuni ma Honolulu.
He mea pono i na poe e kuai ana ke loaa na makaukau me ka waiho pu mai hoi i ka manao hoike i koiia ai na poe aoi no ke Kuleana Kuai Hoolimalima ame na Aina Aladio Dala Kuike.
J. F. BROWN,
Agena o na Aina Aupuni.
Keena Aina, Iune 14, 1897.
2655-td
HOOLAHA WAI.
I kulike ai me ka Pauku 1 o ka Mokuna XXVI, o na Kanawai o 1886, ke hoolahaia aku nei ma keia o ka poe apau e paa ana he mau pono wai, a e uku ana hoi i na uku wai no ka manawa e pau ana Dekemaba 31, 1897, e ohiia no a e ukuia hoi ma ke Keena o ka Oihana Wai o Honolulu, ma ka la 1 o Iulai, 1897.
O na auhau wai apau i hookaa ole ia mahope iho o ka hala ana o na la he umikumamalima, e auhauia no he 10 pa-keneta.
E hookaaia na uku wai ma ke Keena o ka Oihana Wai o Honolulu ma Kapuaiwa Hale.
ANDREW BROWN,
Luna Nui o ka Oihana Wai o Honolulu.
Honolulu, K. H. P., Iune 15, 1897.
2655-3t
KA Nupepa Kuokoa
No ka Makahiki ……………….$2.00
NO Eono Mahina ………………1.00
Kuike ka Rula.
PUKA ANA. 1 Pule 2 Pule 3 Pule 4 Pule 5 Pule 6 Pule
Iniha $ 1.50 $ 2.00 $ 2.50 $ 3.00 $ 3.50 $ 4.00
2 Iniha 2.00 2.75 3.50 4.00 4.50 5.00
3 iniha 2.50 3.50 4.50 5.00 5.50 6.00
4 iniha 3.00 4.00 5.00 6.00 6.75 7.50
5 Iniha 3.50 4.75 6.00 7.00 8.00 9.00
Iniha 4.00 5.50 7.00 8.00 9.00 10.00
O na Olelo Hoolaha a pau e hoouna ia mai ana no ka Hoolaha maloko o keia Nupepa, e hoouna pu mai me ka auhau, a ina aole, aohe hookomo la,
HOOPUKAIA E KA
HAWAIIAN GAZETE CO.
C. G. BALLENTYNE, Luna Nui
JOSEPH M. POEPOE, Lunahooponopono.
Honolulu, Oahu.
POALIMA……………………………..IULAI 2, 1897.
Ma ka aoao ekahi o ko makou pena o keia la e loaa ai i ko makou poe heluhelu ke Kuikahi Hoohui Aupuni hou mawaena o Hawaii nei ame Amerika Huiia; a pela pu hoi me na nuhou apau e pili ana i ua kumuhana la.
Ma ko makou pepa o keia pule ae e hoopuka aku ai makou i kekahi mau manao waiwai nui mai a Peresidena Ma Kinile mai, a pela pu ohoi mai a Kuhina Sherman mai no ka mea e pili ana i ka ninau Hoohui Aupuni mawaena o Hawaii nei ame Amerika Huiia.
Ma ko makou hoomaopopo ana, ina he oiaio ka mea i hoikeia mai i ka Nupepa Examiner o Kapalakiko, o Iune 17 aku nei, mai Wasinetona mai, ma ka la 16, no na olelo a ke "Alii" Liliuokalani, elike me ia a makou e hoopuika aku nei ma ko makou pepa o keia la, alaila, he mea maopopo loa aia ke "Alii" ma ke alahele no ka loaa mai he haawina dala uku hoomau nona mai ke Aupuni mai o Amerika Huiia.
Aloha Farrington.
Me ko makou houpo i miloia me na awaiaulu o ke aloha, ma ka Poakolu iho nei, i pahola aku ai makou i ka ilima akau oia haawina nene-ili kapu o ka makamae i ko makou hoa o ka maka peni, oia hoi o Wallace R. Farrington, ka Lunahooponopono o ka nupepa P. C. Advertiser. Ae - he hoaloha oiaio oia no ke Kuokoa, oiai iloko o na makahiki elua ame ka hapa o kona alakai ana i na manao pepa o kana nupepa i noho Lunahooponopono ai, i lilo ai oia i hoa kaana a kuka pu no makou ma na mea e pili ana i na ninau ano nui a koikoi i komohia iho nei o Hawaii Aupuni, a o ke pookela loa nae paha o na kumuhana i auamo pu ia e makou ame ia, me ka hoomanawanui i na la "hoonaikoia" a ko makou mau hoa e ae o ka Oihana Pa'i, ma Honolulu nei, oia no ka Ninau Hoohui Aupuni.
