Ka Nupepa Kuokoa, Volume XXXV, Number 15, 10 April 1896 — Page 2
| This text was transcribed by: | Mary Miller |
| This work is dedicated to: | HCSA papa 'olelo Hawai'i |
Ka Nupepa Kuokoa
KE KILOHANA POOKELA NO KA LAHUI HAWAII.
Hoolaha Mana Hooko.
I keia la i hookohuia aku ai o MR. J. K. KAHOOPII i Luna Pa Aupuni no ka Pa Aupuni ma Kaupo, Hana, Maui, ma kahi o Wm. Coates i waiho mai.
J. A. KING.
Kuhina Kalaiaina.
Keena Kalaiaina, Aperila 2, 1896.
2593-3t
Ua hookohuia i keia ia o MR. KAAPUNI i Luna no ka hopuhopu ana i na holoholona aea a helehewa no ka Apana o Honolulu, Mokupuni o Oahu, ma kahi o Mr. Kahanaaupo i waiho mai.
J. A. KING.
Kuhina Kalaiaina.
Keena Kalaiaina,
Aperila 1, 1896. 2592-3
Kuai o ka Hoolimalima o na Aina Aupuni ma na Apana o Hana a me Koolau, Maui.
Ma ka POAONO, ma ka hora 12 awakea, ma ke alo iho o ka Hale Hookolokolo, e kuaiia aku ai ka hoolimalima o ka aina ululaau ma ka Apana o Hana ame Koolau, Maui, maloko o ia mau aina he aneane 7,500 eka, a eia na kumu aelike:
Uku hoolimalima maluna aku o $300 no ka makahiki, e ukuia ana i keia ame keia hapalua makahiki, ma ka hookaa mua.
Manawa hoolimalima--21 makahiki.
A eia hoi na kumu e paa ai ka hoolimalima:
E hiki no i ke Aupuni, i kela ame keia manawa, ke lawe a paa i kekahi mau wahi o ua aina la, no ka pono aina hookuonoono me ka hoemi ole ia nae o ka uku hoolimalima.
Aole e hooholoia ka holoholona maluna o ua aina la.
Aole hoi e okiia na kumulaau maluna o ua aina la, koe wale no ma ka mea kupono no ka pa ana ae i ua aina la, a hana hawai paha.
E komo pu no maloko o ka hoolimalima ka pono alakai wai maluna mai o kekahi aina Aupuni e aku, i mea e pono ai ka pomaikai hookahe wai maluna o ua aina nei i hoolimalimaia.
E loaa no na kii ame na hoakaka e ae, ma ke Keena Aina Aupuni.
J. F. BROWN.
Agena Aina Aupuni.
2592-3
Kuai o na Aina Aupuni ame na Hoolmalima.
Ma ka POAHA, Aperila 23, 1896, ma ka hora 12 awakea, ma ke alo iho o ka Hale Hookolokolo, ma Honolulu, e kuai kudala ia aku ai keia mau aina ame na hoolimalima ma Puna, Hawaii:
1. Aina o Iliililoa, Puna, maloko o laila 75.32 eka.
Kumukuai maluna aku o $301.28
Uku no ke ana ana 70.00
$371.00
2. Aina ma Oneloa, 14.78. Kumukuai maluna aku o $22.17. Ma ke Dala Kuike, Dala Gula o Amerika.
Na Aelike: He Kuike ke Dala, ma ke Dala Gula o Amerika.
3. Hoolimalima o ka apana aina ma Waiakolea, Puna, maloko o laila he 18 eka, oi aku a emi mai, me na i'a ame na epau loko apau, ma ia wahi. E koe nae, he pono alanui, maluna aku o ka aina, a hoea i ka Pa Aupuni. Manawa hoolimalima, he 15 makahiki. Hoolimalima oi aku mamua o $40.00 no ka makahiki, e hookaa mua ia ana i kela ame keia makahiki.
E ikeia no na kii o a aina maluna ae nei, a loaa no na hoakaka piha ma ke Keena o ka Agena o na Aina Aupuni, Honolulu, ai ole ia, ia E. D. Balauwina, Hope Agena, ma Hilo.
J. F. BROWN,
Agena o na Aina Aupuni.
Keena Aina Aupuni,
Honolulu, Maraki 24, 1896.
2591-1m
E NANA MAI I KEIA.
E hoouna pololei mai i na Dla uku Nupepa a Olelo Hoolaha paha, a ano e ae paha, e pih ana i ke KUOKOA ma ka inoa HAWAIIAN GAZETTE COMPANY, aole ma ka inoa o kahi mea e ae. Aole ma ka inoa o ka Luna Nui a Lunahooponopono hoi.
