Ka Nupepa Kuokoa, Volume XXXVI, Number 5, 29 January 1897 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE XXXVI.         HELU 5.         HONOULULU, POALIMA, IANUARI 29, 1897.             NA HELU APAU 2633

 

Hoolaha Loio.

 

W. H. KAKELA,

Loio a he Kokua ma ke Kanawai.

HE LUNA HOOIAIO PALAPALA.

2370

 

Hoolaha Kumau.

WILDER & CO., (WAILA MA.

Mea Kuai Papa a me na Lako kukulu hale o na ano a pau, a me na mea e ae a pau e pono ai o ka hale.

K@ Alanui Moiwahine me Papu.

396-q

 

---------

 

PAPA! PAPA

 

AIA MA KAHI O

 

Lewers & Cooke

 

(LUI MA)

 

Ma ke kahua hema o Alanui Papu me Moi.

 

E LOAA NO NA

 

PAPA NOUAIKI

 

O kela a me keia ano.

 

Na Paai Puka, na Puka Anaiani,

na Olepelepe, na Pou, na O'a,

na Papa Hele, na Papu Ku,

me na Papa Moe he nui l a

 

NV PILI HALE O NA ANO A PAU

 

@ na

 

WAI HOOHUNUHINU NAN

@ a pau loa

 

Na Balaki o na Ano he Nui Wal.

            Ke hai ia aku nei oukou e na makamaka a pau, ua makaukau keia mau makamaka o oukou hoolawa aku ma na mea a pau ili ana ma ka laua oihana no ke

 

Uku Haahaa Loa.

 

E like me aka mea a hoio aua mawaen@

a me ka Mea Kuai

 

Hele Mai e Wae no Oukou iho

8896 q

 

-------

 

KA MEA HUNA POHIHIHI

----

MOKUNA XII.

----

HOOKO O ALAMIRA I KANA OLELO

----

            "Ua pono." wahi a tereveliana i pane mai: "Nau no ia mea e noonoo. Ke ike nei au, aia he naauao ame ka noiau iloko o kou poo, e hiki ai ke hooponopono i ka mea a kou uhane i makemake ai, me ka maikai ame ka maemae. O ke ano i haalele aku ai oe i kou home, ame ke kumu i hele mai ai oe mai laila mai, he mau mea na e loa no ia, e hiki ole ai ia'u ke haawi aku i na oleloa'o kupono. Aka ma ko'u mamao ana nae, he keehina hana ku i ka maholoia kau i hana ai, mamuli o na kumu au i hoike mai nei ia'u, no kou ohana. O ka hale-kakela hea ma Ladana, i lawelawe hana ai kou makuahine?"

            "Aole au i ike, e kuu haku, i ka hale-keaka ana e lawelawe hana nei. Aia ko makou noho ana, oia hoi, o Papa,. owau nohoi ame o'u mau kaikunane, mawaho o ke kulanakauhale; a o mama hoi, e ho'i mau ae ana ia i kela ame keia pule. Aole oia i hai mai ia

 

-------------

GENERAL MAXIMO GOMEZ.

 

O keia ae ke kii o Kenerala MaximoGomeza. ka puhi olali kaulana loa o na koa Cuba.

 

-----------

 

makou i ka hale-keaka ana i noho hana ai. O kekahi nohoi, aole ona makemake iki e ninau aku makou iaia no ia hana."

            "Ina pela, " wahi a ka Haku Tereveliana i pane aku ai, "aole oia i makemake i kana poe keiki e hehi aku ma i anuu o ke ola ana. Ua pono a ua pololei maoli keia. Aka; malia paha ua hai mai oia i kona inoa e lawelawe ai a e hana ai oia iloko o ka halekeaka."

            "Aole no, e kuu haku. Aka, e nai aku au ia oe, o ko makou makuahine, he kauwa-wahine ia. O Papa hoi, he Kauna Sepania oia. Aole au i ike i ko mama inoa o ke kahua hana keaka."

            "A-ha! Makemake loa au e ike iaia. e ninau paha au ia Adelo no na wahine hana keak kaulana loa o Ladana - eia no nae, aole no paha he waiwai oia hana ana pela; oiai, aole oia i hele iki i kekahi hale-keaka ma Ladana mai ka ia ona i huli hoi mai ai mai na aina e mai. Aka, e kuu hoaloha opio, e kapae kaua i na noonoo ana no ia mea; a e ninau aku au ia oe: Pehea ia kou manao no ka Haku Adelo?"

