Ka Nupepa Kuokoa, Volume XXXV, Number 23, 5 June 1896 — Ka Moi Hou o Peresia. [ARTICLE]

Ka Moi Hou o Peresia.

O Muzaffer-ed-Dina oia ka inoa o ka Moi hou o Peresia. Oia ke keiki elua a Nasr-ed-Din, ka Moi o Peresia i powa ia mai nei. O keia kanaka i lilo mai la i Sa (Moi) no Peresia, he 43 oiia mau makahiki, a he kiaaina oia no Tabrizs. O ka nui o ua keiki a ka Moi i make he 5 keikikane a he 15 poe kaikamahine. He kaikuaana ko keia Moi hou o Peresia nona ka inoa o Zil-es-Sultan, o kona ano, "Ka Malu-i-ke-ao o ke Aupuni." Aka, he keiki nae ia i hanauia mai e kekahi o na haiawahine haahaa o ka Moi mua, oiai hoi, o ka makuahine o keia alii hou o Peresia, he wahine koko alii oia. A no ia kumu i kohoia ai oia i hooilina no ka nohoalii o Peresia, a oia nohoi ka helu elua o na keikikane a ka Moi i make. He mau makahiki lehulehu i kaahope ae nei i waeia ai oia i hooilina no ka nohoalii, a ua ikea oia ma ia ano e na poo Aupuni apau o Europa. O keia Moi hou o Peresia, aia oia malalo o ke alakai ana a kekahi papa kahuna o Peresia i kapaia, ka Papa Kahuna Shiite, a he hoomana Mahomeda ka lakou e pulama nei. Ke upu la hoi kona kaikuaana, oia o zii-es-Sultan, a oia nohoi ke Keikialii Mirza, e lilo oia ka Moi o Peresia, a ua manaoia, oia no kekahi i komo pu ma na hana ohumu i make ai o Nasr-ed-Din. E lilo ana ia i hoa paio no ka hooilina o ka nohoalii i keia wa.