Ka Nupepa Kuokoa, Volume XXXVI, Number 15, 9 ʻApelila 1897 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

HAAWINA

KULA SABATI.

 

HAAWINA III.  APERILA 18.

Ka hoohuli ana i ka na Aina e ma Anetioka i ka manaoio.  Oihana 11:19 - 26.

 

  19  Nolaila o ka poe i hoopuehuia i ka hoomaau ana i puka mai no Setepano, hele no lakou a hiki i Poinike.  a i Kupero a i Anetioka, e hai aku ana i ka olelo i na Iudaio wale no.

  20  Kekahi poe o lakou,  he mau kanaka no Kupero a no Kurenaio kekahi, a hiki lakou i ko Helene.  e hai mai ana i ka euanelio o ka Haku o Iesu.

  21  O ka lima pu o ka Haku kekahi me lakou: nui loa iho la ka poe i manaoio aku, a huli i ka Haku.

  22  Kaulana aku laia mea a hiki i na pepeiao o ka ekalesia ma Ierusalema: hoouna ae la lakou ia Barenaba e hele i Anetioka.

  23  A hiki ae la ia, a ike ae la i ka hoomaikaiia e ke Akua, olioli iho la ia, a hooikaika mai la oia ia lakou a pau, e hoopili lakou i ka Haku me ka manao ikaika o ka naau.

  24  No ka mea, he kanaka maikai ia, ua piha hoi i ka Uhane Hemolele, a me ka manaoio: a nui loa ae la ka poe i hulia me ka Haku.

  25  Alaila hele aku la o Barenaba i Tareso.  e imi ia Saulo:

  26  A loaa iho la, alakai mai la ia ia i Anetioka.  A puni no ko laua makahiki malaila.  e hoakoakoa ana me ka ekalesia, a ao mai la i kanaka, he nui loa.  Ma Anetioka i kapa mua ia mai ai no haumana, o na Kristiano.

 

A@i oio paha, ke alahou ana 1 Kor. 15:12 - 26.

  12  A ina i halia o Kristo, i hoalaia, oia, mai ka make ani, pehea la e olelo nei kekahi poe o oukou.  Aohe ala ana, mai ka make mai?

  13  Ina aohe ala ana, mai ka make mai, ina aole i ala o Kristo;

  14  A ina aole i ala o Kristo, ina ua makehewa ka makou ao ana aku , a ua makehewa hoi ka oukou manaoio ana mai.

  15  A ina ua loaa hoi makou, he poe hoike wahahee i ke Akua; no ka mea.  ua hoike makou ma o ke Akua la, i kona hoala ana mai ia Kristo: aole hoi ai i hoala mai ia ia , ke ala ole ka poe make.

  PAUKU GULA.  Oih. 11:18.  Oiaio no, na haawi mai no ke Akua i ko no aina o kekahi i ka mihi e ola'i.

  MANAO NUI.  E pono no i kela mea keia mea manaoio ke lawelawe i kona oihana hoike a kuhikuhi i na makamaka a me na malahini ia Iesu ke Akua Hoola.

  OLELO HOAKAKA.  Mahope iho o ke Setepano make ana na hoopii @uia'ku na haumana o Iesu.  Ua hiki mai kekahi poe manaoio i Anetioka, a lanakila loa ma ka haienauelio ana ma kela kulanakauhale nui.  Ua lilo ia i kikowaena hou no ka puunaue ana aku i ka Euanelio.  a mai ia wa aku na lilo o Paulo i poo o ka oihana misionari.  Ua nui na olelo hoike e pili aua i kona mau hana, a nuku ke kuleana o Petero.