            I keia wa i nana pono aku  ai o Alamira i ua Haku Tereveliana ia a pane aku  la:

            "Aohe au i noonoo iki i kahi mea e pili ana nona."

            "Makemake anei oe laia?"

            Aole o Alamira i pane aku.

            "Aha!" i hooho ae ai ua Haku Tereveliana nei, "ke ike nei au, aole oe i makemake iaia. Ua ike nae au, ua hoanoe loa ia kona helehelena ma ka wa mua loa i ike ai oia ia oe. Me he mea ia o ke kumu o keia ana e ana ona, oia kona ike ana i ke kulike loa o kou mau maka ame kou helehelena  i na make ame ka helehelena o kahi mea i kamaaina kahiko loa iaia. E kuu keiki., e nana pono mai oe ia'u. Makemake au eike pono loa aku i kou mau onohi maka."

            Ua hoohuli pono loa aku ia hoi o Alamira i kona mau maka imua o ua Haku Tereveliana nei.

            I ka nana pono ana mai hoi o ua Haku ia maluna o ka halehelena holookoa o Alamira, ua ano e ae la kona helehelena a haikea ae la hoi. A liuliukona pane le ole ana mai, aia hoi, olelo mai la ia:

            "Ua hoomaopopo au i keia like loa o kou helehelena me ko ka mea a ka Halu Adelo i hoohuoi ai, a ma ka la inehinei i hoomaopopo ai au i keia mea. He kupanaha nohoi keia like loa ana o kou mau maka me kona. Aole loa au i ike i kekahi mau onohi maka, mawaho aku o kou, i like loa me kona."

            Alaila, oni ae la ua Haku Tereveliana nei maluna o kona noho, me ka haalele ole nae o kona nana ana maluna o na helehelena  o Alamira, a hoomau mai la oia i ka olelo ana:

            "O kou ano, ma ka'u hoomaopopo, he ano hoopono ia. Ma ka hoike a kou mau maka, aia he uhane aiai ame ka maemae iloko ou. Ua manao nohoi au, o keia no la keano maemae hookahiiloko o ka uhane o kela keiki a'u i aloha nui ai. E Miss Arevalo, e hai aku au ia oe, ua ku au maluna o ka papahele o ka nohona puanuanu a hoihoi ole i ko ke ao nei apau, a i ua keiki nei nae paha ka oi aku; aka, e e hai aku no nae au ia oe, i kahi wa ua loaa ka ikaika i kana mau mino aka mahiehie ana, ka nanahe maikai o kona leo e hoonioni mai i kuu uhane puanuanu. E haawi no au i kuu oia nei iloko o ka luakupapau koou, ina ia he mea e loaa ai ka nohona hauoli i ua keiki la; aka-"

            Maanei i kahuli ano e ae ae ka helehelena o ua Haku Tereveliana nei mai ke ano nanankea a ke ano ahiu okalakala o ka inaina, a hoomau mai la oia i ka pane ana:

            "Aka - no keia aloha o'u hoopoi aku ai iaia, ua uku panai mai la oia ia'u me kekahi uku i oi aku ka eleele i ko ka lua po. Ae - he keu kela o ke keiki lapuwale! Keiki no! He kauwa laepaa oia ma ka'u hoohalike! A he keiki puuwai hohe wale!"

            ua ninini mai la ua Haku Tereveliana nei i keia mau huaolelo piha awahua, ma ke ano e hoino ana oia i ke keiki  ana i aloha loa ai, oia hoi o Geofere, ka mea au, e ka makamaka heluhelu, e hoomanao iho ai, oia no ka luaui makuakane o Alamira e noho ne imua o ke kanaka nana na huolelo makona ana e lohe ana; aka, aole nae i maopopo ia mea iaia (Alamira), aole loa oia i ike o Geofere kona luaui makuakane, a he keiki hoahanau hoi oia na ka Haku Tereveliana.

            I kela wa i ninau aku ai o Alamira i ua Haku nei:

            "Owai keia keiki au, e kuu Haku, e kamailio mai nei?"