He mea auanei e hauoli ai me ka piha pahaohao no ka poe i loohia i na umii ana a ke nahu hoholo iloko o ka opu, ke ike iho, e loaa no ka hoola hikiwawe ia ana, mamuli o ka inu ana i ka Laau Hooia a KAMALENA. Ma na wa he nui, e hiki ana i keia laau ke hoopau hikiwawe loa i na hoea mua loa ana mai a ka ma'i, ma ka inu ana i keia laau. He 25 a 50 keneta ko ka omole. E kuaiia aku ana e na poe kuai laau lapaau apau, BENSON & SMITH, na Agena ko Hawaii Pae Aina.
NUPEPA KUOKOA
No ka Makahiki $2 00
No eono Mahina 1 00
Kuike ka Rula
PUKA 1 2 3 4 5 6
ANA. Pule Pule Pule Pule Pule Pule
Iniha. $1.50 $2.00 $2.50 $3.00 $3.50 $4.00
2 Iniha 2.00 2.75 3.50 4.00 4.50 5.00
3 Iniha 2.50 3.50 4.50 5.00 5.50 6.00
4 Iniha 3.00 4.00 5.00 6.00 6.75 7.50
5 Iniha 3.50 4.75 6.00 7.00 8.00 9.00
6 Iniha 4.00 5.50 7.00 8.00 9.00 10.00
O na Olelo Hoolaha a pau e hoouna ia mai ana no ka Hoolaha maloko o keia Nupepa, e hoouna pu mai me ka auhau, a ina aole, aohe hookomo ia.
HOOPUKAIA I KA
HAWAIIAN GAZETTE CO
C. G. BALLENTYNE, Luna Nui.
JOSEPH M. POEPOE, Lunahooponopono.
Honolulu, Oahu.
POALIMA, APERILA 10, 1896.
E Ninaninau Kokeia ka Oiaio.
Ua loaa hou mai nei ia makou ka palapala a Akoi (Pake) o Hana, Maui, e pane ana i ka palapala a ka lunakanawai o Hana a makou i hoolaha aku ai. A ke manao nei makou, he mea pono i na poo Aupuni ke haawi i na ninaninau akahele ana i keia kumu e hoohalahalaia mai nei ka lumakanawai o Hana, ina paha he oiaio a oiaio ole na mea e oleloia nei e keia Pake.
Ma ka aoao o ka pono, ke kaulike a me ka maluhia, ke makemake loa nei makou e hooko na Kahu Aupuni, mai ke kiekie a ka haahaa, i ka lakou mau hana me ka hopo ole, ka makau ole, ka hoopili makamaka ole hoopili loaa ole, a ane e ae paha, i mea e hiki ole ai ke haawila ka pono a me ka palekana i kahi kanaka e noho ana malalo o na eheu hoomalu o ke Aupuni Repubalika o Hawaii, ka nana ole ia o kona kulana, he hanohano a he haahaa paha, he waiwai a he ilihune paha. O ka Pono ke hanaia a haule mai a Lani.
Kaiulani--Davies--Repubalika o Hawaii.
Oiai makou e haawi ana i na mahalo ana no ka puka-a-maka maoli ana mai nei o na mea hoike e hoomaopopo mai ana i ko ke "Alii" ka Kaiulani kulana oiaio e ku nei i keia wa, mamuli o na hoike ana mai nei a kona kahu hanai i hilinai nui ia, oia o Mr. Theo. H. Davies, a o ua kulana 'la, oia no ua "Kamaliiwahine" ku ana a apono i ke Aupuni Repubalika o Hawaii nei. Aole hiki ke kanulua ia keia hooia ana i puka mai ke kahu malama ponoi mai o ke "Alii"; aka, ua oi aku nae ka piha hauoli ia, ina no o ke "Alii" ponoi maoli no kai hoike mai ia mea, me ka nihi ole ana mai elike e keia ke ano. E ike auanei ko makou poe heluhelu, maloko o na palapala a ke kahu o ke "Alii," a makou e hoolaha aku nei, ka olelo ia ana o na hana a ka "Moiwahine" Liliuokalani i hana ai, ke kumu i haulehia ai ke Aupuni "Moi," he hana hupo loa ia i hana ia e ka "Moiwahine," a ua lokahi pu o Mr. Davies me ke kulana o keia pepa, mai ka wa i haulehia ai ke Aupuni "Monakia," ma ke ahewa ana, he hana hupo ua hana la a ka "Moiwahine" i hana ai. Ua lilo keia hoike a Mr. Davies i mea e hoomaopopo mai ai imua o ka lahui Hawaii holookoa, ua haalele ke "Kamaliiwahine" Kaiulani i kana mau koi ana no ka Nohoalii o Hawaii.