  19.  Poinike. -  Ka apana aina ma ke kahakai o ke Kaiwaenahonua he mau mile 20 ka laula, mai Turo aku i ke akau no na mile 120.  Kupero, - he mokupuni nui ma ke kihi hikina akau o ke Kaiwaenahonua.  140 mile ka loa, 50 ka laula.  Anetioka. - he kulanakauhale i kukuluia M.H. 300, a lilo i ke kolu o na kulanakauhale nui o ke aupuni Roma.  He mau kamaaina 500,000: he mau waiwai palena ole; he mau hale keaka, hale auau, hale kalepa, hale alii, lehulehu loa.  Hookahi alanui 4 mile ka loihi, me ke kipapa o na pohaku oahi mawaena o na alahele elua. no laua he mau lalani elua o na kia mabala.  Ua kaulana loa no na hoouhauha a me ke kolohe.  Ua ku waena o ko Asia a me ko Europa poe kaapuni.  Iudaio, - me ka manao lalau no lakou wale no ka lono maikai. 

  20.  Kurenaio. - he mokuaina ma Aferika akau.  Helene. - ka anemoku nona o Atenai, ke kulanakauhale kaulana loa.  O ka poe Helene ka poe noeau loa ma ke kalai kii, pena kii, haku mele, a pela aku.  O ka olelo Helene ka olelo i hoopalahaia elike me ka olelo Enelani i keia wa.  No ka launa mau ana me ka poe Helene, ua hai euanelio ia no hoi i keia poe.  Iudaio ole nai.

  21.  Lima. - oia hoi ka mana i hoailonaia ma keia olelo hoohalike.  Huli. - me ka haalele ana i na hoomanakii.  Oia kekahi mea hou.  oiai ia wa ua hoomanakii na kamaaina apau. 

  22.  Pepeiao. - a eha ka poe lohe Iudaio me he mea la, he hewa nui keia hoohuli ana i ko na aina e i ka pono Karistiano.  Lakou. - ma ko lakou kuleana ka ekalesia makua.  Barenaba. - i oleloia Oih. 9:27.  He kanaka aloha pumehana oia.  Aole ku ka haupaa i ka puuwai Karistiano.  

  23.  Olioli. - no na mea ana i ikemaka ai.  Ua ikemaka oia i na hana ku i kona kulana.  Nui ka poe kaahele e hiki mai ana i Honolulu, aole nae i ike lakou i kekahi wahi hana misionari.  Ua nui ko lakou mau olelo hoohenehene wale i kekahi mau kina o na kanaka Hawaii.  Hoopili. - elike me na opihi ma na pukoa, me ka hoopau ana i ka ea malalo o loko.  Pela no e pono ai i ka inoa manaoio ke kiola aku i na kuko a pili na lini uhane ia Iesu ka Pohaku Kumau.

  24.  Piha. - no ka hoomana loa o kona naau, a kaawale ke koea.  Huiia. - ma ko Barenaba hoohui ana ia lakou me ke aloha, elike me ka uwila e hoopili paa ana i na hunahuna kila i ka mea mana ume.  Tariso, - ke one kanau, kahi noho o Saulo, ma Kilikia, kokoke loa i Anetioka. 

  25.  Saulo. -  a Barenaba i ike mua ai ma Ierusalema Oih. 9:26, 27, a moakaka loa kona kupono e hai euanelio me ka ikaika akamai a me ka mana o ka Uhane Hemolele.

  26.  Laua.  -  e hana pu ana, e kokua pu ana i kekahi i kekahi.  Nui ko Barenaba hoona ana i na kanaka; nui ko Paulo hoonaauao ana ia lakou.  Nui ko Barenaba walania: nui ko Paulo hoomakili ana i ka noonoo pono.  Aole lili nae laua kekahi i kekahi.  Karistiano, - he inoa hoohenehene paha ia wa ma ke ano like me "Kristoliilii."  Haumana, - oia no ko Iesu olelo kahea; hoahanau, ka poe manaoio, haipule, paulele, o keia aoao; oia no na inoa maa mau.

