Ka Nupepa Kuokoa, Volume XXXV, Number 22, 29 Mei 1896 — Kuu Lei Daimana ua Hala. [ARTICLE]

Kuu Lei Daimana ua Hala.

I ka Lunahooponopono o ke Kuokoa: Welina kaua: —E ahonui mai kou lokomaikai, e hookomo iho i keia wahi hunahuna, ma kahi kaawale o kau papa konane, no kela mau wahi hua e kau ae la maluna. Ua haalele mai kuu lei kuu, kuu milimili i ka poli pumehana o maua na makua, na kupuna, ame ka ohana, a hala aku la ma kela aoao mau o ka honua, k pahu hopu o keia ola ana, a penei ka moolelo o kuu lei daimana: He kaikamahine maikai, kulana hiehie ka mea nona keia moolelo, he aloha ia maua i na makua ame ka ohana, he hoolohe i na kamailio ana a ka makua, he kulana oluolu, he aloha, he hoolohe, a he hookipa malihini, he makamaka ola, a he nui na hoaloha, a he holomua ma na mea i aoia aku iaia mai kona mau la opio mai, a hiki wale aku la no i kona hoi ana aku la ma kela ao ma o. .Ua hanauia o Miss Ella Kahaepalani ka mea nona keaia walohia, mai ka puhaka mai o Miss Zibora Kaaihue, ma Waikakalaua i ka la 29 o Dekemaba, 1880, a ma ka la 28 o Maraki, 1896, i hookuu mai ai oia i keia ola ana, a hoi aku la i ka opu ana ole o ka honua. O ka nui o kona mau mau makahiki o ka honi ana i na ea oluolu o keia ola ana he 15 me 3 malama, a haalele wale mai la no ia maua na makua ame ka ohana, a no ka nui o ko makou aloha paumako ame ka naau i hoopihaia me ka mokumokuahua nona, nolaila, ua haku iho la au i wahi kanikau aloha nona, a oia iho keia: He uwe he kanikau ho aloha keia No Ella Kahaepalani i welo aku la I pulelo aku la hoi ma ka welelau mamakani Ke holo ala i ka moana kai uli kai lipolipo Ke kau ala ka ihu no Parisa No laila ka hae i welo aku la E ike i ka Emepera Napoliona Me ka Ui kaulana Iosepine Emeperesi puuwai olu o Farani No Farani ka luna i kii mai Kulu aku la ke eo i a i ala Oi ala moewaa i ka po nei I ka po a ke aloha ole nele makou Nele iho la makou i ka ike aku I kona kino, na maka i ka noho mai Ka maalo ana mai o ka la welawela O ka la kikiki o Honouliuli Uli hewa no hoi ka ili mala hewa iaia Aloha no hoi ke kula o Hoaeae O ia wahi kula hulili wela nopu i ka la La nui haoaa kakou e hoholo ai E luana ai i na la inea o ia luhi Hala aku la no hoi ia me ke aloha O ia aloha no hoi ka'u e lei nei E kuewa nei i ke ala me ka waimaka Akolu hoi a'u moewaa e ike nei Aia aku la paha oukou i ka nahele o Hihiu

A hihiu no la hoi oukou o aha ina Hele ia i ka la o ko oukou lealea Aloha ino no hoi kuu luhi kuu lei Aia la ke lei ia mai la e ka maukauka Mahiehie wale au ke ike aku Ko kupu ana mai a ohaoha A ulu no a liko a pua a mohaha Manao ae la hoi e kui a lawa a lei A papahi la hoi i ka laula o Ewa nei A lei ae la hoi au ia pua kehakeha Eia ka oe he pua mae wale He pua haule wale i ka lu ia e ka makani E ka opu lokoino ake aloha ole Auwe no hoi kuu kaikamahine kuu luhi Aloha ka uka anu e Ki-oea Oia wahi a kaua i pili ai Aloha Lihue paa i ka uhiwai Aloha o Malamanui ika mauu nene Aloha ke kupukupu e Kanehoa Aloha ke kula e Kanoenoe Noe wale mai la no ia'u ko aloha Aloha ke kai e Kapapapuhi O ia wahi a oukou e hele ai Aloha no hoi ka ia waha lepo o ka aina Oia ia hoolaukanaka o ke kahakai Hiaai wale ke ike aku Na ui holoholo ālanui hao I kuhi no au o oe ia. Nui, nui kuu aloha nou Eia aku ka oe i ka aluka makani I ka puaoa uluahewa i o a ianei Ua hele a enaena na maka i ke ehukai Nonono ula i ka la o Kaiona Hu mai kou aloha no Waiawa Me kou mau hoa imi naauao Hoa holoholo o ka wa kamalii Hoa alo i ka wela o ka la I ke anu hoi a ka mea ua lillii No ke kumu pu kekahi aloha Aloha no oukou a nui loa Eia o Ella Kahaepalani ua haalele mai Ua wehe mai i ka pili hooko-o ia loko Ua pau ke kani a ka manu i ka laau Ke oloke wale la no i paa noni E manao ana no paha ia Kaupe—a Me he kanaka la ka wiliwili e o'i nei Ka hina wale i ke kula o Peekana E uhai ana no paha ia Kualaka—i He alakai hewa nau e ka malie Ua nui aku la no ke Kaiaulu Mai houluulu mai oe i ko aloha Ua hua ka nawao eia iloko Kanikau aloha keia no Kahaepalani Kuu kaikamahine mai ka hale malu i ka leo Oia home a kuu lei e nanea ai Auwe kuu kaikamahine kuu minamina pau ole --- a Kuu kaikamahine mai ka olu kohai o ka manako E walea ana i ke onaona moani o ka pua alani Oia wahi a kaua e luana ai Auwe kuu le-i e, kuu aloha pau ole - a Kuu kaikamahine mai ka malu o ka lau o ka wi Ia wahi a kuu lei e haulani ai Kuu hiapo mai ka makani kupa he Moae

Oia makani kaulana o ka aina e pa nei O ka pa hoi a ka Waikoloa he anu A ka Waikoloa makani o Lihue - e Hu'e mapuna halo'i ka waimaka hanini i o'u nei O ke aloha kai kipa mai i o'u nei Homai ke aloha e wa-hi a paa A hoi ae au he Inuwai mahope E aloha auanei. GEORGE R. KEOMAKA. Honouliuli, Ewa, Oahu, May 7, 1896.