Ua maopopo hoi ia makou, ua ike o Mr. Davies i kona kuhihewa no kona noke ana i "ka pao i ka huewai a ke kanaka," mamua aku nei, a ke hoomaopopo nei oia ia kuhihewa ona. He maikai kela. A ina e lilo ana kana hooponopono ana i keia wa, i mea e hoonaauaoia ai kekahi hapa o ka lahui Hawaii e noho maopopo ole mai nei, ua haulele maoli ke "Kamaliiwahine" Kaiulani i kona mau pono a pau i ka Nohoalii o Hawaii, alaila, e nui auanei na kanaka Hawaii e alakai ia mai ana e haalele aku i ko lakou mau manao kuhihewa, a malia e o iho ana na kukuna olino o ka malamalama iloko o ko lakou mau houpo, "i hookahi a kakou wai o ka like me kela poe o kakou i kakou aku ia i ke Aupuni," alaila, ua manao makou, ua waiwai maoli nei mau hoike ana a me nei mau dala i lu la aku la, me ke "ka-ka-ii" hou ole mai.
Ia makou no hoi i hoomaopopo pu iho ai i na kiina a me na kikoo olelo ana o na palapala i hoikeia ae la, aole loa e hiki ia makou ke olelo iho, ua lawa ia mau hoike ana imua o na kanaka Hawaii e poipu ia nei e na hoopululuhi ana a na anao makee "Alii," ua haalele io o Kaiulani i kana mau koi ana no ka Nohoalii o Hawaii.
E hauoli auanei makou, no ka hoea ana mai o ka la, e hiki ai i ko Mr. Daives, oluolu a lokomaikai, e haawi mai i kekahi palapala akea imua o ka Lahui Hawaii e hoomaopopo ana no ke k@ o ke "Kamaliiwahine" Kaiulani a me ka Nohoalii o Hawaii, ma ke ano, na haalele maoli o Kaiulani i kana mau koi ana no ka Nohoalii o Hawaii, aole hoi e pono na kanaka e kuhihewa iki, elike me ia a lakou e kuhihewa nei i keia wa, aia no o Kaiulani ma ka aoao e koi ana e kukulu hou ia ka Nohoalii o Hawaii.
No ka pono ame ka pomaikai o ke Aupuni keia a makou e hoomaikeike nei i keia manao, a no ka pono pu no hoi kekahi o ka Lahui Hawaii.
KA MANAO O T. H. DAVIES.
KAIULANA A ME KA LAHUI HAWAII.
O ke Aupuni Moi o Hawaii, ua pau loa!
Oni i ka Mole ke Aupuni Repubalika!
Maloko o ka nupepa P. C. Advertiser o ka Poakahi nei, Aperila 6, 1896, i ike iho ai makou i kekahi mau palapala i kakauia e Mr. Theo. H. Davies, ma na la mua o ka makahiki 1893, oiai oia ma Enelani a he mau palapala hoi ia i kakauia aku e ia (Mr. Theo. H. Davies) ia Kauka Mott-Smith a Wasinetona, no ka mea e pili ana i ke Aupuni "Alii" o Hawaii nei. Ua hoike ae nohoi ua nupepe P. C. Advertiser nei, ma ka wa i halawai aku ai kona mea kakau me Mr. Davies ma ke ahiahi o ka la ana i ku mai ai ianei, ma ka malama aku nei o Feberuari, mahope iho o na kukai kamailio ana mawaena o ka mea kakau nupepa ame ia (Mr. Davies), ua olelo mai ua Mr. Davies nei i ka mea kakau nupepa, ma ia wa, aole ia e hoolaha i na mea a laua i kamilio ai ma ia wa a hiki i ka wa e ae ai oia (Mr. Davies) e hoolaha akea ia ae na mea i kamakamailioia ma ia wa.
Ma ka wa i halawai pu ai ka mea kakau nupepa, ma kela manawa i oleloia ae nei me Mr. Davies, ua ninau aku ka mea kakau nupepa iaia no kona kulana e ku nei, ma ka mea pili i ke Aupuni e ku nei i keia wa, a pela pu hoi me ko Kaiulani kulana, ma ia ano hookahi; a no ka mea hoi kekahi e pili ana i kana mau keehina i lawelawe ai ma ka makahiki 1893, iaia ame Kaiulani i holo mai ai i Amerika, ka hana hoi i hoike puka-a-maka loa mai ai i kona manao e hoonoho ia Kaiulani maluna o ka "nohoalii" o Hawaii, malalo o ka malama ana a kekahi Kahu Aupuni. A ua hoike mai hoi ua nupepa la (P. C. Advertiser) i ko Mr. Davies hooia ana aku imua ona, me ka maopopo lea a hoonalonalo ole hoi i ko Kaiulani kulana oiaio e ku nei imua o ka Repubalika o Hawaii, oia hoi, wahi a kona (Mr. Davies) manao, "aohe me e kanalua ai no kona (Kaiulani) kupaa ana (loyalty) mamuli o ke Aupuni o Hawaii." A mahope iho o keia ua hoolahaia ae la na palapala a Mr. Davies i kakau ponoi ai ma Enelani, ame na olelo hoakaka ana imua o ka mea kakau nupepa, a no ka pomaikai o na poe heluhelu o ke "Kilohana Pookela o ka Lahui Hawaii" ke unuhi mai nei makou ia mau mea a hoike aku imua o ko makou poe heluhelu, oia hoi, ka Lahui Hawaii.