 

  I.  Ka Ekalesia hoomahuahua, 19 - 21.  Heaha ka hua maikai o ka hoomaau ana i ka poe manaoio?  Ihea ko lakou kaahele ana?  Ia wai ko lakou hai euanelio ana?  No keaha la ka hai euanelio ole ana i ko na aina e?  Owai kekahi poe o lakou i launa ai me ka poe Helene?  Mahea ko lakou wahi noho hou?  Heaha ke ano o Anetioka, a me kona ano kupono e lilo ai i kiko waenakonu hou o ka manaoio Karistiano?  Heaha ka mea kokua i keia poe hai euanelio?  Heaha ka kua maikai o ko lakou mau olelo hoike a me ko lakou mau olelo paipai?

  II.  Ka eleie koaniani, 22-24.  Heaha ka manao hopohopo o na hoahanau ma ka Ekalesia ma keia ma Ierusalema?  Heaha ko lakou hana e hoohoio ai?  Owai ko lakou eleie?  Ua hoouna aku anei na aposetole ia Barenaba?  Heaha kona kulana?  Heaha kona mea i ikemaka ai ma Anetioka?  Ua hoowahawaha anei oia i ko na aina e i hoohuliia i ka pono?  Heaha ke ano o kona manao e pili ana i na haumana hou?  Heaha kona olelo paipai ia lakou?  Pehea e pono ai ia kakou ke hoopili paa ia kakou iho ia Iesu?  Ua hiki e anei ia Barenaba ke lanakila ina paha nona ke ano makona, hoomauhala, niania?  Heaha ka manao ma keia olelo hoike piha i ka Uhane Hemolele?"  "Piha i ka manaoio?"  He poe Karistiano maoli anei ka poe pi, hoonaukiuki, lalama?

  III.   Na hoahana kaulike, 25, 26.  Ihea ko Barenaba kaahele ana?  Owai ke kanaka ana i kii ai?  Heaha ko laua mau hana ma Anetioka?  Ua kupono anei ka hoonaauao ana'ku i ka poe imi pono?  Ua aoia anei ke kakou mau keiki ma ka pono mamuli o ko kakou hoike manaoio i mau kahu aole i hoonaauaoia?  Oiai ua makaukau na kihapai no ka ohi ana, heaha ka hana kupono i na Ekalesia?  Ua kupono anei i na kahu Ekalesia a me na mea hai euanelio e hana pu ma ka hooholo ana i ke Aupuni o ka Haku?  Heaha ka hana oi aku o ka lanakila, na olelo hookikina, a i ole, na olelo malie?  Ua nui anei ka poe lawehana ma ka Ekalesia o Anetioka?  Owai ka inoa hou i loaa ai i ka poe manaoio malaila?  Ua loaa anei ia oe he wahi hana nou pakahi ma ka Ekalesia?

    MANAO PILI. 

  1.  Heaha ke kumu hana ano nui o na haiolelo lanakila?

  2.  Ua hauoli anei oe ma ka hooholo pu ana i ka hana a ka Haku ma na aina e?

  3.  Ua pili paa anei oe ia Iesu ma ke ano he lala e i hookomoia i ke kumulaau, no laua ka wai hookahi o ke ola?

  4.  Ua kupono anei na halawai haipule no ka hoopilipaa ana i ka poe manaoio ia Iesu.  aole na halawai haipule wale no no ka hoohulihuli ana i ka poe hewa ia Iesu?

  5.  Ua kupono anei ka inoa Karistiano ke ole ke ano hana a me ke ano noonoo kulike me ko Iesu Karisto?

 

HALAWAI A KA AHAHUI KULA SABATI O MAUI,

MOLOKAI AME LANAI.

  E noho ana keia Aha maloko o ka luakini o Wainee: ma Lahaina ma ka Poalima hope o Aperila, la 30, 1897, hora 10 a.m.: nolaila, ke kauoha ia nei na lala o keia Aha, e hele mai me na hoike i kupono malalo o na rula o keia aha.

M. P. WAIWAIOLE.

Kakauolelo.

  Wailuku, Aperila 3, 1897.

 

HE HOOMAIKAI I KE ALOHA.