He oiaio, ma ka wa mua loa a ka mea e noho nei i Lunahooponopono no keia pepa i paa ai i kona noho alakai ana, ua hoike mai oia, o ke alahele a ka Kuokoa e paio ai, oia no ke kakoo ana i ke Kumuhana Hoohui Aupuni, me ka waiho ana mai hoi i na manao alakai e ae o ka pepa na ka Lunahooponopono no ia e hana elike me kana i ike ai he pono. A ma ka wa i hoomaka ai na kakele mua ana o makou nma na kolamu o keia pepa, ma ka malama paha o Novemaba, 1895, a hoea mai i ka la ana i haalele mai ai i kona pili ana me ka hana i na'i pu ia ai e makou ala hoi, aole no makou i lohe iki i kona mau leo hoohalahala no na manao alakai i naiia ai e ke Kuokoa iloko oia wa. A o keia wa hoi i pilila ai e makou me ia, ua awaiaulu ia no ia me ka wainohia o na manao maikai ame ka oluolu. He hoaloha oiaio oia no makou . He kanaka opio puuwai oluolu ame ka noonoo akahele a he kanaka nohoi i hoopihaia me ka naauao kalai manao.
Ma ka wa ana i haalele iho ai ia makou, oia no ka la i loaa mai ai ka lono mai Yokohanma mai, ua pau ke Kuikahi Hoohui Aupuni i ke kakauinoaia e na Komisina Hawaii nei ame Amerika Huiia, a ua komo hoi ua kuikahi la iloko o ka Aha Senate. Nolaila, o ke kumuhana i oni pu-luaia ai e ia ame makou iloko o ka manawa i hala ae nei, ua hoea aku i ka hopena o kona hookoia ana. No ia mea, i ko makou hookuu ana i keia kanaenae aloha ana nona, ke puana ae nei makou - Alo-ha Farrington!
Hawaii me Iapana.
Ma ka auina la o kela Poalima aku nei i loaa mai ai ka pane a ke Kuhina o ko na Aina E i ke Kuhina Iapana no ka mea e pili ana i ka ninau e aumeumeuia nei mawaena o na Aupuni elua. ua oleloia, aole loa i lawa na mea i kakauia maloko o ua palapala la e hoomohala maikai ae i ka noonoo o ke Kuhina Iapana. Ua hoike ae hoi ua Kuhina la, pela ka oleloia, aole no e hooleleia mai ana na luina o ka mokukaua Naniwa no ka hopu pio ana i ka Hale Dute, a wahi a ua Kuhina la, o na olelo oia ano e wawa hele nei ma na pi-pa alanui o Honolulu nei, he mau moeuhane palaualelo wale iho no ia.
Ko ka Wanana.
No aneane hookahi makahiki me na mahini eono a oi iki i ku ai makou malunao ke kahua o ka Hoohui ana ia Hawaii nei me Amerika Hulia. Ua hoakaka akea makou i keia kumuhana imua o ka lehulehu, me ka hoike ana'ku imua o lakou, he kumuhana ola ia, a e ola io loa aku ana no. Ua hooia aku makou imua o ka lahui, mamua o ka hoea ana mai o ka la 1 o Ianuariu o keia makahiki ae (1898) e hookoia ai keia kumuhana me ka puhili ole. A oiai makou e hoike kilipoipoi ole ana no keia mau mahele manao, aole loa i nele ko makou mau hoaloha o ka oihana hoolaha nupepa Hawaii i ka hoopuukahua ana mai ia makou, me ke kuahaua lono papa ana mai Hawaii a Niihau, "Ua make - ua make kanu loa ka Hoohui Aupuni. Pela mai nei o Kaniu ma, Palau ma, Kulolo ma ame Iulai (Julius) Pama ma." Aka, e na mamno oiwi o Hawaii i keia la - Heaha la ka oukou e ike nei? Ait ke Kuikahi Hoohui ia Hawaii nei ame Amerika Huiia iloko o ka Aha Senate. Nolaila, ua "Ko ka Wanana" a "Ke Kilohana Pookela no ka Lahui Hawaii." Ua kani ka moa kualua, pa-e koe o ka leo o ka moa kuakolu, he olowalu koe o ka moa i ke koho ana a ka Aha Senate, a ia wa makou e puana ae ai, aole me ka hoonaukiuki aku, aka, me ke aheahe lai malie no ka manao maikai no na mea apau, "E holo ana ke Kuikahi Hoohui Aupuni, a e Ko ana ka Wanana a ke Kuokoa."