"Ano koke iho nei no i poloaiia mai ai au, ma ke ano oluolu loa, e haawi aku i na hooia ana no ka mea e pili ana i ke kulana kalai aupuni o ke kama'liiwahine Kaiulani. Ua pane aku au ma ke ano penei, elike me ka'u i hoomaopopo ai, ua hoomaopopo ke kama'liiwahine Kaiulani ua pili mai no kona kulana noho makaainana pili aupuni ana (allegiance) i ka lahui holookoa, aole i kekahi aoao kalaiaina maloko o keia mau mokupuni; ua ike hoi oia i ka Repubalika, mai kona wa i ikea ai e na mana aupuni kuwaho, ma ke ano o keia wale no ka "Mana Aupuni ku i ke Kanawai ma Hawaii nei," a aole hoi he la mahope o ka la 17 o Ianuari, 1893, i ku ai ke kama'liiwahine ma ka aoao kokua i kekahi ohumu kue i ka Moiwahine a i ka Repubalika hoi, a i ae ai hoi e lilo oia i moho no kekahi aoao kalaiaina, i lilo ole ai ia i aoao i komohia holookoa ai ka lahui holookoa, ina no paha he aoao kalaiaina heluna nui ia o na kanaka.
"Ua lilo keia i mea kamailio nui ia maloko o ka Ahaolelo, a me na nupepa nohoi, a i mea e hoopauia ai ke kuhihewa e pili ana no ia mea, ke manao nei au he mea e pono ai ke kama'liiwahine, ame a'u iho nohoi, e hoolaha akea aku au i kekahi palapala, i loaa ole ai ia'u ka hiki ana e hoolaha akea aku, oiai hoi ka wa e ola ana o Dr. Mott-Smith, a mamua ae nohoi o ka wa i haalele ai ka Moiwahine (Liliuokalani) i ka nohoalii. Na'u no i kakau i keia palapala ma ka wa koke no i loaa ae ai ia'u ka lono no ka hookahuli Aupuni o Ianuari, 1893, a i kakauia aku hoi i ke Kuhina Hawaii ma Wasinetona, a eia na olelo:
LIVAPULU, Ian. 31, 1893.
E Mr. Smith, Aloha:--He mea oiaio, he ano nui loa maoli ka nuhou mai Hawaii mai, a, aole nohoi ia he nanehai palupalu wale o kona weheia ana, elike me ka manao o na hoa'loha o kaua ma Honolulu. Ua hana hupo loa ka Moiwahine, a manao au, ua nele ia i kona nohoalii no ka wa mau loa. A ma ia wa hookahi no, ua ikea ke Kumukanawai o 1887, ma ke ano he Kumukanawai paakiki ia no ka hana ana, a ua nui ko'u mamina i ka Moiwahine a pela nohoi i ka Aha Kuhina o G. W. Wilikoki. Aole i ike iki ka Moiwahine i kana mea e hilinai aku ai, a nolaila kaukai ponoi iho la ia maluna o kona noonoo maikai ole, a ua like iho la paha ia ma ke bipi bulu iloko o ka upena.
"Aka nae, ua hala aku ia ia, a koe wale no, ma ke ano, he haawina hoonaauao mai ia, a o ka mea nui i keia wa, oia ka noonoo ana ame ka hana pu ana o na mea apau, he mau pono ko lakou ma Hawaii, ma ke ano pilikino a waiwai paha. Aka nae, o na kanaka elima, ma ke alahele e hoea ae ai i Wasinetona, ua like ole ko lakou mau noonoo me ko'u, ma kekahi mau mea, aka nae, ua hookahi pu no kakou apau, ma ka iini ana, no ka holomua o Hawaii.
"A pehea la auanei e loaa ai ia mea ia kakou?
"E ae mai paha ke Aupuni o Wasinetona (ka Aha Kuhina ma Wasinetona) i ka leo noi no ka hoohui, a i ole ia, e hoole paha lakou. Manao nae au e hoole ana lakou, a i ole, e hoopanee ana paha lakou i ka olelo hooholo no ia mea; aka, ina lakou e ae ana, e hoomaopopo pu iho lakou, aole loa e loaa ana ke koho balota ana a na Hawaii maoli no ke apono ana ia mea, me ka nana ole ia mai o na hoakaka kumu ana, a o na hana kipe paha kekahi; a ke ole e loaa i koho balota ana, pehea la auanei e hololea ai ka hana hoohui aina? Aole hiki ke nana ole ia aku na kanaka Hawaii, a o na pulama makahehi ana a na kanaka e ae, e mau ana no ia me lakou.