  I ka Lunahoomalu ame na Lala apau o ka Ahaluna o kuu kihapai aloha o Kaneohe:

  Aloha kakou: - Mamuli o ke kipa ana mai o ka anela o ka make ma na ipuka o ko maua home aloha.  a lawe aku ia i ka hanu makamae o ka'u wahine i aloha nui ia Mrs. Nettie Kuikahi, a hele aku la i kahi mau o na mea apau: nolaila, e hoohooloia:

  Ke haawi aku nei au i ko'u hoomaikai la oukou no ko oukou haawi ana mai i ko oukou mau lima akau o ke aloha ma na mea e pili ana i na hemahema o ko'u hoa pili, no kona hele ana aku e hooko i na kanawai paa o ko keia ao, oia hoi.  e hoi ka lepo i ka lepo ame ka lehu i ka lehu ame na mea honua i ka honua, a hookoe iho la e noho hookahi ma keia ao popilikia hooholoia.  Oiai ua aie nui au i ko oukou lokomaikai ma na mea apau a oukou i hoolakolako mai ai no kona hele ana aku la ma o: nolaila, hooholoia:  Ke pule nei au i ke Akua Mana Loa, e uhai ia ko oukou waihona lokomaikai e na pomaikai he nui loa, iloko o keia mau ia e hele aku nei.  a na Iesu Karisto e hoomaikai mai me Kona aloha palena ole.

  Owau iho no o ko oukou makua iloko o ka luuluu ame ka ehaeha.

M. KUIKAHI.

 

He Leo Poloai

E ka Lunahooponopono o ka Nupepa Kuokoa - e.

  Aloha oe: - E oluolu mai oe i kekahi kolamu o ka kakou kilohana no ka'u leo poloai - he leo poloai keia i ka'u mau loa lawehana no ke aupuni o ko kakou Haku aloha, ma ka hana hookahi.  E ku, e eu.  e na manu o Lihue.  na manu kiai i ka lai o Hauola la -e- hoolono mai.

  Ua aneane loa e pau na hana o ka maiau ana ame ka hoolaupai ana i ka nani e haiamu ana mawaho a maloko o ka luakini o Wainee hou.  ma Lahaina, Maui, ka haawina nui kilakila pookela loa, a ka Mea Hanohano H. P. Baldwin i kukulu ai no ka pomaikai o ko Lahaina mau haipule ame na hanauna hou, ma keia hope aku.

 

KA LUAKINI HOU O WAINEE, LAHAINA, MAUI.

  E hoolaa ia ana ka luakini o Wainee hou ma Lahaina, Maui, ma ka la 18 o Aperila nei, o keia makahiki; nolaila, ke kono nei au i na Kahu Ekalesia a pau, mai Hawaii a Kauai.  E Hawaii o Keawe.  e, he mai.  pa mai ka makani nui o Hilo.  o ka ipu iki la ku-ua mai.  E Maui o Kama. e, ame Molokai nui a Hina, halialia wale hoi ke aloha, aohe olelo ana no olua. no ka mea he lihilihi aia i na maka.

  E Oahu, e ka moku o Kakuhihewa. ka moku kaulana. ke pookela o na moku iloko o ka Paeaina o Hawaii, hui pu mai kakou iloko o ka hookahi, e wehe pu ae i ko makou mau pilikia, mai poina i ke aloha lulu lima, kulu wai liilii la.

  E Kauai o Mano. e. ka moku kaili la, e paa ana oukou i ka ahahui, ma ke kino ame na hana: aka. ma ke aloha e hele mai oukou i Maui nei, no ka makou hana nui o ka la 18 o Aperila, no ko makou mau pilikia, mai poina i na kulu waimaka a ke aloha.  Me ka haahaa.

A. PALI.

  Lahaina,  Aperila 3, 1897.

 

HE LEO ALOHA E HOLO MAI!