            "He keiki hoahanau oia na'u - oia ke keiki a ko'u kaikuaana i make.

            O ka inoa o keia keiki, oia no o Geofere Tereveliana. Me wahi keiki makua ole keia ma kona wa i ho'i mai ai a noho pu me a'u: aka, he wahi keiki nae ia i piha me na haawina o ka hoihoi. He nui launa ole mai na manawa i haule iho ai kona wahi poo a hiamoe ma kuu poli nei, a ua nui kuu aloha nona. A hala he mau makahiki, ua pii ae la kona kino i ka nui. a ua mohala mahuahua mau ae la nohoi kona mau haawina maemae: aka, ua komo pu iloko o kona puuwai opiopio ka manao wiwo no'u nei, a ua hoao mau hoi au e hoauhee aku ia mea mai loko aku o kona houpo. Ua lilo ia i kanaka opio makaukau loa ma ka hololio ame ke kipu ana. Ua hiki hoi iaia ke himeni a ke hookani ma ka piano, me ka makaukau loa, i like me kekahi kumuao himeni a hookani pila hoi. ua lehulehu loa na olelo o Europa nei i loaa ai iaia ka makaukau ma ke kamailio ana. Nui ke aloha o na kauwa iaia; ua lilo oia i mea punahele loa ia lakou. A e hai aku au ia oe, i keia la, aole loa i pua iki ko Mrs. Pumetona aloha no keia keiki.

            "I kekahi la nae, hele mai la oia a nonoi mai la ia'u i dla; aka, ua hoole aku la au i ka haawi ana'ku iaia i kana mea i nonoi mai ai. Manao iho la au, he mea pono ia'u ke a'o iaia i ka hoomakauili,

 

------------

O ke kii ae keia Kenerrala Weyler o na Sepania, e alakai mai nei i na koa Sepania ma Cuba.

------------

 

oiai, oia aku anan no ka hoolina apau o ko'u waiwai. Aka, e Miss Arevalo, e hoolohe mai oe, me ka akahele loa, i ka'u mea e hoike aku ana ia oe. I ka po mahope iho o ka la a'u i hoole aku ai i kana noi, ua hele mai la ia iloko o kuu pahu dala, a me kekahi pahi puhaka e paa ana ma kona lima, ku iho la ia ma ka aoao o ka moe a'u e hiamoe ana, ma ke kulana o ke kanaka e makemake ana e hooko i kekahi hana lima-koko. Ua hoao io no oia e hooko i keia hana puuwai eleele. Ua pahu mai la oia i ka pahi ma kuu puuwai, aka, ua hala nae kanan pahu ana, a ku ae ia ua pahi la ma kuu kipoohiwi. Ia  wa ia ala ae ai au, a ike aku la iaia e ku mai ana imua o'u; eia nae, o kona ano a'u i ike aku ai ia wa, me he ano la o ke kanaka i punia ia e ka ona o kekahi mea ona hoomalule kino. I keia wa nohoi i komo mai ai o Adelo, a mamuli o ka halulu ame ka nakeke iloko o ka rumi ia wa, ua hoalaia aku la na kauwa o loko o ka hale a hoio mai la lakou no ka hoopakele ana ae ia'u. Auwe! nohoi kuu hupo i keia wa, oiai ua hookuu aku au iaia mailoko aku nei o kuu hale! He keu keia o ka moo omokoko lapuwale! Ka lima eleele o ka powa! Ae-kahi moo nahea a'u i hoopumehana mau ai ma kuu poli, a i kona mahana ana, ua nahu mai la oia ia'u!"

            "Aole! Ua haalele iho oia ia nei nei, a holo aku la oia i Ladana e ike ai i kana wahine hoopalau, oia hoi ka Lede Beatirisia o Hametona. Me he mea ia, ua haawi mai ua Lede la iaia i dala a holo aku la oia i Berazila. Amerika Hema, a make oia malaila. Ua hoouna aku no nae au i makai-kiu e hookolo i kona meheu. No'u iho hoi, ua mihi nui loa au no kuu hookuu ana aku iaia me ka maaiahi loa. Aka, oa laki loa nae oia no kona make ana. Ina oia i oia a loaa oia ia'u, e kauia no ka hoopai oolea loa a ke kanawai maluna ona. A e Miss Arevalo, i ka wa a'u i hoomanao ae ai no ko'u aloha iaia, aole i kana mai ko'u inaina iaia."