"Ina hoi e ae ole ana ke Aupuni o Wasinetona i keia leo poloai, alaila, heaha la auanei ke ano o na launa noho ana mawaena o na kanaka maoli ame na haole? He kuee mau loa no ia.
"Ma ko'u manao, hookahi wale no hana e pau ai keia kuee, a oia maoli no ka mea e hiki ai ke hanaia me ka hololea.
"E kaheaia ona Ahaolelo o na poe koho balota apau, a waihoia aku imua o lakou kekahi kumukanawai i hooponoponoia, e haalele ana hoi ka Moiwahine i ka nohoalii a e noho koke aku ke kama'liiwahine Kaiulani ma ia wahi.
"Ua kokoke e pau ka huli naauao ana a ke kama'liiwahine, no eha makahiki ma Enelani, a ke nana aku nei ia no ka la e huli hoi aku ai oia no Hawaii i keia makahiki, mahope iho o kona holo ana aku i Wasinetona. Ua manaoia i kekahi wa, e kaa holookoa ana ke kama'liiwahine malalo o na alakai Pelekane ana, he manao kuhihewa loa ia. He eha ona mau makahiki o ka noho malie ana ma ka poai home, malalo hoi o na malama ana a na lede Karistiano maikai a naauao, no lakou na iini ana, e hoonaauao iaia a kupono no na hana oolea o kona kulana o keia mua aku. Ua manao paa loa au, ma ka wa e pii aku ai ke kama'liiwahine Kaiulani a noho maluna o ka nohoalii, e loaa ana he hauoli nui i na kanaka apau o kela ame keia ano ma Hawaii. O ko'u kulana kahu malama nona, oiai kona mau makahiki oo ole ma keia aina, oia ka mea i hiki ai ia'u ke hoike kanalua ole aku no na manao o ke Kama'liiwahine Kaiulani no ka mea e pili ana i na ninau pili kalaiaina o kona aina oiwi, a e hooia aku hoi, aia mau no kana mau hooikaika ana (influence) ma ka aoao o ke aupuni maikai, hoopono, ka holomua o na kanaka apau, ame ka hoonipaa ana i ka noho'na hoa'loha mawaena o na kanaka maoli ame na haole.
"O na Komisina elima i keia wa ma ka alahele i Wasinetona, he poe hoa'loha io maoli lakou no'u a nou nohoi, a ke manao nei au e komohia ana no iloko o lakou ka manao e ae mai i ka'u kumuhana, ina hoi ma ko lakou noonoo a ike iho, he oi aku keia o ka maikai mamua o ka lakou kumuhana i manao ai. A ma ia ano, e hiki no ke waihoia aku keia kumuhana i ka Ahaolelo Kuikawa ma Honolulu, a ma ke apono ana paha hoi a na poe koho balota.
"Ua ike maopopo no au i na hoa o loko o ka Aha Kuka ame ka poe koho balota, e hiki ai ia'u ke manaoio iho e aponoia mai ana no keia kumuhana me ka lokahi e lakou.
"Ina manao oe he mea e kokuaia ai ma o keia mau hookauwaia ana ma Wasinetona, ma ke ano ke wahaolelo kuikawa au no ke Kama'liiwahine Kaiulani, ua makaukau au no ka holo ana aku ilaila ke kauoha mai oe.
"Owau ilio no, e Dr. Smith aloha, kou oiaio loa.
(Kakauinoaia) THEO. H. DAVIES."
"Ka Mea Mahaloia J. Mott-Smith, ko ka Moiwahine Hawaii Elele Kuhina Mana Nui, a pela aku, ma Wasinetona, Amerika Huiia."
Mahope aku o keia palapala ae la, ua kakau hou aku no au, ma ke ano maiu, ia Dr. Smith a ke lawe mai nei au i na mea ano nui, penei:
"Feberuari 1, 1893.
E Dr. Smith aloha--Ke manao nei au e ike ana oe ma keia palapala ia oe * * * i kekahi mau manao ano nui maoli, a manao au he mea pono ke hoolaha akea ia aku ia mau mea.
"Ua maopopo ia'u e minamina auanei kela ame keia hoa'loha oiaio o Hawaii ina e hanaia ka hana pupuahulu me ka noonoo piha ole ana i keia mau kumu.