Ua ike mua makou i o lilo loa no, e hoea aku ana no kakou i keia hopena, me ka hiki ole ke hoopuukahuaia e na kahuna unihipili o ke au kahiko, a no ia mea, ua wanana e makou i o-la honua, E hui ana Hawaii me Amerika, aohe kahuna kuni nui e manalo ai ia olelo wanana. Ano la, ke ku nei makou ma ke kuahui ame ka nuu o ko makou kahua kalai manao akea, a hoike aku i keia lono hauoli imua o ka lahui oiwi o ka aina hanau hookahi, "E ko ana ka wanana - e hui ana o Hawaii me Amerika - he lahui Karistiano a naauao ka lahui Hawaii - e hooi aku ana ka Amerika Huiia kiai ana me ka makaala nui no na pono pili Aupuni o ka lahui ili-ulaula o Hawaii."
Mai hopohopo e ka lahui oiwi o ka aina, e loaa ana ia kakou ka lanakila haaheo ma keia hope aku. He oiaio, ua nele kakou i ke alii ma ka nohona kino ana, aka, i hookahi o kakou alii o ke Akua i ka poiuiu o ka lani; aka, o ka noho kuokoa a lanaikila oiaio ana o ka lahui maluna o na hana pili koho balota o ka aina hanau, e loaa ana ia la kakou apau, ina e lokahi kakou i keia wa e kakoo ae i ke Aupuni e ku nei. O ka leo keia o ke ola. Aohe wa hou aku; ano ka manawa, mai hoopanee i ka imina o ka pono. He lohe ke ole, a he kuli ka make.
KA HOIKE O KE KULA KAIKAMAHINE O KAMEHAMEHA.
Na Haumana i Hookuuia.
Ma ke ahiahi Poalua iho nei, Iune 29, i malamaia ai kekahi anaina haiolelo ame himeni maloko o ka luakini o Kaumakapili e na haumana o ke Kula Kaikamahine o Kamehameha, a he anaina keia no ka hookuu ana i kekahi mau haumana o keia kula i keia makahiki me ka loaa ana ia lakou he mau palapala hoomaikai.
Ua oleloia he aneane 2000 poe makaikai i lulumi aku maloko o na paia o ka luakini o Kaumakapili, me ke koe okoa nohoi o kekahi poe ohohia e ae iwaho, mai ke alanui Aupuni aku a hoea i ke alapii a papalu ma na ipuka komo.
Aia mamua pono mai o ka Ogana, ua hanaia he holopapa, a maluna iho o keia wahi i kukuluia ai kekahi mau ipu o na lau lipolipo o kela ame keia ano. A maluna o keia wahi i noho ai na haumana no lakou "ka po nani o Halalii."
Eia na lede opio o ke kula i puka ma keia makahiki: Lydia Aholo, Julia Akana, Kalei Ewaliko, Miriama Hale, Lewa Iokia, Helen Kahaleahu, Elizabeth Kahanu, Malie Kapali, Hattie Kekalohe, Elizabeth Keliinoi, Keluia Kiwaha, Julia Lovell, Jessie Mahoahoa, Elizabeth Waiamau, ame Aoe Wong Kong.
Eia ka papa hoike o na hana: Himeni Hui: "In Heavenly Love Abiding" - "Noho ma ke Aloha Lani" (Mendelssohn). Kula Kaikamahine o Kamehameha.
Pule: Rev. C. M. Hyde, D. D.
Kumumanao: "The Teacher and Trainer of Hawaii's Little Ones" - Ke Kumuao a Alakai o ko Hawaii Poe Pokii: Lewa Iokia.
Mele (Poem): "The Greatest Discovery" - Ke Pookela o na Mea i Huli ia: Hattie Kekalohe.
Kumumanao: "My Life at Kamehameha" - Ko'u mau La ma Kamehameha: Aoe Wong Kong.
Kumumanao: "The Servant of the Soul" - Ke Kauwa a ka Uhane: Elizabeth Kahanu.
Kumumanao: "Wake the Divine Within" - Hoala ae i ko loko Uhane Pono: Elizabeth Waiamau.
Kumumanao: "A Bit of Clay" - He Huna Lepo Palolo: Kalei Ewaliko.
