Ka Nupepa Kuokoa, Volume XXXV, Number 26, 26 June 1896 — KE KAI HOEE O 1896. [ARTICLE]

KE KAI HOEE O 1896.

Mamuli o ka oluolu o kekahi makamaka a hoaloha oiaio o ka nupepa Kuokoa nei, ua loaa mai la ia makou keia leta mahalo iho nei, a nona hoi ke poo e kau ae la ma keia wahi o na hoikena o keia kai hoee o 1896 nei: Ma ka hora 9 a.m. o ka la 15 o Iune iho nei, ua pii ae ke kai he 8 kapuai maluna ae o ke kai maa mau, a ua lawe aku ua kai lokoino la i ka papa a pau loa o ka pa papa a M. F. Scott, a he walohia oe ke nana aku, ua komo aku a hoopoino i na waiwai o Geo.

McDowgall, aneane $100 ke poho, ame ko J. Kaelemakule he $50 paha ke poho. Ua lu liilii ia ka pa kuai papa o Geo. Clark, a ke waiho mokaki nei; aohe nae he mea poino. Ua hoohuli iki ia ka uapo o Kailua, a ua komo ia ka hale ukana a ua poino na ukana oloko; e laa ka puna, palaoa, a pela aku; o ka hale o D. Kupaka, ua uhaki pu ia mawaena, ua lilo aku ka pa o ka hale, a he walohia oe ke ike aku, a henui na poino a ua kai hana aloha ole la i hana iho ai ma Kailua, aka, laki nae, aohe ola i poino.

Ma Keauhou, ua lilo loa elua hale pili, a ua hoomaemae ia ke kahua, a he manaonao oe ke ike aku, no Kahaalii me Samuela Hilo, na hale i lilo loa, a ke noho hune nei ia mau ohana. O ko C. Kalaiki hale, ua nahaha o hope, a ua hoohuli ia a kapakahi, ua loaa na ukana, a o ka hale kai poino, a na Hulipahu ma aku hoi, weluwelu loa na papa. O ka hale o Aki pake, ua uhaki pu ia, a he kohu opelu i lomi paakai ia, a o ka hale o kahi Kaaka, kahi Niheu kolohe; Jos. N. Koomoa, ua hoonee ia i o a ia nei, he kohu wahine ami no Hopoe, ka lwe i o a ia nei, aka, koa no kahi kaaka, a na na kake huki o Waipukaiki i pauma aku a ku ana i ke kahu o Kauhikoa. Ua pau ka pilikia. O ka hale o Manuia ma ua kiloi ia mai ke kahua mua, a kahua hou, aohe nae he poino, eia ke koa ke ku nei ka punakea iuka. Ua komo ia ka hale o J. G. Hoapili, Jr., aohe nae he pilikia, ua lilo na pukaaniani o J. W. K. a mea ia mai, olo ka ka pihe ina o ka nalo loa. He poino auanei keia a lohe mai i ke ao, hookahi nae a'u mea mahalo loa, o kahi uapo o Keauhou, aohe wahi oni ae, a ma ka hoomaopopo aku, ua pii ke kai ekolu anana maluna ae o ka uapo a pela i lilo ai na hale.

Ma ka nana, ame ka hoomanao o ka mea kakau, he pulumi paha keia na ke Akua, heaha la? Ea, moe ana no paha hoolono ana, e leha aku na maka i na mauna, mai laila mai na kokua. Ma na wahi e ae o N. Kona nei, he lai malie, ina paha he po keia wa o ke kai, ina paha ua naku aku naku mai, a lehulehu na ola e poino, aka, aole pela ko ke Akua manao, ke kali nei no Oia no ka piha o ke kiaha; ma ka hoomaopopo aku, he leo hea keia, a e ala mai moe hou, o lana auanei ka auwae kahi uuku. N. Kona, Hawaii, June 17, 1896.