E ka Nupepa Kuokoa e:

  Aloha oe: - E na makamaka aloha o kuu aina hanau e noho ana ma Hawaii o Keawe a hala loa aku i Kauai o Manokalanipo, i kaulana i ka huai o ka Malu Ulu o Lele, me ka ua Paupili o Lahaina. ke kono aku nei au ia oukou e holo mai e ike kino i ka hoolaa ana o ka luakini hou o Wainee maluna o ke kahua mua o Wainee i pau i ke ahi ulia. a i ole i ke ahi a ka enemi. Ua helelei ko kakou au waimaka no ka Wainee a na alii ame ka lehulehu o na makaainana o na mokupuni i kapaia, na Honoapiilani. me ka manaoina ole e ku hou ana he luakini e pani ma kona hakahaka e hea hou ia ai kona inoa o Wainee, aka, ano eia ke ku kilakila nei kona kino ano hou. a'u e kaena ae ai. aole paha he lua elike ai ma ka nani ma keia Paeaina o na luakini i kukuluia, ua komo au i Kaukeano hou. a i Kawaiahao hou. aka. aole no elike me Wainee hou. ua hiki no ia oe ke komo iloko, a e ike no oe i na aniani mamua. a mahope. a ma na aoao. e anapa ana na aniani like ole, a e kaalo ae ana kou aka ma na paoa ame na laau i wanikiia, he nani.  E kuu mau hoa i holoholo ai i na la opiopio. e ku a hele mai. e kuu mau hoa i hee pu ai i ka nalu kaulana o U-o, e ku a hele mai. i kuu mau hoa i hoonuu pu iho ai i na lipoa aala waianuhea o Wailehua. e ku a hele mai. i kuu mau hoa i mele pu ai i ka Papa himeni o Wainee. e ku a hele mai. i kuu mau haumana hoi i haawi aku ai i kuu ike kanawai himeni a himeni hoi, ma Panaewa. Halealoha. Papalaua. Adamu i ka M.H. 1858 a 1863. e ku a hele mai. eia no au ke ku nei ma ka hoe o ka moku o ke ola. e ku a hele mai me ke kanalua ole. e ike pu i ka la nui hookahi ma ke one alii o na lai nei o Hauola. na ole hou o Wainee a ke mau nei ke-o ana o kona inoa i kahuia.

  O ka holu mai a ka lau o ka ulu

  Kani ana Wainee bele

  Peahi mai e ka lau o ka niu

  Kani ana Wainee bele.

  Nolaila, ina he aloha oe i ka luakini o Wainee mua. kahi a kaua i lohe pinepine ai i ka olelo o ke oia ma o Rev. D. Baldwin. M. D. Rev. J. H. Moku. Rev. M. Kuaea. Rev. A. Pali. a kahua hoi i loaa ai ka naauao ia kakou. he mea pono no e kua a hele mai. aole he ninau no ka home. aole no ke kapa e moe ai. aole no ka ai. aole no ka puaa. bipi. lio. hoki. koe ke kamelo. e ninau ma ka ino o ko oukou makamaka nei. aia hoi ua makaukau na mea apau, e loaa ai he kumu hookanalua no ka holo mai. me ka manaolana i ko oukou hiki mai.  Aloha auanei.  I kuu mau kaikuaana a pokii hoi o kela hale hoonui ike i kaulana a puni ke ao. ka mea a ka lehulehu i kapa aku ai. ka ipukukui pio ole i ke kau a kau. a i o i ka inoa ka ulu kukui o Kaukaweli. ka ihona welawela o Lelekahauli.  Ina he poe i loaa ole i ke kono a ka Mea Hanohano J.W. Kalua, Peresidena o D.H. Kahaulelio, kakauolelo, oia poe Lahainaluna ka'u e kono nei, e holo mai a e like i ke kahua o Wainee mua, a oukou i hehi hope ai no ka naauao a kakou i imi ai ma kela kula ea ula i ka lepo. a hoi aku i na home. a e imi i ka waiwai oia naauao i loaa ia kakou malaila, a lilo he poe kau kanawai o ka aina, a he poe kuonoono a waiwai o ka aina, a he poe hanohano hoi e noho ana ma na kapakahakai a na nalu e halulu mau ana, a me na wai owe o na kahawai uliuli ou e Hawaii. o keia ke kahua hope o ke gula. dala. daimana. momi. e alohi ana. ma ka aoao o kou puuwai, ame kou mau manamana lima e anapa ana i ka la. a like hoi me ke kanaka eli gula o Kaleponi ka hulali anapa o na kaula waki gula ma ka pakeke hema o ko kakou mau puliki paina a lilina ume naau wahi a ka holokahiki.