Mele hui: "Sweet May" (Barnby): Papa Kula.
Kumumanao: "A Plea of the Children" - He leo i na Keiki: Malie Kapali.
Kumumanao: "Domestic Sciences" - Na Ike Nohona Home: Jessie Mahoahoa.
Kumumanao: The Use of Music" - Ka Waiwai o ka Ike Mele: Lydia Aholo.
Kumumanao: "A Practical Art" - Ka Ike Hana maoli: Julia Lovell.
Mele (Music): "At School Close" (Whittier): Elizabeth Keliinoi.
Haawiia na Palapala Hoomaikai.
Himeni Hui: "Cradle Song:" Kula Kaikamahine o Kamehameha.
Pule Hoomaikai ia Rev. E. S. Timoteo.
Na Elele o ka Hui Opio Imi Pono Karistiano o Hawaii no Kapalakiko.
Ma ka mokuahi Auseturalia o ka Poakolu nei, Iune 30, i kau aku ai na elele o ko Hawaii Pae Aina nei Hui Imi Pono Karistiano no Kapalakiko.
Eia na inoa o keia poe elele: Lyle A. Kickey, Peresidena o ka Hui Opio Imi Pono Karistiano o ko Hawaii Pae Aina, a he elele nohoi oia mai ka Ekalesia mai o Kaukeano; D. L. Naone, Hope Peresidena, a elele mai ka Ekalesia mai o Kawaiahao; Mrs. Herbet Coan, elele mai ka Hui mai o Hilo; Miss Ida Leonard, elele mai ka Hui mai o Paia, Maui; Ralph Woodward, A. M. Walcott, Miss Laura L. Pires, Miss M. Ferreira, Miss Maria Forbes ame Miss Mary E. Green, poe elele mai ka Ekalesia mai o Kaukeano.
Ma keia huli hoi ana mai a ka mokuahi Australia no Honolulu nei e hoi mai ai o Mr. D. L. Naone, a ma ka mokuahi Moana e ku mai ana no onei ma ka la 29 o Iulai ae nei, e huli hoi mai ai o Mr. Dickey, a o na poe elele e ae mahope aku.
KA PANE HAMAMA A KA ONA MILIONA
CLAUS SPRECKELS NO KA HOOHUI AUPUNI.
Ua hoolaha akea ae ka nupepa Examiner o Kapalakiko, o ka la 18 o Iune aku nei, i ka pane a ka Ona Miliona Claus Spreckels no ka mea e pili ana i ka ninau Hoohui Aupuni o Hawaii. A penei ua pane la:
"I ka wa e hiki ole ai i kekahi Aupuni ke hooponopono iaia iho, a aia hoi maloko o kana malama ana ka waiwai o na kanaka o ko na aina e, alaila, he mea pono i na Aupuni no lakou na pono i komohia ilaila, e malama i na pono o ko lakou mau poe kanaka. Ma keia ninau, o Amerika Huiia ke pookela loa aku o keia mana, a nolaila, he hana nana e pono ai ke hana aku a ko. Aole o'u kanalua ina e hoohui mai ana ko kakou Aupuni nei ia Hawaii a haawi aku hoi i na hhoia ana i na Aupuni e ae, e malamaia no na pono o ko lakou poe makaainana a hoomauia hoi ka inoa maikai o ke Aupuni, aole loa a lakou mea e kue mai ai. A he kanalua ole nohoi ko'u, e hoea koke mai ana ka wa e hoomaopopo ai na kanaka Hawaii maoli i ka pomaikai o ka lilo ana i poe makaainana no Amerika huiia, noho hoi malalo o ka hoomalu ana a kekahi Aupuni ikaika.
"Mamuli o ka'u mau mea i olelo ae ia, e hiki no ia oe ke ike iho, he kokua au i ka hoohui ana mai i ko Hawaii Pae Aina me Amerika Huiia ame ke kukuluia ana ona Aupuni panalaau. a he Aupuni kupono loa ia, oiai e kaulike ana ia no na kanaka ame na haole.
"(Kakauinaoia),
"CLAUS SPRECKELS."
Ka Palapala kue a Liliuokalani.
Wasinetona. Iune 17, - I keia la i waiho aku ai ka Moiwahine (i pau) Liliuokalani i kana palapala kue i ka hoohui Aupuni Hawaii ma ke keena o ke Kuhina Nui. Ua haawiia aku keia palapala ia Kuhina Sherman e Mr. Joseph Heleluhe, ma ka aoao o na kanaka hawaii, i hookohu pono ia hoi e elua o ko lakou mau Ahahui Aloha Aina.