            ua hoike pu mai la nohoi kona mau onohi maka i ka inaina iloko o ia wa; a ua lilo ia mau nanaina kupikipikio o ua Haku Tereveliana nei i mea e komohia ai ka maka'u hopohopo iloko o Alamira. Aka, a hala kekahi mau sekona o ko Alamira noho mumule ana, ia wa pane aku la oia imua o ua Haku Tereveliana nei, me ka malie:

            "E kuu Haku, aole anei hoi oe i kuhihewa ma keia mea? Ua hai mai nei oe ia'u, pela ka'u hoomaopopo aku i ke ano o kau mau olelo, aole o Haku Adelo he kanaka i hiki ke hilinaiia. Aole hiki iaia ke lilo i hoaloha oiaio no Mr. Geofere, aole hoi i hoa kuka maikai nona. Aole anei ne keia Adelo i hoolala na hana apau o keia karaima eleele i ikeia e oe, e kuu Haku, me ka ehaeha? Aole anei i ikeia ka maikai ole o kona naau no Mr. Geofere mamuli o kana mau olelo hoinoiono imua ou, no Gerofere? ua aloha oia i ka wahine hoopalau a Mr. Geofere, a au ahai mai nohoi oia ia oe, e mare akua ana oia i ua wahine ia. Nolana, aole anei he hana pono nana e hana ai i mea e ko ai kona makemake, e hookaawaleia aku o Geofere mai keia oia ana'ku paha, a-i-ole, mai na kaiaulu aku nai paha o Enelani? Aka, e kuu Haku, aole au i ike i na hana o keia ano; eia nae, ua nui na mea kamahao a'u i heluhelu ai iloko o na buke i like loa ka puana a ka moe me ka'u mau mea i hoike aku ia imua ou."

            "Malia paha, e Miss Arevalo, pela io no, elike me kau i hoike mai la; aka, aole ae o'u manaolo peia. Aole o'u manao ua loaa ka noonoo elike me kau i olelo mai ia, e Miss. Arevalo, ia Haku Adelo-aole. He kanaka opio poo paakiki keia. Aka, hookahi wale no mea i maopopo pono loa ia'u ua hoao o Geofere e lawe i kuu oia. E hoea mau ana kaua i kela kiekiena, ma na wa apau o ko kaua ola nan, e haawi ai kaua i na noonoo anan ma keia mea. Ua loaa pono maoli aku oia ia'u e hou maoli mai ana ia'u me kela pahi-puhaka, aole hoi o Adelo maalila ia wa."

            I keia wa i olino ae ai ka uwiia o ka hopo ole ma na onohi maka o Alamira, pua aai ula ohelohelo ae ia ka ui mahiehie ma kona mau papalina, a ninau aku la oia i ka Haku Tereveliana:

            "Alaila, e kuu Haku, e iho aku anei oe iloko o kou luakupapau me ka puuwai i nele i ke kala ana i ka hala a kau keiki i hana mai ai maluna ou? e ae kana, ua makemake loa ia, me ka naau lokoino, e lawe aku i kou oia, e kuu Haku, a, aole hoi e hiki ia oe ke hoolaulea hou ia me ia, ma ke ano, e ae oe e hookipa hou mai iaia me ke aloha i kou pelu aka aole anei e hiki ia oe ke kala aku iaia. Ua kala aku ko kakou Hoolapanai Hiwahiwa i ka poena lakou Oie i pepahi. O! e kuu haku e! Ina paha eia no keia keiki au i aloha loa ai i kahi mau ia o kou ola ana ma kekahi wahi o ka poepoe honua neil, e huna ana hoi iaia mai kou mau maka aku, aka, aia nae oia ke noho la ma ia wahi, me ka naau mihi ame ka ehaeha, no ka hewa eleele loa ana i hana mai ai maluna ea, kona makuakane, ka mea hoi e lawe ae i ka makalua o kona luaui makuakane i hala aku i ka make, aole anei oe e kuu Haku e kala aku iaia."