  Ke kono nei au ia oukou a pau. e ku a hele mai me na kokua aloha no ka Wainee hou i kukulu ia maluna o ke kahua a kakou i hehihehiku ai. a e kani mau ana ke o ana o kela huaolelo a ko kakou kaikuaana L. Aholo i hala e ma o mai hoowahawaha i ka Apelu Lahainaluna. E kuu mau hoa o ka papa hookahi a'u e hoomanao ae nei eia no oukou ke ola mai nei, e Daniel Kalou o ka i'a hamau leo o Ewa. e ku e hele mai. e J.N. Kaiaikawaha ka aina Kupoluaikalai, i Waialua no ka poina a ka nalu. he lohena ke kai o Ewa, e ku a hele mai, e C. Lua, o ka aina i kaulana i kela mau kupueu Laielohelohe me Laieikawai, e ku a hele mai.  e Daniel Niulohiki ka aina i kaulana i na oopu peke  o Hanakapiai. e ku a hele mai. e S.K. Kupihea. ka aina i kaulana i ke koo lau a me ke alakai. e ku a hele mai. no oukou ka mahuahua o ka pumehana o ko'u aloha, e hele mai oukou me na opuu palaoa ohaha hope loa o ko kakou mau la oo a'u e hoomanao ae la, ua ano kaulike no ka huina o ko kakou mau la ano i ke 60 makahiki a oi a emi mai.  A mai poina ka hoi au ia hoakula G.L. Kahelekula ka aina i kaulana i ka ua Kuahine o Manoa, e hoolaa ana o Wainee hou ma ka la 18 o Aperila o keia M.H. 1897.  Aloha oukou.

  I na Lahainaluna i makaukau no ka hoio mai. ua ike oukou i ka home noho o ko oukou hoakula. ma Wailehua. Lahaina ua makaukau au i ka home e hookipa mai ia oukou. a e noho me ka loihi a oukou e makemake ai. a e hookipa ia oukou elike me ko'u mau hoa o ua aina hanau nei.

Me ke aloha no,

K. KAHAULELIO.

  Wailehua.  Lahaina,  Mar. 30, 1897.

 

AHAHUI LUNAKAHIKO.

  E noho ana ka Ahahui Lunakahiko o Maui ma ka luakini o Wainee, Lahainalalo, a i ole. ma Halealoha. ma ka Poakolu mua o Mei. 1897. hora 10 Ke kauoha ia aku nei na hoa apau oia Aha e hiki nui mai.

  A e hoomakaukau pu na hoa i ko lakou mau haawina heluhelu i haawi ia na lakou. oia hoi keia malalo iho nei:

  1.  O ka aie o na Ekalesia i na Kahu o lakou.  heaha la na pilikia mui e ulu mai aua ma keia hope aku? D.K. Kaaiakamanu.

  2.  E noho kino mai anei o Iesu Kristo ma ka honua nei, me he alii la mamua o ka hiki ana mai o ka la hookolokolo?  Rev. S.K. Kapu.

  3.  Ahea la e hiki mai ka milenio?  Ua kokoke mai pahaia?  E hoike mai paha oe. Rev. J.K. Hihio.

  4.  Pehea la e maopopo ai he uhane ke Akua?  Pehea la hoi i olelo ia ai he maka kona. a he pepeiao, a he waha. a he wawae a he lima?  Rev. D. K. Kaumiumi.