Ua ukaliia o Mr. Heleluhe e Kapena Julius palmer, ke kakauolelo haole Amerika a Liliuokalani.
Ua hookipa maikai aku o Kuhina Shjerman i na elele o ua palapala la, eia nae aole oia i hoike mai ia laua i kona manao no ia mea. A eia iho ua palapala la:
"Owau, o Liliuokalani, o Hawaii, ma o ka makemake la o ke Akua, i kohoia ai i hooilina ma ka la 10 o Aperila, M. H. 1877, a mamuli o ka lokomaikai o ke Akua, i Moiwahine no ko Hawaii Pae Aina, ma ka la 17 o Ianuari, M. H. 1893, ma keia ke kue aku nei Au i ke aponoia ana o kekahi kuikahi, A'u hoi i haiia mai ai, ua kakauinoaia ma Wasinetona e Messrs. Hatch, Thurston a me Kinneuy, e haawi ana hoi i keia mau mokupuni i lihi aina a malalo hoi o ka mana o Amerika Huiia. Ke kukala nei au, o ua kuikahi la he hana hewa ia i na kanaka maoli a hapa hoi o Hawaii, he wawahi wale ana i na pono o na lii maoli e noho mana ana, he kue i ke kanawai lahui, i ko'u lahui ame na lahui hoaloha e ae, i hana kuikahi pu ai lakou, a he hoomau ana'ku hoi ia i ka hana apuhi i hookahuliia ai ke Aupuni kumu, a o ka hope, he hana hewa loa ia e kue ana ia'u nei.
"Nokamea, o na palapala kue pili oihana i hanaia ai e a'u ma ka la 17 o Ianuari, 1893, imua o ke Aupuni Kuikawa, ua kakauinoaia e a'u a apoia mai hoi e na Aupuni elua, me ka hooia ana mai e waihoia aku ana ka hana ia Amerika Huiia no ka hooponopono kuikawa ana.
"Nokamea hoi, ua hoike maoli ae ka'u mau palapala kue ame ka'u mau palapala e ae i ke Aupuni o Amerika Huiia mahope koke iho oia wa, ua haawi aku au i kuu mana i na koa o Amerika Huiia, i mea e kapaeia ae ai ka hookahe koko ana, a nokamea hoi ua hoomaopopo au i ka waiwai o ka hakoko ana me ia mana weliweli.
"Nokamea hoi, ua hoike ae ka Peresidena o Amerika Huiia, ke Kuhina Nui o ke Aupuni ame ka Elele i hooli@ohuia e laua, ma na palapala pili Aupuni, ua hooweliweli kue kanawai ia ko'u Aupuni e na mana ikaika, o ka Oihana Kuhina ame ko ka mokukaua o Amerika Huiia, a ma ia manawa nohoi i lawelawela ai na noii ana, owau no ka Moi Kumukanawai o ko'u lahui.
"Nokamea hoi, oia olelo hooholo a ke poo kiekie i ikeia o Amerika Huiia, ua haawi pili Aupuni ia mai la ia ia'u ame Sanford B. Dole, a ua nonoiia aku hoi ko Dole haalele ana i ka oihana e Albert S. Willis, ka agena i ikeia a Kuhina o ke Aupuni o Amerika Huiia.
"Nokamea hoi, aole i loaa ka mana i ke Komisina i hoikeia ae ia, aole hoi i ke Aupuni nana i hoouna mai ia mea, ka mana mai na poe koho balota o Hawaii i hoopaaia ko lakou mau inoa, aka, ua loaa mai kona mana hookohukohu mai kekahi komite mai i kapaia, ke Komite no ka Maluhia o ka Lehulehu, i hoalaia ma ua a 17 la o Ianuari, 1893, a maloko o ua komite la he poe kupa Amerika ka hapa nui, aole hoi he Hawaii a lala o loko o laila he Hawaii, a i komo pu hoi ma na hana hoomaikeike a hiki i kona ku ana.
"Nokamea hoi, o ko'u lahui, he anaane 40,000 ia, aole loa lakou i kuka pu ia aku e keia poe 3,000 ka heluna ka poe hoi i olelo he kuleana ko lakou e wawahi ai i ke kuokoa o Hawaii. O ko'u lahui ka eha-hapalima @ @ @ kupono ma ke kanawai no @ @ @ balota ana ma Hawaii, a ina @ @ @ is sku ns poe i laweia mai he p@ @ hana, elike ana no ka huina @ @ o na kanaka.