* * * * * *
"Ke koi ikaika loa nei au e kukalaia ke Kama'liiwahine Kaiulani i Moiwahine, me kekahi Aha Kuka Kahu Aupuni, a o Mr. Dole no ke poo o ia Aha--no ka manawa paha o ekolu makahiki, a e loaa koke auanei ka ae ana o na kanaka maoli, a me he mea la o na haole nohoi kekahi. Ina hoi aole e hanaia keia, pehea e hiki ai ia oe ke kapae ae i ke ulolohi poluluhi (a ulolohi pilikia nohoi) no na lawelawe kuikahi loloia hili ana me ka Aha Kuhina e pau koke aku ana, a pela hoi me ka Aha Kuhina e komo mai ana, ma Wasinetona, a peia pu hoi me ka loaa ana mai o ko na kanaka Hawaii apono ana mai ia mea? Ina e aponoia keia kumuhana, ke ike e nei au i ka hoihoila ana mai o ka maluhia, a ina hoi ma kekahi alahele okoa aku, aohe au i ike iki i ka holo malaelae ana, aka, he kulana poluluhi maoli ka'u e ike nei no na mea apau he mau pomaikai dala ko lakou ma na mokupuni.
"Ina e loaa mai ia'u he lono uwea telegarapa mai a oe mai, ua makaukau au e holo aku maluna o ke "Gallia," a ma kekahi manawa e ae paha, ke haiia mai ka lohe ia'u i elua la mamua ae.
"E hana aku oe elike me kau i manao ai he pono me kuu palapala, a ma ko'u manao, no ka pono maoli o Hawaii, o kuu palapala o ka la o nehinei (me ka waiho ana ae hoi i kuu inoa) e pono no ke hoolaha akea ia aku ma kekahi ano okoa nae. Ke waiho aku nei nae au i kou noonoo maikai.
"O ke kulana e ku nei ma Honolulu i keia wa, he kulana "kuikawa" ia, a e pau koke ana no ia. A ina e mau iho ana no kela poe kanaka eha ma ka Oihana Aupuni, e loaa ana ka hooponopono aupuni maikai ana, aka, heaha ia ka mea e uhai aku ana ia lakou? He mea pono ke loaa mai ia kakou ka manao maikai o na kanaka maoli, a i ole ia, e uku kakou i puulu koa lawa pono i mea e hookikinaia ai lakou a loaa mai ia mea, a ua hopohopo au, e loaa ana ia kakou he manuunuu wale o na hoouluku haunaele ana iloko o ia wa.
"Ke ike nei au, he mea ano nui loa e noonoo pono loa ia keia mau manao, a ke hilinai nei maluna o oukou e waihoia aku ia mau mea ma kekahi ano holopono e ae, ina nohoi aole oe e apono iho ana ia mau manao.
* * * * * * *
(Kakauinoia) THEO. H. DAVIES."
"I ka Mea Mahaloia J. Mott-Smith, ko ka Moiwahine Elele Kuhina, etc., ma Wasinetona, Amerika Huiia."
Ua kakauia keia mau palapala me ka ike ole o ke Kama'liiwahine Kaiulani, a he noi kuio wale no ke ano o keia imua o na Komisina, ma ka aoao a'u i hoomaopopo maoli aioia ke keehina hololea e loaa ai ka maluhia no Hawaii, a ua manao au ua loaa mai no ka'u mau hoakaka i na Komisina, aka, aole nae hoi i hooiaia ae ka loaa ana mai o ia mau mea ia lakou, koe wale no ka hoikeia ana ae ma o kekahi telegarama i kakauinoa ole ia, oia keia:
"Ua hooliloia na mokupuni: Aole no i hooneleia ke Kama'liiwahine."
Ua ikea nae, mai kekahi poe mai, ua pololei ole keia telegarama, ua kakau aku la au i ke Kama'liiwahine, me ka hoike ana aku, hookahi wale no mea hiki ia'u ke hana nona, a hookahi wale nohoi mea hiki iaia ke hana no kona lahuikanaka. Ao aku la au iaia e hele pu oia me a'u i Wasinetona. He mea maopopo loa no nae ke kuemi hope ana o ka noonoo o kekahi kaikamahine opiopio, elike nohoi me ka ke Kama'liiwahine i hana ai; aka, ua pane mai no nae ia:
"Malia paha e olelo mai ana na kanaka Hawaii i kekahi i, 'E Kaiulani, ua hiki nohoi paha ia oe ke hoopakele ia makou, aole nae hoi oi i hoao.' E hele no au me oe i Wasinetona."
O keia ae la ka hoakaka maopopo o ke keehina hana kalaiaina hookahi a ke Kama'liiwahine i lawelawe ai mahope mai o ka hookahuli Aupuni o 1893, a o ke ko'iko'i o ia a'o ana ku iaia, ua kau holookoa iho ia mea maluna o'u ponoi iho.
I do not believe that any man or woman of any party will say that the step taken by Kaiulani was unworthy of the honour, the dignity, the patriotism of a Princess--
I am, Sir,
Your obedient Servant
Theo. H. Davies
KE KAKAULIMA PONOI KEIA O MR. THEO. H. DAVIES MALOKO O NA PALAPALA ANA I HOOUNA MAI AI I KA NUPEPA ADVERTISER--KA UNUHINA HAWAII MALALO IHO NEI.