  5.  E hiki mai anei ka la e hookolokolo la ai ko ke ao nei, ahea la ia?  Mahea la e hookolokolo ia ai?  Pehea ka loihi oia hookolokolo ana?  Rev. E. Hanuna.

  6.  E wehewehe ia Heb. 6:18.  O Nawahine.

  7.  Mahea ka hana nui a ke kahunapule. ma ka haiolelo paha, ma ka hele paha e launa me na kanaka ma kauhale?  Rev. H. Mauase.

  8.  E wehewehe ia Sol. 25:2 Rev j. Kaalauwahi.

  (Ua makemake loa makou e loaa mai ia makou na kope o keia mau kumumanao o ka pomaikai o na poe heluhelu i ke Kuokoa.  L.H.)

 

KUU LEI ALOHA UA HALA.

  I ka Lunahooponopono o ke Kuokoa. welina pu kaua:- E oluolu mai oe ia'u. e hookomo iho ma kahi kaawale o kou mau kolamu, i kela mau hua e kau ae la maluna.

  Ua haalele mai la i keia ola ana. o Miss Esther Kanoho ka maua lei aloha i ka hora 9 a.m. kakahiaka Poalua. la 30 iho nei o Maraki. 1897. ma ko maua wahi e noho nei ma Pualoke. kahi o ka halekahu o ka Ekalesia o Lihue.

  Penei ka hoomaka ana mai o kona mai: Ma ka pule 3 o Maraki. ua hoomaka mai ka wela ma kona kino, elua la me hookahi po. ko maua hoomalu pono ana iaia. a loaa mai ana ke ano oluolu maikai.  A ma ka Poaono o ka pule hope no o Maraki. ua hoomaka mai la ka hi. i ka ai ana aku i ka waiu, luai hou ia mai la no i waho. no hookahi manawa iloko oia la.  A ma ka hora 1 o ka auina la Sabati. la 28 ua hoomaka hou mai la ka luai i ka waiu a mahope naha aku la malalo, ua kii ia ke kauka e nana. ua olelo mai oia aole e loaa koke mai ka laau. no ka mea e hele ana oia no kekahi wahi i kono ia mai iaia. me kona olelo ana mai ia mana a hora 10  ka Poakahi ae e loaa ai ka laau.

  Ma ka Poakahi ae kii ia ka laau. a loaa mai la i ka hora 11, a hanai ia i ka laau no elua manawa, awakea. ahiahi. aole no he ano loaa mai o ke ano oluolu mai a po Poakahi iho ano e loa mai ana oia.  Ma ka po lapule a Poakahi a po a ao ae aole i loaa he wa e moe ai, aole no he wa e hookuu ai i lalo, a hiki i kona make ana.

  Ua loaa no hoi he manawa no maua e hooponopono ai iwaena o maua me ke Akua. aole no nai he wa i loaa mai ai ka maha. ua oi loa aku ka ikaika o ka mai maluna ona. oia ka Ioba i olelo ai. ma ka Mokuna 14:1. "O ke kanaka i hanauia e ka wahine he hapa kona mau ia, ua piha i ka popilikia.  Ua hanau ia oia i ka la 25 o Iulai. 1896. ua piha iaia na mahina 8. me 6 la, 16 hora ma keia ola ana. a hala wale aku la ma keia ao.  Oia ka Ioba i olelo ai, "o ka mea uuku ame ka mea nui. aia no malaila.  I hele kohana mai no au mai ka opu mai o ko'u makuahine . a e hoi kohana aku no au ilaila: na Iehova no i haawi mai. a nana no i lawe aku: e hoomaikai ia ka inoa o Iehova. Ua haalele iho oia he mau kaikuaana a he mau kaikunane ame maua kona mau makua. e paiauma aku ana ma keia ao me ka naau kaumaha a luuluu i ke aloha iaia: a ke noho nei maua me ka u. ame ka minamina nui nona. Aole no hoi i pauaho kona makuahine i ka hapai ana iaia i ka halepule a na ka make hoi i hoopau mai. a hoi aku la ka uhane i ka mea nana i haawi mai. a o ke kino hoi ua hoi aku oia  i ka lepo i kona wahi mau a haalele iho hoi ia maua me ka naau kaumaha e kali aku ana no ka wa a ka Haku e hoomama mai ai. i ko maua mau manao kaumaha a nana no e hookaawale aku mai a maua aku.