            E kuu makamaka heluhelu ke ike ae la oe i ka leo uwalo walohia o Alamira e uwe aloha nei imua o ka Haku Tereveliana, kona kupunakane ana i ike ole ai, a ke kupunakane hoi i ike ole o kana moopuna no keia imu ona. Ua puana ae o Alamira i keia mau huaolelo ma ka hoomaopopo ole ana, eia oia ke uwalo walohia nei no kona luaui makuakane ponoi. A, e kuu makamaka heluhelu, e hoolohe aku oe i ka pane a ka Haku Tereveliana no ka noi a Alamira, elike me kau i ike ae la.

            "Aole! Aole loa!" I hooho ae ai ka Haku Tereveliana, me kona ku ino ana ae iluna, me ka noonoo ole i ka eha o kona wawae, a me na onohi maka e weweoia ana e ka lapalapa o ka inaina pane hou mai la ia: "Aole loa! Ina no e nee mai oia imua o'u a oni mai oia iloko o ka lepo ma kuu mau kapuai wawae nei-a kuwo ae kona leo mihi elike me ka aoa ana a ka lilo, a i ole ia, e aahu oia i ke kapa kanikau o ka mihi, a oni iloko o ka lehu-aole loa au e haawi aku i wahi huna a lihilihi hoi o ko'u kaia ana iaia! ina oia ke ola nei, e lawe mai no au iaia imua o ke kanawai. Ina no oia ka'u keiki ponoi loa, ka hua mai ko'u puhaka aku, e lawe ana no au iaia imua o ka maka o ke kanaka, a ina no he mea no ko'u inoa e hoohilahila ai, a make paha au no ka piha kaumaha, mamuli o ke kau ana o na hoopai a ke kanawai maluna ona, no keia karaima eleele ana i hana ai, aole no au e ho'i hope ana ma ka hooko ana'ku ia nana. He oiaio anei eia io no oia ke ola nei i keia wa. I kekahi wa, ua hoohuoi no o Adelo, ma ka olelo ana, aole oia make. Nolaila, e keia kaikamahine! E pane mai oe. Owai la oe? Pehea la i loaa ai ia oe na onohi maka o Geofere Tereveliana? Nana anei oe i hoouna mai io'u nei i mea e makalahia ae ai au i kuu inaina nona? He kaikamahine anei oe nana?"

            Ua ku ae la ia me ka pololei pu o kona kino, elike me kekahi kia mabala. Ma ka Alamira hoomaopopo aku, me ha mea la e hoopuka maoli mai ana na onohi maka o ua Haku Tereveliana nei i na okooko ahi o ka inaina. Ua haikea pu ae la kona mau papalina. A me ka leo haalulu, pane hou mai ai oia:

            "E keia wahi kaikamahine! E pane mai oe. Heaha oe na Geofere Tereveliana?"

           

----------

 

MOKUNA XIII.

 

Olino ka Hauoli - Ke Alahele Huli i ka Makuahine - Hoea i Ladana.

 

            No keia kulana piha inaina a huhu a ka Haku Tereveliana i hoopuka mai ai imua o Alamira, no na huaolelo ana i kamailio aku ai imua o ua Haku la, me kona ike ole i kona pili i ke kanaka i lilo i enemi makawelawela loa no ua Haku la. Aka, iloko oia mau sekona pokole, ua ulu mai ia ka makee kulana iloko o kona houpo, a me ia manao hiwahiwa e lamalama ana iloko ona ku ae la oia iluna imua ponoi o ke aio o ka Haku Tereveliana, me ka hanohano ame ka hiehie kilakila a pane aku la:

 

                        (Aole i pau.)

 

---------

 

HE OLA NO KE KIKALA HANENEE

---------

 

"Ua loohiala ka'u kaikamahine, i oia ai mai kekahi ma'i @va mai, i kekahi eha ma ke kua a ma ke kikala," i kakau mai ai o Londen Grover o Sa@dis, Ky. "Mahope iho o kona hoohana ana i na laau lapaau he nui me ke oia ole, hoao iho la ia he omole o ka Laau Hooia Eha a Kamalena, a ua oia loa oia." He laau oia nohoi ka Kamalena Laau Hooia eha no ka Rumatika. E kualia ana e na poe kuai laau lapaau, Benson, Smith & Co., na agena no Ko Hawaii Pae Aina.