Aole o'u manaoio, e haawi ana kekahi kanaka makee hanohano, mawaena o kou poe heluhelu, he oleloao okoa aku i ko keia ae la. Aole nohoi o'u manaoio e olelo mai ana kekahi kane a wahine hoi o loko o kekahi aoao kalaiaina, o ke keehina hana i lawelaweia e Kiulani ua ku ole ia i ka hanohano, ke kilakila, (ame) ke aloha aina o kekahi Kama'liiwahine.
Owau iho no,
Kau kauwa hoolohe,
THEO. H. DAVIES.
Craigside, April 4, 1896
Na Auhau Aupuni.
Oiai ke Aupuni e haawi ana i kana mau noii ana, ame na huli ana no na kumu e hoouluia mai ai he mau loaa mahuahua ma ka Auhau Aupuni, aole paha e hewa ana makou ke haawi aku i wahi malamalama ma ka olelo elike me keia, "Mai hoohala i ka pahu ana i ka ulu i ke alo." A ina paha e ninauia mai ana makou, no ke ano o keia mau mamaia-olelo a makou i hoike ae la, alaila, eia ka makou pane: Aia imua ponoi o ke Aupuni i keia wa he papa hoonohonoho dala maopopo loa i lilo i mau loaa makahiki moakaka no kekahi mau luna Aupuni, e hele ana mai ka Peresidena, na Kuhina, na Lunakanawai a hoea i na paahana ame na limahana Aupuni uku haahaa. O keia na ulu i ke alo ponoi o ke Aupuni, a no neia ano ulu ka makou i hoomahui ae la, "Mai hoohala i ka pahu ana i ka ulu i ke alo." Aole makou i ike iki heaha la hoi ke kumu i kupono ole ai ke hoomakiliia mai he mau wahi hunahuna materia no ka pomaikai Auhau Aupuni mailoko mai o keia mau haawina maopopo. Malia nae paha e oleloia mai, ina pela e hanaia ai, alaila, e auhau like ia ana na loaa uku la, uku mahina, a uku makahiki o na mea apau e imi waiwai a imi ola ana iloko nei o ka aina, pau pu na lunahooponopono nupepa, na loio, a pela wale aku. Heaha la ka hewa o ia? Aka, e hanaia nae keia kulana auhau loaa makahiki o ke kanaka elike nohoi me ke kulana auhau o ka waiwai io o ka waiwai paa o ke kanaka, oia hoi, e unuhiia ae noloko mai o ka huina loaa holookoa o ke kanaka i kela ame keia mahina, a makahiki paha, he huina dala i ku ole i ka auhauia. Penei: Ina o ka loaa makahiki o ke kanaka he $1,200, elike ana ia me ka $100 ka averika no ka malama, alaila, e unuhila ae noloko mai o ia huina he $600, a koe aku he $600, a maluna o ia huina e auhauia ai oia. A e oleloia, o na poe keia ma ke ano pahana maoli, a poe luna Aupuni paha, e lawelawe ole ana malalo o na hana laikiniia, elike me na halekuai, na kalepa kamano, loio e uku ana i laikini. No keia poe i laikiniia aole auhau no ko lakou mau loaa makahiki, oiai ma ka laikini ko lakou haawi pomaikai ana i ke Aupuni. I mea e maopopo hou ai ko makou mau manao ma keia alakai houlu auhau ana, he mea pono ke nanaia iho keia papa hoike malalo iho nei, ma ke ano i kumu hoohalike:
Na poe auhauia. Na loaa a uku Huina Huina
makahiki. unuhila. auhauia
Peresidena. 21,000 600 20,400
Kuhina 4,500 600 3,900
Lunakanawai 5,000 600 4,400
Lunakanawai Apana. 1,500 500 900
Lolo 5,000 (aole) He laikini kona.
Makai 360 (aole) aole auhau
600 " " "
Poo La 480 " " "
Luna M. Nupepa 720 600 120
E ikeia auanei ma keia papa hoonohonoho a makou e panee aku nei imua o ko makou poe heluhelu, a imua nohoi o na "Solona" o ka aina, aia he luahuna waiwai nui o na auhau Aupuni e loaa ana maluna o na poe he mau loaa makahiki ko lakou. Malia nae paha, e oleloia mai, he mau limahana na luna Aupuni no ka lehulehu, a no ia kumu he mea maikai ole ka auhau ana ia lakou ma keia ano. Aole o makou hoo@ia mea; aka, oiai nae e ku ana ia mai he dala i hoakoakoaia iloko o k@ huina waiwai maopopo, ma ke @ maoli, elike me ka uku makahiki @ $4,000, a pela aku, he waiwai lewa @ ia, e hiki ole ai ke hoopakeleia maloko aku o ka auhauia ana, ina @ nanaia ka mea pololei a oiaio maoli @ a i mea hoi e hoopakeleia ai ke Aupuni mai ke komo nui ana aku iloko o ka @ nui kuahewahewa, elike me ia e ike @ nei i keia wa. O ka makou keia, @ ka poe kau kanawai koe.