  O maua iho no me ka walohia nui.

MR. ame MRS. J. KANOHO.

  Pualoke, Lihue, Kauai.  April 3, 1897.

 

Hoolaha Kumau.

 

  Aole loa e maikai a oluolu ke oia ana o kekahi mea kino uhane @ ina he aaiole kona akepaa a hiki @ ke lawelawe i kana mau hana me ka hololea.  E hahai ana ka naiuiu a me na nawaliwali e ae ma ka m@  ali o ke ake ponalo.  He mea oiaio keia i hooiaio ia ma na wahi na poai oluolu akau iloko o ka hapaha keneturia, o na

HUALE A AYERS

oia wale no ka LAAU HOOLA AKE maikai loa i ikeia.  F. hoola ana i ka lepopaa, ka naiuiu eha, na ma'i oloko o ka opu, a ma ke ano LAAU OHANA aohe ona lua e like ai.

  O ka Ayers Sasaparila, oia ka Laau Hoomaemae Koko Kilakila. e haawi ai i ka ikaika a me ka hooponopono ana ia loko o ke kino @ ke o ka ili, e hoopau ana i na malukilu kanaka. E pepehi a ulupa ana i na PUHA, e hoola ana i na pohapoha hi o ke ola ana a e kipaku loa ai i na ano ma'i a pau.  O ka poe mai no ka wali pono ole o ka ai. ka nawaliwali mau a ano ma'i e ae i ulu ae mai ke koko ino mai, he mea pono e inu i ka laau.

SASAPARILA A AYERS.

  He laau e hooikaika ai i ka nawaliwali, a e hoopuipui mai ai i ke kino.  Ma ka inu ana i keia laau, e hoonoono ia ai ka ai ana, oluolu ka moe ana a maikai ke ola ana.

  O ka Ayers Cherry Pectoral laau, aohe lua ma ka hoola awiwi ana i na KUNU, ANU a me na PUU EHA.  E hoola ia na KUNU KALEA a me na ma'i pili i ke ake me ka hikiwawe loa.

  O na Huaale a Ayers, na Sasaparila a me ka Ayers Cherry Pectoral. aia kahi e loaa ai ma ka Halekuai o ka

Hollister Drug Co. Lt.

Na Agena ma ka Paeaina Hawaii.

2514

 

KAKELA ME KUKE

Ka Halekuai Nui

- O NA -

WAIWAI LIKE OLE

NA MEA

HANA KAMANA A PAU

Na lako pili hao kukulu hale,

Na kepa,

Na lei ilio,

Na kaulahao ilio.

Na Pahi,

Na Upa,

Na kope hulu.

Na Palapala.

PALAU LIO

Na mea mahiai

Na ao @

Na au ko@

Na kua bipi.

Na lei bipi,

Na kaulahao bipi,

Na uwea pa,

Na kaa palala,

Na mea piula,

Na ipuhao.

Makau me Aho Lawaia

Na Iliwai

Na kaula,

Na hulu pena,

Na pulumi,

Na pena, me ka aila

Na kopa,

Na aila ma@

Na pake@

Na pakeke hao,

Na kapu pauda,

Na kukaepele,

Na uwiki, a me

Na ipukukui.

Mikini Humuhumu aulana

Wilcox, & Gibbs Hookhi Lopa

ka Remington, Elua Lopi.

A me na ukana he mai loa o ke ia@

kela ano.

Kakela me Kuke