"Nokamea, ua hoole loa ua kuikahi la i na pono lahui o ko'u poe kanaka a peia pu hoi me na pono waiwai pili paa o ko lakou mau alii. Mailoko ae o na kea he 4,000,000 i komo iloko o ka panalaau a ua kuikahi la e haawi nei no ka hoohui ana mai, he 1,000,000 a 915,000 eka paha, i hoomaopopo mau la mamua aku nei, aole ma kekahi ano e ae, aka, ma ke ano he waiwai ponoi no ia no ke Alii Kumukanawai e hooponoponoia ana elike me na waiwai ponoi e ae ona.
"Nokamea, ua manaoia ma ua kuikahi la, e ope'a wale ia ae ua waiwai la, oia hoi na aina i kapaia na Aina Leialii, a o ka poe i kuleana ma ke kanawai i ua mau aina la, ma keia wa a ma ka lalani aku o ka nohoalii, aole i loaa ia lakou he kumukuai (kumuwaiwai) no ia mau aina, a o ko lakou kuleana ma ia mau aina, he kuleana ia i hoopaapaa ole ia, a ua paa ia kuleana ia i hoopaapaa ole ia, a ua paa ia kuleana ma ke kanawai ma ko'u inoa i keia la.
"Nokamea, ua hoole ae ua kuikahi la i na hoike ana apau o ka noho aloha mau ana ame ka manao maikai i hana ia me Amerika Huiia maloko o na kuikahi mua, e na moi ma ka aoao o na kanaka Hawaii, a pela pu hoi me na kuikahi apau i hanaia e ia poe Moi me na Aupuni makamaka e ae, a nolaila ua kue ia i ke kanawai lahui.
"Nokamea, ma o ka hana ana me na poe o olelo nei i keia wa he kuleana ko lakou e panai mai ai i ua panalaau la o Hawaii, e lawe mai auanei ke Aupuni o Amerika Huiia i ua panalaau la mai na lima mai o ka poe a ko Amerika luna poo kiekie (ka mea i koho pono ia e ka lahui o Amerika Huiia a i noho oihana ma ka makahiki 1893) i puana ai, he poe lakou i loaa ka mana mamuli o ka epa a e hoomalu ana hoi ia Hawaii me ke kue i ke Kumukanawai.
"Nolaila, owau, o Liliuokalani o Hawaii, ma keia, ke poloai aku nei au i ka Peresidena o ka lahui a'u i hookuu mai ai i kuu waiwai ame kuu mana Aupuni, e unuhi aku i ua kuikahi la (e haawi ana i na mokupuni i oleloia) mai ka noonoo hou ia ana ku. Ke nonoi aku nei au i ka Aha Senate hanohano o Amerika huiia e hooie i ke apono ana i ua kuikahi la, a ke uwalo aku nei au i keia lahui kaulana a maikai, ka poe hoi i loaa mai ai i ko'u poe kupuna ka ike no ka hoomana Karistiano, e kakoo ae i ko lakou mau wahaolelo ma na hana ku i ka pono ame ke kaulike, e kulike ana me na rula o ko lakou poe kupuna, a i ke Akua mana loa hoi o ke ao apau, ka Mea e hooko pololei ana, iaia no au e waiho aku nei i ka'u koi ana.
"Hanaia ma Wasinetona. Apana o Kolumbia, Amerika Huiia. i keia la 17 o Iune, ma ka makahiki umi-kuma-mawalu haneri ame kanaiwa-kumamahiku.
"JOSEPH HELELUHE.'"
"LILIUOKALANI."
Na Hoike:
Wakeke Heleluhe.
Julius A. Palmer.
KA MOKU "HOKUAO."
Ua haalele aku ka mokuahi Hokuao ia Kapalakiko no Honolulu nei ma ka la 28 o Iune, a e ku mai anba ia no onei ma ka la 15 a 16 paha o Iulai nei, a hookahi paha pule a 10 paha la mahope mai o kona ku ana mai e holo loa aku ai oia no Maikonisia.
Nolaila, o na poe Hawaii he poe makamaka ko lakou ma na kai hema e oluolu e lawe ae i na palapala ame na puolo iluna o ka moku oiai ia e ku ana maanei. E makaala e na makamaka.
{E hoike ana keia kii i ke alahele huli welau Akau a Lutanela @ manao ai e hooko aku ma ka malama o Iulai nei, a ua manaoia e @@ iaia he elima makahiki ma keia hua kai.}