OKALA HEU PAPIPI NA PUKIKI.
Ka Mokomoko me na Makai.
Ma ke ahiahi la "Sabati Kari@ano" aku nei, Aperila 5, ua ala ae he haunaele ma Kahehuna ae ne@ mawaena o na Pukiki, a ua hoou@ ia he lono telepone i ka Oihana Makai, ma ka Halewai. Mai laila ma hoi, ua hoounaia aku kekahi mak@ kau lio no ke kahua o ka haunae@ oia o A. Becker. Iaia i hoea aku ai ma laila, ike iho la ia he kanaka ona ka mea nana e kapeku ana kela mau hana hoohaunaele mawaena o na Pukiki. Olelo aku la ka makai iaia e hoi oia i kona hale, aka, ua hoole mai oia. Aka, ua hopu ia keia kanaka ona a lawe ia i ka Halewai, no kona hoeha ana i kekahi keiki Pukiki. Maho e iko o keia, ua hoi hou aku na makai kau lio no ke kahua o ka haunaele, a ma laila hui hou me kekahi mau makai kaulio e ae elua. Na keia mau makai i hoike mai, ua hoao laua e hoopau i ka puuluulu ana o na Pukiki, aole nae o lakou ae mai. E kuku kailalani mai ana ua poe Pukiki nei mauka mai, ma kekahi pili pa pine, a he heluna nui hewahewa o lakou ma laila. Ua hoikeia @ hoi na Pukiki hooulu hoo-na-na mawaena o ia puulu, a ua haawi ae la ka Lutanela o na makai e hopu ia kela poe. I ka wa nae a na makai i hooko aku nei i ke kauoha, o ka wa ia i ulu koke mai ai he haunaele nui.
Ua hahaki koke mai la na Pukiki i na pine laau o ka pa, a hoomaka iho la ka paio ana. Lele na laau, lele ka pohaku, a me na puupua lima a na Pukiki maluna o na makai, pela no hoi ka na makai maluna o ua Pukiki, "Ua haunaele maoli Ewa i ka Moae." Oiai keia uluaoa e nee ana, ua loheia aku ia ke kani ana ae o ka pu panapana a kekahi makai. Ua hele loa aku ia ka haunaele i ka nui, oiai na kanaka e nee ana i o a ia nei, me na kupaka ana me ke ahiu. Ma kela wa hoi i hoea hou aku ai kekahi poe makai kaulio a me Peresidena Dole, a hoopuehu aku la i na Pukiki. Ua hopuia he ehiku Pukiki, no lakou na inoa o Frank Fereira, M. Caravalho, Antone Enas, J.R. Muniz, C. Rodriques, Manuel Juan a me Manuel Jardeu. Elua hoi mau Pukiki i hoopalupalu ia e na newa a na makai i laweia aku no ka halemai Moiwahine.
Ua oleloia he kaa hehihehi wawae ke kumu o ka ulu ana o ka haunaele, mamuli o ke kaili ia ana e ke kanaka ona, nana i hooulu mua i ka haunaele, mai kekahi keiki Pukiki mai.
PAPA KUHIKUHI.
KANAWAI ADVERTISER KUOKOA
8--Kanawai 7. Poanono Mar. 28; Poalima A@
9--" 8. Poaha Apr. 9; " "
10--" 9. " " " "
11--Olelo Hooholo Hui
Ma ke "Sabati Karistiano" aku nei, oia hoi, ka La Pakoa, wahi a kahi poe, ua malamaia na anaina haipule maloko o kekahi mau luakini o loko nei o Honolulu me ke anoano, iliilihia ame ka maikai.
Ua lauahea ae ka lono ma ka Poalua nei, maloko o kela kulanakauhale, ua lilo ae nei ka Halekuai o Walakahauki ma Alanui Papu ia Mr. E. W. Jordan, ma ke kuai. He lima lawelawe kahiko oia no ia halekuai, me he mea la, ua hoomaka kona neho ma laila mai ka makahiki 1869-70 mai paha, a hoea mai i keia wa i lilo holookoa ae la iaia.
He mea pono i kela ame keia ohana ke loaa ona laau lapaau mama no na ma'i o ka opu. I laau lapaau puhili ole no ka "Moku ino loa o lepo" (Diarhea) Nahu, Umii, Kolera ame na ma'i apau o ka opu, aole he laau lapaau oi aku o ka maikai, elike me ka PERRY DAVIS LAAU PENIKILA (Pain Killer). Ua lawelawela keia laau no na makahiki he kanalima, a ke hana mau ia nei i kela ame keia ia, ma na aina apau o ka honua nei. O ka Hui Kua Laau Lapaau o Holister, ka Agena